Lès 7

*6–12 di ougùstùs

Speransa Indestruktibel

Sabat 6 di ougùstùs

Lesa pa e Estudio di e Siman Akí:

Hab. 1:1–4; Job 38–41; Isa. 41:8–14; Jer. 29:1–10; Hebr. 12:1–13.

Teksto di Memoria:

"I speransa no ta desapuntá, pasobra e amor di Dios a ser dramá den nos kurason dor di Spiritu Santu, Kende a ser duná na nos." (Romanonan 5:5, NKJV).

Ora nos ta den iglesia rondoná pa hendenan ku ta smail, kon fásil ta pa papia i kanta tokante speransa. Pero ora nos haña nos mes den e krisol, speransa no ta parse asina fásil semper. Miéntras sirkunstansianan ta primi rondó di nos, nos ta kuminsá kuestioná tur kos, partikularmente e sabiduria di Dios.

Den un di su bukinan, C. S. Lewis ta skirbi tokante un leon fingí. Un hende ku ker a topa ku e leon akí ta puntra si e ta seif. Nan ta bisa e persona ku e no ta seif, “pero e ta bon”.

Aunke nos no ta komprondé Dios semper i E ta parse di ta hasi kosnan inimaginabel, esei no ta nifiká ku Dios ta kontra nos. Simplemente e ta nifiká ku nos no tin e kuadro kompletu ainda. Pero nos ta lucha ku e idea ku pa nos tin pas, konfiansa, i speransa, Dios mester ta komprendibel i previsibel. E mester ta, den nos pensamentu, “seif”. Komo tal, nos ta posishoná nos mes pa desapunto.

Un Bista Riba e Siman:

Kon nos komprondementu di e karakter di Dios ta yuda nos mantené speransa den e krisol?

*Studia e lès di e siman akí pa prepará pa Sabat, 13 di ougùstùs.

Djadumingu

7 di ougùstùs

E Kuadro Grandi

Ora nos ta lastimá, ta hopi fásil pa presumí ku loke ta sosodé ku nos ta e úniko kos ku ta importá. Pero tin un kuadro un poko mas grandi ku djis “ami” (lesa Rev. 12:7, Rom. 8:22).

Lesa Habakuk 1:1–4. Kiko Habakuk a enfrentá?

Kisas lo bo por spera ku Dios lo a bisa algu manera: “Esei ta realmente teribel, Habakuk; laga Mi bin i yuda bo inmediatamente”. Pero Dios Su kontesta ta kontrali. E ta bisa Habakuk ku ta bai bira pió. Lesa esaki den Habakuk 1:5–11.

E asirionan a tuma Israel den koutiverio, pero Dios ta primintí ku pió ta biniendo: E babilonionan awor lo hiba e pueblo di Huda. Habakuk ta keha atrobe den versíkulonan 12–17, i despues ta warda pa mira kiko Dios ta bai bisa.

Kon e introdukshon di Dios na e destrukshon primintí di Babilonia den Habakuk 2: 2, 3 ta trese speransa?

Habakuk 2 ta Dios Su promesa di e destrukshon di e babilonionan. Hebreonan 10:37 ta sita Habakuk 2:3, alushon di un aplikashon mesiániko na e promesa akí den futuro. Ku e mesun siguransa ku Dios a primintí e destrukshon di Babilonia, asina nos tambe tin e siguransa di e destrukshon di “e Gran Babilonia” (Rev. 18:2, NIV).

Habakuk tabata atrapá entre e gran maldat ku tabata rondon’é i Dios Su promesa di pió ku tabata bin. Sinembargo, esaki ta presisamente kaminda nos ta haña nos mes den historia di salbashon. Gran maldat ta rònt di nos, pero Beibel ta predesí ku muchu mas pió tin ku bin. E klave na e sobrebibensia di Habakuk tabata ku el a ser tresé pa mira henter e kuadro. P’esei, den kapítulo 3 e ta kapas pa hasi un orashon inkreibel di alabansa pa motibu di loke Dios lo hasi den futuro.

Lesa Habakuk 3:16–19. Kiko Habakuk ta identifiká komo su rasonnan pa speransa? Kiko ta e speransa di e pueblo di Dios miéntras nos ta warda pa e último esenanan profétiko desplegá? Kon bo por hasi e speransa akí di bo mes?

