Dios Su Yamada na Mishon

14 di òktober

Lesa pa e Estudio di e Siman Akí:

Gén. 11:1–9; Gén. 12:1–3; Dan. 9:24–27; Mat. 1:21; Gén. 12:10–13:1; Echonan 8:1–4; Echonan 1:8.

Versíkulo di Memoria:

“Ma boso lo risibí poder ora Spiritu Santu bin riba boso, i boso lo ta mi testigunan na Herusalèm, na henter Hudea i Samaria, i te na e parti mas alehá di mundu” (Echonan 1:8, NKJV).

Tin ora Dios por saka nos for di nos zona konfortabel i hasi nos Su testigunan. Tin ora E por usa e kambio akí pa kumpli ku Su propósitonan, manera den e ehèmpel di e plamamentu di e pueblo na e Toren di Babel. “E plamamentu akí tabata e medio di pobla tera, i asina e propósito di Señor a kumpli a traves di e mesun medio ku hende a usa pa prevení su kumplimentu.”—Ellen G. White, Patriarchs and Prophets, p. 120. Abraham, mientrastantu, a bai for di su pais di orígen na un otro (Génesis 12) komo un medio di testimonio. E disipelnan di Hesus a bai for di traha meimei di nan propio hendenan so (Echonan 3) na traha pa otronan tambe (Echonan 8:1–4). Den Echonan 1:8, Hesus a establesé un prinsipio di evangelisashon: nan lo a kuminsá lokalmente, Herusalèm i Hudea, despues bai Samaria i, finalmente, na e finnan di tera.

Pero asta si nos no bandoná nos pais, Dios ainda ke pa nos alkansá e hendenan rònt di nos. Ora e iglesia na Herusalèm tabata birando komplasiente, a plama su miembronan. Aunke persekushon a bin i hendenan a sufri, e eventonan desafortuná akí a bira un medio di plama e bon notisia riba henter mundu.

* Studia e lès di e siman akí pa prepará pa Sabat, 21 di òktober.

Pa yega na otronan, Dios tin intenshon pa nos sali mas ayá di nos zona konfortabel. E deseo pa permanesé solamente ku nos mes sorto i tipo étniko òf sosial por hiba na egoismo, asta maldat. E peliger akí ta un di e lèsnan derivá di e storia di Babel.

Lesa Génesis 11:1–9. Kua tabata e intenshonnan di e pueblo? Kiko nan ker a hasi, i dikon Dios lo a frustr’é?

E storia akí di e hendenan na e Toren di Babel ta revelá nan gran ambishon. Nan tabata planiando pa traha un struktura monumental, un stat i un toren manera no a eksistí niun otro kaminda den mundu: “un toren ku su tòp ta yega te den shelu, i laga no straha un nòmber pa nos mes ...” (Gén. 11:4).

Kuantu biaha awendia hende ta trata na hasi e mesun kos? Sea a traves di polítika, arte, negoshi, asta religion, no ta importá. Tin esnan ku ke traha un gran nòmber pa nan mes. Al final, kon inútil i sin sentido nan esfuersonan ta. (Lesa Ekl. 2:1–11.)

Beibel ta bisa den Génesis 11:4 ku e hendenan akí ker a konstruí e toren pa asina nan lo a evitá di ta plamá riba kara di tera. Nan ker a keda huntu pa nan propio rasonnan egoista. Pero Dios tabatin un otro plan.

E hendenan akí tabata uní tambe pa e trabou akí. Pero “I Señor a bisa: ‘Mira, nan ta ún pueblo, i nan tur tin e mesun idioma. I esaki nan a kuminsá hasi i awor nada ku nan proponé pa hasi lo no ta imposibel pa nan’ ” (Gén. 11:6). E plan ambisioso akí di e hendenan tabata, de echo, malbado.

Aunke Skritura no ta bis’é eksplísitamente, Ellen White ta bisa ku nan no a konfia e promesa di Dios ku E lo no a destruí tera nunka mas ku awa (Gén. 9:14,15). Nan tabatin intenshon di konstruí pa nan propio seguridat persibí mas bien ku konfia e Palabra di Dios. Loke sea tabata nan motibunan final, Dios tabata sa ku nan intenshonnan no tabata puru sino tabata yená ku ambishon egoista, i asina El a prevení nan di logra nan metanan deklará.

Bo ta parti di un grupo òf komunidat étniko ku ta mas konfortabel entre nan mes? Den ki formanan bo por enbolbí bo mes posiblemente ku otronan ku no ta parti di bo rasa, etnisidat, òf nashonalidat?

