Adorando e Kreador

6 di mei

Lesa pa e Estudio di e Siman Akí:

Rev. 1:9; Isa. 40:26; 2 Kor. 5:17; Kol. 1:17; Rev. 4:11; Juan 19:16–30.

Versíkulo di Memoria:

" ‘Digno Bo ta, nos Señor i nos Dios, pa risibí gloria i onor i poder; pasobra Abo a krea tur kos, i pa motibu di Bo boluntat nan tabata eksistí, i a wòrdu kreá.’ " (Revelashon 4:11, NKJV).

Ta fásil pa tuma kosnan pa normal, partikularmente kosnan ku semper nos a konosé òf a eksperensiá. Kon fásil, por ehèmpel, ta pa muchanan chikitu kere nan mayornan, ku nan a konosé henter nan bida kòrtiku? Kon fásil ta pa nos tambe, pa tuma e solo, e shelu, e aire, òf e suela bou di nos pianan pa normal.

Sinembargo, bo a yega di stòp pa pensa kuantu nos ta tuma eksistensia mes pa normal? Es desir, kuantu bia nos ta para ketu i hasi e famoso pregunta filosófiko: Di kon tin algu na lugá di nada?

Pa kiko nos universo mes, i tur e mahestat i grandesa i kosnan asombroso den dje, ta eksistí, pa kuminsá? Ki gran kontradikshon lógiko lo a tuma lugá si nos universo, i nos den dje, no tabata tei? Di akuerdo ku e último teoria sientífiko (nan tin tendensia di kambia), un tempu nos universo no tabata eksistí. Den otro palabra, nos tin un eksistensia kasual, i ta un milager ku nos ta akinan mes. I apesar di tur sorto di mito tokante e universo ku a surgi di apsolutamente nada, òf di algun tipo di komparashon matemátiko, nos universo ta eksistí pasobra Dios, e Kreador, a trah’é i tur kos den dje.

* Studia e lès di e siman akí pa prepará pa Sabat, 13 di mei.

Despues di Su asenshon na shelu (Echonan 1:9), Hesus a bishitá e último di e apòstelnan bibu, Juan, riba e isla di Patmos, kaminda e emperador romano sin kompashon, Domisiano, a eksili’é.

Lesa Revelashon 1:9 . Lesa tambe Mateo 13:21, Echonan 14:22, i Juan 16:33. Kiko e mensahe ta akinan pa tur ku ta trata na sigui Hesus den e mundu akí?

Separá for di e sosten di su famia, amigunan, i e komunidat kristian, no a laga Juan su so den e tribulashonnan i problema ku e tabata enfrentá komo un siguidó di Hesus. Su ministerio no a kaba. Su testimonio no tabata kompletu. Un bishitante angelikal di brio sumamente bunita a bishitá Juan riba e isla solitario ei i a trese un mensahe direktamente for di e trono di Dios p’e. E mensahe akí for di Hesus tabata pa eko a traves di e pasionan di tempu a lo largu di e siglonan. E tabata un mensahe di speransa pa tur generashon, pero spesialmente un mensahe pa prepará Dios su pueblo di último dia pa e binida di Hesus. E ta un mensahe serio di spièrtamentu komo tambe un mensahe di enkurashamentu di tempu di fin miéntras nos ta prepará pa enfrentá e pruebanan di e último dianan (òf kualke prueba ku kisas bo por ta enfrentando aktualmente).

Si bo mester a drenta e kueba kaminda ta suponé ku e angel selestial a bishitá Juan ku e vishon profétiko di Revelashon, inmediatamente lo bo a nota e palabranan poné riba un plakat na su entrada, resumiendo henter e buki di Revelashon: “ ‘Teme Dios i dun'E gloria, pasobra e ora di Su huisio a yega; i adorá Esun ku a traha shelu i tera i laman i fuentenan di awa’ ” (Rev. 14:7).

E tema sentral den e buki di Revelashon ta adorashon. A krea nos komo sernan adoradó. Kada un di nos ta adorá algu òf un hende. Berdadero adorashon, adorashon di e Kreador, ta kapasitá nos pa deskubrí e berdadero propósito di bida. E ta duna nos un motibu pa biba. E ta duna nos no solamente algu pa muri p’e sino, ainda mas signifikante, algu pa biba p’e i, si mester, pa soportá tribulashonnan p’e. I enbèrdat, ora e krísisnan final surgi, nos lo komprendé mihó e palabranan ku “ ‘Dor di hopi tribulashon nos mester drenta e reino di Dios.’ ” (Echonan 14:22).

Si sirbidónan fiel, manera Juan, ta enfrentá sufrimentu i tribulashon, kiko ta pone nos pensa ku nos, nos mes, lo no enfrentá problema tampoko? (Lesa 1 Pe. 4:12–15.)

