Satanas su Ultimo Engañonan

27 di mei

Lesa pa e Estudio di e Siman Akí:

Rev. 12:9 ; Rev. 16:13,14 ; 1 Tes. 4:16,17 ; Ezek. 8:16 ; Ezek. 20:1–20 ; Rev.18:4,5.

Versíkulo di Memoria:

“Santifiká nan den e bèrdat; Bo palabra ta bèrdat.” (Juan 17:17, NKJV).

Tabata un di e maintanan presioso den sèptèmber na Chicago. Segun ku solo tabata sali riba Lake Michigan i hendenan ku ta bai trabou diariamente tabata batayá ku pegamentu di tráfiko riba e outopistanan Kennedy i Eisenhower, i muchanan tabata riba kaminda pa skol, un storia hororoso a kuminsá surgi ku a hinka miedu den kurason di habitantenan di Chicago. Hendenan tabata bira trágikamente malu, i algun tabata muriendo djis un par di ora despues di a bebe kápsulanan di Tylenol. Ora a tèst, kada un di e kápsulanan a proba di ta kontaminá ku potassium cyanide, un venenu mortal. Un individuo trastorná a mòrs ku e remedi. Te na e dia akí, nos no sa ta ken a hasi esaki.

Manera nos a mira, Revelashon ta spièrta nos ku e “habitantenan di tera” lo bebe un venenu mortal yamá e “biña di Babilonia”. Tin doktrinanan i siñansanan falsu ku, na final, lo hiba solamente na morto. Sinembargo, no ta laga mundu sin e antídoto, e protekshon, kontra e venenu spiritual akí: e mensahenan di e tres angelnan.

Den e lès di e siman akí nos lo sigui wak no solamente e engañonan di Babilonia sino e plan di Hesus pa salba nos for di nan i e morto ku, di otro manera, nan lo a trese.

Den e lès di e siman akí, nos lo studia e dos muhénan di Revelashon akí i proba, mas profundamente, e konflikto entre bèrdat i eror.

* Studia e lès di e siman akí pa prepará pa Sabat, 3 di yüni.

Den konteksto di e último dianan, Hesus a ekspresá un spièrtamentu poderoso: “Pasobra Kristunan falsu i profetanan falsu lo lanta, i lo hasi señalnan i maravianan pa gaña, si ta posibel, asta e skohínan.” (Marko 13:22). Ken ta e “skohínan”? Mas despues E ta bisa: “I E lo manda Su angelnan ku un zonidu duru di tròmpèt i nan lo reuní Su eligínan for di e kuater bientunan, for di esun ekstremo di shelu te na e otro.” (Mat. 24:31). Un tiki spantoso, no ta bèrdat, ora e engaño den e último dianan lo ta asina grandi ku asta esnan fiel lo ta den peliger di keda engañá?

Lesa Revelashon 12:9. Ken Satanas ta gaña? Kon nos ta komprendé e palabranan akí?

Opviamente, Dios ta bai tin algun hende fiel den e último dianan, manera E tabatin a lo largu di tur e siglonan. Sinembargo, e fraseologia akinan ta mustra presis kon ekstenso Satanas su engaño realmente ta.

Lesa Proverbionan 14:12. Ki spièrtamentu poderoso ta presentá akinan?

Hopi bia ta bisa hende pa sigui nan propio konsenshi pa asina determiná pa nan mes loke ta korekto òf robes, bon òf malu, i e ora ei biba di akuerdo ku esei. Pero Skritura ta bisa ku nos tur ta pekador, tur ta korupto (Jer. 17:9, Rom. 3:9–18), i asina pa konfia nos propio sintimentunan ta kaso un manera garantisá pa, trempan òf lat, tin e robes i asta hasié robes. A traves di siglonan hendenan totalmente konvensí di e eksaktitut di nan kousa, a kometé un kantidat di maldat. Es desir, nan a sigui e “kaminda ku ta parse korekto” na nan.

En kambio, nos mester hundi nos mes den e Palabra di Dios, i dor di Su Palabra, miéntras nos ta someté na Spiritu Santu, siña bèrdat for di eror, korekto for di robes, bon for di malu. Si laga nos pa nos mes kuenta, òf asta na nos mes sentido, nos por bira víktima fásil di e engañonan di Satanas.

Pensa bon riba ehèmpelnan di hendenan ku a aktua basá riba loke nan mes a kere ku tabata korekto, òf asta loke nan a kere ku tabata boluntat di Dios, pero a hasi kosnan malu. Kiko nos por siña di e eventonan trágiko akí?

