E Paktonan di Dios Ku Nos

7 di yanüari

Lesa pa e Estudio di e Siman Akí:

Mat. 10:22; Juan 6:29; Deut. 28:1–14; Prov. 3:1–10; Mal. 3:7–11; Mat. 6:25–33.

Teksto di Memoria:

“Awor lo bin sosodé, si boso obedesé diligentemente e bos di Señor boso Dios, pa obedesé kuidadosamente tur Su mandamentunan ku Mi ta manda boso awe, ku Señor boso Dios lo pone boso haltu riba tur nashon di tera. I tur e bendishonnan akí lo bin riba boso i alkansá boso, pasobra boso ta obedesé e bos di Señor boso Dios” (Deuteronomio 28:1,2, NKJV).

Sorprendentemente, Dios a sera kontratonan (òf paktonan) ku nos. Mayoria ta bilateral, loke ta nifiká ku tur dos partido (Dios i hende) tin un parti pa ehekutá. Un ehèmpel di un pakto bilateral ta “Si lo bo hasi esaki, e ora ei ami lo hasi esei.” Of “Lo mi hasi esaki si bo hasi esei.”

Un tipo di pakto mas skars ta unilateral. “Lo mi hasi esaki sea bo hasi kualke kos òf nò.” Un par di e paktonan di Dios ku humanidat ta unilateral. Por ehèmpel: “E ta laga solo sali riba e malu i riba e bon, i ta manda áwaseru riba e hustu i e inhustu” (Mat. 5:45, NKJV). Despues di e Diluvio, Dios a primintí humanidat i “tur bestia di tera” ku nunka lo tabatin un otro diluvio pa tapa henter tera (lesa Gen. 9:9–16), no importa nos akshonnan. Tambe El a primintí: “Miéntras tera ta permanesé, tempu di sembra i kosecha, friu i kayente, wenter i zomer, i dia i nochi lo no stòp” (Gen. 8:22, NKJV). E temporadanan di aña lo bin i bai, no importa loke nos hasi.

E siman akí nos lo studia algun pakto bilateral signifikante entre Dios i Su yunan. Laga nos hasi orashon ku, pa grasia di Dios, nos lo “mantené nos parti di e kombenio.”

* Studia e lès di e siman akí pa prepará pa Sabat, 14 di yanüari.

E morto di Kristu na Kalvario a hasi salbashon posibel pa kada persona ku hamas a biba òf ku hamas lo biba. Diferente for di e promesa di e temporadanan di aña, salbashon no ta unilateral, no ta tur hende a hañ’é, no importa loke nan hasi. Ta yama e kreensia, ku tur hende lo ta salbá, “universalismo.”

En kambio, Hesus a siña klaramente ku, aunke El a muri pa henter humanidat, hopi hende ta biaha riba e kaminda hanchu na destrukshon i morto eterno (Mat. 7:13,14).

Kiko e siguiente tekstonan tin di bisa tokante kon hende ta risibí e don di salbashon den Hesus?

Pablo a komprendé e naturalesa bilateral di e pakto di salbashon. Sabiendo ku pronto lo a ehekut’é, i apesar di e echo ku hopi di su kompañeronan a bandon’é, Pablo, ku konfiansa, a bisa su amigu stimá Timoteo, ku el a kumpli ku su parti di e trato. “Pasobra ami ta wòrdu bashá kaba komo un ofrenda di bibida, i mi tempu di bai a yega. Mi a lucha e bon lucha, mi a terminá e kareda, mi a warda e fe; den futuro ta wardá pa mi e korona di hustisia, kual Señor, e Hues hustu, lo duna mi riba e dia ei; i no na ami so, ma tambe na tur esnan ku a stima Su binida” (2 Tim. 4:6–8).

Pablo ta bisa: “Mi ta kla [pasobra] Mi a lucha e bon lucha, mi a terminá mi kareda, mi a warda e fe.” Pablo, sinembargo, semper tabata masha kla ku salbashon ta pa medio di fe so, no pa medio di obranan di lei i, pues, aki e no ta mirando su obranan òf logronan, di algun manera, komo ganando mérito pa su mes ku Dios. E “korona di hustisia” ku ta sper’é ta e hustisia di Hesus, ku Pablo, pa medio di fe, a reklamá pa su mes i a mantené su mes na dje ta na fin di su bida.

Aunke salbashon ta un regalo inmeresí, kiko ta e diferensia entre esnan ku aseptá e regalo i esnan ku no asept’é? Kiko aseptá e regalo akí ta rekerí pa nos hasi?

