Señor ta Reina

13 di yanüari

Lesa pa e Estudio di e Siman Akí:

Salmo 8; Salmo 100; Salmo 97; Salmo 75; Salmo 105:7−10; Gal. 3:26–29; Salmo 25:10.

Versíkulo di Memoria:

“SEÑOR ta reina, E ta bistí ku mahestat; SEÑOR a bisti i a faha Su mes ku fortalesa; di bèrdat, mundu ta firmemente stablesí, asina ku e lo no wòrdu moví” (Salmo 93:1, NKJV).

E Salmonan ta mantené firmemente e kreensia fundamental den e reino soberano di Dios. Señor a krea i ta sostené tur kos ku El a krea. E ta e Rei soberano riba henter mundu, i E ta goberná mundu ku hustisia i rektitut. Su leinan i statutonan ta bon i ta trese bida na esnan ku warda nan. Señor ta un Hues hustu ku ta sigurá ku mundu ta permanesé bon ordená, i E ta hasi esei rekompensando esnan hustu i kastigando e malbadonan, pero den Su tempu, no esun di nos.

Dios su pakto ku Israel ta hunga un ròl spesial den sigurá e mundu pasobra e ta anunsiá e salbashon di Señor. Señor a adoptá Israel komo Su poseshon di mas presioso, hasiendo Israel, di tur e nashonnan, Su pueblo. Señor ta fiel na Su pakto i ta sigui kuida Su tou apesar di nan infidelidat i, tin biaha, rebelion abierto.

E gobièrnu soberano di Señor pues ta hasi e mundu firmemente establesí i sigur. E salmistanan ke pa e lesadó komprendé su bèrdat fundamental. Ku e kòsmovishon akí komo nan faro, e salmistanan ta buska pa prosperá i pa sirbi Dios ku deboshon indiviso.

* Studia e lès di e siman akí pa prepará pa Sabat, 20 di yanüari.

Lesa Salmo 8 i Salmo 100. Kon ta deskribí Dios i hende den e Salmonan akí? Kiko e Salmonan akí ta revelá tokante e karakter di Dios?

Kreashon ta hunga un ròl krusial den e Salmonan, den defensa di e soberania di Dios. E shelunan, ku ta “e obra di Su man”, ta proklamá Su gloria i poder (Salmo 19:1−4, Salmo 97:6). E nòmber di Dios ta mahestuoso den henter tera (Salmo 8:1,9). Señor a krea tur kos; E no tin prinsipio (Salmo 93:2) ni fin (Salmo 102:25−27). E ta eterno i superior riba e diosnan di e nashonnan, ku ta solamente “e obra di mannan di hende” (Salmo 115:4), nada mas. E ídolonan “tin man, ma nan no por fula (Salmo 115:7); pa loke ta Señor, “den Kende Su man e profundidatnan di tera ta. . . . Su mannan a forma e tera seku” (Salmo 95:4,5).

Vários salmo ta deskribí e poder di Dios riba e forsanan di naturalesa ku otro nashonnan tabata kere di ta divino (por ehèmpel, Salmo 29, Salmo 93, Salmo 104). E salmonan akí ta reiterá e afirmashon ku Señor ta reina riba henter kreashon i ta supremo den poder i dignidat. Salmo 100:3 ta toka un forma sutil di idolatria, abilidat di yuda bo mes kurpa, enfatisando ku Dios a traha nos, “i no ta nos a traha nos mes”.

Kreashon ta testifiká tambe di e amor di Dios. Tur kos ku ta eksistí ta debe su eksistensia na Dios, ku ta sostené bida tambe (Salmo 95:7, Salmo 147:4−9). Nota ku Dios no solamente a duna hende eksistensia, El a hasi Israel antiguo “Su pueblo, i e karnénan ku E ta pastoriá” (Salmo 100:3). E noshon di Su pueblo: i “Su karnénan” ta revelá Dios su deseo pa un relashon será ku Su pueblo.

