Un Siudat Yamá Konfushon

27 di mei

Lesa pa e Estudio di e Siman Akí:

Rev. 17:1,2,15 ; Rev. 18:1–4 ; Rev. 17:4–6 ; Mat. 16:18 ; Jer. 50:33–38 ; Salmo. 115:4–8.

Versíkulo di Memoria:

“Esakinan lo hasi guera kontra e Lamchi, i e Lamchi lo vense nan, pasobra E ta Señor di señornan i Rei di reinan, i esnan ku ta huntu kunE ta e yamánan i skohínan i fielnan” (Revelashon 17:14, NKJV).

Ta resumí e tema di e gran konflikto den Revelashon ku e simbolismo di dos muhé: unu bistí ku solo, den Revelashon 12, i unu bistí na skarlata, den Revelashon 17.

Ta haña e símbolo yamativo di e muhé bistí ku solo, den e gloria sumamente bunita di Kristu, den Revelashon 12. E ta fiel na su berdadero amor, Hesus. E no ta shushá ku e korupshon di doktrinanan falsu. Den henter Beibel, un muhé puru ta simbolisá e brùit di Hesus, òf e iglesia berdadero. Den Jeremias 6:2, e profeta ta bisa: “Lo mi kaba ku e yu muhé di Sion, esun asina bunita i delikado”. E profeta ta uza e ekspreshon “yu muhé di Sion” òf un muhé fiel pa deskribí e pueblo di Dios (Lesa tambe Efe. 5:25–32 i Hoseas 2:20.)

Kontrali na esei, Beibel ta kompará apostasia ku prostitushon òf adulterio (Santiago 4:4). Papiando di Israel su rebelion i infidelidat, Ezekiel ta lamentá: “Abo, muhé adúltero, ku ta entregá su mes na strañero na lugá di na su mes esposo!” (Ezek. 16:32).

Den e lès di e siman akí, nos lo studia e dos muhénan di Revelashon akí i proba, mas profundamente, e konflikto entre bèrdat i eror.

* Studia e lès di e siman akí pa prepará pa Sabat, 27 di mei.

Lesa Revelashon 12:17 i Revelashon 17:14. Kon ta deskribí e iglesia di Dios, i kiko ta Satanas su reakshon riba dje?

A traves di siglonan, Dios semper tabatin un pueblo ku tabata fiel na djE. Revelashon 12:7 ta deskribí nan fieldat komo esnan ku “ta warda e mandamentunan di Dios”, i tambe ku otro kaminda ta deskribí komo “yamánan, skohínan, i fielnan” (Rev. 17:14, NKJV).

Lesa Revelashon 14:8 i Revelashon 17:1,2. Ki anunsio solèm e angel ta hasi, i kiko Babilonia ta hasi pa garantisá un anunsio asina?

Juan a skirbi e buki di Revelashon na fin di e promé siglo. Pa e tempu akí, e siudat antiguo di Babilonia tabata un monton di stòf. Ora Juan a skirbi e mensahenan den e buki Revelashon, e siudat literal di Babilonia tabata destruí pa mas ku vários siglo.

Den Revelashon ta tuma e siudat antiguo di Babilonia komo un tipo, òf símbolo, di e Babilonia di tempu di fin. Den e profesianan di Revelashon, Babilonia ta representá un sistema religioso falsu ku lo tin karakterístikanan similar na Babilonia di Tèstamènt Bieu. E prinsipionan ku tabata guia Babilonia lo ta e struktura ku ta sostené Babilonia spiritual moderno.

Den Revelashon 17:1–6, un muhé bistí na püs i kòrá kimá ta kana ku dignidat a traves di e paisahe di tempu. E muhé akí ta kore riba un bestia kòrá kimá. Beibel ta yam’é un prostituta. El a bandoná su berdadero amor, Hesu-Kristu. Aki apòstel Juan ta duna nos un representashon gráfiko di un sistema di religion apóstata ku tin influensia poderoso den mundu. Wak e fraseologia: e poder akí tabata un ku ken “e reinan di mundu a kometé akto di inmoralidat i e habitantenan di mundu a bebe nan mes burachi ku e biña di su inmoralidat” (Rev. 17:2). Burachi? Semper un kos negativo den Beibel. I inmoralidat? Simbóliko di e siñansanan falsu, doktrina falsu, i práktika.

E poder akí a influensiá, di forma similar, tantu lidernan komo e pueblo komun negativamente. Kiko ta nos úniko protekshon? (Lesa Efe. 6:10–18.)

Lesa Rev. 17:1,2,15 i Rev. 18:1–4. Kon ekstensivo e influensia di Babilonia ta?

