E Kosmovishon Bíbliko

10 di desèmber

Lesa pa e Estudio di e Siman Akí:

Lukas 2:52; Mat. 4:23; 1 Kor. 6:19,20; Salmo 24:3,4; Echonan 8:4–24; 1 Juan 3:1–3.

Teksto di Memoria:

“Awor ku e Dios di pas Mes santifiká boso kompletamente; i ku henter boso spiritu, alma, i kurpa ta preservá sin kulpa na e binida di nos Señor Hesukristu” (1 Tesalonisensenan 5:23, NKJV).

E buki di Revelashon ta papia di dos "globalisashon" importante, promé ku e Segundo Binida di Kristu. Revelashon 13 ta deskribí e globalisashon di eror, ora "henter e mundu" lo keda asombrá i sigui e bestia ku a subi for di laman Den klas, diskutí bo kontesta riba e pregunta final di djaweps. Kon bo por sa si bo ta prepará, i bo por tin e siguridat sin ta presuntuoso? (Rev. 13:3,7,8,12,16, NKJV). Revelashon 14 ta destaká e globalisashon di bèrdat, ora lo prediká e "evangelio eterno" “na tur nashon, tribu, lenga i pueblo" (Rev. 14:6,7, NKJV). Durante e “tempunan angustioso" ei (2 Tim. 3:1, NRSV), "tur bientu di doktrina" lo ta suplando (Efe. 4:14, NKJV) i hende lo "bira for di skucha e bèrdat i dual bai na mitonan" (2 Tim. 4:4, NRSV). "A traves di e dos gran erornan, inmortalidat di e alma i santidat di djadumingu, Satanas lo trese e hendenan bou di su engañonan. Miéntras esun promé ta pone e fundeshi di spiritismo, e último ta krea un laso di simpatia ku Roma.”—Ellen G. White, The Great Controversy, p. 588.

Te ora ku e eventonan final akí desplegá nan mes, nos mester permanesé firme den nos kreensia den tur e bèrdat ku nos tin, ku ta inkluí e naturalesa di humanidat i di morto, miéntras nos ta buska pa Spiritu Santu guia nos, ku e propósito di ta kla pa e aparishon glorioso di Kristu.

*Studia e lès di e siman akí pa prepará pa Sabat, 17 di desèmber.

Lesa Lukas 2 52. Kua kuater dimenshonnan di Hesus su kresementu ta menshoná den e pasashi akí?

Hesus tabata e Ser Humano perfekto, i su kresementu a abarká tur dimenshon básiko di eksistensia humano. Di akuerdo ku Lukas 2:52, "Hesus a krese den sabiduria [mentalmente] i estatura [físikamente], i den grasia ku Dios [spiritualmente] i hende [sosialmente]" (NIV). "Su mente tabata aktivo i penetrante, ku un reflekshon i sabiduria mas ayá di Su añanan. Sinembargo, Su karakter tabata bunita den su simetria. E podernan di mente i kurpa tabata desaroyá gradualmente, di akuerdo ku e leinan di infansia. Komo mucha, Hesus tabata manifestá un hermosura pekuliar di disposishon. Su mannan boluntario tabata semper kla pa sirbi otronan. E tabata manifestá un pasenshi ku nada por a perturbá, i un fieldat ku nunka lo a sakrifiká integridat. Firme manera un baranka na prinsipionan, Su bida tabata revelá un kortesia di grasia altruista.”—Ellen G. White, The Desire of Ages, p. 68, 69.

Lesa Mateo 4:23. Kon nos por desaroyá awe efikasmente e tripel ministerio di Hesus: siña, prediká, i sana?

Si nos rekonosé ku un ser humano ta un persona integrá i indivisibel, e ora ei nos no por restringí nos religion solamente na asuntunan spiritual. E bèrdat en realidat ta brasa henter nos ser, e ta kubri henter e durashon di nos bida, i ta abarká tur dimenshon di nos bida. Nos elementonan físiko i spiritual ta asina poderosamente integrá ku realmente no por separá nan. I aunke, komo sernan kaí, nunka nos lo ta igual na e deskripshon di Hesus manera presentá mas ariba, pa e grasia di Dios nos mester aspirá p’e, pasobra pa restourá den hende e imágen di Su Hasidó, pa tresé bèk na e perfekshon den kua e tabata kreá, pa promové e desaroyo di kurpa, mente i alma, esaki ta e obra di redenshon. Esaki ta loke Dios ta buska pa hasi den Su pueblo komo parti di e proseso pa prepará nan pa Su regreso.

Ora nos kontrastá nos mes ku Hesus, e diferensia lo por deskurashá nos fásilmente. Kon, anto, focus riba e Krus i loke e ta nifiká ta protehá nos for di ta desanimá pa loke nos ta mira den nos mes, kompará ku loke nos ta mira den Hesus?

