Ekspiashon Horizontal: E Krus i e Iglesia

22 di yüli

Lesa pa e Estudio di e Siman Akí:

Efe. 2:11–22; Rom. 3:31; Rom. 7:12; Isa. 52:7; Isa. 57:19; Juan 14:27; 1 Kor. 3:9–17.

Versíkulo di Memoria:

“Ma awor den Kristu-Hesus boso, kendenan ántes tabata leu, a wòrdu tresí serka pa medio di e sanger di Kristu. Pasobra E mes ta nos pas, Kende a hasi tur dos grupo bira ún, i a tumba e muraya meimei ku ta separá.” (Efesionan 2:13,14, NKJV).

Bo ta un pagano, un griego, ku a siña apresiá e Dios di e hudiunan. De echo, bo a bandoná bo adorashon di hopi diosnan i a brasa Esun Dios berdadero. Segun ku bo ta traha bo kaminda a lo largu di e bunita pationan i kolumnanan kanalisá di e tèmpel di Herusalèm, e zonidunan di adorashon ta spièrta bo alabansa. Nèt e ora ei, sinembargo, bo ta haña bo mes konfrontá pa un barikada di piedra di kuater pia haltu. Grabá kada par di pia na latin i griego tin e mensahe akí: “Niun estranhero por drenta denter di e barera i kurá rònt di e tèmpel. Kualke hende ku gara hasiendo esei lo tin ku kulpa su mes pa su morto ku sigui.” Na e momento ei bo ta sinti bo será pafó, apartá, i separá.

Den Efesionan 2:11–22, Pablo ta mira e krus di Kristu komo hasiendo un diferensia dramátiko, destruyendo bareranan i murayanan asina. Vertikalmente, e krus ta disolvé apartamentu, rekonsiliando hende ku Dios. Horizontalmente, e ta rekonsiliá hende ku otro. E krus ta kita enemistat i ta trese pas entre hudiu i pagano, hasiendo di nan “un humanidat nobo” (Efe. 2:15,NIV). Huntu, nan ta bira un tèmpel nobo, “un lugá kaminda Dios ta biba pa medio di Spiritu Santu” (Efe. 2:22, ESV).

Kiko e bèrdat akí ta nifiká pa nos awe?

* Studia e lès di e siman akí pa prepará pa Sabat, 29 di yüli.

Kompará Efesionan 2:1–3, Pablo su deskripshon anterior di e pasado pagano di e destinatarionan, ku Efesionan 2:11, 12. Kiko e ta asentuá den su deskripshon fresku di nan pasado?

Paganonan ku awor tabata kreyentenan den Kristu i miembronan di Su “kurpa,” e iglesia, un tempu tabata totalmente separá for di Israel i e salbashon ku Dios tabata ofresé. Pablo ta husg’é importante pa nan “kòrda” (Efe. 2:11) e pasado akí. Nan tabata e tempu ei “sin Kristu,” Esun Ungí, e Mesias di Israel. Nan tabata “strañeronan di e mankomunidat [e estado òf pueblo] di Israel.” I nan tabata “strañeronan di e aliansanan di promesa,” inkonsiente di e promesanan di salbashon ku Dios a ofresé a traves di historia di salbashon. E separashon for di Israel i e salbashon ofresé a traves di dje tabata nifiká ku un tempu nan tabata “sin speransa” i tabata “sin Dios den e mundu” (Efe. 2:12).

Tambe, den nan eksistensia pasá, paganonan tabata atrapá den un pleitu grandioso entre nan mes i e hudiunan. Pablo ta duna un sentido di e odio establesé akí ora e referí na un síntoma di dje, insulto. Hudiunan tabata referí na paganonan ku burla manera “esnan insirkunsidá” i paganonan tabata referí na hudiunan ku igual menospresio komo “esnan sirkunsidá” (Efe. 2:11).

Efesionan 2:13, sinembargo, ta mustra na algu radikalmente diferente awor. Pablo a skirbi: “Pero awor den boso union ku Kristu-Hesus, boso, ku ántes tabata te leu aya, a hala serka di Dios pa medio di sanger di Kristu”.

Ora Pablo ta deskribí e paganonan komo un tempu “te leu aya,” e ta fia for di Isaias 57:19: “Pas, pas pa esun ku ta leu i pa esun ku ta serka, i lo Mi kur'é,’ SEÑOR ta bisa” (kompará Efe. 2:17,18). Den Kristu i pa medio di Su krus, a trese kreyentenan pagano serka di tur loke nan tabata separá di dje, Dios, speransa, i nan rumannan hòmber i muhé hudiu. Aki tin e poderosamente bon notisia, impliká pa e deskripshon di Pablo: ku e krus di Kristu por kura e sker hanchu entre hudiu i pagano ta nifiká ku por resolvé tur nos pleitunan i divishonnan einan. E bon notisia akí ta invitá nos pa konsiderá e divishonnan ku ta eksistí den nos mes bida i den iglesia i pa reflekshoná riba e poder di e krus pa superá nan.

