Señor ta Skucha i ta Libra

20 di yanüari

Lesa pa e Estudio di e Siman Akí:

Salmo 139:1–18; Salmo 121; Salmo 17:8; Mat. 23:37; 1 Kor. 10:1–4; Hebr. 4:15,16.

Versíkulo di Memoria:

“E hustunan ta sklama i SEÑOR ta tende, i ta libra nan for di tur nan angustianan” (Salmo 34:17, NKJV).

Kada bes di nobo, e Salmonan ta asentuá e bèrdat ku e Señor soberano, kende a krea i ta sostené e universo, ta revelá Su mes tambe komo un Dios personal ku ta inisiá i ta sostené un relashon ku Su pueblo.

Dios ta serka di Su pueblo i di Su kreashon, tantu den shelu komo riba tera (Salmo 73:23,25). Aunke El “a establesé Su trono den shelu” (Salmo 103:19) i “ta kabalgá riba e nubianan” (Salmo 68:4), E ta tambe “serka di tur esnan ku ta sklama na djE, serka di tur esnan ku ta sklama na djE den bèrdat” (Salmo145:18). E Salmonan ta defendé firmemente e bèrdat ku Señor ta e Dios bibu, kende ta aktua na fabor di esnan ku sklama na djE (Salmo 55:16–22). E Salmonan ta signifikante hustamente pasobra nan ta inspirá pa, i dirigí na, e Dios bibu, ku ta skucha i ta kontestá orashonnan.

Nos mester kòrda ku e reakshon korekto riba e serkania di Señor ta konsistí di un bida di fe den djE, i di obediensia na Su mandamentunan. Nada ménos ku e fe i obediensia akí lo ta aseptabel p’E, manera e historia di Israel a revelá hopi biaha.

* Studia e lès di e siman akí pa prepará pa Sabat, 27 di yanüari.

Lesa Salmo 139:1–18. Kon e ta deskribí e poder di Dios (Salmo 139:1−6), Su presensia (Salmo 139:7−12), i Su bondat (Salmo 139:13−18) di forma poétiko? Kiko e grandesa di Dios ta bisa tokante e promesanan di Dios?

Bo a yega di ke yuda un hende pero no tabatin e medionan? Di mes manera, algun hende a purba yuda bo pero no a komprendé bo nesesidatnan. Diferente for di asta e hendenan di mas amoroso i di bon intenshon, Dios tin tantu e konosementu perfekto di nos komo di nos sirkunstansianan, i tambe e medionan pa yuda nos. P’esei, Si promesanan di ayudo i liberashon no ta tópikonan superfisial sino siguransanan firme.

Dios su konosementu di e salmista ta asina grandi i úniko ku asta e barika di su mama no por a skond’é for di Dios (Salmo 139:13,15). Konosementu divino ta pertenesé na tempu (Salmo 139:2), ser interior (Salmo 139:2,4), i espasio (Salmo 139:3), henter e eksistensia di e salmista. E konosementu maravioso di Dios ta resultado di Su kreashon i relashon serkano ku hende i ta manifestá su mes den Su kuido pa nan.

E bèrdat maravioso akí tokante ku Dios konosé nos íntimamente no mester spanta nos sino, en kambio, hala nos den e brasanan di Hesus i loke El a logra pa nos na krus. Pasobra pa medio di fe den Hesus, Dios a duna nos Su hustisia, “e hustisia di Dios” Mes (Rom. 3:5,21).

E presensia di Dios ta destaká su mes representando Dios komo alkansando mes leu ku “Seol” (sheol, “graf”) i “skuridat” (Salmo 139:8,11,12), lugánan no típikamente deskribí komo kaminda Dios ta biba (Salmo 56:13). Ta deskribí Su presensia tambe komo tumando “ala di mardugá” (ost) pa alkansá “e partinan mas alehá di laman (wèst) (Salmo 139:9). Loke e imágennan akí ta transmití ta e bèrdat ku no tin niun lugá den universo kaminda nos por ta for di e alkanse di Dios. Aunke Dios no ta parti di e universo, manera algu hende ta kere, E ta serka di tur kos, E no a solamente kre’é sino E ta sosten’é tambe (lesa Hebr. 1:3).

