Lès 5

*23 – 29 di yüli

Kalor Ekstremo
Sabat 23 di yüli
Lesa pa e Estudio di e Siman Akí:

Génesis 22; Hos. 2:1–12; Job 1:6–2:10; 2 Kor. 11:23–29; Isa. 43:1–7.

Teksto di Memoria:

“Ma tabata e boluntat di SEÑOR pa herid'E; El a hasiE sufri. Si E entregá Su mes komo un ofrenda pa kulpa, E lo mira Su desendientenan, E lo tin bida largu; i e boluntat di SEÑOR lo prosperá den Su man” (Isaias 53:10).

Miéntras esposa di e famoso eskritor kristian C.S. Lewis tabata muriendo, Lewis a skirbi: “No ku mi ta (mi ta kere) den hopi peliger di stòp di kere den Dios. E peliger real ta di yega na kere kosnan asina teribel tokante djE. E konklushon ku mi tin miedu di dje no ta ‘Asina ta ku no tin Dios, despues di tur kos’, sino ‘Asina ta ku ta asin’aki Dios ta realmente.’ ”—A Grief Observed (New York: Harper Collins Publishers, Inc., 1961), p. 6, 7.

Ora kosnan bira realmente doloroso, algun di nos ta rechasá Dios kompletamente. Pa otronan meskos ku Lewis, tin un tentashon pa kambia nos bista di Dios i imaginá nos mes tur sorto di kosnan malu tokante djE. E pregunta ta: Kon kayente e por bira? Kuantu kayente Dios ta dispuesto na riska pone Su pueblo pasa aden pa asina logra Su propósito final di forma nos den e “imágen di Su Yu?” (Rom. 8:29).

Un Bista Riba e Siman:

Dikon bo ta kere ku Dios ta dispuesto pa riska pa esnan ku E ke pa konos’E i stim’E komprond’E robes? Kuantu bo ta kere ku Dios ta dispuesto pa bo komprond’E malu pa asina moldia bo den e “imágen di Su Yu”?

*Studia e lès di e siman akí pa prepará pa Sabat, 30 di yüli.

Djadumingu

24 di yüli

Abraham den e Krisol

Lesa Génesis 22. For di nada i sin splikashon, di ripiente Dios ta yama Abraham pa ofresé su propio yu komo un sakrifisio kimá. Bo por imaginá bo kon Abraham mester a sinti? Tabata un idea totalmente repugnante ku un Dios santu lo mester pidi pa bo sakrifiká bo propio yu. Asta si Abraham a pensa ku esaki tabata aseptabel, ke tal di Dios Su promesanan di un herensia? Sin su yu, e promesa lo a bai.

Dikon Dios a pidi Abraham pa ofresé e sakrifisio akí? Si Dios sa tur kos, kiko tabata e punto?

Dios Su petishon i su momento no tabata kasualidat. Enbèrdat, e tabata kalkulá na eksaktamente e angustia di mas profundo posibel, pasobra “Dios a reservá Su último tèst, esun di mas difísil pa Abraham te ora e karga di añanan tabata pisá riba dje, i e tabata anhelá pa sosiegu.”—Ellen G. White, Patriarchs and Prophets, p. 147. Esaki tabata un tèst di un Dios rabiá? Pa nada, pasobra “Dios a permití e agonia ku el a soportá durante e dianan skur di e prueba teribel ei pa e por a komprondé, for di su propio eksperensia, algu di e grandesa di e sakrifisio hasí pa e Dios infinito pa redenshon di hende.”—Patriarchs and Prophets, p. 154.

Esaki tabata djis un tèst; Dios nunka tabatin intenshon pa Abraham mata su yu. Esaki ta enfatisá algu hopi importante tokante e manera ku Dios ta traha tin biaha. Dios por pidi nos hasi algu ku nunka E tin intenshon pa nos kompletá. E por pidi nos pa bai un kaminda ku nunka E tin intenshon pa nos yega. Loke ta importante pa Dios no nesesariamente ta e fin, sino loke nos ta siña miéntras E ta reformá nos a traves di e proseso.