Solamente e Kreador tin poder pa bendishoná i pone Su pueblo oumentá, i por lo tantu, E ta e Uniko digno di nan adorashon i konfiansa. Numeroso salmo ta yama tur kos ku tin rosea, henter tera, laman, i tur kos den dje pa grita di goso dilanti di Señor.

Ta mira e gloria di Dios den e kreashon, asta den e kreashon terenal kaí, i e Salmonan ta mustra na Dios so komo digno di adorashon.

“Ta kiko hende ta, ku Bo ta kòrda di dje? I e yu di hende, ku Bo ta hasi kaso di dje?” (Salmo 8:4). Kiko ta bo reakshon riba Dios komo bo Kreador? Ora Dios yama e streanan na nan nòmber (Salmo 147:4), kuantu mas bo ta kere ku Dios ta preokupá pa bo?

Estrechamente uní, de echo inseparablemente un, na Señor komo Kreador tin Señor komo Soberano, komo Gobernante. Salmo 93:1, Salmo 96:10, Salmo 97:1, i Salmo 99:1 ta proklamá e deklarashon “Señor ta reina” di forma solèm, pero ta tende su ekonan a lo largu di e Buki di Salmonan.

Señor ta bistí ku honor, mahestat, i fortalesa (Salmo 93:1, Salmo 104:1). E ta rondoná ku nubianan i skuridat (Salmo 97:2), pero tambe E ta kubri su Mes “ku lus manera ku un mantel” (Salmo 104:2). E metáforanan akí ta eksaltá e poder i splendor di e Rei i ta skohé kuidadosamente pa ekspresá e grandesa úniko di Dios ku ta mas ayá di komprendementu humano.

Lesa Salmo 97. Kiko ta karakterisá e reinado di Señor? (Salmo 97:2, 10) Kiko ta e teritorio di Su reinado? (Salmo 97:1,5,9)

E gobièrnu di Señor ta keda demostrá den Su obranan di kreashon (Salmo 96:5), salbashon (Salmo 98:2), i huisio (Salmo 96:10). Señor ta establesé Su monarkia riba henter mundu (Salmo 47:6−9). E reino di Dios ta un reino eterno, sin igual den poder i mahestat (Salmo 45:6; Salmo 93:1,2; Salmo 103:19). E reinado di Señor ta establesé riba mizerikòrdia, hustisia, i rektitut, i e ta trese órden i stabilidat na e mundu kreá (Salmo 98:3, Salmo 99:4). E reinado di Dios ta uni tantu adoradónan selestial komo terenal den e alabansa di Dios (Salmo 103:20−22, Salmo 148). Hopi salmo ta visualisá ku henter humanidat ta rekonosé e gobièrnu soberano di Dios (Salmo 96:10, Salmo 97:1, Salmo 99:1, Salmo 145:11–13).

Pero no ta tur hende, òf asta gobernantenan terenal, ta hasi esei, a lo ménos pa awor. E malbadonan, ku ta nenga i hasi bofon di Señor i ta oprimí Su pueblo, konstantemente ta desafiá e reinado di Dios (Salmo 14:1, Salmo 74:3−22). Aunke desafiá pa e prosperidat di algun hende malbado i aflihí pa e pasenshi di Dios, e salmista ta konfia den e gobièrnu soberano di Dios i ta sigui floresé den e siguransa di e huisionan hustu di Dios (Salmo 68:21, Salmo 73:17−20). Pa fe e pueblo di Dios ta alegrá den e inougurashon di e reino di Dios a traves di e ministerio redentor di Kristu i ta spera riba e ehekushon di e reino na e segundo binida di Kristu (Mat. 12:26−28, 1 Kor. 15:20–28).

“Boso ku ta stima SEÑOR, odia maldat” (Salmo 97:10). Dikon nos amor pa Dios mester pone nos odia maldat? Kon e dos konseptonan akí ta relashoná ku otro?

Lesa Salmo 75. Dikon e bromamentu di e malbado ta en bano?