E buki di Deuteronomio ta e vershon imprimí di Moises su mensahenan di despedida na e segundo generashon di israelitanan despues di e 40 añanan di dualu den desierto. El a duna e mensahenan akí riba e planonan di Moab djis pariba di Jeriko. Korektamente a yama Deuteronomio “E Buki di Rekuerdo.”

Den e buki akí Moises ta repasá Dios su tratonan fiel ku Israel. E ta nara e biahenan for di Seru Sinai pa Kadesh Barnea na rant di e Tera Primintí, komo tambe e rebelion i e 40 añanan di dualmente den desierto. El a reteirá e Dies Mandamentunan, e rekerimentunan di e diesmo i e mangasina sentral. Pero e enfoke prinsipal di Deuteronomio ta e konseho pa obedesé Dios i risibí Su bendishonnan. Moises ta deskribí Dios komo Un ku tin e abilidat, i e deseo, pa kuida Su pueblo.

Lesa Deuteronomio 28:1–14. Kua gran bendishonnan ta primintí e pueblo? Pero kiko nan tin ku hasi pa risibí nan?

Moises tabata masha ansioso pa e pueblo komprendé ku Dios tabatin bendishonnan maravioso, asta milagroso, den mente pa nan. Su palabranan, “si bo skucha ku tur diligensia,” ta laga nan sa ku nan destino eterno ta den wega aki. Ki un manifestashon poderoso di e realidat di eskoho liber. Nan tabata e nashon skohí di Dios, resipientenan di gran bendishonnan i gran promesanan, pero e bendishonnan i promesanan ei no tabata inkondishonal. Mester a aseptá, risibí, i aktua riba nan.

I nada ku Dios a pidi di nan tabata demasiado difísil pa nan hasi tampoko. “Pasobra e mandamentu akí ku Mi ta ordená bo awe no ta muchu misterioso pa bo, ni e ta muchu leu. E no ta den shelu, ku bo mester bisa: ‘Ken lo subi na shelu pa nos i tres'é pa nos, pa nos por tend'é i hasié?’ Ni e ta mas ayá di laman, ku bo mester bisa: 'Ken lo krusa laman pa nos, busk'é pa nos, i hasi nos tend'é pa nos kumpli kuné?' Ma e palabra ta masha serka di bo, den bo boka i den bo kurason, pa bo por hasié” (Deut. 30:11–14, NKJV).

Naturalmente, ademas di e bendishonnan, tabatin e spièrtamentunan di e maldishonnan, ku lo a bin riba nan si nan mester a desobedesé (Deut. 28:15–68); es desir, ki konsekuensianan nan piká i rebelion lo a trese.

Kiko ta nifiká pa nos, awe, pa “skucha ku diligensia” na loke Dios ta bisa nos hasi?

E buki di Proverbionan no ta asina tantu tokante korekto i robes, manera e ta tokante sabiduria i bobedat. Ora bo ta lesa e buki, lo bo mira e benefishinan di sabiduria i e trampanan di bobedat.

Lesa Proverbionan 3:1–10. Ki promesanan maravioso ta duna aki? Tambe, kiko “promé fruta di tur bo produktonan” ta nifiká?

Dios ta pidi nos pa pone E promé den maneho di nos poseshonnan komo un rekonosementu di Su propiedat riba tur kos i komo un demostrashon di nos fe den djE pa proveé pa nos. Pero asta mas ku esaki, E ta bisa ku si nos lo pone E promé, e ora ei E lo bendishoná loke ta sobra. Pa nos hasi esaki, es desir, pone E promé, ta un akto di fe, un akto di konfiansa, un manifestashon di konfia den Señor ku henter nos kurason i, en realidat, no lèn riba bo propio komprendementu (ku ta spesialmente importante, pasobra asina tantu bia kosnan ta pasa ku nos no por komprendé i no tin sentido).

Nada, sinembargo, mester stimulá nos mas pa konfia Dios i Su amor ku e Krus. Ora bo realisá kiko a duna nos kada un den Hesus, no solamente komo nos Kreador (Juan 1:1–4) i nos Sostenedó (Hebr. 1:3), sino tambe komo nos Redentor (Rev. 5:9), debolbiendo na Dios e promé frutanan di loke sea nos tin ta, en realidat, lo ménos ku nos por hasi. “No solamente Señor ta reklamá e diesmo komo di djE, sino E ta bisa nos kon mester reserv’é p’E. E ta bisa: ‘Honra Señor ku bo sustansia, i ku e promé frutanan di tur bo entrada.’ Esaki no ta siña ku nos mester gasta nos medionan riba nos mes, i trese e sobrá pa Señor, maske di otro manera e mester ta un diesmo honesto. Laga pone e porshon di Dios un banda promé.”—Ellen G. White, Counsels on Stewardship, p. 81.

