Lès 2

*1 – 7 di òktober

Morto den un Mundu Pekaminoso

1 di òktober

Lesa pa e Estudio di e Siman Akí:

Gen. 2:16,17; Gen. 3:1–7; Salmo 115:17; Juan 5:28,29; Rom. 5:12; 2 Kor. 5:21.

Teksto di Memoria:

“P’esei, meskos ku pa medio di un hende piká a drenta mundu, i morto dor di piká, i asina morto a plama na tur hende, pasobra tur a peka” (Romanonan 5:12, NKJV).

Kristu tabata e Agente Divino a traves di ken Dios a trese e universo i e mundu den eksistensia (Juan 1:1–3, 10; Kol. 1:16; Hebr. 1:2). Pero ora Dios e Tata a otorgá honor spesial na Kristu i a anunsiá ku Nan huntu lo a krea e mundu akí, “Lucifer tabata envidioso i yalurs di Hesu-Kristu” (Ellen G. White, The Story of Redemption, p. 14) i a konspirá kontra djE.

Despues ku a tira Satanas for di shelu, el a disidí di “destruí e felisidat di Adam i Eva” riba tera i asina a “kousa fèrdrit den shelu.” El a imaginá su mes ku “si di kualke manera e por a sedusí nan [Adam i Eva] na desobediensia, Dios lo a hasi algun provishon pa medio di kua lo por a pordoná nan, i e ora ei e mes i tur e angelnan kaí lo tabata den un posishon hustu pa kompartí ku nan di Dios Su miserikòrdia.”—Ellen G. White, The Story of Redemption, p. 27. Totalmente konsiente di e strategia di Satanas, Dios a spièrta Adam i Eva pa no eksponé nan mes na tentashon (Gen. 2:16,17). Esaki ta nifiká ku asta ora e mundu ainda tabata perfekto i sin mancha, ya tabatin restrikshonnan kla pa sernan humano obedesé.

E siman akí nos lo reflekshoná riba e kaida di Adam i Eva, riba kon piká i morto a tuma nos mundu over, i riba kon Dios a planta un simia di speransa pa humanidat, asta bèk den Eden.

*Studia e lès di e siman akí pa prepará pa Sabat, 8 di òktober.

Djadumingu

2 di òktober

Deklarashonnan den Tenshon

E mundu, manera el a bini for di Señor, tabata perfekto (Gen. 1:31). Morto tabata un eksperensia deskonosí pa Adam i Eva. Den e konteksto ei, Dios a bini na e Hòfi di Eden i a spièrta: “ ‘Boso por kome libremente di tur palu den e hòfi; pero di e palu di konosementu di bon i malu boso lo no kome, pasobra riba e dia ku boso kome di dje boso lo muri’ ” (Gen. 2:16,17, NRSV).

Kon Génesis 2:16, 17 ta mustra e realidat di boluntat liber den e perfekshon di Eden? Es desir, dikon Dios mester a spièrta nan si nan no por a skohe libremente?

Algun tempu despues di e spièrtamentu akí di Dios, Satanas a asumí e forma di un kolebra i tambe a drenta Eden. Eva a kontemplá e kolebra ta kome, yen di goso, di e fruta prohibí sin muri. “E mes a kome di e fruta prohibí” (Ellen G. White, Patriarchs and Prophets, p. 54), i nada no a pasa kuné.

Lesa Génesis 3:1–4. Poniendo bo mes den posishon di Eva, dikon e palabranan ei lo por a zona konvisente?

For di perspektiva di lógika humano, e argumento di e kolebra a zona muchu mas konvisente ku e palabra di Dios a zona. Promé ku tur kos, no tabatin evidensia den e mundu natural, te asina leu, pa eksistensia di piká i morto. Di dos, e kolebra realmente tabata komiendo e fruta prohibí i tabata disfrutá mashá hopi di dje. Asina, pa kiko Eva lo a restringí su mes di hasi mesun kos? E mandato di Dios tabata parse di ta muchu restriktivo i sin sentido.

