E Kontrato di Debolbé Diesmo

14 di yanüari

Lesa pa e Estudio di e Siman Akí:

Gen. 14:18-20; Mal. 3:10; Deut. 12:5-14; Lev. 27:30; 1 Reinan 17:9-16; 1 Kor. 4:1,2.

Teksto di Memoria:

“ 'Trese tur e diesmonan den e mangasina pa por tin kuminda den Mi kas, i purba Mi awor den esaki,’ e Señor di ehérsitonan ta bisa, ‘si lo Mi no habri pa boso e bentananan di shelu i basha pa boso tal bendishonnan ku lo no tin espasio sufisiente pa risibié’ ” (Malakias 3:10, NKJV).

Den Génesis 14 Abram a bolbe for di un eksitoso mishon di reskate di rehen den kua el a salba su subrino Lòt, e famia di Lòt, i e otro hendenan saká for di Sodoma. E rei di Sodoma tabata asina gradesidu pa e reskate ku el a ofresé Abram tur e botin di e bataya. Abram no solamente a rechasá e oferta sino a duna un diesmo di tur loke e tabata poseé na Melkisedek.

Inmediatamente despues di e eksperensia di Abram su debolbementu di diesmo, Señor a bisa: “No tene miedu, Abram. Mi ta bo eskudo, bo rekompensa ekstremadmente grandi” (Gen. 15:1, NKJV). En efekto, Señor tabata bisando Abram: “No preokupá. Lo Mi ta bo protektor i proveedor.” Despues, hopi mas despues, Moises a bisa Israel ora nan tabata na punto di drenta Kanaan: “Berdaderamente lo bo duna diesmo di henter e produkshon di bo grano ku e kunuku ta produsí tur aña ... pa bo por siña teme Señor bo Dios semper” (Deut. 14:22,23, NKJV).

Ellen G. White a skibi: “Hende tabata rekerí di ofresé na Dios regalonan pa propósitonan religioso promé ku a duna Moises e sistema definí, asta desde e dianan di Adam.” — Testimonies for the Church, tomo 3, p. 393.

Kiko tur esaki ta nifiká pa nos awendia?

* Studia e lès di e siman akí pa prepará pa Sabat, 21 di yanüari.

Dikshonarionan ta definí diesmo komo “un désimo parti di algu” òf “10 porshento”. A saka e definishon akí probablemente for di e narativo bíbliko. Diesmo ta simplemente debolbé 10 porshento di nos entrada, òf oumento, na Dios. Nos ta komprendé ku tur loke nos tin ta pertenesé na djE na promé lugá. E legislashon di debolbé diesmo, duná na Israel riba Seru Sinai, ta indiká ku e diesmo ta santu i ta pertenesé na Dios (lesa Lev. 27:30,32). Dios ta pidi solamente Su 10 porshento. Nos ofrendanan di gratitut ta separá di i ademas di e diesmo. E diesmo ta e testimonio mínimo di nos kompromiso kristian. Niun kaminda den Beibel nos ta haña kualke indikashon ku e porshon di Dios ta ménos ku un désimo parti.

Lesa Génesis 14:18-20 i Hebreonan 7:1-9. Kua tabata Abram su reakshon ora el a topa Melkisedek? Kiko esaki ta siña nos tokante kon leu bèk den historia e práktika ta bai?

E promé menshon di diesmo den Beibel ta den Génesis 14, ku ta konta e storia di Melkisedek su enkuentro ku Abram. E último menshon di diesmo den Beibel ta rekordá e mesun enkuentro, pero ta usa e palabranan “désimo parti” i “diesmo” di forma interkambiabel (lesa Hebr. 7:1-9). Nota den e storia di Hebreonan ku ni Melkisedek ni Kristu tabata di e tribu di Levi, pues debolbementu di diesmo ta presedé i ta sigui e karakter speshal di e levitanan. Debolbementu di diesmo no ta eksklusivamente un kustumber hudiu i no a originá ku e hebreonan na Sinai.

Lesa Génesis 28:13,14,20-22. Kiko Dios a primintí di hasi pa Jakòb, i kiko tabata e kontesta di Jakòb na Dios?

Ora Jakòb a bandoná kas, huyendo for di su ruman rabiá, Esau, un anochi e tabatin un soño di un trapi ku tabata subi for di tera na shelu. Angelnan tabata subi i baha riba dje. I Dios tabata para na e tòp i a primintí di ta ku Jakòb i algun dia tres’é kas bèk. E hóben soltero akí tabatin un eksperensia di kombershon real i a bisa: “Señor lo ta mi Dios. ... I di tur loke Bo duna mi lo mi duna Bo seguramente un désimo parti” (Gen. 28:21,22, NKJV).

