Sabat i e Fin

13 di mei

Lesa pa e Estudio di e Siman Akí:

Santiago 2:8–13; Deut. 5:12–15; Salmo 33:6,9; Revelashon 14; 2 Pe. 3:13; Rev. 21:1.

Versíkulo di Memoria:

“I pa trese na klaridat kiko ta e atministrashon di e misterio ku pa siglonan tabata skondí den Dios, Kende a krea tur kos” (Efesionan 3:9, NKJV).

E esensia di humanidat su dignidat ta un kreashon komun. E echo ku Dios a krea nos di forma úniko ta pone balor riba tur ser humano. E yu no nasí den barika di e mama, e teenager desabilitá, e hóben adulto ku síndrome di Down, i e wela aflihí pa Alzheimer, tur tin inmenso balor pa Dios. Dios ta nan Tata. Nan ta su yunan hòmber i muhé. “E Dios ku a traha mundu i tur kos ku tin den djé, siendo Señor di shelu i di tera, no ta biba den tèmpel trahá ku man. ... i for di ún sanger El a traha tur nashon di hende pa biba riba henter mundu. ...” (Echonan 17:24–26, NKJV).

Nos tin un herensia kompartí. Nos ta pertenesé na e mesun famia. Nos ta rumannan hòmber i muhé, modelá, formá, i moldiá pa e mesun Dios. Kreashon ta proveé un sentido berdadero di balor propio. Ora e DNA i kromosomanan a bini huntu pa forma e struktura biológiko úniko di bo personalidat, Dios a tira e patronchi afó. Den henter universo no tin un meskos ku bo. Bo ta úniko, un kreashon úniko den su klase, un ser di balor asina inmenso ku e Dios kende a krea e kòsmòs a tuma riba Su mes nos kurpanan di karni i a ofresé Su mes komo un sakrifisio pa bo i bo pikánan!

* Studia e lès di e siman akí pa prepará pa Sabat, 20 di mei.

Si nos ta meramente un kolekshon di sèlnan formá kon ku ta, simplemente produkto di kasualidat i un makaku afrikano avansá, nada mas, e ora ei bida tin poko nifikashon. Si nos ta simplemente un di e ocho bion hendenan kalkulá, garando un na otro pa espasio pa biba riba un planta yamá tera, bida ta pèrdè su propósito, otro for di simpel sobrebibensia. Kontrali na esei, e Kreashon bíbliko ta proveé un rason pa biba i un imperativo moral pa bida. Dios a krea nos i nos ta responsabel na djE pa nos akshonnan. Esun ku a traha nos ta tene nos responsabel. El a establesé límitenan, asta den un mundu di “relativismo moral”.

Lesa Revelashon 14:7, Romanonan 14:10, i Santiago 2:8–13. Kiko huisio ta impliká tokante temanan manera responsabilidat? Kon e huisio, e mandamentunan di Dios, i adorashon ta konektá?

E mensahe di e tres angelnan ku ta bulando meimei di shelu den Revelashon 14 ta anunsiá ku “e ora di Su huisio a yega” (Rev. 14:7, NKJV). Ya ku Dios a krea nos ku kapasidat pa hasi eskohonan moral, nos ta responsabel pa e desishonnan ku nos tuma. Si nos tabata simplemente un kolekshon kasual di sèlnan, produktonan di nos genétika i besindario solamente, forsanan riba kua nos no tabatin kontròl lo a determiná nos akshonnan pa gran parti.

Pero huisio ta impliká responsabilidat moral. Den e ora di krísis akí di historia di tera, e ora di huisio, Dios ta yama nos pa tuma desishonnan den lus di eternidat. E apelashon serio di e promé angel pa “adorá Esun ku a traha shelu i tera i laman i fuentenan di awa” (Rev. 14:7, NKJV) ta rekonosé ku e base di tur adorashon ta e echo ku Dios a krea nos.

Mientrastantu, nos deboshon na e Sabat di e di shete dia ta demostrá nos kreensia ku Hesus ta digno pa ador’E komo nos Kreador. E ta revelá nos aseptashon di Su lei di Dies Mandamentu komo prinsipionan divinamente inspirá pa biba bida te na máksimo. Pa motibu ku e lei ta e fundeshi di Dios su gobièrnu i un revelashon di Su karakter, e ta bira e norma di huisio. Nos fieldat na e mandamentu di Sabat ta rekonosementu di nos kompromiso pa biba bidanan obediente.