For di kua kondishon Hesus a redimí bo? Dikon lo por ta importante pa bo kòrda, ku algun regularidat, unda bo tabata ora El a haña bo i unda lo bo por tabata si E no a haña bo?

“Pasobra E mes ta nos pas, Kende a hasi tur dos grupo bira ún, i a tumba e muraya meimei ku ta separá, dor di abolí den Su karni e enemistat . . . asina . . . rekonsiliá nan dos den un solo kurpa ku Dios dor di e krus” (Efe. 2:14–16).

Kon Pablo ta deskribí e krus i e impakto di Kristu Su obra einan den kada un di e pasashinan akí den Efesionan? Kon lo bo a resumí loke Pablo ta bisa tokante e krus i kon e ta transformá nos relashonnan? (Lesa Efe. 1:7, 8; Efe. 4:32; Efe. 2:13, 14; Efe. 2:16; Efe. 5:2, 25.)

Den konteksto di nos pasashi pa e siman akí, Efesionan 2:11–22, e krus ta rindi tres gran bentaha pa kreyentenan:

1. paganonan, ku tabata “leu” for di Dios i Su pueblo, ta “hala serka” (Efe. 2:13) na tur dos, siendo awor yunan hòmber i muhé di Dios i rumannan hòmber i muhé di kreyentenan hudiu (Efe. 2:19);
2. e “hostilidat” (griego, echthran, “enemistat,” relatá na echthros, “enemigu”) entre kreyentenan hudiu i griego, mes a ser matá (Efe. 2:16). E krus di Kristu ta kita loke tabata parse di ta e estado permanente di hostilidat i guera den kua hudiunan i paganonan tabata enemigunan deklará (Efe. 2:17);
3. na lugá di hostilidat ta bin rekonsiliashon. Tabata propósito di Kristu pa “rekonsiliá nan dos den un solo kurpa ku Dios dor di e krus” (Efe. 2:16; kompará Kol. 1:19–22).

Kon rekonsiliashon ta? Kon ta sinti pa ta rekonsiliá? Imaginá bo alienashon severo entre un mama i yu muhé, unu ku a establesé a lo largu di un periodo di añanan. Imaginá bo ku disolvé e renkor akí den un ola di grasia i pordon i e reunion ku ta sigui entre nan dos. Esei ta rekonsiliashon. Ta eksperensiá rekonsiliashon na momento ku un miembro di iglesia pone un banda kualke problema ku ta dividí for di otro i ta rekonosé e otro miembro di iglesia komo un ruman hòmber òf muhé stimá, ku ta aseptá loke a ofresé. Rekonsiliashon no ta un término mekániko òf legal sino unu interpersonal ku ta selebrá e drechamentu di relashonnan kibrá. Pablo ta riska imaginá Kristu Su obra poderoso riba e krus komo unu ku ta impaktá e relashonnan, no solamente entre individuonan, sino tambe gruponan di hende. E ta imaginá su mes ku e ta invadí nos bida i ta destruí nos divishonnan, i ta disolvé nos pleitunan, i ta renobá nos kompañerismo ku i komprendementu di otro.

Den ki formanan lo bo por tin mester di apliká e prinsipionan akinan pa ta rekonsiliá ku un otro hende? Kon bo ta kuminsá hasié?

Ki akshon Pablo ta bisa ku Kristu a tuma pa ku “e lei di mandamentunan ekspresá den ordenansanan”? Dikon El a tuma e akshon akí? (Lesa Efe. 2:14, 15.)

Pablo probablemente ta aludí na e balustrada òf kurá ku tabata rondoná e korte di Israel den e tèmpel di Herodes, ku su menasa di morto. Pablo ta imaginá su mes e muraya akí biniendo abou i paganonan hañando akseso total pa adorá Dios (Efe. 2:18). Kualke muraya asina, Pablo ta bisa, e Krus ta kita. Pasobra einan nos ta siña ku e dos pueblonan akí, hudiunan i paganonan, ta realmente un.

Algun hende ta kere ku Efesionan 2:14, 15 ta siña ku e Dies Mandamentunan, inkluso e mandamentu di Sabat, ta “abolí” òf “poné un banda” pa e krus. Sinembargo, den Efesionan, Pablo ta demostrá rèspèt profundo pa e Dies Mandamentunan komo un rekurso pa forma disipulado kristian. E ta sita e di sinku mandamentu (Efe. 6:2,3) i ta referí na otronan (p.e., e di shete, Efe. 5:3–14, 21–33; e di ocho, Efe. 4:28; e di nuebe, Efe. 4:25; e di dies, Efe. 5:5). Esaki ta riba un liña ku Pablo su afirmashonnan anterior tokante e lei (Rom. 3:31, Rom. 7:12). E ta referí na e mal uzo di e lei, pero e ta honra e lei mes i ta asumí su kontinuidat. P’esei, usa e versíkulonan akí pa abolí e Dies Mandamentunan, spesialmente den lus di tur e otro versíkulonan den Beibel tokante eternidat di e lei, ta klaramente un mal interpretashon di Pablo su intenshon akinan.

