Dunando Bèk

4 di mart

Lesa pa e Estudio di e Siman Akí:

Lukas 12:16-21; Ekl. 2:18-22; Prov. 27:23-27; 2 Kor. 4:18; Ekl. 5:10; Kol. 1:15-17.

Versíkulo di Memoria:

“I mi a tende un bos for di shelu, bisando: ‘Skirbi: Bendishoná ta e mortonan ku di awor padilanti ta muri den Señor! Sí, e Spiritu ta bisa, ku nan sosegá di nan trabounan, pasobra nan obranan ta sigui huntu ku nan’ ” (Revelashon 14:13).

Segun ku nos ta yega e final di nos añanan di entrada, nos enfoke finansiero ta bira den direkshon di preservá nos aktivonan den antisipashon di e fin di bida. E transishon di trahamentu pa hubilashon por ta un eksperensia mashá troumátiko. Den términonan di nos finansa, kua ta e mihó manera di prosedé?

Segun ku hende ta bira mas bieu, kasi naturalmente nan ta kuminsá preokupá tokante futuro. E temornan di mas komun ta: muri muchu lihé (promé ku atendé ku e famia); biba muchu largu (sobrebibí nan aktivonan òf rekursonan di spar); malesa katastrófiko (tur mi rekursonan lo por bai den un bia); i desabilidat mental i/òf físiko (ken lo kuidá mi?).

Ora e tabata komentá riba e temornan akí, Ellen G. White a skirbi: "Tur e temornan akí ta originá ku Satanas. ... Si nan lo a tuma e posishon ku Dios lo tabata ke pa nan tin, nan último dianan kisas por tabata esnan mihó i mas kontentu. … Nan mester pone ansiedat i karganan un banda, i okupá nan tempu tan kontentu ku nan por, i ta madurando pa bai shelu.” — Testimonies for the Church, tomo 1, p. 424.

E siman akí nos lo repasá Dios su konseho tokante nos último añanan. Kiko ta kosnan ku nos mester hasi, kiko nos mester evitá di hasi, i kua prinsipionan nos mester sigui?

* Studia e lès di e siman akí pa prepará pa Sabat, 11 di mart.

Lesa Lukas 12:16-21. Kiko ta e mensahe relevante pa nos akinan? Ki reproche fuerte Señor a duna e hòmber bobo, i kiko esei mester bisa nos tokante nos aktitut pa loke nos tin?

Aunke e mensahe ta mas amplio ku esaki, bo por argumentá ku esaki tabata un storia ku Hesus a konta tokante kiko no hasi den hubilashon. Konsekuentemente, si un persona ta kita for di trabou pa gasta su aktivonan akumulá pa su mes, e mester tene kuidou i tuma e storia akí na serio. E problema no ta di traha duru òf bira riku, partikularmente ora bo ta bira mas bieu i, kisas, asta mas riku. E problema ta ku e aktitut pa kuné. Su palabranan: “relahá bo mes, kome, bebe i ta felis” (Lukas 12:19, NKJV) ta ekspresá e berdadero problema akinan.

"E ophetivonan di e hòmber akí no tabata mas haltu ku esnan di e bestianan ku ta fayesé. E tabata biba komo si fuera no tabatin Dios, ni shelu, ni bida futuro; manera kos ku tur kos ku e tabata poseé tabata di su mes, i e no tabata debe Dios ni hende nada.” — Ellen G. White, Christ's Object Lessons, p. 257, 258.

Si durante e etapa akí di bida nos ta pensa solamente riba nos mes i ta ignorá e nesesidatnan di otro i e kousa di Dios, nos ta siguiendo e ehèmpel di e hòmber riku bobo. No tabatin ningun indikashon den e parabel di Hesus ku e hòmber riku tabata floho òf deshonesto. E problema tabata den kon e tabata gasta loke Dios a konfi'é kuné. Pasobra nos no sa e dia di nos morto, semper nos mester ta kla p’e, bibando pa kumpli ku e boluntat di Dios na lugá di sigui un bida di egoismo.

E kuadro general ku Beibel ta duna ta ku un persona ta traha i ta keda produktivo tanten ku e ta kapas. De echo, ta interesante pa nota ku e outornan di e gran bukinan profétiko di Daniel i Revelashon tur dos, hopi ta kere, tabatin mas ku 80 aña ora nan a kompletá nan trabou. Esaki tabata den un tempu ku e averahe di edat di fayesimentu tabata masoménos 50 aña. Ellen G. White a publiká algun di su bukinan mas konosí i mas stimá, manera The Desire of Ages, despues di masoménos 70 aña di edat. Edat, anto, tanten ku nos ta salú, no mester nifiká ku nos ta stòp di ta produktivo i, te kaminda ta posibel, hasi kosnan bon.