Kon nos komprendementu di Kreashon ta influensiá nos komportashon? Ki relashon genétika i besindario tin ku e eskohonan ku nos ta hasi diariamente? Kon nos por pa e grasia di Dios, vense defektonan di karakter ku nos no a skohe pa tin, na promé lugá?

Ta pa motibu ku nos mundu tin mester di e mensahe trankilisante di Kreashon asina desesperadamente, ku Dios a duna nos e Sabat. Meimei di siglo 19, ora e hipótesis evolutivo tabata hasi e mundu intelektual popular, Dios a manda un mensahe di speransa inkreibel. Nos a bin ta studia e mensahe akí, hañá den Revelashon 14:6,7.

Satanas a hasi tur intento pa deformá e idea di Kreashon pasobra e ta odia Hesus i no ke pa E risibí e adorashon ku nos deb’E komo nos Kreador i Redentor. E Sabat ta den sentro di e gan konflikto riba Kristu su dignidat pa risibí adorashon komo nos Kreador. Dios su mensahe di último dia ta unu ku ta yama henter humanidat bèk pa adorá Kristu komo e Kreador di shelu i tera. E base di tur adorashon ta e echo ku El a krea nos.

Lesa Génesis 2:1–3, Eksodo 20:8–11, i Deuteronomio 5:12–15 den konteksto di Revelashon 14:6,7. Kon nos ta mira, den e mandamentu di Sabat, e konekshon entre Kreashon i Redenshon tambe?

Sabat ta un símbolo eterno di nos sosiegu den djE. E ta un señal spesial di lealtat na e Kreador (Ezek. 20:12,20). Mas bien ku un rekerimentu legalista arbitrario, e ta revelá ku ta haña berdadero sosiegu di hustifikashon pa medio di obranan den djE. E Sabat ta papia di un Dios kende a logra pa nos loke nos nunka lo por a hasi pa nos mes.

Skritura ta yama nos pa sosegá den Su amor i kuido kada Sabat. Sabat ta un símbolo di sosiegu, no obranan; di grasia, no legalismo; di siguridat, no kondenashon; di dependé riba djE, no riba nos mes. Kada Sabat nos ta regosihá den Su bondat, i alab’E pa e salbashon ku nos por haña solamente den Kristu.

E Sabat ta tambe e konekshon eterno entre e perfekshon di Eden den pasado i e gloria di e shelunan nobo i e tera nobo den futuro (Isa. 65:17, Rev. 21:1).

E Sabat ta yama nos bèk na nos raisnan. E ta un konekshon na nos famia di orígen. For di dia ku tempu a kuminsá, a warda e Sabat kontinuamente. E ta un konekshon intakto a lo largu di tempu bèk te na nos kreashon. E ta tene nos di focus riba e bèrdat glorioso ku nos ta yunan di Dios. E ta yama nos na un relashon íntimo i será kunE.

Kon ta mustra na e mandamentu di Sabat den Revelashon 14:6,7, i dikon e ta importante pa nos mensahe di tempu di fin? (Lesa Eksodo 20:8–11.)

Den un intento pa destruí e singularidat di nos kreashon, diabel a introdusí un falsifikashon no asina sutil. E falsifikashon, aseptá pa asta algun entre nos, ta bai asin’aki. Dios ta e kousa prinsipal di kreashon, pero El a tuma siglonan largu pa trese bida den eksistensia. Evolushon tabata e proseso ku El a uza. E aserkamentu akí ta purba harmonisá “data sientífiko” ku e relato di Génesis. E ta afirmá ku e dianan di kreashon ta periodonan di tempu largu i indefiní i ku bida riba tera ta biónes di aña bieu.

Lesa Salmo 33:3,9 i Hebreonan 11:3. Kiko e pasashinan kla di Beibel akí ta bisa nos tokante kon Dios a krea mundu?

E relato bíbliko ta kla. Dios “a papia, i asina tabata; El a duna òrdu, i esei a bin na eksistensia” (Salmo 33:9). “Pa medio di fe nos ta komprendé ku e mundunan a wòrdu prepará pa medio di e palabra di Dios.” (Hebr. 11:3). E promé kapítulo di Génesis ta afirmá ku Dios a krea mundu den seis dia literal di 24 ora i a sosegá riba e di shete. E struktura lingwístiko di Génesis 1 i 2 no ta permití nada mas. Asta eruditonan ku no ta kere den e Kreashon di seis dia literal ta rekonosé ku e outor su intento tabata pa siña e Kreashon di seis dia.