Komo Esun ku sa tur kos tokante nos, Dios por yuda i restourá nos. E realisashon fresku di Su grandesa ta inspirá un eksploshon di alabansa i konfiansa renobá den e salmista. E ta duna bonbiní na investigashon divino komo e medio ku por kita kualke kos for di su bida ku ta duna su relashon ku Dios problema.

Algun hende lo haña e echo ku Dios sa asina tantu tokante nan, asta nan sekretonan di mas skur, un pensamentu mas bien spantoso. Dikon, anto, e evangelio ta nos úniko speransa?

Lesa Salmo 40:1–3, Salmo 50:15, Salmo 55:22, i Salmo 121. Kon Dios ta envolví den nos asuntunan diario?

Señor ta revelá Su mes den Skritura komo e Dios bibu ku ta aktua na fabor di esnan ku sklama na djE.

Pa e salmista, “Mi a pone SEÑOR semper mi dilanti” (Salmo 16:8). P’esei, e ta konfia Dios i ta sklama na djE (Salmo 7:1, Salmo 9:10). Señor lo skuch’é asta ora e ta sklama for di e “profundidatnan” (Salmo 130:1,2), transmitiendo ku ningun sirkunstansia di bida ta skapa e dominio soberano di Dios. Asina, e gritu di e salmista, no importá kon urgente, nunka ta falta speransa.

Salmo 121, mientrastantu, ta selebrá e poder di e Kreador den bida di e individuo fiel. E poder akí ta inkluí:

E resultado final? E salmista tabata konfia den e kuido amoroso di Dios. Nos, naturalmente, mester hasi mesun kos.

Kua ta algun maneranan práktiko ku bo por eksperensiá e realidat di Dios su kuido mihó? Kon bo por koperá mihó ku Dios pa asina permitiE obra denter di bo i pa bo?

Lesa Salmo 17:7–9, Salmo 31:1–3, i Salmo 91:2–7. Kiko e salmista ta hasi den tempu di problema?

E salmista ta topa ku vários sorto di problema i, den nan, ta bira na Señor, kende ta un refugio den tur atversidat. Konfiansa ta un eskoho deliberá pa rekonosé e soberania di Dios riba un hende su bida den tur sirkunstansia. Si konfiansa no ta funshoná den atversidat, e ora ei e lo no funshoná niun kaminda.

E testimonio di e salmista, “Lo mi bisa SEÑOR: ‘Mi refugio i mi fòrti, mi Dios, den Kende mi ta konfia!’ ” (Salmo 91:2), ta surgi di su eksperensia di pasado ku Dios i awor ta sirbi pa fortalesé su fe pa futuro. E salmista ta yama Dios e Altísimo i e Omnipotente (Salmo 91:1,2), rekordando e grandesa di su Dios, ku ta surpasá tur kos.

E salmista ta konta tambe di e seguridat ku un hende por haña den Dios: e “lugá sekreto” (“amparo” òf “lugá di skonde”), “sombra” (Salmo 91:1), “refugio”, “fòrti” (Salmo 91:2), “alanan”, “eskudo”, “harnas” (Salmo 91:4), i “lugá di biba” (Salmo 91:9). E imágennan akí ta representá hafnan sigur den kultura di e salmista. Hende mester solamente pensa riba e kayente insoportabel di e solo den e parti ei di mundu pa asina apresiá e sombra òf kòrda riba e tempunan di guera den historia di Israel pa asina balorá e seguridat proveé pa e eskudo òf e fòrti.

Lesa Salmo 17:8 i Mateo 23:37. Kua imágen ta uza aki, i kiko e ta revelá?

Un di e metáforanan di mas íntimo ta esun ku ta referí na ta “bou di e sombra di Bo alanan” (Salmo 17:8, Salmo 57:1, Salmo 63:7). E metáfora akí ta provoká konsuelo i siguransa dor di impliká e protekshon di un mama para. Ta kompará Señor ku un águila ku ta protehá su yunan ku su alanan (Eks. 19:4, Deut. 32:11) i ku un galiña ku ta hunta su yunan bou di su alanan (Mat. 23:37).