E sistema di iglesia falsu tin un alkanse internashonal, influensiando hendenan rònt mundu ku nan engañonan. Satanas ta furioso ku lo proklamá e evangelio na tur “nashon i tribu, lenga, i pueblo” i “ ‘lo prediká e bon notisia di e reino rònt mundu’ ”, asina ku e ta uza tur engaño posibel pa koutivá e mentenan di e “ ‘e habitantenan di mundu’ ” (Rev. 14:6, Mat. 24:14, Rev. 17:2).

Rev. 17:2 ta kontinuá ku su splikashon di e misterio di e gran Babilonia dor di deklará ku el a “kometé fornikashon” ku e reinan di tera. Kiko ta fornikashon? E ta un union ilegal. Den e sistema di iglesia kaí, uni ku estado. Den e sistema berdadero di iglesia, e iglesia ta uní ku Hesu-Kristu. E iglesia kaí ta wak e lidernan polítiko di tera pa poder i outoridat. E ta buska e estado pa kumpli ku su dekretonan. Mas bien ku saka su fortalesa for di Kristu komo su berdadero kabes, e ta wak e estado pa sosten.

Revelashon 17:2 ta sigui ku su representashon dramátiko: “i e habitantenan di mundu a bebe nan mes burachi ku e biña di su inmoralidat”. Ta uza e simbolismo di e djus puru di drùif den henter Tèstamènt Nobo pa representá e sanger puru i sin mancha di Kristu, bashá pa nos salbashon riba e krus (Mat. 26:27–29). Den Lukas 22:20 Hesus ta bisa: “E kopa akí, ku a wòrdu dramá pa boso, ta e aliansa nobo den Mi sanger”. Ora trose e biña nobo i puru di e evangelio, i supstituí e siñansanan di e Palabra di Dios pa e siñansanan di lidernan religioso humano, e ta bira e “biña di Babilonia”. (Lesa Mat. 15:9.)

Nota tambe, ku Dios ta yama Su pueblo pa sali for di Babilonia. Den otro palabra, no importá kon korupto i malu e sistema ta, su alkanse ta asina hanchu ku e ta abarká, a lo ménos pa sierto tempu, Su fielnan, òf “Mi pueblo”, (Rev. 18:4), manera E ta yama nan. Sinembargo, e tempu ta yegando ora Dios lo yama nan pa sali for di e sistema korupto i malu, ku ta na punto di kai pa motibu di su naturalesa korupto i malu, e “lugá di biba pa demoño” akí i e “lugá di skonde pa tur sorto di para impuru” (Rev. 18:2).

Ki ròl esnan ku ta proklamá e mensahenan di e tres angelnan tin, ku Dios ta uza nan pa yama “Mi pueblo”, Su pueblo, pa sali for di Babilonia?

Lesa Rev. 17:4–6. Kiko e versíkulonan akí ta siña nos tokante e naturalesa di e sistema malu akí?

Manera nos a mira, Revelashon 17 ta deskribí un sistema religioso apóstata ku ta introdusí den kristianismo hopi di e siñansanan di Babilonia di Tèstamènt Bieu.

“Pa buska un komprendementu di e naturalesa di Babilonia, nos tin ku bai bèk na su promé referensia di e registro bíbliko, den Génesis. Tur kos a kuminsá riba e sabana di e pais Shinar, un region den e parti sùit di Mesopotamia, awe sùit Irak, yamá Babilonia. Ta einan a konstruí e Toren Di Babel, un símbolo di sufisiensia propio, preservashon propio, i independensia di Dios (Gén. 11:1–4).”—Ángel Manuel Rodríguez, dokumento titulá “The Closing of the Cosmic Conflict: Role of the Three Angels’ Messages,” p. 43.

A konstruí e Toren di Babel, e sitio Babilonia antiguo, den desafio direkto na e Palabra di Dios. E konstruktornan di Babel a konstruí e monumento akí pa nan propio gloria, i Dios a konfundí nan idiomanan. E relato di Génesis ta pon’é asin’aki: “P’esei su nòmber tabata Babel, pasobra einan SEÑOR a konfundí e idioma di henter tera” (Gén. 11:9, NKJV).

Asina malu e sistema akí ta ku ta deskribié di tabata “I mi a mira e muhé burachi di e sanger di e santunan i di e sanger di e testigunan di Jesus.” (Rev. 17:6), imágen hororoso di presis kon korupto Babilonia ta (lesa tambe Isa. 49:26).