Dikon ta importante pa komprendé ku debolbé diesmo, meskos ku e Sabat, no tabata algu ku a originá den e antiguo sistema legal òf asta religioso di Israel? Ki mensahe nos, ku ta biba despues di e krus, mester saka for di e bèrdat akí?

Lesa Malakias 3:10. Kiko nos por siña di e versíkulo akí tokante unda nos diesmo mester bai?

Aunke no a duna direkshonnan spesífiko den e teksto, ta evidente sinembargo ku e pueblo di Dios tabata sa kiko e tabata ke men ku e palabra “mangasina”. Dios ta inkluí den Su direkshonnan: “pa por tin kuminda den Mi kas” (NKJV). Su pueblo a komprendé ku e kas di Dios inisialmente tabata e santuario, e tènt elaborá ku Moises a traha pa medio di direkshonnan spesífiko duná na dje na Seru Sinai. Despues, ora Israel tabata biba den e Tera Primintí, e sitio sentral tabata promé na Siloh i despues mas permanentemente na e tèmpel na Herusalèm.

Lesa Deuteronomio 12:5-14. E versíkulonan akí no ta indiká ku e yunan di Dios por a usa nan mes diskreshon pa loke ta trata unda nan tabata depositá nan diesmo. Ki prinsipionan nos por saka for di e versíkulonan akí pa nos mes awendia?

Komo miembronan di e famia di Dios, nos ke komprendé i praktiká Su boluntat respekto kiko hasi ku nos diesmo. Den e narativo bíbliko nos ta siña ku tres bia den kada aña, Pasku, Pentekòste, i Fiesta di Tabernakel (Eks. 23:14-17), e pueblo di Dios mester a biaha pa Herusalèm pa hiba nan diesmo i ofrendanan personalmente i pa alabá i adorá Dios. E ora ei e levitanan tabata distribuí e diesmo pa nan rumannan riba henter e tera di Israel (lesa 2 Kron. 31:11-21, Neh. 12:44-47, Neh. 13:8-14). Den harmonia ku e prinsipio bíbliko di mangasina sentral, iglesia Atventista di Shete Dia a designá e asosiashonnan, mishonnan, i unionnan di iglesianan lokal komo mangasinanan na fabor di e iglesia mundial, i for di kua ta paga e ministerio.

Pa komodidat di e miembronan di iglesia, ta hiba e diesmo na e iglesia lokal, kaminda, komo parti di nan eksperensia di adorashon, miembronan ta trese nan diesmonan i ofrendanan, aunke algun ta usa donashonnan online. Despues e tesoreronan lokal ta manda e diesmo na e mangasina di konferensia. E sistema akí di maneho di diesmo, deliniá i ordená pa Dios, a permití pa Iglesia Atventista di Shete Dia tin un impakto mundial i kresiente den mundu.

Imaginá bo si tur hende a disidí di duna nan diesmo na ken ku nan tabata ke, a kosto di iglesia atventista mes. Kiko lo a pasa ku nos iglesia? Dikon e práktika ei, anto, ta asina un mal idea i kontrali na Skritura?

Lesa Levítiko 27:30 i Numbernan 18:21,24. Kiko Dios ta proponé pa hasi ku e diesmo?

Pa motibu ku Dios ta doño di tur kos (Salmo 24:1), opviamente E no tin mester di e plaka. Pero pa motibu ku e diesmo ta di djE, E ta bisa nos kiko hasi kuné, i esei ta, usa Su diesmo pa sosten di e ministerio evangéliko. I, por lo tantu, ta atendé e nesesidatnan di e pastornan ku e diesmo di Dios.

No a duna e tribu di Levi, e forsa ministerial den Tèstamènt Bieu, propiedatnan grandi, manera restu di e tribunan. A duna Levi sierto siudatnan, inkluyendo e siudatnan di refugio, ku sufisiente tera rondó di nan pa hardinnan personal. Tabata sostené nan ku e diesmonan di e otronan, i nan mes tambe tabata debolbé diesmo di nan entrada.

Lesa Echonan 20:35. Kiko ta e mensahe akinan, i kon esaki ta relashoná ku e asuntu di diesmo?

Debolbé diesmo ta importante pasobra e ta yuda nos establesé un relashon di konfiansa ku Dios. Tuma un désimo parti di bo entrada i “regal’é” (aunke, téknikamente, e ta pertenesé na Dios en todo kaso) realmente ta rekerí un akto di fe, i solamente ehersiendo fe bo fe lo krese.

