E Proseso di Huisio

17 di desèmber

Lesa pa e Estudio di e Siman Akí:

Mat. 25:31–46; Dan. 7:9–14; 1 Kor. 6:2,3; 2 Pe. 2:4–6; Mal. 4:1; Rev. 21:8.

Teksto di Memoria:

“Pasobra nos tur mester aparesé dilanti di e tribunal di Kristu, pa asina kada un di nos por risibí loke nos meresé pa e kosnan hasí miéntras nos ta den e kurpa, sea bon òf malu” (2 Corinthians 5:10, NIV).

Si Skritura ta kla tokante un kos, ta tokante realidat di huisio. Dios lo husga mundu. E tekstonan, tantu den Tèstamènt Bieu komo esun Nobo, ta numeroso i sin ambigwedat. E hustisia ku asina ta falta aki i awor, lo yega un dia.

Beibel ta bisa ku Dios tin "konosementu perfekto" (Job 37:16, NIV) i “sa tur kos" (1 Juan 3:20, NIV), inkluyendo nos intenshonnan di mas sekreto (Ekl. 12:14, Jer. 17:10). Nos por skonde pa tur hende i tur otro kos, pero nada ta skondí pa Dios.

Loke e realidat akí ta impliká ta ku E no tin mester di un huisio pa E mes pa konosé bida di kada individuo. E huisionan di Dios ta, en realidat, un akomodashon divino, realisá pa e bon di Su kriaturanan, tantu den shelu komo riba tera. E proseso akí ta di naturalesa kósmiko históriko pasobra Lucifer a kuminsá su rebelion den shelu i despues a ekstend’é na e mundu akí (Rev. 12:7–9).

Durante e siman akí nos lo konsiderá e proseso di huisio di e tempu di fin ku su tres fasenan prinsipal: e huisio pre atvènt, e huisio durante e milenio, i huisio ehekutivo. Henter e proseso ta terminá ku vindikashon di e hustunan i e di dos morto di e malbadonan.

*Studia e lès di e siman akí pa prepará pa Sabat, 24 di desèmber.

Pa hopi hende, e idea di huisio ta nifiká kondenashon. I aunke esei ta parti di e proseso, nos no mester lubidá ku e idea di huisio tin un banda positivo, den e echo ku huisio tambe ta envolví vindikashon di e hustunan. En realidat, e buki di Daniel ta referí na un huisio di e tempu di fin "na fabor di e santunan di Altísimo" (Dan. 7:22, NKJV). E huisio di Dios ta inkluí tur dos: un prinsipio hañá den e teksto akí di Tèstamènt Bieu: “Tende anto den shelu, i aktua i husga Bo sirbidónan, kondenando e malbado, tresiendo su kaminda riba su kabes, i hustifikando e hustu dunando e di akuerdo ku su hustisia" (1 Reinan 8:32, NKJV).

Lesa Mateo 25:31–46 i Juan 5:21–29. kon Kristu a señalá e konseptonan di kondenashon i vindikashon den e huisio final?

Algun hende ta afirmá ku e ekspreshonnan "no ta husgá" (Juan 3:18, NASB) i "lo no ta husgá" (Juan 5:24, NIV) ta nifiká ku no ta husga esnan ku ta den Kristu ètòl. Pero e ekspreshonnan akí ta impliká ku no ta kondená kreyentenan den e huisio. P’esei mester komprendé e tekstonan akí manera nan ta bisa "e no ta kondená" (Juan 3:18, NIV) i "lo no bin na kondenashon" (Juan 5:24).

En resúmen, nos destino ta determiná den nos bida presente. Esnan den Kristu tin nan vindikashon na e huisio ya sigurá i esnan ku no ta den Kristu ta permanesé bou di kondenashon. Deskribiendo e huisio (Mat. 25:31–46), Kristu a menshoná presensia no solamente di e kabritunan (malbadonan), sino tambe di e karnénan (hustunan). I apòstel Pablo a deklará eksplísitamente: “Pasobra nos tur mester aparesé dilanti di e tribunal di Kristu, pa kada un por risibí rekompensa pa loke el a hasi durante e kurpa, sea bon òf malu" (2 Kor. 5:10, NRSV).

Mientras nos ta reflekshoná riba e huisio, nos mester tene den mente ku nos ta salbá pa grasia (Isa. 55:1, Efe. 2:8–10), hustifiká pa fe (Gen. 15:6, Rom. 5:1), i husgá pa obranan (Ekl.12:14, Mat. 25:31–46, Rev. 20:11–13) . Base di e proseso di huisio ta e lei moral di Dios, manera resumí den e Dies Mandamentunan (Ekl. 12:13, 14; Santiago 1:25; Santiago 2:8–17). Nos obranan ta e evidensianan eksterno di e outentisidat di nos eksperensia di salbashon i, konsekuentemente, e elementonan pa ser balorá durante huisio.

