Lès 8

*13 – 19 di ougùstùs

Mirando lo Invisibel
Sabat 13 di ougùstùs
Lesa pa e Estudio di e Siman Akí:

Rom. 8:28–39; Juan 14:1–14; Efe. 1: 8–23; Isa. 40:27–31.

Teksto di Memoria:

"Pa medio di fe el a bai for di Egipto, sin tene miedu di e furia di rei; pasobra el a keda firme, komo si fuera e tabata mira Esun ku ta invisibel." (Hebreonan 11:27, NKJV).

E definishon di fe den e buki di Hebreonan semper ta desafiante. “Awor fe ta e siguransa di kosnan ku hende ta spera, e konvikshon di kosnan ku hende no ta mira” (Hebr. 11:1, NIV). Kon nos por ta sigur tokante loke nos no ta mira? Sinembargo, esaki ta eksaktamente loke Moises ta ilustrá den nos teksto di memoria: “El a keda firme, komo si fuera e tabata mira Esun ku ta invisibel” (Hebr. 11:27, NIV).

Ta ainda mas desafiante pa realisá ku nos ta yamá pa mira “esun ku ta invisibel” no simplemente ora tempunan ta bon, sino spesialmente ora tur kos ta bayendo robes. Pa esaki nos tin mester di fe, un fe manera di Kristu, ku e bèrdat tokante Dios i e reino di Dios mester forma. E bèrdat tokante e bondat di nos Tata, e poder den e nòmber di Hesus, e poder di e Resurekshon, i e kompashon di Dios ta bèrdatnan esensial ku lo kapasitá nos pa para fuerte ora nos ta den e krisol i por ta tentá pa duda tur kos.

Un Bista Riba e Siman:

Ki bèrdatnan tokante Dios por yuda sostené nos a traves di asta e situashonnan di mas pió?

*Studia e lès di e siman akí pa prepará pa Sabat, 20 di ougùstùs.

Djadumingu

14 di ougùstùs

E Ekstrabagansia di Nos Tata

“Si Dios realmente tabata stima mi, siguramente E lo a hasi ... pa mi!” Mi ta puntra mi mes kuantu bia e pensamentu ei a flèsh a traves di nos mente. Nos ta wak nos sirkunstansianan i despues ta kuminsá puntra nos mes si Dios realmente ta stima nos, pasobra si E tabata hasi esei realmente, kosnan lo tabata diferente.

Tin dos motibu ku hopi bia ta hiba nos na duda e bondat di Dios. Di promé, ora nos tin un deseo ardiente den nos kurason i mente pa algu ku nos ta kere ta bon, e idea ku Dios kisas lo por ke algu diferente pa nos por parse ridíkulo. Di dos, nos por duda e bondat di Dios pasobra nos eksperensia ta klèsh ku loke nos ta kere. Si algu parse bon òf ta sinti bon òf ta zona bon òf ta smak bon, e ora ei e mester ta bon. I asina nos ta rabia ku Dios ora nos no por hañ’é.

Ta aki ta kaminda fe ta bin den wega. Fe ta bin den akshon presisamente na e momentonan ei ku nos ta tentá pa duda Dios i Su bondat.

Romanonan 8: 28–39 ta un pasashi poderoso ku ta deskribí e bondat di Dios pa ku nos. Kiko bo por haña den e versíkulonan ku ta yuda warda nos mente kontra duda e bondat di Dios?

Den Romanonan 8: 32 tin un pida lógika importante ku ta ekstremadamente útil den warda nos di bira aplastá pa nos sirkunstansianan. “Si Dios no a duda pa pone tur kos den wega pa nos, brasando nos kondishon i eksponiendo su mes te na lo pió dor di manda su propio Yu, tin kualke kos mas ku E lo no hasi ku alegria i gratuitamente pa nos?” (Message). Kon nos por pensa posiblemente ku Dios lo a manda Hesus pa muri pa nos i despues bira kruel i miskiña?

Esaki ta nifiká ku e bèrdat di Dios su generosidat pa nos, manera ta mira den e morto di Kristu, mester tin un impakto mas fuerte den nos pensamentu ku tur e dudanan ku e krisol por generá denter di nos.

Kon ta posibel pa un bèrdat (e bondat di Dios) tin un efekto mas poderoso riba bo, ku bo dudanan? Pasa algun tempu meditando riba e bèrdat ku Dios a duna Hesus pa muri na bo lugá, i ku e generosidat inkreibel akí ta kontinuá den mil diferente formanan pa bo awe. Kiko esaki ta hasi pa bo fe?

