Mishon na esnan No Alkansá: Parti 1

2 di desèmber

Lesa pa e Estudio di e Siman Akí:

Echonan 17; 1 Kor. 2:2; Rom. 1:18–25.

Versíkulo di Memoria:

“E Dios ku a traha mundu i tur kos ku tin den dje, siendo Señor di shelu i di tera, no ta biba den tèmpel trahá ku man” (Echonan 17:24, NKJV).

Deskribiendo loke Pablo a hasi na Atena, Lukas a skirbi: “Pesei e tabata rasoná den snoa ku e hudiunan i ku e paganonan ku tabata teme Dios, i riba plasa tur dia ku esnan ku pa kasualidat tabata presente einan” (Echonan 17:17).

Naturalmente, Pablo lo tabata mas konfortabel trahando meimei di e hudiunan, su mes karni i sanger. Pero Pablo a nenga di ta satisfecho ku traha meimei di solamente su mes hendenan. A yam’é pa alkansá otronan tambe.

Of Pablo por a traha ku solamente e paganonan “ku tabata teme Dios”, ku nan kosmovishon ya a sufri un kambio sustansial. Nan tabatin un fundeshi bíbliko ku Pablo por a traha riba dje, asta si ainda nan mester a konosé e Dios kende nan “tabata teme”, Hesus e Mesias.

Pero, nò. Miéntras e tabata na Atena, un stat famoso pa su filosofia, Pablo a trata na alkansá e hendenan aya tambe. Hopi di esakinan tabatin un pasado i kosmovishon radikalmente diferente for di esun di e hebreonan i nan historia sagrado, ku tabata forma e fundeshi di e fe ku Pablo ker a siña e hendenan di Atena.

Kon Pablo a hasi pa trata na alkansá e hendenan akí, i kiko nos por siña for di su intentonan?

* Studia e lès di e siman akí pa prepará pa Sabat, 9 di desèmber.

Lesa Echonan 17:1–16. Kon Pablo a resultá na Atena, i kon el a reakshoná riba loke el a haña einan?

E stat di Atena tabata “yen di ídolo” (Echonan 17:16). Konosiendo e historia di su mes hendenan i nan tendensia (a pesar di e spièrtamentunan sin fin) na idolatria, Pablo tabata molestiá pa tur e ídolonan ku el a haña na Atena tambe. No tin duda, Pablo tabata motivá pa kompashon pa e hendenan di Atena, ku lo a muri den nan pikánan si nan no a siña di e berdadero Dios.

Awe, nos siudatnan ainda ta yen di ídolo, aunke nan ta ménos opvio ku loke Pablo a mira. I desafortunadamente, hopi kreyente ta totalmente kapas di kana a traves di un siudat sin reakshoná lo mas mínimo riba su ídolonan. Pablo, sin embargo, tabata sufisientemente sintonisá ku Spiritu Santu pa reakshoná. Fuera di lugá ku algun otro kreyente, ku ainda no a kapta ku e evangelio tabata pa henter mundu, Pablo tabata sa ku Dios tabata ke pa e hendenan di Atena salba huntu ku tur otro hende. El a komprendé ku e konsepto di mishon global tabata pa hiba e evangelio na esnan ku no a alkansá kompletamente, inkluyendo paganonan ku tabata adorá ídolonan, komo tambe e filósofonan ku tabata yena e kayanan di Atena.

Pablo, pa e motibu ei, tabata frekuentá e plasa kaminda tabata haña e hendenan akí. Nos lo por bisa ku el a forma e promé Sentro di Estudio di Mishon Global, kaminda el a usa e plasa pa studia i tèst métodonan di alkansá e kurasonnan i mentenan di e paganonan akí.

Pablo tabata sa ku e no por a aserká e hendenan di Atena di mesun forma ku e tabata aserká hudiunan òf asta paganonan ku tabata teme Dios. Esakinan tabata hendenan ku nan punto di salida no tabata e Dios di Israel òf Su obranan meimei di e nashon di Israel. No importá kon sentral e konseptonan i kreensianan akí tabata pa e hudiunan i asta pa e paganonan ku tabata teme Dios, nan no tabata nifiká nada pa e hendenan ku Pablo a topa den e plasa na Atena. P’esei, tabatin mester di un aserkamentu kompletamente nobo.

