Lès 11

*3 – 9 di sèptèmber

Wardando den e Krisol
Sabat 3 di sèptèmber
Lesa pa e Estudio di e Siman Akí:

Rom. 15:4,5; Rom. 5:3–5; 1 Samuel 26; Salmo 37:1–11.

Teksto di Memoria:

“Ma fruta di e Spiritu ta . . . pasenshi” (Galationan 5:22, NKJV).

Sientífikonan a hasi un eksperimento ku muchanan di 4 aña i marshmallow. Un sientífiko a bisa kada mucha ku nan por a haña un marshmallow; sinembargo, si e mucha a warda te ora e sientífiko a bolbe bèk for di un respondi, e lo a duna nan dos. Algun di e muchanan a pròp e marshmallow den nan boka na momento ku e sientífiko a bai; otronan a warda. Por a nota e diferensianan.

Despues e sientífikonan a hasi un siguimentu di e muchanan akí den nan añanan di teenager. Esnan ku a warda a resultá di ta mihó ahustá, mihó studiantenan, i mas konfidente ku esnan ku no a warda. Tabata parse ku pasenshi tabata indikativo di algu mas grandi, algu importante den e karakter humano. Nada straño, anto, ku Señor ta bisa nos pa kultiv’é.

E siman akí nos lo wak kiko lo por tin tras di algun di e krisolnan di mas difísil: e krisol di warda.

Un Bista Riba e Siman:

Dikon tin bia nos tin ku warda asina largu riba kosnan? Ki lèsnan nos por siña tokante pasenshi miéntras nos ta den e krisol?

*Studia e lès di e siman akí pa prepará pa Sabat, 10 di sèptèmber.

Djadumingu

4 di sèptèmber

E Dios di Pasenshi

Lesa Romanonan 15:4,5. Kiko nos ta haña den e versíkulonan akí pa nos?

Normalmente nos ta sin pasenshi tokante kosnan ku nos ke realmente òf a primintí nos pero no tin ainda. Hopi bia nos ta satisfecho solamente ora nos haña loke nos tabata anhelá. I pa motibu ku kasi nunka nos ta haña loke nos ke ora nos ke, ta nifiká ku hopi bia nos ta kondená na iritashon i falta di pasenshi. I ora nos ta den e estado akí, ta kasi imposibel pa mantené un pas i konfiansa den Dios.

Warda ta doloroso pa definishon. Na hebreo, un di e palabranan pa “warda ku pasenshi” (Salmo 37:7, NKJV) ta bin di un palabra hebreo ku por tradusí “tin hopi doló,” “sakudí,” “tembla,” “ta heridá,” “ta tristu.” Siña pasenshi no ta fásil; tin bia e ta e esensia mes di loke ta nifiká di ta den e krisol.

Lesa Salmo 27:14, Salmo 37:7, i Romanonan 5:3–5. Kiko e versíkulonan akí ta bisando nos? Na kiko pasenshi ta hiba?

Miéntras nos ta warda, nos por konsentrá riba un di dos kos. Nos por focus riba e kosnan ku nos ta wardando riba dje, òf nos por focus riba Esun kende ta tene e kosnan ei den Su mannan. Loke ta hasi asina un diferensia ora nos ta warda riba algu no ta asina tantu kon largu nos tin ku warda, sino nos aktitut miéntras nos ta warda. Si nos ta konfia Señor, si nos a pone nos bida den Su mannan, si nos a someté nos boluntat na djE, e ora ei nos por konfia ku E lo hasi loke ta mihó pa nos ora ta mihó pa nos, no importá kon difísil ta, tin bia, pa kere esaki.

Riba kiko bo ta wardando desesperadamente? Kon bo por siña someté tur kos na Dios i na Su tempu? Drenta un aktitut di entrega i sumishon kompletu na Señor pa medio di orashon.

Djaluna

5 di sèptèmber

Den Dios Su Tempu

Lesa Romanonan 5:6 i Galationan 4:4. Kiko nan ta bisa nos tokante Dios Su tempu?

