Lès 10

*27 di ougùstùs – 2 di sèptèmber

Humildat den e Krisol
Sabat 27 di ougùstùs
Lesa pa e Estudio di e Siman Akí:

Ezek. 24:15–27; Eks. 32:1–14; Mat. 5:43-48; 1 Pe. 2:18–25; Salmo 62:1–8.

Teksto di Memoria:

"Bendishoná ta esnan humilde, pasobra nan lo eredá e tera." (Mateo 5:5, NKJV).

Nos no ta tende e palabra humilde usá hopi, eksepto kisas ora nos ta lesa tokante Moises òf nos ta studiando e Bienaventuransanan. No ta difísil pa deskubrí dikon tampoko. Ta definí humildat komo “soportá daño ku pasenshi i sin resentimentu”. Nada straño ku nos no ta tende hopi di dje; e ta apénas un prueba bon respetá den kultura awendia. Tin biaha Beibel ta tradusí e palabra akí komo “mansu”. Atrobe, humildat no ta un rasgo di karakter mirá komo deseabel pa mayoria kultura tampoko.

Pero humildat, soportá daño ku pasenshi i sin resentimentu, ta un di e karakterístikanan di mas poderoso di Hesus i Su siguidónan. I tòg, e no ta un fin den su mes: humildat di spiritu por ta un arma poderoso den mannan di esnan ku ta meimei di doló i sufrimentu. Enbèrdat, e krisol ta un gran lugá pa siña humildat di kurason, pasobra a traves di nos propio humildat i lugánan kibrá nos por ta testigunan poderoso pa Dios.

Un Bista Riba e Siman:

Kiko ta e relashon entre sufrimentu i humildat? Kon, den nos propio humildat i lugánan kibrá, nos por ta un testimonio na otronan? Kon humildat por ta realmente un fortalesa, no un debilidat, pa e kristian?

*Studia e lès di e siman akí pa prepará pa Sabat, 3 di sèptèmber.

Djadumingu

28 di ougùstùs

Pan Kibrá i Biña Bashá

Oswald Chambers a bisa ku nos mester bira “pan kibrá i biña bashá” pa otronan. Kiko bo ta kere e ke men ku esaki?

Den henter Beibel tin ehèmpelnan di hendenan ku Dios a “kibra” pa sirbi otronan. Dios a yama Moises pa soportá olanan sin fin di redu i krítika miéntras e tabata guia hende na e Tera Primintí. Dios a yama José na un biahe ku tabata enbolbí traishon i enkarselashon segun ku E tabata hib’é na un posishon di servisio na Egipto. Den kada kaso, Dios a permití situashonnan pa asina e bidanan di Su pueblo por a bira teaternan di Su grasia i kuido, no solamente pa nan mes sino tambe pa e bon di otronan. Dios por usa nos den e mesun forma. Ta fásil pa sinti nos mes rabiá òf heridá den situashonnan asina. Pero manera nos a nota ayera, mansedumbre ta e abilidat duná di Dios pa soportá kosnan asina “ku pasenshi i sin resentimentu.”

Lesa Ezekiel 14:15–27. Kiko ta sosodiendo aki? Dikon Dios a pone Ezekiel dor di e krisol akí?

Den Ezekiel 24:24 Dios ta bisa: "Asina Ezekiel lo ta un señal pa boso. Di akuèrdo ku tur loke el a hasi, boso lo hasi. Ora esaki sosodé, boso lo sa ku Ami ta Señor DIOS." (NIV) Pa medio di Ezekiel su ehèmpel e pueblo di Israel tabata bai konvensé nan mes di e bèrdat tokante ken Dios tabata, e Señor Soberano, i nan lo a mira e bèrdat akí miéntras nan tabata eksperensiá kumplimentu di e profesia ku Ezekiel su bida tabata simbolisando i e sufrimentu ku el a enfrentá. Ken sa kuantu hende lo mira “e Señor DIOS” a traves di nos den nos lugánan kibrá tambe?

Trempan òf lat bida mes ta kibra nos tur. Kiko tabata bo eksperensia ku ta kibrá? Ki lèsnan bo a siña? Kon Señor por usa bo propio alma kibrá pa yuda otro hende?

