Na Esnan di Mas Ménos di Esakinan

11 di febrüari

Lesa pa e Estudio di e Siman Akí:

Lukas 4:16-19; Isa. 62:1,2; Deut. 15:11; Mat. 19:16-22; Lukas 19:1-10; Job 29:12-16.

Teksto di Memoria:

“E ora ei e Rei lo bisa na esnan na Su man drechi: ‘Bin, boso bendishoná di Mi Tata, heredá e reino prepará pa boso for di fundashon di mundu’ ” (Mateo 25:34, NKJV).

Beibel ta papia hopi bia di e strañeronan (tin bia yamá peregrino),e wérfanonan, i e biudonan. E grupo akí por ta esnan na ken Hesus a referí komo “esnan di mas ménos di e rumannan akí di Mi” (Mat. 25:40, NKJV).

Kon nos por identifiká e hendenan akí awendia? E strañeronan di tempunan di Beibel tabata individuonan ku mester a bandoná nan pais di orígen, kisas pa motibu di guera òf hamber. E ekivalente den nos dia por tabata e miónes di refugiadonan ku a bira pober pa motibu di sirkunstansianan ku nan no a skohe pa ta den.

E wérfanonan ta muchanan ku a pèrdè mayornan a traves di guera, aksidente, òf malesa. E grupo akí por tabata inkluí tambe esnan ku nan mayornan ta den prizòn òf ousente di otro forma. Ki un tereno amplio di servisio ta eksponé aki.

E biudonan ta esnan ku a pèrdè nan kasánan pa e mesun motibu ku e wérfanonan. Hopi ta kabes di un famia di un mayor i por a usa e yudansa ku iglesia por proveé.

Manera nos lo mira e siman akí, pa motibu ku nos ta manehadónan di e negoshi di Dios, yuda e pobernan no ta djis un opshon. E ta: sigui e ehèmpel di Hesus i obedesé Su mandatonan.

* Studia e lès di e siman akí pa prepará pa Sabat, 18 di febrüari.

Trempan den e ministerio públiko di Hesus, El a biaha bai Názarèt, den region di Galilea. Esaki tabata su siudat natal, i e pueblo lokal ya a tende di Su obra i milagernan. Manera tabata Su kustumber, Hesus tabata asistí na servisionan di Sabat den e snoa. Aunke Hesus no tabata e rabi enkargá, e asistente a dun’E e ròl di Isaias i a pidiE pa hasi e lektura di Skritura. Hesus a lesa Isaias 61:1,2.

Lesa Lukas 4:16-19 i kompar’é ku Isaias 61:1,2 (lesa tambe Lukas 7:19-23). Dikon, bo ta kere, Hesus a skohe e Skritura spesífiko akí? Dikon lo tabata konsiderá e versíkulonan akí di Isaias komo mesiániko? Kiko nan tabata revelá tokante e obra di e Mesias?

Pa motibu ku e lidernan religioso aparentemente a pasa e profesianan ku tabata papia di un Mesias sufridó por alto i a mal apliká esnan ku tabata mustra na e gloria di Su Segundo Binida (loke mester sirbi komo un rekordatorio pa nos di kon importante komprendé profesia realmente ta), mayoria di e hendenan tabata kere e idea falsu ku e mishon di e Mesias tabata pa libra Israel for di su konkistadónan i opresornan, e romanonan. Pensa ku e deklarashon di mishon di e Mesias a bin di Isaias 61:1,2 mester tabata un berdadero shòk.

Generalmente e funshonarionan sin konsenshi manera kobradónan di belasting, esnan den negoshi, i asta nan propio bisiñanan, tabata despresiá e pobernan. Komunmente tabata pensa ku pobresa tabata e maldishon di Dios i ku nan kondishon desafortuná mester tabata nan mes falta. Ku e mentalidat akí, poko hende tabatin algun preokupashon pa e pobernan i nan situashon infelis.

Sinembargo, e amor di Hesus pa e pobernan tabata un di e evidensianan di mas grandi di ku E tabata e Mesias, manera nos ta mira den e forma kon Hesus a kontestá e pregunta di Juan Boutista tokante E komo e Mesias (lesa Mat. 11:1-6). “Meskos ku e disipelnan di e Salbador, Juan Boutista no a komprendé e naturalesa di e reino di Kristu. El a spera ku Hesus lo a tuma e trono di David; i segun ku tempu tabata pasa, i e Salbador no a reklamá e outoridat real, Juan a bira konfundí i preokupá.” — Ellen G. White, The Desire of Ages, p. 215.

“Religion puru i sin mancha dilanti di Dios i e Tata ta esaki: bishitá wérfanonan i biudonan den nan difikultat, i mantené bo mes sin mancha for di mundu” (Santiago 1:27, NKJV). Kon e versíkulo akí mester yuda nos establesé nos prioridatnan religioso?