En kambio, kualke uzo di e lei pa habri un brùg entre hudiu i pagano i spesialmente pa ekskluí paganonan for di asosiashon kompletu meimei di e pueblo di Dios i akseso na adorashon, lo tabata maldishon pa Pablo i un mal uzo di e intenshon divino pa e lei. E “lei” den Efesionan 2:14, 15 ta sea e aspektonan seremonial di e lei ku tabata dividí hudiu for di pagano, representá den Pablo su frase kompliká, “e Lei di mandamentunan kontené den e ordenansanan”, òf e ta henter e sistema di lei di Tèstamènt Bieu manera a bin ta interpret’é, oument’é, i mal uz’é komo un brùg pa distansiá hudiunan for di paganonan.

Kua tenshonnan entre Atventistanan di Shete dia òf entre miembronan di e komunidat kristian mas amplio mester konfrontá i vense? Dikon nos amor komun di Kristu mester ta sufisiente pa vense e tenshonnan akí?

Kon Pablo ta resumí e ministerio di Kristu den Efesionan 2:17,18?

E konsepto di pas ta importante den Efesionan, ku e karta kuminsando i terminando ku bendishonnan di pas di “Dios nos Tata i Señor Hesu-Kristu” (Efe. 1:2; kompará Efe. 6:23). Anteriormente den Efesionan 2:11–22, Pablo a argumentá ku Kristu ta personifiká pas, “Pasobra E mes ta nos pas,” i ku Su Krus ta kre’é (Efe. 2:14– 16). Kristu no solamente ta destruí algu, e hostilidat entre hudiu i pagano (Efe. 2:14,15), E ta krea un humanidat nobo, marká pa relashonnan di rekonsiliashon i pas (Efe. 2:15–17). Un pas asina no ta djis ousensia di konflikto sino ta resoná ku e konsepto hebreo di shalom, e eksperensia di plenitut i bienestar, tantu den nos relashon ku Dios (Rom. 5:1) komo ku otronan.

Kon Pablo ta imaginá su mes kreyentenan partisipando den kompartí e mensahe di pas di Hesus? Efe. 4:3; Efe. 6:14, 15; kompará Rom. 10:14,15 ku Efe. 2:17–19, Isa. 52:7, Isa. 57:19.

E Evangelionan ta kontené ehèmpelnan di Hesus komo un predikador di pas. Den Su mensahenan di despedida na e disipelnan, E ta primintí nan, i nos, “Pas Mi ta laga pa boso; mi pas Mi ta duna boso” (Juan 14:27). I E ta konkluí, “E kosnan akí Mi a papia ku boso, pa den Mi boso por tin pas. Den mundu boso tin tribulashon, ma tene kurashi, Mi a vense mundu.(Juan 16:33). Despues di Su resurekshon, ora E paresé na e disipelnan, E ta bisa nan repetidamente, “Pas sea ku boso” (Juan 20:19,21,26).

Den Efesionan 2:17,18, Pablo ta perspikas pa indiká ku Kristu Su predikamentu di pas tabata ekstendé mas ayá di e tempu di Su ministerio terenal. El a “prediká pas” den presente na tantu “leu” (kreyentenan pagano promé ku nan a kombertí) i “serka” (kreyentenan hudiu, ESV; kompará Efe. 2:11–13). Despues di a aseptá e proklamashon akí, tur kreyente ta eksperensiá un bendishon profundo.

Kon nos por siña di ta predikadornan di pas, kontrali na kanalnan di konflikto? Na kua situashonnan, aworakí mes, bo por yuda trese sanashon?

Kua sèt kulminante di imágen Pablo ta uza den Efesionan 2:11–22 pa señalá unidat entre hudiunan i paganonan den iglesia?

Repasando Efesionan 2, nos ta kòrda ku versíkulonan 1–10 ta siña ku nos ta biba den solidaridat ku Hesus, miéntras versíkulonan 11–22 ta siña ku nos ta biba den solidaridat ku otronan komo parti di Su iglesia. E morto di Hesus tin benefishinan tantu vertikal den establesé nos relashon ku Dios (Efe. 2:1–10) komo esnan horizontal den seya nos relashonnan ku otronan (Efe. 2:11–22). A traves di e Krus, Hesus ta basha tur kos abou ku ta dividí kreyentenan pagano for di esnan hudiu, inkluyendo e mal uzo di e Lei pa asina hasi e abismo mas hanchu (Efe. 2:11–18). Hesus ta konstruí algu tambe, un tèmpel nobo maravioso komponé di kreyentenan. Paganonan, un tempu ekskluí di adorashon den e lugánan sagrado di e tèmpel, awor ta uni ku kreyentenan hudiu den bira un tèmpel nobo. Nos tur ta bira parti di Dios Su iglesia, “un tèmpel santu den Señor” (Efe. 2:19–22) i ta privilegiá pa biba den solidaridat ku Hesus i nos rumannan hòmber i muhé den Kristu.

