Lo Mi Lanta

3 di febrüari

Lesa pa e Estudio di e Siman Akí:

Salmo 18:3–18; Salmo 41:1–3; Deut. 15:7–11; Salmo 82; Salmo 96:6–10; Salmo 99:1–4; Rom. 8:34.

Versíkulo di Memoria:

“ ‘Pa motibu di e opreshon di e pobernan, pa motibu di e kehamentu di esnan den nesesidat, lo Mi lanta awor,’ SEÑOR ta bisa: ‘Lo Mi pon'é den e siguridat ku e ta anhelá na dje’ ” (Salmo 12:5, NKJV).

Nos époka no ta e úniko époka den kua maldat, inhustisia, i opreshon ta hasi estrago. E salmistanan tambe tabata biba den un tempu asina. I asina, loke sea ku nan ta, e Salmonan ta tambe Dios su protestanan kontra e violensia i opreshon den mundu, den nos mundu, i esun di e salmistanan tambe.

Sí, Señor tin pasenshi i ta wanta Su rabia den Su gran toleransia, i no ke pa niun hende bai pèrdí ma arepentí i kambia nan kamindanan (2 Pe. 3:9–15). I aunke Dios su tempu apropiá pa Su intervenshon no semper ta koinsidí ku espektativanan humano, e dia di Dios su huisio ta yegando (Salmo 96:13, Salmo 98:9). Nos mester solamente konfia den djE, i den Su promesanan, te ora e dia ei yega. Solamente e Kreador, kende Su trono ta fundá riba rektitut i hustisia (Salmo 89:14, Salmo 97:2), por proveé, ku Su huisio soberano, stabilidat i prosperidat na e mundu. E dòbel aspekto di huisio divino ta inkluí liberashon di esnan oprimí i destrukshon di e malbadonan (Salmo 7:6−17).

Esaki ta loke a primintí nos, i esaki ta loke, de echo, lo bini un dia, pero na Dios su tempu, no di nos, un punto ku e salmista ta enfatisá.

* Studia e lès di e siman akí pa prepará pa Sabat, 10 di febrüari.

Lesa Salmo 18:3–18; Salmo 76:3–9, 12; i Salmo 144:5–7. Kon ta deskribí Señor den e tekstonan akí? Kiko e imágennan akí ta transmití tokante Dios su disponibilidat pa libra Su pueblo?

E himnonan akí ta alabá Señor pa Su poder asombroso riba e forsanan di maldat ku ta menasá Su pueblo. Nan ta deskribí Dios den Su mahestat komo Guerero i Hues. E imágen di Dios komo Guerero ta frekuente den e Salmonan i ta destaká e severidat i urgensia di Dios su kontesta riba e gritunan i sufrimentu di Su pueblo.

“Tambe SEÑOR a strena den e shelunan,
i e Haltísimo a hasi Su bos resoná...
El a tira su flechanan
i a plama nan;
el a lansa lamper ku tabata kòrta pisá i a konfundí nan.
E ora ei e vayenan di laman a paresé,
i e fundeshinan di mundu a keda bisto,
dor di Bo reprendementu, O SEÑOR,
debí na e suplamentu pisá di e rosea di Bo nanishi” (Salmo 18:13–15).

E determinashon puru i magnitut di Dios su akshon mester plama kualke duda tokante Dios su gran kuido i kompashon pa esnan ku ta sufri òf tokante Su abilidat pa derotá maldat. Nos mester djis warda pa E hasié.

Al final, asta ora e pueblo di Dios, manera David, tabata envolví den guera, liberashon no a bini di medionan humano. Den su hopi batayanan kontra e enemigunan di e pueblo di Dios, Rei David a alabá Dios komo e Uniko ku a logra tur e viktorianan. Lo tabata fásil pa David tuma krédito pa loke a sosodé, pa su hopi éksitonan i triunfonan, pero esei no tabata su estado di ánimo. E tabata sa for di unda e Fuente di su poder tabata bini.

Aunke David ta deklará ku Señor ta train su mannan pa guera (Salmo 18:34), niun kaminda den e Salmonan e ta dependé riba su abilidatnan di bataya. En kambio, Señor ta bringa pa David i ta libr’é (Salmo 18:47,48).

Den e Salmonan, Rei David, ku tabata konosí komo un guerero eksitoso, ta asumí su ròl komo un músiko eksperto i ta alabá Señor komo e úniko Libertador i Sostenedó di Su pueblo (Salmo 144:10−15). Alabansa i adorashon na Señor ta David su fuentenan di fortalesa, ku ta mas poderoso ku kualke arma di guera. Solamente Dios ta di konfia i adorá.