Kon, sinembargo, nos ta dil ku e momentonan ora kalamidat dal, i ta parse ku nos no por mira e protekshon di Señor? Dikon e troumanan akí no ta nifiká ku Señor no tei huntu ku nos?

Lesa 1 Korintionan 10:1–4. Kon Pablo ta deskribí e storia di e Eksodo? Kua lès spiritual e ta trata na siña kuné?

Lesa Salmo 114. Kon e liberashon divino di e pueblo di Israel for di Egipto ta deskribí di forma poétiko akinan?

Ki un deskripshon poétiko ta duná den Salmo 114 di Dios su liberashon maravioso di Su yunan for di e sklabitut di Egipto. A lo largu di henter Tèstamènt Bieu, i asta den esun Nobo, tabata mira e liberashon for di Egipto komo un símbolo di e poder di Dios pa salba Su pueblo. Den e versíkulonan akí den Korintionan Pablo ta hasi hustamente esei, mirando henter e berdadero storia komo un metáfora, un símbolo di salbashon den Hesu-Kristu.

Salmo 114 ta deskribí tambe liberashon divino a traves di e soberania di Dios komo Kreador riba e podernan di naturalesa, kua ta e manera kon El a salba Su pueblo den e Eksodo. Laman, riu Jordan, i e serunan, di forma poétiko, ta representá e podernan natural i humano ku tabata oponé Israel riba nan kaminda pa e Tera Primintí (Deut. 1:44, Hos. 3:14−17). Dios, sinembargo, ta soberano riba nan tur.

De echo, pa hopi di Dios su yunan den tur tempu i tur kaminda, e kaminda pa e Herusalèm selestial ta yen di peliger. E Salmonan ta enkurashá nan pa wak mas ayá di e serunan i den direkshon di e Kreador di shelu i tera (Salmo 121:1).

E spiritu di Salmo 114 ta kaptá pa Hesus su kalmamentu di e tormenta riba laman i Su proklamashon ku e iglesia no tin nada di teme pasobra El a vense mundu (Mat. 8:23−27, Juan 16:33).

E gran echonan di Señor na fabor di Su pueblo mester inspirá henter tera pa tembla den Su presensia (Salmo 114:7). Mester komprendé e temblamentu komo rekonosé i adorá mas bien ku ta yen di miedu (Salmo 96:9, Salmo 99:1). Ku Dios na nan banda, kreyentenan no tin nada di teme.

Kua ta algun di e peligernan spiritual ku nos ta enfrentá komo kreyentenan, i kon nos por siña lèn riba e poder di Señor pa protegé nos di sukumbí na e peligernan akí ku ta mes real pa nos awor ku nan tabata pa e salmista?

Lesa Salmo 3:4; Salmo 14:7; Salmo 20:1–3; Salmo 27:5; Salmo 36:8; Salmo 61:4; i Salmo 68:5, 35. Di unda yudansa ta bini den e tekstonan akí?

E motibu di refugio i yudansa spiritual i físiko ta aparesé notablemente den konteksto di e santuario. E santuario ta un lugá di yudansa, di seguridat, i di salbashon. E santuario ta proveé un refugio pa esnan den problema. Dios ta defendé e wèrfanonan i biudonan i ta duna fortalesa na Su pueblo for di Su santuario. Ora “For di Sion, e perfekshon di bunitesa, Dios a resplandesé” (Salmo 50:2), e huisionan hustu di Dios ta proklamá, i e bendishonnan di Señor ta sali padilanti (Salmo 84:4, Salmo 128:5, Salmo 134:3).

E refugio den e santuario ta surpasá e seguridat proveé pa kualke otro lugá den mundu pasobra den e santuario Dios ta biba en persona. E presensia di Dios, no simplemente e tèmpel komo un edifisio firme, ta proveé seguridat. Di mes manera, siendo e seru kaminda Señor ta biba, Seru Sion ta surpasá otro serunan aunke den su mes e tabata un seru simpel (Salmo 68:15,16; Isa. 2:2).

