E Evangelio Eterno

8 di aprel

Lesa pa e Estudio di e Siman Akí:

Rev. 14:6–12; 1 Kor. 15:1–4; Rom. 3:24–26; 1 Pe. 1:18–20; Mat. 28:19,20; Echonan 1:8

Versíkulo di Memoria:

“I mi a mira un otro angel ta bula meimei di shelu, kende tabatin un evangelio etèrno pa prediká na esnan ku ta biba riba tera, i na tur nashon i tribu i lenga i pueblo” (Revelashon 14:6, NKJV).

Na Israel antiguo, ora e paganonan rònt di nan tabata politeista, adorando múltiple “diosnan” di palu i piedra, a haña Israel su deklarashon di fe kla, identifikabel i poderoso den Deuteronomio 6:4: “ ‘Tende, O Israel! SEÑOR ta nos Dios, SEÑOR ta ún!’ ” (NKJV).

A lo largu di siglonan, e kantamentu di e Shema (nòmber di e orashon, basá riba e palabra hebreo pa “tende”) tabata kòrda e hudiunan riba e vishon spiritual ku tabata uni nan komo un pueblo i ku tabata fortalesé nan resolushon pa mantené nan identidat úniko komo adoradónan di esun Dios berdadero.

Pa Atventistanan di Shete dia, e mensahenan di e tres angelnan den Revelashon 14 ta nos Shema. Nan ta nos deklarashon di fe ku ta identifiká nos. Nan ta definí ken nos ta komo un pueblo i ta deskribí nos mishon na e mundu. En breve, ta deliniá nos identidat profétiko úniko den Revelashon 14:6–12, i ta akinan nos ta haña nos pashon pa proklamá e evangelio na e mundu.

Den e lès di e siman akí nos lo kuminsá un estudio detayá di Revelashon 14:6–12, pero nos lo hasi esei a traves di e wowonan di grasia segun ku nos ta skucha Dios papiando na nos kurason.

* Studia e lès di e siman akí pa prepará pa Sabat, 15 di aprel.

Ora mayoria hende pensa riba e último buki di Beibel, nan no ta pensa riba e grasia di Dios. Ora nan konsiderá Dios su mensahe di último dia, nan pensamentunan ta bira hopi bia inmediatamente na bestianan spantoso, símbolonan místiko, i imágennan straño. E buki di Revelashon ta spanta mes tantu hende ku e ta trankilisá, loke ta desafortuná pasobra e ta, en realidat, saturá ku grasia i yená ku speransa. Es desir, asta meimei di e bestianan spantoso i spièrtamentunan di persekushon i e tempunan difísil nos dilanti, Dios ainda ta duna nos motibunan pa alegrá nos mes den Su salbashon.

Lesa Revelashon 1:1–3 i Revelashon 14:6. Kon e versíkulonan akí huntu ta konta nos tokante no solamente e buki di Revelashon sino tokante e “evangelio eterno” tambe?

Revelashon ta trata di Hesus. E ta Su mensahe na Su pueblo i ta spesialmente aplikabel na Su iglesia den e último dianan. E ta un mensahe yená ku grasia di nos speransa di tempu di fin. A lo largu di e buki, ta deskribí Kristu komo e Lamchi matá, i ta primintí un bendishon na esnan ku lesa, komprendé, i aktua riba e bèrdatnan revelá.

Di akuerdo ku Revelashon 1:5,6, Hesus ta esun kende a “stima nos, i ku a libra nos di nos pikánan pa medio di Su sanger i El a hasi nos bira un reino, saserdotenan pa Su Dios i Tata” (NKJV). Den Kristu nos ta pordoná. Grasia ta pordoná nos pasado, ta empoderá nos presente, i ta proveé speransa pa nos futuro. Es desir, den Kristu nos ta librá di e kastigu i poder di piká, i un dia pronto nos lo ta librá di e presensia di piká. Esaki ta e mensahe di e último buki di Beibel, Revelashon.

I e ta tambe un mensahe urgente, promé deskribí komo un angel bulando rápidamente meimei di shelu teniendo e “evangelio eterno”.

E evangelio? Salbashon pa medio di fe den Kristu? Kristu su morto ekspiatorio pa nos? E promesa di bida eterno, no pa motibu di loke nos por hasi, ma pa motibu di loke Kristu a hasi pa nos? Tur esaki ta na kuminsamentu di e mensahenan di e tres angelnan? Eksaktamente!

Nada straño, anto, ku nan ta mensahenan yená ku grasia yen di speransa i promesa pa nos komo sernan kibrá i sufriendo.