Hesus a konsehá esnan ku ta wardando riba Su Segundo Binida pa no solamente vigilá sino pa sigui traha tambe (Mat. 24:44-46).

Na kualke edat ku kualke kantidat di plaka, kon nos por evitá di kai den e trampa ku e hòmber a kai aden aki? Puntra bo mes, "Pa kiko mi ta bibando?"

Un dia un hende a puntra e evangelista famoso Billy Graham kiko tabata asombr'é mas di bida, awor ku e ta bieu (Graham tabata den su 60 añanan na e momento ei). Graham su kontesta? "Su brevedat."

Sin duda, bida ta pasa bai lihé.

Kiko e siguiente tekstonan ta siña tokante bida humano akinan? Salmo 49:17; 1 Tim. 6:6,7; Salmo 39:11; Santiago 4:14; Ekl. 2:18-22.

No solamente bida ta pasa bai lihé, pero ora bo muri, bo no ta bai ku nada, a lo ménos di e biennan material ku bo a akumulá. (Karakter? Esei ta un otro storia.) "Pasobra ora ku e muri, e lo no bai ku nada" (Salmo 49:17, NKJV), ku ta nifiká ku e ta lag'é atras pa un otro hende haña. Ken lo hañ'é, naturalmente, ta dependé di kua plan a traha di antemano.

Aunke, naturalmente, no ta tur hende nesesariamente tin un propiedat, mayoria hende, partikularmente segun ku nan a traha a lo largu di añanan, a akumulá algun rikesa. Na final, loke ta pasa ku e rikesa ei despues ku bo fayesé ta realmente un kuestion importante ku hende mester konsiderá.

Pa esnan ku tin poseshonnan na final di bida, no importá kon grandi òf chikí nos biennan kisas por ta, planifikashon patrimonial por ta nos akto final di mayordomia, di manehá kuidadosamente loke Dios a bendishoná nos kuné. Si bo no tin un plan patrimonial ku bo a krea ku un tèstamènt òf fideikomismo, e leinan di estado òf gobièrnu sivil por kai den wega (tur esaki ta dependé, naturalmente, di unda bo ta biba). Si bo fayesé sin un tèstamènt, mayoria hurisdikshon sivil simplemente ta pasa bo propiedatnan pa bo famianan, sea nan mester di nan òf nò, sea ku nan lo hasi bon uso di e plaka òf nò, i sea lo bo a skohe pa duna un porshon na e persona ei òf nò. Iglesia lo no haña nada. Si esei ta loke bo ke, bon; si no, bo mester traha plan di antemano.

Den e términonan di mas simpel, nos por bisa ku pasobra Dios ta e Doño di tur kos (lesa Salmo 24:1), lo ta lógiko pa konkluí for di un perspektiva bíbliko ku ora nos kaba ku loke Dios a konfia nos kuné, nos mester debolbé na djE, e Doño legítimo, loke a sobra, unabes kumpli ku e nesesidatnan di sernan kerí.

Morto, manera nos sa, por bini na kualke momento, i inesperá tambe, asta awe. Kiko lo a pasa bo sernan kerí si bo mester a muri awe? Tambe, kiko lo pasa ku bo propiedat? Lo a partié manera lo bo tabata ke?

Den tempunan di Tèstamènt Bieu, hopi di e yunan di Israel tabata kunukero i wardadó di karné. Asina, tabata ekspresá algun di Dios su promesanan primintí den lenguahe agríkola. Por ehèmpel, den Proverbionan 3:9,10, Dios ta bisa si nos ta finansieramente fiel na djE, nos "mangasinanan lo ta yená ku abundansia" (NKJV). Ta probabel ku hopi kristian no tin un mangasina awendia. Pues, nos ta komprendé ku Dios lo bendishoná nos trabou òf negoshi si nos ta dispuesto na sigui i obedes'É.

Lesa Proverbionan 27:23-27. Kon lo bo a interpretá "Sea diligente pa konosé estado di bo tounan" (NKJV) pa kristiannan ku ta bibando aktualmente?

Maske kuantu Beibel ta spièrta kontra e riku ku ta trapa riba e pober, òf ku ta kudishi ku nan rikesa, Skritura nunka ta kondená rikesa òf e esfuersonan di hende pa atkirí rikesa, bou di kondishon ku nan no hasié di forma deshonesto òf pa medio di oprimí otronan. De echo, e tekstonan pa awe, den Proverbionan, ta indiká ku nos mester ta diligente den nos asuntunan finansiero pa asina nos por tin sufisiente pa nos mes i nos famia. "Lo bo tin sufisiente lechi di kabritu pa bo kuminda, pa kuminda di bo kas, i alimento pa bo sirbidónan" (Prov. 27:27, NKJV).

