Dios Su Mishon na Nos: Parti 1

30 di sèptèmber

Lesa pa e Estudio di e Siman Akí:

Gén. 3:9–15; Gén. 28:15; Eks. 29:43,45; Mat.1:18–23; Juan 1:14–18; Juan 3:16; Juan 14:1–3.

Versíkulo di Memoria:

“E ora ei SEÑOR Dios a yama e hòmber i a bis'é: ‘Unda bo ta?’ ” (Génesis 3:9, NKJV).

Mishon ta haña su orígen i propósito solamente den Dios. E mishon akí no a kuminsá ku e yamada di Abram (Gén. 12:1–4) òf ku e Eksodo (Eks. 12:31–42). E no a kuminsá ni ku Hesu-Kristu riba tera (Mat. 1:18–25) òf ku e biahenan mishonero di Pablo (Echonan 13:4–14:26). E mishon akí a kuminsá ku Dios Mes, ora El a trese e universo den eksistensia i mas despues a krea humanidat.

Den e Skrituranan nos ta mira un Dios kende intenshonalmente ta aserká i ta deseá di ta ku Su yunan. For di prinsipio E ta establesé un relashon ku Adam i Eva. Asta despues ku piká ta drenta, E ta kontinuá ku Su mishon, pero awor e ta pa restablesé Su relashon ku humanidat. Al final, Dios Su mishon lo kumpli (Revelashon 21–22), motibu pa kua nos mester ta motivá den e obra di proklamá e evangelio eterno na e mundu (Rev. 14:6, 7).

E fundeshi di kualke esfuerso mishonero, pa e motibu ei, mester ta sentrá riba un relashon ku e Kreador i ku e komprendementu apropiá di Su naturalesa i karakter mishonero. Pero promé ku nos komprendé e mishon di Dios, ta esensial pa komprendé e Dios di mishon mihó.

* Studia e lès di e siman akí pa prepará pa Sabat, 7 di òktober.

Dios a krea nos den Su imágen i semehansa. El a duna nos un mundu perfekto, i Su propósito tabata pa nos lo a biba den perfekto konekshon kunE, un relashon sentrá den Su atributo di mas presioso: amor. Pero pa amor ta real, Dios a duna nos tambe un regalo presioso: boluntat liber, e libertat pa skohe kua kaminda sigui. Naturalmente, Dios a duna instrukshonnan kla na Adam i Eva tokante e peliger i konsekuensianan mortal di desobedensia (Gén. 2:16, 17). Satanas, na su turno, di forma engañoso a konvensé Eva ku e por a kome e fruta di e palu di konosementu di bon i malu, pero sin niun resultado negativo. Al kontrario, el a afirmá ku nan lo tabata “meskos ku Dios, pasobra boso lo sa kiko ta bon i kiko ta malu (Gén. 3:5). Desafortunadamente, Eva a skohe pa kome i a duna e fruta na Adam, ku a hasi e mesun eskoho. Piká, e ora ei, a mancha e kreashon perfekto.

E momento ei a kambia e plan i propósito original di Dios pa e planeta Tera resien kreá. Awor mester a implementá e mishon di salbashon, ku Dios a diseñá “promé ku fundashon di mundu” (Efe. 1:4).

Lesa Génesis 3:9–15. Kua tabata e promé palabranan di Dios na Adam despues ku e i Eva a kai, i dikon e deklarashon ei ta asina signifikante teológikamente asta awe?

Naturalmente, Dios tabata sa eksaktamente unda nan tabata. Dominá pa miedu, Adam i Eva tabata esnan ku mester a mira kiko tabata pasando. Pero mester a konfrontá nan tambe, pa asina nan por a komprendé e konsekuensianan teribel di nan piká. Mester a derotá Satanas tambe. Pa esei, Dios e ora ei a kuminsá presentá Su mishon: e plan di redenshon (lesa Gén. 3:14,15), e úniko speransa di “rekonsiliá mundu ku Su mes” (2 Kor. 5:19).

Nos mester pone bon atenshon, sinembargo, na e echo ku promé ku e konfrontashon i e promesa di rekonsiliashon, Dios a bin buska humanidat kaí. Apesar di e situashon aparentemente desesperá, Dios ta trata básikamente dos tema den Su pregunta na Adam: nos estado kaí i Su naturalesa mishonero. Nos ta pèrdí i den nesesidat desesperá di salbashon. E ta Esun kende ta haña nos ku e determinashon pa salba i pa ta huntu ku nos.

