Iluminá Ku e Gloria di Dios

17 di yüni

Lesa pa e Estudio di e Siman Akí:

1 Tes. 5:1–6 ; Juan 8:32 ; Rev. 18:1 ; Rev. 4:11 ; Eks. 33:18,19 ; Rev. 5:6,12 ; Rev. 13:8.

Versíkulo di Memoria:

“Despues di e kosnan aki mi a mira un otro angel ta baha for di shelu, kende tabatin gran outoridat, i tera a keda iluminá ku su gloria” (Revelashon 18:1, NKJV).

Trempan òf lat, eventonan final lo desplegá. Eksaktamente ki ora, eksaktamente kon, no a bisa nos. Pero a bisa nos sufisiente. Algun tipo di legislashon ku ta imponé wardamentu di djadumingu, kontrali na warda e di kuater mandamentu, lo tuma lugá. Revelashon a revelá na nos e temanan krusial ku ta den wega, e hungadónan krusial enbolbí, i den liñanan grandi, el a bisa nos kiko lo sosodé ora, kontrali na adorashon di Esun “ku a traha shelu i tera i laman i fuentenan di awa” (Rev. 14:7), hendenan, tur “ku nan nòmber no a wòrdu skirbí desde e fundashon di mundu den e buki di bida di e Lamchi ku a wòrdu matá” (Rev. 13:8), lo adorá e bestia i su imágen. Den otro palabra, tur esnan ku a skohe pa sigui Señor Hesu-Kristu i obedesé Su mandamentunan, nan nòmbernan ta keda den e buki di bida. Kuantu mas mihó pa ta den e registro di Dios ku den e registronan di hende.

Dios a lanta Iglesia Atventista di Shete dia pa prediká e evangelio akí na e mundu. Por lo tantu, nos mester, nos mes, ta kombertí na e bèrdat manera e ta den Hesus, i pa ta transformá i hasí nobo pa medio di e “evangelio eterno” di Revelashon 14:6, ku ta sentrá riba e morto di Kristu pa nos, e siguransa di nos salbashon den djE.

* Studia e lès di e siman akí pa prepará pa Sabat, 24 di yüni.

Lesa 1 Tes. 5:1–6. Ki atvertensia apòstel Pablo ta duna nos enkuanto di e último dianan di historia humano?

Apòstel Pablo a urgi e kreyentenan na Tesalónika pa “keda lantá” i “ta bon na tinu” den konteksto di e segundo binida di Kristu. I si Pablo lo a bisa esei na e kreyentenan e tempu ei, kiko e lo a bisa nos awe?

El a deklará tambe ku nan tabata “yunan di lus” (1 Tes. 5:5) i ku nan no tabata den “skuridat, ku e dia ei” [e regreso di Kristu] (1 Tes. 5:4) lo a sorprendé nan “manera un ladron” (1 Tes. 5:4). Hesus a uza e ekspreshon pa “sea alerta” en konekshon ku orashon ferviente i sinsero (Mat. 24:42, Mat. 26:40,41). Keda lantá ta, pa ta spiritualmente alerta. Ta bon na tinu ta, pa ta serio tokante e tempunan ku nos ta bibando aden i di focus riba e kosnan ku realmente ta importá.

Ellen G. White ta añadí: “Nos ku konosé e bèrdat mester ta preparando pa loke pronto ta pa kuminsá riba mundu komo un sorpresa aplastante.”—Testimonies for the Church, tomo 8, p. 28.

I miéntras kisas e por ta un sorpresa pa e mundu, e no mester ta un sorpresa pa nos. Aunke nos no sa ki ora e lo sosodé, nos por mira sufisiente pa sa ku e ta biniendo, i ku awor, awe, ta e dia pa ta kla.

Repasá Daniel 2, i nota e sekuensia di reinonan ku a bini i a bai, eksaktamente manera a predesí. Kiko esaki mester siña nos tokante kon nos por konfia ku loke Dios bisa lo sosodé, enbèrdat lo sosodé?

Kristu a duna nos e mensahenan akí di último dia pa asina, sabiendo loke ta biniendo, nos por prepará p’e. E profesianan di Daniel i Revelashon, kombiná ku e don moderno di profesia, ta duna nos persepshon divino den loke ta biniendo riba e mundu akí. E Palabra profétiko di Dios ta splika den términonan general e historia di salbashon adelantá, i Daniel 2 ta proveé evidensia rashonal poderoso ku nos por konfia Dios.

Pablo ta bisa pa no “drumi” manera otronan ta hasi. Kiko esei ta nifiká, i kon nos por sa si, enbèrdat, nos ta drumiendo i, si nos ta drumiendo, kiko lo tin mester pa lanta nos?