Djaluna

15 di ougùstùs

Den Nòmber di Hesus

“Kiko ku boso pidi Mi den mi nòmber, Mi ta hasi” (Juan 14:14).

Hesus no tabata bai ta hopi tempu mas huntu ku e disipelnan. Esun kende tabata nan sosten i enkurashamentu tabata bayendo shelu, i e disipelnan tabata kuminsá sinti konfuso i sin poder. Pero aunke e disipelnan lo no tabata kapas pa mir’E físikamente mas, Hesus a duna nan un promesa remarkabel.

Lesa Juan 14:1–14. Di akuerdo ku versíkulonan 13 i 14, Hesus ta primintí pa hasi “kualke kos” pa nos ku nos pidi den Su nòmber. Pa motibu di esaki, kasi semper nos ta añadí na final di nos orashonnan: “Den nòmber di Hesus, amèn.”

Ora nos bisa esaki, kiko normalmente nos ta kere ku e ta nifiká? Kiko Hesus ke men ora E ta enkurashá nos pa resa asin’aki? Ki klavenan tin den e versíkulonan akí ku ta yuda nos komprondé loke E ta hala nos atenshon riba dje?

Ora nos petishon ta “den nòmber di Hesus”, nos por ta sigur ku henter e mekanismo di shelu ta na trabou na nos fabor. Nos no por mira e angelnan trahando tur rònt di nos. Pero nan tei, mandá for di e trono di shelu den nòmber di Hesus, pa kumpli ku nos petishonnan.

Tin bia ora nos hasi orashon den nòmber di Hesus, nos ta habri nos wowonan i spera ku tur kos ta diferente rònt di nos, pero tur kos ta parse mesun kos. Sinembargo, miéntras e poder di Dios por bin ku efekto dramátiko, manera ora Hesus a kalma e tempestat, e por bin tambe den kietut, iriparabel, manera ora e poder di Dios a sostené Hesus den Getsémani. Algu dramátiko kisas no ta sosodé di ripiente, pero esei no ke men ku Dios no ta na trabou pa nos.

Lesa Juan 14:1–14 atrobe. Segun ku bo ta lesa, imaginá bo ku Hesus ta papiando direktamente ku bo, kara kara. Ki speransa i enkurashamentu bo por saka for di e promesanan akí? Na mes momento, puntra bo mes: “Ki kosnan den mi bida por ta strobando di haña e promesanan akí kumplí pa mi? Ki kambionan mi mester proponé den mi kurason pa hasi?”

Djamars

16 di ougùstùs

E Poder di e Resurekshon

E Resurekshon ta dirigí su mes riba e problema di impotensia humano. Ora nos pensa riba e bida, morto, i resurekshon di Hesus, hopi bia nos ta pensa riba kon e morto di Hesus tabata e evento ku a hasi nos legalmente bon ku Dios. I esei, naturalmente, ta bèrdat.

Sinembargo, e Resurekshon ta añadí un dimenshon spesífiko na salbashon. E resurekshon di Hesus ta signifikante no solamente pasobra e ta mustra nos ku un dia nos lo resusitá tambe. E Resurekshon a pone Hesus na man drechi di e Tata den un posishon di poder i outoridat. E poder di resurekshon akí ta e mesun poder ku Dios ta hasi disponibel pa nos awe!

Den Efesionan 1:18–23, Pablo ta papia tokante e poder di Dios. Kiko e versíkulonan akí ta siña nos tokante e poder di e Resurekshon? Ki speransa i promesanan pa bo mes bo por haña den e versíkulonan akí?

Pablo ta resando pa e efesionan komprondé un par di kos ku nan por komprondé korektamente solamente ku ayudo divino:

  1. ku tin speransa di transformashon i un futuro eterno na kua Hesus a yama nos;
  2. ku nos ta komprondé e poder ku El a manifestá na nos fabor.

Pablo, e ora ei, ta purba deskribí kon asombroso e poder akí ta. E poder ku ta disponibel pa nos awe ta e mesun poder ku a resusitá Hesus no solamente for di tera i bèk na bida, sino na e lugá di poder na man drechi di e Tata.

Pero Pablo no ta stòp einan. E Resurekshon no a simplemente duna Hesus djis kualke sorto di poder, sino e poder pa goberná i proveé tur kos posibel ku Su pueblo hamas por tabatin mester, pa tur eternidat!

Traha un lista di e áreanan den bo bida ku bo mester di poder di e Hesus resusitá. Ora bo kaba, resa pa e poder akí keda apliká na tur e áreanan di nesesidat akí. Na mes momento, kiko bo por hasi mihó, ki eskohonan bo por hasi, ku por permití e poder akí obra mas libremente den bo bida?