Aunke ta fásil pa focus riba e bestianan i spièrtamentunan di e último dianan, manera deskribí den Revelashon, kon nos por siña balansá tur esakinan ku loke ta, indudablemente, e mensahe di mas importante di Revelashon: Kristu su morto apnegá na nos fabor?

Nota kiko Revelashon 14:6, e kuminsamentu di e mensahe di e tres angelnan, ta kuminsá kuné: e evangelio “eterno”. Si nos faya di komprendé e profundidat di e evangelio, nos lo hera henter e punto di e mensahenan di e tres angelnan. Nunka nos por komprendé e temanan den e mensahe di Dios su ora di huisio òf e kaida di Babilonia òf e marka di e bestia, si nos faya i komprendé e evangelio.

Lesa 1 Korintionan 15:1–4, Romanonan 3:24–26, i Romanonan 5:6–8. Kon ta presentá e “evangelio eterno” den e tekstonan akí? Ki gran speransa ta presentá akinan pa nos?

E evangelio ta e inkreiblemente bon notisia di Kristu su morto pa nos pikánan, Su glorioso resurekshon, i Su amor i preokupashon ku semper ta presente pa nos. Pa medio di fe den Su sanger dramá i Su poder di resurekshon, nos ta librá di tantu e kastigu komo poder di piká. Kristu a apsorbé e pensamentunan di apòstel Pablo i tabata den sentro di su siñansa i predikamentu. E Kristu krusifiká a redimié for di e kondenashon i kulpa di su pasado. E Kristu resusitá a dun’é poder pa presente, i e Kristu ku ta bini bèk a dun’é speransa pa futuro.

Nota kuater punto den e pasashinan akí den Romanonan:

1. Nos ta hustifiká gratuitamente pa medio di grasia.
2. Grasia ta un deklarashon di Dios su hustisia.
3. Grasia ta hustifiká esnan ku aseptá Hesus pa medio di fe.
4. Dios a demostrá Su amor pa nos miéntras nos tabata pekadornan ainda.

E grasia di Kristu ta inmeresí i grátis. Hesus a muri e morto torturá i doloroso ku pekadornan pèrdí lo muri. El a eksperensiá e plenitut di e Tata su rabia, òf huisio, kontra piká. A rechas’E pa asina por a aseptá nos. El a muri e morto ku tabata di nos, pa asina nos por a biba e bida ku tabata di djE.

Ta straño, anto, ku salbashon mester ta pa medio di fe, i sin e obranan di lei? Kiko posiblemente nos lo por a añadí, kiko nos obranan, asta esnan mihó intenshoná, yená ku Spiritu Santu, lo por a añadí na loke Kristu a hasi pa nos na e krus?

I a regla e plan akí, e plan di salbashon, asta promé ku prinsipio di tempu (2 Tim. 1:9, Tito 1:2, Efe. 1:4), loke ta yuda splika dikon ta yam’é e evangelio “eterno”. Promé ku Dios a krea mundu, E tabata sa kiko lo a sosodé, i asina El a instituí e plan di salbashon pa atendé ku e krísis ora, finalmente, e lo a bini.

E mensahe di e tres angelnan ta un storia di grasia. Nan ta e storia di un Salbador su amor inmenso, un storia di Hesus kende ta stima nos asina tantu ku E lo a, mas bien, eksperensiá fièrnu mes ku tin un di nos pèrdí. Nan ta e storia di un amor sin límite, inkonsebibel, inkomprendibel, inmortal, interminabel i infinito.

Dios nunka ta haña sorpresa. E no ta suheto na e bientunan kambiabel di eskohonan di humanidat. Manera nos a mira kaba, Su plan pa libra nos for di e dominio di piká no tabata algun pensamentu sekundario despues ku piká a lanta su kabes mahos. E drama di piká no a kue Dios di sorpresa.

Lesa Revelashon 13:8 i 1 Pedro 1:18–20. Kiko e versíkulonan akí ta siña nos tokante e plan di salbashon?

E frase “evangelio eterno” den Revelashon 14:6 ta papia di pasado, presente, i futuro. Ora Dios a krea humanidat ku kapasidat di hasi eskohonan moral, El a antisipá ku nan lo a hasi eskohonan robes. Unabes Su kriaturanan tabatin kapasidat pa skohe, nan tabatin kapasidat pa rebeldiá kontra Su naturalesa amoroso. E úniko manera pa evitá e realidat akí lo tabata pa krea sernan robòt, kontrolá i manipulá pa algun plan kósmiko divino. Lealtat fòrsá ta kontrali na e naturalesa mes di Dios. Amor ta rekerí eskoho, i unabes a duna sernan poder di eskoho, e posibilidat di hasi eskohonan robes ta eksistí. P’esei, Dios a konsebí e plan di salbashon den Su mente promé ku e rebelion di nos promé mayornan den Eden.