Lesa Juan 8:32, Juan 7:17, i Juan 17:17. Kua promesanan Hesus ta duna enkuanto di konosé bèrdat i unda ta hañ’é?

Dios su último apelashon na Su pueblo ta pa hui e erornan di Babilonia i kana den e lus di bèrdat eterno hañá den Su Palabra. E klave na tur kos ta e Beibel. Tanten ku hende ta tene nan mes na e Beibel i sigui loke e ta siña, lo no gaña nan den e krísis final, partikularmente enkuanto di e Sabat.

E mensahe di e di dos angel ta apelá na nos pa aseptá bèrdat mas bien ku eror, Skritura mas bien ku tradishon, i e siñansanan di e Palabra di Dios mas bien ku e erornan di doktrina falsu.

E mensahe di e di tres angel, ku ta sigui e promé dos angelnan, ta presentá un spièrtamentu kontra e marka di e bestia. A lo largu di e profesianan di Beibel, un bestia ta representá un poder polítiko òf religioso. E bestia di laman di Revelashon 13 i 14 ta surgi for di Roma komo un sistema di adorashon mundial. Finalmente e poder romano akí ta ekstendé su influensia a traves di henter mundu i lo dirigí un movementu pa uni iglesia i estado. E meta lo ta pa logra unidat di mundu na un momento di konvulshon ekonómiko, katástrofenan natural, konfushon sosial, krísis polítiko internashonal, i konflikto global.

I, finalmente Estádos Unídos lo tuma mando den e union global akí. “A traves di e dos gran erornan, inmortalidat di e alma i santidat di djadumingu, Satanas lo trese e hendenan bou di su engañonan. Miéntras e promé ta pone e fundeshi di spiritismo, e último ta krea un laso di simpatia ku Roma. E protestantnan di Estádos Unídos lo ta di promé pa rèk nan mannan a traves di e golfo pa gara man di spiritismo; nan lo rèk a traves di e abismo pa tene man ku e poder romano; i bou di influensia di e union tripel akí, e pais akí lo sigui den e pasonan di Roma ora nan trapa riba e derechonan di konsenshi.”—Ellen G. White, The Great Controversy, p. 588.

E mensahenan akí ta konkluí ku un apelashon urgente pa e siguidónan fiel di Kristu pa warda e mandamentunan di Dios a traves di e fe bibu di Hesus ku ta biba den nan kurason (Rev. 14:12).

Kon bo ta komprendé e palabranan di Hesus ku “e bèrdat lo hasi boso liber”? Kiko esei ta nifiká? Kon e bèrdat a hasi bo liber? Kiko ta nifiká pa ta “liber” den e konteksto akí?

Dios a lanta un pueblo di último dia pa para riba e skoudernan di e gran Reformadónan di pasado ku e Beibel komo nan úniko kredo, Kristu so komo nan úniko fuente di salbashon, Spiritu Santu komo nan úniko fuente di fortalesa, i e regreso di nos Señor komo un kumplimentu di tur nan speransanan. Lo proklamá bèrdatnan, pa hopi tempu skuresé pa e skuridat di eror i tradishon, inkluyendo e berdadero Sabat di Beibel, na e mundu djis promé ku e regreso di nos Señor.

E mensahenan di e tres angelnan a duna lus na e movementu di último dia akí pa kompletá e Reforma i pa partisipá huntu ku Kristu den terminá Su obra riba tera. E gran profesianan di e último buki di Beibel ta revelá un movementu divino di destino ku ta surgi di desapunto pa proklamá e último mensahe di Dios na e mundu. Revelashon 14 ta deskribí un iglesia mundial ku ta kubri henter e planeta ku e bon notisia di e evangelio eterno.

Den Revelashon 18 un di kuater angel ta djòin e tres angelnan di Revelashon 14. E angel akí ta duna poder na e proklamashon di e tres angelnan pa asina e “tera [a keda] iluminá ku gloria [di Dios]” (Rev. 18:1). Kapítulo 18 ta enfoká riba e eventonan importante ku ta hiba na e klímaks di historia humano i e triunfo final, e último, di e evangelio.

Lesa Rev. 18:1. Kua tres kosnan Juan ta konta nos tokante e angel akí? (Lesa tambe Hab. 2:14.)

E angel ku ta bini abou for di e presensia glorioso di Dios den e sala di trono di e santuario tabata enkargá pa proklamá Dios su último mensahe di miserikòrdia i pa spièrta e habitantenan di tera di loke tabata biniendo riba planeta Tera.