Djaluna

29 di ougùstùs

Intersediendo pa Grasia

Lesa Eksodo 32:1–14. Ki ròl nos ta haña Moises ta hunga aki?

Despues ku e pueblo a kuminsá adorá e bisé di oro, Dios a disidí ku nan a bai demasiado leu i a anunsiá ku E lo a destruí e pueblo i hasi Moises un gran nashon. Pero mas bien ku tuma Dios su oferta, Moises a boga pa Dios mustra Su grasia na Su pueblo, i Dios a sede.

Eksodo 32:1–14 ta lanta dos asuntu importante. Di promé, Dios su oferta pa destruí e pueblo rebelde i bendishoná Moises tabata un tèst p’e. Dios tabata ke pa Moises demostrá kuantu kompashon e tabata sinti pa e pueblo desesperadamente desobediente akí. I Moises a pasa e tèst. Meskos ku Hesus, el a boga pa miserikòrdia pa pekadornan. Esaki ta revelá algu masha interesante: tin bia tambe Dios por permití nos pa enfrentá oposishon; E lo por permití nos pa ta den un krisol pa asina E, nos, i e universo ku ta wak, por mira kuantu kompashon nos tin pa esnan ku ta rebelde.

Ki motibunan Moises a duna pa a pidi Señor pa no destruí Israel?

Di dos, e pasashi akí ta mustra ku oposishon i desobedensia ta un yamada pa revelá grasia. Grasia ta nesesario ora hende ménos ta meres’é. Pero ora ménos nan meres’é ta tambe e momento ku nos ta sinti ménos pa ofres’é. Pero ora Moises su ruman muhé Miriam tabata kritikando e, el a grita na Señor pa kur’é di su lepra (Numbernan 12). Ora Dios tabata rabiá ku Korag i su siguidónan i a menasá di destruí nan tur, Moises a kai riba su kara pa boga pa nan bidanan. Siguiente dia, ora Israel tabata murmurá kontra Moises pa e morto di e rebeldenan i Dios a menasá di destruí nan tur atrobe, Moises a kai kara abou i a urgi Aaron rápidamente pa hasi ekspiashon pa nan tur (Numbernan 16). Den su propio mansedumbre, den su propio desinteres meimei di e krisol akí, Moises a buska grasia na fabor di esnan ku siguramente no tabata meres’é.

Pensa riba e hendenan rònt di bo ku bo ta kere ta esnan ku ménos meresé grasia. Kon, ku mansedumbre i humildat apnegá, bo por ta un revelashon di e grasia di Dios na nan?

Djamars

30 di ougùstùs

Stima Esnan Ku ta Heridá Nos

Un hende a bisa un bia: “Stima nos enemigunan, anto, no ta nifiká ku nos ta suponé di stima e sushi den kua e pèrla ta derá; mas bien e ta nifiká ku nos ta stima e pèrla ku ta den e stòf. . . . Dios no ta stima nos pasobra nos ta amabel pa naturalesa. Ma nos ta bira amabel pasobra E stima nos.”

Ora bo wak bo “enemigunan”, kiko bo ta mira normalmente, e pèrla òf e stòf rònt di dje?

Lesa Mateo 5:43–48. Hesus ta yama nos pa stima i hasi orashon pa nos enemigunan. Ki ehèmpel for di naturalesa Hesus ta duna nos ei ku ta yuda nos komprondé dikon nos mester stima nos enemigunan? Kiko ta e punto ku E ta siñando nos?

Den Mateo 5:45 Hesus ta usa e ehèmpel di Su Tata den shelu pa ilustrá kon nos mester trata esnan ku heridá nos, ku kisas ta pone nos den e krisolnan di mas pió. Hesus ta bisa ku Su Tata ta manda e bendishon di áwaseru pa tantu e hustu komo esun inhustu; si Dios ta duna asta e inhustu áwaseru, kon anto nos tambe mester trata nan?

Hesus no ta tratando na bisa ku semper nos mester tin un sintimentu kaluroso i agradabel pa tur hende ku kousa nos problema, aunke esaki por ta posibel tambe. Fundamentalmente, amor pa nos enemigunan no ke men di ta un sintimentu ku nos tin pa nan sino akshonnan spesífiko pa ku nan ku ta revelá preokupashon i konsiderashon.

