Kantando e Kantika di Señor den un Pais Straño

27 di yanüari

Lesa pa e Estudio di e Siman Akí:

Salmo 79:5–13; Salmo 88:3–12; Salmo 69:1–3; Salmo 22:1; Salmo77; Salmo 73:1–20; 1 Pe. 1:17.

Versíkulo di Memoria:

“Kon nos por kanta e kantika di SEÑOR na un tera stranhero?” (Salmo 137:4, NKJV).

Nos no tin mester di bai profundo den e buki di Salmonan pa deskubrí ku a ekspresá e Salmonan den un mundu imperfekto, unu di piká, sufrimentu, i morto. Konstantemente maldat ta menasá e kreashon stabil dirigí pa e Señor soberano i Su leinan hustu. Miéntras piká ta korumpí e mundu mas i mas, tera a bira kada bes mas “un tera straño” pa e pueblo di Dios. E realidat akí ta krea un problema pa e salmista: Kon biba un bida di fe den un tera straño?

Manera nos a mira kaba, e salmistanan ta rekonosé e gobièrnu i poder soberano di Dios, komo tambe Su huisionan hustu. Nan sa ku Dios ta e refugio eterno i ku nunka ta faya i yudansa den tempunan di problema. Pa e motibu akí, e salmistanan tin biaha ta konfundí (ken no ta?) pa e aparente ousensia di Dios i e floresementu di maldat dilanti di e Señor soberano i bon. E reakshonnan di e salmistanan riba e aparente silensio di Dios ta demostrá e naturalesa paradóhiko di e Salmonan komo orashonnan. Den otro palabra, e salmistanan ta reakshoná riba e ousensia persibí di Dios, komo tambe riba e presensia di Dios.

* Studia e lès di e siman akí pa prepará pa Sabat, 3 di febrüari.

Lesa Salmo 74:18–22 i Salmo 79:5–13. Kiko ta den wega akinan?

E salmista ta trata na kapta e gran konflikto entre Dios i e forsanan di maldat, i e ta mustra na e pasenshi inkomprensibel di Dios, komo tambe na Su sabiduria i poder infinito.

E problema di maldat den e Salmonan ta primeramente teológiko; e ta konserní inevitablemente preguntanan tokante Dios. Pues, ta mira e destrukshon di Herusalèm i e tèmpel prinsipalmente komo un skandal divino, pasobra el a proveé un oportunidat pa e paganonan blasfemá Dios. E herensia di Dios (e pueblo di Israel) ta e señal di Su elekshon i aliansa divino (Deut. 4:32−38, Deut. 32:8,9) ku lo no faya nunka. E konsepto di Dios su herensia tambe ta kontené un dimenshon di tempu di fin, komo ku un dia tur nashon lo bira herensia di Dios i lo sirbiE. E noshon ku e nashonnan a invadí e herensia di Dios ta menasá e promesanan divino akí.

No tin duda, e salmista ta rekonosé ku e pikánan di e pueblo a korumpí e relashon di pakto di e pueblo ku Dios i a trese tur e konsekuensianan riba e pueblo (Salmo 79:8, 9). Sobrebibensia di e pueblo ta dependé únikamente riba e intervenshon grasioso di Dios i restourashon di e laso di pakto pa medio di ekspiashon di piká. Señor ta “Dios di nos salbashon”, ku ta transmití Dios su fieldat na Su promesanan di pakto (Salmo 79:9).

Sinembargo, mas importante ku e restourashon di e fortunanan di Israel ta e defensa di e karakter di Dios den mundu (Salmo 79:9). Si e akshonnan malbado di e nashonnan keda sin kastigu, lo parse ku Dios a pèrdè Su poder (Salmo 74:18–23, Salmo 83:16–18, Salmo 106:47). Solamente ora Dios salba Su pueblo, Su nòmber lo ta hustifiká i eksaltá.

Manera awe, e mesun prinsipio tabata eksistí e tempu ei. Nos pikánan, nos dekadensia, nos maldatnan, por trese mal fama no solamente riba nos mes sino, pió ainda, riba e Dios kende su nòmber nos ta profesá. Nos akshonnan robes por tin efektonan spiritual perhudisial riba nos testimonio i mishon, tambe. Kuantu hende a bira for di nos fe pa e akshonnan di esnan ku ta profesá e nòmber di Kristu?

“E honor di Dios, e honor di Kristu, ta envolví den e perfekshon di e karakter di Su pueblo.”—Ellen G. White, The Desire of Ages, p. 671. Kon bo ta komprendé e bèrdat importante akí, i kiko e mester nifiká den bo mes bida kristian?