Djaluna

8 di ougùstùs

Ken Nos Tata Ta

Oswald Chambers ta skirbi: “Bo a bin ta puntra Dios kiko E ta bai hasi? E lo no bisa bo nunka. Dios no ta bisa bo kiko E ta bai hasi; E ta revelá na bo Ken E ta.”—My Utmost for His Highest (Uhrichsville, OH: Barbour & Company, Inc., 1963), 2 di yanüari.

Kiko bo ta kere Chambers ke men ku e idea akí?

Manera nos sa, e buki di Job ta kuminsá ku un gran tragedia personal pa Job. E ta pèrdè tur kos, eksepto su bida i su kasá, i esaki ta sugerí pa e “ ‘maldishoná Dios i muri!’ ” (Job 2:9, NIV). Loke ta sigui ta un diskushon den kua su amigunan ta purba saka afó dikon tur esaki a sosodé. A lo largu di tur e diskushonnan akí, Dios ta permanesé ketu.

Despues, di ripiente, den Job 38 Dios ta aparesé i ta papia: “ ‘Ken ta esun ku ta nubla e konsepto, ku Mi ke pa hende tin di Mi, papiando sin konosementu?’ ” (Job 38:2, NIV). Sin tuma pouze, Dios ta puntra Job un 60 preguntanan ku ta laga bo boka habrí. Habri bo Beibel i skèn dor di esakinan den Job 38 i 39.

Despues di e último pregunta, Job ta kontestá: “ ‘Kiko ami, ku no ta nada, por bisa? No a keda mi nada otro ku tapa mi boka ku mi man. Mi a papia diferente be, pero awor sí no mas!’ ” (Job 40:4,5). Pero Dios no ta kla. E ora ei E ta kuminsá atrobe i ta hasi un sèt di preguntanan “grandi” tras di otro.

Lesa Job su kontesta final den Job 42:1–6. Kiko Dios tabata tratando na bisa Job, i kiko tabata e efekto riba dje?

Dios nunka ta kontestá niun di e preguntanan di “dikon” di e amigunan di Job. Pero Dios sí ta pinta un kuadro di Su grandesa inkomparabel manera revelá a traves di e obranan asombroso di kreashon. Despues di esaki, Job siguramente no tin mester di mas kontesta. Un kuadro aplastante di e realse di Dios a skuresé e nesesidat di splikashonnan.

E storia akí ta revelá un paradòks fasinante. Speransa i enkurashamentu por lanta for di e realisashon ku nos sa asina poko. Instintivamente, nos ta purba haña konsuelo dor di sa tur kos, i asina nos ta bira deskurashá ora nos no por sa. Pero tin bia Dios ta destaká nos ignoransia pa asina nos por realisá ku speransa humano por haña seguridat solamente den un Ser muchu mas grandi ku nos mes.

Kosnan ku bo no por komprondé ta tumando lugá aworakí? Si ta asina, focus riba e karakter di Dios. Kon hasiendo esei por duna bo e speransa ku bo tin mester pa perseverá a traves di loke pa awor ta inkomprendibel?

Djamars

9 di ougùstùs

E Presensia di Nos Tata

“Pasobra Ami ta SEÑOR bo Dios, Kende ta sostené bo man drechi, Kende ta bisabo: 'No tene miedu, lo Mi yudabo.' ” (Isa. 41:13).

Un hende a yega di bisa: “Ora Dios ta parse leu, ken ta esun ku a move?” Ora problema dal, nos ta presumí ku Dios a bandoná nos. E bèrdat ta ku E no a bai niun kaminda.

Dios Su presensia tabata parse masha leu pa e hudiunan den eksilio. Sinembargo, a traves di Isaias Dios ta sigurá nan di futuro liberashon. Sinembargo, miéntras e regreso aktual na Herusalèm tabata ainda hopi aña den futuro, Dios tabata ke pa Su pueblo sa ku E no a move bai for di nan i ku tabatin tur rason pa speransa.

Lesa Isaias 41:8–14. Ki motibunan pa speransa bo por identifiká pa hendenan ku ta spera ansiosamente pa futuro liberashon? Kon e promesa akí ta yuda nos miéntras nos ta warda pa nos eksilio riba tera terminá?

Un di e imágennan di mas poderoso den e versíkulonan akí, nos ta haña den Isaias 41:13. E Dios soberano di universo ta bisa ku Su pueblo no mester tin miedu, pasobra E ta esun kende ta “ ‘kohe bo man tene’ ”. Ta un kos pa imaginá Dios guiando eventonan riba tera for di un trono grandi, añanan di lus leu for di tera. Pero ta un kuadro kompletamente diferente pa realisá ku E ta serka sufisiente pa tene e mannan di Su pueblo hopi stimá.