Den e versíkulonan akí, Pablo ta bisa nos ku Hesus a bin pa muri pa nos na eksaktamente e tempu korekto. Pero Pablo no ta bisa nos dikon e tabata e tempu korekto. Ta hopi fásil pa lesa e versíkulonan akí i puntra bo mes, Dikon Hesus a warda pa míles di aña te ora El a bin na tera pa dil ku piká, universo no a komprondé ku piká tabata un kos hopi malu hopi tempu promé ku e tempu ei? Nos por puntra dikon Hesus ta wardando pa bin pa di dos bia tambe. Nos por puntra tambe, Dikon Señor ta wardando asina tantu tempu pa kontestá mi orashon?

Pensa riba, por ehèmpel, e profesia di 70 siman di Daniel 9:24–27, e profesia ku ta mustra na Hesus komo e Mesias (repas’é si bo mester). Kon largu e periodo di tempu akí tabata? Kiko esaki ta bisa bo tokante siña warda riba kosnan den Dios Su tempu, asta si e ta tuma loke ta parse pa nos un tempu largu.

Tin hopi motibu spiritual importante dikon nos lo eksperensiá tempunan di warda. Di promé, warda por re-enfoká nos atenshon kita for di “kos” i bèk na Dios Mes. Di dos, warda ta permití nos desaroyá un kuadro mas kla di nos propio motibunan i deseonan. Di tres, warda ta konstruí perseveransia, un perseveransia spiritual. Di kuater, warda ta habri e porta na desaroyá hopi fortalesanan spiritual, manera fe i konfiansa. Di sinku, warda ta permití Dios pone otro pidanan den e pùzel di a kuadro mas grandi. Di seis, nunka nos lo por sa e motibu ku nos tin ku warda; por lo tantu, nos ta siña biba pa medio di fe. Bo por pensa riba kualke otro motibunan pa warda?

Ki ehèmpelnan bo por haña den Beibel di Dios hasiendo kosnan den Su propio tempu, ku por yuda bo siña konfia ku E lo hasi pa bo loke ta korekto den Su propio tempu tambe? (Pensa, por ehèmpel, riba Abraham i Sara i e promesa di un yu hòmber.) Na mes momento, puntra bo mes, “Kiko kisas mi por ta hasiendo ku por a tarda e kontesta riba un orashon ku Dios por a kontestá hopi tempu pasá?”

Djamars

6 di sèptèmber

David: Un lès Ophetivo den Warda

Den 1 Samuel 16:1–13 nos ta mira e hóben David ungí pa Samuel komo rei. Sinembargo, tabata un biahe largu for di e kamponan di su tata, Jesse, te na e trono na Herusalèm. Sin duda, tin bia e tabata sinti su mes meimei di un krisol.

Di promé, ta yama e hóben pa toka muzik pa aliviá e spiritu tormentá di Saul (1 Samuel 16). Despues, e ta bira héroe di Israel ora e mata Goliat (1 Samuel 17). Despues tin hopi aña durante kua David ta koriendo pa su bida. Tantu Samuel komo si yu hòmber Jonatan sa ku David ta destiná pa ta e siguiente rei (1 Sam. 23:17, 1 Sam. 24:20). Pero David no ta hasi nada pa avansá su destino duná pa Dios. De echo, parse ku e ta hasi lo kontrario. Asta ora Saul a purba mat’é i David a kòrta un pida paña for di e rei su mantel, el a deseá ku nunka el a hasi un kos asina (1 Sam. 24:5–7). Atrobe ora Saul ta tratando na mata David, David ta nenga di mata Saul ora e oportunidat surgi (1 Sam. 26:7–11).

Lesa 1 Samuel 26:1–11. Dikon David ta nenga di mata Saul? Ki prinsipionan esaki ta siña nos tokante e manera ku Dios ta efektuá Su plannan pa nos bida?

Awor, lesa 1 Samuel 26:12–25. Kon David su rechaso pa mata Saul ta afektá Saul? Kiko esaki ta siña nos tokante e bentahanan di warda riba Dios?