Den nan eskritonan, e outornan di Beibel a inkluí hopi di e provishonnan di Dios pa e pobernan, e strañeronan, e biudonan, i e wérfanonan. Nos tin registronan di esaki te na Seru Sinai. “Seis aña lo bo sembra bo tera i lo bo rekohé su produkto, ma e di shete aña lo bo lag’é sosegá i keda sin kultivá, pa e pobernan di bo pueblo por kome; i loke nan laga, e bestianan di kampo por kome. Di mes manera lo bo hasi ku bo kunuku di wendrùif i bo hòfi di oleifi” (Eks. 23:10, 11, NKJV).

Lesa Levítiko 23:22 i Deuteronomio 15:11. Aunke kon diferente e konteksto por ta for di nos bida awe, ki prinsipionan nos mester saka for di e versíkulonan akí?

Generalmente ta komprendé ku “ruman” akinan ta referí na kompañeronan israelita òf kompañeronan kreyente. Tambe nos ta pensa di nan komo e pobernan digno, òf “esnan di mas ménos akí di Mi rumannan.” E Salmonan ta duna direkshon riba kon nos mester trata esnan den nesesidat. “Defendé e pobernan i wérfanonan; hasi hustisia na esnan aflihí i den nesesidat. Libra e pobernan i esnan den nesesidat; libra nan for di man di e malbadonan” (Salmo 82:3,4, NKJV). E pasashi akí ta indiká nos embolbimentu den formanan mas ayá di simplemente proveé alimento.

Despues tin promesanan na esnan ku yuda esnan den nesesidat. “Esun ku duna na e pober lo no falta nada” (Prov. 28:27, NKJV). “E rei ku husga e pobernan ku bèrdat, su trono lo establesé pa semper” (Prov. 29:14, NKJV). I Rei David a nota: “Bendishoná ta esun ku konsiderá e pober; Señor lo libr’é den tempu di difikultat” (Salmo 41:1, NKJV). Esaki, anto, semper tabata un prioridat den Israel antiguo asta si, tin bia, a pèrd’é for di bista.

En kambio, asta den tempunan mas moderno, partikularmente na Inglatera, bou di impakto di loke tabata konosí komo “Darwinismo Sosial”, hopi hende tabata pensa ku no solamente no tabatin imperativo moral pa yuda e pobernan ma ku tabata, de echo, robes pa hasi esei. En kambio, siguiendo e forsanan di naturalesa, den kua esnan fuerte ta sobrebibí a kosto di esnan débil, “darwinistanan sosial” tabata kere ku lo tabata perhudisial pa sosiedat yuda e pobernan, esnan malu, esnan den nesesidat pasobra, si nan multipliká, nan lo a solamente debilitá e tehido sosial di e nashon komo un totalidat. Aunke kruel, e pensamentu akí tabata e resultado lógiko di kreensia den evolushon i e narativo falsu ku e ta proklamá.

Kon e evangelio, e idea ku Kristu a muri pa tur hende, mester afektá kon nos ta trata tur hende, independientemente di ken nan ta?

Nos no sa muchu tokante e hóben riku aparte di ku e tabata hóben,un gobernante, i riku. I e tabatin interes den kosnan spiritual tambe. E tabata asina energétiko ku el a kore bin serka Hesus (Marko 10:17). E tabata eksitá pa siña tokante bida eterno. E storia akí ta asina importante ku a registr’é den tur tres Evangelio sinòptiko: Mateo 19:16-22, Marko 10:17-22, i Lukas 18:18-23.

Lesa Mateo 19:16-22. Kiko Hesus tabata ke men ora El a bis’é: “Si bo ke ta perfekto, bai i bende loke bo tin, i duna na e pobernan, i lo bo tin tesoro den shelu: i bin i sigui Mi” (Mat. 19:21)?

Hesus no ta pidi mayoria di nos pa bende tur loke nos tin i duna e sèn na e pobernan. Pero plaka mester tabata e hóben akí su dios, i aunke e kontesta di Hesus por parse bastante severo, E tabata sa ku esaki tabata e úniko speransa di salbashon di e hòmber akí.

Beibel ta bisa ku el a bai masha tristu pasobra e tabata hopi riku, loke ta proba presis kuantu e tabata adorá su plaka. Hesus a ofres’é bida eterno i un lugá den Su sírkulo interno (“Bin sigui Mi”, e mesun palabranan ku Hesus a usa ora El a yama e 12 disipelnan). Sinembargo, nunka mas nos no ta tende di e hóben akí. El a kambia eternidat pa su poseshonnan terenal.