Kualke sea e donnan i abilidatnan i éksito ku bo tabatin den bida, dikon semper bo mester kòrda e fuente di nan tur? Kua peliger bo ta enfrentá si bo lubidá e fuente ei?

Lesa Salmo 9:18, Salmo 12:5, Salmo 40:17, Salmo 113:7, Salmo 146:6−10, i Salmo 41:1–3. Kua ta e mensahe aki na nos, asta awe?

Dios ta ekshibí kuido spesial i preokupashon pa hustisia respekto e vários gruponan di hende vulnerabel, inkluyendo esnan pober, den nesesidat, oprimí, wérfano, biudo, biuda, i strañeronan. E Salmonan, meskos ku e Lei i e profetanan, ta kla riba e punto ei (Eks. 22:21–27, Isa. 3:13–15).

Hopi Salmo ta usa e ekspreshon “pober i den nesesidat” i ta evitá di representá esnan oprimí den términonan eksklusivamente nashonal i religioso. Nan ta hasi esaki pa asina destaká Dios su kuido universal pa henter humanidat.

E ekspreshon “pober i den nesesidat” no ta limitá na pobresa material sino ta nifiká tambe vulnerabilidat i impotensia. E ekspreshon ta apelá na Dios su kompashon, i e ta transmití e idea ku esun ku ta sufri ta su so i no tin niun otro yudansa sino Dios. E deskripshon “pober i den nesesidat” ta pertenesé tambe na un hende su sinseridat, verasidat, i amor pa Dios ora e ta konfesá su total dependensia riba Dios i ta renunsiá kualke pista di dependensia propio i afirmashon propio.

Mientrastantu, kuida esnan den nesesidat (Salmo 41:1–3) ta demostrá fieldat di e pueblo na Dios. Maldat hasí kontra esnan vulnerabel tabata partikularmente pikánan horibel den kultura bíbliko (Deut. 15:7–11). E Salmonan ta inspirá hendenan fiel pa lanta nos bosnan kontra tur opreshon.

E Salmonan ta suprayá tambe e banidat di basa un hende su konfiansa riba medionan humano pasahero komo e fuente di sabiduria i seguridat final. E pueblo di Dios mester resistí e tentashon pa pone máksimo fe pa salbashon den lidernan i institushonnan humano, spesialmente ora nan ta diferensiá di e kamindanan di Dios.

Den Su grasia, nos Señor a identifiká Su mes ku e pobernan birando poder E mes, pa a traves di Su pobresa hopi por a bira riku (2 Kor. 8:9). E rikesanan di Kristu ta inkluí liberashon di tur opreshon tresé pa piká, i E ta primintí nos bida eterno den e reino di Dios (Rev. 21:4). Hesu-Kristu ta kumpli ku e promesanan di e Salmonan komo e Hues divino, ku lo husga tur maltrato di esnan den nesesidat, komo tambe negligensia di deber pa ku nan (Mat. 25:31–46).

Kuantu nos ta pensa riba esnan “pober i den nesesidat” meimei di nos, i kuantu nos ta hasi pa nan?

Señor a duna e lidernan di Israel outoridat pa mantené hustisia den Israel (Salmo 72:1−7, 12−14). E reinan di Israel mester a ehersé nan outoridat di akuerdo ku e boluntat di Dios. E preokupashon sentral di e lidernan mester tabata sigurá pas i hustisia den e tera i kuida pa esnan ku desbentaha sosial. Solamente e ora ei e tera i henter e pueblo lo prosperá. E fieldat di Dios, no poder humano, ta fortalesé e trono di e rei.

Lesa Salmo 82. Kiko ta sosodé ora e lidernan trose hustisia i oprimí e pueblo ku nan a haña e tarea di protegé?

Den Salmo 82 Dios ta deklará Su huisionan riba e huesnan korupto di Israel. E “diosnan” (Salmo 82:1,6) ta klaramente ni diosnan pagano ni angelnan, pasobra nunka nan a haña e tarea di hasi hustisia na e pueblo di Dios i asina no por a husga nan pa no a kumpli kuné. E akusashonnan den Salmo 82:2−4 ta eko e leinan di e Torá, identifikando e “diosnan” komo lidernan di Israel (Deut. 1:16−18, Deut. 16:18−20, Juan 10:33–35). Dios ta kuestioná e “yunan di hende” si nan ta husga hustamente, i ta anunsiá nan kastigu, pasobra El a haña nan inhustu. E lidernan ta tambaliá den skuridat sin konosementu (Salmo 82:5), pasobra nan a bandoná e lei di Dios, e lus (Salmo 119:105).