E palabra hebreo pa “dia” den Génesis 1 ta “yom”. A lo largu di Beibel, tur bia ku un kantidat ta modifiká e palabra “yom” komo un athetivo (di tres dia, promé dia, loke sea), e ta limitá e periodo di tempu na 24 ora. No tin ni un solo ehèmpel den Beibel kaminda un numeral ku ta modifiká e sustantivo “yom” ta indiká un periodo indefiní. Sin eksepshon, semper e ta un periodo di 24 ora.

Tambe, i na e punto inmediato, si Dios no a krea mundu den seis dia literal, ki nifikashon e Sabat di e di shete dia tin? Pa kiko Dios lo a komand’é? Lo no tabatin niun sentido ètòl pa laga e Sabat komo un herensia eterno di un siman di Kreashon di seis dia, si un siman di Kreashon di seis dia nunka a eksistí, pa kuminsá. Aseptá siglonan largu di kreashon ta desafiá e nesesidat mes pa e Sabat di e di shete dia. E ta lanta tambe preguntanan serio enkuanto di integridat di Skritura.

Dor di ataká e Sabat, Satanas ta desafiando e kurason mes di Dios su outoridat, i kiko por tabata mas efektivo, destruyendo e konmemorativo di e Kreashon di seis dia, ku nenga e realidat di e Kreashon di seis dia? Nada straño ku asina tantu hende, inkluyendo kristiannan, ta ignorá e Sabat di e di shete dia. Ki un komposishon pa e engaño final.

E gran konflikto, ku a kuminsá den shelu milenionan pasá, tabata riba e kuestion di Dios su outoridat. E desafio ta keda mesun kos awendia tambe.

Lesa Revelashon 14:7,9,12. Resumí e versíkulonan akí dor di kompletá e frasenan riba e liñanan aki bou.

E pasashinan akí ta aklará ku e tema sentral den e konflikto den e último dianan entre bon i malu, Kristu i Satanas, ta adorashon. Nos ta adorá e Kreador òf e bestia? I pasobra Kreashon ta forma e base di tur nos kreensianan (despues di tur kos, kiko nos ta kere ku tin kualke sentido aparte di Dios komo nos Kreador?), e Sabat di e di shete dia, implantá den e relato di Kreashon di Génesis mes (Génesis 2:1–3), ta para komo e señal eterno i inmutabel di e Kreashon ei. E ta e señal di mas básiko di e siñansa di mas básiko. E úniko kos mas fundamental kuné ta Dios Mes.

P’esei, pa usurpá e Sabat di e di shete dia ta, usurpá e outoridat di Señor na e nivel di mas prinsipal posibel, esun di E komo Kreador. E ta, bai patras di tur kos i sak’é ku rais ku tur. E ta, en realidat, trata na tuma e lugá di Dios Mes (2 Tes. 2:4).

Naturalmente, e kuestion real den e último dianan ta nos amor i lealtat na Hesus. Pero di akuerdo ku Beibel, ta ekspresá e amor akí den obediensia na e mandamentunan (1 Juan 5:3, Rev. 14:12), i e Sabat so entre e mandamentunan ta bai patras di tur kos pasobra e so ta mustra na Dios komo Kreador (Eks. 20:8–11). Nada straño ku e lo ta e símbolo eksterno di e divishon final entre esnan ku ta adorá Señor i esnan ku ta adorá e bestia (Rev. 14:11, 12). Konsiderando kon básiko i fundamental e Sabat ta na tur otro kos, ta difísil pa mira kon e kuestion final di adorá e Kreador lo por ta tokante kualke otro kos.

Hopi hende ta argumentá ku no ta hasi diferensia ki dia un hende ta warda komo e Sabat, tanten ku nos warda unu. Kon nos ta kontestá e argumento ei ku Beibel?

E Sabat ta un lugá di refugio den un mundu kansá. Kada siman nos ta laga e preokupashonnan di e mundu akí i ta drenta den Dios su sentro di refugio, e Sabat. E famoso outor hudiu, Abraham Heschel, ta yama e Sabat “un palasio den tempu”. Kada di shete dia, e palasio selestial di Dios ta baha for di shelu na tera, i Señor ta invitá nos den e gloria di Su presensia pa e periodo di 24 ora akí pa pasa un tempu di kompañerismo íntimo kunE.