Lesa Salmo 41:1–4; Salmo 88:3–12; i Salmo 102:3–5,11,23, 24. Kua eksperensianan e tekstonan akí ta deskribí? Den kiko bo por relashoná ku loke ta bisa aki?

E orashonnan akí pa salbashon for di malesa i morto ta demostrá ku e yunan di Dios no ta eksonerá di e sufrimentunan di e mundu akí. E Salmonan ta revelá e aflikshonnan teribel di e salmista. E ta sin forsa, marchitando manera yerba, inkapas di kome, poné un banda huntu ku e mortonan, drumiendo manera esnan matá den graf, repugnante pa su amigunan, sufriendo i den desesperashon. Su wesunan ta pega na su kueru.

Hopi Salmo ta asumí ku Señor a permití e problema pa motibu di desobediensia di Israel. E salmista ta rekonosé ku piká por trese enfermedat; p’esei, e ta referí na e pordon ku ta bini promé ku kurashon (Salmo 41:3,4). Sinembargo, algun Salmo, manera Salmo 88 i Salmo 102, ta rekonosé ku e sufrimentu inosente di e pueblo di Dios ta un echo di bida, no importá kon difísil e ta pa komprendé.

Den Salmo 88, Dios ta enkargá ku hiba e salmista na rant di morto (Salmo. 88:6–8). Nota, sinembargo, ku asta ora e ekspresá e kehonan di mas oudas, e lamento ta klaramente un akto di fe, pasobra si Señor, den Su soberania, a permití problema, E por a restourá e bienestar di Su yu.

Riba drèmpel di graf, e salmista ta rekordá Dios su maravianan, bondat amoroso, fieldat, i hustisia (Salmo 88:10–12). Apesar di su sintimentu ku Dios a dal e, e salmista ta tene na Dios. Aunke e ta sufri, e no ta nenga e amor di Dios i e sa ku Dios ta su úniko salbashon. E apelashonnan akí ta mustra ku e salmista no solamente konosé sufrimentu sino tambe tin un konosementu íntimo di e grasia di Dios i ku nan dos no nesesariamente ta ekskluí otro.

Den algun palabra, tantu e echo di ku Dios ta permití sufrimentu komo Su liberashon ta demostrashonnan di Su supremo soberania. Sa ku Dios ta den kontrol ta inspirá speransa. Ora nos lesa Salmo 88 den lus di e sufrimentu di Kristu, nos ta keda asombrá pa e profundidatnan di Su amor, den kua E tabata dispuesto pa pasa a traves di e porta di morto pa bienestar di humanidat.

Pensa riba Hesus riba e krus i loke El a sufri pa motibu di piká. Kon e realidat ei, ku Dios den Kristu a sufri pió ku kualke di nos, mester yuda nos tene fe asta meimei di momentonan di sufrimentu i prueba?

Lesa Salmo 42:1–3, Salmo 63:1, Salmo 69:1–3, i Salmo 102:1−7. Kiko ta kousa gran doló pa e salmista?

No solamente sufrimentu personal i komunitario ta perturbá e salmista, sino tambe, si no ta mas, Dios su aparente falta di atenshon pa e difikultatnan di Su sirbidónan. Ta sinti e ousensia di Dios meskos ku set intenso den un tera seku (Salmo 42:1–3, Salmo 63:1) i angustia mortal (Salmo 102:2−4). E salmista ta sinti su mes separá for di Dios i ta kompará su mes ku paranan solitario. “Mi a bira manera pelikan di desierto; mi a bira manera shoko di lugánan bandoná. Mi no por drumi, mi a bira manera para solitario riba dak di kas” (Salmo 102:6,7).

E menshon di desierto ta enfatisá e sentido di isolashon for di Dios. Un para “solitario riba dak di kas” ta pafó di su nèshi, su lugá di sosiegu. E salmista ta sklama na Dios “for di e profundidatnan”, komo si fuera e ta inundá pa awanan poderoso i ta senk den “lodo hundu” (Salmo 69:1–3, Salmo 130:1). E imágennan akí ta deskribí un situashon opresivo for di kua no tin skapatorio, eksepto pa intervenshon divino.

Lesa Salmo 10:12, Salmo 22:1, Salmo 27:9, i Salmo 39:12. Kon e salmista ta reakshoná riba e aparente ousensia di Dios?

