Montonando Tesoro den Shelu

4 di febrüari

Lesa pa e Estudio di e Siman Akí:

Gen. 6:5-14; Hebr. 11:8-13; 2 Kor. 4:18; Gen. 13:10-12; Gen. 32:22-31; Hebr. 11:24-29.

Teksto di Memoria:

“Pasobra kiko lo probechá un hende si e gana henter mundu, i pèrdè su mes alma? Of kiko un hende lo duna a kambio di su alma?” (Marko 8:36,37, NKJV).

Hesus a duna nos e mihó strategia di invershon na mundu ora El a bisa: "No montoná pa boso mes tesoronan riba tera, kaminda mòt i frus ta destruí i kaminda ladronnan ta kibra drenta i hòrta; ma montoná pa boso mes tesoronan den shelu, kaminda ni mòt ni frus ta destruí i kaminda ladronnan no ta kibra drenta i hòrta " (Mat. 6:19,20, NKJV). Hesus ta konkluí Su strategia di invershon bisando:

"Pasobra kaminda bo tesoro ta, einan bo kurason lo ta tambe " (Mat. 6:21, NKJV). Den otro palabra: mustra mi na kiko bo ta gasta bo sèn, i lo Mi mustrá bo unda bo kurason ta, pasobra kaminda ku bo pone bo sèn, bo kurason seguramente lo sigui, si e no ta einan kaba.

Bo ke un kurason pa e reino di Dios? Si ta asina, e ora ei pone bo sèn kaminda e lo kosechá rekompensanan eterno. Pone bo tempu i bo sèn i orashon den e obra di Dios. Si bo hasié, pronto lo bo bira ainda mas interesá den e obra ei, i bo kurason lo sigui tambe. E siman akí nos lo repasá tekstonan i ilustrashonnan ku ta mustra kon akumulá tesoronan den shelu i, finalmente, kosechá un rekompensa eterno.

* Studia e lès di e siman akí pa prepará pa Sabat, 11 di febrüari.

Ta notabel pa konsiderá ku frekuentemente Dios ta yama esnan ku ta buskando tesoro selestial pa hasi alterashonnan di bida importante aki riba tera. Sea prepará pa afrontá e mesun kos, si tin mester.

Lesa Génesis 6:5-14. Kua kambionan radikal a bini na Noe komo resultado di obedesé Dios? Kua prinsipionan nos por haña akinan pa nos mes den un mundu ku mester ser spièrtá tokante morto inminente?

Noe por a pasa su tempu i rekursonan konstruyendo un kas pa su mes, pero el a skohe pa hasi un kambio drástiko den su bida i pasa 120 aña di e bida ei siguiendo e yamada di Dios pa traha e arka.

Hopi dudoso awendia ta deskartá e storia di diluvio komo un mito, hopi biaha basá riba spekulashonnan sientífiko tokante e leinan konosí di naturalesa. Esaki no ta nada nobo. "E mundu promé ku e diluvio a rasoná ku pa siglonan e leinan di naturalesa tabata stabil. E temporadanan rekurente a bin den nan órden. Te awor nunka áwaseru a kai; tera a haña awa pa medio di un neblina òf serena. E riunan nunka ainda a pasa nan límitenan, sino a hiba nan awanan ku siguridat na laman. Dekretonan fiho a evitá ku e awanan a desbordá di nan oria." — Ellen G. White, Patriarchs and Prophets, p. 96. Promé ku diluvio, hende tabata argumentá ku nunka un diluvio por a bini basá riba un komprendementu falsu di realidat; despues di diluvio, basá riba un komprendementu falsu di realidat, nan ta argumentá ku, pa kuminsá, nunka el a bini.

Mientrastantu, Beibel ta bisa tambe ku hende lo bira dudoso di eventonan di tempu di fin, manera nan tabata di e diluvio (lesa 2 Pe. 3:3-7). Kon nos, e ora ei, por prepará pa e destrukshon ku ta bini? Tin un desishon konsiente yamá “gratifikashon retrasá". Básikamente esaki ta nifiká ku nos mester hasi e trabou ku Dios a yama nos pa hasi ku pasenshi, ku e speransa di un rekompensa futuro mas glorioso. Nos no sa ki ora Kristu lo regresá. Den un sentido, no ta importá. Loke ta importá ta ku, meskos ku Noe, nos ta hasi turesten loke Dios ta pidi di nos, asta si, manera ku Noe, e ta nifiká algun kambio di bida radikal.

Kon prepará lo bo ta pa hasi un kambio importante den bo bida pa Dios si, meskos ku Noe, a yamá bo pa hasi presis esei? (Lesa Lukas 16:10).