Awe, hopi biaha nos ta trata na alkansá hendenan ku nan antesedentenan no tin nada en komun ku loke a yama herensia “hudeo kristian”. Por lo tantu, meskos ku Pablo, nos mester adaptá. Un aserkamentu ku lo por funshoná bon, por ehèmpel, na Buenos Aires por ta inútil na Bangkok.

Ki tipo di ídolonan hende ta adorando den bo sosiedat, i kon bo por habri nan bista na kon sin balor tur ta?

No importá unda e tabata, Pablo, mirando su mandato di Dios, tabata bai prediká e evangelio. Asina, esei ta eksaktamente loke el a trata na hasi na Atena.

Lesa Echonan 17:18–21. Kua tabata algun di e diferente maneranan ku e paganonan den e plasanan a reakshoná riba e palabranan i preguntanan di Pablo?

Klaramente, ku su “diosnan strañero”, Pablo a hasi un impreshon riba e hendenan akí den e plasa (Echonan 17:18), i asina nan a hib’é na e Areo Pago, un parti di e stat kaminda tabata husga asuntunan legal i religioso, aunke no tabata parse manera ku Pablo tabata enfrentando kualke tipo di huisio legal. Tabata hustamente, parse, pa duna e i su “siñansa nobo” (Echonan 17:19) un oudiensia. Lo tabata difísil pa ignorá un hende di Pablo su elokuensia, pashon, i inteligensia, asta si e tabata promoviendo ideanan ku tabata parse masha straño pa e hendenan akí.

Echonan 17:21 ta bisa ku e hendenan di Atena no tabata hasi nada sino papia tokante i skucha na e último ideanan. Lukas tabata akusando nan di flohera? Probablemente nò. Mas probablemente e tabata indikando ku nan tabata pensadónan i diskutidónan eksperensiá. Despues di tur kos, e griegonan a produsí hòmbernan manera Socrates, Plato, i Aristóteles, filósofonan ku nan influensia a yega te na nos dianan tambe. Pa siglonan tabata mira Atena komo e sentro di pensamentu intelektual i filosófiko. Aunke algun di e pensadónan akí no tabata ateista, seguramente no den e sentido ku nos ta pensa di ateismo awendia, hopi di nan ideanan filosófiko tabata radikalmente diferente for di e siñansanan di kristianismo. Ta difísil, por ehèmpel, pa haña un lugá den e filosofia di e epikureonan i stoisistanan pa algu manera un Mesias resusitá.

Na Atena, Pablo a spera ku Spiritu Santu por a usa su konosementu i abilidatnan oratorio, ku el a haña den su edukashon bou di Gamaliel. Pero en realidat tabata Pablo su edukashon den e kayanan di Atena ku Spiritu Santu tabata kapas pa usa ainda mas. “Esnan di mas sabí di su oyentenan tabata sorprendé ora nan tabata skucha su rasonamentu. El a mustra su mes familiarisá ku nan obranan di arte, nan literatura, i nan religion.”—Ellen G. White, The Acts of the Apostles, p. 237.

Despues di Pablo su eksperensia na Atena ku e paganonan i filósofonan akí, el a skirbi na e Korintionan ku “mi a determiná di no sa nada meimei di boso sino Hesu-Kristu, i E, krusifiká” (1 Kor. 2:2). Ki lèsnan tin pa nos tokante kon sentral Kristu mester ta na nos mensahe, independientemente di na ken nos ta predikando?

Nota ku Pablo no a menospresiá e religion falsu òf e diosnan falsu di e hendenan di Atena. El a reuní tur e puntonan bon ku e por a haña, pa poko ku nan tabata, i el a enfatisá nan.

Lesa Echonan 17:22, 23. Kiko Pablo tabata hasiendo aki den su intento pa alkansá e hendenan akí ku e evangelio?

“ ‘Hòmbernan di Atenas, mi ta mira ku boso ta masha religioso den tur sentido’ ” (Echonan 17:22). Pablo tabata elogiando paganonan! Nan religion tabata kiboká den tur sentido, i, sin embargo, Pablo tabata elogiá nan deboshon na dje, pasobra deboshon na asta spiritualidat kiboká ta mas rekomendabel ku no preokupá mes tokante spiritualidat.