Kòrda: no tin niun dekreto arbitrario di Dios ku ta skohe algun pa ta salbá i otronan pa bai pèrdí. Kada un ta moralmente responsabel pa su propio destino.

Na final, e huisio no ta e momento ora Dios disidí di aseptá òf rechasá nos, sino e momento ora Dios finalisá nos eskoho sea ku nos a asept’E òf nò, un eskoho manifestá pa nos obranan.

Nos ta haña e konsepto di huisio promé ku e regreso di Kristu, òf loke nos ta yama huisio "pre- atvènt", hopi kaminda den Skritura.

Lesa Daniel 7:9–14; Mateo 22:1–14; Revelashon 11:1,18,19; i Revelashon 14:6,7. Kon e pasashinan akí ta tira lus riba e noshon di un huisio investigador pre-atvènt den e sala di korte selestial? Kiko ta nifikashon di un huisio asin’aki?

E konsepto di un huisio investigador pre-atvènt di e pueblo di Dios ta basá riba tres siñansa bíbliko básiko.

Unu ta e noshon ku tur e mortonan, hustu òf inhustu, ta permanesé inkonsiente den nan graf te na e resurekshon final (Juan 5:25–29).

E di dos ta e eksistensia di un huisio universal pa tur ser humano (2 Kor. 5:10, Rev. 20:11–13).

E di tres ta e echo ku e promé resurekshon lo ta e rekompensa bendishoná pa e hustunan, i e di dos resurekshon lo ta morto eterno pa e malbadonan (Juan 5:28,29; Rev. 20:4–6,12–15).

Loke esaki ta nifiká ta ku, si lo husga tur ser humano, mester husga nan promé ku nan respektivo resurekshonnan, pasobra na e resurekshonnan ei nan lo risibí nan rekompensa final.

E buki di Daniel ta yuda nos komprendé tantu e tempu komo e naturalesa di e huisio pre-atvènt ei. Na final di e 2.300 dianan simbóliko, na 1844, lo a purifiká e santuario selestial (Dan. 8:14, kompará ku Hebr. 9:23) i e huisio investigador pre-atvènt lo a kuminsá (Dan. 7:9–14), dos forma diferente di ekspresá e mesun evento. I e huisio ta "na fabor di e santunan di e Haltísimo" (Dan. 7:22, NKJV). Es desir, e ta bon notisia pa e pueblo di Dios.

Den Mateo 22:1–14, Hesus a papia di un investigashon di e invitadonan di e kasamentu promé ku e fiesta di kasamentu a kuminsá.

I den e buki di Revelashon, ta referí na e huisio investigador pre-atvènt pa medio di e tarea di midi "esnan ku ta adorá" den e tèmpel di Dios (Rev. 11:1, NKJV) i den e anunsio ku "e ora di Su huisio a yega" (Rev. 14:6,7, NKJV; kompará ku Rev. 14:14–16).

Kon nos konosementu di un huisio den shelu mester impaktá kon nos ta biba aki riba tera?

Beibel ta bisa nos ku na e Segundo Binida

1. tantu e santunan bibu komo e santunan resusitá lo "kontra ku Señor den laira" (1 Tes. 4:16,17);
2. lo hiba tur e santunan shelu pa biba den e "lugánan di biba" selestial ku E mes a prepará pa nan (Juan 14:1–3, NRSV); i
3. numa na final di e milenio e Herusalèm Nobo lo baha bin na e tera akí i bira e hogar eterno di e santunan (Rev.21:1–3,9–11).

Asina, durante e milenio, miéntras e tera akí ta permanesé desolá, e santunan lo reina ku Kristu den shelu (Jer. 4:23, Rev. 20:4).

Lesa 1 Korintionan 6:2,3 i Revelashon 20:4–6,11–13. Dikon e santunan mester partisipá den e huisio durante e milenio?

Henter e proseso di huisio ta intenshoná

1. pa vindiká e karakter di Dios kontra e akusashonnan di Satanas ku Dios ta inhustu den e forma ku E ta trata Su kriaturanan;
2. pa konfirmá e imparsialidat di e rekompensanan di e hustunan;
3. pa demonstrá e hustisia di e kastigunan di e malbadonan; i
4. pa eliminá tur duda ku por a hiba na un otro rebelion den universo.

Den e huisio investigador pre-atvènt di e hustunan, solamente e ehérsitonan selestial ta envolví (Dan. 7:9,10). Pero durante e huisio di milenio di e malbadonan i e angelnan kaí, e santunan mes tambe lo partisipá (1 Kor. 6:3, Judas 6, Rev. 20:4–6).

