Hesus ta Gana—Satanas ta Pèrdè

25 di mart

Lesa pa e Estudio di e Siman Akí:

Revelashon 12; Efe. 5:25–27,32; Fil. 3:9; Dan. 7:25; Isa. 14:12–14; Rev. 13:14–17.

Versíkulo di Memoria:

“I e dragon tabata furioso riba e muhé, i a bai pa hasi guera ku e restu di su desendientenan, kendenan ta warda e mandamentunan di Dios i tin e testimonio di Hesu-Kristu.” (Revelashon 12:17, NKJV).

Den Outnumbered: Incredible Stories of History’s Most Surprising Battlefield Upsets, Cormac O’Brien ta konta e storianan di ehérsitonan ku, aunke nan tabata seriamente den minoria, tòg a gana. E ta konta di e ehérsito di Hanibal di 55.000 sòldá, di Cartago. derotando e ehérsito romano “invensibel” di 80.000 fuerte. E ta konta e storia asombroso di e ehérsito griego di Alehandro e Grandi ku a derotá e imperio di Persia.

Nos tambe ta den un bataya di bida i morto ku un enemigu astuto. Nos ta den minoria, bringando kontra posibilidatnan inkreibel. E forsanan di maldat ta parse invensibel. Parse ku nos ta enfrentá sierto pèrdida. Derota ta parse inevitabel.Viktoria parse for di bista. For di un perspektiva meramente humano, ta parse ku e forsanan di Satanas lo aplastá nos.

Pero, danki Dios, aunke nos ta den minoria, aunke e posibilidatnan ta (humanamente bisá) montoná kontra nos, aunke e atakenan di Satanas ta visioso, a traves di Hesus nos lo gana finalmente. E tema di e último buki di Beibel, Revelashon. ta esaki: Hesus ta Gana, Satanas ta Pèrdè. E kurason di e bataya akí ta deliniá den Revelashon 12, e enfoke di nos estudio e siman akí. E estudio akí lo duna un bon preparashon pa komprendé Revelashon 14 i e mensahenan di e tres angelnan.

* Studia e lès di e siman akí pa prepará pa Sabat, 1e di aprel.

Revelashon 12 ta presentá un fluho di episodionan dramátiko, imágennan di e konflikto eterno entre bon i malu ku a kuminsá den shelu pero ku lo kaba aki riba tera. E episodionan akí ta hiba nos ku e fluho di koriente di tempu, for di e esena di apertura di Satanas su rebelion den shelu te na su atakenan visioso riba e pueblo di Dios den e último dianan.

Lesa Revelashon 12:7–9 ku ta deskribí e konflikto kósmiko akí entre bon i malu. Kon, posiblemente, algu manera esaki por a tuma lugá den shelu? Kiko e versíkulonan akí ta impliká tokante e realidat di boluntat liber, eskoho liber?

E libertat pa skohe ta un prinsipio fundamental di e gobièrnu di Dios, tantu den shelu komo riba tera. Dios no a krea robòtnan, ni den shelu ni riba tera. Kreá den e imágen di Dios, nos komo hende por hasi eskohonan moral.

E poder di eskoho ta aliniá djaserka ku e abilidat pa stima. Si bo kita e poder di eskoho, bo ta destruí e abilidat pa stima, pasobra nunka por fòrsa òf obligá amor. Amor ta un ekspreshon di boluntat liber. Tur angel den shelu a enfrentá e eskoho sea pa respondé riba e amor di Dios òf pa bira lomba den egoismo, arogansia, i orguyo. Meskos ku e angelnan selestial tabata konfrontá pa amor ku un eskoho eterno, Revelashon ta presentá kada un di nos ku eskohonan eterno den e konflikto final di tera.

Nunka tabatin neutralidat den e gran konflikto (lesa Lukas 11:23), i lo no tin niun den e guera final di tera. Meskos ku tur angel a skohe e banda di Hesus òf e banda di Satanas, lo hiba henter humanidat na nan eskoho final i irevokabel na fin di tempu. Ken lo tin nos lealtat, nos adorashon, nos obediensia? Esaki semper tabata e problema ku humanidat, i e lo ta asina, aunke di forma mas dramátiko, den e krísis final di historia di tera.

Pero tin un notisia inkreiblemente bon: Revelashon 12 ta deskribí Kristu su triunfo den e konflikto, i tur loke nos, usando nos boluntat liber, tin ku hasi ta skohe pa ta na Su banda, e banda ganadó. Ki tremendo pa ta kapas di skohe un banda den un bataya ku bo sa, di antemano, lo ta e ganadó.

