Planiando pa Eksito

18 di febrüari

Lesa pa e Estudio di e Siman Akí:

Ekl. 12:1; Gen. 2:15; 1 Tim. 5:8; Kol. 3:23,24; Gen. 39:2-5; Prov. 3:5-8.

Versíkulo di Memoria:

“I loke sea bo hasi, hasié sinseramente, manera ku ta pa Señor i no pa hende, sabiendo ku di Señor lo bo risibí e rekompensa di e herensia; pasobra bo ta sirbi Señor Kristu” (Kolosensenan 3:23,24, NKJV).

Mayoria hende ke biba un bida “eksitoso” i felis. Naturalmente, den un mundu kaí, kaminda tragedia i kalamidat por bati na porta na kualke momento, e meta akí no semper ta fásil pa alkansá.

E ora ei, tambe, tin e kuestion di kon nos ta definí “éksito”. Tin e kaso di Jose na Egipto; si hamas tabatin un bida eksitoso, esei seguramente lo tabata un, no ta bèrdat? Di prizòn pa palasio, e tipo di kos ei. Na otro banda, ke tal di Juan Boutista? El a bai di prizòn pa graf. Kon eksitoso su bida tabata? Atrobe, tur kos ta dependé riba kon bo ta definí “eksitiso”.

E siman akí nos ta bai wak e idea di “éksito” den konteksto di mayordomia básiko i prinsipionan finansiero. No importá ken nos ta òf unda nos ta biba, plaka i finansa ta bai ta parti di nos bida, sea nos gusta òf nò. Kiko, e ora ei, ta algun paso, pasonan práktiko, ku nos por dal a lo largu di kaminda ku, aunke nan no ta garantisá “éksito”, sinembargo por yuda nos evitá trampanan i erornan komun ku por hasi éksito finansiero un tiki mas difísil?

* Studia e lès di e siman akí pa prepará pa Sabat, 25 di febrüari.

Lesa Eklesiastes 12:1. Kiko ta e mensahe einan pa nos?

Segun ku hóbennan ta madurá bira adulto, pensamentunan lo lanta tokante ku nan mester proveé pa nesesidatnan básiko, kuminda, paña, i alohamentu. Hesus Mes a bisa nos kon priorisá nos nesesidatnan ora El a bisa: "Ma buska promé e reino di Dios i Su hustisia, i tur e kosnan aki lo wòrdu añadí na boso" (Mat. 6:33). Naturalmente, pa esnan ku ta mas bieu i no a hasi eskoho pa Hesus ora nan tabata yòn, ainda tin tempu pa tuma e desishonnan korekto pa ku mayordomia.

Manera nos a mira den Génesis 28:20-22, Jakòb a hasi algun eskoho di bida importante, tantu spiritual komo finansiero. Den e vishon, Señor a introdusí Su mes na Jakòb komo "Señor Dios di Abraham bo tata i e Dios di Isaak" (Gén. 28:13, NKJV). Despues, komo parti di su voto na Dios, Jakòb a bisa: Señor lo ta mi Dios" (Gen. 28:21, NKJV).

Lesa Genesis 29:9-20. Kiko ta importante tokante e momento di e evento akí den bida di Jakòb?

Despues ku Jakòb a hasi su kompromisonan spiritual i finansiero na Dios, Señor a dirigié na Raquel na e pos (lesa Gén. 29:9-20). Ta na su lugá pa tuma bo desishon spiritual i bo desishon di bida promé ku komprometé na matrimonio. Bo futuro kasá mester sa "den kiko nan ta hinka nan mes." E persona akí ta un kristian komprometé? Ki tipo di trabou e lo ta envolví aden? E persona akí lo ta un dosente, un verplegster, un abogado, un obrero, loke sea? Na ki tipo di bida lo mi komprometé mi mes? Otro preguntanan ku mester di kontesta promé ku e kompromiso di matrimonio ta: Ki nivel di edukashon ta kompletá? Ki kantidat di debe lo bin den e matrimonio? Mi ta dispuesto na aseptá e situashon akí komo parti di mi responsabilidat?

Lesa 2 Korintionan 6:14,15. Dikon e prinsipio akí ta asina importante pa konsiderá ora ta buska un pareha di bida? Aunke e no ta garantisá un bon matrimonio, dikon e lo yuda hasi e chènsnan di un bon matrimonio mihó?