Djárason

17 di ougùstùs

Karga Tur Nos Preokupashon

Tin un plaka ku algun hende tin den nan hogar ku ta bisa: “Pakiko resa ora bo por preokupá?” E ta pone nos hari pasobra nos sa kuantu bia nos ta preokupá mas bien ku bin serka Dios i dun’E nos preokupashonnan.

Un hende a bisa un bia ku ora nos bida bira tur mará, duna Dios e i laga E lòs e kònòpinan. Kon Dios mester ta anhelá pa hasi esaki pa nos. Sinembargo, asombrosamente, nos ta logra di tene na nos problemanan te ora nos ta na punto di kibra. Dikon nos ta warda te ora nos ta desesperá promé ku nos bai serka Señor?

Lesa 1 Pedro 5:7. Pedro ta sitando for di Salmo 55:22. Kiko ta e mensahe básiko akinan pa nos? Lesa tambe Mat. 6:25–33.

1 Pedro 5:7 ta un versíkulo simpel. No tin sekreto skondí den dje, i e ta nifiká eksaktamente loke e ta bisa. Tira ta nifiká hasi presis esei, tira, duna, pa asina loke ta kousa e doló i e preokupashon ya no tin niun konekshon ku bo mas. Pero, naturalmente, no ta tira nos karganan djis kualke kaminda. Nos preokupashon no ta disparsé den un bashí. Ta dun’é na nos Tata den shelu, kende ta primintí di regl’é. Esei ta loke Hesus ta bisando nos den e versíkulonan den Mateo. E problema ora nos hasi esaki no ta ku e ta difísil; mas bien, ta ku e ta parse demasiado fásil, demasiado bon pa ta bèrdat.

Tur sorto di kos ta kousa ansiedat. Por ta preshon di trabou. Krítika inesperá. Sintimentunan ku nos no ta kerí òf no stimá. Salú òf preokupashonnan finansiero. Sinti ku nos no ta sufisiente bon pa Dios. Kere ku nos no ta pordoná.

Loke sea nan ta, un rason pa nos keda tene na nos problemanan ta ku nos ta pensa ku nos por regla nan mihó ku kualke otro hende por. Pero Pedro ta urgi nos pa rekonsiderá kualke idea asina. E motibu ku nos no tin ku preokupá ta ku Dios ta preokupá. Pero Dios ainda ta preokupá sufisiente pa intervení ora un divorsio ta menasá òf nos ta sinti nos mes totalmente inútil? Beibel ta bisa ku E ta preokupá sufisiente pa transformá kualke situashon.

Kiko ta kosnan ku ta pone bo preokupá aworakí? Maske kon legítimo nan ta, maske kon problemátiko nan ta, tin kualke kos demasiado difísil pa Señor? Kisas nos problema di mas grandi ta ku aunke nos ta kere ku Dios sa di dje i por drech’é, nos no ta kere ku E lo resolv’é na e manera ku nos lo gusta pa e resolvé. Reflekshoná riba e último punto ei i puntra bo mes kon bèrdat e ta den bo propio bida.

Djaweps

18 di ougùstùs

Fiel Ainda Ora Nos No Por Mira Dios

Pa pensa ku niun hende ta preokupá ku loke ta pasando ku nos ta hopi desagradabel. Pero pa pensa ku Dios no sa òf no ta preokupá pa nos por ta di mas preokupante.

Pa esnan di Hudea eksiliá na Babilonia, tabata parse ku Dios no tabata preokupá muchu ku nan situashon. Nan tabata eksiliá ainda, nan tabata sinti nan mes ainda bandoná pa Dios pa motibu di nan piká. Pero Isaias ta papia palabranan di konsuelo ku nan. Isaias 40 ta un pasashi bunita den kua Isaias ta papia di forma asina tierno ku e pueblo tokante Dios: “E ta warda su trupa manera un wardador, E ta serka su bestianan ku un gesto di su man, primi e lamchinan kontra su pechu i guia e mamanan ku kuidou” (Isa. 40:11). Pero despues di asina tantu tempu, e eksiliadonan tabata pensa: Unda Bo ta, o Señor? Nos no por mira niun evidensia ku ainda Bo tei (Isa. 40 11) òf ta preokupá!

Lesa Isaias 40:27–31. Den ki forma Isaias ta deskribí Dios? Kon e deskripshon akí di Dios tabata nifiká pa kontestá nan kreensia ku “ ‘SEÑOR no sa di nada ku ta pasa nos, nos Dios no ta tuma nos derechonan na kuenta’ ” (Isa. 40:27).