Pensa riba kon sagrado boluntat liber i eskoho liber mester ta pa Hesus, kende, aunke E tabata sa ku e lo a hib’E na e krus (lesa 2 Tim. 1:9), a duna nos boluntat liber di tur manera. Kiko esaki mester bisa nos tokante kon kuidadosamente nos mester usa e regalo sagrado, pero kostoso, akí?

For di komienso, Satanas (lesa Rev. 12:4,5) a trata na destruí Kristu. Sinembargo, den tur intento, Satanas a faya. Na nasementu di Kristu, por ehèmpel, un angel a spièrta Hosé i Maria tokante e plannan visioso di Heródes, i nan a hui bai Egipto. Hesus a enfrentá e tentashonnan di mas atraktivo di Satanas den desierto ku un “Ta pará skirbí”, i asina a haña protekshon den e Palabra di Dios. Den Su morto riba e krus, El a revelá e magnitut di Su amor i a libra nos di e kastigu di kondenashon di piká. Den Su resurekshon, komo nos Sumo Saserdote bibu, E ta libra nos di e poder di piká den nos bida.

Lesa Revelashon 12:4–6,9; Efesionan 5:25–27,32; i Salmo 2:7–9 i definí e siguiente símbolonan:

Den Beibel, un bara ta un símbolo di dominio òf soberania. Un bara di heru ta un símbolo di un soberania inkebrantabel, todopoderoso, invensibel. Hesus a enfrentá kada un tentashon ku nos ta eksperensiá, pero El a sali vensedó. Diabel ta un enemigu derotá. Kristu a triunfá riba dje den Su bida, morto, i resurekshon. Pasobra Hesus ya a derotá diabel riba e krus di Kalvario, nos tambe por ta viktorioso. E viktoria di Hesus riba Satanas tabata kompletu, pero e gran konflikto entre Kristu i Satanas no a kaba ainda.

Sinembargo, ora nos aseptá, pa medio di fe, loke Kristu a hasi pa nos, nos debe di piká ta kanselá i nos pikánan pordoná. Nos ta para perfekto dilanti di Dios, kubrí den e hustisia di Kristu. Manera Pablo ta skirbi tokante ta “hañá den djE, no teniendo un hustisia di mi mes ku ta bin for di Lei, ma esun ku ta dor di fe den Kristu, e hustisia ku ta bin di Dios pa medio di fe” (Fil. 3:9, NKJV). Si nos ta pordoná, no tin nada ku por akusá nos di dje. Hesus a konkistá i a vense pa semper e pió kos ku piká i maldat por a hasiE. El a hasi e atake kompletu riba maldat i a vens’é. Ora nos aseptá Hesus pa medio di fe, Su viktoria ta di nos.

Dikon e siguransa di salbashon, pa motibu di e viktoria di Kristu riba Satanas, ta asina krusial pa nos? Kon loke Pablo a skirbi den Filipensenan 3:9 por ta nos propio eksperensia?

Manera deskribí den Beibel, Hesus nunka a pèrdè un bataya ku Satanas. E ta e vensedó poderoso. E vensedó riba e podernan di maldat. Ta un kos pa kere ku Hesus tabata viktorioso riba e tentashonnan di Satanas; ta kompletamente un otro kos pa kere ku e viktoria di Hesus ta nos viktoria tambe.

Lesa Revelashon 12:10. Ki estímulo bo mester haña for di e echo ku “a benta” bo akusadó “for di shelu”?

Aunke ainda e bataya ta kontinuá ku pleno vigor riba tera, Satanas a pèrdè. Punto. Esaki ta bèrdat, no solamente di e viktoria final di Kristu na klímaks di historia humano, sino e ta bèrdat tambe den nos bataya riba e gobernantenan i podernan di maldat den nos bida personal. Algun kristian ta biba den derota frustrá. Nan ta sperando viktoria riba algun aktitut òf hábito pero nunka ta gara e realidat di e viktoria di Kristu pa nan den nan bida personal.

Lesa Revelashon 12:11. Ki siguransa di viktoria Kristu ta duna nos den e pasashi akí?

Shete bia den e mensahenan di Revelashon na e shete iglesianan nos ta haña e ekspreshon “esun ku vense”. Akinan den Revelashon 12:11 nos ta haña e konsepto akí di vense atrobe. E palabra “vense” den e lenguahe original di e teksto ta nikao. Por tradusié literalmente “konkistá, prevalesé, triunfá, òf sali viktoriosamente”. Nota kon ta posibel pa nos ta vensedónan. Revelashon 12:11 ta afirmá ku ta solamente “pa medio di sanger di e Lamchi”.