Kon nos lo a reformulá e versíkulo ei pa awe? Kisas nos lo e sugirí: "Revisá bo registronan finansiero i determiná e estado di bo asuntunan." Òf "Traha un balanse i komprendé bo relashon di debe i kapital." Ratu ratu durante bo añanan di ganashi, lo tabata apropiá pa revisá bo tèstamènt òf otro dokumento i bo aktivonan aktual i aktualisá nan segun ku ta nesesario. Dokumentonan manera tèstamènt i fideikomiso ta poné na lugá trempan den e proseso di planifikashon di propiedat, pa asina e ta un protekshon kontra morto prematuro, òf di no ta kapas pa motibunan di salú, pa disidí riba unda bo aktivonan mester bai. E idea ta pa plania adelantá pa loke lo sosodé ku bo poseshonnan unabes nan no ta di bo mas.

Den resúmen, bon mayordomia di loke Dios a bendishoná nos kuné no ta trata solamente ku loke nos tin miéntras nos ta na bida sino tambe ku kiko lo pasa despues ku nos a bai, pasobra, a ménos ku Señor regresá den nos bida, un dia nos lo bai miéntras ku nos poseshonnan material, sea ta un tiki òf hopi, lo keda atras. P'esei, ta keda na nos awor pa hasi provishonnan pa asina loke a bendishoná nos kuné por ta un bendishon pa otronan i pa e avanse di e obra di Dios.

"Pasobra rikesa no ta pa semper" (Prov. 27:24, NKJV). Dikon ta importante pa tene e pensamentu akí nos dilanti?

Ki prinsipionan nos por saka for di e siguiente tekstonan respekto kon nos mester dil ku plaka?

Plaka por tin un gara poderoso riba sernan humano, un gara ku a hiba na ruina di hopi. Ken no a tende di hende ku a hasi kosnan teribel pa motibu di plaka, asta ora ku ya nan tabatin hopi kaba pa kuminsá?

Pero, sin embargo, e no mester ta asina. Pa medio di e poder di Dios nos por vense e intento di e enemigu pa tuma loke mester tabata un bendishon (poseshonnan material) i kambia nan den un maldishon.

Den konteksto di ta un bon mayordomo den planifikashon pa morto, un peliger ku hende ta afrontá ta e tentashon di akapará aktivonan awor, hustifikando akapará ku e idea ku, bon, "Ora mi muri, e ora ei mi por duna tur." Aunke mihó ku gasta tur aworakí (un bionario a bisa ku e tabata sa ku e lo a biba bon solamente si e chek pa su entiero a bòns), nos por i mester hasi mihó ku esei.

"Mi a mira ku hopi ta ninga e kousa miéntras nan ta biba, teniendo nan konsenshi ketu ku nan lo ta karitativo ora nan muri; apénas nan ta riska ehersé fe i konfiansa den Dios pa duna kualke kos miéntras nan ta biba. Pero e karidat riba kama di morto akí no ta loke Dios ta rekerí di Su siguidónan; e no por diskulpá e egoismo di e bibunan. Esnan ku ta tene duru na nan propiedat te na e último momento, ta entreg’é na morto mas bien ku na e kousa. Pèrdidanan ta tuma lugá kontinuamente. Bankonan ta kibra, i ta konsumí propiedat na hopi manera. Hopi ta proponé pa hasi algu, pero nan ta tarda ku e asuntu, i Satanas ta traha pa prevení e medionan di bai den e tesoreria mes. E ta pèrdí promé ku debolbé na Dios, i Satanas ta regosihá ku ta asina.” — Ellen G. White, Testimonies for the Church, tomo. 5, p. 154.

Dikon nos mester ta hopi kuidadoso kon nos ta hustifiká nos uso di kualke bendishon material ku nos tin?

Aunke ta difísil pa sa kon bida lo tabata riba tera si sernan humano no a peka, un kos nos por sa sigur: lo no tabatin akumulashon, ni kudishi, ni pobresa, kosnan ku tabata un plaga riba nos mundu desde historia registrá. Nos sentido di propiedat, di loke nos a traha p’e i, si nos a hasié di forma honesto, ta legítimamente di nos, ta sinembargo un manifestashon di bida den un mundu kaí. Al final, sin embargo, independientemente di kuantu nos tin òf no tin, tin un punto importante ku nos mester kòrda semper.

Lesa e siguiente tekstonan. Kua ta e punto sentral den nan tur, i kon e punto ei mester impaktá loke nos ta hasi ku kualke medio material ku Dios a bendishoná nos kuné? (Salmo 24:1, Hebr. 3:4, Salmo 50:10, Gen. 14:19, Kol. 1:15-17).