Skritura, di forma inkebrantabel, ta sostené e idea di ku Señor ta e úniko Dios. Dios ta kompartí Su gobièrnu di e mundu ku lidernan humano nombrá komo Su representantenan (Rom. 13:1). Kuantu biaha, sinembargo, e representantenan humano akí, tantu den historia komo asta awe, a trose e responsabilidat ku a duna nan?

Salmo 82, den forma di burla, ta eksponé e apostasia di algun lider ku tabata kere ku nan mes di tabata “diosnan” riba otro hende. Aunke Dios a duna e outoridat i e privilegio na e lidernan israelita, ku El a yama nan e “yunan di e Altísimo” i pa represent’E, Dios ta renunsiá e lidernan malbado. Dios ta kòrda nan ku nan ta mortal i suheto na e mesun leinan moral ku tur hende. Niun hende ta riba e Lei di Dios (Salmo 82:6–8).

Dios lo husga henter mundu; e pueblo di Dios tambe lo duna kuenta na Dios. Tantu e lidernan komo e pueblo lo imitá e ehèmpel di e Hues divino i pone nan último speransa den djE.

Ki tipo di outoridat bo tin riba otronan? Kon hustu i rekto bo ta ehersé e outoridat ei? Tene kuidou.

Lesa Salmo 58:6–8; Salmo 69:22–28; Salmo 83:9–17; Salmo 94:1, 2; i Salmo 137:7–9. Ki sintimentunan e Salmonan akí ta transmití? Ken ta e agente di huisio den e Salmonan akí?

Algun Salmo ta implorá Dios pa tuma vengansa riba individuonan i nashonnan ku tin intenshon di hasi daño, òf ku ya a hasi daño, na e salmistanan òf nan pueblo. E Salmonan akí por zona aplastante pa motibu di nan lenguahe duru i aparente diskordia ku e prinsipio bíbliko di amor pa enemigunan (Mat. 5:44).

Sinembargo, e indignashon di e salmista den lus di opreshon ta un bon. E ta nifiká ku e salmista tabata tuma bon i malu mas na serio ku hopi hende tabata hasi. Ta import’é, asta hopi mas, e maldat ku ta hasi den mundu, no solamente na e mes sino na otronan tambe.

Sinembargo, niun kaminda e salmista ta sugirí ku e mes ta e agente di vengansa. En kambio, e ta laga vengansa únikamente den man di Dios. E Salmonan ta lanta e maldishonnan di e pakto divino (Deut. 27:9−16) i ta implorá Dios pa aktua manera El a primintí.

E Salmonan ta proklamashonnan profétiko tokante e huisio inminente di Dios; nan no ta únikamente orashonnan di e salmista. Salmo 137 ta reflehá e anunsionan di huisio divino riba Babilonia, manera ta mira den e profetanan. E destrukshon ku e babilonionan a trese riba otro nashonnan lo a bira bèk riba nan. E Salmonan ta transmití atvertensianan divino ku maldat lo no keda sin kastigu pa semper.

E vengansa di Dios ta keda midí ku hustisia i grasia. E yunan di Dios ta yamá pa resa pa esnan ku ta maltratá nan i asta pa spera pa nan kombershon (Salmo 83:18, Jer. 29:7).

Sinembargo, miéntras nos ta trata na laga e Salmonan akí konkordá ku normanan bíbliko di amor pa enemigunan, nos mester ta kuidadoso pa no minimisá e eksperensia doloroso ekspresá den nan. Dios ta rekonosé e sufrimentu di Su yunan i ta sigurá nan ku “Presioso den bista di SEÑOR ta e morto di Su santunan” (Salmo 116:15). Huisio divino ta obligá e pueblo di Dios pa halsa nan bosnan kontra tur maldat i buska e binida di e reino di Dios den su plenitut. E Salmonan ta duna bos tambe na esnan ku ta sufri, lagando nan sa ku Dios ta konsiente di nan sufrimentu i ku un dia hustisia lo yega.

Ken, tin biaha, no tabatin pensamentunan òf fantasianan tokante vengansa riba esnan ku a hasi nan òf nan sernan kerí malu teribel? Kon e Salmonan akí lo por yuda bo pone sintimentunan asina den perspektiva korekto?

Lesa Salmo 96:6–10; Salmo 99:1–4; i Salmo 132:7–9, 13–18. Unda e huisio di Dios ta tuma lugá, i kua ta e implikashonnan di e kontesta pa nos? Kon e santuario ta yuda nos komprendé kon Dios lo atendé ku maldat?

E huisio di Dios ta relashoná djaserka ku e santuario. E santuario tabata e medioambiente kaminda e salmista su komprendementu di e problema di maldat tabata transformá (Salmo 73:17–20). E santuario tabata designá komo e lugá di huisio divino manera indiká pa e huisio di Urim (Num. 27:21) i pa e pechero di huisio di e sumo saserdote (Eks. 28:15, 28–30). Konformemente, hopi Salmo ta deskribí Dios riba Su trono den e santuario, kla pa husga mundu pa su piká i maldat.