E teoria dualista di un kurpa mortal ku un alma inmortal a generá vários teoria tokante e kurpa humano. Por ehèmpel, pa filósofonan griego antiguo, e kurpa humano tabata e prizòn di e alma, ku tabata liberá pa medio di morto. Den un eko di e konsepto pagano akí, hopi kristian awe ta kere ku e kurpa ta e bibienda temporal di e alma inmortal, ku lo ser integrá di nobo ku e kurpa na resurekshon. Kontrali na esei, panteistanan ta hasi e kurpa humano divino; nan ta kere ku Dios i universo ta mesun kos. Pa nan, tur kos ta Dios i e kurpa humano ta partí di e úniko supstansia divino integrá i universal. Rondoná pa teorianan konfliktivo riba e tema, nos mester para firme riba loke Beibel ta siña tokante naturalesa di humanidat.

Lesa 1 Korintionan 6:19,20 i 1 Korintionan 10:31. Kon e komprendementu ku nos kurpa ta "tèmpel di Dios" i "tèmpel di Spiritu Santu" por influensiá nos estilo di bida positivamente?

Tantu Adam komo Eva tabata kreá den imágen i semehansa Dios mes (Gen. 1:26,27), ku tabata reflehá no solamente den nan karakter sino tambe den nan aspekto físiko. Pa motibu ku e presensia di piká a dañá i asta a skonde e imágen ei, e obra di redenshon ta pa restourá sernan humano na nan kondishon original, inkluyendo nan salú físiko, te na e grado posibel pa sernan inkapas pa partisipá di e palu di bida.

E restourashon akí ta un proseso di bida largu ku lo kulminá solamente na e segundo binida di Kristu, ora loke ta koruptibel bisti loke ta inkoruptibel i mortal bira inmortal (1 Kor. 15:53,54).

Apòstel Juan a skibi na su amigu Gayo: "Stimá, mi ta resa pa tur kos por bai bon ku bo i pa bo por ta bon di salú, meskos ku ta bon ku bo alma" (3 Juan 1:2, NRSV).

Si nos rekonosé, ku un ser humano ta un entidat indivisibel, i ku religion ta abarká tur aspekto di bida humano, e ora ei nos mester konsiderá nos salú físiko tambe, komo un deber religioso. Nos mester laga e prinsipio inspirá, “sea ku boso ta kome òf bebe, òf loke sea ku boso ta hasi, hasi tur kos pa gloria di Dios" (1 Kor. 10:31, NKJV) guia nos. Pero kòrda ku ainda nos ta biba den un mundu kaminda bon hende por hasi nan bèst i tòg sufri e konsekuensianan di un naturalesa humano pakaminoso i un ambiente pekaminoso. P'esei, nos mester konfia den Dios i hasi nos bèst i laga e resultadonan serka Dios.

Algun hende ta kere ku ora kambia e ambiente, e individuo lo transformá su mes. Definitivamente, nos mester evitá lugánan i sirkunstansianan ku por hasi nos mas vulnerabel na tentashon (Salmo 1:1, Prov. 5:1–8). Pero nos problema ku tentashon i piká por resolvé solamente pa medio di transformashon di nos mes kurason (òf mente). Kristu a toka e sentro di e asuntu ora El a deklará: “Pasobra ta for di paden, for di kurason di hende, pensamentu malu ta Sali: inmoralidat sèksual, ladronisia, asesinato, adulterio, avarisia, malisia, engaño, indesensia, envidia, kalumnia, arogansia i lokura" (Marko 7:21,22, NIV). Esaki ta nifiká ku nos mente mester transformá su mes pa asina nos komportashon kambia.

Lesa e siguiente tekstonan: 1 Korintionan 2:16; Salmo 24:3,4; Romanonan 12:2; Filipensenan 4:8; i Kolosensenan 3:2. Kiko ta nifiká di tin e "mente di Kristu"?

Señor a primintí ku bou di e "pakto nobo" E lo a pone Su lei den mente di Su pueblo i skibié riba nan kurason (Jer. 31:31–33, kompará ku Hebr. 8:8–10, Hebr. 10:16). No ta un sorpresa, anto, ku den e Sermon riba e Seru, Kristu a amplia i profundisá e nifikashon di e mandamentunan di Dios na nivel di pensamentu i intenshon (lesa Mat. 5:17–48). Asina, nos por optené viktoria riba tentashon, solamente pa Dios su grasia ku ta transformá i, na nivel di pensamentu i intenshon, nos mester reklamá e promesa ei pa asina nos por stòp pensamentunan pekaminoso.

