E Bon Notisia di e Huisio

22 di aprel

Lesa pa e Estudio di e Siman Akí:

Rev. 14:7; Salmo 51:1–4; Rev. 20:12; Dan. 7:9,14,26; Rev. 4:2–4; .Rev. 5:1–12.

Versíkulo di Memoria:

“I el a bisa na bos haltu: ‘Teme Dios i dun'E gloria, pasobra e ora di Su huisio a yega; i adorá Esun ku a traha shelu i tera i laman i fuentenan di awa.’ ” (Revelashon 14:7, NKJV).

Si Beibel tabata hopi kla tokante kualke kos, e ta kla ku Dios ta un Dios di huisio, i ku trempan òf lat, di un manera òf otro, huisio, e huisio ku ta hasi asina falta aki i awor, ta bai bini i Dios Mes, “e Hues Supremo di henter mundu”, ta bai atministr’é (Gén. 18:25; lesa tambe Salmo 58:11, Salmo 94:2, Salmo 98:9). Of, manera Pablo mes a skirbi: “Ke men ku kada un di nos mester duna kuenta na Dios di su mes echonan!” Rom. 14:12

Pensamentu spantoso, no ta bèrdat? Ku nos tin ku duna kuenta di nos mes dilanti di Dios, e Dios kende sa e kosnan di mas profundo, e Dios kende lo “... trese tur echo na huisio, tur kos ku ta skondí, sea bon òf malu.” (Ekl. 12:14, NKJV)?

Tòg, finalmente e huisio ta revelá e bondat i e grasia di Dios i ku E ta tantu hustu komo miserikòrdioso den kon E ta trata ku esnan salbá, i asta ku esnan pèrdí.

E siman akí nos lo eksplorá e temanan di mas profundo di e huisio den relashon ku e gran konflikto ku ta kontinuá ku pleno vigor den universo, i nos lo wak spesialmente tokante loke ta sosodé ora e pueblo fiel mes di Dios ta enfrentá e “huisio benidero” inevitabel Echonan 24:25.

* Studia e lès di e siman akí pa prepará pa Sabat, 29 di aprel.

E último buki di Beibel, Revelashon, ta enfoká riba kulminashon di e konflikto eterno entre bon i malu. Lucifer, un angel rebelde, a desafiá e hustisia, rektitut, i sabiduria di Dios. El a reklamá ku Dios tabata inhustu i deshonesto den e manera ku E tabata atministrá e universo. E huisio final di Revelashon ta den sentro di e konflikto akí riba e karakter di Dios.

Revelashon 14:7 ta bisa: “Teme Dios i dun'E gloria, pasobra e ora di Su huisio a yega; i adorá Esun ku a traha shelu i tera i laman i fuentenan di awa”.Dikon ta signifikante ku mesora despues ta bisa nos tokante e “evangelio eterno”, e mensahe di e promé angel ta papia tokante e huisio di Dios? Kiko e “evangelio eterno” tin di aber ku e huisio di Dios?

E evangelio i e huisio, tur dos parti di e mensahe di e promé angel, ta di forma inseparabel di wef den otro. Si no tabata pa e “evangelio eterno”, nos lo no tabatin speransa den e huisio. De hecho, manera nos lo mira, e “evangelio eterno” ta, en realidat, nos úniko speransa den e huisio. No tin niun duda ku parti di kontenido di e evangelio ta e anunsio di huisio.

Durante e huisio akí, e mundunan ku no a kai lo mira ku Dios a hasi tur loke E por pa salba tur ser humano. E huisio akí ta revelá Dios su huisio i miserikòrdia. E ta bisa algu tokante Su amor i lei. E ta papia di Su grasia pa salba i Su poder pa libra.

E huisio ta parti di Dios su último solushon pa e problema di piká. Den e gran konflikto entre bon i malu den universo, Dios a kontestá e akusashonnan di Satanas riba e krus, pero den e huisio, E ta revelá ku El a hasi tur kos posibel pa salba nos i pa hiba nos na e krus.

Lo habri e registronan infinito, minusioso, eksakto, i detayá di shelu (lesa Dan. 7:10). Nos ta asina presioso pa Dios ku henter universo ta para ketu pa konsiderá e eskohonan ku nos a hasi den lus di e pursiguimentu di Spiritu Santu i e redenshon asina libremente proveé pa Kristu riba e krus di Kalvario.

Lesa Salmo 51:1–4 kuidadosamente, spesialmente versíkulo 4. Kon e versíkulonan akí ta yuda tira lus riba e nifikashon i propósito di e huisio?

