Lès 6

*30 di yüli – 5 di ougùstùs

Luchando Ku Tur Energia
Sabat 30 di yüli
Lesa pa e Estudio di e Siman Akí:

Juan 16:5–15; Kol. 1:28,29; 1 Pe. 1:13, Mat. 5:29; Génesis 32.

Teksto di Memoria:

“I pa e propósito akí tambe mi ta traha, luchando segun Su poder ku ta obra poderosamente den mi” (Kolosensenan 1:29).

Un hòmber i un muhé tabata sinta huntu na un programa di entrevista. Tur dos a eksperensiá e asesinato di un mucha. Nan a asesiná yu hòmber di e muhé 20 aña pasá, i su rabia i amargura tabata mes grandi ku semper. E hòmber tabata totalmente diferente. Teroristanan a asesiná su yu muhé un par di aña anterior. El a papia tokante pordon pa ku e asesinonan i tokante kon Dios a transformá su doló. Maske kon teribel e doló tabata, e hòmber akí a bira un ilustrashon di kon Dios por trese sanashon na e momentonan di mas skur di nos bida.

Kon dos hende por reakshoná di forma asina diferente? Kon kambio spiritual por tuma lugá den bida di un kristian, kapasitando e individuo pa madurá a traves di krisolnan di bida mas bien ku nan aplast’é kompletamente?

Un Bista Riba e Siman:

Kiko ta e ròl di nos boluntat, i forsa di boluntat, den e bataya ku e ami i piká? Kon nos por evitá e eror di laga nos sintimentunan goberná e desishonnan ku nos ta tuma? Dikon nos mester perseverá i no entregá ora nos ta den e krisol?

*Studia e lès di e siman akí pa prepará pa Sabat, 6 di ougùstùs.

Djadumingu

31 di yüli

E Spiritu di Bèrdat

Bo a yega di resa: “Por fabor, Dios, hasi mi bon!” pero parse ku tiki kos ta kambia? Kon ta posibel ku nos por resa pa e poder transformadó di Dios pa obra denter di nos, ma nos bida parse ta keda mesun kos? Nos sa ku Dios tin rekursonan sobrenatural ilimitá ku E ta ofresé nos asina ansioso i gratuitamente. Realmente nos ke tuma bentaha di tur, i tòg, nos bida parse no ta kambia den un forma ku ta pas ku loke Dios ta ofresiendo.

Dikon? Un motibu, di forma alarmante, ta simpel: Miéntras e Spiritu tin poder ilimitá pa transformá nos, ta posibel pa medio di nos mes eskohonan pa restringí loke Dios por hasi.

Lesa Juan 16:5–15. Den e pasashi akí, Hesus ta yama Spiritu Santu e “Spiritu di bèrdat” (Juan 16:13). Kiko esaki ta impliká ku Spiritu Santu ta hasi pa nos?

Miéntras Spiritu Santu por trese e bèrdat pa nos tokante nos pekaminosidat, E no por pone nos repentí. E por mustra nos tambe e bèrdat di mas grandi tokante Dios, ma E no por fòrsa nos pa kere òf obedes’é. Si Dios a obligá nos den asta e forma di mas leve, nos lo a pèrdè nos boluntat liber, i Satanas lo a akusá Dios di manipulá nos mente i kurason i di e manera ei por akusá Dios di traha trampa den e gran kontroversia. Ora e gran kontroversia a kuminsá den shelu, nos Tata no a obligá Satanas òf kualke di e angelnan pa kere ku E tabata bon i hustu òf obligá e angelnan pa repentí. I den e Hòfi di Eden, ora asina tantu kos tabata den wega atrobe, Dios a aklará e bèrdat tokante e palu meimei di e hòfi hopi bon, ma no a prevení Eva i Adam di ehersé nan boluntat liber pa desobedesé. Dios lo no aktua niun tiki diferente ku nos awendia. Asina, e Spiritu ta presentá e bèrdat tokante Dios i piká i despues e ta bisa: “En bista di loke Mi a mustra bo, kiko lo bo hasi awor?”

Ta mesun kos ora nos ta den e krisol. Tin biaha e krisol tei presisamente pasobra nos no a obedesé òf a repentí di nos pikánan. Pa nos Tata obra den kasonan asina, nos mester skohe konsientemente pa habri e portanan di repentimentu i obediensia pa asina e poder di Dios drenta i transformá nos.