E huisio investigador pre-atvènt a kuminsá na 1844 ora "a pone trononan na lugá. . . E korte a sinta, i a habri e bukinan" (Dan. 7:9,10, NKJV). E huisio durante e milenio, sinembargo, lo kuminsá despues ku hiba e santunan shelu i nan sinta riba trononan, i asigná e huisio na nan. E ora ei, un biaha mas, e bukinan selestial lo habri, i e mortonan ta "ser husgá segun nan obranan, pa e kosnan ku tabata skibí den e bukinan" (Rev. 20:4,12, NKJV). E proseso akí ta proveé un oportunidat pa e santunan evaluá e registronan selestial i pa mira e trato hustu di Dios den tur kaso. E no ta solamente rekompensá tur ser humano di akuerdo ku loke nan meresé, basá riba nan propio desishonnan, sino tambe E ta splika dikon E ta hasi esei.

Kiko e ta siña nos tokante e karakter di Dios ku promé ku kualke un di esnan pèrdí ku ta drumi ta resusitá pa enfrentá e di dos morto, esnan salbá lo ta envolví den e proseso di huisio, i lo no kastigá niun hende te ora ku nos, tambe, mira e hustisia i sinseridat di Dios? Trese bo kontesta na klas riba Sabat.

Durante Edat Media tabatin un tendensia fuerte pa deskribí Dios komo un Hues severo i ku ta kastigá. Awe e tendensia ta pa deskribiE komo un Tata amoroso i tolerante ku nunka ta kastigá Su yunan. Sinembargo, amor sin hustisia lo kombertí su mes den káos i anarkia, i hustisia sin amor lo bira opreshon i sumishon. E proseso hudisial di Dios ta un meskla perfekto di hustisia i miserikòrdia, kua ámbos ta derivá di Su amor inkondishonal.

E huisio ehekutivo ta e intervenshon di kastigu final i ireversibel di Dios den historia humano. Huisionan di kastigu limitá tabata tuma lugá, por ehèmpel, den e ekspulshon di Satanas i su angelnan rebelde for di shelu (Rev. 12:7–12), e ekspulshon di Adam i Eva for di e hòfi di Eden (Génesis 3), e Gran Diluvio (Génesis 6–8), e destrukshon di Sodoma i Gomora (Génesis 19, Judas 7), e morto di e primogénito na Egipto (Eksodo 11–12), i e morto di Ananias i Safira (Echonan 5:1–11). Asina ta ku no ta sorpresa ku lo tin un huisio ehekutivo di e malbadonan tambe na final di historia humano.

Lesa 2 Pedro 2:4–6 i 2 Pedro 3:10–13. Kon e tekstonan akí ta yuda nos komprendé e naturalesa di e huisio ehekutivo final? Kon nan ta impliká e idea di terminashon di huisio, kontrali na su durashon pa semper, loke lo tabata un pervershon di hustisia i no un ekspreshon di dje?

"E bondat i toleransia largu di Dios, Su pasenshi i miserikòrdia ehersé na Su súpditonan, lo no strob’E di kastigá e pekador ku a ninga di ta obediente na Su rekerimentunan. No ta toka un hende, un kriminal kontra e lei santu di Dios, pordoná solamente pa medio di e gran sakrifisio ku El a hasi ora El a duna Su Yu pa muri pa e kulpabelnan pasobra Su lei tabata inkambiabel, pa dikta na Dios.”—Ellen G. White, Manuscript Releases, tomo 12, p. 208.

Tur loke Dios por a hasi, pa salba humanidat di ta eternamente pèrdí, El a hasi, asta na un preis haltu pa E mes. Esnan ku bai pèrdí finalmente, a hasi eskohonan ku a hiba nan na e final desafortuná akí. E idea ku e huisio di Dios riba esnan pèrdí, inkluso e destrukshon di esnan pèrdí (kontrali na tormenta eterno) ta bai kontra e karakter di un Dios amoroso, ta simplemente inkorekto. Ta e amor di Dios, i solamente e amor di Dios, ta demandá hustisia tambe.

Kiko e Krus mes ta siña nos tokante loke Dios tabata dispuesto na hasi pa asina salba tur hende ku lo a bai salba?

Dios ta guiando historia humano den direkshon di e klímaks di su tempu di fin. Na final di e milenio tur e malbadonan morto lo resusitá for di nan grafnan pa risibí nan sentensia di kastigu final. (Rev. 20:5,11–15). E ora ei, ora henter e proseso di husgamentu terminá i no por agregá nada mas na dje, e malbadonan lo rekonosé e hustisia di Dios. "Ku tur e echonan di e gran konflikto na bista, henter universo, tantu esnan leal komo rebelde, lo deklará den un akòrt: ‘Hustu i berdadero ta Bo kamindanan, Abo Rei di santunan.’ I Satanas mes ta inkliná i konfesá e hustisia di su sentensia.”—Ellen G. White, The Great Controversy, p. 670, 671.

