Lès 12

*10 – 16 di sèptèmber

Muriendo Manera un Simia

Sabat 10 di sèptèmber

Lesa pa e Estudio di e Siman Akí:

Fil. 2:5–9; Rom. 12:1,2; 1 Sam. 2:12–3:18; 1 Sam. 13:1-14; Zak. 4:1–14.

Teksto di Memoria:

"Di bèrdat, di bèrdat, Mi ta bisa boso, si un pipita di trigo no kai den tera i muri, e ta keda su so; ma si e muri, e ta duna hopi fruta." (Juan 12:24, NKJV).

Hesus Su kuadro di un pipita di trigo ta un analogia fasinante di nos sumishon na e boluntat di Dios. Di promé, tin e kaimentu. E pipita ku ta kai for di e stèngel di e trigo no tin kontròl riba unda òf kon e ta kai riba suela. E no tin kontròl riba e suela ku ta rondon’é i despues ta primi riba dje.

Di dos, tin e wardamentu. Miéntras e pipita ta den tera, e no sa kiko futuro tin aden. I no por “imaginá” kon bida lo ta den futuro, pasobra e ta solamente un pipita di trigo.

Di tres, tin e murimentu. E pipita posiblemente no por bira un stèngel di trigo a ménos e entregá su situashon konfortabel i seif komo un pipita. E mester “muri”; es desir, e mester entregá loke e tabata semper promé pa asina por transform’é di un simia den un mata ku ta karga fruta.

Un Bista Riba e Siman:

Si nos sa ku e boluntat di Dios ta mihó pa nos, dikon nos tin e asina difísil pa asept’é? Ki ehèmpel di sumishon Kristu a laga pa nos? Kon bo ta mira e analogia di e pipita di trigo apliká den bo bida?

*Studia e lès di e siman akí pa prepará pa Sabat, 17 di sèptèmber.

Djadumingu

11 di sèptèmber

Sumishon pa Servisio

Lesa Filipensenan 2:5–9. Ki mensahe importante tin pa nos den e versíkulonan akí?

Kultura kontemporáneo ta urgi nos tur pa demandá i afirmá nos derechinan. I tur esaki ta bon i ta hopi bia e manera kon e mester ta. Pero manera ku Hesus, e boluntat di Dios por pidi nos pa entregá nos derechinan libremente pa asina sirbi e Tata den formanan ku lo hasi un impakto eterno pa e reino di Dios. E proseso akí di entregá nan por ta difísil i inkonfortabel, kreando e kondishon di un krisol.

Wak kon Hesus a hasi esaki (Fil. 2:5–8). E versíkulonan akí ta deskribí tres paso ku Hesus a dal ora El a someté Su mes na boluntat di e Tata. I na prinsipio, Pablo, di forma alarmante, ta kòrda nos: “Boso mester tin e mesun aktitut ku Kristu Hesus tabatin” (Fil. 2:5).

Pa ta den posishon pa salba nos, Hesus a entregá Su igualdat ku e Tata i a muda bin na tera den e forma i limitashonnan di un ser humano (Fil. 2:6,7).

Hesus no a bin komo un ser humano grandi i glorioso, sino komo un sirbidó di otro sernan humano (Fil. 2:7).

Komo un sirbidó humano, Hesus no a biba un bida largu i pasífiko, ma a bira “obedesidu te na morto,.” Ma E ni a muri den un forma nobel i glorioso. Nò, e tabata “obedesidu te na morto, sí, morto na krus” (Fil. 2:8).

Den ki áreanan di bida e ehèmpel di Hesus akí ta un modelo pa nos? Si derechinan i igualdat ta bon i mester protehá nan, kon lo bo a splika e lógika di tin nesesidat di entregá nan tin bia? Awor, lesa Filipensenan 2:9. Den ki forma e versíkulo akí ta yuda nos komprondé e lógika di sumishon na boluntat di e Tata?
Hasi orashon pa sabiduria di Spiritu Santu, puntrando, “Na ki derechinan mi ta teniendo aworakí ku realmente lo por ta un barera pa someté na Hesus Su boluntat ora mi ta sirbi mi famia, mi iglesia, i esnan rondó di mi? Te na ki grado mi ta dispuesto pa soportá inkomodidat pa sirbi otronan mas efektivamente?”