Ora nos wak henter e kaminda di David pa e trono, kisas nos lo por resumié den un frase kòrtiku, no gara loke Dios no a duna ainda. E regalonan di Dios semper ta mihó risibí for di Su man i den Su tempu. Esaki por rekerí un tempu hopi largu di warda. Sprùitnan di bonchi por krese literalmente denter di oranan, miéntras un palu di eik lo tuma hopi aña. Pero despues, ora e bientunan fuerte bin, e lo no ranka e palu ku rais ku tur.

Pensa kon fásilmente David por a hustifiká ku el a mata Saul. (Despues di tur kos, a bisa David ku e lo haña e trono, i Saul tabata asina malu di tur manera.) Sinembargo, su akshonnan ta papia di berdadero fe den Dios. Kiko kisas lo bo por saka for di e ehèmpel akí pa bo mes den loke sea bo por ta wardando riba dje?

Djárason

7 di sèptèmber

Elias: E Problema di Pura

E konfrontashon riba kabes di Seru Karmelo a terminá (1 Reinan 18). Kandela a bin for di shelu, henter e pueblo a rekonosé e Dios berdadero, i a mata e profetanan falsu. A vindiká Dios. Lo bo a pensa ku Elias a bin ta krese den forsa spiritual segun dia tabata bai, pero di ripiente el a tende algu ku a teroris’é asina tantu ku e ker a muri. Lesa restu di e storia den 1 Reinan 19:1–9. E último palabranan den e versíkulonan ta preokupante: "...i e palabra di SEÑOR a yega na djé, i El a bis'é: 'Kiko bo ta hasi akinan, Elias?'" (1 Reinan 19:9, NIV). Evidentemente, Elias su miedu a pon’é kore i haña su mes na e lugá robes.

Despues di un intervenshon asina poderoso di Señor riba Seru Karmelo, Elias lo mester tabata yen di fe i konfiansa; en kambio, e ta kore ku miedu pa su bida. Ki lès nos por siña di e mal ehèmpel akí?

E storia akí ta ilustrá algu importante: ora nos pura, nos por haña nos mes fásilmente na e lugá robes. Den kaso di Elías, tabata su miedu ku a pon’é ta aplastá i pura drenta den desierto, deseando ku nunka el a nase. Pero tin otro kosnan ku ta pone nos pura fuera di Dios Su plan pa nos.

Lesa e siguiente versíkulonan. Gen. 16:1–3; Num. 20:10–12; Huesnan 14:1–3; Mat. 20:20,21; Lukas 9:52–56; Echonan 9:1. Ki kosnan a pone e personahenan deskribí aki pura fuera di e boluntat di Dios?

Kon fásil ta pa laga kosnan manera ambishon, rabia, pashon, falta di fe, òf un supuesto “zelo” pa Señor pone nos pura bai dilanti kaminda nos no mester ta. Niun hende ta imün pa e peliger akí. E klave ta pa kultivá un fe ku ta konfia den e bondat i miserikòrdia di Dios, kende nos sa ku ta stima nos i ke loke ta mihó pa nos. Esaki no ta sosodé outomátikamente. Fe lo por ta un don, ma e ta un don ku nos mester kultivá, nutri, i wardá selosamente.

Djaweps

8 di sèptèmber

Siña Buska Goso den Señor

“Deleitá bo mes den SEÑOR, i E lo dunabo e deseonan di bo kurason."(Salmo 37:4, NRSV).

Salmo 37:4 ta un promesa maravioso. Imaginá bo haña loke bo tabata ke semper. Pero haña e deseonan di nos kurason ta dependé riba tin un kurason ku ta buska su goso den Señor. Asina anto, kiko ta nifiká “buska bo goso den SEÑOR”?

Lesa Salmo 37:1–11. E konteksto pa Salmo 37:4 ta kisas un tiki sorprendente. David ta skirbiendo tokante ta rondoná pa hendenan ku ta trahando kontra Dios i kontra dje. Ora hende ta traha kontra nos, e reakshon natural ta hopi biaha bira rabiá òf sali pa hustifiká nos mes. Pero David ta konsehá algu diferente.

Den e siguiente versíkulonan, kiko ta David su konseho na e pueblo di Dios den e situashon akí?