E teksto ta bisa ku e angel ta bini ku “gran outoridat”. E palabra griego di Tèstamènt Nobo pa “outoridat” ta exousia. Hesus ta uza e palabra akí den e Evangelio di Mateo den harmonia ku e mandamentu di Su disipelnan bai. Den Mateo 10:1 Hesus ta duna Su disipelnan “outoridat” riba e prinsipadonan i podernan di maldat. E ta manda nan bai ku e poder divino pa ta viktorioso den e bataya entre bon i malu. Den Mateo 28:18,19 e ta bolbe manda nan bai, pero e biaha akí ku “tur outoridat” den shelu i riba tera pa bai i “hasi hende den tur nashon mi disipel”.

Finalmente, kon e kuestionnan den e último dianan (manera nan ta hasi realmente tur dia) tin komo resultado final outoridat? Ken su outoridat nos ta sigui: di Dios, di nos mes, di e poder di e bestia, òf di un otro hende? Ken su outoridat bo ta siguiendo aworakí?

Lesa Rev. 4:11, Rev. 5:12, Revelashon 19:1, i Revelashon 21:26. Ki palabranan ta asosiá ku e gloria di Dios ku ta yena e tera manera ta deskribí den Rev. 18:1?

E gran konflikto entre bon i malu den universo ta tambe tokante Dios su honor òf reputashon. Satanas, un angel rebelde, a deklará ku Dios ta inhustu, ku E ta demandá adorashon pero ta duna poko en kambio. E malbado ta deklará ku e lei di Dios ta restringí nos libertat i ta limitá nos goso.

Hesus su bida, morto, i resurekshon a refutá e mito ei. Esun kende a krea nos a baha den e pos di kolebra akí di e mundu akí pa redimí nos. Riba e krus, El a kontestá Satanas su akusashonnan i a demostrá ku Dios ta tantu amoroso komo hustu.

Enkantá pa Su amor, preokupá tokante Su honor, Su pueblo di tempu di fin ta revelá Su gloria, Su karakter amoroso, apnegá na un mundu egoista, impio, i tera ta iluminá pa e karakter di Dios.

Lesa Eks. 33:18,19. Kon Dios ta revelá Su gloria na Moises? Kiko ta e gloria di Dios?

E gloria di Dios ta Su karakter. Tera lo ta yená ku e gloria di Dios ora nos ta yená ku e amor di Dios i nos karakternan ta kambiá pa amor redentor.

Revelando Su amor den nos bida personal ta revelá Su gloria, Su karakter, na e mundu. E último mensahe pa proklamá na un mundu inundá den skuridat spiritual, hibá pa tres angel meimei di shelu ta “ ‘Teme Dios i dun'E gloria’ ” (Rev. 14:7).

No tin niun gloria pa nos mes den nos bon obranan, òf nos hustisia, òf nos bondat. “E mensahe di e hustisia di Kristu mester zona di un fin di tera te na e otro. . . . Esaki ta e gloria di Dios ku ta sera e obra di e di tres angel.”—Ellen G. White, Testimonies for the Church, tomo 6, p. 19. Ellen G. White ta skirbi tambe: “Kiko ta hustifikashon pa fe? E ta e obra di Dios di pone e gloria di hende den tera, i hasi pa hende e loke no ta den su poder pa hasi pa su mes.”—Testimonies to Ministers and Gospel Workers, p. 456.

Niun gloria pa nos mes pero, sí, gloria na Dios en kambio.

Tin hopi símbolo den Revelashon, símbolonan bíbliko di importansia; es desir, un dragon den shelu (Rev. 12:3,4,7), angelnan bulando meimei di shelu (Rev. 14:6), un muhé koriendo riba un bestia kòrá kimá (Rev. 17:3), etcetera. Nan ta den e Palabra di Dios; Spiritu Santu a inspirá Juan pa pone nan einan, i nan tin ròlnan importante den revelá bèrdat na esnan ku lesa e palabranan di e buki akí i hasi nan, pasobra, manera e ta bisa: “Bendishoná ta esun ku lesa i esnan ku tende e palabranan di e profesia, i ku paga atenshon na e kosnan ku ta pará skirbí den djé; pasobra e tempu ta serka.” (Rev. 1:3).

Tin, sinembargo, un otro imágen ku ta paresé, bes tras bes, den henter e buki di Revelashon. Kiko e imágen ta, i kiko e ta representá?

Lesa Rev. 5:6,8,12; Revelashon 7:17; Revelashon 14:1; Revelashon 15:3; Revelashon 19:7; Revelashon 21:22,23; i Revelashon 22:1,3. Kiko ta nifikashon di e simbolismo di e lamchi, i di kon e lo ta paresé asina tantu biaha den e buki di Revelashon?