A ménos ku bo ta independientemente riku, òf e benefisiario di un fondo fidusiario ku mama i/òf tata a krea pa bo pa asina nunka lo bo mester a traha un dia den bo bida (si bo lesa hopi storia tokante e muchanan akí, e plaka, ku mester tabata un bendishon, hopi biaha ta hiba na tragedia pa nan komo adulto), trempan òf lat lo bo mester traha pa bo biba. Lo ideal, naturalmente, ta pa haña algu ku bo tin pashon p’e ku por proveé bo ku un bon entrada, haña training den dje, haña un trabou hasiendo e, i traha riba dje pa bo añanan di trabou. Esei ta lo ideal; naturalmente, no ta semper e ta resultá asina.

Lesa Génesis 2:15 (lesa tambe Ekl. 9:10 i 2 Tes. 3:8-10). Kua ta nifikashon di e echo ku, asta promé ku entrada di piká, a duna Adam (i seguramente Eva tambe) trabou? Kon esaki lo por splika dikon, manera deklará akiriba, esnan ku nunka mester a traha a haña ku nan situashon ta un maldishon?

E trabou akí no tabata un kastigu, opviamente. E tabata diseñá pa nan bon. Es desir, asta den Paraiso, asta den un mundu den kua ningun piká, ni morto, i niun sufrimentu tabata eksistí, Dios tabata sa ku sernan humano mester a traha.

"I na Adam a duna e trabou di kuida e Hardin. E Kreador tabata sa ku Adam no por tabata felis sin trabou. E tabata deleitá den e bunitesa di e Hardin, pero esaki no tabata sufisiente. E mester tabatin trabou pa pone e órganonan maravioso di e kurpa den ehersisio. Si felisidat tabata konsistí di hasi nada, hende, den su estado di inosensia santu, lo a ser lagá sin trabou. Pero Esun ku a krea hende tabata sa kiko lo tabata pa su felisidat; i tan pronto ku El a kre'é, El a dun'é e trabou ku EL a asigná p’e. E promesa di futuro gloria, i e dekreto ku hende mester traha duru pa su pan di kada dia, a bin di e mesun trono.” — Ellen G. White, Our High Calling, p. 223.

Sinembargo, asta despues di e kaida, ora (manera ku tur otro kos) piká a mancha trabou, Dios a bisa Adam: "Maldishoná e tera ta pa bo motibu; ku doló lo bo kome di dje tur e dianan di bo bida" (Gen. 3:17 NKJV). Nota, Dios a maldishoná e tera pa "bo motibu", pa motibu di Adam, ku e idea ku trabou lo tabata algu ku e lo tabatin mester, spesialmente komo un ser kaí.

Kiko trabou tin ku, idealmente, lo mester hasié algu ku por ta un bendishon pa nos?

Manera nos a mira, Dios su intenshon tabata pa ser humano traha den un kapasidat òf otro. E parti akí di nos bida (e añanan di trabou) ta generalmente masoménos 40 aña largu. Pa hopi hende esaki ta e momento ku ta kria i eduká yunan i ora ta atkerí kas i otro kompranan importante. Esaki por ta un tempu hopi intenso finansieramente. Ta un tempu hopi sensitivo, pasobra e famia ta siñando pa traha huntu, i su miembronan ta kreando lasonan di bida largu. Strès finansiero por kibra e matrimonio na e punto akí, i e ta sosodé frekuentemente. Famianan den kua tur dos partido tin un kompromiso kristian i ta dispuesto pa sigui prinsipionan bíbliko, ta muchu mas stabil.

Lesa 1 Timoteo 5:8; Proverbionan 14:23; i Kolosensenan 3:23,24. Ku puntonan importante nos por saka for di e tekstonan akí tokante finansa den e hogar?

Den hopi kaso, e esposo ta e prinsipal sosten di e famia, aunke hopi biaha tur dos pareha ta traha. Naturalmente, sirkunstansianan inesperá por surgi, malesa, reseshonnan ekonómiko, loke sea, ku ta hasi e ideal akí difísil. Hende mester, anto, ahustá konsekuentemente.

Ta yama yunan ku a trese den mundu durante e segmento di bida akí "un herensia di Señor" (Salmo 127:3, NKJV). Nos mester kòrda ku yunan ta trese ku nan un responsabilidat asombroso. E meta di mayornan kristian ta pa eduká nan yunan pa bira adultonan independiente den e bida akí i prepará nan pa e bida benidero. Ata aki tres punto pa yuda mayornan:

1. Proveé un ambiente kristian den e hogar. Esaki lo a inkluí adorashon familiar regular i interesante, asistensia regular na Sabat Skol i iglesia, i fieldat den diesmo i ofrenda. Esakinan ta bon kustumbernan pa forma den e promé añanan di bida.
2. Siña nan un disponibilidat pa trabou i un apresio pa esaki. Muchanan lo diskubrí ku semper ta nota, apresiá i rekompensá diligensia i integridat na trabou. Nan lo siña ku plaka ta bini serka nos komo resultado di nos dunamentu di tempu na otronan, hasiendo tareanan ku ta balioso pa nan.
3. Yuda ku un bon edukashon. Edukashon ta karu awendia, partikularmente edukashon kristian di skol privá. Pero pa mayornan ku plannan pa nan yunan, no solamente pa e bida akí sino tambe pa esun benidero, e kosto ta bale la pena.