Lesa Salmo 37:4 atrobe. Den konteksto di e versíkulonan ku bo a kaba di hasi komentario riba dje, kiko ta nifiká “Deleitá bo mes den SEÑOR”?

David ta ripitiendo bes tras bes, den diferente forma, “Konfia Dios.” Konfia ku E lo aktua. No disgustá, pasobra Dios ta bo Dios, i E ta obrando pa bo, asta aworakí mes. Bo no tin mester di drenta den akshon i purba regla kosnan riba bo mes. Bo Tata den shelu ta den kontròl. Konfi’E. Konfi’E kompletamente.

Ta den e konteksto akí ku David ta skirbi tokante buska goso den Señor. Buska goso den Señor ta nifiká ku nos ta biba den un estado di konfiansa perfekto. Nada por machiká nos pas, pasobra Dios ta aki i obrando. Nos por alab’E, nos por asta smail, pasobra niun hende por burla di nos Dios! Ora nos por siña hasi esaki, nos lo risibí realmente loke nos kurason ta anhelá p’e, pasobra nos lo risibí loke nos Tata amoroso ke duna nos, na e momentu ku mas ta benefisiá nos i Su reino.

Kon bo por siña “buska bo goso den SEÑOR”? Pasa algun tempu den orashon, buskando direkshon di Señor den kon esaki por bira un realidat den bo bida.

Djabièrnè

9 di sèptèmber

Mas Estudio:

Lesa Ellen G. White, “The Anointing of David,” p. 637–642, den Patriarchs and Prophets.

Dios Su plan pa nos por rekerí pa nos hasi un kantidat di wardamentu, i esaki realmente por sinti manera un krisol. Siña pasenshi durante e momento akí por tuma lugá ora nos ta focus riba e persona di Dios i konfia ku E ta aktuando pa nos. Tin hopi motibu pa warda, pero tur ta preokupá ku e kumplimentu di Dios Su plannan pa nos i Su reino. Nos por pèrdè hopi si nos pura bai dilanti di Dios, pero nos por gana hopi dor di mantené un aktitut di konfiansa i goso den dje.

Señor ta pisa i ta midi tur prueba. “Mi no por lesa e propósito di Dios den mi aflikshon, ma E sa kiko ta mihó, i lo Mi komprometé mi alma, kurpa, i spiritu na djE manera na mi Kreador fiel. ‘Pasobra mi sa ta den Ken mi a kere i mi ta konvensí ku E ta kapas pa warda loke mi a konfia na djE te na e dia ei (2 Tim. 1:12). Si nos a eduká i a train nos alma pa tin mas fe, mas amor, pasenshi mas grandi, i un konfiansa mas perfekto den nos Tata selestial, mi sa ku nos lo tabatin mas pas i felisidat dia pa dia segun ku nos ta pasa a traves di e konfliktonan di e bida akí.

“Señor no ta satisfecho di laga nos wòri i preokupá nos mes for di e brasanan di Hesus. Mas ta nesesario di e wardamentu i vigilá ketu kombiná. Nos ta pensa a ménos ku nos ta sinti ku nos no ta riba e kaminda korekto, i nos ta sigui wak paden pa algun señal ku ta pas ku e okashon; pero pa komprobá no ta di sintimentu sino di fe.”—Ellen G. White, Selected Messages, tomo 2, p. 242.

Preguntanan pa Diskushon:

pregunta 1 Kiko ta nifiká ku Hesus “ta pisa i ta midi” tur prueba? Kon sa esaki por yuda nos miéntras nos ta warda?

pregunta 2 Pidi hendenan den bo klas pa duna testimonionan personal riba di kiko warda ku pasenshi ta trata. Kiko tabata nan temornan, nan gosonan? Kon nan a dil ku nan? Kiko nan a siña? Na ki promesanan nan ta gara?

pregunta 3 Kiko boso por hasi komo iglesia òf klas pa yuda otronan ku ta den e krisol miéntras nan ta warda riba Dios Su tempu pa algu?

pregunta 4 Kiko ta e ròl di orashon den desaroyo di pasenshi? Tin otronan ku bo por resa p’e pa asina e Spiritu desaroyá pasenshi den nan bida?