Ora nos ta okupá, por ta difísil pa kòrda ku Dios ta asina serka di nos. Pero ora nos kòrda ku e ta Immanuel, “Dios ku nos”, e ta hasi asina un diferensia. Ora Dios su presensia ta huntu ku nos, Su propósitonan, Su promesanan, i Su poder transformador tambe ta.

Durante e siguiente par di dia, purba un eksperimento. Na tur momento posibel, purba kòrda bo mes ku e Dios di universo ta serka sufisiente di bo pa tene bo man i personalmente ta primintiendo bo yudansa. Tene un registro di kon esaki ta kambia e manera ku bo ta biba. Sea prepará pa diskutí bo eksperensia den klas riba Sabat.

Djárason

10 di ougùstùs

E Plannan di Nos Tata pa Nos

Tur hende ta buskando speransa. Pero unda ta hañ’é? Pa algun hende, ta haña speransa den e smail di un amigu. Pa otronan, speransa ta krese for di seguridat finansiero òf un matrimonio stabil. Unda bo ta buska speransa i kurashi normalmente?

Den e buki di Yeremias, e profeta ta skirbiendo na hendenan ku a pèrdè speransa den nan eksilio. “Banda di e riunan di Babilonia, ayanan nos tabata sinta yora ora nos tabata kòrda riba Sion.” (Salmo 137:1). Pero aunke nan kurason ta kibrá, Yeremias ta eksponé rasonnan ku nan no mester pèrdè speransa.

Ki rasonnan pa speransa ta duná den Yeremias 19:1–10?

Den e pasashi akí tin tres fuente importante di speransa digno di enfatisá.

Di promé, Dios ta bisa Su pueblo ku nan no mester pèrdè speransa, pasobra nan situashon no ta resultado di kasualidat òf maldat inimaginabel. Pasobra Dios Mes ta bisa: “Mi a manda [Huda] den eksilio for di Herusalèm pa Babilonia” (Jer. 29:4, NIV). Aunke maldat ta parse di ta rondoná nan, Huda nunka a bandoná e sentro di Dios su mannan.

Di dos, Dios ta bisa Su pueblo ku nan no mester pèrdè speransa, pasobra E por obra asta denter di nan difikultatnan presente. “Buska pas pa e stat kaminda Mi a manda boso den eksilio, i pidi SEÑOR p'é, pasobra den su pas boso lo tin pas.” (Jer. 29:7, NIV).

Di tres, Dios ta bisa Su pueblo ku nan no mester pèrdè speransa, pasobra E ta bai trese un fin na nan eksilio na un momento spesífiko: "Pasobra asina SEÑOR ta bisa:'Despues ku setenta aña ser kumplí pa Babilonia, lo Mi bishitá boso i kumpli ku Mi bon palabra pa ku boso, pa trese boso bèk na e lugá aki.' ” (Jer. 29:10, NIV).

Despues ku Dios splika kon E tabata den kontròl di nan pasado, ta den kontròl di nan presente, i lo ta den kontròl di nan futuro, e ora ei, di forma bunita, E ta komuniká Su kuido tierno pa Su pueblo (lesa Jer. 29:11–14).

Lesa Yeremias 29:11–14, bisando bo nòmber despues di e palabra boso, manera kos ku Dios ta hasiendo e promesanan akí na bo personalmente. Apliká e promesanan akí na bo mes den loke sea bo luchanan presente lo por ta.

Djaweps

11 di ougùstùs

E Disiplina di Nos Tata

Lesa Hebreonan 12:5–13. Kiko ta e mensahe pa nos akinan, i kon e ta pas ku loke nos a bin ta studia e kuartal akí?

Den Hebreonan 12:5–13, Pablo ta deskribí pruebanan den konteksto di disiplina. Den e tradukshon di Beibel NIV di e pasashi akí, vários forma di e palabra disiplina ta aparesé dies bia. Den e mundu griego, e palabra akí tabata e palabra di mas básiko pa “edukashon”. Asina, komprondé “disiplina” ta komprondé kon Dios ta eduká nos den e skol di fe ku Pablo a bin ta deskribí anteriormente den Hebreonan 11.