Desafortunadamente, ora Eva a disidí entre e dos deklarashonnan konfliktivo, el a ignorá tres prinsipio básiko:

rason humano no ta semper e manera di mas sigur pa evaluá asuntunan spiritual;
e Palabra di Dios por parse di ta ilógiko i sin sentido pa nos, pero e ta semper korekto i digno di konfiansa; i
tin kosnan ku no ta malu òf robes den nan mes, pero Dios a skohe nan komo tèstnan di obediensia.

Nos mester realisá ku e eksperensia di Eva den e Hòfi di Eden no ta un solo kaso den tempu. Tur dia i tur momento nos mester disidí entre e Palabra di Dios (ku pa hopi por ta impopular) i e apelashonnan seduktor di nos kultura rònt di nos. Nos eskoho lo tin konsekuensianan eterno.

Kua ta maneranan ku e siñansa kla di Beibel ta den konflikto ku e maneranan di mundu?

Djaluna

3 di òktober

Gañá pa e Kolebra

Lesa Génesis 3:1–7. Ki kriterio Eva a uza pa skohe entre e Palabra di Dios i esun di e kolebra?

Génesis 3 ta un di e ehèmpelnan di mas kla di e sikologia di tentashon. Dios a spièrta Adam i Eva ku si nan a kome di e fruta prohibí, nan lo a muri sigur (Gén. 2:16,17). Asumiendo forma di un kolebra, Satanas a uza vários strategia retóriko pa despistá Eva den piká.

Promé, el a generalisá Dios Su prohibishon spesífiko. El a puntr’é: “ ‘Realmente Dios a bisa, Lo bo no kome for di niun palu di e hòfi?’ ” (Gén. 3:1, NASB). Eva a refutá ku e prohibishon tabata enkuanto di solamente e palu spesífiko ei, pasobra si hamas nan mester a kome for di dje òf mishi kuné, nan lo a muri.

Despues, Satanas a kontradesí e deklarashon di Dios. El a asertá kategórikamente: “ ‘Siguramente lo bo no muri!’ ” (Gén. 3:4, NASB).

I finalmente, Satanas a akusá Dios di a reprimí konosementu esensial for di dje i su esposo. E gañadó a argumentá: “ ‘Pasobra Dios sa ku riba e dia ku bo kome di dje [e fruta prohibí] bo wowo lo habri, i lo bo bira manera Dios, konosiendo bon i malu’” (Gén. 3:5, NASB).

Eva su kuriosidat a hib’é riba e tereno enkantá di Satanas. Einan e tabata fòrsá pa disidí sea pa keda fiel na Dios Su mandato restriktivo òf pa brasa Satanas su atrakshonnan seduktor. Dudando Dios Su palabra, el a uza su propio sentidonan, e método empíriko, esun di opservashon personal, pa disidí entre e dos deklarashonnan konfliktivo.

Di promé, el a mira ku for di un perspektiva dietétiko, “e palu tabata bon pa kuminda.” Di dos, for di un punto di bista estétiko, el a mira ku “e tabata un delisia pa bista.” Di tres, for di un análisis lógiko, “e palu tabata deseabel pa hasi hende sabí.” P’esei, den su mes mente, siguramente e tabatin bon motibunan pa pone atenshon na e palabranan di e kolebra i pa kome di e palu prohibí. Desafortunadamente, esaki ta loke el a hasi.

Algun hende ta argumentá ku tur forma di konosementu ta bálido, tanten ku nos retené “e loke ta bon” (1 Tes. 5:21, NASB). Pero e eksperensianan trágiko di Adam i Eva den e Hòfi di Eden ta demostrá ku konosementu, den i di su mes, por ta mashá perhudisial. Tin algun kos ku, enbèrdat, ta kumbiní pa nos no sa.

Kiko e relato akí ta bisa nos tokante kon fásil ta pa rashonalisá i hustifiká nos eskohonan pekaminoso?

Djamars

4 di òktober

“Boso Lo No Muri”

Lesa Génesis 3:4. Kua ta e hopi maneranan diferente ku e mentira akí a ripití a traves di siglonan?