Pablo a sigui: “ ‘Pasobra miéntras ku mi tabata pasa dor di boso stat i tabata opservá e ophetonan di boso adorashon. . . .’ ” (Echonan 17:23). Ora e tabata deskribí su mes estudio di e religion atena, Pablo tabata komuniká un aktitut respetuoso pa ku e hendenan. E no tabata kore drenta manera un eksperto ku ta proklamá su mes ku tur e kontestanan pa kon e hendenan mester a kambia. En realidat, e tabata, de echo, un eksperto i, de echo, e tabatin e kontestanan ku e hendenan akí tabatin mester! Pero e no a presentá su mes di e forma ei, sino nan lo a rechas’é totalmente. En kambio, nan a mir’é komo un hende ku tabata preokupá pa e hendenan i tabata deseá nan bon.

Komentando riba e inskripshon “NA UN DIOS DESKONOSÍ” (Echonan 17:23), Pablo a probechá di loke por a mira komo tereno komun. Nan tabata kere den dios (hopi, en realidat), loke tabata un bon komienso (algun hende e tempu ei no tabata kere) i por a habri kaminda pa kombersashon mas profundo. E no a burla di e idea negativo di un altar na un dios deskonosí. En kambio, e tabata apresiá i atmirá un pueblo ku tabata preokupá sufisiente tokante kosnan spiritual pa hasi e esfuerso i gastu di adorá algu ku ni sikiera nan tabata sa, djis por si akaso nan tabata falta algu.

Nan tabata kiboká? Naturalmente, pero esei por a solushoná. Loke tabata importante na prinsipio tabata ku nan tabata deboto den loke nan tabata komprendé. Esei, Pablo a rekonosé, tabata material ku Spiritu Santu por a traha kuné.

Pablo a haña un tema di kombersashon ku lo a spièrta nan interes.

Ki brùgnan i puntonan di kontakto bo por pensa riba dje ku lo a habri oportunidatnan pa kombersashon mas profundo ku otronan ku ken bo ta bin den kontakto?

Awor ku Pablo tabatin atenshon di e pensadónan na Atena, el a bira su oudiensia na e Dios di shelu.

Lesa Echonan 17:24–27. Ki aserkamentu Pablo tabata tumando aki, den un intento pa alkansá e hendenan akí?

Pa un pueblo ku tabata preokupá sufisiente tokante kosnan spiritual pa konstruí un altar na un dios deskonosí, Pablo su palabranan tabata intrigante: un Dios Kreador ku no ta biba den un tèmpel no tin mester di nada di hende, sino en kambio ta supli nesesidatnan humano. Pa un kultura saturá den mitologia griego, den kua e diosnan tabata impredesibel, sentrá den nan mes, i kruel, e idea di un Dios manera esun ku Pablo a deskribí, tabata un pensamentu maraviosamente intrigante. I e hòmbernan di e Areo Pago a dal nan promé pasonan di beibi den direkshon di un Dios di amor.

Echo ta ku e Dios akí, ku nan no tabata konosé, por a bira konosí! En bèrdat, E ke ta konosí tambe.

Lesa Echonan 17:24–34. Kon Pablo ta sigui su testimonio?

Ta interesante tambe pa nota ku Pablo en realidat a sita algun di nan propio eskritornan, ku, despues di a skirbi algu bastante serka na bèrdat bíbliko, a duna Pablo un apertura pa hiba su oyentenan mas adelante. Es desir, el a usa familiaridat ku nan kreensianan pa buska tereno komun ku nan, solamente pa despues hib’é mas aleu. No tin duda: tratando pa alkansá otronan, teniendo un familiaridat ku loke nan tabata kere i buskando terenonan komun, por ta un método poderoso di alkansá hende.

Nota tambe ku Pablo ta usa e tereno komun ku nan akí pa despues bai kaminda e ker a bai: e resurekshon di Hesus i e speransa ku e tabata ofresé nan tur. Lukas a deskribí e reakshonnan riba Pablo su palabranan final tokante e resurekshon. Algun a burla di e idea; otronan a bisa ku nan ker a tende Pablo atrobe riba e asuntu; i algun a kere. Loke ta klave den e storia akí pa nos propósitonan ta ku nan tur en realidat a skucha. I esei tabata Pablo su speransa for di prinsipio.

