El a Muri pa Nos

29 di òktober

Lesa pa e Estudio di e Siman Akí:

Rev. 13:8; Mat. 17:22,23; Marko 9:30–32; Juan 19:1–30; Rom.6:23; 1 Kor. 1:18–24.

Teksto di Memoria:

“ ‘I manera Moises a halsa e kolebra den desierto, meskos asina mester halsa e Yu di Hende, pa ken ku kere den djE no mester peresé ma tin bida eterno’ ” (Juan 3:14,15, NKJV).

Ta bisá ku nos no por evitá morto i impuesto. Esei no ta kompletamente bèrdat. Hende por evitá impuesto, pero no morto. Nan lo por ta kapas di posponé morto un par di aña, pero trempan òf lat, morto ta yega semper. I pasobra nos sa ku e mortonan, tantu esnan hustu komo esnan malbado, ta terminá primeramente den e mesun lugá, nos speransa di resurekshon ta nifiká tur kos pa nos. Manera Pablo a bisa, sin e speransa akí, asta “tambe esnan ku a pega soño den Kristu a peresé” (1 Kor. 15:18, NKJV), ku mas bien ta algu straño pa bisa si esnan ku “a pega soño den Kristu” ta zueif rònt den shelu den presensia di Dios.

Pues, Kristu Su resurekshon ta sentral na nos fe, pasobra den Su resurekshon nos tin garantia di esun di nos mes. Pero promé ku Kristu a resusitá for di morto, E, naturalmente, mester a muri. Ta p’esei, meimei di e agonia di Getsemani, den antisipashon d Su morto, El a resa: “ ‘Awor Mi alma a bira intrankil, i kiko lo Mi bisa? Tata, libra Mi di e ora akí? Ma ta pa e propósito akí Mi a bin na e ora akí.’ ” (Juan 12:27, NKJV). I e propósito ei tabata pa muri.

E siman akí nos lo focus riba e morto di Kristu i loke e ta nifiká pa e promesa di bida eterno.

*Studia e lès di e siman akí pa prepará pa Sabat, 5 di novèmber.

Lesa Revelashon 13:8, Echonan 2:33, i 1 Pedro 1:19,20. Kon por a konsiderá Kristu komo “matá desde fundashon di mundu” (NKJV)?

“Tur ku ta biba riba tera lo ador’é, kende no a skirbi nan nòmber den e Buki di Bida di e Lamchi matá for di fundashon di mundu” (Rev. 13:8, NKJV). Loke ta krusial pa nos akinan ta e idea ku Kristu tabata “matá for di fundashon di mundu” (Rev. 13:8, NKJV). Opviamente, nos mester komprendé esaki den un sentido simbóliko (e buki di Revelashon ta yen di símbolo), pasobra no a krusifiká Kristu te na míles di aña despues di kreashon di tera. Loke e teksto akí ta bisando ta ku a regla e plan di salbashon promé ku kreashon di mundu. I sentral na e plan ei lo tabatin e morto di Hesus, e Lamchi di Dios, riba e krus.

Lesa Tito 1:2. Kiko e versíkulo akí ta siña nos tokante kuantu tempu pasá a regla e plan di salbashon, ku tabata sentrá riba e morto di Kristu?

“E plan pa nos redenshon no tabata un idea ku a bin despues, un plan formulá despues di e kaida di Adam. . . . E tabata un despliegue di e prinsipionan ku for di siglonan eterno tabata e fundeshi di e trono di Dios.”—Ellen G. White, The Desire of Ages, p. 22.

A revelá e plan promé na Adam i Eva den e Hardin di Eden (Gen. 3:15,21), i kada sakrifisio di sanger, a lo largu di Tèstamènt Bieu, a tipifik’é. Por ehèmpel, miéntras Dios tabata tèst Abraham su fe, El a proveé un lamchi pa sakrifiká na lugá di Isaac (Gen. 22:11–13). E remplaso akí a tipifiká ainda mas kla e naturalesa supstituto di Kristu Su sakrifisio ekspiatorio riba krus.

Por lo tantu, sentral na henter e plan di salbashon tin e morto supstituto di Hesus, simbolisá pa siglonan pa sakrifisionan di animal, kada unu un símbolo di Hesus Su morto riba krus komo "e Lamchi di Dios, ku ta kita piká di mundu" (Juan 1:29).

Sakrifisionan di animal ta spantoso i sangriento, esei ta bèrdat. Pero dikon e echo spantoso i sangriento ta presisamente e punto ku ta siña nos tokante Kristu Su morto na nos lugá i loke e kosto teribel di piká tabata?

Kiko tabata e reakshonnan di e disipelnan riba Hesus Su pronóstikonan di Su propio sufrimentu i morto, i kiko nan reakshonnan mester siña nos tokante e peligernan di komprendé Skritura robes?

