Manehando den Tempunan Difísil

11 di mart

Lesa pa e Estudio di e Siman Akí:

2 Kron. 20:1-22; 1 Kron. 21:1-14; 2 Pe. 3:3-12; 1 Juan 2:15-17; Rev. 13:11-17.

Versíkulo di Memoria:

“Ofresé na Dios gradisimentu, i paga bo promesanan na e Haltísimo. Yama riba Mi riba e dia di angustia; lo Mi libra bo, i lo bo glorifiká Mi” (Salmo 50:14,15, NKJV).

Tin ora nos mundu ta parse di ta drai for di kontrol: guera, dramamentu di sanger, krímen, inmoralidat, desasternan natural, pandemia, insertidumbre ekonómiko, korupshon polítiko, i mas. Tin un ansha fuerte pa hende i famianan pensa promé riba nan propio sobrebibensia. Konsekuentemente, ta pensa hopi riba buska seguridat den e tempunan insigur akí, loke, naturalmente, ta komprendibel.

E kansansionan di bida ta tuma hopi di nos enfoke diario. Ku debenan pa paga, yunan pa kria, propiedat pa mantené, ta tuma tempu i reflekshon. I, naturalmente, nos mester di paña, kuminda, i akomodashon. Den e Sermon di Seru, Hesus a toka e nesesidatnan básiko akí i despues a deklará: "Boso Tata selestial sa ku boso tin mester di tur e kosnan akí. Ma buska promé e reino di Dios i Su hustisia, i tur e kosnan akí lo ta ser añadí na boso" (Mat. 6:32,33, NKJV).

Meimei di tempunan difísil, ora nos mester lèn riba Señor mas ku nunka, tin algun paso konkreto, basá riba prinsipionan bíbliko, ku nos mester sigui.

* Studia e lès di e siman akí pa prepará pa Sabat, 18 di mart.

Lesa 2 Krónikanan 20:1-22. Kua prinsipio spiritual importante nos por saka for di e storia akí pa nos mes, independientemente di e luchanan ku nos ta enfrentando?

Serka di final di e reinado di Josafat, a invadí Huda. Josafat tabata un hòmber di kurashi i balor. Pa añanan e tabata fortifikando su ehérsitonan i su siudatnan fortifiká. E tabata bon prepará pa enfrentá kasi kualke enemigu; sinembargo, den e krísis akí e no a pone su konfiansa den su propio forsa, sino den e poder di Dios. El a pone su mes pa buska Señor, i el a proklamá un ayuno den henter Huda. Henter e pueblo a reuní den e korte di e tèmpel, manera Salomon a resa ku nan lo a hasi si nan tabata enfrentá peliger. Tur e hòmbernan di Huda a para dilanti di Señor ku nan esposa i yunan. Nan a resa pa Dios lo a konfundí nan enemigunan pa Su nòmber por a ser glorifiká. Despues e rei a resa: "Nos no tin forsa kontra e gran multitut akí ku ta biniendo kontra nos; ni nos no sa kiko hasi, pero nos bista ta riba Bo" (2 Krón. 20:12, NKJV).

Despues ku nan a komprometé nan mes na Dios di e manera akí, e Spiritu di Señor a bini riba un hòmber di Dios ku a bisa: "No tene miedu ni desmayá pa motibu di e gran multitut akí, pasobra e bataya no ta di boso ma di Dios. ... Boso no tin mester di bringa den e bataya akí. Posishoná boso mes, para ketu i mira e salbashon di Señor" (2 Krón. 20:15-17, NKJV).

Asina, trempan e siguiente mainta, e rei a reuní e pueblo, ku e koro levítiko dilanti pa kanta alabansa na Dios. Despues el a atvertí e pueblo: "Kere den SEÑOR, boso Dios, i lo boso ta establesé; kere Su profetanan, i boso lo prosperá" (2 Krón. 20:20, NKJV). E ora ei e koro a kuminsá kanta, i nan enemigunan a destruí otro, i "ningun hende no a skapa" (2 Krón. 20:24). A tuma e hòmbernan di Huda tres dia pa rekohé solamente e botin di bataya, i riba e di kuater dia nan a bai Herusalèm bèk, kantando miéntras nan tabata bai.

Naturalmente, e Dios kende a salba nan ta e mesun Dios ken nos ta stima i ta adorá, i Su poder ta mesun grandi awe manera e tempu ayá. E desafio, pa nos, ta di konfi'E i Su direkshon.