Dios a yama Abram pa bandoná su tera natal i su famianan i bai na un tera ku E lo a mustr’é. Aunke no ta duna detaye, Abram mester a bandoná e tera di su nasementu i promé añanan. Seguramente, e no tabata un desishon fásil, i sin duda el a entregá algun plaser i fasilidatnan terenal pa hasi esaki.

Lesa Génesis 12:1-3. Kon "tur e famianan di tera tabata ser bendishoná" komo resultado di e promesa akí i su aseptashon?

Esaki tabata un evento importante ku a kambia bida di Abram i su famia. "Pa medio di fe Abraham a obedesé ora Dios a yam'é pa sali bai na e lugá ku e lo a risibí komo herensia. I el a sali bai, sin sa na unda e tabata bai" (Hebr. 11:8, NKJV). "Abraham su obediensia inkondishonal ta un di e evidensianan di mas notabel di fe ku por haña den henter Beibel." — Ellen G. White, Patriarchs and Prophets, p. 126.

Mayoria di nos lo no ta ansioso pa bandoná nos pais natal i nos amigunan i miembronan di famia. Pero Abram a hasi esei. Abram tabata satisfecho pa ta kaminda Dios tabata ke pa e ta. Pa straño ku esaki por parse, Abram, Isaak, i Jakòb nunka den nan bida a risibí e tera ei, tòg, di tur manera, nan a keda fiel na Dios.

Lesa Hebreonan 11:8-13. Kua ta e mensahe relevante pa nos akinan?

Abram tabata konosí komo un prens pa esnan ku batata biba rònt di dje. E tabata konosí pa ta generoso, balente, hospitalario, i un sirbidó di e Dios Haltísimo. Su testimonio pa Dios tabata ehemplar. Pa grasia di Dios, nos ta herederonan ku Abraham. "Meskos ku Abraham ‘a kere Dios, i a kont’é p’e komo hustisia.’ P'esei, sa ku solamente esnan ku ta di fe ta yunan di Abraham" (Gal. 3:6,7, NKJV). "I si boso ta di Kristu, e ora ei boso ta simia di Abraham, i herederonan di akuerdo ku e promesa" (Gal. 3:29, NKJV).

Ku Abraham, manera ku Noe, nos ta mira un hende tumando un desishon importante ku ta kambia bida komo resultado di obedesé Dios.

Lesa 2 Korintionan 4:18. Kon e mensahe di e versíkulo akí mester impaktá e tipo di desishonnan spiritual ku nos ta tuma? Kon tantu Moises komo Abraham a sigui e mesun prinsipio ei?

Ora Abram a bandoná su pais natal komo kontesta riba e yamada di Dios, su subrino Lòt a skohe pa bai kuné riba su peregrinashon. Génesis 13 ta registrá ku Dios a bendishoná Abram te na e punto ku e "tabata masha riku den bestia di kria [e manera primaria pa midi rikesa den e kultura ei], den plata, i den oro" (Gen 13:2). Lòt tambe tabatin "karné, baka i tènt" (Gen. 13:5). Nan tur dos a bira asina riku ku nan trupanan di bestia ekstensivo, ku nan no por a biba serka banda di otro. Pa evitá konflikto entre nan wardadónan, Abram a ofresé Lòt e eskoho di unda e lo ker a biba. Naturalmente, Lòt mester a warda riba Abram, ku tabata mas grandi kuné, i pasobra e tabata debe su mes prosperidat na su konekshon kuné. Sinembargo, e no a mustra gratitut na su benefaktor i ku egoismo e tabata ke loke e tabata konsiderá e mihó tera disponibel.

Lesa Génesis 13:10-12. Kua faktornan rashonal por a hiba Lòt na tuma e desishon ku el a tuma?

Maske kon fásilmente Lòt lo por a hustifiká su desishon pa muda bai e siudat, kosnan no a resultá asina bon p’e einan, i ora Abram a tende tokante loke a pasa kuné, e no a bisa: "Ya, lástima, Lòt. Bo ta kosechá loke bo sembra." En kambio, el a bin na su reskate (lesa Génesis 14).

Tin biaha, den nos búskeda pa mas kos, nos no ta siña nos lèsnan bon. Lòt a bai stret bèk den Sodoma! Pero den Su gran miserikòrdia, Dios a manda mensaheronan ku atvertensia pa Lòt i su famia, pa laga nan sa di e destrukshon inminente di e siudatnan akí.

Lesa Génesis 18:20-33. Kiko Dios a bisa Abraham tabata e motibu pa Su bishita na tera? Kiko tabata Abraham su kontesta riba e notisia ku Dios tabata planiando pa destruí e siudatnan malbado akí?