“E plan pa nos redenshon no tabata un pensamentu sekundario, un plan formulá despues di e kaida di Adam. E tabata un revelashon di ‘su plan ku pa siglo El a tene skondí’. Romanonan 16:25 (RV). E tabata un despliegue di e prinsipionan ku for di siglonan eterno tabata e fundeshi di e trono di Dios.” —Ellen G. White, The Desire of Ages, p. 22.

E “evangelio eterno” ta papia no solamente di pasado i presente, e ta e base di un futuro ku speransa. E ta papia di biba eternamente huntu ku Esun kende su kurason ta anhelá pa ta ku nos pa semper.

Lesa Efesionan 1:4. Pensa riba kiko ta nifiká ku, asta promé ku e “fundashon di mundu”, a “skohe” bo den Kristu pa tin salbashon den djE. Dikon bo mester haña e bèrdat akí asina alentador?

Lesa Revelashon 14:6 atrobe. Kiko ta ekstenshon di e proklamashon di e evangelio eterno, i dikon e kontesta ta importante pa nos i nos mishon i yamada komo iglesia?

Di akuerdo ku e mensahe urgente di tempu di fin di e promé di e tres angelnan akí, mester proklamá e “evangelio eterno” na tur nashon, tribu, lenga, i pueblo. Aki tin un mishon asina grandioso, asina grandi, asina fantástiko, i asina integral ku e ta konsumí tur kos. E ta demandá nos mihó esfuersonan i ta rekerí nos kompromiso total. E ta hiba nos di un preokupashon ku nos mes interes propio na un pashon pa servisio di Kristu. E ta inspirá nos ku algu mas grandi ku nos mes i ta hiba nos for di e límitenan smal di nos mente na un vishon mas grandioso.

Lesa Mateo 28:19, 20. Kon e versíkulonan akí ta konektá ku e mensahe di e promé angel?

Den su buki, A Quest for More: Living for Something Bigger Than You, Paul David Tripp ta diskutí e nesesidat sikológiko di tur ser humano pa ta parti di algu mas grandi ku nan mes: “A krea sernan humano pa ta parti di algu mas grandi ku nan mes bida. Piká ta pone nos kremp nos bida na e sais di nos bida. Kristu ta duna nos Su grasia pa reskatá nos for di e límitenan kloustrofóbiko di nos mes reino chikitu ku ta enfoká riba nos mes i ta libra nos pa biba pa e propósitonan eterno i delisianan satisfaktorio di e reino di Dios.”

No tin nada mas inspiradó, mas efektivo, mas benefisioso ku ta parti di un movementu divino, providensialmente lantá pa Dios pa kumpli ku un tarea muchu mas grandi, muchu mas abundante, ku niun solo ser humano hamas lo por a kumpli riba su mes. E mandato duná pa Dios, deskribí den Revelashon 14, ta e tarea di mas grandi hamas enkomendá na Su iglesia. E ta un apelashon sinsero pa duna nos bida na e tarea di mas grandioso di shelu pa revelá Dios su amor inkomprendibel promé ku e regreso di Hesus.

Kiko tabata bo propio eksperensia di ta enbolbí den algu mas grandi ku bo mes? Kon e eksperensia ei ta yuda bo komprendé e punto di e estudio di awe? Tambe, kiko lo por ta mas grandi ku e Kreador di e kòsmòs usa bo pa hasi un diferensia eterno den universo?

A traves di un estudio perseptivo i profundo di Beibel, e promé atventistanan tabatin un komprendementu kresiente di e nifikashon di e mensahenan akí. Nan a sinti ku Dios tabatin un mensahe trahá na midí pa e generashon akí, un mensahe urgente di tempu di fin ku mester proklamá na tur nashon, tribu, lenga, i pueblo, pa asina prepará un mundu pa e regreso di Kristu. E mensahenan di e tres angelnan tabata e motivashon pa mishonnan atventista for di su prinsipio.

Na 1874 Asosiashon general a manda nos promé mishonero Oropa. Ellen G. Wite a yama John Andrews “e hòmber di mas kapas den nos rangonan”. Andrews tabata papia por lo ménos shete idioma, por a ripití Tèstamènt Nobo di memoria, i tabata konosé mayoria di Tèstamènt Bieu. E tabata un erudito briante, un eskritor produktivo, un predikador poderoso, i un teólogo kompetente.