Den Revelashon 5:6, den vishon profétiko, Huan ta fiha su bista den shelu i ta mira “un Lamchi pará. Tabata komo si fuera a mat'E”. E sakrifisio di Kristu ta e enfoke di e atenshon di henter shelu. No tin nada mas sublime pa demostrá e amor infinito i inkomprendibel di Dios ku e krus.

Ora, pa medio di fe, nos aseptá loke Kristu a hasi pa nos, nos debe ta kanselá, i nos ta para perfekto den bista di Dios. Nos pikánan ta pordoná (Kol. 1:14, Efe. 1:7, Kol. 2:14), i e “a benta e akusadó di nos rumannan . . . for di shelu” (Rev. 12:10). Nos ta redimí, viktorioso, i salbá, no pa motibu di nos propio méritonan sino pa motibu di Kristu su viktorianan na nos fabor.

Lesa Revelashon 12:6 i kompar’é ku Revelashon 12:14–16. Nota kuidadosamente e periodo di tempu, e atake di Satanas riba e “muhé” (Dios su iglesia), i Dios su provishon pa Su pueblo. Di kiko e versíkulonan akí ta papiando?

E 1.260 dianan den Revelashon 12:6 ta paralelo na e tempu, tempunan, i mitar di un tempu den Revelashon 12:14. Nos ta haña e mesun profesia di tempu akí ku ta deskribí e mesun periodo di tempu den Daniel 7:25, Revelashon 11:2,3, i Revelashon 13:5. Pasobra esakinan ta símbolonan profétiko (un muhé literal ku ala no a bai den desierto), nos ta apliká tempu profétiko, e prinsipio di dia-aña (lesa, por ehèmpel, Numbernan 14:34 i Ezekiel 4:4–6) na e profesianan akí. Esaki ta nifiká, simplemente, ku un dia profétiko ta igual na un aña. Komentando riba e mesun periodo di tempu profétiko akí den Revelashon 11:2, Andrews University Study Bible ta deklará: “Intérpretenan historisista, pa e motibu ei, generalmente a komprendé ku e periodo di 1.260 dianan profétiko ta nifiká 1.260 aña literal ku ta kore di 538 despues di Kristu te na 1798” (p. 1,673 comments on Revelation 11:2). Un iglesia korupto, huntu ku un estado korupto, tabata oprimí, persiguí, i tin bia mata e pueblo fiel di Dios.

E persekushon satániko feros akí di kristiannan ku ta kere den Beibel tabata un ekstenshon di e gran konflikto entre bon i malu. Saliendo for di e skuridat di Edat Media, na momento di e Reforma, hòmber i muhénan tabata enfrentá un eskoho. Nan lo tabata fiel na e Palabra di Dios, òf nan lo a aseptá e siñansanan di saserdotenan i preladonan? Un bia mas bèrdat a triunfá, i Dios tabatin un pueblo ku tabata fiel na djE dilanti di oposishon poderoso.

Tin algun ekspreshon fasinante i ekstremadamente alentador di Dios su kuido den e versíkulonan akí. Revelashon 12:6 ta usa e ekspreshon “un lugá ku Dios a prepará” (NKJV). Revelashon 12:14 ta deklará ku “a kuida” e muhé den desierto, i Revelashon 12:16 ta deklará: “Tera a bin yuda e muhé”. Na momentonan di persekushon severo, Dios a proveé pa Su iglesia. Manera El a hasi e tempu ei, E lo hasi mesun kos pa Su remanente di tempu di fin.

Deskribí un tempu di prueba òf difikultat den bo propio bida ora ku fásilmente bo por a bira deskurashá, pero Dios a proveé un lugá di refugio pa bo i a sostené bo den bo desafionan. Kon Dios a proveé sosten ora mas bo tabatin mester di dje?

Diabel tabata den guera ku Kristu for di su rebelion den shelu (Rev. 12:7). Satanas su propósito e tempu ei i su propósito awor ta pa tuma kontròl di universo (lesa Isa. 14:12–14). E enfoke di su atenshon den e último dianan di historia di tera ta riba e pueblo di Dios. Revelashon 17 ta deklará enfátikamente ku e dragon (Satanas) tabata furioso (rabiá) ku e muhé (e iglesia) i a bai pa hasi guera ku restu di su desendiente. Ta tradusí e ekspreshon akí, e restu di su desendiente, tambe “e remanente” den King James Version. Dios su remanente ta keda leal na Kristu, obediente na Su bèrdat, i fiel na Su mishon.