Ta remarkabel ku e salmistanan ta determiná pa no keda ketu dilanti di e silensio di Dios. E salmistanan ta kere firmemente den orashon, pasobra orashon ta dirigí na e Dios bibu i yen di grasia. Dios tei ainda, asta ora E ta aparentemente ousente. Ainda E ta e mesun Dios ku a tende nan den pasado, i pues nan ta konvensí ku E ta tende nan awor.

E okashonnan di Dios su silensio ta pone e salistanan saminá nan mes i buska Dios, pero ku konfeshon i petishonnan humilde. Nan sa ku Dios lo no keda ketu pa semper. E Salmonan ta demostrá ku komunikashon ku Dios mester kontinuá, apesar di sirkunstansianan di bida.

Kiko nos por siña di e reakshonnan di e salmista riba e aparente ousensia di Dios? Kon bo ta reakshoná riba momentonan ku Dios ta parse ketu? Kiko ta sostené bo fe?

Lesa Salmo 77. A traves di kua eksperensia e outor ta pasando?

Salmo 77 ta kuminsá ku un súplika na Dios pa yudansa ku ta yená ku lamento i rekuerdo doloroso di pasado (Salmo 77:1–6). Henter e ser di e salmista ta bira tristu den direkshon di Dios. E ta nenga pa kualke alivio konsol’é eksepto esun ku ta bini di Dios.

Sinembargo, rekordando Dios parse ta intensifiká su angustia. “Ora mi kòrda riba Dios, mi ta keha” (Salmo 77:3, ESV). Hamah hebreo, “keha”, hopi biaha ta deskribí e ronkamentu di awanan furioso (Salmo 46:3). Di forma similar, henter e ser di e salmista ta den un estado di intrankilidat.

Kon rekordá Dios por produsí sintimentunan di angustia asina fuerte? Un seri di preguntanan preokupante ta traishoná e kousa di su angustia (Salmo 77:7–9): Dios a kambia? Dios posiblemente por traishoná Su pakto?

E kontraste rígido entre Dios su aktonan di salbashon den pasado i e aparente ousensia di Dios den presente ta pone e salmista sinti su mes bandoná pa Dios. Si Dios a kambia, e ora ei e salmista no tin speransa, un konklushon ku e ta lucha pa rechasá.

Mientrastantu, e salmista no por drumi pasobra Señor ta ten’é lantá (Salmo 77:4). Esaki ta kòrda riba otro personahenan bíbliko ku Dios a uza nan insomnio komo providensia pa avansá Su propósitonan (Gen. 41:1−8, Esther 6:1, Dan. 2:1−3). E anochi largu sin por a drumi a pone e salmista konsiderá Señor su aktonan di liberashon di pasado pero ku resolushon nobo (Salmo 77:5,10).

E siguransa ku e salmista ta risibí di Dios no ta konsistí di splikashonnan tokante su situashon personal, sino mas bien un konfirmashon di Dios su fieldat i integridat (meskos ku Job). E salmista ta enkurashá pa spera riba Señor den fe, sabiendo ku E ta e mesun Dios ku a hasi milagernan den pasado di Israel (Salmo 77:11–18). E salmista ta realisá tambe ku “Bo lastronan no ta konosí” (Salmo 77:19), rekonosiendo Dios su guia, asta den situashonnan den kua Su presensia no ta opvio pa bista humano. E salmista ta rekonosé ku Dios ta revelá i skondí simultáneamente, i asina e ta ofresé alabansa na e kamindanan misterioso i soberano di Señor.

Pensa riba momentonan den pasado ora Señor a obra den bo bida. Kon e bèrdat ei por yuda bo dil ku loke sea bo ta enfrentando aworakí?

Lesa Salmo 37:1, 8; Salmo 49:5–7; Salmo 94:3–7; i Salmo 125:3. Ki lucha e salmista ta enfrentá?

E Salmonan akí ta lamentá e prosperidat aktual di e malbadonan i e desafio ku e echo akí ta forma pa e hustunan. E malbadonan no solamente ta prosperá, sino tin biaha tambe abiertamente ta despresiá Dios i ta oprimí otronan. E asuntu konfuso ta ku miéntras “e sèpter di maldat” (Salmo 125:3) ta dominá mundu, e “sèpter di hustisia” (Salmo 45:6) parse ta fayando. Pa kiko, anto, no renunsiá i brasa maldat manera otronan ta hasi?

Lesa Salmo 73:1–20, 27. Kiko ta hiba e salmista a traves di e krísis? Kua ta e fin di esnan ku ta konfia den kosnan bano? (Lesa tambe 1 Pe. 1:17.)