Djaluna

12 di sèptèmber

Muri ta Bin Promé ku Konosé Dios Su Boluntat

Hopi kristian ta buska sinseramente pa konosé e boluntat di Dios pa nan bida. “Si solamente mi por a konosé e boluntat di Dios pa mi bida, lo mi a sakrifiká tur kos p’E.” Pero asta despues di a primintí Dios esaki, ainda nos por ta konfundí tokante kiko Su boluntat ta. Nos por haña e rason pa e konfushon akí den Romanonan 12:1,2. Pablo ta deskribiendo kon nos por konosé e boluntat di Dios, i e ta hasi un énfasis importante: si bo ke sa kiko e boluntat di Dios ta, bo tin ku sakrifiká promé!

Lesa Romanonan 12:1,2. Pablo ta skirbi ku nos lo ta kapas pa “komprobá kiko ta e boluntat di Dios” (Rom. 12:2, NIV) ora:

Nos tin un berdadero komprondementu di “e miserikòrdia di Dios” pa nos (Rom. 12:1, NIV).
Nos ta ofresé nos mes komo sakrifisionan bibu (Rom. 12:1).
Nos mentenan ta renobá (Rom. 12:2).

Ta solamente e mente renobá ku berdaderamente por komprondé e boluntat di Dios. Pero e renobamentu akí ta dependé riba nos morto na e ami promé. No tabata sufisiente pa Kristu a simplemente sufri pa nos, E mester a muri.

Pidi Spiritu Santu pa mustra bo kualke área den kua bo no ta kompletamente “morto”. Kiko Spiritu Santu ke pa bo entregá pa asina bo bira un “sakrifisio bibu” pa Dios?

Ora áreanan den bo bida no ta kompletamente morto na e ami, Dios ta permití krisolnan pa trese nan na bo atenshon. Sinembargo, nos sufrimentu no solamente ta yuda nos konfrontá nos piká, e ta duna nos tambe un persepshon den kon Hesus a entregá Su mes pa nos. Elisabeth Elliot ta skirbi: “E sumishon di nos kurason su anhelo di mas profundo ta kisas mes serka manera nos ta yega na un komprondementu di e krus. . . . nos propio eksperensia di krusifikashon, aunke e ta inmensamente ménos ku esun di nos Salbador, no opstante ta proveé nos ku un chèns pa kuminsá konos’E den e kompañerismo di Su sufrimentunan. Den tur forma di nos propio sufrimentu, E ta yama nos na e kompañerismo ei.”—Elisabeth Elliot, Quest for Love (Grand Rapids, MI: Fleming H. Revell, 1996), p. 182.

Lesa i resa riba Romanonan 12:1,2. Pensa riba e kosnan ku bo tin ku entregá pa asina bo bira un sakrifisio. Kon esaki ta yuda bo komprondé e sufrimentunan ku Hesus a enfrentá pa bo riba e krus? Kon e konosementu akí por yuda bo drenta den kompañerismo ku Hesus i Su sufrimentunan?

Djamars

13 di sèptèmber

Disponibilidat pa Skucha

“Despues SEÑOR a bini, keda para i a yam'é meskos ku e bianan promé: ‘Samuel, Samuel.’ ‘Papia, pasobra bo sirbidó ta skucha,’ Samuel a kontestá’” (1 Sam. 3:10, NIV).

Bo a yega di tende e bos chikitu ketu ei di Spiritu Santu, ma a ignor’é? Konsekuentemente, tur kos a bai robes, i despues bo a pensa den bo mes, Ai nò, dikon mi no a skucha?

Promé Samuel ta deskribí un storia di un hòmber bieu i dos yu hòmber malbado ku no tabata skucha Señor i un mucha hòmber chikitu ku sí a skucha. Aunke tabatin spièrtamentunan fuerte di Dios, esnan ku mester a kambia nan kaminda no a hasié.

Lesa nan storia den 1 Samuel 2:12–3:18. Ki kontraste ta ser demostrá aki entre esnan ku skucha Dios i esnan ku no ta skucha?

E yu hòmbernan di Eli tabatin otro kosnan den nan mente ku e kosnan di Dios. I asta ora Eli, despues di a tende kiko Dios tabata ke, a papia ku su yunan hòmber, no tabata parse ku e ta hasi nada otro. I su yunan hòmber opviamente no tabata kla pa someté e detayenan di nan bida na e boluntat di Dios. Ki un kontraste ku e hóben Samuel!