A lo largu di historia, Dios ta sigui puntra: “Unda bo ta?” Den bo eksperensia personal, kiko esaki ta nifiká pa bo, i kon bo a kontest’E?

Lesa Génesis 17:7, Génesis 26:3, i Génesis 28:15. Kua tabata e enfoke prinsipal di e promesa di Dios na Abraham i su desendientenan den e versíkulonan akí?

Den e narativo di Tèstamènt Bieu, Dios ta sigui aktua di akuerdo ku Su naturalesa mishonero pa asina kumpli ku Su propósitonan. Por ehèmpel, despues di e diluvio e pueblo di Babel a disidí di reuní na un lugá pa konstruí un stat i un toren ku lo a alkansá te na e shelunan. Dios a intervení, konfundiendo nan idioma ku e meta pa plama nan rònt mundu (Gén. 11:1–9). Despues El a amplia Su mishon, yamando Abram (ku mas despues a bira Abraham) pa ta un kanal di Su bendishonnan na henter mundu (Gén. 12:1–3). E promesanan di Dios na Abraham i su desendientenan tabata multiforme, pero unu ta resaltá riba nan tur. Vários bia Dios a deklará básikamente na nan: “Lo Mi ta [bo] Dios.” “Lo Mi ta ku bo.” “Mi ta ku bo” (lesa Gén. 17:7,8; Gén. 26:3; Gén. 28:15).

Segun ku historia ta avansá, José ta terminá na Egipto, pero komo un instrumento di salbashon pa Su pueblo. Den kada stap di José su eksperensia, asta den e momentonan di mas difísil di su bida, Beibel ta afirmá ku “Señor tabata kuné” (Gén. 39:2, 21,23). Generashonnan mas despues, den kumplimentu di Su mishon, Dios e ora ei a manda Moises serka fárao komo e libertador di Su pueblo for di sklabitut egipsio. Durante Moises su “enkargo”, Dios a bis’é: “Lo Mi ta ku bo” (Eks. 3:12). Bes tras bes Yahweh a konfirmá Su deseo profundo di ta ku Su pueblo.

Lesa Eksodo 29:43,45. Kua tabata un di e propósitonan prinsipal di e santuario di Tèstamènt Bieu? Dios a disidí di ta ku Su yunan den un forma diferente. El a konfirmá na Moises Su anhelo pa biba meimei di e yunan di Israel den e konstrukshon di e tabernakel i e establesimentu di un sistema masha intenshonal i ku un propósito ku lo a mustra na e instrumento supremo di Su mishon: Hesu-Kristu. “A instituí e ofrendanan di sakrifisio, i e saserdosio di e sistema hudiu pa representá e morto i obra intermediario di Kristu. Tur e seremonianan ei no tabatin niun nifikashon, ni niun birtut, solamente si nan tabata relashoná ku Kristu.”—Ellen G. White, The Advent Review and Herald of the Sabbath, 17 di desèmber 1872.

Kua ta maneranan ku bo ta eksperensiá e presensia di Dios den bo bida?

Tèstamènt Bieu ta presentá kon e Kreador a kuminsá implementá un plan a traves di un pueblo ku tabata suponé di representá Su naturalesa i propósito na e mundu. Tur kos ku Dios a hasi tabata di akuerdo ku Su strategia mishonero. A traves di profeta Isaias, Dios a bisa: “ ‘Ami ta Dios, i no tin ningun manera Mi, Kende ta deklará e fin for di prinsipio, . . . bisando: Mi propósito lo wòrdu establesí, i lo Mi kumpli ku tur loke ta agradá Mi’ ” (Isa. 46:9, 10). Den Tèstamènt Nobo, sinembargo, Dios Su deseo pa ta ku humanidat ta tuma un dimenshon nobo. Pa medio di e enkarnashon di Kristu, loke tabata solamente un promesa den e Hòfi di Eden (Gén. 3:15) ta bira un realidat.

Lesa e narativo di e anunsio di nasementu di Kristu den Mateo 1:18–23. Kua kosnan esensial e relato akí ta bisa nos tokante Dios?

“Dios ku nos.” Emanuel. Dios a biba meimei di Su pueblo denter di e santuario, i awor E tabata biba ku nan den e persona físiko di Hesus di Názarèt. Di bèrdat, ku e nasementu di Hesus, Dios a presentá den formanan konkreto Su deseo kontinuo di ta ku nos den naturalesa i mishon: e Yu di Dios tabata kompletamente humano i kompletamente divino, i E ta Esun ku a afirmá: “ ‘Ami ta e kaminda, bèrdat i bida; niun hende no ta bin serka e Tata, sino pa medio di Mi’ ” (Juan 14:6).