E krus i huisio tur dos ta revelá ku Dios ta hustu i miserikòrdioso. E lei kibrá ta demandá morto di e pekador. Hustisia ta deklará: “Pago di piká ta morto”. Miserikòrdia ta respondé: “e don di grasia di Dios ta bida etèrno den Kristu-Hesus, nos Señor.” (Rom. 6:23, NKJV). Si por a kambia òf abolí e lei di Dios, lo tabata totalmente innesesario pa Kristu muri. E morto di Kristu ta establesé e naturalesa eterno di e lei, i e lei ta e base di huisio.

Lesa Revelashon 20:12. Kon ta husga nos? Ki relashon nos bon obranan tin ku nos salbashon.

Nos obranan ta revelá nos eskohonan i nos lealtat na Dios. Di akuerdo ku Efesionan 2:8,9, “Pasobra pa medio di grasia boso ta salbá dor di fe. . . no komo resultado di obranan, pa ni un hende no gaba”. Pero ora Kristu salba nos, E ta kambia nos. “Pasobra nos ta e obra di Su man, kreá den Kristu-Hesus pa bon obranan.” (Efe. 2:10, NKJV).

Nos bon obranan, empoderá pa Spiritu Santu, no ta salba nos, pero sí nan ta testifiká ku nos fe ta genuino. Dios su huisio final ta kita tur pretenshon, tur hipokresia, tur falsedat, i ta penetrá den e profundidat mes di nos ser. Ora e ta deskribí nos posishon dilanti di Dios den e huisio, Ellen G White ta proveé e komprenshon poderoso akí den e manera kon e evangelio i huisio ta bai man den man.

“E echo ku ta representá e pueblo rekonosé di Dios komo pará dilanti di Señor den pañanan shushi mester hiba na humildat i skrudiñamentu profundo di kurason di parti di tur ku ta profesá Su nòmber. Esnan ku enbèrdat ta purifikando nan alma a traves di obedesé e bèrdat lo tin un opinion di mas humilde di nan mes. Mas djaserka nan wak e karakter sin mancha di Kristu, mas fuerte nan deseo lo ta pa ta konforme na Su imágen, i ménos nan lo mira puresa òf santidat den nan mes. Pero miéntras nos mester realisá nos kondishon pekaminoso, nos mester dependé riba Kristu komo nos hustisia, nos santifikashon, i nos redenshon. Nos no por kontestá e akusashonnan di Satanas kontra nos. Kristu so por hasi un súplika efikas na nos fabor. E ta kapas pa silensiá e akusadó ku argumentonan fundá no riba nos méritonan, sino riba esnan di Su mes.”— Testimonies for the Church, tomo 5, p. 471, 472.

Kon bo ta mira, den su palabranan, e koherensia di e evangelio for di e huisio? Ki speransa bo por saka for di e konekshon akí entre e evangelio i e huisio pa bo mes?

E bukinan profétiko di Daniel i Revelashon ta tomonan komplementario ku ta mustra nos na e eventonan ku ta desplegá den e último dianan di historia di tera. E buki di Revelashon ta anunsiá ku e ora di e huisio di Dios a yega. E buki di Daniel ta revelá ki ora e huisio a kuminsá.

Den Daniel 7 Dios a revelá e historia di mundu na e profeta. Nashonnan ta lanta i kai. Podernan ku ta persiguí ta oprimí e pueblo di Dios. Despues di a deskribí Babilonia, Medo-Persia, Gresia, Roma, e kiebro di e Imperio Romano, i e persekushon di e iglesia pa e 1.260 aña deskribí den e teksto (Dan. 7:25; lesa tambe Rev. 12:14), Dios ta focus Daniel su mente riba un evento selestial glorioso ku lo regla tur kos. Ta dirigí atenshon di e profeta di e lantamentu i kaida di nashonnan i e forsanan opresivo di tera na e sala di trono di universo i Dios su huisio final, ora E lo drecha tur kos robes i establesé Su reino eterno di hustisia.

Dios a hiba Daniel den vishon profétiko for di e káos i konflikto di tera te na e glorianan di e santuario selestial i e seshon di e korte supremo di universo, kaminda Kristu, e Gobernante Legítimo di e mundu akí, lo a risibí for di Su Tata e reino ku tabata legítimamente di djE.

Lesa Daniel 7:9,10,13 i deskribí loke Daniel a mira den e versíkulonan akí. Kiko tambe ta e resultado final di e huisio akí? Lesa Daniel 7:14,26,27.

Ta disidí destino di henter humanidat den e sala di hustisia di shelu. Derecho ta prevalesé. Bèrdat ta triunfá. Hustisia ta reina. Esaki ta un di e esenanan di mas asombroso, di mas maravioso, di mas espektakular den henter Skritura. I e bon notisia ta ku e ta terminá hopi bon pa e pueblo fiel di Dios, esnan bistí ku e hustisia di Kristu.