Básikamente, Babilonia spiritual ta representá un religion basá riba siñansanan humano, establesé riba ideanan humano, i sostené pa tradishonnan humano. E ta un forma di religion trahá pa hende, trahá pa, kisas, lidernan religioso humano briante, pero e ta para den oposishon na e poder di e evangelio i e iglesia ku Hesus a traha, un iglesia trahá riba amor, no violensia.

E buki di Revelashon ta deskribí e dos sistemanan di religion akí. Esun promé ta revelá konfiansa total den Hesus i dependensia riba Su Palabra. Esun di dos ta revelá konfiansa den outoridat humano i dependensia riba maestronan religioso humano. Un ta un fe sentrá riba Kristu ku dependensia total riba Kristu su grasia, sakrifisio i ekspiashon pa salbashon. E otro ta un aserkamentu humanista na fe ku ta remplasá e dependensia total riba Kristu pa salbashon ku un dependensia riba e tradishonnan di e iglesia.

Kon nos por protegé nos mes di e influensianan sutil di Babilonia, manera e tendensia, fásil manera e ta, di dependé riba nos mes i no totalmente riba Dios?

E apelashon di Revelashon ta un yamada urgente na kompromiso, resumí den e simbolismo di e dos muhénan den Revelashon. Aunke tin bia lo parse ku lo derotá e pueblo di Dios den e konflikto kósmiko akí entre bèrdat i eror, Dios ta primintí ku Su iglesia lo triunfá na final.

Kompará Mat. 16:18 ku Revelashon 17:14. Ki promesa Hesus a duna Su disipelnan enkuanto di Su iglesia?

Kristu ta e fundeshi sólido riba kua Su iglesia ta trahá. Su iglesia ta basá riba e siñansanan di Su Palabra i ta guiá pa Su Spiritu. Kontrali na esei, Babilonia, manera nos a mira, ta ankrá den siñansanan i tradishon trahá pa hende. Kualke lider religioso ku ta supstituí opinionnan òf tradishonnan humano na lugá di, òf riba, e boluntat revelá di Dios den e Skrituranan, ta simplemente fomentando konfushon babilóniko.

Den e dianan di Babilonia antiguo, iglesia i estado tabata un i e mesun kos. Ora rei Nebukadnèsar tabata sinta den su tèmpel riba su trono real, e tabata papia supuestamente pa e diosnan. Na un okashon, komo un akto di desafio di e Dios berdadero, e rei babilóniko a pasa un dekreto universal imponiendo adorashon i a ordená tur su súpditonan pa bùig pa su dekreto, un símbolo poderoso di loke Dios su pueblo fiel, ku ta nenga di adorá e imágen falsu, lo enfrentá den e último dianan (Lesa Daniel 3.)

Den e último dianan di historia di tera, un sistema di iglesia-estado lo lanta, Babilonia spiritual, ku un lider spiritual reklamando di ta papia komo Dios. Lo deklará ku su palabra ta e palabra mes di Dios i su mandatonan e mandatonan di Dios. A lo largu di siglonan e pontífise romano a deklará ku nan ta para na lugá di Dios riba tera. Den su karta papal di 20 di yüni 1894, Papa Leo XIII a deklará: “Nos tin aki riba tera e lugá di Dios Todopoderoso.” Ferraris Ecclesiastical Dictionary ta añadí: “E Papa ta di dignidat asina grandi i asina eksaltá ku e no ta djis un hende, sino komo si fuera Dios i e vikario di Dios.” Apòstel Pablo ta añadí e palabranan akí eksponiendo e poder akí: “kende ta oponé i ta halsa su mes riba tur loke ta wòrdu yamá Dios òf opheto di adorashon, asina ku e ta tuma asiento den e tèmpel di Dios, proklamando su mes komo Dios". (2 Tes. 2:4).

Pasobra ya nos a mira ku Dios tin hendenan fiel den “Babilonia”, di kon nos mester ta kuidadoso kon nos ta papia di dje, i di kon nos mester ta kuidadoso pa no husga hende komo persona, kontrali na e sistema mes?

Ata un otro klave pa identifiká e “misterio di e gran Babilonia” klaramente. Idolatria tabata den sentro di adorashon babilóniko.

Lesa Jeremías 50:33–38 i Jeremías 51:17,47. Kiko bo ta deskubrí den e versíkulonan akí tokante Babilonia antiguo su adorashon di imágennan i Dios su reakshon riba dje?