Lesa 2 Krónikanan 20:20. Ki nifikashon spesial e teksto akí mester tin pa Atventistanan di e di shete dia?

Rei David mester tabata sa mihó. E mester tabata sa di e eksperensia di su mihó amigu Jonatan ku ora bo ta den un relashon di pakto ku Dios, no ta importá si bo tin poko hòmber òf hopi; Dios por duna bo viktoria. Den 1 Samuel 14:1-23, Beibel ta registrá e historia di kon Saul su yu hòmber, Jonatan, i su kargadó di arma a derotá henter un forsa armá di filisteo, ku yudansa di Dios. Pero apesar di e eksperensia akí i hopi otro den historia di e pueblo di Dios, ora tempunan difísil a bin pa rei David, el a permití Satanas tent'é pa konfia su propio forsa i ingenio.

Lesa 1 Krónikanan 21:1-14. Dikon David a disidí di numerá Israel òf konta su sòldánan? Dikon su komandante Joab a konsehá kontra esaki?

Nota ku tabata Satanas su idea pa konta e sòldatnan. El a tenta David pa konfia den su propio forsa mas bien ku dependé riba e providensia di Dios den su defensa. Joab, e lider di e ehérsito di Israel, a purba persuadí David pa no numerá Israel pasobra el a mira Dios obra na fabor di Israel, pero David a eksigí pa e senso sigui padilanti. Su akshonnan a trese kalamidat pa e nashon, manera e teksto ta revelá.

Hamas niun hende a konfia Dios en bano. Ki ora ku bo batayá pa Señor, prepará bo mes. I prepará bon tambe. Tin un sita, atribuí na un gobernante britániko, Oliver Cromwell (1599-1658), ku, promé ku un bataya, a bisa su ehérsito: "Pone bo konfiansa den Dios, mi muchanan, i mantené bo puiru seku!" (E puiru tabata pòlbu.) Den otro palabra, hasi tur loke bo por pa triunfá, pero, na final, realisá ku solamente Dios por duná bo viktoria.

Den nos konteksto inmediato, ta hopi tentador pa konfia den e poder di gobièrnu òf den nos kuentanan di banko, pero den kada krísis menshoná den Beibel, ora hende a konfia den Dios, El a honra nan konfiansa i a proveé pa nan.

Nos mester ta usando e tempu presente pa regla kuenta ku Dios, sali for di debe, i ta generoso ku loke nos a haña. Den palabranan di e kantika di gospel bieu, "Si algun bia nos tabatin mester di Señor ántes, sigur nos mester di djE awor."

Kon nos ta logra e ekilibrio korekto entre hasi loke nos por, por ehèmpel, pa ta finansieramente sigur, i tòg, na mes momento, konfia den Señor pa tur kos?

Kiko kristiannan atventista di e di shete dia mester hasi komo kontesta riba tempunan difísil? Nos ta bùk abou den un modo di sobrebibensia? Nò, en realidat, lo kontrario ta bèrdat. Pasobra nos sa ku fin di mundu i e segundo binida di Kristu ta serka, nos ke usa nos biennan pa konta otronan e bon notisia di evangelio i loke Dios a prepará pa esnan ku stim'E. Nos ta komprendé ku un dia pronto tur kos riba e tera akí lo ser kimá.

Lesa 2 Pedro 3:3-12. Kiko Pedro ta bisando nos ku e palabranan akí?

Nos ta komprendé for di e Palabra di Dios ku E no ta mandando trùknan di mudansa pa hiba nos kosnan shelu. Tur lo kima den e laman di kandela final ora tur pista di piká i maldat, eksepto e sikatrisnan den e mannan di Kristu, lo ta destruí pa semper.

Asina, kiko nos mester hasi ku nos poseshonnan? "Ta awor nos rumannan mester ta redusiendo nan poseshonnan na lugá di oumentá nan. Nos ta na punto di move bai un pais mihó, asta unu selestial. Pues, no laga nos ta habitantenan di tera, sino laga nos redusí nos kosnan na e menor kantidat posibel.” — Ellen G. White, Counsels on Stewardship, p. 59.