A revelá e plan di salbashon na e santuario. Den paganismo, tabata komprendé piká komo un mancha físiko, ku ritonan mágiko ta eliminá. En kambio, Beibel ta presentá piká komo un violashon di e lei moral di Dios. Dios su santidat ta nifiká ku E stima hustisia i rektitut. Di mes manera, e pueblo di Dios mester buska hustisia i rektitut i mester adorá Dios den Su santidat. Pa hasi esei, nan mester warda e lei di Dios, ku ta un ekspreshon di Su santidat.

Pues, e santuario ta e lugá di pordon di piká i restourashon di hustisia manera indiká pa e propisiatorio di e trono di Dios i e “sakrifisionan di hustisia” (Deut. 33:19, Salmo 4:5).

Sinembargo, e “Dios Kende ta Pordoná” ta tuma vengansa riba echonan malbado di hendenan ku no arepentí (Salmo. 99:8). Ta mira e implikashonnan práktiko di e santuario ku ta e lugá di huisio divino den e konsiensia konstante di e santidat di Dios i ta demandá pa bida rekto di akuerdo ku e rekerimentunan di pakto di Dios.

E huisio di Dios for di Sion ta resultá den e bienestar di e hustunan i e derota di e malbadonan (Salmo 132:13–18). E santuario tabata fomentá e espektativanan hubiloso di e binida di Señor komo e Hues, spesialmente durante e Dia di Ekspiashon. Di mes manera, e Salmonan ta fortalesé e seguridat di e yegada inminente di e Hues divino (Salmo 96:13, Salmo 98:9), es desir, Hesu-Kristu den e santuario selestial (Rev. 11:15–19).

Lesa Romanonan 8:34. Kon e versíkulo akí ta mustra nos ku loke Kristu ta hasiendo den e santuario selestial ta bon notisia pa Su pueblo?

Lesa Ellen G. White, “The Beatitudes,” p. 6–13, 29–35, den Thoughts From the Mount of Blessing.

E Salmonan ta protestanan kontra indiferensia humano kontra inhustisia; nan ta un rechaso pa aseptá maldat. Nan ta motivá, no pa un deseo di revancha sino pa un afan pa glorifiká e nòmber di Dios. P’esei, ta pas pa e hustunan alegrá nan mes ora nan lo mira e vengansa di Dios riba maldat, pasobra di e manera akí e nòmber di Dios i Su hustisia ta keda restourá den mundu (Salmo 58:10,11). E Salmonan ta obligá hende halsa nan bosnan kontra maldat i pa buska e binida di e reino di Dios den su plenitut. Den e Salmonan, ta duna nos siguransa di konsuelo i liberashon divino. Señor lo lanta!

“ ‘Ora hende lo zundra boso, i persiguí boso,’ Hesus a bisa, ‘alegrá boso i keda kontentu.’ I El a mustra Su oyentenan na e profetanan ku a papia den nòmber di Señor, komo ‘un ehèmpel di sufrimentu i di pasenshi.’ Santiago 5:10. Abel, e promé kristian di e yunan di Adam, a muri komo un mártir. Enòk a kana ku Dios, i mundu no a konos’é. Nan a hasi chèrchi di Noe komo un fanátiko i un alarmista. ‘I otronan a pasa den prueba di bofon i sota di karbachi, sí, tambe kadena i prizòn.’ ‘I otronan a wòrdu torturá, sin aseptá nan liberashon, pa nan por a optené un mihó resurekshon.’ Hebreonan 11:36, 35.”—Ellen G. White, Thoughts From the Mount of Blessing, p. 33.

Preguntanan pa Diskushon:

Pa motibu ku e realisashon doloroso di e maldat den mundu por pone hende puntra nan mes si Señor realmente ta reina, kon nos por kultivá un fe inkebrantabel ku lo para fuerte asta bou di tentashon? Es desir, riba kiko nos mester focus pa asina mantené nos fe den e amor i bondat i poder di Dios? Kiko e krus mester bisa nos tokante Dios i Su karakter?

Dikon ta importante pa no dependé riba medionan humano (lidernan, institushonnan, i movementunan sosial) komo e último sabiduria i solushon pa hustisia den mundu sino dependé únikamente riba e Palabra i huisio di Dios?

Kua ta implikashonnan práktiko di e bèrdat ku e santuario ta e lugá di huisio divino?

Kon nos por komprendé e lenguahe duru di algun Salmo? Kon e lenguahe ei ta yuda nos relashoná ku e humanidat di esnan ku a skirbi nan?