Lesa Génesis 12:1–3. Di ki manera Dios Su instrukshon na Abraham tabata un yamada na mishon?

Dios a pidi Abram (ken su nòmber El a kambia despues pa Abraham) pa bandoná su pais i su hendenan i bai na un otro tera. Tur tabata e plan di Dios pa usa Abraham komo un vehíkulo pa kumpli ku Su propósitonan divino riba tera. I Abraham a bai, di akuerdo ku e Palabra di Señor. Si Dios tin un plan pa bo, e por ta un yamada pa bo bandoná bo famia ekstendé i bo hendenan pa bai na un lugá ku E ta habriendo pa bo sirbiE, pa asina bo por ta un bendishon pa otronan.

Lesa e siguiente tekstonan. Kiko kada un teksto ta bisa di e pakto di Dios, Su promesa na nos?

For di e tekstonan akiriba, ta evidente ku Dios tabata bai kumpli ku e promesa, hasí den Hòfi di Eden, ku Un Hende lo bini komo un solushon pa e problema di piká. E solushon akí, Hesu-Kristu e Mesias, tabata bai lanta for di e liña di Abraham i Isak (a traves di Sara). Hebreonan 11:9 ta deklará ku Isak i Yakòb tabata herederonan di e promesa di bendishon ku Dios a hasi na Abraham.

Nos no sa eksaktamente kuantu Abraham mes tabata sa òf komprendé di presis kon e Simia primintí lo a lanta a traves di dje, pero el a bai den fe, di tur manera. “Pa medio di fe Abraham, ora ku el a wòrdu yamá, a obedesé dor di sali bai na un lugá ku e tabata pa risibí komo erensia; i el a sali bai, sin sa unda e tabata bai.” (Hebr. 11:8).

Ki un ehèmpel pa nos!

Suponé ku Dios ta yama bo pa bai, “sin sa” na unda bo ta bai? Kon bo ta respondé, i dikon?

Siguiendo e yamada di Dios, Abraham a drenta e tera manera Dios a orden’é. Sinembargo, for di prinsipio, kosnan no a parse di ta bai muchu bon p’e. El a yega kaminda Dios a bis’é pa bai, pero di akuerdo ku Beibel, “Den e tempu ei e kananeonan tabata den e tera” (Gén. 12:6), paganonan konosí pa nan krueldat i violensia. Nada straño ku djis despues ku Abraham a yega einan, Señor a aparesé na dje i a bisa: “ ‘Bo desendientenan lo Mi duna e tera akí’ ” (Gén. 12:7). No tin duda ku Abraham tabatin mester di e enkurashamentu.

Sinembargo, kosnan ainda no tabata bai partikularmente bon p’e, a lo ménos na kuminsamentu.

Lesa Génesis 12:10–13:1. Kiko a sosodé kuné despues, i kua erornan e hòmber di Dios akí a kometé?

Kon desalentador mester tabata p’e: bandonando un eksistensia probablemente di mas próspero den e pais di orígen, solamente pa bai, “sin sa unda e tabata bai” (Hebr. 11:8). I un di e promé kosnan ku el a enfrentá tabata un hamber! E hamber akí tabata asina malu ku e mester a bandoná e lugá ku Dios a bis’é pa establesé den dje i bai un otro kaminda. I e ora ei kosnan a bira pió despues di esei.

“Durante su estadia na Egipto, Abraham a duna evidensia ku e no tabata liber di debilidat i imperfekshon humano. Ora el a skonde e echo ku Sara tabata su esposa, el a traishoná un deskonfiansa den e kuido divino, un falta di e fe elevá ei i kurashi ku asina tantu bia i noblemente tabata ehèmpel di su bida. . . . Debí na e falta di fe di Abraham, Sara tabata den gran peliger. E rei di Egipto, siendo informá di su bunitesa, a pone nan tres’é na su palasio, ku intenshon di hasié su esposa. Pero Señor, den Su gran miserikòrdia, a protegé Sara, mandando huisionan riba e kas real.”—Ellen G. White, Patriarchs and Prophets, p. 130.

Niun hende a yega di bisa ku obra mishonero tabata fásil, ora Abraham a saka mentira, ora e tabata engañoso, el a solamente hasi kosnan pió. Afortunadamente, Dios ta un Dios di pasenshi, E no a rechasá Su sirbidó pa su eror, ku, desafortunadamente, lo no tabata e úniko ku Abraham lo a kometé. Kon alentador pa sa ku asta apesar di nos erornan, si nos gara na Señor den fe i sumishon, manera Abraham a hasi, Señor no solamente por pordoná nos erornan, pikánan, i faltanan, sino E por usa nos ainda pa mishon.

