E Resurekshon di Moises

Lesa Judas 9 i Lukas 9:28–36. Kua evidensianan bo ta haña den e tekstonan akí pa e resurekshon korporal di Moises?

Algun tata di iglesia griego di Alexandria a argumentá ku, ora Moises a muri, a mira dos Moises: unu bibu den spiritu, un otro morto den e kurpa; un Moises subiendo na shelu huntu ku angelnan, e otro derá den tera. (Lesa Origen, Homilies on Joshua 2.1; Clement of Alexandria, Stromata 6.15.) E distinshon akí entre e suposishon di e alma i entiero di e kurpa kisas por tin sentido pa esnan ku ta kere den e konsepto griego di e alma inmortal, pero e idea no ta den Beibel. Judas 9 ta konfirmá e siñansa bíbliko di e resurekshon di e kurpa di Moises, pasobra e disputa tabata "tokante e kurpa di Moises" i no tokante niun supuesto alma ku a sobrebibí.

Deuteronomio 34:5–7 ta bisa nos ku Moises a muri na edat di 120 aña, i Señor a der’é den un lugá skondí den un vaye na e tera di Moab. Pero Moises no a permanesé hopi tempu den e graf. "Kristu Mes, huntu ku e angelnan ku a dera Moises, a baha for di shelu pa yama e santu drumí. . . . Pa promé biaha, Kristu tabata na punto di duna bida na e morto. Ora e Prens di bida i esnan briante tabata aserká e graf, Satanas tabata alarmá pa su soberania. . . . Kristu no a rebahá su mes pa drenta den konflikto ku Satanas. . . . Pero, Kristu a sede tur kos na Su Tata, bisando: 'Señor reprendé bo'. Judas 9. . . . E resurekshon a keda sigurá pa semper. Satanas a keda privá di su presa; e mortonan hustu lo a biba atrobe.”—Ellen G. White, Patriarchs and Prophets, p. 478, 479.

Ta haña evidensia kla di Moises su resurekshon na e transfigurashon. Einan Moises a aparesé huntu ku profeta Elias, ku a keda trasladá sin a mira morto (2 Reinan 2:1–11). Moises i Elias asta a dialogá ku Hesus (lesa Lukas 9:28–36). “I mira, dos hòmber tabata papia kunE, ku tabata Moises i Elias, kendenan a aparesé den gloria i tabata papia di Su morto ku E tabata na punto di kumpli kuné na Herusalèm" (Lukas 9:30, 31, NKJV). Moises su aparishon, prueba di Kristu su viktoria benidero riba piká i morto, ta deskribí akinan den términonan inekibokabel. Tabata Moises i Elias, no nan "spiritu" (despues di tur kos, Elias no a muri), ku a aparesé na Hesus einan.

No a permití Moises pa drenta e Kanaan terenal (Deut 34:1–4) sino a tum’é den e Kanaan selestial. Kiko esaki ta siña tokante kon Dios "ta kapas pa hasi ekstremadamente abundantemente riba tur loke nos pidi òf pensa, di akuerdo ku e poder ku ta obra den nos" (Efe. 3:20, NKJV)?

Dos Kaso di Tèstamènt Bieu

Lesa 1 Reinan 17:8–24 i 2 Reinan 4:18–37. Kua similaridat i diferensianan bo ta mira den e dos resurekshonnan akí?

Den Hebreonan 11 nos ta lesa ku pa fe, “muhénan a risibí nan mortonan bèk pa medio di resurekshon" (Hebr. 11:35, NASB). Esaki tabata e kaso den e dos resurekshonnan deskribí den e tekstonan pa awe.

Esun di promé (lesa 1 Reinan 17:8–24) a tuma lugá durante e gran apostasia na Israel, ku a sosodé bou di influensia di Rei Akab i su esposa pagano Jezabel. Ora un sekura severo tabata asotá e tera, Dios a manda Elias bai Sarepta, un stat pafó di Israel. Einan el a topa un pober biuda di Fenisia ku tabata na punto di kushina un último kuminda miserabel pa e mes i su yu hòmber, i despues muri. Pero nan bida a keda salbá pa e milager di e hariña i e zeta, ku no a kaba te ora e sekura a pasa. Algun tempu despues su yu hòmber a bira malu i a muri. Den desesperashon, e mama a supliká Elias, ku a sklama na Señor. "SEÑOR a skucha e bos di Elias; i bida di e mucha hòmber a bolbe na dje i el a biba atrobe" (1 Reinan 17:22, NASB).