Hesus ta aserká Su Tata selestial den presensia di henter universo. Sernan selestial ta aglomerá rònt di e trono di Dios. Henter e universo di sernan no kaí ta para asombrá di e esena di huisio akí. E konflikto largu ku a sigui pa milenionan pronto lo kaba. E bataya pa e trono di universo ta totalmente, kompletamente disidí.

Daniel tabatin rason tokante e imperionan ku a bin i a bai, manera predesí. Dikon, anto, tin asina tantu sentido pa konfia e Palabra di Dios tokante loke e ta bisa enkuanto di esun final, “un reino eterno”, ku nunka lo “pasa bai”?

Den Revelashon 4 Juan ta mira un porta habrí den shelu i ta risibí e invitashon pa "Bin aki riba, i lo Mi mustrabo loke mester tuma lugá despues di e kosnan aki." (Rev. 4:1, NKJV). Hesus a invitá e apòstel pa wak a traves di e porta den e santuario di shelu pa mira esenanan eterno den e gran konflikto entre bon i malu. Nos tambe por wak a traves di e porta habrí ei huntu ku Juan i risibí un bistaso di e plan eterno di salbashon. Nos ta testigunan di temanan ku e korte selestial di shelu ta disidí. Temanan fundamental den e gran konflikto entre bon i malu ta desaroyá dilanti di nos bista.

Lesa Revelashon 4:2–4. Ki similaridatnan bo por mira akinan ku e esena di huisio den Daniel 7?

Esaki ta opviamente un esena di sala di trono. Dios Tata ta sinta riba e trono rondoná pa sernan selestial. Tin bos i welek simbolisando e huisionan di Dios. Nos ta nota tambe den Revelashon 4:4 ku 24 ansiano ta presente rònt di e trono di Dios.

Ken e 24 ansianonan akí ta? Den Israel antiguo tabatin 24 divishon den e saserdosio levítiko. E saserdotenan akí tabata representá e pueblo dilanti di Dios. Den 1 Pedro 2:9 e apòstel ta deklará ku kreyentenan di Tèstamènt Nobo ta un “generashon skohí”, “un saserdosio real”. E 24 ansianonan akí, kisas, por tabata representá tur e redimínan ku un dia lo regosihá rònt di e trono di Dios; òf, kisas, nan ta representá e personanan resusitá na e resurekshon di Kristu i ku a subi na shelu huntu kunE (Mat. 27:52, Efe. 4:7,8).

Di tur manera, esaki ta bon notisia. Tin algun di e redimínan for di tera rònt di e trono di Dios. Nan a enfrentá tentashonnan meskos ku nos ta enfrentá nan. A traves di e grasia di Kristu i poder di Spiritu Santu nan a vense. Nan ta bistí ku “pañanan blanku” ku ta nifiká e hustisia di Kristu ku ta kubri i limpia nan pikánan. Nan tin un korona di oro riba nan kabes, ku ta nifiká ku nan ta viktorioso den e bataya ku maldat i ta parti di shelu su liña real di kreyentenan yená ku fe.

Nos ta mira un trono poné den shelu ku Dios sintá riba dje. Tin sernan selestial rònt di e trono, i pronto tur ser selestial ta kuminsá kanta, i e crescendo di alabansa ta krese bira mas i ainda mas haltu: "Digno Bo ta, nos Señor i nos Dios, pa risibí gloria i onor i poder; pasobra Abo a krea tur kos, i pa motibu di Bo boluntat nan tabata eksistí, i a ser kreá." (Rev. 4:11, NKJV).

Den Revelashon 5:1–3, un bia mas nos ta mira un trono. Ta introdusí un ròl skirbí na tur dos banda. E ta seyá ku e seyo divino, i niun hende den shelu òf riba tera por habri e ròl. Sernan selestial ta tembla. E asuntu ta serio. Niun ser angelikal por representá humanidat den e huisio final di tera. Juan ta yora pasobra niun hende por habri e ròl. E ora ei un di e ansianonan, un di esnan redimí di tera, ta papia palabranan di enkurashamentu na Juan su kurason. Hesus, e Lamchi di Dios, ta digno di habri e ròl.

Juan ta mira e kontesta final riba e problema di piká den Revelashon 5:5. Akinan e profeta di edat ta mira e úniko manera ku un hende por pasa e huisio final na e trono di Dios.

“I un di e ansianonan a bisami: ‘Stòp di yora; mira, e Leon ku ta di e tribu di Juda, e Rais di David, a vense pa habri e buki’ I mi a mira. . . un Lamchi pará, manera matá” (Rev. 5:5,6, NKJV).