Naturalmente, no importá kiko nan hasi, niun hende no tin niun garantia tokante e direkshon ku nan yunan lo bai. Dikon ta importante pa mayornan no kulpa nan mes pa e eskohonan robes ku nan yunan mas grandi lo por tuma?

Un otro fase di un bida "eksitoso", e último fase, tin e potensial pa ta esun di mas agradabel, si e desishonnan di e añanan anterior tabata sabí i no ruiná pa eventonan inesperá. Den un situashon ideal e mayornan a lanta nan yunan pa bira adultonan independiente, a paga pa e kas, e nesesidatnan di transporte ta reglá, no tin debenan persistente, i tin un fluho di entrada sufisiente pa proveé pa e nesesidatnan di e famia di edat.

Dios ta yama Su yunan na un norma mas haltu den trabou i bida. E norma ei ta Dios su lei skirbí riba nos kurason (lesa Jer. 31:33) i reflehá den nos karakter. Segun ku sosiedat ta eroshoná i siñansa kristian ta debilitá i minimisá, lo bira ainda mas importante pa e kristian individual biba i traha riba un nivel ku ta ireprochabel. Beibel ta bisa: "Mester skohe un bon nòmber mas bien ku gran rikesa, fabor amoroso mas bien ku plata i oro" (Prov. 22:1, NKJV).

Beibel ta registrá momentonan di empresarionan ku a rekonosé ku nan tabata bendishoná pasobra nan tabatin un empleado piadoso. Ora Jakòb a deseá di bandoná su suegro, Laban, i regresá ku su famia na su tera natal, Laban a implor'é pa e no bai, bisando: "Por fabor, keda, si mi a haña grasia den bo bista, pasobra mi a haña sa pa eksperensia ku Señor a bendishoná mi pa bo motibu" (Gen. 30:27, NKJV). I ora a bende Jose den sklabitut na Egipto, su maestro, Potifar, a hasi un opservashon similar di Jose su trabou i a rekompens'é di akuerdo ku esei.

Lesa Génesis 39:2-5. Aunke e tekstonan no ta bisa nos spesífikamente, kiko bo ta imaginá ku Jose tabata hasiendo ku a pone su maestro wak e asina faborabel?

"P’esei sea boso ta kome òf bebe, òf loke sea boso ta hasi, hasi tur pa gloria di Dios" (1 Kor. 10:31, NKJV). Asina, den nos trabou i maneho finansiero i loke sea ku nos ta hasi, nos mester hasi tur pa e gloria di Dios. E ta Esun kende ta duna nos e konosementu i fortalesa pa logra den bida. "Di Bo, o Señor, ta e grandesa, e poder i gloria, e viktoria i mahestat; pasobra tur loke tin den shelu i na tera ta di Bo; di Bo e reino ta, o Señor, i Bo ta eksaltá komo kabes riba tur kos. Tantu rikesa komo honor ta bin for di Bo, i Bo ta reina riba tur kos. Den Bo man tin poder i forsa; den Bo man e ta pa hasi tur hende grandi i duna fortalesa na tur" (1 Kron. 29:11,12, NKJV).

Kua ta e prinsipionan ku bo ta siguiendo, no solamente den trabou, sino den bida en general? Ki kambionan kisas lo bo mester hasi?

Tin desena di maestro sekular di maneho di plaka eifó, pero Dios a spièrta nos kontra konsultá nan pa e maneho di e biennan ku El a konfia nos kuné. "Bendishoná ta e hende ku no ta kana den konseho di e hende ku no ta piadoso, ni ta para den kaminda di pekadornan, ni ta sinta riba asiento di e chèrchadó; ma su delisia ta den e lei di Señor, i den Su lei e ta meditá di dia i anochi. E lo ta meskos ku un palu plantá kantu di e riunan di awa, ku ta duna su fruta na su tempu, ku su blachi tambe no ta marchitá; i loke sea ku e hasi lo prosperá" (Salmo 1:1-3, NKJV).

Asina, e hende ku ta deleitá den e lei di Señor (por komprendé e lei akinan mas ampliamente komo e Palabra di Dios) lo ta bendishoná. Kon simpel esei ta? I e lo prosperá, ta eksitoso.