Hesus a nase pa muri, i El a biba pa muri. Kada stap ku El a tuma a tres’E mas serka di Su gran sakrifisio ekspiatorio riba e krus di Kalvario. Totalmente konsiente di Su mishon, E no a permití niun hende ni nada distrayE di esei. En realidat, "henter Su bida tabata un prólogo na su morto riba krus.”—Ellen G. White, Fundamentals of Christian Education, p. 382.

Den e último aña di Su ministerio riba tera, Hesus a papia mas i mas eksplísitamente na Su disipelnan tokante Su morto benidero. Pero nan tabata parse inkapas i no dispuesto pa aseptá e realidat di Su deklarashonnan. Yená ku noshonnan falsu tokante e ròl di e Mesias, e último kos ku nan a spera tabata pa E, Hesus, spesialmente komo e Mesias, muri. Den resúmen, nan teologia falsu a hiba nan den doló i sufrimentu innesesario.

Ya na Nikodemo, Hesus a deklará: “ ‘I manera Moises a halsa e kolebra den desierto, asina tambe ta nesesario pa halsa e Yu di Hende, pa ken ku kere den djE no mester peresé sino haña bida eterno’ " (Juan 3:14,15, NKJV). Miéntras E tabata na Cesarea di Filipo, Hesus a bisa Su disipelnan ku E mester a "bai Herusalèm, i sufri hopi kos di e ansianonan i saserdote prinsipal i eskribanan, i nan lo mat’E, i wòrdu lantá riba e di tres dia" (Mat. 16:21, NKJV). Pasando den sekreto a traves di Galilea (Marko 9:30-32) i durante su biahe final pa Herusalèm (Lukas 18:31–34), Hesus a papia atrobe ku Su disipelnan tokante Su morto i resurekshon. Pasobra no tabata loke nan ker a tende, nan no a skucha. Kon fásil ta pa nos hasi meskos.

Hende, spesialmente e pueblo skohí di Dios, tabatin konseptonan falsu enkuanto di e promé binida di e Mesias. Kua ta algun di e konseptonan falsu ku ta eksistí awe enkuanto di e segundo binida di Hesus?

Lesa Juan 19:1–30. Kua ta e mensahe krusial pa nos den Hesus Su deklarashon " ‘Ta kumplí’ "?

Finalmente, e momentonan krusial pa Kristu, pa humanidat, i pa henter universo a yega. Ku agonia profundo, El a lucha kontra e podernan di skuridat. Pokopoko El a pasa a lo largu di Hòfi di Getsemani, a traves di Su huisionan inhustu, i a subi e seru di Kalvario. Angelnan malbado a purba di vens’E. Miéntras Kristu tabata kologá na e krus, e saserdotenan prinsipal, e eskribanan, i ansianonan, a hasi chèrchi di djE bisando: "’El a salba otronan; E mes E no por salba! Si E ta e Rei di Israel, lag’E baha awor for di e krus, i nos ta ker’E’ " (Mat. 27:42, NKJV).

Kristu por a baha for di e krus i salba su mes? Sí, e tabata kapas pero no dispuesto pa hasi esei. Su amor inkondishonal pa henter humanidat, inkluso e chèrchadónan ei, no a permitiE entregá. En realidat, “e chèrchadónan tabata entre esnan ku E tabata muriendo pa salba; i E no por a baha for di e krus i salba Su mes, pasobra e tabata suhetá, no pa e klabunan, sino pa Su boluntat pa salba nan.”—Alfred Plummer, An Exegetical Commentary on the Gospel According to S. Matthew (London: Elliot Stock, 1910), p. 397.

Aki, den e sufrimentu di Kristu, Hesus tabata derotando e reino di Satanas, aunke ta Satanas a instigá e eventonan ku a hiba na e krus, inkluyendo e traishon di Hudas (Juan 6:70; Juan 13:2,27). "Di algun manera, den un forma ku e Evangelista no ta purba deskribí, e morto di Hesus ta tantu un akto di Satanas komo un akto den kua Hesus ta gana viktoria riba Satanas.”—George E. Ladd, A Theology of the New Testament, rev. ed. (Cambridge, UK; Lutterworth Press, 1994), p. 192.

Gritando for di e krus: “ ‘Ta kumplí’ ” (Juan 19:30), Kristu a impliká no solamente ku Su agonia a yega na un fin, sino spesialmente ku El a gana e gran konflikto kósmiko históriko kontra Satanas i su forsanan di maldat. "Henter shelu a triunfá den e viktoria di e Salbador. Satanas tabata derotá, i tabata sa ku el a pèrdè su reino.”—Ellen G.White, The Desire of Ages, p. 758.