Pensa, por ehèmpel, tambe riba e último tempunan, ora esnan ku ta fiel no por kumpra ni bende, manera deskribí den Revelashon 13-14 (wak siman 11). Pa a desaroyá un konfiansa den Dios i den Su providensia i poder i amor lo ta di sumo importansia ora ta parse ku henter mundu ta kontra nos. Debolbé diesmo fiel seguramente por yuda desaroyá e konfiansa ei. Asta promé ku esei, ki krusial pa nos tur di a siña konfia Dios, independientemente di nos situashon.

Un segundo gran rason pa fidelidat finansiero ta di tin akseso na e bendishonnan tangibel primintí di Dios. Komo parti di e kontrato di debolbé diesmo, Dios a primintí bendishonnan ku ta asina grandi ku nos lo no tin espasio sufisiente pa risibí nan. Ku nos ekseso, nos por yuda otronan i yuda sostené e obra di Dios ku nos ofrendanan.

Di ki manera bo a eksperensiá e gran bèrdat ku ta, en realidat, “mas bendishoná pa duna ku pa risibí”?

Nos ta kalkulá nos diesmo riba nos “entrada” si paga nos pa ora òf pa medio di un salario, i nos ta paga nos “oumento” òf ganashi si nos ta independiente i tin nos propio negoshi. Den hopi pais, e gobièrnu ta kita impuestonan di e salario di e trahadó pa kubri kosto di e servisionan hasí na e hendenan, manera seguridat, kamindanan i brùgnan, benefishinan di desempleo, etc. E kuestion di bruto òf nèto ta envolví primeramente si nos ta debolbé diesmo riba nos entrada promé òf despues ku a kita e impuestonan menshoná. Esnan ku ta traha riba nan mes por dedusí legítimamente e kosto di hasi negoshi pa asina determiná nan ganashi aktual promé ku dedusí nan impuestonan personal.

Estudionan di e kustumbernan di dunamentu di miembresia ta revelá ku mayoria atventista di e di shete dia ta debolbé diesmo riba e entrada bruto, es desir, promé ku kita impuestonan. De echo, di akuerdo ku Tithing Principles and Guidelines [Prinsipionan i Poutanan di Diesmo], publiká pa Asosiashon General na 1990, “Mester kalkulá diesmo riba e kantidat bruto di un sueldo òf salario di un empleado promé ku dedukshonnan legalmente rekerí òf otro dedukshonnan outorisá pa e empleado. Esaki ta inkluí impuestonan federal i estatal riba entrada ku ta proveé pa servisionan i otro benefishinan di siudadania responsabel. Por dedusí kontribushonnan na Seguridat Sosial-Lesa Pouta 111-F.” — Página 22.

Lesa 1 Reinan 17:9-16. Kua tabata situashon di e biuda promé ku Elias a bin serka dje? Kiko e profeta a pidié hasi promé di sòru pa su mes i su yu? Kiko nos por siña di e relato akí tokante e pregunta en kuestion?

Dios a bisa e biuda di Sarepta ku un hòmber di Dios tabata bai bin wak e (1 Reinan 17:9). Ora Elias a yega, el a splika su teribel sirkunstansianan. Promé Elias a pidi poko awa di bebe i despues el a agregá: “No tene miedu; bai i hasi manera bo a bisa, pero traha un pan chikitu pa mi promé, i tres’é pa mi; i despues traha algu pa bo mes i bo yu. Pasobra asina Señor Dios di Israel ta bisa: ‘E barí di ariña lo no bira bashí, ni e bòter di zeta lo no seka, te dia ku Señor Dios manda áwaseru riba tera’ ” (1 Reinan 17:13,14, NKJV).

Esaki tabata egoismo di su parti, òf simplemente e tabata probando su fe, de echo, permitié ehersé su fe? E kontesta lo mester ta opvio.

Manera a bisa nos, “Kada hende mester ta su propio asesor i ta laga pa e duna manera e proponé den su kurason.” — Ellen G. White, Testimonies for the Church, tomo 4, p. 469.

Kon bo ta splika un hende ku nunka a duna diesmo e bendishonnan ku ta bin di duna esei? Kua e bendishonnan ei ta i kon debolbé diesmo ta fortalesé bo fe?

Lesa 1 Korintionan 4:1,2. Komo yunan di Dios i mayordomonn de Su bendishonnan, ki tipo personanan E ta pidi pa nos ta?

Pues, kiko ta nifiká pa ta fiel ku nos diesmo? E siman akí nos a repasá vários di e elementonan konstituyente di e diesmo:

1. E kantidat, ku ta un désimo parti, òf 10 porshento, di nos entrada òf oumento.
2. Hibá na e mangasina: e lugá for di unda ta paga e ministernan di evangelio
3. Honra Dios ku e promé parti di nos entrada.
4. Usá pa e propósito korekto: e apoyo di e ministerio.