Pa motibu di Abraham su preokupashon pa Lòt i su famia, el a negoshá ku Dios pa spar e siudatnan si por a haña hendenan hustu den nan. El a kuminsá ku 50 i a baha te na 10. Den harmonia ku Su karakter di amor, Dios nunka a stòp di duna mizerikòrdia te ora Abraham a stòp di pidi! Dios i e dos angelnan personalmente a libra Lòt, su esposa i dos yunan muhé. Pero su esposa a wak patras i a bira un pilá di salu. Lòt a drenta Sodoma komo un hòmber riku i a sali ku kasi nada. Kon kuidadoso nos mester ta tokante e tipo di desishonnan ku nos ta tuma, spesialmente pensando solamente riba ganashinan di término kòrtiku kontrali na e kuadro grandi (lesa Marko 8:36,37).

Komo un hóben ku tabata stima i teme Dios, Jakòb sinembargo a rebahá su mes pa konspirá ku su mama, Rebeka, pa gaña su tata i gana su bendishon. Komo konsekuensia, el a kuminsá su bida di adulto riba e kaminda robes, i e mester a hui òf, kisas, enfrentá un morto prematuro. Rebeka a bisa Jakòb pa "Hui bai ... serka Laban; i keda algun tempu serka dje, te ora ku e furia di bo ruman baha; ...E ora ei lo mi manda buska bo for di ayanan " (Gen. 27:43-45). En realidat Jakòb a bai pa 20 aña, i nunka mas el a mira kara di su mama.

Lesa Génesis 32:22-31. Kiko a pasa Jakòb akinan, i kua lèsnan spiritual nos por saka for di e storia akí di e grasia di Dios, asta ora nos tuma desishonnan robes?

"A traves di humiliashon, arepentimentu, i sumishon propio, e mortal pekador i erante akí a prevalesé ku e Mahestat di shelu. El a gara duru ku su mannan temblando riba e promesanan di Dios, i e kurason di Amor Infinito no por a bira lomba pa e ruego di e pekador. E eror ku a hiba na e piká di Jakòb di optené e derechi di nasementu pa medio di froude awor tabata poné klaramente su dilanti. E no a konfia e promesanan di Dios, sino a trata, pa medio di su mes esfuerso, di logra loke Dios lo a logra den Su mes tempu i manera. ... Jakòb a risibí e bendishon pa kua su alma tabata anhelá. Su piká komo suplantador i gañadó tabata pordoná.” — Ellen G. White, Patriarchs and Prophets, p. 197, 198.

Lesa Génesis 49:29-33. Aunke Jakòb no tabatin poseshonnan mas na Kanaan, ki instrukshonnan el a duna su yunan relashoná ku su entiero? Ken tambe ta derá den e kueba ei? Dikon bo ta kere ku Jakòb a hasi e petishon akí?

Beibel ta informá nos ku tur e tres patriarkanan i nan esposanan ta derá den e mesun kueba. E konfiansa di Jakòb den Dios tabata fuerte, i e tabata konsiderá su mes un strañero i peregrino riba tera (lesa Hebr. 11:13). Apesar di erornan, el a bai for di kas sin nada pero a regresá Kanaan komo un hòmber riku.

Apesar di nos fayonan, ainda Dios por bendishoná nos. Kuantu mas mihó, sin embargo, evitá e erornan pa kuminsá kuné! Kua eskohonan bo ta enfrentando aworakí, i kon bo por evitá di hasi esnan robes?

E personahe di Moises a dominá e promé añanan di historia sagrado. El a keda na bida pa medio di e providensia di Dios, kende a obra pa medio di un mama aktivo i un ruman muhé kariñoso. Ora Fárao su yu a haña beibi Moises den un makutu di rit, el a pidi su mama hebreo pa kuid’é i a pag'é pa hasi esei. Ki un desafio bendishoná pa un mama hóben ku tabata un eksilio i katibu! Yokabed tabatin solamente 12 aña pa siña su yu resa, konfia i honra Dios, i moldia su karakter pa un bida di servisio. Pa añanan, a entrená Moises den e kortenan real di Egipto. "I a entrená Moises den tur e sabiduria di e egipsionan, i e tabata poderoso den palabra i echo" (Echonan 7:22, NKJV). Segun ku Moises tabata madurá komo hòmber, el a tuma un desishon konsiente ku a kambia su bida i e rumbo di historia.