Den e bida akí, sinembargo, no importá kon fiel nos ta, nunka nos lo alkansá impekabilidat kompletu. Pero si nos ta den Kristu, Su hustisia ta kubrí nos kompletamente. Aunke nos no ta perfekto ainda, nos ta konsiderá perfekto den djE kaba (Fil. 3:12–15). "Ora nos ta uní ku Kristu, nos tin e mente di Kristu. Puresa i amor ta bria den e karakter, humildat i bèrdat ta kontrolá e bida. E ekspreshon di kara mes ta kambia. Kristu, ku ta biba den e alma, ta ehersé un poder ku ta transformá, i e aspekto eksterior ta duna testimonio di e pas i alegria ku ta reina den e interior.”—Ellen G. White, Selected Messages, buki 1, p. 337.

Solamente pa medio di un entrega diario, un morto diario di e ami, un esfuerso diario determiná, pa fe, pa ta obediente na Hesus, nos por tin e tipo di transformashon akí den nos bida.

Imaginá bo kon bo bida lo tabata si bo por a para asta pensamentunan pekaminso. Kon diferente bida lo tabata? Kua ta e úniko forma potensial pa esaki por ta bo eksperensia?

Spiritu Santu ta e poderoso Agente di Dios ku ta drama e amor di Dios den nos kurason (Rom. 5:5), ta hiba nos na un berdadero eksperensia di salbashon (Juan 16:7–11), ta guia nos den tur bèrdat (Juan 16:13), i ta empoderá nos pa kumpli ku e mishon di e evangelio (Echonan 1:8). Pasobra ta Spiritu Santu ta kontrarestá e obra degenerá di Satanas, no ta sorpresa ku Satanas ta purba, na tur manera, pa distorshoná nos komprenshon di e naturalesa i obra di Spiritu Santu. Miéntras ku algun ta nenga Su personalidat, otronan ta enfatisá e donnan di e Spiritu riba Su poder ku ta transformá.

Lesa Echonan 8:4–24. Simon e hasidó di brua di Samaria ker a risibí e donnan di Spiritu Santu sin ta regenerá pa e Spiritu. Kon e mesun aktitut akí ta manifestá ainda den nos dianan?

E yunan di Dios ta esnan ku Spiritu Santu ta guia (Rom. 8:14) den tur e bèrdat di e palabra di Dios (Juan 16:13, Juan 17:17). Hesus a atvertí den términonan kla: “No ta tur hende ku bisa Mi: ‘Señor, Señor,’ lo drenta e reino di shelu, ma solamente esun ku hasi boluntat di mi Tata ku ta den shelu. Hopi lo bisa Mi riba e dia ei: ‘Señor, Señor, nos no a profetisá den bo nòmber i den bo nòmber saka demoño i den bo nòmber hasi hopi milager?’ E ora ei lo Mi bisa nan klaramente: ‘Nunka Mi a konosé boso. Bai for di Mi, boso malechornan!’ ” (Mat. 7:21–23, NIV). Esaki ta nifiká ku Spiritu Santu nunka ta guia hende bai for di e Palabra di Dios, ku E Mes a inspirá, sino mas bien semper ta hiba nos den konformidat ku e Palabra ei.

E mesun Spiritu Santu ku ta guia nos na tur bèrdat, tambe ta empoderá nos pa guia otronan na e bèrdat maravioso ei (Mat. 28:18–20, Echonan 1:8). Miéntras nos ta kumpli ku nos mishon sagrado, nos tin Su asistensia spesial. Pues, kada mainta nos mester hinka rudia dilanti di Señor i renobá nos votonan di konsagrashon na djE. Si nos hasi esaki, E lo duna nos e presensia di Su Spiritu, ku Su poder ku ta rebibá i santifiká.

Nos mester, sinembargo, ta habrí pa Su direkshon dor di tuma desishonnan konsiente, kada dia, pa hasi loke nos sa ku ta korekto i evitá loke nos sa ku ta robes. Es desir, solamente tratando, den nos forsa duná pa Dios, di biba manera mester, nos lo ta habrí pa risibí e poder ei di Spiritu Santu den nos bida, ku Dios ta primintí nos.

Dikon ta asina importante, kada mainta, pa nos resa pa ta habrí na e direkshon di Spiritu Santu den nos bida?

Nos ta biba den un mundu eksitá ku muchu hopi nesesidatnan artifisial i distraishonnan yamativo. Si nos no ta kuidadoso, esakinan por tuma tur nos tempu i korumpí nos prioridatnan. Esaki no ta solamente un otro konsekuensia di nos mundu sibernétiko globalisá; kristiannan den tur époka, na un grado òf otro, mester ta alerta kontra e intentonan di Satanas pa distraí nan for di loke realmente ta importá den e bida akí.

Ken, si e no ta kuidadoso, no ta den peliger di kita su bista for di Señor i pensa riba kosnan mundano, kosnan karnal, kosnan ku, al final, no por satisfasé nos finalmente, i ku, na final, por hiba na nos ruina spiritual?