Lesa Revelashon 14:7 . Kon e mensahe di e promé angel ta konkluí? Ki apelashon final e mensahe di ora di huisio ta hasi? (Lesa tambe Isa. 40:26 , Juan 1:1–3 , i Rom. 1:20 .)

Revelashon 14:7 ta terminá ku un yamada di trompèt pa adorá e Kreador; e yamada akí ta spesialmente importante awor, ora mayoria di e mundu sientífiko i asta esun kristian a aseptá evolushon, un siñansa ku ta dal na e kurason mes di tur kos bíbliko i kristian. Si evolushon tabata bèrdat, nos fe lo tabata, di nesesidat, un mentira. Ta asina rígido e asuntunan ta.

Revelashon su apelashon final, anto, tin su rais den e promé buki di Beibel, Génesis. Nunka nos lo komprendé e kuestionnan den e bataya kósmiko akí riba adorashon kompletamente, a ménos ku nos komprendé e nifikashon di Kreashon. “Na prinsipio Dios a krea e shelunan i tera.” (Gén. 1:1). E versíkulo akí ta e fundeshi pa henter Skritura. “Na prinsipio Dios a krea.”. E palabra hebreo pa “krea” den e pasashi akí ta bara, un verbo ku ta usa solamente i eksklusivamente ku Dios Mes komo e tema.

Pa haña djis un idea chikitu di kon ilimitá e poder di Dios ta, laga nos konsiderá djis un opheto di Su kreashon, e solo. E solo ta produsí mas energia den un sekònde ku humanidat a produsí pa medio di zeta, gas, karbon, òf kandela for di prinsipio di tempu.

E solo tin un diameter di aproksimadamente 865.000 mia i lo por mantené un mion planeta tamaño di tera. Pero solo ta djis un di por lo ménos 100 bion strea den nos galaksia, e Galaksia. Un strea yamá Strea Pistol ta emití tantu komo dies mion bia e poder generá pa nos solo. Un mion strea grandura di nos solo por pas fásilmente denter di e esfera di Strea Pistol. Kon nos por sikiera kuminsá lora nos mente rònt di kreashon?

Kreashon ta revelá un Dios di poder asombroso i ilimitá. Su forsa kreativo no solamente a trese e shelunan i tera den eksistensia, sino el a obra na fabor di Su pueblo a traves di siglonan. E ta e Dios ku a kuminsá e mundu akí, kende ta semper presente den e mundu akí, i kende nunka lo bandoná Su pueblo den e mundu akí.

Kon e grandura aplastante di e Kreashon solamente ta oumentá e realidat di Dios su amor, pasobra e ta mustra ku, apesar di kon chikitu nos ta en komparashon ku e Kreashon, Kristu a muri pa nos, di tur manera?

E Dios di Kreashon, kende a trese e solo, luna, i streanan den eksistensia, kende Su poder asombroso a krea e planeta akí i a yen’é ku kosnan bibu, ta tambe e Dios kende ta interesá den kada un di nos. E ta e Dios kende a libra Su pueblo for di sklabitut egipsio, kende a guia nan den nan biahe den desierto, kende a laga áwaseru di mana kai for di shelu, kende a pone e murayanan di Yériko basha den otro, i kende a derotá e enemigunan di Israel. E mesun Dios kende a lòs Su poder infinito pa krea e universo, ta lòs e poder infinito ei pa derotá e forsanan di maldat ku ta pisa e batayanan pa nos almanan.

Lesa 2 Kor. 5:17, Salmo 139:15–18, Echonan 17:27, i Kol. 1:17. Kiko e versíkulonan akí ta siña nos tokante e serkania di Dios?

Teólogonan ta papia tokante e transendensia di Dios. Esaki ta e idea ku Dios ta eksistí ariba i riba henter Kreashon. Pero nan ta papia tambe tokante e inherensia di Dios. Esaki ta e idea ku Dios tambe, di un manera òf otro, ta eksistí denter di nos mundu i, manera historia bíbliko ta mustra, ta tambe enbolbí den dje di forma kompliká i íntimo. Aunke Señor ta biba den un “lugá haltu i santu”, E ta tambe “huntu ku esnan umilde i di spiritu kibrá” (Isa. 57:15). Manera Hesus Mes a bisa, papiando tokante Su siguidónan fiel: “ ‘Ami den nan i Abo den Mi, pa nan por ta perfekto den unidat, pa mundu por sa ku ta Abo a mandaMi, i ku Bo a stima nan, meskos ku Bo a stimaMi.” (Juan 17:23). E no ta bira mas íntimo i mas serka ku esei.