Ta nos responsabilidat komo miembronan di iglesia pa kumpli e promé tres elementonan; ta responsabilidat di e enkargadonan di e mangasina pa sigurá nan mes ku ta usa e fondonan di e diesmo korektamente.

I, e diesmo no ta opshonal di nos parti. Tantu e diesmo komo e mangasina ta parti di nos responsabilidat. Nos no ta establesé e parameternan; Dios ta hasi esei. Si mi no debolbé un 10 porshento kompleto di mi “oumento”, en realidat mi no ta debolbiendo diesmo; i si mi no trese e 10 porshento ei na e “mangasina”, en realidat tampoko mi ta debolbiendo diesmo.

Lesa Mateo 25:19-21. Ki ora ta pidi nos pa nos duna kuenta di nos atministrashon di e fondonan di Dios? Kiko ta bisa esnan ku tabata finansieramente fiel?

“Trese henter e diesmo den mangasina” (Malakias 3:10), ta e mandato di Dios. No ta hasi niun apelashon na gratitut ni na generosidat. Esaki ta un asuntu di simpel honestidat. E diesmo ta di Señor; i E ta pidi nos pa debolbé na djE loke ta di djE”. — Ellen G. White, Education, p. 138. Manehá pa Dios ta un privilegio úniko, i tambe un responsabilidat. E ta bendishoná i sostené nos i ta pidi solamente un désimo parti, i despues E ta usa Su diesmo pa proveé pa esnan den e ministerio, manera El a hasi ku e tribu di Levi durante e tempunan di Israel antiguo.

Algun hende ta argumentá ku nan no gusta kon ta usa e plaka de nan diesmo i, por lo tantu, sea nan no ta debolbé diesmo òf nan ta manda nan plaka otro kaminda. Sinembargo, unda Dios a bisa: “Trese e diesmo den mangasina, pero solamente si bo ta sigur ku e mangasina ta us’é korektamente”?

Lesa e dokumento di diesmo mas kompletu di Ellen G. White den tomo 9 di Testimonies for the Church, p. 245-252. Studia Sekshon III di Counsels on Stewardship, p. 65-107.

“Si tur e diesmonan di nos pueblo tabata strom drenta den e tesoreria di Señor manera nan mester a hasi, nan lo a risibí tal bendishonnan ku e donnan i ofrendanan pa propósitonan sagrado lo a multipliká dies biaha, i asina e kanal entre Dios i hende lo a keda habrí.” — Ellen G. White, Testimonies for the Church, tomo 4, p. 474. Esaki ta un deklarashon asombroso. Si nos tur tabata hendenan ku ta debolbé diesmo fiel, Dios lo a bendishoná nos ku fondonan pa oumentá nos ofrendanan ku 1.000 porshento.

“Den e di tres kapítulo di Malakias nos ta haña e kontrato ku Dios a hasi ku hende. Aki Señor ta spesifiká e parti ku E lo desempeñá ora E otorgá Su gran donnan riba esnan ku lo debolbé e diesmonan i ofrendanan fielmente na djE.” — Ellen G. White, Review and Herald, December 17, 1901.

“Nos tur mester kòrda ku e reklamonan di Dios ta forma e base di tur otro reklamo. E ta duna nos generosamente, i e kontrato ku El a sera ku hende ta ku e lo debolbé un désimo parti di su poseshonnan na Dios. Dios ta konfia Su mayordomonan ku Su tesoronan, pero di e désimo parti E ta bisa: Esaki ta di Mi. Den e mesun proporshon ku Dios a duna Su propiedat na hende, asina hende mester debolbé un diesmo fiel di tur su rikesa na Dios. Hesukristu Mes a hasi e areglo distinto akí.” — Ellen G. White, Testimonies for the Church, tomo 6, p. 384.

Preguntanan pa Diskushon:

Meditá mas riba e idea akí di ku e práktika di diesmo no a originá den Israel antiguo. Kon e echo akí ta yuda nos komprendé e eternidat di e obligashon akí di nos parti dilanti di Dios?

Den klas, diskutí e pregunta hasí na final di e estudio di djaluna. Pensa kiko lo a sosodé si hende a disidí di manda nan diesmo otro kaminda. Kiko lo a pasa ku nos iglesia? Nos lo asta tabatin un iglesia ainda? Kiko tin di malu ku e aktitut ku ta bisa: Bon, mi diesmo ta asina chikitu den kontraste ku tur otro kos, e no ta importá? Ke tal si tur hende tabata pensa asina?

Kompartí ku otronan loke bo a siña i a eksperimentá dunando diesmo. Kiko bo por siña otronan tokante e práktika?