Ki lèsnan nos por saka for di e storia tokante Abram na Egipto?

Lesa Echonan 8:1–4. Den e iglesia primitivo, kiko a okashoná e plamamentu di kreyentenan mas ayá di nan zona konfortabel?

Te na e momento akí, e iglesia primitivo tabata prinsipalmente na Herusalèm (òf denter di e teritorio hudiu i meimei di e pueblo hudiu). Ora persekushon a kuminsá, den kua Soulo, un hudiu deboto i un fariseo, tabata aktivamente enbolbí, e iglesia na Herusalèm tabata plamá riba henter Hudea i Samaria e ora ei. Hesus a pronostiká den Echonan 1:8 ku "boso lo ta mi testigunan na Herusalèm, na henter Hudea i Samaria”. E deklarashon akí a kumpli, manera notá den Echonan 8:4, ku “Esnan ku e persekushon a plama fo'i otro a prediká e bon notisia tur kaminda ku nan a pasa”.

Asta despues ku e iglesia a kuminsá sali mas ayá di Herusalèm, ainda nan tabata predikando den e regionnan di e hudiunan òf den e barionan di e pueblo hudiu den otro statnan. Echonan 11:19 ta indiká ku e iglesia tabata plamá te na Fenisia (Libanon) i Chipre, pero den e etapa akí nan no a prediká e mensahe na niun otro sino na e hudiunan so. E disipelnan di Hesus i e iglesia primitivo no tabatin intenshon di mira e paganonan, sino solamente hudiunan, bin na Señor. Ainda nan tabatin puntonan di bista masha limitá riba loke e mishon di iglesia mester tabata.

Pedro, un disipel di Hesus i un di e figuranan na kabes di e iglesia primitivo, tabata kontra pa hiba e evangelio na e paganonan, asta despues ku Pablo a kuminsá hasi esei. Pedro tabata konosí komo un apòstel na esnan sirkunsidá (ku ta nifiká e hudiunan) i Pablo un apòstel na e paganonan (Gal. 2:8). Na prinsipio Pedro no tabata ni ke pa mir’é huntu ku e paganonan (Gal. 2:11,12). Sinembargo, Dios a saka Pedro for di su zona konfortabel i a kambia su kurason. El a kuminsá siña loke e komishon di evangelio realmente tabata enserá i loke e morto di Hesus tabata destiná pa logra pa henter mundu.

Lesa Echonan 10:9–15, 28, 29. Kua tabata e mensahe ku Señor tabata dunando Pedro, i kon nos, den nos tempu i époka, mester apliká e prinsipio akí na e obra di mishon?

Lesa Echonan 1:8. Kua prinsipio Hesus a presentá ora nos ta hasiendo e obra di kompartí òf ta Su testigunan na e mundu?

Esaki ta e prinsipio eksponé pa Hesus ku ta mustra nos kon nos mester aktua komo Su disipelnan, ku tin e bon notisia pa kompartí ku otronan. Kompartí e bèrdat no ta tokante konvensé otronan kon robes nan ta, sino tokante kompartí Hesus manera deskribí den e mensahenan di e tres angelnan di Revelashon 14:6–12.

Tin, sinembargo, algun prinsipio den e palabranan di Hesus den Echonan 1:8.

Promé, “ ‘boso lo ta Mi testigunan na Herusalèm’ ”. Manera nos a mira (pero ta bale la pena ripití): nos mester ta Su testigunan den e lugá kaminda nos ta biba físikamente. Esaki por inkluí nos mes hogar, nos iglesia, nos bario, i nos komunidat. Nos mester ta Su testigunan promé kaminda nos ta, den e área ku El a pone nos na prinsipio, kas òf trabou, i pa ta Su testigunan na e hendenan mas serka di nos. E por ta famia djaserka òf famia ekstendé, hendenan di iglesia, koleganan di trabou, bisiñanan, i komunidat.

Tin biaha hende ta interesá solamente den bai na un pais lehano i kultura straño pa ta Su testigunan. Pero nan no ta testifiká na hendenan rònt di nan awor. Nos mester kuminsá kaminda nos ta i move for di einan segun ku Señor ta guia nos.