Ta mira un manifestashon poderoso di e mentira akí den e kreensia komun den inmortalidat di e alma. E noshon akí tabata base di hopi religion i filosofia antiguo. Den Egipto antiguo, e tabata motivá e práktikanan di balsamamentu i e arkitektura funerario, manera ta mira den e piramitnan.

E teoria akí a bira tambe un di e pilánan prinsipal di filosofia griego. Por ehèmpel, den The Republic of Plato (E Repúblika di Plato), Socrates ta puntra Glaucon: “Bo no ta konsiente ku nos alma ta inmortal i nunka ta peresé?” Den Plato su Phaedo (Aserka di e Alma), Socrates a argumentá den un tono similar, bisando ku e “alma ta inmortal i indestruktibel, i nos alma realmente lo eksistí den Hades.” E konseptonan filosófiko akí lo a forma hopi di e kultura oksidental i asta kristianismo pos apostóliko. Pero nan a originá muchu mas promé, ya den e Hòfi di Eden, ku Satanas mes.

Meimei di e tentashon edéniko, Satanas a sigurá Eva: “ ‘Siguramente boso lo no muri!’ ” (Gen. 3:4, NASB). Ku e afirmashon enfátiko akí, Satanas ta pone su mes palabra riba e palabra di Dios.

Kontrali na inmoralidat di e alma, kiko e versíkulonan akí ta siña, i kon por uza nan pa kontrarestá e mentira akí? (Salmo 115:17; Juan 5:28,29; Salmo 146:4; Mat. 10:28; 1 Kor. 15:51–58).

E teoria satániko di e inmortalidat natural di e alma a persistí, asta den nos mundu moderno. Bukinan, pelíkulanan, i programanan di televishon tur a sigui promové e idea ku, ora nos muri, nos ta simplemente pasa den un otro estado konsiente. Ki desafortuná ta ku ta proklamá e eror akí riba hopi púlpito kristian tambe. Asta siensia a bira enbolbí. Tin un fundashon den Estádos Unídos ku ta purbando di krea teknologia ku, e ta afirmá, lo kapasitá nos pa kontaktá e mortonan, ku nan ta kere ta bibu ainda pero ta eksistí komo PPM, “personanan posmaterial.” Ku e eror akí asina predominante, no ta sorpresa ku e engaño akí lo hunga un ròl krusial den e eventonan final di historia humano.

Den ki formanan e mentira akí ta manifestá den bo mes kultura? Dikon nos mester dependé riba e Palabra di Dios riba loke nos sentidonan ta bisa nos?

Djárason

5 di òktober

Konsekuensianan di Piká

Basá riba Génesis 3:7–19 i Romanonan 5:12, kua tabata e konsekuensianan prinsipal di piká?

Koutivá pa e diskurso konvisente di e kolebra, Eva no a antisipá e konsekuensianan drástiko di a kaminda ku e tabata siguiendo. Den su mes, e akto di kome di e fruta prohibí no tabata asina signifikante manera loke e tabata representá en realidat. A traves di un akto asina di desobediensia, Eva a kibra su lealtat na Dios i a asumí un aliansa nobo na Satanas.

Génesis 3 ta deskribí e kaida di Adam i Eva i algun di su konsekuensianan di mas trágiko. For di un perspektiva teológiko, theophobia (tin miedu di Dios) a superá tur dos i nan a skonde pa Dios (Gén. 3:8). For di un evaluashon sikososial, nan tabatin bèrgwensa di nan mes i a kuminsá akusá otro (Gén. 3:7,9–13). For di un punto di bista físiko, nan lo a soda, sinti dolo, i finalmente muri (Gén. 3:16–19). I for di un perspektiva ekológiko, e mundu natural a degenerá (Gén. 3:17,18).

