Siña Nos Resa

6 di yanüari

Lesa pa e Estudio di e Siman Akí:

Salmo 105:5; Kol. 3:16; Santiago 5:13; Salmo 44; Salmo 22; Salmo 13; Salmo 60:1–5.

Versíkulo di Memoria:

“I a sosodé ku E tabata hasi orashon na un lugá, i ora ku El a kaba, un di Su disipelnan a bis'E: "Señor, siña nos hasi orashon, meskos ku Juan tambe a siña su disipelnan" (Lukas 11:1, NKJV).

Un kreensia ku solamente orashon spontáneo, no siñá, ta orashon real parse ta prevalesé entre algun kristian. Sinembargo, Hesus su disipelnan a keda inmensamente rekompensá ora nan a pidi Hesus pa siña nan resa. Dios a pone un buki di orashon, e Salmonan, den sentro di e Beibel, no simplemente pa mustra nos kon Dios su pueblo di tempunan antiguo tabata resa, sino tambe pa siña nos kon nos por resa awe.

For di e promé siglonan, e Salmonan a forma e orashonnan di e pueblo di Dios, inkluyendo e orashonnan di Hesus (1 Kron. 16:7, 9; Neh. 12:8; Mat. 27:46; Efe. 5:19). E siman akí nos lo wak e ròl ku e Salmonan a hunga yudando e pueblo di Dios rekoré nan biahe di bida i krese den nan relashon ku Dios. Nos mester kòrda ku e Salmonan ta orashonnan i, komo tal, ta inkalkulabel, no solamente pa motibu di nan vishon teológiko sino tambe pa e manera ku nan por enrikesé i transformá nos orashonnan individual i komunitario.

Resa e Salmonan a yuda hopi kreyente establesé i mantené bidanan di orashon regular i pleno.

E siman akí nos lo sigui wak e Salmonan, spesialmente den konteksto di momentonan ku kosnan no ta bayendo masha bon pa nos.

* Studia e lès di e siman akí pa prepará pa Sabat, 13 di yanüari.

Lesa Salmo 105:5, Kolosensenan 3:16, i Santiago 5:13. Kua ta e lugá di e Salmonan den e kreyente su eksperensia di adorashon?

Un manera simpel di introdusí e Salmonan den bida diario ta pa dediká tempu kada dia na lesamentu di un salmo, kuminsando ku Salmo 1, i sigui e órden duná den e buki di Salmo. Un otro manera ta pa lesa e Salmonan ku ta korespondé na bo situashon aktual, loke sea e ta: tin Salmonan di lamento, e Salmonan di lamento komunitario, e Salmonan di gradisimentu, himnonan, Salmonan di penitensia, e Salmonan di sabiduria (buskando Dios su sabiduria i direkshon), Salmonan históriko, Salmonan ku ta kontené rabia i furia, i Salmonan di peregrinashon. Den transkurso di e kuartal akí, nos lo wak hopi di nan i studia e Salmonan akí den e konteksto den kua nan ta aparesé.

Kon, anto, nos tin ku lesa e Salmonan?

Lesa e salmo promé, partisipando den un reflekshon simpel, i despues resa. Reflekshoná riba e salmo ta envolví reflekshon riba e vários aspektonan di e salmo: e manera ku e salmista ta dirigí su mes na Dios, i e rason pa e orashon. Konsiderá kon bo situashon ta korespondé ku e eksperensia di e salmista i kon e salmo lo por yuda bo artikulá bo eksperensia. Lo bo keda asombrá kuantu biaha lo bo haña bo mes ta kapas di resoná i relashoná ku loke bo ta lesa einan.

Si algu den e salmo desafiá bo, reflekshoná, por ehèmpel, si e salmo ta koregí speransanan falsu aktual tokante algu ku bo ta enfrentando. Kontemplá e mensahe di e salmo den lus di e persona i obra di salbashon di Kristu i di e speransa duradero ku e obra di Kristu ta ofresé nos. Manera nos sa, òf mester sa, semper ta yuda pa wak tur kos den Beibel den lus di Kristu i e krus.

Tambe, buska motibunan nobo pa orashon ku e Salmonan ta supli, i pensa riba nan importansia pa bo, bo iglesia, i e mundu. Pidi Dios pa pone Su Palabra den bo kurason i mente. Si e salmo ta korespondé ku e situashon di un hende ku bo konosé, intersedé den orashon pa e persona ei. E punto ta, e Salmonan ta kubri asina tantu aspekto di bida, i nan por enrikesé nos pa medio di lesa i apsorbé den nos kurason loke nan ta bisando nos.

Kiko ta nifiká “Laga e palabra di Kristu biba rikamente den boso” (Kol. 3:16)? Dikon lesa Beibel ta e paso di promé i mas krusial pa e eksperensia ei?