Komo e Rei soberano, Señor ta tambe un Dunadó di lei (Salmo 99:7) i un Hues (Salmo 98:9, Salmo 97:2). Konstantemente e malbadonan ta menasá e órden hustu ku Dios a establesé den mundu, pero Señor lo husga mundu i trese e gobièrnu di maldat na su fin (Salmo 75:8−10, Salmo 96:13).

Den Salmo 75, vários imágen ta deskribí e destrukshon irevokabel di e malbadonan. E imágen di un kopa ku biña kòrá (Salmo 75:8) ta transmití e intensidat di e furia di Dios (Jer. 25:15, Rev. 14:10). E kòrtamentu di e kachunan di e malbadonan ta deskribí e fin di nan poder i dominio, miéntras E lo halsa e kachunan di e hustunan (Salmo 75:10). Dios ta skohe un “tempu stipulá” (Salmo 75:2,) òf “momento apropiá” pa Su huisio. E huisio ehekutivo akí klaramente lo tuma lugá na fin di tempu (Salmo 96:13, 1 Kor. 15:23−26).

Señor ta sondia kurason di hende komo parti di Su huisio. Lesa Salmo 14:2. E ta pone nos kòrda riba Génesis 6:5, 8. Tur dos teksto ta mustra ku e ehekushon di Dios su huisio di e mundu ta presedí pa Dios su saminashon di bida di e hendenan i ta buska ken E por salba. Tin ora ta yama e huisio akí “e huisio investigador”, ora Dios ta defendé e hustunan i ta disidí destino di e malbadonan.

Kon e ta funshoná?

Na promé lugá, Dios ta libra Su pueblo for di e malbadonan (Salmo 97:10, Salmo 146:9) i ta koroná esnan humilde ku salbashon (Salmo 149:4). Na di dos lugá, Dios ta destruí pa semper e malbadonan ku no arepentí (Salmo 97:3). Algun salmo ta deskribí di forma poétiko e inutilidat di armanan humano kontra e Hues divino (Salmo 76:3–6). Señor ta tambe un Dios ku ta pordoná, aunke E ta kastigá hende su barbaridatnan (Salmo 99:8). E pueblo di Dios, no solamente e malbadonan, lo duna kuenta na Dios (Salmo 50:4, Salmo 135:14).

E Salmonan ta transmití e mesun noshon ku otro tekstonan bíbliko ta ekspresá, ku e huisio di Dios ta kuminsá ku e pueblo di Dios i ta ekstendé te na henter mundu (Deut. 32:36, 1 Pe. 4:17). E salmista ta sklama na Dios pa huzg’é pero ta dependé riba e hustisia di Dios pa defend’é (Salmo7:8−11; Salmo 139:23,24).

E Salmonan ta yama nos pa regosihá den antisipashon di e huisionan di Dios (Salmo 67:4, Salmo 96:10−13, Salmo 98:4−9). Kon e huisio di Dios ta bon notisia pa esnan kubrí pa e sanger di Kristu?

E tema di e huisio di Dios ta lanta un pregunta signifikante: Kon e pueblo di Dios por tin pas ku Dios i siguransa di salbashon na momento di huisio? Lesa Salmo 94:14, Salmo 105:7−10, Dan. 7:22.

E pueblo di Dios ta sigur pasobra Señor a pone Su lugá di biba na Sion (Salmo 76:1,2) i a establesé Su aliansa eterno ku nan komo Su poseshon tesorá (Salmo 94:14, Salmo 105:8–10). Dios no ta simplemente primintí di no rechasá Su pueblo di pakto; E ta traha aktivamente pa tene nan sigur den djE. E ta pordoná nan pikánan (Salmo 103:3); E ta instruí, ta bendishoná, i ta fortalesé Su pueblo (Salmo 25:8−11, Salmo 29:11, Salmo 105:24). Dios ta duna Su huisionan pa bira e pueblo na hustisia i pa demostrá ku Dios ta preokupá pa nan (Salmo 94:8–15).