Despues, “ ‘na henter Hudea i Samaria, i te na e parti mas alehá di mundu’ ” (Echonan 1:8). Atrobe, Hesus ta afirmá e realidat ku testifikashon ta enbolbí krusa fronteranan kultural. Kuminsando for di kaminda nos ta, por yama nos pa bai na otro áreanan pa alkansá diferente gruponan sosial, étniko, i religioso. Si mi ta pertenesé na un sierto grupo étniko òf lingwístiko, por ta muchu mas fásil pa mi testifiká na nan pasobra tin bareranan kultural mínimo pa krusa. Den algun área di mundu, solamente un tribu ta representá den e konstelashon di e iglesia. Sinembargo, e Gran Komishon di Hesus ta bisa nos ku, komo Su testigunan, saliendo for di nos zona konfortabel i invertí nos rekursonan pa gruponan di hende asina, ta krusial. Nan tambe tin mester di e mensahe di Hesus.

Desafio: Identifiká i traha un lista di gruponan di hende ku nesesidatnan spesial den bo komunidat, ku iglesia no a hasi esfuerso pa alkansá.

Desafiá: Kuminsá resa pa un oportunidat den futuro serkano pa bira enbolbí den mishon na hendenan ku nesesidatnan spesial.

Lesa Ellen G. White, “The Great Commission,” p. 25–34, i “A Seeker for Truth,” p. 131–142, den The Acts of the Apostles.

“Promé di a subi na shelu, Kristu a duna Su disipelnan nan enkargo. El a bisa nan ku nan mester tabata e ehekutornan di e tèstamènt den kua El a laga e tesoronan di bida eterno pa e mundu. Boso tabata testigunan di Mi bida di sakrifisio na fabor di e mundu, El a bisa nan. Boso a mira mi obranan pa Israel. I aunke Mi pueblo lo no a bin serka Mi pa nan por a haña bida, aunke saserdotenan i gobernantenan a hasi ku Mi manera nan tabata ke, aunke nan a rechasá Mi, ainda nan lo tin un otro oportunidat di aseptá e Yu di Dios. Boso a mira ku tur ku bin serka Mi konfesando nan pikánan, Mi ta risibí libremente. Esun ku bin serka mi, lo Mi no tira afó di ningun manera. Na boso, Mi disipelnan, Mi ta enkomendá e mensahe di miserikòrdia akí. Boso mester dun’é na tantu hudiu komo pagano—na Israel promé, i despues na tur nashon, lenga, i pueblo. Mester reuní tur ku kere, den un iglesia.”—Ellen G. White, The Acts of the Apostles, p. 27, 28.

E Gran Komishon ta kla: “ ‘P’esei bai i hasi tur e nashonnan disipel di Mi’ ” (Mat. 28:19). P’esei, ta trata definitivamente di bai serka otronan, spesialmente otro nashonnan.

“E komishon evangéliko ta e gran karta mishonero di e reino di Kristu. E disipelnan meter a traha formalmente pa almanan, dunando tur e invitashon di miserikòrdia. Nan no mester a warda pa e hendenan bini serka nan; nan mester a bai serka e hendenan ku nan mensahe.”—Ellen G. White, The Acts of the Apostles, p. 28.

“Den nos mundu tin hopi hende ku ta mas serka di e reino di Dios ku nos ta suponé. Den e mundu skur di piká akí Señor tin hopi hoya presioso, na ken E lo guia Su mensaheronan. Tur kaminda tin esnan ku lo tuma nan poseshon pa Kristu. Hopi lo balorá e sabiduria di Dios riba kualke bentaha terenal, i lo bira fiel kargadónan di lus. . . . Konvensí ku e proseder di Pedro tabata den kumplimentu direkto di e plan di Dios, i ku nan prehuisionan i eksklusividat tabata totalmente kontrali na e spiritu di e evangelio, nan a glorifiká Dios, bisando: ‘Di manera ku Dios a duna arepentimentu pa bida tambe na e paganonan.’ Asina, sin kontroversia, nan a basha e prehuisionan abou, nan a bandoná e eksklusividat establesé pa e kustumber di siglonan, i kaminda a habri pa proklamá e evangelio na e paganonan.”—Ellen G. White, The Acts of the Apostles, p. 140–142.

Preguntanan pa Diskushon:

Kon lo bo a definí e palabra “mishon” segun ku bo ta aplik’é na bo propio bida?

Den ki formanan lo bo por a, diariamente, ekspresá mishon den bo aktitut i komportashon? Kon bo por tabatin mas mentalidat di mishon den bo tareanan di kada dia?

Kon importante ta pa nos saminá nos kurason i buska poder di ariba pa purifiká nos di prehuisio kontra esnan diferente for di nos?