Tur kristian sa, i a eksperensiá, tempunan di desesperashon i sufrimentu, momentonan ku nan a puntra nan mes kiko Señor ta hasiendo, òf dikon Señor ta permití e kosnan akí pasa ku nan. E salmistanan mes a pasa a traves di kosnan similar. I, a traves di inspirashon divino, nan a registrá loke nan a eksperensiá.

Lesa Salmo 44. Kiko e ta bisando nos, i dikon esaki ta relevante pa kreyentenan den tur époka?

E selekshon di Salmonan den sirbishinan di adorashon di iglesia ta reflehá e eksklusividat di estadonan di ánimo i palabranan ku nos ta ekspresá den nos orashonnan komunitario. Un restrikshon asina por ta un señal di nos inkapasidat òf inkietut pa enfrentá e realidatnan skur di bida. Aunke tin biaha nos por sinti ku Dios ta trata nos inhustu ora sufrimentu dal nos, nos no ta hañ’é apropiá pa ekspresá nos pensamentunan den adorashon públiko òf asta den orashon privá.

E reserva akí por pone nos pèrdè e sentido di adorashon. E fayo pa ekspresá honestamente i abiertamente nos sintimentunan i puntonan di bista dilanti di Dios den orashon ta laga nos hopi biaha mará na nos mes emoshonnan. Esaki tambe ta nenga nos konfiansa i seguridat pa aserká Dios. Resa e Salmonan ta duna un siguransa ku ora nos resa i adorá, no ta spera ku nos ta sensurá òf nenga nos eksperensia.

Salmo 44, por ehèmpel, por yuda adoradónan verbalisá nan eksperensia di sufrimentu inosente liber i adekuadamente. Resa e Salmonan ta yuda hende eksperensiá libertat di ekspreshon den orashon. E Salmonan ta duna nos palabranan ku nos no por haña ni riska pronunsiá. “Nos kurason no a hal'atras, ni nos pasonan no a desviá for di Bo kaminda; sinembargo, Bo a kibra nos na pida pida na un lugá pa chakál biba aden, i a tapa nos ku e sombra di morto” (Salmo 44:18, 19).

Nota, sinembargo, kon Salmo 44 ta kuminsá. E eskritor ta papiando tokante kon, den pasado, Dios a hasi gran kosnan pa Su pueblo. P’esei, e outor ta ekspresá su konfiansa den Dios i no “den mi bog” (Salmo 44:6).

Apesar di esaki, e pueblo di Dios ainda tin problema. E lista di aflikshon i lamento ta largu i doloroso. Sinembargo, asta meimei di tur esaki, e salmista ta sklama na Dios pa libra, pa “redimí nos pa motibu di Bo mizerikòrdia” (Salmo 44:26). Es desir, asta meimei di problema, e konosé e realidat di Dios i Su amor.

Kon bòrda riba tempunan pasá, ora Dios su presensia tabata sinti hopi real, ta yuda bo dil ku e momentonan den kua problemanan ta pone bo pensa ku Dios ta hopi leu?

Resa e Salmonan ta hasi mas ku kapasitá adoradónan pa verbalisá nan orashonnan libremente. E Salmonan ta supervisá nan eksperensia di akuerdo ku Dios su normanan i ta hasié soportabel dor di introdusí speransa i siguridat di Dios su presensia.

Lesa Salmo 22. Kiko nos por siña for di e salmo akí tokante konfiansa den Dios meimei di gran sufrimentu?

E palabranan di lamento di Salmo 22:1 por yuda hendenan ku ta sufri ekspresá nan doló i sentido di soledat: “Mi Dios, mi Dios, pakiko Bo a bandoná Mi? Pakiko Bo ta asina leu di yuda mi, asina leu di e palabranan di mi sklamashon?”.

E palabranan akí, naturalmente, a bira famoso meimei di kristiannan pasobra nan tabata e mesun palabranan ku Hesus Mes, miéntras E tabata riba e krus, a ekspresá, mustrando nos kon sentral e Salmonan tabata na Kristu su eksperensia (lesa Mat. 27:46).

Sinembargo, asta meimei di sufrimentu i pruebanan, ta ekspresá e palabranan akí tambe: “Lo mi konta mi rumannan di bo nòmber i alabá Bo den presensia di nan tur” (Salmo 22:22).

Den otro palabra, aunke e sintimentunan eksakto akí kisas no ta koinsidí ku e dilema aktual di e outor, e salmista ainda tabata ekspresando su fe den Dios i deklarando ku, no importá kiko pasa, e lo a sigui alabá Dios.