Salmo 105 komo un totalidat ta mustra Señor su fieldat na Su aliansa den historia di Israel. Den tur kos ku tabata sosodé, e bon i e malu, Dios tabata ei. Den Su providensia, El a guia Hose na Egipto i a traves di dje El a salba Su pueblo i e nashonnan den e área ei durante e hamber severo (Salmo 105:16−24). Señor a lanta Moises pa guia Su pueblo for di sklabitut egipsio, loke el a hasi ku señalnan i maravianan na nan fabor (Salmo 105:25−38).

Señor a duna Su pueblo e Tera Primintí (Salmo 105:11, 44) i Su protekshon kontinuo (Salmo 105:12−15). El a multipliká nan (Salmo 105:24), a libra nan for di nan señornan (Salmo 105:37,38), i a proveé pa nan nesesidatnan diario (Salmo 105:39−41). Señor ta indudablemente den kontrol soberano di tur loke ta envolví Su pueblo, un bèrdat ku e salmistanan tabata ke pa Su pueblo no lubidá nunka.

Ora Dios rekordá Su aliansa, e ta envolví mas ku konosementu òf memoria pasobra semper e ta hiba na akshon (Gen. 8:1, 1 Sam. 1:19, Salmo 98:3, Salmo 105:42–44). Di mes manera, ora ta yama e pueblo pa rekordá Dios su maravianan i huisionan, e ta nifiká ku e pueblo mester biba den formanan ku ta honra Dios.

Den e aliansa akí, e yamada prinsipal di Israel ta pa permanesé fiel na e aliansa dor di warda e leinan di Dios (Salmo 78:5−7, Salmo 105:45). E pueblo di Dios ta yamá tambe pa duna testimonio tokante Dios na otro nashonnan, pasobra Señor ta deseá pa tur nashon uni ku Su pueblo Israel (Salmo 105:1,2). Asina mundu ta sigur den e pakto protektor di e Dios todopoderoso i miserikòrdioso (Salmo 89:28−34).

Kiko nos tin den Hesus, ku ta mustra dikon e promesanan akí, hasí na Israel antiguo, awor por apliká na nos? (Lesa Gal. 3:26–29.)

Lesa Salmo 19:7; Salmo 93:5; Salmo 119:165; Salmo 1:2, 6; Salmo 18:30; i Salmo 25:10. Kua liña komun ta kore a lo largu di nan tur?

E supremasia di Señor den mundu komo e Kreador soberano, Rei, i Hues tin implikashonnan teológiko pa e kredibilidat di Su testimonionan. E testimonionan (hebreo ‘edut, “dekreto”, “lei”) ta referí na e kurpa di leinan i ordenansanan ku kua Señor ta goberná e bida religioso i sosial di Su pueblo (Eks. 32:15). Nan ta “masha sigur” (Salmo 93:5), reflehando e stabilidat i permanensia di e trono di Dios i e mundu ku Dios a krea i ta sostené (Salmo 93:1,2). E palabra hebreo tradusí komo “sigur” (e palabra papiamentu amèn ta derivá di e palabra akí) ta transmití e noshon di konfiabilidat, fieldat, i firmesa (2 Sam. 7:16, 1 Kron. 17:23). E leinan di Dios ta inkambiabel i indestruktibel.

Dios ta garantisá integridat di Su promesanan i mandatonan. E fieldat di Dios ta tantu totalmente trankilisante dor di garantisá e karakter inmutabel di Su gobièrnu, komo totalmente eksigente dor di pidi kontestanan di konfiansa i obediensia na Dios.

Na mes momento, ta deskribí e falta di hustisia den mundu di forma poétiko komo un sakudimentu di e fundeshi di tera (Salmo 18:7, Isa. 24:18–21). E leinan di Dios ta instruí e pueblo den e kaminda di bida hustu ku por resistí e huisio di Dios. E hustunan, pues, lo no keda sakudí, pasobra nan ta ankrá firmemente den e lei di Dios, ku ta proveé stabilidat i seguridat, i nan kurason ta determiná (hebreo kun ta nifiká tambe “ta firme”, “ta sigur”) den Señor (Salmo 112:1,6,7). Nada ta pone esnan ku ta warda e lei di Dios trompeká (Salmo 119:165), ku ta nifiká e protekshon i guia di Dios den bida (Salmo 1:2,3,6).