Lesa Revelashon 12:17. Ki karakterístikanan di Dios su remanente, Su iglesia di último dia, nos ta haña den e versíkulo akí?

Den Revelashon 12:17 Satanas (e dragon) ta rabiá ku e muhé, Dios su iglesia. Diabel ta furioso ku un pueblo ku ta warda e mandamentunan di Dios, i e lo hasi tur kos ku e por pa destruí nan.

Finalmente, e ta instigá un dekreto pa asina nan no por kumpra òf bende i nan lo bai prizòn i enfrentá morto (lesa Rev. 13:14–17). Si Satanas no por destruí Kristu, e lo purba destruí e opheto di Kristu su afekshon di mas profundo: Kristu su iglesia. E último guera di tera no ta sentrá riba Medio Oriente i e vários konfliktonan ayanan; e ta enfoká riba mente di e pueblo di Dios plamá riba henter mundu. E ta un bataya entre dos forsa opuesto, Kristu i Satanas. Atrobe, niun hende ta neutral.

E pregunta sentral den e guera final akí ta: “Ken tin nos lealtat? Unda nos fidelidat ta?” Shelu ta rekerí kreyentenan ku ta asina enkantá pa e amor di Kristu, redimí pa medio di Su grasia, komprometé na Su propósitonan, empoderá pa Su Spiritu, i asina obediente na Su mandatonan ku nan ta dispuesto pa enfrentá morto mes pa Su kousa.

Nos mundu ta rumbo pa un krísis grandi. Pero den Hesus, pa medio di Hesus, a traves di Hesus, i pa motibu di Hesus, nos viktoria ta sigurá, tanten ku nos keda konektá na djE, lokual nos ta hasi pa medio di fe, un fe ku ta hiba na obediensia. Tur kos ta dependé di nos propio eskoho.

Kon bo ta mira e realidat di Revelashon 12:17 tuma lugá den bo propio bida, den bo propio eksperensia kristian? Es desir, den ki formanan bo ta haña e gran konflikto ta tuma lugá den bo propio bida?

Den un sentido, nos por argumentá ku Dios no tabatin eskoho: si E tabata ke sernan ku por a stim’E i stima otronan, E mester a krea nan liber. Si nan no tabata liber, nan no por a stima, i kiko nos universo lo tabata sin amor? E lo tabata loke algun hende a afirmá: nada mas ku un mashin imbésil ku ta funshoná di akuerdo ku leinan estrikto di kousa i efekto i den kua nos no tin boluntat liber, ni eskoho liber, sino ta nada otro sino paketenan di karni i sanger di partíkulanan supatómiko ku ta sigui solamente e leinan di físika. No eksaktamente un kuadro bunita, ni e no ta representá loke nos sa, den i di nos mes, ku ta bèrdat. Ken entre nos ta kere, por ehèmpel, ku nos amor pa nos mayornan, nos yunan, nos esposonan ta nada otro sino un areglo di atomnan?

“E lei di amor ku ta e fundeshi di e gobièrnu di Dios, e felisidat di tur ser inteligente ta dependé riba nan akuerdo perfekto ku su gran prinsipionan di hustisia. Dios ta deseá di tur Su kriaturanan e servisio di amor—servisio ku ta brota for di un apresio di Su karakter. E no tin plaser den un obediensia fòrsá; i na tur E ta duna libertat di boluntat, pa nan por rindi servisio boluntario na djE. “Tanten ku tur ser kreá tabata rekonosé e lealtat di amor, tabatin harmonia perfekto a lo largu di e universo di Dios. Tabata e goso di e ehérsito selestial pa kumpli ku e propósito di nan Kreador. Nan tabata deleitá den reflehá Su gloria i mustra Su alabansa. I miéntras amor pa Dios tabata supremo, amor un pa otro tabata konfiá i altruista. No tabatin niun nota di diskordia pa mancha e harmonianan selestial.”—Ellen G. White, Patriarchs and Prophets, p. 34, 35.

Preguntanan pa Diskushon:

Dikon Revelashon 12 ta un introdukshon ku ta pas ku e mensahenan di e tres angelnan, spesialmente dilanti di e konflikto benidero na e tempu di fin?

Kon Revelashon 12 ta trankilisante pa bo personalmente den e tentashonnan i pruebanan ku bo ta enfrentá diariamente?

Tin algun hende ku ta kere ku nos genétika i medioambiente ta determiná nos akshonnan grandemente. Bo ta di akuerdo òf no ta di akuerdo? Ki ròl nos eskoho tin den determiná nos komportashon? Diskutí e relashon entre nos eskoho i Dios su poder operativo den nos bida.