Ki konvikshonnan e “Spiritu di bèrdat” a trese pa bo resientemente? Kon bon bo ta skuchando na Su bos? I, mas importante ainda, ki eskohonan bo ta hasiendo ku bo boluntat liber?

Djaluna

1e di ougùstùs

E Kombinashon Divino-Humano

Kiko a yega di ta bo logro di mas grandi? Tin chèns ku, loke sea bo a logra no a sosodé simplemente dor di lanta for di bo kama mainta. Si nos ke logra algu ku ta bale la pena den e bida akí, e ta tuma tempu i esfuerso. Nos disipulado na Kristu no ta diferente.

Lesa Kolosensenan 1:28,29. Aunke Pablo ta papia tokante Dios ku ta obra den dje, den ki forma e ta mustra ku esfuerso humano tambe ta enbolbí? Lesa tambe Deut. 4:4, Lukas 13:24, 1 Kor. 9:25, Hebr. 12:4.

Den Kolosensenan 1:29 tin un persepshon hopi interesante den e manera ku Pablo ta mira su relashon ku Dios den su trabou. E ta bisa ku e ta luchando, ma ku e poder di Dios.

E palabra pa “trabou” ta nifiká “bira kansá”, “traha te na e punto di agotamentu”. Tabata usa e palabra akí partikularmente di atletanan ora nan tabata train. E palabra pa “lucha”, kua ta bin despues, por nifiká den algun idioma “agonisá”. Asina anto, nos tin e kuadro di palabra di un atleta luchando ku tur kos pa gana. Pero despues Pablo ta añadí un kambio na e idea, pasobra Pablo ta luchando, no ku tur kos ku e tin, ma ku tur kos ku Dios ta dun’é. Asina anto, ta laga nos ku un simpel konklushon tokante e ministerio di Pablo, tabata un ministerio hasí ku gran esfuerso personal i disiplina, ma hasí ku e poder di Dios. E relashon akí ta funshoná den eksaktamente e mesun forma ku nos ta persiguí e desaroyo di Kristu Su karakter den nos.

Esaki ta importante pa kòrda, pasobra nos ta biba den un mundu den kua nos ke mas i mas ku ménos i ménos esfuerso. E idea ei a slùip drenta den kristianismo tambe. Algun evangelista kristian ta primintí ku si solamente bo kere, Spiritu Santu lo kai riba bo ku poder sobrenatural asombroso i ehekutá gran milagernan. Pero esaki por ta un mitar-bèrdat peligroso, pasobra e por hiba hende na e konklushon ku nos solamente mester warda pa e poder di Dios bin miéntras nos ta sinta konfortablemente den nos stul.

Kiko ta bo propio eksperensia ku e tipo di esfuerso ku Pablo a papia di dje? Kiko Dios a pone riba bo kurason ku bo ta luchando kuné? Kon bo por siña someté na e boluntat di Dios?

Djamars

2 di ougùstùs

E Boluntat Disipliná

Un di e enemigunan di mas grandi di nos boluntat ta nos propio sintimentunan. Nos ta bibando mas i mas den un kultura bombardiá ku kuadronan i músika ku por apelá direktamente na nos sentidonan, stimulando nos emoshonnan: rabia, miedu, i pashon, sin ku nos ta realisá esei. Kuantu bia nos ta pensa kosnan manera “Kiko mi ta sinti gana di kome pa sena?” “Kiko mi tin gana di hasi awe?” “Mi ta sinti bon tokante kumpra esaki?” Sintimentunan a bira, pues, íntimamente enbolbí den nos tumamentu di desishon. Sintimentunan no ta nesesariamente malu, pero kon mi ta sinti tokante algu por tin tiki di aber ku loke ta korekto òf mihó. Enbèrdat, nos sintimentunan por gaña nos (“E kurason ta mas engañoso ku tur kos” [Jer. 17:9]) i por krea un kuadro falsu di realidat, poniendo nos hasi mal eskohonan, posishonando nos pa un krisol ku nos mes a traha.

Ki ehèmpelnan bo por haña for di Beibel kaminda hendenan a hasi eskohonan basá riba sintimentunan mas bien ku riba e Palabra di Dios? Kiko tabata e konsekuensianan? Lesa por ehèmpel: Gen. 3:6; 2 Sam. 11:2–4; Gal. 2:11,12.

Lesa 1 Pedro 1:13. Tokante kiko Pedro ta preokupá, i kiko e ke pa su lektornan hasi realmente?