Dios ta bisa ku si nos pone E promé, nos “mangasinanan lo ta yená ku abundansia” (Prov. 3:10, NKJV). Sinembargo, esaki no ta bai sosodé pa medio di milager; es desir, bo no ta bai lanta un dia i haña bo mangasinanan i barínan di ripiente yen.

En kambio, Beibel ta yená ku prinsipionan tokante bon mayordomia, planiamentu kuidadoso, i responsabilidat finansiero, di kua fieldat na loke Dios ta yama nos pa hasi ta nos promé i prinsipal responsabilidat.

Kon, sinembargo, nos ta siña konfia Dios i den Su promesanan durante tempunan finansiero difísil ora, asta miéntras nos ta tratando pa ta fiel, e mangasinanan i barínan no ta yen?

Tin un konekshon spiritual será entre e práktika di debolbé diesmo i nos relashon ku Dios. E israelitanan tabata prosperá ora nan tabata obedesé Dios i tabata fiel den debolbé diesmo. Den kontraste, nan tabata pasa den tempunan difísil ora nan no tabata hasié. Tabata parse ku nan tabata sigui un siklo di obediensia i prosperidat, i despues desobediensia i problema. Tabata durante un di e periodonan akí di infidelidat ku Dios, a traves di profeta Malakias, a proponé un kontrato bilateral ku Su pueblo.

Lesa Malakias 3:7–11. Kua ta e promesanan i e obligashonnan ku ta haña den e versíkulonan akí?

Dios a primintí e hendenan ku si nan lo a bolbe serka djE, E lo a bolbe serka nan. Ora nan a puntr’E kiko E tabata ke men ku bolbe serka djE, El a bisa eksplísitamente: “Stòp di hòrta Mi di diesmo i ofrenda.” Nan robo tabata e rason pa kua nan tabata maldishoná. Ata aki Dios su solushon pa e problema di e maldishon: “Trese tur e diesmonan [henter e diesmo] den e mangasina” (Mal. 3:10, NKJV). I si boso hasi esaki, e ora ei “lo Mi . . . habri pa boso e bentananan di shelu i basha pa boso tantu bendishon ku lo no tin sufisiente espasio pa risibié” (NKJV). Si nos no tin sufisiente espasio pa risibié, nos tin un ekseso ku kua nos por yuda otronan i yuda pa avansá e kousa di Dios.

“E kende a duna Su úniko Yu pa muri pa bo, a hasi un pakto ku bo. E ta duna bo Su bendishonnan, i a kambio E ta rekerí bo pa trese bo diesmo i ofrendanan p’E. Niun hende hamas lo riska di bisa ku no tabatin manera den kua e por a komprendé tokante e asuntu akí. Ta menshoná e plan di Dios tokante diesmo i ofrendanan definitivamente den e di tres kapítulo di Malakias. Dios ta yama Su agentenan humano pa ta fiel na e kontrato ku El a sera ku nan.”—Ellen G. White, Counsels on Stewardship, p. 75.

Un di e siklonan positivo di obediensia ta registrá durante e reinado di bon Rei Ezekias di Huda. Tabatin un revivamentu genuino na Huda, i e pueblo a kuminsá debolbé nan diesmo i ofrendanan fielmente na e mangasina di e tèmpel. Asina tantu a drenta ku e tabata akumulá na bòshi na e tèmpel. 2 Krónikanan 31:5 ta konta loke a sosodé ora e pueblo “a trese na abundansia e promé frutanan di grano i biña, zeta i miel, i di tur e produkshon di kunuku; i nan a trese na abundansia e diesmo di tur kos” (NKJV).

Kiko bo diesmo (òf falta di esaki) ta bisa tokante bo propio spiritualidat i relashon ku Dios?

Tabata bisa di Hesus ku “e multitut grandi tabata gusta skuch'E” (Marko 12:37). Mayoria di e hendenan den e gran multitutnan ku tabata sigui i skucha Hesus tabata miembronan di e klase akí, e hendenan komun. Nan tabata esnan ku El a alimentá riba e seru i ku a tende e Sermon riba Seru. Hesus a bisa nan, básikamente: Mi sa ku boso ta preokupá tokante proveé pa boso famianan. Boso ta preokupá tokante e kuminda i bebida ku boso lo tin mester diariamente i e pañanan ku boso tin mester pa kalor i protekshon. Pero ata loke Mi ta proponé . . .