Kon Pablo su uzo di e metáfora di e iglesia komo un tèmpel den Efesionan 2:19–22 ta kompará ku e uzonan den e siguiente pasashinan? 1 Kor. 3:9–17; 2 Kor. 6:14–7:1; 1 Pe. 2:4–8.

Pablo ta uza e metáfora di e iglesia komo tèmpel komo un imágen kulminante pa e inklushon total di paganonan den e iglesia. Un tempu prohibí di adorashon den e “Korte di Israel” den e tèmpel, awor nan no ta solamente haña akseso (Efe. 2:18) sino nan mes ta bira materialnan di konstrukshon pa un tèmpel nobo diseñá komo “un lugá kaminda Dios ta biba pa medio di Spiritu Santu” (Efe. 2:22).

Outornan di Tèstamènt Nobo ta uza e metáfora di tèmpel pa visualisá e santidat di e iglesia, Dios Su ròl den funda i krese e iglesia, i e solidaridat di kreyentenan denter di e iglesia. Ta uza e metáfora huntu ku lenguahe biológiko (lesa Efe. 2:21, kaminda e tèmpel ta “krese”), i hopi biaha ta asentuá e proseso di konstrukshon (lesa Efe. 2:22, “boso tambe ta wòrdu trahá konhuntamente,”). Mas bien ku un imágen státiko, e iglesia ta kapas pa rekonosé su identidat komo “e tèmpel di e Dios bibu” (2 Kor. 6:16).

Studia kuidadosamente e siguiente preámbulo na e preguntanan di diskushon menshoná akibou:

Kua ta e konteksto spesífiko den kua Pablo ta skirbi Efesionan 2:11–22 ora e ta deskribí e efektonan drástiko di e Krus riba relashonnan humano? E ta referí na e relashonnan entre kreyentenan hudiu i pagano ku huntu ta miembronan di e iglesia. E ta ekspresá un preokupashon opvio ku nan ta komprendé i biba nan status rekonsiliá kompartí komo kompañeronan di e famia di Dios (Efe. 2:19). Sinembargo, den konteksto di e karta komo un totalidat, Pablo ta demostrá un propósito radikal amplio. Su tema ta Dios Su plan final grandioso pa uni tur kos den Kristu (Efe. 1:9,10) i su ekstenshon ta inkluí “tur komunidat den shelu i riba tera” (Efe. 3:15).

Riba tur kos, e unidat di miembronan denter di e iglesia, e tópiko spesífiko ku e ta referí na dje den Efesionan 2:11–22, mes tin un propósito mas amplio ku Pablo ta revelá den Efesionan 3:10: “pa e sabiduria multiforme di Dios awor [ora El a krea e iglesia for di tantu hudiunan komo paganonan] por bira konosí pa medio di e iglesia na e gobernantenan i outoridatnan den e lugánan selestial”. Pa medio di aktualisá e unidat ku Kristu a gana riba e krus, kreyentenan mester señalá ku Dios Su plan final, pa uni tur kos den Kristu, ta na kaminda. Nan relashonnan rekonsiliá ta señalá Dios Su plan pa un universo unifiká den Kristu. Asina, ta apropiá pa wak Efesionan 2:11–22, poné den konteksto di Efesionan komo un totalidat, pa prinsipionan bíbliko enkuanto di un tópiko di importansia awe, relashonnan entre gruponan di hende òf rasanan.

Preguntanan pa Diskushon:

Kua prinsipionan bíbliko enkuanto di relashonnan étniko ta proveé den Efesionan 2:11–22? Kon e pasashi ta ofresé un aserkamentu distintivo i Kristoséntriko na e tema di kon miembronan di un grupo étniko mester relashoná ku miembronan di un otro?

Mirando Dios Su plan pa futuro di humanidat (Efe. 1:9,10; Efe. 2:11–22), kon importante ta pa iglesia dil ku su propio problemanan i konfliktonan interno entre rasanan?

Kua problemanan herebiendo entre gruponan étniko, ku demasiado biaha por ta skondí i ignorá, ta eksistí den bo komunidat? Kon bo iglesia kisas por hunga un ròl positivo den aktualisá e obra di unifiká ku Kristu ya a kumpli riba e krus? Kon abo kisas lo por partisipá den e obra ei?