Ki un teribel interkambio, no ta bèrdat? Ki un ehèmpel tristu di no sigui “gratifikashon retrasá” (wak siman pasá). Skohe manera e hòmber akí a hasi ta asina un engaño pasobra, no importá kiko rikesa material por duna nos awor, trempan òf lat nos lo muri i afrontá e prospekto di eternidat. I mientrastantu, asina tantu di e rikunan a deskubrí ku nan rikesa no tabata duna nan e pas i felisidat ku nan a spera; en bèrdat, den hopi kaso, lo kontrario ta parse di a sosodé. A skibi asina tantu biografia tokante kon miserabel hopi hende riku tabata. De echo, den tur historia registrá, ta haña un di e mihó deskripshonnan di kon insatisfaktorio rikesa por ta, den i di su mes, den e buki di Eklesiastes. Loke sea ta e lèsnan ku por saka for di dje, un punto ta manifestá su mes klaramente: plaka no por kumpra pas i felisidat.

“Pasobra ken ku kier salba su bida lo pèrd'é; ma ken ku pèrdè su bida pa Mi kousa i pa kousa di evangelio, lo salb'é. Pasobra ki probecho un hende lo tin si e gana henter mundu i pèrdè su propio alma? Of kiko un hende lo duna en kambio di su alma?” (Marko 8:35-37). Kiko ta nifiká pèrdè bo bida na interes di e evangelio?

Zakeo tabata un hudiu riku ku a traha su plaka trahando komo un kobradó di impuesto pa e romanonan odiá. Pa esei, i pasobra e i otro kobradónan di impuesto tabata eksigí mas belasting ku tabata debe realmente, nan tabata odia Zakeo i tabata yam’é un “pekador”.

Zakeo tabata biba na Yeriko, ku tabata situá riba un ruta komersial ku hopi komersio di negoshi. E enkuentro di Zakeo ku Hesus no tabata un koinsidensia. Aparentemente Zakeo tabata bou di konvikshon spiritual i ker a hasi algun kambio den su bida. El a tende tokante Hesus i e ker a mir’E. Palabra mester a sali ku e grupo ku Hesus tabata biaha kuné lo a yega Yeriko e dia ei. Hesus mester a pasa a traves di Yeriko for di Galilea, riba Su último biahe pa Herusalèm. E promé palabranan di Kristu na Zakeo a revelá ku, asta promé di drenta e pueblo, Hesus tabata sa tur kos di dje.

Lesa Lukas 19:1-10. Kiko tabata e diferensianan entre e eksperensia di e hòmber riku akí ku Hesus i esun di e hóben riku?

Nota ku ora Zakeo a bisa ku e lo a duna “mitar di mi biennan” (Lukas 19:8) na e pobernan, Hesus a aseptá e gesto akí komo un ekspreshon di un berdadero eksperensia di kombershon. E no a bis’é: sòri, Zak, pero manera ku e gobernante hóben riku, ta tur kos òf nada. Mitar no ta bai sirbi. Dikon? Mas probablemente pasobra, aunke Zakeo seguramente tabata gusta su rikesa, e no tabata e dios p’e ku e tabata pa e hóben riku. De echo, aunke nos no sa kiko Hesus a bis’é spesialmente, Zakeo ta esun promé ku a papia tokante duna sèn na e pobernan. Kontrali na esei, Hesus mester a bisa e hóben riku spesífikamente pa renunsiá tur kos; di otro manera e lo a destruyé. Aunke Zakeo, meskos ku kualke hende riku, mester tabata kuidadoso tokante e peligernan di rikesa, tabata parse ku e tabatin e mihó bou di kontròl ku e hóben riku.

“Ora e hóben riku a bira bai for di Hesus, e disipelnan a keda asombrá pa e palabranan di nan Maestro: ‘Ki difísil ta pa esnan ku ta konfia den rikesa drenta den e reino di Dios!’ Nan a sklama un na otro: ‘Ken anto por salba?’ Awor nan tabatin un demostrashon di e bèrdat di e palabranan di Kristu: ‘E kosnan imposibel pa hende ta posibel pa Dios.’ Marko 10:24,26; Lukas 18:27. Nan a mira kon, pa medio di e grasia di Dios, un hòmber riku por a drenta den e reino.” — Ellen G. White, The Desire of Ages, p. 555.

Lesa Job 1:8. Kon Dios Mes a deskribí Job?

Ta bastante bon, ku asta Dios ta yama Job “perfekto” i “rekto” (Job 1:8), asina perfekto i rekto ku niun otro hende riba tera na e momento ei por a igual’é. Atrobe, esakinan ta Dios su propio palabranan, literal, tokante Job.