Hesus ta konkluí e pasashi akí ku un versíkulo ku hopi bia ta kousa un kantidat di debate: “Sea perfekto antó, manera boso Tata den shelu” (Mat. 5:48). Pero e nifikashon ta hopi kla den e konteksto: E hendenan ei ku ke ta perfekto manera Dios ta perfekto mester demostrá amor pa nan enemigunan manera Dios ta demostrá amor na esnan di djE. Pa ta perfekto den bista di Dios ta pa stima e oposishon; i pa hasi esaki ta tuma un humildat di kurason ku solamente Dios por duna.

Teniendo den mente nos definishon di humildat (“soportando daño ku pasenshi i sin resentimentu”), skirbi e kambionan ku bo mester hasi pa asina permití Señor duna bo e tipo di humildat di kurason ku lo yuda bo tin e aktitut korekto pa ku “enemigunan”.

Djárason

31 di ougùstùs

Un Boka Será

E ehèmpelnan di mas poderoso di mansedumbre den e krisol ta bin di Hesus. Ora El a bisa pa bin i “siña di Mi, pasobra Mi ta humilde i humilde di kurason” (Mat. 11:29), E tabata ke men e den formanan ku probablemente nos no por imaginá nos mes.

Lesa 1 Pedro 2:18–25. Pedro ta ofresiendo algun konseho sorprendente na esklabonan. E ta deskribí kon Hesus a reakshoná riba trato inhustu i doloroso i ta sugerí na nan ku El a laga pa nan “un ehèmpel pa boso sigui den su pasonan” (1 Pe. 2:21). Ki prinsipionan di mansedumbre i humildat den e krisol nos por siña for di e ehèmpel di Hesus, manera Pedro a ekspres’é?

Ta teribel pa wak un hende trata un otro inhustamente. I ta ekstremadamente doloroso ora nos ta na e banda ku ta risibí un trato asina. Pa motibu ku normalmente nos tin un sentido fuerte di hustisia, ora inhustisia tuma lugá nos instintonan ta pa “drecha kosnan” miéntras nos ta karga loke nos ta kere ta un rabia hustu.

No ta fásil pa biba asin’aki. Ta kisas imposibel a ménos ku nos brasa un bèrdat krítiko, ku den tur situashon inhustu, nos mester kere ku nos Tata den shelu ta den kontròl i ku E lo aktua na nos fabor ora e ta di akuerdo ku Su boluntat. Esaki ta nifiká tambe ku nos mester ta habrí pa e posibilidat ku meskos ku Hesus, nos no ta skapa inhustisia semper. Pero nos mester kòrda semper ku nos Tata den shelu ketu bai ta ku nos i den kontròl.

Pedro su konseho, modelá di bida di Hesus, ta sorprendente pasobra e ta parse di ta ku silensio den kara di sufrimentu inhustu ta un testimonio mas grandi pa e gloria di Dios ku “pone hende na nan lugá.” Ora Kaifas i Pilato a kuestioná Hesus, E por a bisa un kantidat di kos pa koregí e situashon i pa hustifiká Su mes, ma E no a hasié. Su silensio tabata un testimonio na Su humildat.

Kon bo ta dil ku situashonnan den kua a trata bo inhustamente? Kon bo por apliká algun di e prinsipionan, ku nos a wak aki awe, mihó na bo propio bida?

Djaweps

1e di sèptèmber

Nos Baranka i Refugio

Asina tantu bia e hendenan di mas orguyoso, esnan di mas arogante i molestoso, ta esnan ku ta sufri di estima propio abou. Nan arogansia i orguyo, i falta total di humildat òf mansedumbre, ta eksistí komo un tapa, kisas asta inkonsientemente, pa algu ku ta falta paden. Loke nan tin mester ta algu ku nos tur tin mester: un sentido di seguridat, di dignidat, di aseptashon, spesialmente den momentonan di angustia i sufrimentu. Nos por haña esei solamente a traves di Señor. Den poko palabra, humildat i mansedumbre, leu for di ta atributonan di debilidat, ta hopi bia e manifestashon di mas poderoso di un alma ku ta firmemente ankrá riba e Baranka.