Hesus por tabata pensando tokante e eksperensia di Abraham ora El a bisa e hudiunan: “Boso tata Abraham tabata regosihá pa mira Mi dia; i el a mir'é i a keda kontentu.” (Juan 8:56). Abraham por a omití riba e persepshon akí, i rechasá e instrukshonnan komo di Satanas. E klave na e sobrebibensia i siñamentu di Abraham a lo largu di henter e proseso tabata su konosementu di e bos di Dios.

Kon bo ta konosé e bos di Dios? Kon bo sa ora Dios ta papiando ku bo? Kiko ta e formanan ku E ta komuniká Su boluntat na bo?

Djaluna

25 di yüli

Israel Rebelde

E storia di Hoséas tin algun lès poderoso pa siña nos. E situashon di Hoséas ta remarkabel. Su esposa, Gomèr, ta kore bai i tin yu ku otro hòmbernan. Aunke e ta seksualmente infiel, Dios ta yama Hoséas pa tuma su esposa bèk i demostrá su amor kompletamente na dje atrobe. E storia ta nifiká komo un parabel tokante Dios i Israel. E israelitanan a bandoná Dios i tabata prostituyendo nan mes spiritualmente na otro diosnan, pero Dios ainda tabata stima nan i ker a demostrá Su amor na nan. Pero wak e métodonan di Dios!

Lesa Hoséas 2:1–12. Ki métodonan Dios ta bisa ku E lo usa pa hala Israel bèk na Su mes? Kon e eksperensianan akí lo a sinti?

E storia akí ta lanta dos asuntu importante tokante e manera ku nos ta eksperensiá Dios ora E ta tresiendo nos na repentimentu.

Di promé, nos ta kore riesgo di no rekonosé ku Dios ta obra. Ora Israel a pasa dor di eksperensianan asina difísil i doloroso, kisas e por tabata difísil pa nan rekonosé ku nan Dios tabata obrando pa nan salbashon. Ora sumpiñanan skèrpi ta blòkia nos kaminda òf ora murayanan ta rondoná nos asina ku nos no sa na unda nos ta bayendo (Hos. 2:6), esaki ta Dios? Ora nos nesesidatnan básiko disparsé òf nos ta brongosá (Hos. 2:9,10), nos Tata por ta meimei di tur esaki? Bèrdat ta ku loke sea nos ta sinti, Dios semper ta obrando pa trese nos pa repentimentu, pasobra E stima nos asina tantu.

Di dos, nos ta kore rísiko di mal komprondé Dios ora E ta obra. Nos por rekonosé ku Dios ta obra, pero nos no ta gusta loke E ta hasiendo. Miéntras nos ta sintiendo heridá i bergonsá, ta fásil pa kulpa Dios pa ta kruel, pa no intervení, òf pa no tin kunes. Pero Dios semper ta obrando pa renobá nos a traves di Su pakto di amor.

Lesa Hoséas 2:14–23. Kiko e pasashi akí ta revelá tokante Dios? Pidi Spiritu Santu mustrabo si bo tabata koriendo pa Dios den kualke área di bo bida. Si bo ta konvensí ku bo tabata, dikon warda pa pasa dor di e krisol? Kiko ta wantando bo pa someté tur kos na Señor awor?

Djamars

26 di yüli

Sobrebibí A Traves di Adorashon

Lesa Job 1:6 – 2:10. Kiko a kousa Job su sufrimentu?