Naturalmente, manera e promé palabranan di e buki ta bisa, esaki ta e revelashon “di Hesu-Kristu”. I no solamente un Lamchi, sino un Lamchi “matá” (Rev. 5:6,12; Rev. 13:8.). Es desir, Hesu-Kristu krusifiká. Aki tin e kurason i alma, no solamente di henter Beibel, sino di e buki di Revelashon i di e mensahenan di e tres angelnan. Nos no por ta fiel na nos yamada, nos no por hasi e obra ku Dios a lanta e iglesia akí pa hasi, a ménos ku nos tin e Lamchi, e Lamchi matá, Hesus krusifiká, un sakrifisio pa nos pikánan, komo e punto di enfoke di nos mensahe.

“Nos mester pone, intenshonalmente, e Lamchi matá den sentro mes di nos doktrinanan i mishon i den sentro di tur sermon ku nos prediká, kada artíkulo ku nos skirbi, tur orashon ku nos hasi, tur kantika ku nos kanta, tur estudio di Beibel ku nos duna, i den tur kos ku nos hasi. Laga e amor revelá pa e Lamchi riba e krus transformá e manera ku nos ta trata otro i move nos pa tambe preokupá pa e mundu.”—Ángel Manuel Rodriguez, “The Closing of the Cosmic Conflict: Role of the Three Angels’ Messages,” p. 70.

Es desir, meimei di e metáfora di bestianan peligroso, di un dragon ku ta hasi guera, di plaganan, di persekushon, i di e marka di e bestia, ta keda dilanti i meimei e Lamchi, e Lamchi matá. I E so, i loke El a hasi pa nos, ta hasiendo aworakí, i lo hasi promé ku tur kos kaba, E ta, finalmente, loke e mensahenan di e tres angelnan ta trata di dje.

Dikon mantené e Lamchi matá den sentro di nos mensahe ta krusial, no solamente pa guia otronan na dje, sino tambe pa bo propio bida spiritual?

“Sirbidónan di Dios, ku nan karanan iluminá i briando ku konsagrashon santu, lo pura di lugá pa lugá pa proklamá e mensahe for di shelu. Pa medio di míles di bosnan, riba henter tera, lo duna e spièrtamentu. Lo hasi milagernan, lo kura esnan malu, i señalnan i maravianan lo sigui e kreyentenan. Satanas tambe ta obra, ku maravianan engañoso, asta tresiendo kandela abou for di shelu den bista di hende. Revelashon 13:13. Di e manera akí lo hiba e habitantenan di tera na tuma nan posishon.

“Lo hiba e mensahe no asina tantu pa medio di argumento manera a traves di e konvikshon profundo di e Spiritu di Dios. A presentá e argumentonan. A sembra e simia, i awor e lo sprùit i karga fruta. E publikashonnan distribuí pa obreronan mishonero a ehersé nan influensia, sinembargo, a stroba hopi, ku nan mente tabata impreshoná, di komprendé e bèrdat kompletamente òf di rindi obediensia. Awor e rayonan di lus ta penetrá tur kaminda, ta mira e bèrdat den su klaridat, i e yunan honesto di Dios ta kòrta e lasonan ku tabata tene nan. Konekshonnan familiar, relashonnan di iglesia, ta sin poder pa stòp nan awor. Bèrdat ta mas presioso ku tur sobrá kos. Apesar di e agensianan kombiná kontra e bèrdat, un gran kantidat ta tuma nan posishon na banda di Señor.”—Ellen G. White, The Great Controversy, p. 612.

Preguntanan pa Diskushon:

Ellen G. White ta deklará ku “e mensahe di hustifikashon pa fe ta e mensahe di e di tres angel . . . . enbèrdat.”—Evangelism, p. 190. Kiko esei ta nifiká? Ki relashon hustifikashon pa fe tin ku e mensahenan di e tres angelnan?

Lesa Revelashon 14:12 atrobe. Kiko ta e diferensia entre warda e mandamentunan di Dios i legalismo? Ki ora obediensia ta bira legalismo? Den ki formanan un hende ku no ta warda e mandamentunan di Dios ainda por ta un legalista?

Ki kontesta bo por duna esnan ku ta kritiká nos ora nos papia tokante e bestianan feros i spièrtamentu spantoso ku nos ta haña den e buki di Revelashon? Ademas di e kontesta opvio, ku ta ku nos ta papia di nan pasobra, bon, nan tei, skirbí den e buki, ki otro kontestanan bo por duna?

Diskutí eventonan mundial aktual den klas. Kiko bo a mira ta sosodé ku por a yuda hiba na eventonan final? Kon nos ta pone un balanse entre ta konsiente di e tempunan ku nos ta biba aden pero no keda atrapá den spekulashon inútil tokante kosnan ku no a revelá na nos ainda?