Naturalmente, el a skirbi e palabranan ei mas ku un siglo pasá. Pero ainda e prinsipio ta keda: semper tempu ta kòrtiku, pasobra nos bida ta kòrtiku semper. Kiko ta 60 aña, òf 80 aña, òf 100 aña (si bo tin bon gene i bon práktikanan di salú) kontrali na eternidat? Bo bida por kaba promé ku bo kaba di lesa e lès di e siman akí, i e siguiente kos ku lo bo sa ta e segundo binida di Hesus. (Tremendo, esei tabata lihé despues di tur kos, no?)

Komo kristiannan Atventista di e di shete dia nos mester biba semper den lus di eternidat. Sí, naturalmente, nos mester traha duru pa proveé pa nos mes i nos famianan; i si a bendishoná nos ku rikesa, no tin nada robes ku gosa di dje awor, basta ku nos no bira kudisioso i ta generoso kuné pa ku esnan den nesesidat. Sinembargo, nos mester kòrda semper ku tur loke nos akumulá akinan ta transitorio, pasahero, i si nos no ta kuidadoso, e tin e potensial di hasi nos korumpí spiritualmente.

Si bo tabata sa ku Hesus lo a bini denter di 10 aña, kon lo bo a kambia bo bida? Of sinku aña? Of tres?

E parabelnan i siñansanan di Hesus, e storianan di personahenan bíbliko, i e konseho di Ellen G. White, tur ta indiká klaramente ku no tin kompromiso di mitar kaminda na Kristu. Sea nos ta òf nos no ta na banda di Señor.

Ora un eskriba a puntr’E kua mandamentu tabata esun di mas grandi, Hesus a kontestá: "Lo bo stima Señor bo Dios ku henter bo kurason, ku henter bo alma, ku henter bo mente, i ku tur bo forsa" (Marko 12:30, NKJV). Ora nos duna Kristu tur kos, no ta sobra nada pa un otro maestro. Ta asina e ta. Ta asina e mester ta.

Lesa Mateo 6:24. Kua tabata bo propio eksperensia ku e bèrdat di e palabranan akí?

Nota, Hesus no a bisa ku tabata difísil pa sirbi Dios i plaka, òf ku bo mester tabata kuidadoso kon bo tabata sirbi nan dos. El a bisa, a kambio, ku no por hasié. Punto. E pensamentu akí mester pone un tiki miedu i temblamentu den nos alma (Fil. 2:12).

Lesa 1 Juan 2:15-17. Kon e tres kosnan akí ta ser manifestá den nos mundu, i dikon e peliger ku nan ta presentá tin biaha ta mas sutil ku nos ta realisá?

Nada straño ku Pablo a skirbi: "Pone boso mente riba e kosnan djariba, no riba e kosnan ku ta riba tera" (Kol. 3:2). Naturalmente, esei ta mas fásil pa bisa ku hasi, pasobra e kosnan di mundu ta akinan nos dilanti tur dia. E atrakshon di "tur loke tin den mundu" ta fuerte; e atrakshon pa gratifikashon inmediato semper tei, murmurando den nos orea òf rankando na nos manga di kamisa, òf tur dos. E kristian di mas fiel no a yega di sinti algu di amor pa "e kosnan di mundu"? Asta ku nos konosementu ku un dia tur lo kaba, tòg nos ta sinti e ranká, òf nò? E bon notisia, sinembargo, ta ku nos no tin mester di lag'é ranka nos for di Señor.

Lesa 2 Pedro 3:10-14. Kon loke e ta bisa aki mester impaktá e manera kon nos ta biba, inkluyendo loke nos ta hasi ku nos rekursonan?

Beibel ta pinta un kuadro doloroso di mundu promé ku e segundo binida di Hesus. Daniel ta papia di "un tempu di angustia, manera nunka tabatin desde ku tabatin un nashon, te na e tempu ei" (Dan. 12:1, NKJV). Konsiderando algun di e tempunan difísil den pasado, loke e ta referí na dje akinan mester ta bastante malu.

E buki di Revelashon tambe ta mustra na tempunan difísil promé ku e regreso di Kristu.

Lesa Revelashon 13:11-17. Kon asuntunan finansiero ta pas ku e persekushon di tempu di fin?

Bo no por kumpra òf bende? Kuantu di nos bida awe ta drai rònt di kumpra i bende? Nos trabou ta, den un sentido, nos bendementu di nos tempu i abilidatnan i biennan na esnan ku ke kumpra nan. No por kumpra òf bende ta nifiká ku no por funshoná den sosiedat. E preshon riba esnan ku ta keda fiel lo ta enorme e ora ei. Ademas, mas plaka bo tin, mas partisipashon lo bo tin den e mundu akí, a lo ménos den términonan di poseshonnan material, i asina, seguramente, e preshon pa konformá lo ta ainda mas fuerte.