Den su buki riba e bunitesa i solemnidat di e Sabat, Heschel ta skirbi di e nifikashon di e Sabat den e palabranan akí: “E Sabat ta un metáfora pa paraiso i un testimonio na e presensia di Dios; den nos orashonnan nos ta antisipá un era mesiániko ku lo ta un Sabat, i kada Sabat ta prepará nos pa e eksperensia ei: A ménos ku un hende siña kon pa saboriá e sabor di Sabat . . . hende lo ta inkapas pa disfrutá di e sabor di eternidat den e mundu benidero.”

Na Kreashon Hesus a traha un lugá di biba spesial pa nos. Nos por haña refugio ayanan. Nos por ta seif ayanan. Su trabou ta kompletu. E ta kumplí. Ora nos sosegá riba Sabat, nos ta sosegando den Su kuido amoroso. Nos ta sosegando den antisipashon di nos sosiegu eterno den e shelunan nobo i e tera nobo ku ta bini pronto.

Lesa Isaias 65:17, Isaias 66:22, 2 Pedro 3:13, i Revelashon 21:1. Kon warda Sabat ta mustra nos padilanti na eternidat?

E mesun Dios kende a krea e tera e promé bia lo kre’é atrobe, i e Sabat ta keda un símbolo eterno di djE komo e Kreador (lesa Isa. 66:23). De echo, e hudiunan a mira e Sabat komo un símbolo, un antisipo di loke tabata yama na hebreo e olam haba, e mundu benidero.

E mensahe di tres angel ku ta bula a traves di e shelunan, apelando pa nos adorá e Kreador ta shelu su kontesta riba e desesperashon di hopi den siglo bintiun. E ta mustra nos na nos Kreador, Esun kende na promé lugá a traha tur kos, i na nos Redentor, Esun kende, despues di e huisio, despues ku eradiká piká, lo hasi tur kos bira nobo. “I Esun ku ta sintá riba e trono a bisa: ‘Mira, Mi ta hasi tur kos nobo.’ I El a bisa: ‘Skirbi, pasobra e palabranan akí ta fiel i bèrdadero.’ " (Rev. 21:5).

Kon bo por hasi e Sabat personalmente un antisipo di shelu den bo mes bida i bo famia?

“E rason proveé . . . pa adorá Dios ta ku E ta e Kreador. Den liturgia selestial, sernan selestial a ekspresá e idea den un forma masha konsiso: ‘Pasobra Bo a krea tur kos’ (Rev. 4:11). Riba tera, mester enfatisá Dios su kreashon mas tantu posibel, asina ta ku e angel ta bisa, ‘Adorá Esun ku a traha shelu i tera i laman i fuentenan di awa’ (Rev. 14:7.). A indiká korektamente ku e angel ta uzando e lenguahe di e di kuater mandamentu pa hustifiká e yamada pa adorá Dios (Eks. 20:11). . . .

“Denter di e Dekálogo e mandamentu di Sabat ta para komo su seyo, den sentido ku e ta identifiká ken Dios ta, e Kreador; ta konfirmá e teritorio riba kua E ta goberná, tur kos ku El a krea; i ta revelá Su derecho di goberná, pasobra El a krea tur kos. Pa e dragon triunfá, e mester a, di un òf otro manera, pone e konmemorativo akí un banda.”—Ángel Manuel Rodríguez, ”The Closing of the Cosmic Conflict: Role of the Three Angels’ Messages,” p. 40, 41.

Preguntanan pa Diskushon:

Kon e mensahe di e Sabat ta kontestá e gran preguntanan di bida, manera di unda mi a bini, di kon mi ta akinan, i kiko ta mi destino eterno?

Reflekshoná riba e maravia di Kreashon. Reflekshoná riba e milager di nos mes eksistensia den e universo enorme akí. Kiko e echo ku e konmemorativo prinsipal di e kreashon akí, e Sabat, ta bini serka nos (kontrali na nos bai serka dje) tur siman sin eksepshon, mester siña nos tokante kon importante e doktrina di Kreashon ta?

Den Daniel 3 i Daniel 6, kon bo ta mira e tema di adorashon desempeñá den e relatonan inspirá akí? Kiko nos ta haña den e relatonan akí ku por yuda nos prepará i antisipá ki desafio Dios su pueblo fiel lo enfrentá durante e krísis rònt di “e marka di e bestia”?

Kon nos ta mustra un hende ku ta kere den e miónes, asta biónes, di añanan di evolushon komo e medio di kreashon, e i irashonalidat di warda e Sabat di e di shete di komo un konmemorativo na e kreashon ei?