Lesa Juan 1:14–18. Kiko bo por siña for di e enkarnashon di Kristu tokante Dios Su mishon na nos?

Dios a avansá ku Su mishon i e ora ei, pa medio di Hesu-Kristu, tabata presente den karni meimei di Su yunan. E “unigénito di e Tata, yen di grasia i bèrdat” (Juan 1:14), a kumpli ku e profesianan di Tèstamènt Bieu i, di akuerdo ku e plan divino, a bira un ku nos, Dios den karni humano. E Dios di mishon tabata sigui kumpli ku Su propósito.

Pensa kiko ta nifiká ku e amor di Dios pa nos ta asina grandi ku E lo a bin serka nos den nos propio humanidat. Kon nos mester respondé riba e amor akí, spesialmente den términonan di mishon na otronan?

E bida i ministerio di Hesus tabata Dios Su revelashon supremo. Den masoménos tres aña Dios tabata kapas pa revelá mas tokante ken E tabata i di kiko Su mishon tabata trata ku den tur kos ku El a hasi pa medio di kualke otro método den generashonnan previo. Kristu tabata e perfekto “imágen di Dios invisibel,” Esun den ken “henter e plenitut ta biba, . . . i a hasi pas dor di e sanger di Su krus” (Kol. 1:15,19,20). Den Kristu, a hasi e naturalesa mishonero di Dios kompletamente konosí. Hesus Mes a revelá Su mishon, bisando: “ ‘Pasobra e Yu di hende a bin pa buska i salba loke tabata pèrdí’ ” (Lukas 19:10).

Lesa i reflekshoná kuidadosamente riba Juan 3:16. Kon bo ta mira e amor i mishon di Dios interaktuando akinan?

Mas despues den Su ministerio, ora Hesus tabata aserká Su último siman di bida, e destino final di humanidat tabata den wega. E eventonan ku a tuma lugá durante e dianan ei a konektá e espektativa di pasado ku speransa pa futuro. Durante e selebrashon di Pasku, ku tabata mustra na libertat for di opreshon egipsio, Hesu-Kristu, e Dios enkarná, a entregá Su bida pa libra nos for di e sklabitut di piká. Apòstel Pablo a skibi: “El a hasi Esun, Kende no tabata konosé piká, bira piká pa nos, pa nos por bira e hustisia di Dios den djE” (2 Kor. 5:21).

Lesa Mateo 28:18–20. Kua ta e promesa ku nos por haña den e Gran Komishon? Kon e ta trese siguransa pa nos segun ku nos ta bira enbolbí den e mishon di Dios?

E morto di Kristu tabata parti di e proseso di rekonsiliashon, no su final. A traves di Su resurekshon, Hesus a konkistá morto i a risibí “ ‘tur outoridat riba mundu i den shelu’ ” (Mat. 28:18). Basá riba e realidat akí, despues El a ordená tur Su siguidónan pa hasi disipelnan rònt mundu, ku un promesa formidabel: “ ‘Mi ta ku boso semper, te na fin di mundu’ ” (Mat. 28:20, énfasis añadí).

Den ki formanan bo a mira e promesa di Hesus di ta “ku bo semper” kumpli den bo propio bida segun ku bo ta enbolbí den mishon?

Lesa Juan 14:1–3. Den ki formanan e ta konektá ku e mensahe di tempu di fin hañá den e Skrituranan?

Durante Su ministerio terenal, un di e promesanan di mas presioso di Kristu, e speransa bendishoná, ta reflehá un bia mas e deseo di e Kreador pa ta ku nos pa eternidat. Hesus a afirmá: “ ‘lo Mi bin atrobe i risibí boso serka Mi pa kaminda Ami ta, boso tambe por ta’ ” (Juan 14:3, énfasis añadí).

Di akuerdo ku apòstel Juan, e promesa finalmente lo bira realidat. “I mi a tende un bos duru for di e trono, bisando: "Mira, e tabernakel di Dios ta meimei di hende, i E lo biba meimei di nan, i nan lo ta Su pueblo, i Dios mes lo ta meimei di nan,” (Rev. 21:3).