Lesa Rev. 16:13,14 i Revelashon 18:2,23. Ki referensianan na spiritismo bo ta haña den e versíkulonan akí?

Ekspreshonnan manera e “lugá di biba pa demoño” i e “spiritu di demoñonan” i “bruheria”, tur ta indiká aktividat demoniako. Nada straño ku a spièrta nos ku, di e dos gran engañonan den e último dianan, un lo ta “inmortalidat di e alma” (lesa Ellen G. White, The Great Controversy, p. 588).

Naturalmente, esei ta asina fásil pa mira awendia. Asta den e mundu kristian, e idea di ku e alma ta inmortal ta nada mas sino doktrina kristian básiko. Hopi kristian ta kere ku, na morto, e salbánan ta bula bai shelu, i esnan pèrdí ta baha bai den fièrnu. Kuantu biaha, por ehèmpel, despues ku e gran evangelista Billy Graham a muri, nos tabata tende ku “Billy Graham awor ta seif den shelu, den e brasanan amoroso di Hesus”, òf kosnan asina? Tur ora ta siña e tipo di kosnan akí for di púlpitonan, den klasnan, i, spesialmente, na entieronan.

Lesa Eklesiastés 9:5 ; Job 19:25–27 ; 1 Tesalonisensenan 4:16,17 ; i Revelashon 14:13 . Ki instrukshon kla Dios a duna Su pueblo tokante bida despues di morto, i unda nos ta haña nos speransa?

Un di e pilánan di engaño babilóniko ta un komprendementu falsu di morto, ku, sentrá riba e idea di inmortalidat di e alma, ta prepará e kaminda pa e influensia engañoso di spiritismo. Si bo ta kere ku e mortonan, den algun forma, ta sigui biba i kisas asta por ta kapas di komuniká ku nos, e ora ei ki protekshon bo tin for di kualke di e numeroso engañonan ku Satanas tin? Si un hende ku bo a kere tabata bo mama òf yu morto, òf un otro ser kerí, di ripiente mester a aparesé i papia ku bo, kon fásil lo tabata pa bo sentidonan gaña bo? Esaki a sosodé den pasado, ta sosodé awor, i, siguramente, segun ku nos ta aserká e dianan final mes, lo sosodé atrobe. Nos úniko protekshon ta pa para firmemente ankrá den loke Beibel ta siña i tene duru na e siñansa bíbliko tokante morto komo un soño te na e segundo binida di Hesus.

Kua ehèmpelnan di spiritismo moderno ta eksistí den bo kultura awendia? Di kon pegamentu firme na e Palabra di Dios ta nos úniko protekshon?

Adorashon di solo tabata prominente na Egipto, Asiria, i siguramente Babilonia. Den su buki The Worship of Nature [Adorashon di Naturalesa], James G. Frazer ta hasi e opservashon akí: “Na Babilonia antiguo nan tabata adorá solo for di antigwedat pre históriko.”—Tomo 1, p. 529. E por parse sorprendente, pero tin biaha adorashon di solo babilóniko tabata influensiá e adorashon di Dios su pueblo den Tèstamènt Bieu.

Lesa Ezek. 8:16 i 2 Reinan 23:5,11. Kiko e profetanan a skirbi tokante e influensia di adorashon di solo na Israel i Huda? (Lesa tambe Rom. 1:25.)

Profeta Ezekiel, un kontemporáneo di Daniel, a pinta algun di Dios su pueblo ku nan lomba den direkshon di e tèmpel di Dios, adorando e solo den direkshon pariba. Na lugá di adorá e Kreador di solo, nan tabata adorá e solo en kambio.

Den Revelashon 17 Juan ta deskribí un tempu ora e prinsipionan di Babilonia, inkluyendo adorashon di solo, lo a drenta den e iglesia kristian durante un era di kompromiso. E kombershon kasual di Constantino, den e promé parti di e di kuater siglo, a kousa gran goso den e Imperio Romano. Constantino tabatin un afinidat fuerte pa adorashon di solo. Edward Gibbon, e historiadó renombrá, ta skirbi: “Tabata selebrá Solo komo e guia i protektor invensibel di Constantino.”—The History of the Decline and Fall of the Roman Empire, kapítulo 20. Na aña 321 despues di Kristu, Constantino a pasa tambe e promé “lei di djadumingu”. E anunsio tabata deklará: “Riba e dia venerabel di Solo laga e Magistradonan i e hendenan ku ta biba den e siudatnan sosegá, i laga tur tayer ta será.”—Edict of Constantine, A.D. 321. Esaki no tabata un lei ku a imponé wardamentu di djadumingu pa tur e súpditonan di Constantino, pero el a fortifiká e wardamentu di djadumingu den mente di e poblashon romano.