Lesa Proverbionan 3:5-8. Kon nos ta apliká e prinsipio akí den nos asuntunan finansiero básiko?

Un bista general di e konseho bíbliko riba maneho finansiero ta duna nos puntonan masha balioso pa sigui. Laga nos wak shete di nan.

1. Organisá bo mes. Desaroyá un plan di gastu (Prov. 27:23,24). Hopi famia ta eksistí simplemente di salario pa salario. Sin un plan simpel pa gana, gasta, i spar, bida tin muchu mas strès.
2. Gasta ménos ku bo ta gana. Determiná pa biba denter di bo medionan (Prov. 15:16). Hopi famia den pais oksidental generalmente ta gasta mas ku nan ta gana. Esaki ta posibel solamente pa motibu di e disponibilidat di krédito i debe. Hopi problema ta manera un plaga pa esnan ku tin debe.
3. Spar un porshon di kada periodo di pago (Prov. 6:6-8). Nos ta spar pa hasi kompranan mas grandi den futuro i pa regla gastunan inesperá, manera aksidente òf malesa. Por usa algun sèn di spar pa plania pa e tempu ora, pa motibu di edat avansá, nos no ta kapas pa haña trabou mas.
4. Evitá debe meskos ku COVID-19 (Prov. 22:7). Interes ta un gastu ku bo por biba sin dje. Un persona òf famia bibando ku debe, es desir, riba plaka fiá, ta realmente bibando awe riba loke nan ta spera di gana den futuro. Si kualke kambio di bida tuma ligá, e ora ei por resultá bèrgwensa finansiero serio.
5. Ta un trahadó diligente. "Alma di un hende floho ta deseá, i no tin nada; ma e alma di esun diligente lo enrikesé" (Prov. 13:4, NKJV).
6. Ta finansieramente fiel ku Dios (Deut. 28:1-14). Niun famia por permití su mes di biba sin e bendishon di Dios.
7. Kòrda ku e tera akí no ta nos hogar real. Nos maneho ta bisa hopi tokante unda nos prioridatnan final ta (lesa Mat. 25:14-21).

"Niun skema di negoshi òf plan di bida por ta sólido òf kompleto si e ta abarká solamente e añanan breve di e bida presente akí i no hasi provishon pa e futuro sin fin. ... Niun hende por montoná tesoro den shelu sin haña asina su bida riba tera enrikesé i hasí nobel.” — Ellen G. White, Education, p. 145.

"Loke ta na fundeshi di integridat empresarial i di berdadero éksito ta e rekonosementu di e propiedat di Dios. E Kreador di tur kos, E ta e propietario original. Nos ta Su mayordomonan. Tur loke nos tin ta un depósito di djE, pa usa di akuerdo ku Su direkshon.” — Education, 137.

Pa motibu di e preshon pa proveé pa nos famianan, hopi biaha nos ta pensa ku nos trabou ta simplemente pa proveé un entrada. Pero komo kristiannan, nos ta enfrentá tambe pa hasi nos parti den e gran komishon ku Hesus a duna tur Su siguidónan. Despues di a sita e komishon akí manera ta hañá den Marko 16:15, Ellen G. White a skibi: "No ku ta tur ta yamá pa ta minister òf mishonero den sentido ordinario di e terminologia; pero tur por ta obreronan huntu kunE den kompartí 'bon notisianan' na nan kompañeronan. A duna e mandato na tur, grandi òf chikí, eduká òf ignorante, bieu òf yòn.” — Education, p. 264.

"Nos mester sigui Dios su plan di bida mas djaserka. Hasi nos bèst den e trabou ku ta mas serka di nos, komprometé nos kamindanan na Dios, i vigilá e indikashonnan di Su providensia, esakinan ta reglanan ku ta garantisá orientashon sigur den e eskoho di un okupashon.” — Education, p. 267.

Preguntanan pa Diskushon:

Kon nos komo kristiannan ta definí kiko ta un bida "eksitoso"? Kua lo por ta e diferensia entre loke mundu ta definí komo éksito i loke nos (idealmente) mester hasi? Tuma, por ehèmpel, Juan Boutista. Kon lo bo a definí su bida, ku a terminá di un forma bergonsoso den prizòn, tur basá riba un impulso di un muhé malbado? Lo bo a yam'é eksitoso? Ki motibunan bo por duna pa bo kontesta?

Kon nos ta splika e echo ku tin hopi hende "eksitoso" ku no ta sigui niun di e prinsipionan bíbliko tokante maneho di rikesa òf bida en general? Of ke tal di esnan ku ta purba sigui nan i, no opstante, no tin logra? Kisas nan ta bira malu, òf kalamidat ta dal. Kon nos mester komprendé e situashonnan akí?