“E obra di redenshon lo ta kompletu. Den e lugá kaminda piká a abundá, e grasia di Dios a abundá muchu mas. Tera mes, e kampo mes ku Satanas ta reklamá komo di dje, lo ta no solamente reskatá sino eksaltá. . . . Aki, kaminda e Yu di Dios a habitá den humanidat; kaminda e Rei di gloria a biba i a sufri i a muri, aki, ora E lo hasi tur kos nobo, e tabernakel di Dios lo ta ku hende. . . . I a traves di siglonan sin fin, segun ku esnan redimí ta kana den e lus di Señor, nan lo alab’E pa Su Don inekspresabel, Emanuel, ‘Dios ku nos.’ ”— Ellen G. White, The Desire of Ages, p. 26.

Aki nos ta haña e kuadro di mas bunita di Redenshon. E Dios di mishon finalmente lo kumpli ku Su deseo di ta ku Su yunan eternamente. Ki un privilegio tremendo di ta parti di e realidat akí!

Desafionan Semanal. A lo largu di e kuartal akí lo invitá bo pa enbolbí intenshonalmente den Dios Su mishon. Esaki lo ta un oportunidat pa mira i eksperensiá e Dios di mishon obrando den bo bida. Probechá di e momento akí pa reflekshon personal i sea prepará pa kompartí loke bo a siña ku bo klas riba un base semanal. Ademas, e parti di Desafiá lo enkurashá bo pa oumentá bo embolbimentu den Dios Su mishon.

Desafio: Resa tur dia di e siman benidero pa Dios habri bo kurason pa ta parti di Su mishon.

Desafiá: Siña nòmber di un persona den bo bida ku bo no konosé ainda, un bisiña, kolega, trahadó den pakus, shofùr di bùs, guardian, etc. Kuminsá hasi orashon p’e tur dia.

“E plan pa nos redenshon no tabata algu pensá despues, un plan formulá despues di e kaida di Adam. E tabata un revelashon di ‘e misterio ku a wòrdu tení sekreto pa siglonan largu.’ Romanonan 16:25. . . . E tabata un despliegue di e prinsipionan ku for di siglonan eterno tabata e fundeshi di e trono di Dios. For di prinsipio, Dios i Kristu tabata sa di e apostasia di Satanas, i di e kaida di hende a traves di e poder engañoso di e apóstata. Dios no a determiná ku piká lo mester a eksistí, sino El a premirá su eksistensia, i a hasi provishon pa enfrentá e teribel emergensia. Asina grandi Su amor tabata pa mundu, ku El a sera un pakto pa duna Su úniko Yu, ‘pa ken ku kere den djE no bai pèrdí, ma tin bida eterno.’ Juan 3:16.”—Ellen G. White, The Desire of Ages, p. 22.

“Kristu no a bisa Su disipelnan ku nan trabou lo tabata fásil. . . . Pero E lo no a laga nan lucha nan so. El a sigurá nan ku E lo tabata ku nan; i ku si nan lo a bai padilanti den fe, nan lo a move bou di e eskudo di Omnipotensia. . . . Tanten ku nan tabata obedesé Su palabra, i tabata traha den konekshon kunE, nan no por a faya. Bai na tur nashon, El a bisa nan. Bai na e lugá di mas leu di e globo habitabel i sea sigur ku Mi presensia lo ta ku bo asta einan. Traha den fe i konfiansa; pasobra nunka e momento lo yega ku lo Mi bandoná bo. Lo Mi ta ku bo semper, yudando bo pa ehekutá bo deber, guiando, konsolando, santifikando, sosteniendo bo, dunando bo éksito ora bo ta papia palabranan ku lo hala atenshon di otronan na shelu.”—Ellen G. White, The Acts of the Apostles, p. 29.

Preguntanan pa Diskushon:

Pensa riba loke ta nifiká ku e promé palabranan di Dios na humanidat no tabata “Kiko bo a hasi?” Of “Dikon bo a desobedesé Mi?” En kambio, e promé palabranan tabata: “Unda bo ta?” Ki konsuelo e bèrdat akí mester duna nos tokante Dios Su intenshon pa nos i nos sernan kerí?

Pensa riba loke ta nifiká ku Dios Mes, den persona di Hesus, a bin na e mundu akí pa asina salba nos. Kristu riba e krus tabata e manifestashon supremo di Dios komo un Dios di mishon. Kiko esaki ta bisa nos tokante Su karakter?

E mishon ta pertenesé na Dios, P’esei, E lo ekipá i empoderá hende pa e tarea. Den lus di e realidat akí, ora bo wak e desafionan di evangelisashon mundial, kon bo por dil ku sintimentunan i aktitutnan di inkapasidat òf miedu?