Yeremías 50 i 51 ta predesí e destrukshon di Babilonia pa e Medianan i Persianan. Un di e motibunan pa e kaida di Babilonia tabata nan idolatria. E babilonionan tabata kere ku e imágennan akí tabata representashonnan di nan deidatnan. Den religion babilóniko, tabata konsiderá e kuido ritual i adorashon di e estatuanan di deidatnan sagrado; e diosnan tabata biba simultáneamente den nan estatuanan den tèmpelnan i den e forsanan natural ku nan tabata inkorporá. Tabata konsiderá e sakeo òf destrukshon di ídolonan di ta pèrdida di patronahe divino; durante e periodo neo-babilóniko, e prens kaldeo Marduk-apla-iddina II a hui bai den e murasnan sùit di Mesopotamia ku e estatuanan di diosnan babilóniko pa salba nan di e ehérsitonan di Senakerib di Asiria (Jane R. McIntosh, Ancient Mesopotamia: New Perspectives, ABC-CLIO, Inc., Santa Barbara, CA, 2005 p. 35–43).

E profetanan di Beibel tabata kompará e adorashon di e imágennan sin bida akí ku e Kreador Dios, kende tabata tantu bibu komo dunadó di bida (Jer. 51:15,16,19).

Lesa Eksodo 20:4–6 i Salmo. 115:4–8. Kiko nan ta siña tokante idolatria?

Aunke e kuestionnan di e idolatria di Babilonia spiritual ta bai mas profundo ku solamente bùig dilanti di imágennan di palu i piedra, Babilonia spiritual ta paralelo na Babilonia antiguo ku e imágennan introdusí den su servisio di adorashon. E uzo di imágennan komo ophetonan di adorashon, òf asina yamá “venerashon”, ta un violashon di e di dos mandamentu pasobra e ta limitá e abilidat di Spiritu Santu pa impreshoná e kosnan di eternidat riba nos mente i ta redusí e mahestat di Dios na un estatua sin bida. A introdusí e imágennan akí den kristianismo den di kuater siglo pa hasi kristianismo mas aseptabel pa e poblashon pagano. Desafortunadamente, hopi bia ta duna e imágennan akí santidat i homenahe ku ta pertenesé na Dios so, loke ta hasi henter e kos spiritualmente degradante.

“E mensahe di Revelashon 14, anunsiando e kaida di Babilonia, mester apliká na kurpanan religioso ku un tempu tabata puru i a bira korupto. Ya ku e mensahe akí ta sigui e spièrtamentu di e huisio, mester dun’é den e último dianan; p’esei e no por referí na e Iglesia Romano so, pasobra e iglesia ei tabata den un kondishon kaí pa hopi siglo.”—Ellen G. White, The Great Controversy, p. 383.

Daniel 3, e storia di e tres hebreonan ku a ordená pa “adorá e imágen di oro ku rei Nabukodonosor a lanta” (Dan. 3:5, NKJV) den Babilonia antiguo, ta para komo un símbolo, un modelo, di loke lo sosodé ora Babilonia spiritual den e último dianan, lo imponé adorashon di un “imágen” falsu tambe (lesa Rev 13:15 ; Rev. 14:9,11 ; Rev. 16:2 ; Rev. 19:20 ; Rev. 20:4). Ki interesante ta ku e mandamentu ku e tres hebreonan lo a violá, e di dos mandamentu (Eks. 20:4,5), tabata un di e dos mandamentunan ku e poder akí, deskribí un otro kaminda komo tratando “di kambia dianan fihá i leinan” (Dan. 7:25), a manipulá kuné.

Kiko tabata e otro mandamentu ku el a manipulá kuné? Naturalmente, e di kuater mandamentu, ku, manera nos a mira i lo mira atrobe, ta den sentro di henter e kuestion di adorashon i lo ta sentral den e krísis final ora nos enfrentá e kuestion di sea nos lo adorá Esun kende a “traha shelunan i tera, laman i tur loke tin den nan, i a sosegá riba e di shete dia” (Eks. 20:11, NKJV; lesa tambe Rev. 14:7, NKJV), òf e bestia i su imágen.

Preguntanan pa Diskushon:

Ki relashon e Toren di Babel tin ku Babilonia spiritual moderno? Kiko ta e similaridatnan entre nan dos?

Kon bo ta harmonisá dos idea kontrali? Hesus a duna outoridat na Su iglesia, pero ta peligroso pa pone nos eksperensia religioso den mannan di kualke lider spiritual. Kiko ta e límitenan di outoridat di iglesia?

Kon nos por siña ku idolatria, un di e pikánan di Babilonia, no ta solamente bùig pa estatuanan? Den ki formanan asta protestantnan por kai den idolatria?

Kiko ta algun otro paralelo ku bo por haña den Daniel 3 i e adorashon fòrsá einan, i di loke ta spièrta nos den e último dianan?