E di dos resurekshon (lesa 2 Reinan 4:18–37) a tuma lugá na Shunem, un pueblo chikí na sùit di Seru di Gilboa. Eliseo a yuda un biuda pober paga su debenan pa medio di e milager di yena hopi butishi ku zeta (2 Reinan 4:1–7). Despues, na Shunem, el a topa un muhé kasá prominente ku no tabatin niun yu. E profeta a bis’é ku lo e a haña un yu hòmber, i el a sosodé manera predesí. E yu a krese i tabata salú, pero un dia el a bira malu i a muri. E muhé Sunamita a bai Seru Karmelo i a pidi Eliseo pa bin kuné pa wak su yu hòmber. Eliseo a hasi orashon persistentemente na Señor, i finalmente e yu tabata bibu atrobe.

E muhénan akí tabatin diferente trasfondo pero mesun fe ku ta salba. E biuda di Fenisia a alohá profeta Elias den un tempu ekstremadamente difísil ora no tabatin un lugá sigur p’e den Israel. E muhé sunamita i su esposo a traha un kamber spesial kaminda profeta Eliseo por a keda miéntras e tabata pasa a traves di nan region. Ora e dos muchanan a muri, nan mamanan fiel a apelá na e profetanan di Dios ei i tabatin e goso di mira nan yunan biba atrobe.

Esakinan ta gran storianan, pero pa kada un di e dos relatonan akí, kuantu otronan no kontá no tabatin algu asina milagroso ku a sosodé? Kiko e echo tristu akí mester siña nos tokante kon sentral na nos fe e resurekshon primintí na fin di tempu ta?

E Yu Hòmber di e Biuda di Nain

Beibel ta bisa ku Hesus "tabata kana rònt hasiendo bon tur kaminda i kurando tur ku tabata oprimí pa diabel, pasobra Dios tabata kunE" (Echonan 10:38, NASB). Enbèrdat, tur e Evangelionan ta yen di relatonan di Hesus ministrando na hopi alma den nesesidat i yen di doló, motibu di kon mas despues hopi hudiu a yega na kere ku Hesus tabata e Mesias primintí.

"Tabatin pueblonan kompletu kaminda no tabatin un keho di enfermedat den niun kas, pasobra El a pasa serka nan i a kura tur nan enfermonan. Su trabou a duna evidensia di Su unshon divino. Amor, miserikòrdia, i kompashon tabata revelá den kada akto di Su bida; Su kurason tabatin simpatia tierno pa e yunan di hende. El a tuma naturalesa di hende, pa E por a alkansá hende su nesesidatnan. Esnan di mas pober i di mas humilde no tabatin miedu di aserk’E. Asta muchanan chikitu tabata atraé na djE.”—Ellen G. White, Steps to Christ, p. 11, 12.

Lesa Lukas 7:11–17. Kua diferensianan importante tin entre loke a sosodé den e resurekshon akí i esnan ku nos a wak ayera?

Durante Su ministerio na Galilea, Hesus a kura e enfermonan i a saka demoñonan. Un biaha E i Su siguidónan tabata aserkando e portanan di Nain, ora ku un proseshon funerario tabata pasando a traves di e portanan ei. Den e kaha di morto habrí tabatin e úniko yu hòmber di un biuda, ku tabata yorando di forma inkonsolabel. Yen di kompashon pa e mama afligí, Hesus a bis’é, “No yora.” Despues Hesus a bira na e yu hòmber morto den e kaha di morto i a orden’é: “Hóben, Mi ta bisa bo, lanta.” E yu a biba bèk i Hesus a “present'é na su mama" (Lukas 7:13–15, NKJV). E presensia di Hesus a kambia henter e senario kompletamente, i hopi hende ku a presensiá e milager tabata sa no solamente ku algu asombroso a sosodé, sino ku un hende spesial (nan tabata yam’é “un gran profeta") tabata meimei di nan.