Lesa Hebreonan 11:24-29. Pensa riba loke Moises a laga atras i kiko e mester a enfrentá a kambio. Purba wak e for di su posishon, promé ku el a hasi e eskoho. Kiko e tabata bai laga, i kiko e tabata skohiendo pa aseptá ora e bai?

Egipto tabata un di e podernan di mas grandi den e mundu antiguo na e momento ei, si no ta esun di mas grandi. Riu Nilo a krea un tera asina fértil ku Egipto, yen di kosecha, tabata un nashon riku i poderoso, i Moises mes lo tabata na tòp di e reino akí. Ta difísil pa imaginá kon tentador e atrakshon di mundu, e mundu di Egipto i tur su tesoronan, mester tabata p’e den su promé añanan. Seguramente, e mester a haña e adorashon, e plasernan, e rikesanan tentador. Sin duda, probablemente e por a hustifiká fásilmente pa keda mas bien di kompartí su suerte ku un grupo di katibunan despresiá.

I sinembargo, kiko? Manera Skritura ta bisa, el a skohe "mas bien pa sufri aflikshon huntu ku e pueblo di Dios ku gosa di e plasernan pasahero di piká" (Hebr. 11:25, NKJV). I papia di aflikshon? Un parti importante di e buki di Eksodo ta trata ku e luchanan i pruebanan di Moises, ku, asta despues di tur loke el a pasa aden, ainda no tabata por a krusa bai e Tera Primintí (lesa Num. 20:12). Sinembargo, na final, nos tur sa ku Moises a hasi e eskoho korekto, asta si tin biaha e mester a puntra su mes si realmente el a hasi esei.

For di un perspektiva mundano, Moises mester a keda na Egipto. Sinembargo, komo kristiannan, nos a haña un bista di realidat ku ta hiba nos mas ayá di e mundu akí. Ora mundu ta tenta nos, kon nos por mantené e kuadro grandi semper nos dilanti? Dikon ta asina importante pa nos hasi esei?

Dios a honra Su parti di e pakto ora El a bendishoná Abraham. I Abraham a honra Dios ora e no a montoná tesoro riba e tera akí. "E herensia ku Dios a primintí Su pueblo no ta den e mundu akí. Abraham no tabatin niun poseshon riba tera, ‘nò, ni sikiera pa pone su pia riba dje.’ Echonan 7:5. E tabata poseé gran rikesa, i el a us'é pa e gloria di Dios i e bon di su próhimo; pero e no tabata wak e mundu akí komo su hogar. Señor a yam'é pa bandoná su kompatriotanan idólatra, ku e promesa di e tera di Kanaan komo un poseshon eterno; sinembargo, ni e ni su yu ni yu di su yu a risibié. Ora Abraham tabata deseá un lugá pa dera su mortonan, e mester a kumpr'é serka e kananeonan. Su úniko poseshon den e Tera di Promesa tabata e graf kobá den baranka den e kueba di Makpela.” — Ellen G. White, Patriarchs and Prophets, p. 169.

Miéntras nos ta biba nos bida, tin biaha nos ta keda tentá pa bai den direkshon di rikesa i rekreashon. Ta tuma un fe fuerte pa praktiká gratifikashon retrasá. "A ofresé e palasio magnífiko di Fárao i e trono di monarka komo un sedukshon na Moises; pero e tabata sa ku e plasernan pekaminoso ku ta pone hende lubidá Dios, tabata den su kortenan señorial. El a wak mas ayá di e palasionan espléndido, mas ayá di e korona di un monarka, na e onornan haltu ku lo otorgá na e santunan di e Haltísimo den un reino no manchá pa piká. Pa fe el a mira un korona ku no ta peresé, ku e Rei di shelu lo a pone riba frenta di e vensedó. E fe akí a hib'é na bira lomba pa monarkanan di tera i uni ku e nashon humilde, pober, despresiá ku a skohe pa obedesé Dios mas bien ku sirbi piká.” — Patriarchs and Prophets, p. 246.

Preguntanan pa Diskushon:

Kiko lo sosodé ku nos poseshonnan ora Hesus bini? (Lesa 2 Pe.3:10.) De echo, kiko por pasa ku nan asta promé ku Hesus bini? (Lesa Mat. 6:20.) Dikon, anto, ta importante semper pa mantené kosnan den nan perspektiva korekto?

Hesus a spièrta tokante "e engaño di rikesa" (Marko 4:19). Di kiko e ta papiando? Kon rikesa por gaña nos?

Den klas, papia tokante e maneranan ku Moises lo por a hustifiká pa keda na Egipto na lugá di laga tur kos atras pa asina hui huntu ku un grupo di katibu bai den un desierto seku? Kiko finalmente mester a pon’é disidí manera el a hasi?