Tin algu asombroso akinan. E angelnan ta bin pa mira Dios, i Satanas ta bin huntu ku nan. Dios ta puntra Satanas unda e tabata, i Satanas ta kontestá ku "For di bai bin riba tera i di kana pariba pabou den djé." (Job 1:7). Despues Dios ta plantia e pregunta akí: “Bo a konsiderá Mi sirbidó Jòb?” (Job 1:8). E pregunta mes no ta remarkabel; loke ta remarkabel ta Esun ku ta hasié. No ta Satanas ta esun ku ta señalá Job komo un suheto pa eksaminashon, ta Dios. Sabiendo eksaktamente loke ta bai sigui, Dios ta yama Job na atenshon di Satanas. Abou riba tera, Job no tin apsolutamente niun idea kon kayente su krisol ta na punto di bira. I aunke ta hopi kla ku ta Satanas, no Dios, kende ta kousa e sufrimentu di Job, ta kla tambe ku ta Dios kende ta duna Su pèrmit eksplísito pa Satanas destruí Job su poseshonnan, yunan, i su propio salú físiko. Si Dios ta dunando pèrmit pa Job sufri, ki diferensia ta hasi ku sea Dios òf Satanas ta kousa personalmente e sufrimentu? Kon Dios por ta hustu i santu ora aktivamente e ta permití Satanas kousa Job asina doló? E situashon akí ta un kaso spesial, òf e ta karakterístika di e manera kon Dios ainda ta trata ku nos awendia?

Den Job 1:20,21, kon Job ta reakshoná riba e pruebanan?

Ta posibel pa reakshoná riba sufrimentu asina den dos forma. Nos por bira amargo i rabiá, birando nos lomba pa un Dios ku nos ta kere ta kruel i ineksistente, òf nos por tene mas duru na Dios. Job ta dil ku su katástrofe dor di keda den Dios Su presensia i ador’E.

Den Job 1:20,21 nos ta mira tres aspekto di adorashon ku por yuda ora nos ta den angustia. Di promé, Job ta aseptá su impotensia i ta rekonosé ku e no tin niun reklamo di nada: “Sunú mi a sali for di barika di mi mama, i sunú lo mi bolbe einan…" (Job 1:21). Di dos, Job ta rekonosé ku ainda Dios ta den kontròl total: “SEÑOR a duna i SEÑOR a kita.” (Job 1:21). Di tres, Job ta konkluí dor di reafirmá su kreensia den e hustisia di Dios. “Bendishoná sea e nòmber di SEÑOR” (Job 1:21).

Bo ta pasando dor di un prueba? Sigui e pasonan ku Job a usa. Kon nan lo por yuda abo tambe? tokante kambionan ku bo tin ku hasi?

Djárason

27 di yüli

Sobrebibí a Traves di Speransa

“Pasobra, rumannan, nos no kier pa boso keda sin sa di nos aflikshon ku a bin riba nos na Asia, ku nos tabatin un karga masha pisá mes, mas ku nos por a soportá, asina ku asta nos tabata desesperá di nos bida; sí, nos tabatin e sentensia di morto den nos mes, pa nos no konfia den nos mes, sino den Dios, Kende ta lanta e mortonan" (2 Kor. 1:8,9).

Komo Dios Su apòstel skohí, Pablo a soportá mas ku mayoria hende. Sinembargo, Pablo no tabata aplastá. Mas bien, el a krese den alabansa pa Dios. Lesa su lista di difikultatnan den 2 Korintionan 11:23–29. Awor, lesa 2 Korintionan 1:3–11.

Den 2 Korintionan 1:4, Pablo ta deklará ku e rason pa a risibí Dios Su kompashon i konsuelo ta “Pa asina nos tambe por konsolá esnan ku ta den kualke aflikshon ku e mesun konsuelo ku Dios a konsolá nos kuné”. Te na ki grado sufrimentu lo por ta un yamada na ministerio? Kon nos por bira mas alerta na e posibilidat akí?