Den henter Hebreonan 11, Pablo tabata pintando kuadronan di hòmber- i muhénan di fe. Nan fe tabata loke a mantené nan pa sigui padilanti ora nan tabata enfrentá tur sorto di situashonnan di prueba. Ora nos drenta kapítulo 12, Pablo ta bira na nos, e lesadónan, i ta bisa ku ya ku asina tantu hende promé ku nos a perseverá kontra kontroversianan inkreibel, nos tambe por kore i terminá e bida di fe. E klave ta pa fiha nos bista riba Hesus (Hebr. 12:2), pa E por ta un ehèmpel ora tempunan ta difísil (Hebr. 12:3). Lesando kapítulo 12 ta manera ora duna nos un sèt di brel pa lesa. Sin e brel akí nos vishon òf komprondementu di difikultat semper lo ta vago. Pero mirando dor di e brel akí lo koregí e splikashon trubel di sufrimentu ku nos kultura ta primi riba nos. E ora ei nos lo ta kapas pa komprondé klaramente i ta kapas pa respondé riba pruebanan di forma inteligente.

Lesa dor di e “brel” di Hebreonan 12:1–13. Awor, konsentrá riba versíkulonan 5–13 i kontestá e preguntanan akí:

Kiko ta e fuente di disiplina?

Kiko ta nos reakshon riba disiplina?

Kiko ta e meta di disiplina?

Repasá Hebreonan 12:1–13 atrobe. Traha un lista di tur e rasonnan ku bo por identifiká kuné komo basenan pa speransa. Kon bo a eksperensiá e speransa akí den bo propio momentonan di “edukashon” spiritual?

Djabièrnè

12 di ougùstùs

Mas Estudio:

Lesa Ellen G. White, “The School of the Hereafter,” p. 301–309, den Education; “Help in Daily Living, p. 470, 471, den The Ministry of Healing.

“Den eksperensia di tur hende ta bin momentonan di desapunto skèrpi i deskurashamentu total—dianan ora tristesa ta e porshon, i ta difísil pa kere ku Dios ainda ta e benefaktor amabel di Su yunan mortal; dianan ora problemanan ta tormentá e alma, te ora morto parse ta preferibel ku bida. Ta e ora ei ku hopi ta pèrdè nan grep riba Dios i ta yega den e sklabitut di duda, e koutiverio di inkredulidat. Si na momentonan asina nos lo por a diserní ku persepshon spiritual e nifikashon di Dios su providensianan, nos lo mester a mira angelnan ku ta tratando na salba nos for di nos mes, luchando pa plantia nos pia riba un fundeshi ku ta mas firme ku e serunan eterno, i fe nobo, bida nobo, lo a surgi den eksistensia.”—Ellen G. White, Prophets and Kings, p. 162.

Preguntanan pa Diskushon:

pregunta 1 Ellen G. White ta bisa ku nos “tur” ta eksperensiá momentonan di “desapunto skèrpi i deskurashamentu total”. Kon bon nos ta tuma nota di otro segun ku nos ta pasa dor di momentonan asina? Kon nos por siña mihó pa ta agentenan di speransa un pa otro ora nos ta eksperensiá desapuntonan asina amargo?

pregunta 2 Komo klas, pasa riba boso kontestanan riba e último pregunta di djamars. Ki diferensia el a hasi den bo bida miéntras bo a yega di mantené e realidat di Dios su serkania bo dilanti?

pregunta 3 Den klas, lesa sekshonnan den Job 38–41 na bos duru. Ki tipo di kuadro di Dios e ta presentá? Kiko bo ta siña ku ta duna bo speransa i ánimo? Kon e Sabat ta pas den e kuadro akí? Kon e ta yuda tene e naturalesa i karakter di Dios nos dilanti?

pregunta 4 Speransa ku ta transformá ta bin di shelu. Esaki ta nifiká ku nos por resa pa trese speransa den otro su bida. Pasa algun tempu resando pa esnan ku nan speransa a bin ta tambaliá resientemente, pa nan speransa por ser renobá. Mas ku esei, kiko bo por hasi pa otronan ku ta den un lucha ku nan ta pèrdiendo, pa haña speransa?

pregunta 5 Si un hende ta dispuesto, pidi e persona ei pa konta di un tempu ku desesperashon i pruebanan a pon’é pèrdè speransa i fe. Kiko a bira e persona ei bèk? Kiko nos por kompartí un ku otro ku por yuda ora nos ta den momentonan di duda i desesperashon?