Lesa Mateo 6:25–33. Kiko a primintí aki, i kiko e hendenan mester a hasi pa asina risibí e promesanan ei?

Hopi di e promesanan di Dios tin elementonan di un pakto bilateral. Es desir, pa por risibí e bendishonnan, nos tin ku hasi nos parti tambe.

Lesa Isaias 26:3. Kiko ta pidi nos hasi pa asina tin e pas di Dios?

Lesa 1 Juan 1:9. Kiko Hesus lo hasi si nos konfesá nos pikánan?

Lesa 2 Krónikanan 7:14. Kiko ta e “si” i “e ora ei” di e proposishon di Dios akinan?

Tur e versíkulonan akí i hopi otronan ta trata ku e echo importante ku aunke Dios ta soberano, aunke Dios ta nos Kreador i Sostenedó, i aunke salbashon ta un don di grasia i inmeresí di nos parti, ainda nos tin un parti pa hunga den e drama di e gran konflikto aki riba tera. Usando e don sagrado di boluntat liber, eskoho liber, nos mester skohe pa sigui e inspirashon di Spiritu Santu i obedesé loke Dios ta yama nos pa hasi. Aunke Dios ta ofresé nos bendishonnan i bida, nos por skohe maldishon i morto en kambio. Nada straño ku Dios ta bisa: “P’esei skohe bida, pa tantu abo komo bo desendientenan por biba” (Deut. 30:19, NKJV).

“Ki ora ku e pueblo di Dios, den kualke periodo di mundu, ku alegria i bon gana a realisá Su plan di benevolensia sistemátiko [debolbé diesmo] i den regalo i ofrendanan, nan a realisá e promesa permanente ku prosperidat lo a kompañá tur nan trabounan den e mesun proporshon ku nan a obedesé Su rekerimentunan. Ora nan tabata rekonosé e afirmashonnan di Dios i kumpli ku Su rekerimentunan, i honr’E ku nan sustansia, nan mangasinanan tabata yená ku abundansia. Pero ora nan tabata hòrta Dios den diesmo i den ofrendanan, nan mester a realisá ku nan no tabata solamente hòrta E sino nan mes, pasobra E tabata limitá Su bendishonnan na nan den mesun proporshon ku nan tabata limitá nan ofrendanan na djE."—Ellen G. White, Testimonies for the Church, tomo 3, p. 395.

Beibel ta masha kla ku nos ta salbá pa medio di fe so, un don di e grasia di Dios. Nos obediensia na e mandamentunan di Dios ta un reakshon riba e grasia di Dios; e no ta gan’é (despues di tur kos, si tabata gan’é, e lo no tabata grasia: lesa Romanonan 4:1–4).

En realidat, ora nos wak e pakto bilateral di Dios ku nos, nos por mira tantu nos bendishonnan komo nos responsabilidatnan. Pa medio di nos reakshonnan riba loke Dios ta ofresé nos, nos ta establesé nos relashon kunE i, te na un gran grado, determiná nos propio destino. Obediensia, e servisio i lealtat di amor, ta e berdadero señal di disipulado. Na lugá di libra nos di obediensia, ta fe, i fe solamente, ta hasi nos partísipenan di e grasia di Kristu, ku ta kapasitá nos pa rindi e obediensia ku Dios ta pidi di nos.

Preguntanan pa Diskushon:

Ta bisá ku si tur atventista tabata fiel den debolbé diesmo, nos iglesia lo tabatin mas ku sufisiente plaka pa hasi tur loke e mester hasi pa plama e mensahe. Kiko bo ta hasiendo, den términonan di diesmo i ofrenda, pa yuda iglesia hasi lo a yam’é pa hasi?

Reflekshoná mas riba e idea di kon importante nos eskohonan i nos obranan ta den nos relashon ku Dios. Kon nos ta mantené e kuestionnan di obra i obediensia, inkluyendo debolbementu di diesmo i bon mayordomia, nos dilanti pero sin kai den e trampa di legalismo?

Den klas, papia tokante e pregunta na final di e estudio di djamars tokante ora tempunan difísil bin asta ora nos tabata fiel. Kon nos ta komprendé esaki si e sosodé, i kon nos ta keda sin bira deskurashá ora e sosodé?