Den e buki di Ester nos ta haña un otro grupo di hende ku kisas por a konsiderá ku nan kamindanan tabata skondí for di Dios. Den e buki akí no ta menshoná Dios ni un bia. Sinembargo, henter e storia ta un drama ku ta desvelá, di Dios su intervenshon pa salba Su pueblo for di un lei irevokabel pa laga destruí nan. No solamente e storia akí ta deskribí eventonan di pasado, e ta simbolisá un tempu den futuro ora lo bolbe persiguí e pueblo di Dios i lo introdusí un lei atrobe pa nan destrukshon (Rev. 13:15). Bo por imaginá bo kon fásil lo tabata pa konkluí ku si sirkunstansianan asina tabata eksistí, Dios siguramente mester a bandoná Su pueblo? Pero nos no mester tin miedu. E mesun Dios kende a salba Su skohínan den e storia di Ester lo salba nan atrobe den e krísis final.

Nos a lesa kon Isaias a deskribí Dios na e eksiliadonan. Kon abo lo a deskribí Dios na hendenan ku tabata sinti ku Dios a disparsé i a bandoná nan? Kon lo bo a siña nan mira a traves di e wowonan di fe i pa no ta dependiente riba loke nan ta mira rònt di nan ku nan wowonan humano?

Djabièrnè

19 di ougùstùs

Mas Estudio:

Lesa Ellen G. White, “In the Days of Queen Esther,” p. 598–606, den Prophets and Kings.

“Dios no a bisa ku E lo a duna e Spiritu Santu na esnan ku pidiE? I e Spiritu akí no ta un guia aktual real i berdadero? Algun hende parse tin miedu pa tuma Dios riba Su palabra, manera kos ku e lo ta presunshon den nan. Nan ta resa pa Señor siña nos i tòg nan tin miedu pa akreditá e palabra primintí di Dios i kere ku a siña nos di djE. Tanten ku nos bin serka nos Tata selestial humildemente i ku un spiritu pa E siña nos, dispuesto i ansioso pa siña, dikon nos lo mester duda e kumplimentu di Dios di Su propio promesa? Bo no mester dud’E pa niun momento i deshonr’E di e manera ei. Ora bo a buska pa konosé Su boluntat, bo parti den e operashon ku Dios ta pa kere ku E lo guia bo i bendishoná bo ora bo ta hasi Su boluntat. Nos por deskonfiá nos mes si akaso nos malinterpretá Su siñansanan, pero hasi asta esaki un tema di orashon, i konfi’E, ketu bai konfi’E al máksimo, ku Su Spiritu Santu lo guia bo pa interpretá korektamente Su plannan i e funshonamentu di Su providensia.”—Ellen G. White, Manuscript Releases, tomo 6, p. 225.

“Fe ta krese fuerte ora e bin den konflikto ku dudanan i influensianan kontrali. E eksperensia ganá den e pruebanan akí ta di mas balor ku e hoyanan di mas kostoso.”—Ellen G. White, Testimonies for the Church, tomo 3, p. 555.

Preguntanan pa Diskushon:

pregunta 1 Komo klas, papia tokante e tiponan di kosnan ku nos ta kere den dje ku nos no ta mira, kosnan ku nos sa ku ta real ku, sinembargo, ta mas ayá di nos bista. Kon esaki por yuda nos komprondé loke ta nifiká pa mira “Esun ku ta invisibel”?

pregunta 2 Diskutí e pregunta final ku nos ta haña na final di e estudio di djárason. Kuantu bia nos ta haña nos mes den e situashon ei? Kiko nos por hasi ku lo kapasitá nos mihó pa konfia ku e kaminda di Señor ta esun mihó, asta si e no ta loke nos ke?

pregunta 3 Si “fe ta krese fuerte ora e bin den konflikto ku dudanan i influensianan kontrali” i esaki ta hiba na algu ekstremadamente balioso, “di mas balor ku e hoyanan di mas kostoso”, kon esaki lo mester forma e manera ku nos ta wak konfliktonan asina?

pregunta 4 Mayoria di nos a mira hendenan, asta kompañeronan kristian, den situashonnan den kua, a lo ménos for di nos perspektiva, e resultado tabata horibel. E kos di mas pió ku nos a imaginá a sosodé, apesar di e orashonnan i mihó esfuersonan. Kon nos ta komprondé esaki den lus di loke nos a bin ta studiando?