Asta despues ku Job a enfrentá un katástrofe tras di otro, Dios a ripití loke El a bisa promé tokante Job, ku no tabatin hende mas riba tera meskos kuné, perfekto i rekto etcetera, eksepto ku e ora ei a agregá un elemento nobo. Job ainda tabata tur e kosnan akí, “aunke bo a instigá Mi kontra dje, pa destruyé sin motibu” (Job 2:3, NKJV).

I aunke nos ta haña un vishon poderoso di e perfekshon i rektitut di Job den kon el a nenga di renunsiá Dios apesar di tur loke a sosodé i apesar di e chèrchi desafortuná di su esposa: “Ainda bo ta tene duru na bo integridat? Maldishoná Dios i muri!” (Job 2:9, NKJV), e buki ta revelá un otro aspekto di e bida di Job promé ku e drama a desaroyá akinan.

Lesa Job 29:12-16. Kiko ta deskribí akinan ku ta duna nos ainda mas komprenshon den e sekreto di Job su karakter?

Kisas loke ta mas perspikas akinan ta e palabranan di Job: “I mi a investigá e kaso ku mi no tabata konosé” (Job 29:16, NKJV). Den otro palabra, Job no a simplemente warda, por ehèmpel, pa algun pididó di limosna den paña kibrá aserk’é pa un limosna. En kambio, Job tabata proaktivo pa identifiká nesesidatnan i despues aktua riba nan.

Ellen G. White a sugirí: “No warda pa nan [e pobernan] yama bo atenshon na nan nesesidatnan. Aktua manera Job a hasi. E kos ku e no tabata sa el a investigá. Hasi un gira di inspekshon i haña sa loke ta nesesario i kon por supli esaki mihó.” — Testimonies for the Church, tomo 5, p. 151. Esaki ta un nivel di maneho di plaka i mayordomia di e rekursonan di Dios ku ta mas ayá di e práktika di hopi di e yunan di Dios Awendia.

Lesa Isaias 58:6-8. Kon nos por tuma e palabranan antiguo akí i apliká nan na nos mes awe?

“Ora e Yu di hende lo bin den Su gloria, i tur e angelnan santu huntu kunE, e ora ei E lo sinta riba e trono di Su gloria: i tur nashon lo reuní Su dilanti: i E lo separá nan un for di otro.’ Asina Kristu, riba e Seru di Oleifi, a pinta na Su disipelnan e esena di e gran dia di huisio. I El a representá su desishon komo birando riba un punto. Ora e nashonnan ta reuní Su dilanti, lo tin solamente dos klase, i loke nan a hasi òf a neglishá di hasi p’E den persona di e pobernan i esnan ku ta sufri lo determiná nan destino eterno.” — Ellen G. White, The Desire of Ages, p. 637.

“Ora bo habri bo porta na esnan den nesesidat i sufriendo di Kristu, bo ta dunando bonbiní na angelnan invisibel. Bo ta invitá e kompania di sernan selestial. Nan ta trese un atmósfera sagrado di goso i pas. Nan ta bin ku alabansanan riba nan lepnan, i ta tende un nota di kontesta den shelu.Kada akto di miserikòrdia ta produsí músika aya. For di Su trono e Tata ta konta e obreronan apnegá entre Su tesoronan di mas presioso.” — The Desire of Ages, p. 639.

Preguntanan pa Diskushon:

“Pasobra e pobernan nunka lo kaba riba tera” (Deut. 15:11, NKJV). Ademas di e echo ku e predikshon akí, aunke míles di aña bieu, desafortunadamente a kumpli, kon nos mester komprend’é awe? Algun hende a usa e palabranan akí pa nada mas ku hustifiká pa no yuda e pobernan, i rasoná asin’aki: “Bon, Dios a bisa ku e pobernan semper lo ta meimei di nos, pues, ta asina kos ta.” Kiko ta e malinterpretashon di e pensamentu ei?

Lesa 1 Timoteo 6:17-19: “Ordená esnan ku ta riku den e siglo presente akí pa nan no ta arogante, ni pa konfia den rikesanan insigur ma den e Dios bibu, Kende ta duna nos na abundansia tur kos pa gosa di dje. Laga nan hasi bon, pa nan por ta riku den bon obra, kla pa duna, dispuesto pa kompartí, i montoná pa nan mes un bon fundeshi pa e tempu benidero, pa nan por tene na bida eterno” (NKJV). Nota kiko e peliger ta: konfia den bo rikesanan kontrali na e Dios bibu. Dikon esei ta asina fásil pa hasi pa esnan ku tin plaka, aunke nan sa ku al final ni nan plaka lo no tene nan na bida? Dikon nos tur mester ta kuidadoso tokante no konfia den nada otro ku e Dios bibu?