Ta deskribí e Palabra di Dios komo e lus na pia di e salmista, i asina e ta proteh’é for di e trampanan skondí di e enemigu (Salmo 119:105,110). Gran pas, ku esnan ku stima e lei di Dios ta gosa di dje (Salmo 119:165), opviamente no ta resultá di un ousensia total di prueba (Salmo 119:161). E ta derivá mas bien di keda den e presensia di Dios i tin un relashon sano kunE.

Kua ta maneranan práktiko ku warda e leinan i reglanan i testimonionan di Dios a yuda bo den bo bida? Na otro banda, kiko bo a sufri pa motibu di a violá nan?

Lesa Salmo 86:5, 15; Ellen G. White, “God’s Love for Man,” p. 9–15, den Steps to Christ. Kon e bèrdat ku Dios ta amor ta yuda nos komprendé mihó e vários deskripshonnan di Dios i Su echonan den e Salmonan?

E estudio di e siman akí ta enfoká riba algun deskripshonnan klave di Dios i Su aktividatnan, ku ta establesé e mundu i ta hasié firme i sigur. E salmistanan ta apelá na Dios, kende ta e Kreador, Rei, Hues, Salbador di aliansa, i Dunadó di lei. E ròlnan den mundu ku Dios ta okupá ta reflehá nan mes den vários otro di e nòmbernan i títulonan di Dios, inkluyendo Wardadó (Salmo 23:1, Salmo 80:1), Baranka di Salbashon (Salmo 95:1), i Tata (Salmo 68:5, Salmo 89:26). Den mundu nos por ta sigur i seif, asta meimei di e konfushon di e gran konflikto, pasobra Dios ta soberano i fiel den tur loke E hasi i bisa. Aunke e temanan teológiko akí di ningun manera ta agotador, nan ta sugestivo di e vários maneranan den kua Dios ta revelá su Mes den e Salmonan.

Segun ku nos ta sigui studia e Salmonan, ta importante pa kòrda lesa e Salmonan den lus di Dios su karakter di amor i grasia i Su plan pa salba i restablesé mundu. “Mas nos studia e karakter divino den lus di e krus, mas nos ta mira mizerikòrdia, ternura, i bendishon mesklá ku rason i hustisia, i mas klaramente nos ta diserní innumerabel evidensianan di un amor ku ta infinito i un piedat tierno ku ta superá e simpatia anhelante di un mama pa su yu kabesura.”—Ellen G. White, Steps to Christ, p. 15. Den e Salmonan, asta ora e pueblo ta enfrentá e huisio di Dios pa nan rebelion, nan ta sigui yama riba Dios pasobra nan sa ku e rabia di Dios ta solamente pa un tempu, pero Su mizerikòrdia ta eterno (Salmo 103:8).

Preguntanan pa Diskushon:

Dikon komprendé e realidat i popularidat di e gran konflikto ta krusial den yuda nos komprendé ku, apesar di e gobièrnu i soberania final di Dios, ainda tin hopi konfushon i sufrimentu den nos mundu? Dikon e motibu di e gran konflikto ta asina útil pa nos?

Kon e kerensia den Dios komo Kreador mester forma nos komprendementu di nos mes i nos relashon ku restu di kreashon? Kiko ta pasa ora hende desviá for di e bèrdat ei (Salmo 106:35−42)?

Kiko tabatin robes ku e ídolonan di e nashonnan den tempunan bíbliko (Salmo 115:4−8)? Ke tal di ídolonan moderno? Dikon nan ta mesun peligroso pa nos kaminata ku Señor?

Kon e pueblo di Dios mester biba, sabiendo ku e huisio di Dios ta kuminsá ku Su pueblo? Kon Dios ta husga Su pueblo i ku ki meta?