Dios ke ministrá a traves di nos na hendenan lastimá. Esaki ta nifiká ku E por permití nos promé eksperensiá e mesun sorto di dolónan. E ora ei nos lo ofresé enkurashamentu, no di teoria, sino di nos propio eksperensia di e kompashon i konsuelo di Dios. Esaki ta un prinsipio for di e bida di Hesus (lesa Hebr. 4:15).

Pablo su deskripshonnan bibu di su difikultatnan no ta pa pone nos sinti duele di dje. Nan ta pa nos sa ku asta ora nos ta den e profundidatnan, e Tata ainda por intervení pa trese Su kompashon i konsuelo. Nos por desesperá asta di nos propio bida, i asta por mata nos, pero no tene miedu, Dios ta siñando nos pa dependé riba djE. Nos por konfi’E, pasobra nos Dios ta “lanta hende for di morto” (2 Kor. 1:9).

Segun ku Pablo ta sigui fiha su bista riba proklamá e evangelio, e sa ku Dios lo reskat’é den futuro tambe. Tres kos ku Pablo ta menshoná den 2 Korintionan 1:10,11 ta sostené su abilidat di permanesé firme. Di promé, Dios Su registro di pista probá: “Kende a libra nos di un peliger di morto asina grandi, i lo libra nos, (2 Kor. 1:10). Di dos, Pablo su determinashon pa fiha su konsentrashon riba Dios Mes: “Esun den Kende nos a pone nos speransa. I E lo sigui libra nos” (2 Kor. 1:10). Di tres, e interseshon kontinuo di e santunan: “Miéntras ku boso tambe ta yuda nos ku boso orashonnan” (2 Kor. 1:11).

Kiko bo por siña for di Pablo ku por yuda bo mantené for di kai den kompashon propio meimei di bo propio luchanan?

Djaweps

28 di yüli

Kalor Ekstremo

Te asina leu e kuartal akí, nos a konsiderá hopi ehèmpel di e krisolnan ku Dios ta usa pa trese puresa i semehansa na Kristu na nos bida. Sinembargo algun hende por wak e ehèmpelnan akí i konkluí ku Dios ta un kapatas severo i demandante. Sigur, algun por bisa: “Nos sa ku Dios ke algu bon pa nos, pero e ehèmpelnan akí no ta revelá masha kuido i amor. En kambio, Dios ta parse mas un tirano. E ta eksponé riba un propósito ku ta kousa nos momentonan difísil konsiderabel, i no tin nada ku nos por hasi kontra dje”.

Ta bèrdat ku miéntras nos ta biba riba un tera yená ku piká, nos lo komprondé solamente un tiki di dikon kosnan ta sosodé. Den shelu nos lo komprondé asina tantu mas (1 Kor. 4:5, 1 Kor. 13:12), ma pa awor nos lo tin ku biba ku e tenshon di kere ku Dios ta presente i ta kuidando pa nos, aunke kosnan no semper ta sinti muchu bon. Isaias ta deskribí e tenshon akí hopi bon.

Lesa Isaias 43:1–7. Den versíkulo 2 Dios ta bisa ku Su pueblo lo pasa dor di awanan i dor di kandela. Esakinan ta figurativo di peligernan ekstremo, pero kisas nan ta aludí na e krusamentu di Laman Kòrá i Yordan, tur dos momentonan spantoso, pero momentonan ku a traha kaminda na un bida nobo. Bo por spera ku Dios lo por a bisa ku E lo a protehá Su pueblo di e peligernan akí, ku E lo guia nan via un ruta mas fásil. Pero meskos ku e Wardadó den Salmo 23, E ta bisa mas bien ku ora e tempunan difísil bin, e pueblo di Dios no mester ta aplastá, pasobra E ta huntu ku nan.

Wak bèk na Isaias 43:1–7. Skirbi e diferente formanan den kua Dios ta sigurá Su pueblo di konsuelo durante e momentonan di awa i kandela. Ki kuadro di Dios esaki ta pinta den bo mente? Kua promesanan bo por reklamá pa bo mes?