E punto ta, dunando nos palabranan pa resa, e Salmonan ta siña nos pa wak mas ayá di nos situashon aktual i, pa medio di fe, mira e momento ora Dios, pa medio di Su grasia, lo restourá nos bida.

Resando e Salmonan, pues, ta hiba adoradónan na horizontenan spiritual nobo. E Salmonan ta laga adoradónan ekspresá nan sintimentunan i komprendementu, pero no ta laga nan keda kaminda nan ta awor. Ta hiba e adoradónan na bandoná nan karganan di doló, desapunto, rabia, i desesperashon dilanti di Dios i na konfi’E, loke sea nan sirkunstansianan ta.

E moveshon di lamento na alabansa, opservá den hopi Salmo, ta sugestivo di e transformashon spiritual ku e kreyentenan ta eksperensiá ora nan risibí grasia i konsuelo divino den orashon.

Kon nos por siña mira mas ayá di nos pruebanan inmediato i, por lo tantu, konfia den e bondat di Dios, loke sea ku nos ta enfrentá awor?

Nos tur probablemente a enfrentá momentonan ora ku e presensia di Dios tabata parse hopi leu for di nos. Ken, tin biaha, no a pensa: Kon esaki por a sosodé?

E salmistanan, humano manera restu di nos, siguramente a enfrentá kosnan similar. Aunke, sí, tin biaha nos pikánan ta trese pruebanan riba nos, na otro momentonan nan ta parse di ta asina inhustu, i nos ta sinti manera kos ku nos no a meresé loke nos ta enfrentá awor. Atrobe, ken no tabata einan?

Lesa Salmo 13. Kua dos estadonan di ánimo prinsipal bo por distinguí den e salmo akí? Ki desishon bo ta kere a trese e kambio radikal den e perspektiva general di e salmista?

“Kuantu tempu mas, O SEÑOR? Lo Bo lubidámi pa semper? Kuantu tempu mas lo Bo skonde Bo kara pa mi?” (Salmo 13:1). Atrobe, ken no por relashoná ku e sintimentunan akí, pa robes ku nan lo por ta? (Dios algun biaha ta lubidá kualke di nos?)

Salmo 13, anto, ta indiká e kaminda pa evitá un otro eror komun, ku ta di focus riba nos mes i nos problemanan ora nos ta resa. E salmo akí por transformá nos orashon hibando nos na reafirmá e naturalesa fiel i inkambiabel di Dios su trato ku Su pueblo.

Sigur, aunke e salmo ta kuminsá ku lamentonan i kehonan, e no ta terminá einan. I esei ta e punto krusial.

E salmo ta hiba nos na skohe deliberadamente pa konfia e poder redentor di Dios (Salmo 13:5), pa asina nos miedu i ansiedat (Salmo 13:1–4) gradualmente por habri kaminda pa Dios su salbashon, i nos kuminsá eksperensiando kambio di lamento pa alabansa, di desesperashon pa speransa (Salmo 13:5, 6).

Sinembargo, un simpel ripitishon di e palabranan di e Salmonan ku solamente un tiki komprenshon di nan nifikashon lo no produsí e transformashon outéntiko, intenshoná pa nan uso. Ora nos ta resa e Salmonan, nos mester buska Spiritu Santu pa E kapasitá nos pa aktua den e forma eksigí pa e salmo. E Salmonan ta e Palabra di Dios pa medio di kua e karakternan i akshonnan di e kreyentenan ta keda transformá, no simplemente informá. Pa grasia di Dios, e promesanan di e Salmonan ta manifestá den bida di kreyentenan. Esaki ta nifiká ku nos ta permití e Palabra di Dios forma nos di akuerdo ku e boluntat di Dios i uni nos ku Kristu, kende a demostrá e boluntat di Dios perfektamente i, komo e Yu di Dios enkarná, a resa e Salmonan, tambe.

Kon bo pruebanan por hala bo mas serka di Dios? Dikon, si bo no ta kuidadoso, na por pusha bo for di djE?

Lesa Salmo 60:1–5. Pa kua okashonnan bo ta pensa ku e salmo akí lo tabata un orashon adekuá? Kon nos por benefisiá di e Salmonan di lamento asta den temporadanan alegre di bida?

Hende ta komprendé salmonan di lamento komo orashonnan di hendenan ku ta bibando a traves di momentonan di prueba, sea físiko, sikológiko, òf spiritual. Of tur tres.

Sinembargo, esaki no ta nifiká ku nos mester evitá e Salmonan akí, asta den bon tempunan. Tin biaha por tin un desigualdat entre e palabranan di e salmo i e eksperensia aktual di e adoradó. Es desir, Salmonan di lamento por ta benefisioso pa adoradónan ku no ta den angustia.