Lesa Salmo 62:1–8. Kiko parse ta e trasfondo pa e salmo akí? Riba kiko David ta yamando atenshon? Ki prinsipionan spiritual bo por siña for di loke e ta bisando? Mas importante ainda, kon bo por siña apliká e prinsipionan akí na bo propio bida?

“Sin motibu hende por bira nos enemigu. No solamente e mundu, sino nan propio rumannan, lo malinterpretá e motibunan di e pueblo di Dios. Lo pone e sirbidónan di Dios den lugánan difísil. Lo hasi un seru bira un seritu pa hustifiká hende ora nan ta pursiguí un kurso egoista i inhustu. . . . Pa malinterpretashon lo bisti e hendenan akí ku bistínan skur di deshonestidat pasobra sirkunstansianan mas ayá di nan kontròl a hasi nan trabou konfuso. Lo mustra riba nan komo hendenan ku bo no por konfia. I ta e miembronan di iglesia lo hasi esaki. E sirbidónan di Dios mester arma nan mes ku e mente di Kristu. Nan no mester spera di skapa insulto i baluashon robes. Lo yama nan afishonado i fanátiko. Pero no laga nan bira deskurashá. E mannan di Dios ta riba e wil di Su providensia, guiando Su obra pa e gloria di Su nòmber.—Ellen G. White, The Upward Look, p. 177.

Kon imün bo ta na e reprochenan i flechanan di otronan? Mas probablemente no dje imün ei, bèrdat? Kon bo por pega duru na Señor i ankra bo sentido di balor propio na Esun kende ta stima bo asina tantu ku El a muri pa bo pikánan, i asina yuda protehá bo kontra e insultonan di otronan?

Djabièrnè

2 di sèptèmber

Mas Estudio:

Lesa Ellen G. White, “The Importance of Seeking True Knowledge,” p. 453, 454, den The Ministry of Healing; “The Sermon on the Mount,” p. 298-314, den The Desire of Ages; “The Worker and His Qualifications, p. 630, den Evangelism.

“E difikultatnan ku nos mester topa por ta hopi minimisá pa e humildat kua ta skonde su mes den Kristu. Si nos ta poseé e humildat di nos Maestro, nos lo subi ariba di e insultonan, e rechasonan, e molèsternan, na kua nos ta eksponé diariamente, i nan lo stòp di tira un melankolia riba e spiritu. E evidensia di mas haltu di noblesa den un kristian ta dominio propio. Esun ku, bou di abuzu òf krueldat ta faya di mantené un spiritu kalmu i konfiá, ta roba Dios di Su derechi pa revelá den dje Su mes perfekshon di karakter. Humildat di kurason ta e fortalesa ku ta duna viktoria na e siguidónan di Kristu; e ta e muestra di nan konekshon ku e kortenan ariba.”—Ellen G. White, The Desire of Ages, p. 301.

Preguntanan pa Diskushon:

pregunta 1 Kon humildat ta permití nos “lanta riba” dañonan i molèsternan? Kiko bo ta kere ta e karakterístika di mas importante di humildat ku ta permití nos hasi esaki?

pregunta 2 Den bo propio kultura partikular, kon hende ta mira e karakterístikanan di humildat i mansedumbre? Ta respetá, despresiá nan, òf kiko? Ki tipo di preshonnan bo ta enfrentá den bo kultura ku ta traha kontra di e echo ku bo ta kultivando e karakterístikanan akí?

pregunta 3 Tin kualke gran ehèmpelnan di humildat i mansedumbre di hendenan bibu awendia? Si ta asina, ken nan ta, kon nan a ekspresá e rasgonan akí, i kiko bo por siña for di nan?

pregunta 4 Dikon asina tantu bia nos ta igualá humildat i mansedumbre ku debilidat?

pregunta 5 Nos a mira kon David a buska Señor komo un refugio. Pero kon esei ta funshoná? Kon ta manifestá e refugio ei semper? Den otro palabra, kon nos, komo iglesia, por ta un refugio pa esnan ku mester di un refugio? Ki tipo di refugio bo propio iglesia lokal ta proveé? Kiko bo por hasi pa yuda hasié un lugá di refugio pa esnan ku tin mester di dje?