Ta difísil pa kapta e kontraste asombroso akinan: den humiashon apsoluto di e Yu di Dios El a gana, pa nos i pa universo, e viktoria di mas grandi i di mas glorioso.

Pensa riba kon malu piká mester ta ku el a rekerí e morto di Kristu komo ekspiá p’e. Kiko e bèrdat akí mester siña nos tokante kon inútil nos obranan ta pa optené mérito dilanti di Dios? Despues di tur kos, kiko nos por hasi pa agregá na loke Kristu ya a hasi pa nos? Trese bo kontesta na klas riba Sabat.

Lesa Juan 3:14–18 i Romanonan 6:23. Kiko e versíkulonan akí ta siña nos ku e morto di Kristu a logra pa nos?

Ora Hesus a yega na e riu di Hordan pa batisá, Juan Bautista a sklama: " ‘Mira! E Lamchi di Dios, ku ta kita piká di mundu!’ " (Juan 1:29, NKJV). E deklarashon akí a rekonosé Kristu komo e Lamchi di Dios antitípiko na ken tur berdadero sakrifisio di Tèstamènt Bieu a mustra.

Pero e sakrifisionan di animal no por a kita e pikánan riba nan mes (Hebr. 10:4). Nan tabata proveé solamente pordon kondishonal dependiente di e efektividat di e futuro sakrifisio di Kristu riba krus. "Si nos konfesá nos pikánan, E ku ta fiel i hustu pa pordoná nos nos pikánan i pa purifiká nos di tur tur inhustisia" (1 Juan 1:9, NKJV).

Lesa Juan 3:16, 17. Ki gran speransa nos por saka for di e versíkulonan akí, spesialmente ora bo ta sinti korektamente ku bo meresé pa kondená bo pa algu ku bo a hasi?

Pensa kiko tur esaki ta nifiká. Hesus, Esun ku a krea e kòsmòs (Juan 1:1–3), a ofresé Su Mes pa kada un di nos, un sakrifisio pa pikánan, tur pa asina nos no tin ku ta kondená pa algu ku hustamente por a kondená nos p’e. Esaki ta e gran promesa di evangelio.

Hesu-Kristu a deklará ku “ ‘Dios a stima mundu asina tantu ku El a duna Su úniko Yu’ ” pa muri pa nos (Juan 3:16, NRSV). Pero nos no mester lubidá nunka ku Kristu a ofresé Su mes boluntariamente na nos fabor (Hebr. 9:14). Luther a referí na e krus komo "e altar riba kua E [Kristu], konsumí pa e kandela di amor ilimitá ku tabata kima den Su kurason, a presentá e sakrifisio bibu i santu di Su kurpa i sanger na e Tata, ku ferviente interseshon, gritunan duru, i lágrimanan kayente i ansioso (Hebr. 5:7).”—Luther's Works, tomo 13 (St. Louis, MO: Concordia Publishing House, 1956), p. 319. Kristu a muri un biaha pa tur hende (Hebr. 10:10) i pa semper (Hebr. 10:12), pasobra Su sakrifisio ta mas ku sufisiente i nunka ta pèrdè su poder.

I tin mas: "Si solamente un alma lo a aseptá e evangelio di Su grasia, Kristu, pa salba esun ei, lo a skohe Su bida di esfuerso i humiashon i Su morto di bèrgwensa.”—Ellen G. White, The Ministry of Healing, p. 135.

Lesa atrobe Juan 3:16, remplasando e palabranan "e mundu" i "ken ku" pa bo propio nòmber. Kon bo por siña, momento pa momento, spesialmente ora bo ta tentá pa peka, pa hasi e promesa maravioso akí di bo?

Lesa 1 Korintionan 1:18–24. Kiko Pablo ta bisando tokante e krus, i kon e ta kompar’é ku e "sabiduria di mundu"? Dikon, asta awe, ora "materialismo" (e idea ku tur realidat ta solamente material, loke ta nifiká ku no tin Dios òf esfera sobrenatural di eksistensia) ta dominá "e sabiduria di mundu," e mensahe di e krus ta asina importante?

E krus di Kristu ta e sentro mes di historia di salbashon. "Eternidat nunka por komprendé e profundidat di amor revelá na e krus di Kalvario. Tabata einan ku e amor infinito di Kristu i e egoismo ilimitá di Satanas a para kara kara.”—Stephen N. Haskell, The Cross and Its Shadow (South Lancaster, MA: Bible Training School, 1914), p. v.

Miéntras Kristu tabata ofresiendo Su mes humildemente komo un reskate pa e rasa humano, Satanas tabata hundiE egoistamente den sufrimentu i agonia. Kristu no a muri djis e morto natural ku tur ser humano mester enfrentá. El a muri e segundo morto, pa asina tur esnan ku asept’E lo no tin ku eksperensi’é nunka nunka pa nan mes.