E Hòfi di Eden no tabata e lugá bunita i plasentero mas ku e tabatin kustumber di ta. “Ora nan a testiguá den flor marchitando i blachi kayendo e promé señalnan di dekadensia, Adam i su kompañero a lamentá mas profundamente ku hende awe ta lamentá riba nan mortonan. Morto di e flornan frágil i delikado tabata enbèrdat un motibu di tristesa; pero ora e palunan bunita a tira nan blachinan abou, e esena a trese klaramente na mente e echo grave ku morto ta porshon di tur kos bibu.”—Ellen G. White, Patriarchs and Prophets, p. 62.

Adam i Eva no a muri mesora, den sentido di stòp di biba, pero riba e dia ei mes nan a risibí nan sentensia di morto. Señor a bisa Adam: “ ‘Ku sodó di bo kara lo bo kome pan te ora bo regresá na tera, pasobra for di dje a tuma bo; pasobra stòf bo ta i na stòf lo bo bolbe’ ” (Gen. 3:19, NKJV). E Kaida a trese konsekuensianan trágiko enbèrdat pa henter humanidat. Apòstel Pablo ta splika ku “meskos ku piká a bini den mundu pa medio di un hende, i morto a bini pa medio di piká, i asina morto a plama na tur pasobra tur a peka” (Rom. 5:12, NRSV).

E echo tristu i doloroso ta ku meskos ku humanidat a hasi a traves di tur siglo, nos awe ta sufri e konsekuensianan di loke a sosodé den Eden. Ki gradesidu nos por ta, sinembargo, ku pa motibu di Hesus i e krus nos tin speransa di bida eterno den un mundu kaminda pika lo no lanta nunka mas.

Segun ku nos ta reflekshoná riba e eksperensia trágiko di Eva, ki lèsnan nos por siña di dje tokante e konsekuensianan di nos mes echonan pekaminoso?

Djaweps

6 di òktober

E Promé Promesa di Evangelio

Lesa Génesis 3:15,21. Ki speransa por haña den e pasashinan akí pa henter humanidat?

Génesis 3 ta deskribí e tragedia teribel ku a tuma e mundu over despues di e Kaida. Tur kos a kambia, i Adam i Eva por a mira e kontraste entre kon e mundu tabatin kustumber di ta i kiko el a bira.

Pero meimei di nan frustrashon i desesperashon, Dios a duna nan siguransa pa presente i un speransa pa futuro. Na promé lugá, El a maldishoná e kolebra ku un palabra di speransa mesiániko. El a deklará: “ ‘I lo Mi pone enemistat entre abo i e muhé, i entre bo simia i su Simia; E lo heridá bo kabes, i abo lo heridá Su hilchi’ ” (Gen. 3:15, NKJV).

E palabra “enemistat” (Hebr. ’eybah) ta impliká no solamente un kontroversia kósmiko duradero entre bon i malu, sino tambe un avershon personal pa piká, ku Dios Su grasia a implantá den mente humano. Pa naturalesa, nos ta kompletamente kaí (Efe. 2:1,5) i “katibunan di piká” (Rom. 6:20, NKJV). Sinembargo, e grasia ku Kristu ta implantá den kada bida humano ta krea den nos enemistat kontra Satanas. I ta e “enemistat” akí, un don divino for di Eden, ta permití nos aseptá Su grasia salbador. Sin e grasia akí ku ta kombertí i poder ku ta renobá, humanidat lo a sigui ta e prizonero di Satanas, un sirbidó semper kla pa hasi loke e ta manda.

Despues Señor a uza un sakrifisio di animal pa ilustrá e promesa mesiániko akí (lesa Gen. 3:21). “Ora Adam, di akuerdo ku Dios Su direkshonnan spesial, a hasi un ofrenda pa piká, e tabata un seremonia di mas doloroso p’e. E mester a hisa su man pa tuma bida, ku Dios so por a duna, i hasi un ofrenda pa piká. Tabata promé biaha ku el a testiguá piká. Miéntras e tabata wak e víktima sangriento, trosiendo den agonia di morto, e mester a wak padilanti, pa medio di fe, na e Yu di Dios, ku e víktima tabata prefigurá, ku mester a muri sakrifisio di hende.”—Ellen G. White, The Story of Redemption, p. 50.