Pa kiko manda un hòmber asina na un lugá kaminda tabatin masha poko kreyente? Pa kiko manda “e hòmber di mas kapas” ku bo tabatin na un kampo mishonero deskonosí? I dikon e tabata dispuesto pa bai? Su esposa a muri un par di aña anterior. Dikon e lo tabata dispuesto pa laga famia i amigunan atras na Merka i nabegá huntu ku su dos yunan na un pais deskonosí, riskando tur kos pa e kousa di Kristu?

Tin solamente un motibu. E tabata kere ku Hesus tabata biniendo pronto, ku e mensahe di bèrdat di tempu di fin mester a bai na henter mundu.

A lo largu di nos historia nos hendenan di mas briante i mihó a biaha te na e finnan di tera pa proklamá e mensahe di último dia. Nan tabata maestronan, personal médiko, pastornan, kunukeronan, mekánikonan, karpinténan, i negoshantenan di tur tipo. Algun tabata empleadonan denominashonal, pero hopi no tabata. Nan tabata laikonan ku tabata kere ku Hesus tabata biniendo pronto.

Lesa Revelashon 14:6, Echonan 1:8, i Mateo 24:14. Ki similaridat bo ta mira den e versíkulonan akí?

Predikamentu di e evangelio eterno ta bula a traves di fronteranan geográfiko. E ta penetrá áreanan di mas lehano di tera. E ta alkansá hendenan di tur idioma i kultura. Finalmente, e lo impaktá henter mundu. Kon fasinante pa sa ku nos mensahe, te asina leu, a alkansá mas ku 210 di e 235 paisnan di mundu rekonosé pa Nashonnan Uní.

Ki ròl lo bo por hunga, i kon lo bo por a hung’é mihó, den yuda plama e mensahenan di e tres angelnan na tur “nashon, tribu, lenga, i pueblo”?

Reflekshoná mas riba e idea di e estudio di djárason tokante nos nesesidat di ta parti di algu mas grandi ku nos mes i nos bidanan pober, kòrtiku, hopi bia korupto, dañá, i desepshonante (ken no tin algun di e kosnan ei den nan eksistensia?). E deseo akí tin asina tantu sentido tambe. Físikamente, nos ta nada otro sino paketenan chikitu di karni kargando ku nos nos propio seleber, un par di liber di material orgániko basá riba karbon, mas serka den komposishon di un hèmber di galiña hasá ku un disko duru.

Kiko e pakinan chikitu di karni, pará riba nan mes, ta nifiká kontrali na e infinidat ku ta rondon’é? Biba solamente pa bo mes, biba pa algu no mas grandi ku bo mes, ora tin asina tantu kos tur rònt di nos i mas ayá di nos, ta manera ta di será pa bida largu den detenshon solitario meimei di un stat grandi ku bo por sinti ta vibra a traves di e murayanan. I ki kos mas grandi, mas grandioso, i mas glorioso i konsekuente nos lo por biba p’e ku proklamá e promesa di bida eterno ku nos a haña den Hesus?

“Sirbidónan di Dios, ku nan karanan iluminá i briando ku konsagrashon santu lo pura di lugá pa lugá pa proklamá e mensahe for di shelu. Pa medio de míles di bosnan, riba henter tera, lo duna e spièrtamentu. Milagernan lo tuma lugá, esnan malu lo kura, i señalnan i maravianan lo sigui e kreyentenan. Satanas tambe ta traha, ku maravianan engañoso, asta tresiendo kandela abou for di shelu den bista di hende. Revelashon 13:13. Asina lo trese e habitantenan di tera pa tuma nan posishon.”—Ellen G. White, The Great Controversy, p. 612.

Preguntanan pa Diskushon:

“Vários a skirbi mi, puntrando si e mensahe di hustifikashon pa fe ta e mensahe di e di tres angel, i mi a kontestá: ‘E ta e mensahe di e di tres angel enbèrdat.’ ”—Ellen G. White, The Advent Review and Sabbath Herald, 1e di aprel 1890. Ki relashon hustifikashon pa fe tin ku e mensahe di e tres angelnan?

Reflekshoná mas riba e frase “evangelio eterno”. Kiko ta eterno tokante e evangelio?

Kiko ta nifiká ku Atventistanan di Shete dia ta den asina tantu pais di mundu? Kiko e ta bisa tokante kon Dios a bendishoná nos esfuersonan te asina leu? Na mes momento, kon bo iglesia lokal, asta bo Sabat Skol lokal, por hunga un ròl mas grandi den “terminá e obra”?