Predikador Charles Stanley ta deskribí kon esensial ta pa kultivá frankesa na e bos di Dios den loke e ta yama “kambia bai den neutral.” E ta bisa: “Spiritu Santu . . . no ta papia djis numa pa pasa informashon over. E ta papia pa haña un reakshon. I E sa ora nos agènda tin un slais asina grandi di nos atenshon ku ta un gastamentu di tempu pa sugerí kualke kos kontrali. Ora esei ta e kaso, hopi bia E ta ketu. E ta warda pa nos bira neutral sufisiente pa tende i finalmente obedesé.”—Charles Stanley, The Wonderful Spirit-Filled Life, (Nashville, TN: Thomas Nelson Publishers, 1992), p. 179, 180.

Kiko bo ta kere Stanley ke men ku bira “neutral sufisiente”? Ora bo pensa riba bo frankesa ku Dios, kiko ta prevení bo hopi bia di ta “neutral sufisiente pa tende i finalmente obedesé”? Kiko bo tin ku hasi den bo bida pa kultivá frankesa na e bos di Dios i un desishon pa ta obediente na Su direkshon?

Djárason

14 di sèptèmber

Independensia

Ora Eva a peka den Hòfi di Eden, no tabata simplemente pasobra el a duda Dios Su palabra. E sènter di e problema tabata su kreensia ku e tabatin sufisiente sabiduria pa disidí pa su mes kiko tabata bon i korekto. El a konfia su mes huisio. Ora nos dependé riba nos mes huisio kontrali na konfia e Palabra di Dios, nos ta habri nos mes pa tur sorto di problema.

E storia di Saul ta deskribí e pasonan na independensia i e tragedia ku ta sigui asina rápidamente. Samuel a konsagrá Saul komo e rei di Dios (1 Sam. 10:1). Despues el a duna Saul instrukshonnan spesífiko (1 Sam. 10:8), ma Saul a desobedesé.

Lesa e siguiente parti di e storia den 1 Samuel 13:1–14. Kiko Saul a hasi ku a hiba na su propio kaida?

Tin tres paso ku a hiba Saul abou na e kaminda pa independensia asina lihé despues ku a hasié rei. E problema ta ku niun di e pasonan tabata asina malu den nan mes. Sinembargo, nan tabata kontené e simianan di tragedia pasobra el a tuma kada un independientemente di Dios. Nota e sekuensia den kua e kaida di Saul a tuma lugá.

Saul a bisa: “mi a mira”, e plamamentu di su trupanan i Samuel su ousensia (1 Sam. 13:11). Saul tabata bou di preshon, i el a evaluá ku su mes wowonan loke tabata pasando.
Saul a pasa di “mi a mira” na “mi a bisa”, ku e filisteonan lo a konkistá nan (1 Sam. 13:12, NKJV). Loke el a mira ku su mes wowonan a forma loke el a bisa, òf a sospechá, tokante e situashon.
Saul a move di “mi a bisa” pa “mi a sinti” —obligá na ofresé sakrifisio (1 Sam. 13:12, NKJV). Loke Saul a pensa awor a forma su sintimentunan.

Nos tur a yega di hasi esaki: nos ta dependé riba nos mes bista humano, kua ta hiba nos na dependé roba nos propio pensamentu humano, kua ta hiba na dependé riba nos mes sintimentunan humano. I despues nos ta aktua riba e sintimentunan akí.

Dikon bo ta kere ku tabata asina fásil pa Saul sigui su mes huisio, aunke e tabatin instrukshonnan kla di Dios ta zona ainda den su oreanan? Si nos sa ku nos ta asina frágil i tin konosementu asina imperfekto, dikon nos ta keda dependé riba nos mes? Kiko nos por hasi pa siña konfia den e mandatonan di Señor mas ku den di nos mes?

Djaweps

15 di sèptèmber

Supstitutonan

Manera nos a mira ayera, nos por mina sumishon na e boluntat di Dios ora nos dependé riba nos mes forsa. Ta posibel tambe pa dependé riba otro supstitutonan pa Dios. Ora algun hende ta sinti nan mes deprimí, nan ta bai kumpra algu ku ta hasi nan kontentu. Ora algun ta sinti nan mes inadekuá, nan ta persiguí fama. Ora otronan tin difikultat ku nan kasá, nan ta buska un otro hende pa duna nan intimidat i eksitashon.

Hopi di e kosnan ku nos ta usa por aliviá e preshon, pero no nesesariamente nan ta resolvé e problema ni siña nos kon hèndel e situashon mihó próksimo bia. Solamente ayudo sobrenatural di Dios por hasi esei. E problema ta ku hopi bia nos ta dependé riba supstitutonan pa Dios mas bien ku riba Dios Mes.