Nos lo por a resumí loke nos a siña tokante e krisolnan di Dios den tres forma. Di promé, Dios Su kayente ekstremo ta pa destruí no nos sino nos piká. Di dos, Dios Su kayente ekstremo no ta pa hasi nos miserabel sino pa hasi nos puru, manera El a krea nos pa ta. Di tres, Dios Su kuido pa nos a traves di tur kos ta konstante i tierno, E lo no laga nos nunka nos so, no importá kiko sosodé ku nos.

Kiko e versíkulonan akí ta siña bo tokante e akshonnan i karakter di Dios? Salmo 103:13,14; Mat. 28:20; 1 Kor. 10:13; 1 Pe.1 :7. Kon bo a eksperensiá e realidat di e versíkulonan akí den bo propio bida?

Djabièrnè

29 di yüli

Mas Estudio:

Lesa Ellen G. White, “The Test of Faith,” p. 145–155 den Patriarchs and Prophets; “Praise Ye the Lord,” p. 315–319 den Testimonies for the Church, tomo 5.

“Dios semper a proba Su pueblo den e fòrnu di aflikshon. Ta den e kayente di e fòrnu ku ta separá e desperdisio for di e oro berdadero di e karakter kristian. Hesus ta vigilá e tèst; E sa kiko ta nesesario pa purifiká e metal presioso, pa e por reflehá e resplandor di Su amor. Ta pa medio di pruebanan djaserka ku Dios ta disipliná Su sirbidónan. E ta mira ku algun tin podernan ku nan por usa pa avanse di Su obra, i E ta pone e personanan akí na prueba; den Su providensia E ta trese nan den posishonnan ku ta tèst nan karakter. . . . E ta mustra nan nan propio debilidat, i ta siña nan pa lèn riba djE. . . . Asina E ta alkansá Su ophetivo. Nan ta eduká, di train, i disipliná, prepará pa kumpli ku e grandioso propósito pa kua El a duna nan nan podernan.”—Ellen G. White, Patriarchs and Prophets, p. 129, 130.

“Si den e providensia di Dios ta yama nos pa soportá pruebanan, laga nos aseptá e krus i bebe e kopa amargo, rekordando ku ta e man di un Tata ku ta ten’é na nos lepnan. Laga nos konfi’E den skuridat komo tambe den dia. Nos no por kere ku E lo duna nos tur kos ku ta pa nos bon? . . . Asta den e anochi di aflikshon, kon nos por nenga di halsa kurason i bos den alabansa gradesidu, ora nos rekordá e amor ekspresá na nos pa e krus di Kalvario?”—Ellen G. White, Testimonies for the Church, vol. 5, p. 316.

Preguntanan pa Diskushon:

pregunta 1 Den klas, laga un hende konta di su propio tèst di fe ku, si e no tabata tan intenso manera Abraham tabatin, tabata ainda duru sufisiente. Kiko bo por siña for di e persona ei su eksperensia, for di su éksitonan òf fayonan?

pregunta 1 Repasá e último 24 oranan di bida di Kristu promé ku Su krusifikashon. Ki ekstremonan El a enfrentá? Kon El a soportá? Ki prinsipionan nos por saka for di Su ehèmpel i apliká pa nos mes ora nos ta meimei di nos propio krisol?

pregunta 1 Diskutí e idea ku nos a toka e siman akí, tokante kon a traves di nos propio sufrimentu nos por ministrá na otronan ku ta sufriendo. No importá kon berdadero e lo por ta, kiko ta algun di e problemanan ku nos lo por topa ku e idea akí?

pregunta 1 Ellen G. White a skirbi akiriba: “Laga nos konfi’E den sukú komo tambe den dia”. Esei ta mas fásil bisá ku hasí. Kon nos por yuda otro desaroyá e tipo di fe ku lo kapasitá nos pa hasi presis esei? Dikon ta importante pa konfia Dios den e tempunan malu?