Tabata den dékadanan ku a sigui ku emperadornan i papanan a sigui, pa medio di dekretonan di estado i konsehonan di iglesia, establesé djadumingu komo e dia singular di adorashon, loke e ta keda awendia tambe pa mayoria kristian. Ki un ehèmpel poderoso di e bèrdat duru ku djis pasobra mayoria di hende ta kere den un kos, òf ta praktik’é, no ta hasié korekto.

Wak rònt kon komun adorashon di djadumingu ta den iglesianan kristian. Kiko e echo akí mester siña nos tokante kon penetrante e engañonan di Satanas ta? Atrobe, manera ku estado di e mortonan, kiko ta nos úniko salbaguardia?

E mensahe di e di dos angel den Revelashon 14 ta “Babilonia a kai, el a kai”. Den Revelashon 17, e muhé identifiká komo Babilonia spiritual, bistí na püs i kòrá kimá, ta kore riba un bestia kòrá kimá, ta pasa su kopa di biña rònt, i ta hasi mundu burachi ku eror. Iglesia i estado ta uni. Falsedat ta prevalesé. Demoñonan ta obra nan milagernan pa gaña. E mundu ta lansa den su konflikto final.

Na mes momento, ta kalumniá, ridikulisá, oprimí, i persiguí e pueblo di Dios, pero den Kristu i a traves di e poder di Spiritu Santu, nan ta firme den nan kompromiso. Tur e podernan di fièrnu i e forsanan di maldat no por kibra nan lealtat na Kristu. Nan ta sigur den djE. E ta nan “refugio i fortalesa, un pronto ousilio den tempu di angustia” (Salmo 46:1, NKJV).

Dios ta yamando un pueblo di tempu di fin bèk na fieldat na Su Palabra. Hesus a resa: “Santifiká nan den e bèrdat; Bo palabra ta bèrdat.” (Juan 17:17). E bèrdat di Dios su Palabra, no opinion òf tradishon humano, ta e Strea di Nort pa guia nos den e ora krítiko akí di historia di tera.

Ata un deklarashon remarkabel pa Dr. Edward T. Hiscox, outor di Standard Manuel for Baptist Churches. Na aña 1893 el a dirigí su mes na un grupo di sentenar di pastornan baptista i a shòk nan ora el a splika kon djadumingu a yega den iglesia kristian.

“Ki un duele ku e [djadumingu] ta bini stigmatisá ku e marka di paganismo, i batisá ku nòmber di e dios di solo, despues adoptá i sanshoná pa e apostasia papal, i lagá atras komo un herensia sagrado pa protestantismo!”—Edward Hiscox, promé ku un konferensia di pastornan na New York, 13 di novèmber 1893.

Lesa Ezekiel 20:1–20. Kiko ta e esensia di Ezekiel su mensahe akinan, i kon e Sabat ta pas ku e yamada na fieldat akí?

Ezekiel 20 ta un apelashon serio pa Israel bandoná práktikanan pagano i pa adorá e Kreador na lugá di nan diosnan falsu, den e kaso akí e “ídolonan di Egipto”. Den e mensahe di e tres angelnan Dios ta hasiendo un apelashon similar pa “adorá e Kreador”, pasobra “Babilonia a kai” I tambe, manera nos sa, e Sabat, i fieldat na dje, lo hunga un ròl grandi den eventonan final.

Ki lèsnan nos por saka pa nos mes for di loke a skirbi den Ezekiel 20:1–20? (Lesa tambe 1 Kor. 10:11.)

E muhé na kòrá kimá i püs, koriendo riba e bestia kubrí ku kòrá kimá, a pasa su kopa di biña rònt, i e mundu ta burachi ku e doktrinanan falsu di Babilonia. Papiando di e “biña di Babilonia”, Ellen G. White ta hasi e komentario kla akí: “Kiko e biña ei ta? Su doktrinanan falsu. El a duna mundu un Sabat falsu na lugá di e Sabat di e di kuater mandamentu, i a ripití e falsedat ku Satanas a bisa Eva promé den Eden, e inmortalidat natural di e alma.”—Ellen G. White, Review and Herald, 6 di desèmber 1892. E siñansanan eróneo akí a gaña miónes. Komo resultado, Dios ta dunando Su pueblo, ketu bai ankrá den eror, un último apelashon di último dia.