Enkuanto di nifikashon di e krus, tin vários aspekto importante ku nos mester rekordá. Na promé lugá, e Krus ta e revelashon supremo di e hustisia di Dios kontra piká (Rom. 3:21–26). Na di dos lugá, e Krus ta e revelashon supremo di e amor di Dios pa pekadornan (Rom. 5:8). Na di tres lugá, e Krus ta e gran fuente di poder pa kibra e kadenanan di piká (Rom. 6:22, 23; 1 Kor. 1:17–24). Na di kuater lugá, e Krus ta nos úniko speransa di bida eterno (Fil. 3:9–11; Juan 3:14–16; 1 Juan 5:11, 12). I na di sinku lugá, e Krus ta e úniko antídoto kontra un futuro rebelion den e universo. (Rev. 7:13–17, Rev. 22:3).

E "sabiduria di mundu" no por deskubrí ningun di e bèrdatnan krusial akí tokante e krus. Al kontrario, e tempu ei, manera awor, e predikashon di e krus ta "lokura" pa sabiduria mundano, ku hopi biaha ni sikiera ta rekonosé e bèrdat di mas opvio ku por tabatin: ku ta eksistí un Kreador (lesa Rom. 1:18–20).

E palabra griego pa "lokura" ta konektá ku e palabra na papiamnetu "loko"; es desir, e predikashon di e krus ta "lokura" di akuerdo ku e "sabiduria di mundu.” Sabiduria mundano, no por konosé Hesus òf e salbashon ku E ta ofresé nos pa medio di Su morto supstituto riba e krus.

Kualke balor ku "sabiduria mundano" por ofresé, dikon nunka nos no mester lag’é interferí ku loke nos ta kere tokante Hesus i e speransa ku ta ofresé nos pa medio di "e lokura di e mensahe prediká” (1 Kor. 1:21, NKJV)?

Lesa Ellen G. White, “Gethsemane,” p. 685–697; “Calvary,” p. 741–758, den The Desire of Ages; “Repentance,” p. 27, den Steps to Christ.

"Mi a mira ku henter shelu ta interesá den nos salbashon; i nos lo ta indiferente? Nos lo ta negligente, komo si fuera ta un asuntu di poko balor, si nos ta salba òf pèrdí? Nos lo menospresiá e sakrifisio ku a hasi pa nos? Algun a hasi esaki. Nan a hunga ku miserikòrdia ofresé, i e desaprobashon di Dios ta riba nan. Lo no hasi e Spiritu di Dios tristu semper. E lo bai si hasiE tristu un poko mas. Despues ku Dios a hasi tur kos E tabata por pa salba hende, si nan mustra pa medio di nan bida ku nan ta menospresiá e miserikòrdia ofresé pa Hesus, morto ta nan porshon, i e lo ta karu. E lo ta un morto horibel; pasobra nan lo tin ku sinti e agonia ku Kristu a sinti riba e krus pa kumpra pa nan e redenshon ku nan a rechasá. I e ora ei nan lo realisá loke nan a pèrdè, bida eterno i e herensia inmortal. E gran sakrifisio ku a hasi pa salba almanan ta mustra nos su balor. Unabes e alma presioso pèrdè, e ta pèrdí pa semper.”—Ellen G. White, Testimonies for the Church, tomo 1, p. 124.

Preguntanan pa Diskushon:

Hebreonan 10:4 ta bisa, "Ta imposibel pa e sanger di toro i kabritu kita piká" (NIV). Asina, kon hende tabata salba den tempu di Tèstamènt Bieu? Kon e analogia di un karchi di krédito, ku bo ta usa pa hasi pagonan pero despues bo mester paga e faktura di e karchi di krédito, ta yuda nos komprondé e tema akí mihó?

Lesa 2 Korintionan 5:18–21. Si Kristu a muri pa pikánan di henter mundu, dikon no ta tur hende lo ta salbá? Dikon eskoho personal ta hunga un ròl krusial den determiná ken lo ta salbá pa e krus i ken lo bai pèrdí apesar di e gran sakrifisio hasí na nan fabor?

Kua ta algun kos ku "sabiduria mundano" ta siña ku ta "lokura" pa Dios? Ke tal di e idea ku tur e diseño inkreibel i bunitesa di e mundu ta puramente un kreashon kasual? Òf ku e universo a surgi for di apsolutamente nada? Kua otro ehèmpelnan bo por pensa riba dje?

Pensa riba e último pregunta di e estudio di djamars. Ke tal e krus, i loke a sosodé einan, ta hasi e idea di salbashon pa obra ta asina di poko importansia, asina eróneo, i asina kontrali na e plan di salbashon?