Nos ta mayordomo i manehadónan di loke El a konfia na nos; es desir, Dios ta doño di tur kos finalmente, i E ta esun ku ta duna nos bida, eksistensia, i e forsa pa nos tin kualke kos mes. Ta solamente lógiko, anto, ku ora nos ta kla ku loke Dios a duna nos, i a kuida di nos famia, nos mester debolbé e sobra na djE.

"Ora bo duna na e obra di Dios, bo ta montonando tesoro den shelu pa bo mes. Tur loke bo montoná ariba ta sigur for di desaster i pèrdida, i ta oumentando te na un balor eterno i duradero.” “[i] lo ser registrá riba bo kuenta den e reino di shelu”— Ellen G. White, Counsels on Stewardship, p. 342.

Tin hopi bentaha ora nos duna awor, miéntras nos ta biba. Aki tin algun:

1. E dunadó realmente por mira e resultadonan di e donashon, un edifisio di iglesia nobo, un hóben na universidat, un kampaña di evangelisashon finansiá, etc.
2. E ministerio òf persona por benefisiá awor ora e nesesidat ta mas grandi.
3. No tin bringamentu entre famia òf amigunan despues di bo morto.
4. E ta pone un bon ehèmpel di balornan familiar di generosidat i amor pa otronan.
5. E ta minimisá konsekuensia di impuesto riba patrimonio.
6. E ta garantisá ku lo hasi e donashon na bo entidat deseá (sin interferensia di korte òf famianan malkontentu).
7. E ta demostrá ku kurason di e dunadó a kambia di egoismo pa altruismo.
8. E ta almasená tesoronan den shelu.

Ellen G. White a skirbi dos kapítulo riba e tópiko importante akí di distribushon di nos aktivonan. Lesa “To (Aged and) Wealthy Parents,” den Testimonies for the Church, tomo 3, p. 116-130, i “Wills and Legacies,” den Testimonies for the Church, tomo 4, p. 476-485.

Tambe tin un sekshon ku ta diskutí planifikashon patrimonial den Counsels on Stewardship, p. 323-335. Ellen G. White a skirbi tambe: "E loke hopi ta proponé pa posponé te ora nan ta na punto di muri, si nan tabata kristian di bèrdat nan lo hasié miéntras nan tin un gará fuerte riba bida. Nan lo a dediká nan mes i nan propiedat na Dios, i, miéntras nan ta aktua komo Su mayordomonan, nan lo tabatin e satisfakshon di ta kumpli ku nan deber. Birando nan propio ehekutor, nan mes lo por a kumpli ku e demandanan di Dios, na lugá di pasa e responsabilidat riba otronan.” — Testimonies for the Church, tomo 4, p. 480.

Kiko e ke men ku "bira nan propio ehekutor"? Den un tèstamènt normal, esun ku ta traha e tèstamènt ta apuntá un ehekutor pa distribuí e aktivonan despues di su morto den harmonia ku su deseonan manera ta ekspresá den e tèstamènt. Birando bo propio ehekutor, simplemente bo mes ta distribuí bo aktivonan miéntras bo ta na bida. Hasiendo esei, lo bo tin e satisfakshon di mira e resultadonan i di sa ku bo ta atendé ku e talentonan ku Dios a duna bo di un manera apropiá.

Pa e kristian, e segundo binida di Kristu ta e "Speransa Bendishoná." Nos tur a imaginá nos mes kon maravioso lo ta pa mira Hesus biniendo den e nubianan di shelu. Nos ta ansioso pa tende e palabranan, "Bon hasí." Pero ke tal si nos mester muri promé ku Hesus regresá? Si nos a sigui Su boluntat revelá, nos por tin e satisfakshon awor di mira e obra bai dilanti pa motibu di nos esfuersonan, sabiendo ku pa motibu di nos plan patrimonial, e trabou lo sigui despues ku nos a bai.

Preguntanan pa Diskushon:

Aunke nos por montoná tesoronan den shelu awor, dikon esei no ta mesun kos ku purba gana, òf asta "kumpra", bo kaminda pa salbashon?

Miéntras nos mester ta generoso den duna ku loke nos tin awor, nos mester ta sabí tambe. Kuantu bia nos a tende hende, partikularmente esnan ku ta pone fecha, hasi apelashonnan pa plaka pasobra tal i tal evento ta bai tuma lugá riba tal i tal fecha, i pasobra nos plaka lo ta inútil e ora ei, mihó nos mand'é pa Su ministerio awor? Kon nos por siña diserní entre e engaño akí i maneranan legítimo ku nos por usa nos plaka asta awor pa e kousa di Dios?