“Pasobra nos no tin un Sumosaserdote ku no por kompadesé di nos debilidatnan, sino Un ku a wòrdu tentá den tur kos meskos ku nos, ma tòg sin piká. P’esei, laga nos aserká e trono di grasia ku konfiansa, pa nos risibí mizerikòrdia i haña grasia pa yuda den tempu di nesesidat” (Hebr. 4:15,16).

Den ki formanan e tekstonan akí ta paralelo na loke e salmista ta bisa tokante e santuario?

E santidat di e santuario di Dios ta insitá e salmista pa rekonosé ku tur hende ta pekaminoso i kompletamente inmeresí di e fabor di Dios, i e ta afirmá ku liberashon ta basá riba e fieldat i grasia di Dios so (Salmo 143:2, 9–12). Nada den nos ta duna nos kualke mérito dilanti di Dios. Ta solamente ora hende para den un relashon korekto ku Dios a traves di arepentimentu i aseptashon di e grasia i pordon di Dios, nan por roga pa e seguransa di liberashon di Dios. E servisio di santuario tabata representá e salbashon hañá den Hesus.

Lesa Ellen G. White, “The Night of Wrestling,” p. 195–203, den Patriarchs and Prophets. Kiko nos por siña di e eksperensia di Jacob tokante e poder di orashon persistente i konfiansa inkondishonal den Dios?

E Salmonan ta fortalesé nos fe den Dios kende ta e Refugio ku nunka ta faya pa esnan ku ta konfia nan bida den Su mannan poderoso. “Dios lo hasi gran kosnan pa esnan ku ta konfia den djE. E motibu pa kiko Su pueblo profesá no tin forsa mas grandi ta ku nan ta konfia asina tantu riba nan mes sabiduria, i no ta duna Señor un oportunidat pa revelá Su poder na nan fabor. E lo yuda Su yunan kreyente den tur emergensia si nan lo pone nan konfiansa kompletu den djE i obedes’E fielmente.”—Ellen G. White, Patriarchs and Prophets, p. 493.

Sinembargo, algun Salmo por plantia un desafio serio ora loke nan primintí, i nos situashon aktual, no ta kuadra. Na momentonan manera esaki, nos tin ku djis siña konfia den e bondat di Dios, mas fuertemente revelá na e krus.

Tambe, tin biaha por uza algun salmonan pa fomentá speransanan falsu. Hesus su reakshon riba Satanas su uso korupto di Salmo 91:11, 12 ta mustra ku no mester konfundí konfia Dios ku tenta Dios (Mat. 4:5−7) òf di manera imprudente pidi Dios hasi algu ku ta kontrali na Su boluntat.

“E viktorianan di mas grandi pa e iglesia di Kristu òf pa e kristian individual no ta esnan ku nan a gana pa medio di talento òf edukashon, pa medio di rikesa òf fabor di hende. Nan ta e viktorianan ku nan a gana den e kamber di oudiensia ku Dios, ora fe ferviente i agonisante tene duru na e brasa poderoso di poder.”—Ellen G. White, Patriarchs and Prophets, p. 203.

Preguntanan pa Diskushon:

Den klas, diskutí e kontesta riba e último pregunta den e estudio di djamars tokante konfia den Dios meimei di atversidat i ora kosnan ta bai teriblemente robes. Kon un hende ta komprendé e kosnan akí i kon nan por sosodé ku hende, asta ku tur e promesanan maravioso den e Salmonan tokante e protekshon di Dios? Pensa riba esaki tambe: e salmista ku a skirbi tokante e promesanan maravioso di Dios, no a sufri atversidat òf sa di hendenan fiel ku tambe a sufri atversidat?

Kon nos por desaroyá un konfiansa inkondishonal den Dios den tur sirkunstansia (por ehèmpel, Salmo 91:14; Salmo 143:8, 10; Salmo 145:18–20) ? Dikon konfiansa den Dios den tempu bon ta krusial pa siña konfi’E den tempu malu tambe?