Lesa 2 Korintionan 5:21 i Hebreonan 9:28. Kiko e tekstonan akí ta siña tokante loke a revelá pa promé biaha den Eden?

Sabiendo ku finalmente nan lo a muri (Gen. 3:19,22–24), Adam i Eva a bandoná Hòfi di Eden. Pero nan no a bai sunú òf ku nan mes bistí di blachi di figo (Gen. 3:7). Dios Mes a “traha túnikanan di kueru” pa nan, i asta El a bisti nan (Gen. 3:21, NKJV), un símbolo di Su hustisia ku ta kubri (lesa Zak. 3:1–5, Lukas 15:22). P’esei, asta den e tempu ei, for di prinsipio, den Eden asta, a revelá e evangelio na humanidat.

Djabièrnè

7 di òktober

Mas Estudio:

Lesa Ellen G. White, “The Temptation and Fall,” p. 52–62 i “The Plan of Redemption,” p. 63–70, den Patriarchs and Prophets; “The Knowledge of Good and Evil,” p. 23–27, den Education.

Den añanan resien, a hasi estudionan riba loke ta yama Near Death Experiences (NDEs) [Eksperensianan Serka di Morto]. Loke ta pasa ta ku hende ta “muri”, den sentido ku nan kurason ta stòp di bati, i nan ta stòp di hala rosea. Sinembargo, despues nan ta bin bèk na bida, pero ku storianan fantástiko di zueif den un otro esfera di eksistensia i topa ku un ser di lus. Algun asta ta papia tokante topa ku miembronan di famia ku a muri hopi tempu pasá. Hopi hende, asta kristiannan, ku no ta komprendé e bèrdat tokante morto, ta kere ku e storianan akí ta mas prueba di e inmortalidat di e alma. Sinembargo (i esaki mester ta e spièrtamentu di mas kla ku algu ta robes), mayoria di esnan ku tin e eksperensianan akí ta afirmá ku e sernan spiritual ku nan a topa kuné durante e NDEs a duna nan palabranan di konsuelo, deklarashonnan bunita tokante amor, pas, i bondat. Pero nan no ta tende nada tokante salbashon den Kristu, nada tokante piká, i nada tokante huisio. Miéntras nan ta haña un sabor di bida kristian despues di morto, nan lo no mester a haña a lo ménos un lèk di e siñansanan kristian di mas básiko huntu kuné? Sinembargo, loke ta siña nan ta zona mayormente manera dogma di Era Nobo, ku lo por splika dikon, den hopi kaso, nan ta sali ménos inkliná pa ku kristianismo ku nan tabata promé di a “muri.” Tambe, dikon niun di e kristiannan, konvensí ku nan NDEs tabata un bista antisipá di e shelu kristian, nunka ta haña niun teologia kristian miéntras nan ta aya, kontrali na e dósis grandi di sentimentalismo di Era Nobo? E kontesta ta ku e mesun ku a gaña Eva den Eden, a gaña nan, i ku e mesun mentira tambe. (Wak lès 11.)

Preguntanan pa Diskushon:

pregunta 1 Kon e eksperensia di Adam i Eva ta demostrá ku Dios Su pordon no nesesariamente ta retrosedé tur konsekuensia di Piká? Dikon esaki ta un bèrdat asina importante pa kòrda semper?

pregunta 2 E palu di konosementu di bon i malu tabata e “tereno fukiá” di e enemigu pa Adam i Eva. Kiko ta algun “terenonan fukiá” ku nos lo por haña nos mes tentá pa drenta?

pregunta 3 Satanas ta tratando na hiba Dios Su pueblo na kere ku “e rekerimentunan di Kristu ta ménos estrikto ku nan a kere un tempu, i ku pa medio di konformidat na e mundu nan lo a ehersé un influensia mas grandi ku esnan mundano.”—Ellen G. White, Testimonies to Ministers and Gospel Workers, p. 474. Kiko nos mester hasi pa asina no kai den e trampa sutil akí?