Kon, anto, nos ta prepará? Nos ta prepará awor, siendo sigur ku pa medio di e grasia di Dios nos no ta katibu di nos plaka, di e kosnan di mundu. Si nos no ta mará na nan awor, nos lo no ta ora, pa por ta fiel, nos mester renunsiá na nan.

Lesa Deuteronomio 14:22 i e último parti di versíkulo 23. Kiko e pueblo di Dios mester a hasi ku nan oumento òf produkshon kada aña? Dikon Dios a pidi nan hasi esaki?

Dios a splika a traves di Moises ku un di e motibunan ku El a establesé e sistema di diesmo tabata “pa boso por siña teme SEÑOR boso Dios semper" (Deut. 14:23, NKJV). Den e paralelismo poétiko di Salmo 31:19, nos ta mira ku temor ta sinónimo di konfiansa.

"O, ki grandi ta Bo bondat, Ku Bo ta montoná pa esnan ku ta teme Bo, ku Bo a prepará pa esnan ku ta konfia den Bo" (NKJV).

E liñanan paralelo akí ta mustra nos ku pa teme Señor ta pa konfi'E. P'esei, nos ta komprendé ku Dios a establesé e sistema di diesmo pa protegé nos di egoismo i pa enkurashá nos pa konfi'E pa proveé pa nos. Miéntras ser fiel den diesmo seguramente no ta un garantia ku hende lo keda fiel al final, esnan ku no ta fiel den diesmo seguramente ta hinkando nan mes den problema.

Aunke nada den Beibel ta spièrta kontra di rikesa, nada den Beibel ta papia tokante rikesa komo algu ku ta oumentá un hende su kompromiso spiritual tampoko. De echo, e peliger kontrali ta bèrdat. "Amor pa plaka, deseo pa rikesa, ta e kadena di oro ku ta mara nan [hende] na Satanas.” — Ellen G.White, Steps to Christ, p. 44.

De echo, for di fundashon di kristianismo, niun iglesia hamas a partisipá den tal rikesa i komodidatnan manera e iglesia den hopi pais di mundu ta disfrutá awe. E pregunta ta: Na ki kosto? Un prosperidat asina seguramente ta influensiá nos spiritualidat, i no pa bon tampoko. Kon lo por tabata? For di ki dia rikesa i material abundante a fomentá e birtutnan kristian di apnegashon i sakrifisio propio? Yega kas na frishidèrnan yená ku mas kuminda ku nos por kome, i ta doño di un òf dos outo, i tuma vakashonnan anualmente, i kumpra kos online, i tin lo último den kòmpiuter i telefòn inteligente den kas ta hasié mas fásil pa no stima mundu ni e kosnan den mundu? Aunke hopi miembro di nos iglesia no tin e luhonan akí, hopi sí tin, i nan ta hasié riskando nan propio alma. Esaki no ta papiando di esnan "riku" awor, manera mionarionan i mas ayá. Nan a lo ménos sa ku nan ta riku, i nan por pone atenshon (si nan skohe esei) na e atvertensianan bíbliko duná na nan. Nos ta papiando, en kambio, tokante hopi hende asta di e klase medio, ku, meimei di telefònnan inteligente, iMac, èrko, i SUV, ta sufisientemente engañá pa pensa ku pasobra nan ta djis "klase medio", nan no ta den peliger di keda atrapá spiritualmente pa nan propio prosperidat. P'esei diesmo por ta, si no tin nada otro, un antidoto spiritual poderoso kontra e peligernan di rikesa, asta pa esnan ku no ta partikularmente "riku".

Preguntanan pa Diskushon:

Asta si nos no ta riku segun e normanan di mundu, dikon nos tur mester ta kuidadoso tokante nos aktitut pa ku plaka i rikesa?

Kua ta algun kos práktiko ku nos por hasi, ademas di debolbé diesmo, ku por yuda nos sigurá ku nos no ta keda muchu atrapá den e kosnan di e mundu akí?

Kiko lo a pasa ku bo mañan si, di ripiente, lo bo no por a kumpra òf bende pasobra bo ta kontá entre esnan "ku ta warda e mandamentunan di Dios i e fe di Hesus" (Rev. 14:12, NKJV)? Kon bon lo a bai ku bo fe?