Pedro a komprondé ku e menta ta e stür pa e kurpa ku nos ta kontrolá. Kita e kontròl di e mente, i kualke sintimentunan ku supla den nos direkshon ta kontrolá nos.

Imaginá bo kanando riba un kaminda smal na e hogar di e Wardadó. A lo largu di e kaminda tin hopi kaminda ku ta hiba den diferente direkshon. Algun di e kamindanan akí ta bai na lugánan ku nos lo no ke bishitá. Otronan ta parse tentador; nan ta apelá na nos sintimentunan, nos emoshonnan, nos deseonan. Si, sinembargo, nos kue kualke un di nan, nos ta kita for di e kaminda korekto i bai den un kaminda ku kisas por ta ekstremadamente difísil pa baha for di dje.

Ki desishonnan importante bo ta enfrentando? Puntra bo mes frankamente: “Kon mi por sa si mi ta basando mi eskohonan riba sintimentu, emoshon, deseo, kontrali na e Palabra di Dios?”

Djárason

3 di ougùstùs

Kompromiso Radikal

“I si bo wowo drechi hasibo trompeká, sak'é tir'afó, pasobra ta mihó pa bo ku un di e miembronan di bo kurpa bai pèrdí, i no henter bo kurpa ser tirá den fièrnu.” (Mat. 5:29).

Elaborá riba e palabranan di Hesus den e versíkulo akiriba. Lo bo yama Su palabranan radikal? Si ta asina, dikon?

Akshon radikal ta nesesario no pasobra Dios a hasi bida di e kristian difísil, sino pasobra nos i nos kultura a alehá asina leu for di e plannan di Dios pa nos. Hende hopi biaha ta spièrta i ta puntra nan mes: “Kon mi por a bai asina leu for di Dios?” E kontesta semper ta e mesun kos: djis un paso a la bes.

Lesa Mateo 5:29,30. Hesus ta papiando den konteksto di piká seksual, Sinembargo, e prinsipionan básiko ta apliká na trata ku otro piká tambe. Enbèrdat, e prinsipionan por apliká na nos kresementu den Kristu en general.

Ki punto krusial Hesus ta bisando nos ku Su palabranan den Mateo 5:29,30? Realmente ta yama nos literalmente pa mutilá nos mes?

Hesus no ta yamando nos pa hasi nos kurpa daño físikamente, pa nada! Mas bien, E ta yamando nos pa kontrolá nos mente i p’esei nos kurpa, no importá e kosto. Nota ku e versíkulonan no ta bisa ku nos mester hasi orashon i ku Dios lo kita e tendensianan pekaminoso instantáneamente for di nos bida. Tin bia Dios por hasi esaki miserikòrdiosamente pa nos, ma hopi bia E ta yama nos pa hasi un kompromiso radikal pa entregá algu, òf kuminsá hasi algu, ku nos no tin gana di hasi mes. Ki un krisol esei por ta! Mas tantu bia nos hasi e eskohonan korekto, mas fuerte nos lo bira, i mas débil e poder di tentashon lo ta den nos bida.

Tin bia Dios ta usa krisolnan pa kapta nos atenshon kaminda tin asina tantu distraishonnan ruidoso rònt di nos. Ta den e krisol ku nos ta realisá kon leu nos a alehá for di Dios. E krisol por ta Dios Su yamada pa nos tuma un desishon radikal pa bai bèk na e plan di e Tata pa nos.

Djaweps

4 di ougùstùs

E Nesesidat pa Perseverá

Lesa e storia di Yakob luchando ku Dios (Génesis 32). Kiko e storia akí ta bisa nos tokante perseveransia, asta meimei di gran deskurashamentu? (Tene henter e konteksto di Yakob su situashon den mente promé ku bo kontestá.)

Nos por sa kiko ta korekto i ehersé nos boluntat pa hasi e kos korekto; pero ora nos ta bou di preshon, por ta hopi difísil pa keda tene na Dios i Su promesanan. Esei ta pasobra nos ta suak i miedoso. P’esei, un di e fortalesanan importante di e kristian ta perseveransia, e abilidat pa sigui padilanti apesar di ke entregá.