Nos sa ku algun hende lo rechasá e evangelio, pero nos mester hasi tur kos posibel pa sigurá ku promé ku nan rechas’é, nan ta komprendé kiko nan ta rechasando. Pablo, pa medio di su método di traha meimei di e hendenan di Atena i su uso stratégiko di loke el a studia i a siña di nan, a sigurá ku nan a tende ku mente habrí ku tabata eksistí un Dios ku nan no tabata konosé pero ku a krea nan. E Dios akí tabata stima nan i tabata ke pa nan konos’E. E tabata miserikòrdioso ku nan apesar di nan ignoransia. Pero Dia di Huisio tabata yegando. I si tur esaki tabata zona demasiado inkreibel, tabatin evidensia verídiko p’e den e resurekshon di Kristu.

Awor ku e hendenan realmente a tende i komprendé e mensahe, nan mester a skohe pa nan mes sea pa rechas’é totalmente òf investigá mas aleu. I algun a investigá mas aleu i a bira siguidónan di Hesus (Echonan 17:34).

Desafio: Den orashon, pidi guia spesífiko di Dios pa sa kua ta e mihó manera di testifiká na un hende ku bo konosé.

Desafiá: Eksplorá media sosial komo un posibel “Areo Pago” pa bo representá e evangelio, ku klaridat i diskreshon di Pablo, na no kreyentenan.

Un di e konklushonnan prinsipal di e storia di eksperensia di Pablo na e Areo Pago ta su estudio riba e tereno di kon alkansá un grupo no alkansá di no kreyente, loke a resultá den un grupo chikitu di kreyentenan ku a kuminsá na Atena.

“Mester a dikta e palabranan di e apòstel, i e deskripshon di su aktitut i alrededor, deskribí pa e pèn di inspirashon, na tur generashon benidero, dunando testimonio di su konfiansa inkebrantabel, su kurashi den soledat i atversidat, i e viktoria ku el a haña pa kristianismo den kurason mes di paganismo.

“E palabranan di Pablo ta kontené un tesoro di konosementu pa e iglesia. E tabata den un posishon kaminda fásilmente e lo por a bisa e loke por a iritá su oyentenan orguyoso i trese su mes den difikultat. Si su diskurso tabata un atake direkto riba nan diosnan i e gran hòmbernan di e siudat, e lo tabata den peliger di sufri e destino di Socrates. Pero ku un takto nasí di amor divino, el a hala nan mente kuidadosamente for di deidatnan pagano, revelando na nan e Dios berdadero, kende pa nan tabata deskonosí.”—Ellen G. White, The Acts of the Apostles, p. 240, 241.

Pa medio di su kontakto direkto ku e hendenan, un estudio di nan kultura i religion, i su rèspèt pa nan deboshon na kosnan spiritual, Pablo a manehá algu notabel na Atena, algu ku ta un tesoro di konosementu pa e iglesia. El a evitá di iritá su oyentenan. Esaki tabata den i di su mes un gran logro, inspirá pa Dios. Esaki, di akuerdo ku Ellen G. White, ta e tesoro di konosementu ku nos, komo iglesia, mester paga atenshon na dje den e storia akí.

Preguntanan pa Diskushon:

Ku e storia di Pablo na Atena komo un modelo, kua ta e promé paso pa kualke hende ku ta kuminsá obra evangelístiko nobo den un siudat?

Ki sorto di komportashon ta rekerí di un kristian pa konstruí brùgnan ku hendenan den e siudat (i frankamente, kualke otro kaminda) ku no konosé Dios?

Ora tiponan moderno di ídolo provoká nos, kiko nos mester evitá di hasi, spesialmente mesora na prinsipio, ora nos kuminsá trabou nobo meimei di hendenan ku ta adorá e ídolonan ei?

Pablo por a stòp ku djis introdusí e hendenan na e Dios akí ku ta stima nan, i nan lo tabata bastante satisfecho. Pero e ora ei el a krusa un liña ku a pone hende pensa ku e tabata engañá ora el a trese e resurekshon. E mester a hasi esei? Dikon, òf dikon no?