E gran notisia tokante nos Dios ta ku Su grandesa i poder ta asina enorme ku e ta yega a traves di e kòsmòs i den bida di kada un di nos. E ta primintí di traha nos di nobo, moldia nos, transformá nos den semehansa di Su imágen. Pensa riba loke esei ta nifiká. E Dios kende a krea i kende ta sostené bion di galaksianan ta e mesun Dios no solamente den ken “ ‘nos ta biba, move i eksistí’ ” (Echonan 17:28), sino tambe ta obra den nos kurasonnan, pa duna nos kurasonnan nobo, pa purifiká nos di piká, i hasi nos kriaturanan nobo den Kristu. Ki un pensamentu poderosamente trankilisante pa realisá ku nos Dios, un Dios di tal poder, ta stima i ta preokupá pa nos.

Kon nos por siña saka speransa i konsuelo for di komprendé e inherensia di Dios? Of e ta duna bo miedu, pasobra Dios konosé bo sekretonan di mas skur? Kon e evangelio mester duna bo pas den e konteksto ei?

Wak e mensahe di e promé angel. Evangelio eterno. Ora di huisio. Adorá e Kreador. Wak kon djaserka relashoná e ideanan akí ta. Ora nos para dilanti di nos Kreador den huisio, ta solamente e evangelio ta duna nos kualke speransa mes. “P’esei awor no tin kondenashon pa esnan ku ta den Kristu-Hesus” (Rom. 8:1). No tin kondenashon awor akí, i siguramente no den e huisio.

E mensahe di Dios komo Kreador ta asina sentral na bèrdat presente, spesialmente ora evolushon, asta ora bistí den trahe “kristian”, ta menasá di destruí henter e fundeshi di e fe kristian.

Sinembargo, meimei di e atake violento di pensamentu evolutivo, Dios a lanta un iglesia, un pueblo ku su nòmber mes ta un testimonio kontra e idea di evolushon, un pueblo ku mester proklamá e bèrdat fundamental di Dios komo nos Kreador i Redentor.

Lesa Efesionan 3:9 , Kolosensenan 1:13–17 , Rev. 4:11, i Romanonan 5:17–19 . Kiko e tekstonan akí ta siña nos tokante Hesus komo Kreador i Redentor?

Wak kon djaserka vinkulá Hesus komo Kreador ta na Hesus komo Redentor. E momento ku Su ròl komo Kreador ta disminuí, manera evolushon inevitablemente ta hasi, Su ròl komo nos Redentor ta drenta den duda tambe. Hesus ta bini pa redimí nos di piká, di morto, di sufrimentu, i di violensia, ora piká, morto, sufrimentu, i violensia ta, manera evolushon ta siña, e mes medio di kreashon mes? Dios ta redimí nos di e mes proseso ku El a uza pa krea nos, pa kuminsá? Ta un mentira peligroso.

I loke ta hasié pió ainda ta ku evolushon ta chèrcha e mes idea di e morto di Hesus riba krus. Di kon? Pablo (lesa Romanonan 5:17–19) inseparablemente ta konektá e introdukshon di piká, a traves di Adam, na e morto di Hesus. Tin un konekshon direkto, e ora ei, entre Adam i Hesus. Den kualke modelo evolutivo, sinembargo, niun Adam sin piká por a introdusí morto, pasobra morto, miónes di aña di morto, tabata, supuestamente, e forsanan i podernan ku tabata nesesario pa krea Adam, pa kuminsá.

P’esei, for di kuminsamentu evolushon ta destruí e fundeshi bíbliko di e krus. Kontrali na esei, Atventistanan di Shete dia, ora nan yama e mundu pa adorá e Kreador, ta para komo un testigu bibu kontra e eror akí.

Maske kuantu nos por i ta maraviá i adorá Señor komo nos Kreador, tin mas. Manera nos a mira kaba, pero digno di wak atrobe, ta e idea ku nos Kreador ta tambe nos Redentor. E Dios kende a krea nos ta e mesun Dios kende a redimí nos. E Dios kende a bisa: “Laga Nos traha hende segun Nos imágen, konforme Nos semehansa” (Gén. 1:26), ta e mesun ku, riba e krus, a grita: “ ‘Eli, Eli, lama sabagtani?’ ” es desir, “ ‘Mi Dios, mi Dios, pakiko Bo a bandoná Mi?’ ” (Mat. 27:46). Papia di e motibu pa teme Dios òf mas ainda, pa dun’E gloria i pa ador’E tambe!

Kon nos por, komo sernan humano kaí, respondé adekuadamente riba un bèrdat asina asombroso manera esaki? Kiko nos por hasi posiblemente komo kontesta? A bisa nos, den e mensahe di e promé angel, kiko hasi: “ ‘Teme Dios i dun'E gloria, pasobra e ora di Su huisio a yega; i adorá Esun ku a traha shelu i tera i laman i fuentenan di awa’ ” (Rev. 14:7).