Lesa Rev.18:4,5. Kiko ta Dios su apelashon na multitutnan ku ainda ta den organisashonnan religioso kaí?

Manera nos a mira kaba (pero ta bale la pena ripití), hopi di Dios su pueblo ta den organisashonnan religioso ku a komprometé siñansanan bíbliko. Nan no ta komprendé e bèrdatnan di Skritura. Dios su apelashon amoroso ta dirèkt: “Sali fo'i dje, mi pueblo! Sino boso ta bira kómplise di su pikánan i e plaganan ku ta bini riba dje, lo afektá boso tambe” (Rev.18:4).

Lesa 1 Juan 3:4 i kompar’é ku Romanonan 14:23. Kon Beibel ta definí piká? Kon e pasashinan di Beibel akí ta harmonisá?

Piká ta transgreshon òf kibramentu di e lei di Dios. E úniko manera ku kualke hende por obedesé e lei ta pa medio di fe den e poder di e Kristu bibu. Nos ta sernan humano débil, frágil, basilante, pekaminoso. Pa medio di fe, ora nos aseptá Kristu, Su grasia ta ekspiá pa nos pasado i ta empoderá nos presente. E ta duna nos “grasia i apostolado pa trese obediensia” (Rom. 1:5, NKJV). Shelu su apelashon na Su pueblo den iglesianan ku no ta respetá i obedesé e lei di Dios ta pa sali afó pa medio di fe. Su apelashon na atventistanan den kongregashonnan ku ta warda Sabat ta pa bandoná tur intentonan humano egoséntriko na obediensia i biba bidanan santu pa medio di fe den e grasia di Kristu, ku ta libra nos di kondenashon di piká i dominio di piká. I meskos ku Israel su fieldat na e lei (Deut. 4:6) lo tabata un testimonio poderoso na e mundu, nos fieldat tambe por ta un testimonio poderoso i yuda guia hende for di Babilonia.

“E gran Babilonia den e buki di Revelashon ta señalá, den un sentido spesial, e religionnan apóstata uní na siere di tempu. . . . ‘E Gran Babilonia’ ta e nòmber pa medio di kua Inspirashon ta referí na e gran tripel union religioso di e papado, protestantismo apóstata, i spiritismo. . . . E término ‘Babilonia’ ta referí na e organisashonnan mes i nan lidernan, no asina tantu na e miembronan komo tal. Ta referí na e últimonan komo ‘hopi awanan’ (Rev. 17:1,15).”—The SDA Bible Commentary, tomo 7, p. 851, 852.

“A traves di e dos gran eror, e inmortalidat di e alma i santidat di djadumingu, Satanas lo trese e hendenan bou di su engañonan. Miéntras e promé ta pone e fundeshi di spiritismo, e último ta krea un laso di simpatia ku Roma.”—Ellen G. White, The Great Controversy, p. 588.

Den Tèstamènt Bieu, e spiritunan di e mortonan tabata hunga un ròl importante den religion babilóniko. E babilonionan tabatin un kerensia fuerte den e doktrina di inmortalidat di e alma. Nan tabata kere ku na morto e alma tabata drenta den e mundu di spiritu. E konsepto di e alma inmortal ta straño na e siñansanan di Skritura. The Jewish Encyclopedia ta identifiká klaramente e orígen di e idea falsu di inmortalidat di e alma. “No ta siña e kerensia ku e alma ta sigui ku su eksistensia despues di disolushon di e kurpa . . . niun kaminda den Skritura Santu. . . . E kerensia den inmortalidat di e alma a bini na e hudiunan for di kontakto ku pensamentu griego i prinsipalmente a traves di e filosofia di Plato, su eksponente prinsipal, ku misterionan di Orphic i eleusinio den kua vishonnan babilóniko i egipsio tabata mesklá di forma straño, a hib’é na dje.”— Kaufmann Kohler, The Jewish Encyclopedia, “Immortality of the Soul,” (1906).

Preguntanan pa Diskushon:

Dikon un komprendementu di e bèrdat tokante morto ta asina krítikamente importante? Di kiko e ta protegé nos? Di kon e ta asina di alivio tambe?

Algun di e engañonan di diabel ta opvio, otronan mas sutil. Kon nos por evitá ku kualke di nan ta gaña nos?

Den klas, papia tokante e pregunta ku nos a toka den e estudio di djadumingu, tokante esnan ku ta hasi malu keriendo ku nan ta siguiendo e boluntat di Dios, manera ta revelá den Beibel. Kon nos ta splika esaki? Ki ròl e lei di Dios mester hunga den e splikashon?