Lesa Malakias 4:1; Revelashon 20:14,15; i Revelashon 21:8. Kon efektivo e "laman di kandela" i e “di dos morto" lo ta?

E destrukshon final di Satanas i su angelnan i tur e malbadonan lo purifiká e universo di piká i su konsekuensianan. I tòg, asta e destrukshon final di e malbadonan ta un akto di e amor di Dios, no solamente pa e santunan sino tambe pa e malbadonan mes. Nan lo a muri mas bien ku biba den presensia di Dios kende ta un "kandela konsumidó" pa piká (Hebr. 12:29).

"Nan [esnan pèrdí] lo tabata anhelá pa hui for di e lugá santu ei. Nan lo a duna bonbiní na destrukshon, pa nan lo por a skonde for di kara di Esun ku a muri pa redimí nan. E destino di e malbadonan ta determiná pa nan mes eskohonan. Nan eksklushon for di shelu ta boluntario di nan mes, i hustu i miserikòrdioso di parti di Dios.”—Ellen G. White, The Great Controversy, p. 543.

Por lo tantu, e destrukshon final di piká i pekadornan, kontrali na e teoria no bíbliko di nan sufrimentunan eterno den fièrnu, ta proveé un kastigu hustu i proporshonal pa kualke maldat ku hende a kometé. E ta konfirmá tambe ku piká lo tin un komienso i lo tin un final. E ora ei henter e universo lo bolbe bèk na su perfekshon original, promé ku piká, maldat, i desobedensia a surgi misteriosamente i sin ningun hustifikashon.

Alabá sea Señor ku E, komo nos "Hues hustu" (2 Tim. 4:8, NKJV), lo tuma e desishon hustu di duna inmoralidat na e hustunan i destrukshon eterno na e malbadonan.

Kiko lo tabata robes ku e idea ku Dios ta salba tur hende na final? Dikon esei ta un idea asina malu?

Lesa Ellen G. White, “Without a Wedding Garment,” p. 307–319, den Christ’s Object Lessons; “Desolation of the Earth,” p. 653–661; “The Controversy Ended,” p. 662–673, den The Great Controversy.

"Riba dia di e huisio final, tur alma pèrdí lo komprendé e naturalesa di su mes rechaso di bèrdat. Lo presentá e krus, i tur mente, ku tabata siegá pa transgreshon, lo mira su nifikashon real. Dilanti di e vishon di Kalvario ku su Víktima misterioso, pekadornan lo para kondená. Lo anulá tur esküs mentiroso. Apostasia humano lo aparesé den su karakter odioso. Hende lo mira kiko nan eskoho tabata. E ora ei lo aklará tur kuestion di bèrdat i eror den e kontroversia largu. Den e huisio di e universo, Dios lo para liber di kulpa pa e eksistensia òf kontinuashon di maldat. Lo ser demostrá ku e dekretonan divino no ta aksesorio na piká. No tabatin defekto den gobièrnu di Dios, niun kousa pa malkontentu. Ora revelá e pensamentunan di tur kurason, tantu esnan leal komo esnan rebelde lo uni i deklará: ‘hustu i berdadero Bo kamindanan ta, Abo, Rei di e santunan. Ken lo no teme Bo, O SEÑOR, i glorifiká Bo nòmber? . . . pasobra bo obranan hustu a ser revelá.’ Rev. 15:3,4.”—Ellen G. White, The Desire of Ages, p. 58.

Preguntanan pa Diskushon:

"Si bo pega na e ami, i rechasá di someté bo boluntat na Dios, bo ta skohiendo morto. Pa piká, unda ku hañ’é, Dios ta un kandela konsumidó. Si bo skohe piká, i nenga di separá for di dje, e presensia di Dios, ku ta konsumí piká, mester konsumí abo.”— Ellen G. White, Thoughts From the Mount of Blessing, p.62. Kon e sita akí ta yuda nos komprendé e naturalesa di e Huisio Ehekutivo?

Reflekshoná riba e idea (presentá na final di e estudio di djamars) ku ni un di esnan pèrdí lo enfrentá huisio final te despues ku esnan redimí tabata parti di e proseso di huisio. Atrobe, kiko esaki ta siña nos tokante e sinseridat i transparensia di Dios? Pa un universo den kua amor ta reina, dikon e transparensia akí ta asina importante?

Kon e partisipashon di e santunan den e huisio di milenio lo konsolá nan respekto nan sernan kerí ku lo bai pèrdí?