Lesa 2 Pedro 3:14 i 1 Juan 3:1–3. Kua diferensianan bo ta mira entre prepará nos mes pa e Segundo Binida i ta prepará pa e evento glorioso ei?

Hopi biaha e noshon di un preparashon kontinuo pa e Segundo Binida ta bira un esküs pa e tardansa. E noshon akí fásilmente por hiba nos na relahá bou di e suposishon di e sirbidó malbado: “Mi señor ta tarda Su binida” (Mat. 24:48, NKJV).

Lesa Salmo 95:7,8; Hebreonan 3:7,8,15; i Hebreonan 4:7. Kiko e versíkulonan akí ta bisa nos tokante ta kla aworakí mes?

For di perspektiva bíbliko, e tempu di salbashon ta semper "awe" i nunka mañan (lesa Salmo 95:7,8; Hebr. 3:7,8,15; Hebr. 4:7). I mas: a ménos ku un gran eksperensia importante di kombershon tuma lugá, nos lo sigui ta loke nos ta na e momento akí. Tempu mes no ta kombertí esnan ku no ta kombertí. En todo kaso, a ménos ku hende ta kresiendo kontinuamente den grasia, i avansá den fe, e tendensia lo ta pa apartá nos mes, bira duru, dusoso, síniko, asta inkrédulo.

For di e perspektiva akí nos por bisa ku kada dia di nos bida ta nos bida den miniatura. Pues, pa e grasia di Dios, nos mester plania pa futuro, pero biba kada dia prepará pa e regreso di Hesus, spesialmente pasobra, mirando e eventualidatnan di e bida akí, awe por ta bo último dia.

Kon bo por, awe, ta kla pa e regreso di Hesus, si E lo a regresá awe? Diskutí bo kontesta Sabat, den klas.

Lesa Ellen G. White, “Mind Cure,” p. 241–259, den The Ministry of Healing; “True and False Theories Contrasted,” p. 7–16, den The Sanctified Life.

"E gran konflikto ta yegando su final. Kada informe di kalamidat den laman òf riba tera ta un testimonio di e echo ku e fin di tur kos ta aserkando. Guera i rumornan di guera ta deklará esaki. Tin un kristian ku su kurason no ta bati mas lihé segun ku e ta antisipá e gran eventonan ku ta habri nos dilanti? Señor ta biniendo. Nos ta tende e stapnan di un Dios ku ta aserkando.”—Ellen G. White, Maranatha, p. 220.

"Biba e bida di fe dia pa dia. No bira ansioso i aflihí tokante e tempu di angustia, i asina tin un tempu di angustia adelantá. No sigui pensa: ‘mi tin miedu ku lo mi no para den e gran dia di prueba.’ Bo mester biba pa presente, pa e dia akí so. Mañan no ta di bo. Awe bo mester mantené viktoria riba e ami. Awe bo mester biba un bida di orashon. Awe bo mester bringa e bon lucha di fe. Awe bo mester kere ku Dios ta bendishoná bo. I miéntras bo ta optené viktoria riba skuridat i inkredulidat, lo bo kumpli ku e rekisitonan di e Maestro i lo bo bira un bendishon pa esnan rònt di bo.”—Ellen G. White, Signs of the Times, 20 di òktober 1887.

"Señor ta bin pronto, i nos mester ta prepará pa topa kunE na pas. Laga nos ta determiná pa hasi tur kos den nos poder pa komuniká e lus na esnan rondó di nos. Nos no mester ta tristu, sino alegre, i nos mester mantené Señor Hesus semper nos dilanti. . . . Nos mester ta kla i sperando su aparishon. O, ki glorioso lo ta pa mirE, i risibí bonbiní komo su redimínan! Nos a warda hopi tempu, pero nos fe no mester debilitá. Si solamente nos por mira e Rei den Su hermosura, nos lo ta bendishoná pa semper i semper. Mi ta sinti komo si fuera mi mester grita duru: ‘Rumbo pa kas.’ Nos ta aserkando e tempu ora Kristu lo bin ku poder i gran gloria, pa hiba Su redimínan na nan hogar eterno.”—Ellen G. White, Heaven, p. 165, 166.

Preguntanan pa Diskushon:

Kon e noshon di e persona, kurpa, alma, i spiritu komo un totalidat indivisibel, por yuda nos komprendé mihó e alkanse integral di religion i e importansia di nos estilo di bida personal?

Tur berdadero reavivamentu i reforma ta teoséntriko (sentrá den Dios) i nunka antroposéntriko (sentrá den komportashon humano). Kon e parabel di e fariseo i e kobradó di belasting (lesa Lukas 18:9–14) ta ilustrá e prinsipio akí?

Den klas, diskutí bo kontesta riba e pregunta final di djaweps. Kon bo por sa si bo ta prepará, i bo por tin e siguridat sin ta presuntuoso?