Un di e ehèmpelnan di mas grandi di perseveransia den Beibel ta Yakob. Hopi aña promé, Yakob a gaña su ruman, Esou, i su tata pa dun’é e derecho di yu mayó (Génesis 27), i for di e dia ei, e tabata kore pa miedu di Esou su deseo pa mat’é. Aunke El a haña promesanan maravioso di Dios Su guiansa i bendishon den su soño di un trapi ku ta alkansá shelu (Génesis 28), ainda e tabatin miedu. Yakob tabata desesperá pa Dios Su siguransa ku Dios a asept’é i ku e promesanan ku Dios a hasi na dje hopi aña anterior ainda tabata bèrdat. Ora e tabata bringa ku un hende ku realmente tabata Hesus, Yakob su hep a sali for di lugá. For di e punto ei en adelante, no tabata posibel pa bringa, komo ku e doló lo tabata demasiado insoportabel. Mester tabatin un kambio sutil di bringa na tene duru. Yakob ta teniendo duru na Hesus a traves di doló insoportabel te ora e risibí un siguransa di su bendishon. Asina, Hesus ta bis’é: "LagaMi bai, pasobra dia ta bai habri." (Gen. 32:26).

Yakob su bendishon a bin pasobra el a tene duru a traves di e doló. Asina ta ku nos. Dios por saka nos “hep” tambe for di lugá i despues bisa nos pa tene duru na djE a traves di nos doló. Enbèrdat, Dios a permití e sikatrisnan doloroso sigui, Yakob ainda tabata kokochá ora el a topa ku su ruman. Pa aparensianan eksterno e tabata un debilidat, ma pa Yakob e tabata un indikashon di su fortalesa.

Kiko ta algun eskoho práktiko ku bo por hasi (asosiashonnan, estilo di bida, material pa lesa, kustumbernan di salú, bida spiritual) ku lo yuda bo perseverá mihó ku Señor meimei di deskurashamentu i tentashon?

Djabièrnè

5 di ougùstùs

Mas Estudio:

Lesa Ellen G. White, “The Night of Wrestling,” p. 195–203, den Patriarchs and Prophets; “Consecration,” p. 43–48, den Steps to Christ.

“Na e Kaida, Dios a duna e boluntat akí, ku ta forma un faktor asina importante den e karakter di un hende, den kontròl di Satanas; i for di e tempu ei e tabata obra den hende pa ke i pa hasi segun su propio plaser, pero pa e ruina i miseria total di hende.”—Ellen G. White, Testimonies for the Church, tomo 5, p. 515.

“Pa risibí ayudo di Dios, hende mester realisá su debilidat i defisiensia; e mester apliká su propio mente na e gran kambio ku mester hasi den e mes; e mester spièrt’é na orashon i esfuerso sinsero i perseverante. Mester sagudí hábitonan i kustumbernan robes tira abou; i ta solamente pa medio di esfuerso determiná pa koregí e erornan akí i pa konformá na prinsipionan korekto ku por gana e viktoria. Hopi nunka ta alkansá e posishon ku kisas nan lo por okupá, pasobra nan ta warda pa Dios hasi pa nan e loke ku El a duna nan poder pa hasi pa nan mes. Mester train tur ku ta ekipá pa utilidat pa medio di e disiplina mental i moral di mas severo, i Dios lo asistí nan dor di uni poder divino ku esfuerso humano.”—Ellen G. White, Patriarchs and Prophets, p. 248.

Preguntanan pa Diskushon:

pregunta 1 Te na ki grado bo ta kere ku realmente nos ta rekonosé ku nos boluntat tabata “duná den kontròl di Satanas na e Kaida”? Kon, dor di focus riba e karakter di Hesus, nos por komprondé mihó kon kaí nos ta i kon grandi e grasia di Dios ta pa ku nos?

pregunta 1 Lesa e storia di Hesus den Getsémani (Mat. 26:36-42). Kiko tabata Hesus Su mes sintimentunan i deseonan, kontrali na Dios Su boluntat? Kiko nos por siña di e ehèmpel akí?

pregunta 1 Komo klas, papia tokante e distinto kosnan den boso propio kultura ku por obra pa kibra nos defensanan i laga nos mas vulnerabel na e atakenan di Satanas. Kiko nos por hasi pa yuda otro miembronan di iglesia ta konsiente di e peligernan akí, komo tambe yuda esnan ku ta sinti e nesesidat di yudansa?

pregunta 1 Bo konosé un hende den bo iglesia ku no tabata tei pa basta un tempu largu, ku kisas por ta preparando pa entregá òf ya a entregá? Kiko boso por hasi komo grupo pa enkurashá e persona akí, pa yud’é pa no bira lomba pa Hesus? Ki kosnan práktiko boso por hasi pa yuda?