Na promé lugá, nan por hasi nos mas konsiente ku sufrimentu ta parti di e eksperensia humano general, i ku e ta sosodé ku tantu esnan hustu komo e malbadonan. E Salmonan ta sigurá nos ku Dios ta den kontrol i ta proveé fortalesa i solushonnan den momentonan di problema. Asta den e salmo akí, asta meimei di e problema (“Bo a hasi tera tembla,” Salmo 60:2), e salmista ta desplegá su último speransa den e liberashon di Dios.

Na di dos lugá, e Salmonan di lamento ta siña nos kompashon pa ku esnan ku ta sufri. Ora nos ta ekspresá nos felisidat i gratitut na Dios, spesialmente den públiko, nos mester ta konsiente di esnan ménos afortuná. Sigur, nos lo por tabatin kosnan bon na e momento akí, pero ken no sa di hendenan, tur rònt di nos, ku ta sufriendo teriblemente? Resa Salmonan asina por yuda nos pa no lubidá esnan ku ta pasando a traves di momentonan difísil. E Salmonan mester lanta den nos kompashon i un deseo pa ministrá na esnan ku ta sufriendo manera Hesus a hasi.

“E mundu akí ta un hospital enorme pa enfermedatnan infeksioso, pero Kristu a bin pa kura esnan malu, pa proklamá liberashon na e koutivonan di Satanas. E tabata den su Mes salú i fortalesa. El a duna Su bida na esnan malu, esnan aflihí, esnan poseí di demoño. E no a rechasá niun hende ku a bin pa risibí Su poder kurativo. E tabata sa ku esnan ku tabata pidiE yudansa a trese enfermedat riba nan mes; tòg E no a rechasá pa kura nan. I ora birtut di Kristu tabata drenta den e pober almanan akí, nan a ser konvensé di piká, i hopi tabata saná di nan enfermedat spiritual, komo tambe di nan enfermedatnan físiko. E evangelio ainda ta poseé e mesun poder, i dikon nos lo no mester presensiá awe e mesun resultadonan?”—Ellen G. White, Welfare Ministry, p. 24, 25.

Ken bo konosé, awor mes, ku tin mester di no solamente bo orashonnan sino bo toke di ministrashon tambe?

Lesa Salmo 42:8 i Ellen G. White, “Poetry and Song,” p. 159–168, den Education. Kon orashon i kanto ta relashoná ku otro di akuerdo ku e tekstonan inspirá akí?

Ellen G. White ta deskribí e Salmonan penitente di David (por ehèmpel, Salmo 51) komo e lenguahe di su alma i orashonnan ku ta ilustrá e naturalesa di berdadero doló pa piká (lesa Steps to Christ, p. 24,25). E ta kurashá kreyentenan pa memorisá tekstonan for di e Salmonan komo e medio di fomentá e sentido di presensia di Dios den nan bida i enfatisá Hesus su práktika di alsa Su bos ku Salmonan ora E topa ku tentashon i miedu opresivo. Tambe e ta remarká: “kuantu biaha, pa medio di palabranan di kanto santu, ta habri den e alma e fuentenan di penitensia i fe, di speransa i amor i goso! . . . En realidat, hopi kantika ta orashon.”— Education, p. 162–168.

Ora nos resa i kanta e Salmonan, nos ta asumí e persistensia, perseveransia, kurashi, i speransa di e salmistanan. Nan ta kurashá nos pa sigui nos bida spiritual i ta konsolá nos ku nos no ta nos so. Otro hendenan, meskos ku nos, a pasa a traves di momentonan skur i sinembargo tabata triunfante, pa grasia di Dios. Na mes momento, e Salmonan ta revelá na nos e indisionan di Kristu su interseshon ferviente na nos fabor, ya ku semper E ta biba pa resa pa nos (Hebr. 7:25).

Envolví e Salmonan den orashon i adorashon ta hasi e komunidat kreyente konsiente di henter e skala di eksperensia humano i ta siña e adoradónan pa envolví den e vários fasetanan di e eksperensia ei den adorashon. E Salmonan ta orashonnan i kantonan divino-humano. Pa e motibu ei, inkluí e Salmonan kontinuamente den adorashon ta trese e komunidat kreyente na e sentro di Dios su boluntat i poderoso grasia ku ta sana.

Preguntanan pa Diskushon:

Dikon orashon spontáneo, sin guia, no ta e úniko forma di resa? Kon nos bida di orashon por benefisiá di e Salmonan, e orashonnan bíbliko?

Kon e Salmonan por enrikesé nos eksperensia di orashon komunitario? Diskutí algun maneranan práktiko ku bo iglesia lokal por fomentá e uso di Salmonan den su sirbishinan di adorashon.

Kiko e Salmonan ta revelá tokante e komplehidat di e peregrinashon humano di fe i e poder di Dios su grasia ku ta sana?