Tantu e biuda di Sarepta (1 Reinan 17:8–24) komo e muhé sunamita (2 Reinan 4:18–37) a pidi pa yudansa, di Elias i Eliseo respektivamente. Pero e biuda di Nain a haña yudansa sin sikiera el a pidi p’e. Esaki ta nifiká ku Dios ta preokupá pa no, asta ora nos ta inkapas òf ta sinti indigno pa pidiE pa yudansa. Hesus a mira e problema i a atendé kuné, asina típiko di Hesus a lo largu di henter Su ministerio.

Religion berdadero ta enbolbí preokupá pa wérfano i biudanan rònt di nos (Santiago 1:27). Aunke, opviamente, nos lo no ta kapas pa hasi e tipo di milagernan ku Hesus a hasi, kiko nos por hasi pa ministrá na esnan ku ta sufriendo rònt di nos?

Yu Muhé di Jairo

Lázaro

Mas Estudio:

Lesa Ellen G. White, “The Death of Moses,” p. 469–480, den Patriarchs and Prophets; “The Voice of Stern Rebuke,” p. 129–142; “A Prophet of Peace,” p. 237–243, den Prophets and Kings; “The Centurion,” p. 318, 319; “The Touch of Faith,” p 342, 343; “ ‘Lazarus, Come Forth,’ ” p. 524–536, den The Desire of Ages.

"Den Kristu tin bida, original, no fiá, no derivá. ‘Esun ku tin e Yu tin e bida .’ 1 Juan 5:12. E divinidat di Kristu ta e kreyente su garantia di bida eterno. Hesus a bisa: ‘Esun ku kere den Mi lo biba, maske e muri, i tur esnan ku ta biba i ta kere den Mi lo no muri nunka. Bo ta kere esaki?' Kristu aki, [den Juan 11:25, 26], ta wak padilanti na e tempu di Su segundo binida. E ora ei e mortonan hustu lo resusitá inkoruptibel, i lo trasladá e hustunan bibu pa shelu sin a mira morto. E milager ku Kristu tabata na punto di realisá, ora El a resusitá Lázaro for di morto, lo a representá e resurekshon di tur e mortonan hustu. Pa medio di Su palabra i Su obranan El a deklará Su mes e Outor di resurekshon. E Mes ku pronto tabata bai muri riba e krus tabata pará ku e yabinan di morto, un vensedó di graf, i a afirmá Su derechi i poder pa duna bida eterno.”—Ellen G. White, The Desire of Ages, p. 530.

Preguntanan pa Diskushon:

Hopi hende a muri durante e ministerionan profétiko di Elias i Eliseo, komo tambe durante Kristu Su propio ministerio riba tera. Solamente djis un par a resusitá (Lesa Lukas 4:24–27.) Pensa tambe riba e eksperensia di tur e mortonan, den sentido ku sea nan a resusitá den pasado òf na e Segundo Binida, ki diferensia e ta hasi, a lo ménos respekto kon ta pa ta morto? proba ku e mesun Dios akí por òf lo lanta e mortonan, kon e ta revelá na nos e mesun poder asombroso ku e tin i dikon, siguramente, algu manera resurekshon lo no ta mas ayá di Su poder?

Hopi eskritor a traves di siglonan a skirbi tokante e banidat di un bida ku ta terminá semper den morto. Huntu ku otro sernan bibu, galiña, kastor, uster, etc., nos tur ta muri. Sinembargo, pa hende, den un sentido nos situashon ta pió ku pa e animalnan, pasobra nos sa ku nos ta bai muri. (Lesa Ekl. 9:5). Galiñanan, kastornan, i usternan no sa. Dikon, anto, e promesa di resurekshon ta asina krusial pa nos?

Si bo ta kere ku e alma ta inmortal i ku e mortonan, espesialmente e mortonan hustu, ta sigui biba den shelu despues ku nan muri, ki nesesidat tin pa e resurekshon di fin di tempu?

Si un hende yama i puntra, "Sally tei" kisas lo bo por kontestá: "Sí, pero e ta na soño." Si, sinembargo, un hende yama i puntra, "Sally tei" bo no ta bai kontestá: "Sí, pero e ta morto." Dikon no? Kiko esaki ta siña nos tokante e naturalesa di morto?