Ata aki tres supstituto ku nos por usa na lugá di Dios:

Usa lógika humano òf eksperensia di pasado ora nos tin mester di revelashon divino fresku.
Blòkia problemanan for di nos mente ora nos tin mester di solushonnan divino.
Skapa realidat i evitá Dios ora nos tin mester di komunion ku Dios pa poder divino.

Zakarias ta yuda nos focus riba loke realmente ta importá ora nos ta tentá pa usa supstitutonan. Despues di un ousensia di hopi aña, e eksiliadonan finalmente a regresá for di Babilonia i a kuminsá rekonstruí e tèmpel inmediatamente. Pero tin un kantidat inkreibel di oposishon na esaki (por haña algun trasfondo den Esdras 4–6). Asina Zakarias a bin ku su mensahe di enkurashamentu na Zerubabel, ku tabata guiando e trabou.

Lesa e mensahe akí den Zakarias 4. Kiko Dios ke men den Zakarias 4: 6? Kon Spiritu Santu por a afektá terminashon di un proyekto di konstrukshon? Kiko esaki ta siña nos tokante e relashon entre Spiritu Santu i e kosnan práktiko ku nos ta hasi?

Dios no a prevení e oposishon na e tèmpel ni a spar Zerubabel di e strès di dil kuné. I Dios lo no protehá nos semper for di oposishon. Pero ora oposishon bin, Dios por us’é komo un krisol, pa siña nos dependé riba djE.

Ora strès bin, kiko ta bo promé reakshon? Kuminda? Televishon? Orashon? Sumishon na Dios? Kiko bo kontesta ta bisa bo tokante bo mes i e kosnan ku bo mester siña òf kambia?

Djabièrnè

16 di sèptèmber

Mas Estudio:

Lesa Ellen G. White, “Eli and His Sons,” p. 575-580, i “The Presumption of Saul,” p. 616–626, den Patriarchs and Prophets.

Sumishon na e boluntat di Dios lo bin ora nos muri na nos propio deseonan i ambishonnan. Esaki ta habri kaminda pa berdadero servisio na otronan. Nos no por biba pa Dios sin bira un sakrifisio i biba den frankesa kontinuo na e bos di Dios. Pa nos someté nos boluntat berdaderamente na e boluntat di nos Tata, nos mester rekonosé e peligernan di dependé riba nos mes i riba supstitutonan pa e Palabra i poder di Dios. Komo ku sumishon na e boluntat di Dios ta den sentro di un bida manera di Kristu, Dios por permití krisolnan siña nos dependé riba djE.

“Ta trese e negligensia di Eli klaramente dilanti di tur tata i mama den e tera. Komo resultado di su afekto no santifiká òf su falta di boluntat pa hasi un deber desagradabel, el a kosechá e kosecha di inikidat den su yunan perverso. Tantu e mayor ku a permití e maldat komo e yunan ku a praktik’é tabata kulpabel dilanti di Dios, i E lo no a aseptá niun sakrifisio òf ofrenda pa nan transgreshon.”—Ellen G. White, Child Guidance, p. 276.

Preguntanan pa Diskushon:

pregunta 1 Komo klas, papia tokante e kondishon despektivo di e Yu di Dios ora El a bin na tera komo un ser humano pa asina muri pa nos pikánan. Kiko e ta bisa nos tokante loke sakrifisio propio i apnegashon pa e bon di otronan ta nifiká? Aunke siguramente nos no por hasi nada manera Hesus a hasi, e prinsipio tei i mester ta semper nos dilanti. Den ki formanan nos por, den nos mes esferanan, imitá e tipo di sumishon i sakrifisio propio ku Hesus a mustra nos na e krus?

pregunta 2 Pa hopi hende, someté na Dios sin sa kiko lo sosodé despues, por ta un kos spantoso. Kon lo bo a konsehá hende ku ta dependiendo riba nan mes mas bien ku Dios? Kiko lo bo a bisa pa yuda kita miedu di no sa, òf ta kapas di kontrolá, futuro?

pregunta 3 Komo klas, pasa algun tempu hasiendo orashon pa hendenan ku bo konosé, ku tin difikultat pa someté na e boluntat di Dios, pa nan por mira ku konfia e boluntat di Dios lo ta e úniko ruta na un pas duradero. Na mes momento, ki kosnan práktiko bo por hasi pa e hendenan akí pa yuda nan mira ku nan por someté na Dios i ku Su kaminda ta esun mihó? Den otro palabra, kon Dios por usa bo pa yuda otronan sa di Su amor i disponibilidat pa proveé?