Lesa Revelashon 5:8–12. Kon henter shelu ta respondé riba e anunsio ku Hesus ta digno pa habri e ròl di huisio i redimí nos?

Hesus, e Lamchi di Dios kende a sakrifiká Su bida pa salbashon di henter humanidat, ta tuma e ròl di huisio i ta habrié. Henter shelu ta eksplotá den alabansa enkantá. Su viktoria riba e tentashonnan di Satanas, Su morto riba krus di Kalvario, Su resurekshon, Su ministerio Sumosaserdotal, ta proveé salbashon pa tur ku skohe, pa medio di fe, pa respondé riba Su grasia. E huisio ta inkreiblemente bon notisia pa e pueblo di Dios. E ta papia di e fin di e reinado di piká i e liberashon di e pueblo di Dios.

Kualke kos por ta mas alentador? Hesus ta para pa nos den e huisio. Su bida hustu perfekto ta kubri nos. Su hustisia ta obra denter di nos pa hasi nos nobo. Su grasia ta pordoná nos, ta transformá nos, i ta empoderá nos pa biba bidanan santu.

Nos no mester tin miedu. Hesus ta para pa nos den e huisio, i e podernan di maldat ta derotá. Huisio ta pasa na “fabor” di e pueblo di Dios (Dan. 7:22). E propósito di e huisio no ta pa haña sa kon malu nos ta sino pa revelá kon bon Dios ta.

Atrobe, reflekshoná riba e gran speransa ku nos tin den e huisio: Hesus komo nos supstituto. Dikon esei ta nos úniko speransa?

Wak e persepshonnan poderoso ku Spiritu di Profesia ta duna nos enkuanto di e estado di Dios su pueblo den e último dianan, den e tempu di huisio i e fin di mundu.

“Nan úniko speransa ta den e miserikòrdia di Dios, nan úniko defensa lo ta orashon. Manera Yozue tabata suplikando dilanti di e Angel, asina e iglesia remanente, ku kibramentu di kurason i fe sinsero, lo supliká pa pordon i liberashon a traves di Hesus, nan Abogado. Nan ta kompletamente konsiente di e pekaminosidat di nan bida, nan ta mira nan debilidat i indignidat, i ora nan wak nan mes, nan ta kla pa desesperá. E tentadó ta para aserka pa akusá nan, manera el a para aserka pa akusá Yozue. E ta mustra na nan pañanan shushi,nan karakternan defektuoso. E ta presentá nan debilidat i bobedat, nan pikánan di ingratitut, nan desigualdat na Kristu, loke a deshonrá nan Redentor. . . . E pueblo di Dios tabata hopi defektuoso den hopi aspekto. Satanas tin un konosementu eksakto di e pikánan ku el a tenta nan pa kometé, i e ta presentá esakinan den e lus di mas eksagerá, deklarando: “ ‘Dios lo eksiliá ami i mi angelnan for di Su presensia, i tòg rekompensá esnan ku tabata kulpabel di e mesun pikánan? Bo no por hasi esaki, o Señor, den hustisia. Bo trono lo no para den hustisia i huisio. Hustisia ta demandá pa pronunsiá e sentensia ei kontra nan.’ Pero miéntras e siguidónan di Kristu a peka, nan no a duna nan mes na e kontròl di maldat. Nan a pone nan pikánan un banda, i a a buska Señor den humildat i kontrishon, i e Abogado divino ta supliká na nan fabor. Esun ku tabata mas abuzá pa nan ingratitut, ku konosé nan piká, i tambe nan arepentimentu, ta deklará: ‘Señor reprendé bo, o Satanas.” Mi a duna Mi bida pa e almanan akí. Nan ta grabá riba e palmanan di Mi mannan.’ ”—Ellen G. White, Testimonies for the Church, tomo 5, p. 473, 474.

Preguntanan pa Diskushon:

Kon e konosementu ku “e ora di Su huisio a yega” ta impaktá nos bida diario? Si mayoria di nos ta honesto, probablemente nos lo a bisa ku e no ta hasi esei, bèrdat? Kon nos por kambia?

Dikon e huisio ta bon notisia i no mal notisia? Den klas, papia tokante e ròl di Hesus pa nos den e huisio. Kon esaki por motivá nos pa ta fiel na djE, sabiendo ku solamente pa motibu di loke El a hasi pa nos, nos por tin speransa di salbashon?

Reflekshoná mas riba e idea di e huisio, ku ta revelá e karakter di Dios na e universo. Kon e idea akí ta pas hopi bon ku henter e senario di e gran konflikto?