Lesa Juan 19:16–30, Juan su relato di Hesus riba krus. Segun ku bo ta les’é pensa riba e tekstonan di Beibel ku nos a wak tokante Hesus komo Kreador, komo Esun pa medio di ken “Pasobra pa medio di djE tur kos a wòrdu kreá, tantu den e shelunan komo riba tera, visibel i invisibel, sea trononan òf dominionan òf gobernantenan òf outoridatnan tur kos a wòrdu kreá pa medio di djE i p'E.” (Kol. 1:16). Kon nos mester respondé riba e ekspreshon asombroso akí di e amor di Dios?

E mensahe di e promé angel pa adorá e Kreador a bini despues di e krus, despues ku a bira konosí na e universo ku ta mirando i na e siguidónan di Kristu ku Esun kende a “traha shelu i tera i laman i fuentenan di awa” ta e Mesun kende, aunke siendo Dios, El a ser “trahá den e semehansa di hende. I hañando Su mes den kondishon di hende, El a umiyá Su mes dor di bira obedesido te na morto, asta morto na un krus” (Fil. 2:7,8).

Ki un espektákulo maravioso esei mester tabata pa esnan ku tabata konosé Hesus promé ku El a bini na tera komo un ser humano. Nada straño ku sernan selestial tambe ta ador’E. Pa loke ta trata nos, redimí pa Su sanger, kiko mas nos lo por hasi sino adorá nos Kreador i nos Redentor?

Di kon e idea, den lus di e krus, di sernan humano kaí ku ta kapas na añadí kualke kos na loke Kristu a hasi riba krus ta un idea asina herétiko? Kua di nos obranan lo por añadí na loke e Kreador ya a hasi pa nos?

E adorashon di Dios ta sentral den e Skrituranan i semper tabata un punto di disputa pa hende i pa e pueblo di Dios. A lo largu di Tèstamènt Bieu e profetanan a reprendé e pueblo di Dios pa tabata adorá otro diosnan òf pa tabata adorá Señor uzando e práktikanan di adorashon di e mundu pagano. E konflikto entre adorá Dios òf adorá otro diosnan ta pertenesé na e sentro mes di e konflikto kósmiko i bin kompañá pa indiferensia na e lei di Dios.

“Adorashon ta dirigí su mes riba e aspekto di mas fundamental di eksistensia humano den sentido ku e tin di aber ku loke hende komo kriaturanan bibu meter hasi ora nan konfrontá ku e presensia di e Kreador. . . . Solamente esnan ku ta bibu por adorá Señor; e mortonan no por alabá i ador’E. . . . Esun kende a krea nos ta invitá nos pa someté nos bidanan den e akto di adorá pa asina risibí nan bèk for di djE enrikesé, pa uza nan pa benefishi di otronan. Adorashon tin di aber ku e naturalesa i propósito mes di nos eksistensia i ku e nesesidat pa tin un sentro pafó di nos mes ku ta libra nos di egoismo. No adorá Dios ta, pèrdè nos rason pa eksistensia; e ta, eksistí den un estado di desorientashon i, p’esei, ta muriendo, bayendo direkshon di ekstinshon total pasobra nos ta deskonektá for di e fuente mes di bida.”—Ángel Manuel Rodríguez,“The Closing of the Cosmic Conflict: Role of the Three Angels’ Messages,” p. 42.

Preguntanan pa Diskushon:

Reflekshoná mas riba e idea akí di di kon, den un mundu kaí, no ta sufisiente ku Dios a krea nos. Di kon nos mester di e promesa di Redenshon tambe?

Pensa riba algun eksperensia den kua indudablemente bo a mira e poder di Dios obra den bo bida; es desir, den un forma ku a mustra bo e amor di Dios pa bo personalmente. I despues, reflekshoná riba e echo ku esaki ta Dios kende a krea henter e kòsmòs! I e Dios akí stima bo sufisiente pa ta preokupá pa bo bida. Di kon e realidat akí no mester ta solamente di alivio sino humiante tambe?

Si evolushon tabata bèrdat, pensa riba kon lo a yama nos na adorá un Kreador ku a uza biónes di añanan di morto, violensia, destrukshon, sufrimentu, i ekstinshon di masa pa asina krea nos, miéntras na mes momento duna nos un storia kompletamente diferente den Génesis tokante kon a krea nos. I tòg, nos ta suponé di ador’E? Ador’E pa kiko? Pa a gaña nos pa míles di aña tokante kon nos a yega akinan, pa kuminsá?