Miéntras e salmista den Salmo 73 ta permanesé di focus riba e inikidat aktual den mundu, e tabata inkapas di mira e kuadro grandi for di punto di bista di Dios. E problema ku e prosperidat di maldat tabata forma pa su fe tabata aplastante; e tabata kere tambe ku su argumento tokante e inutilidat di fe tabata basá riba realidat.

Sinembargo, Salmo 73 ta mustra ku “e kosnan akí ta hasi bofon di esnan ku ta ignorá e promé versíkulo di e salmo akí, ku ta e resúmen di henter e salmo: ‘Siguramente Dios ta bon pa Israel, pa esnan ku ta di kurason puru! ’ ”—Johannes Bugenhagen, Reformation Commentary on Scripture (Downers Grove, IL: InterVarsity Press, 2018) , p. 11.

Ta hiba e salmista na e santuario, e lugá di e gobièrnu soberano di Dios, i a kòrd’é ku “awe” ta solamente un piesa di e mosaiko, i e mester a konsiderá e “fin”, ora e malbadonan lo enfrentá e huisio di Dios. E echo ku e salmista a komprendé e bèrdat akí den e santuario i a konfesá su bobedat anterior ta mustra ku por kapta realidat solamente pa medio di persepshon spiritual i no a traves di lógika humano.

Kon e promesa di e huisio di Dios riba mundu, i riba tur su maldat, ta duna bo konsuelo ora asina tantu maldat awor ta keda sin kastigu?

Lesa Salmo 56; Ellen G. White, “Rejoicing in the Lord,” p. 115–126, den Steps to Christ.

Meskos ku e salmistanan, e pueblo di Dios di tur tempu ta puntra nan mes de bes en kuando kon kanta e kantikanan di Señor den “un tera straño”. Nos fe den e gobièrnu soberano di Señor ta desafiá, tin biaha severamente, i nos por puntra nos mes si Dios ta den kontrol òf berdaderamente mes poderoso i bon manera e Skrituranan ta bisa.

Fe bíbliko hopi biaha ta impliká mes tantu insiguridat i suspenso ku konfiansa i afirmashon. Tin biaha insiguridat i suspenso, spesialmente den lus di maldat i e aparente ousensia di Dios, por ta kasi insoportabel. Sinembargo, insiguridat nunka mester ta tokante Dios, Su karakter amoroso i hustu i integridat. E salmistanan por ta insigur tokante futuro, pero hopi biaha nan ta apelá na Dios su amor i fieldat ku no ta faya (Salmo 36:5–10; Salmo 89:2,8).

Di mes manera, nos mester sigui e mesun ehèmpel. “Konvoká tur bo podernan pa wak ariba, no abou na bo difikultatnan; e ora ei lo bo no desmayá nunka na kaminda. Pronto lo bo mira Hesus tras di e nubia, sakando Su man pa yuda bo; i tur loke bo tin ku hasi ta dun’E bo man den simpel fe i lag’E guia bo. Segun ku bo ta haña konfiansa, a traves di fe den Hesus, lo bo haña speransa.”—Ellen G. White, Testimonies for the Church, tomo 5, p. 578, 579.

E momentonan ora Dios “skonde Su kara” no ta debilitá e efikasia di orashon. Al kontrario, e okashonnan akí ta pone e salmistanan saminá nan mes, rekordá Dios su aktonan salbador di pasado, i buska Dios ku konfeshon i petishonnan humilde (Salmo 77:10–12, Salmo 89:46−52). “Fe ta krese bira fuerte ora e bini den konflikto ku dudanan i influensianan opuesto. E eksperensia atkerí den e pruebanan akí ta di mas balor ku e hoyanan di mas kostoso.”—Ellen G. White, Testimonies for the Church, tomo 3, p. 555.

Preguntanan pa Diskushon:

Kua tenshonnan e salmistanan tabata eksperensiá den lus di maldat? Kua tenshonnan similar bo a enfrentá, i kon bo a dil ku nan? Kon bo ta mantené bo fe durante e momentonan akí?

Unda nos mester buska kontestanan ora pruebanan, òf hendenan ku nan mes sufrimentunan ta pone nan kuestioná e bondat i poder di Dios, ta tèst nos fe den Dios?

Kon bo ta kontestá e pregunta komun tokante maldat den un mundu kreá i sostené pa un Dios di amor todopoderoso? Kon e motibu di e gran konflikto akí ta yuda kontestá, a lo ménos un tiki, e desafio akí?