Bendishoná ta Esun Ku ta Bini den Nòmber di Señor

24 di febrüari

Lesa pa e Estudio di e Siman Akí:

Salmo 23; Juan 10:11–15; Salmo 22; Salmo 89:27–32; Kol. 1:16; Salmo 2; Hebr. 7:20–28.

Versíkulo di Memoria:

“E piedra ku e trahadónan a rechasá a bira e piedra di skina prinsipal. Esaki ta loke SEÑOR a hasi; i e ta maraviyoso den nos bista” (Salmo 118:22,23, NKJV).

E Salmonan ta testifiká tokante e persona i ministerio di Kristu.

Nos ta mira kasi tur aspekto di Su obra den e plan di salbashon den e Salmonan. Den vários forma, e bida i obra di Kristu ta pintá adelantá i pronostiká den nan, hopi biaha ku eksaktitut remarkabel.

E tópikonan revelá den e Salmonan ta inkluí e deidat di Kristu, e echo ku E ta yu, Su obediensia, Su diligensia pa e tèmpel di Dios, Su identidat komo e Bon Wardadó, Su traishon, Su sufrimentu, Su wesunan ku no a ser kibrá, Su morto, resurekshon, asenshon, saserdosio, i monarkia. Tur tei, manera pronostiká hopi siglo promé ku Hesus a bini den karni.

Nada straño, por ehèmpel, ora E tabata papiando tokante Su ministerio, Hesus a mustra bèk na e Salmonan ora E tabata papiando ku e disipelnan riba e kaminda pa Emaus (Lukas 24:44). E tabata ke pa nan haña evidensia den e Salmonan di ken E tabata.

Algun di e Salmonan ku tin un kumplimentu tipológiko den Kristu ta inkluí Salmonan 24, 45, 72, i 101 (e Rei i Hues ideal), 88, i 102 (orashonnan di e sirbidó sufridó di Dios).

Den tur e Salmonan, a traves di e salmistanan su lamentonan, gradisimentunan, alabansanan, i sklamashonnan pa hustisia i liberashon, nos por tende e ekonan di e orashon di Kristu pa salbashon di mundu.

* Studia e lès di e siman akí pa prepará pa Sabat, 2 di mart.

Lesa Salmo 23; Salmo 28:9; Salmo 80:1; Salmo 78:52, 53; Salmo 79:13; i Salmo 100:3. Kon ta deskribí e relashon entre Señor i Su pueblo den e tekstonan akí?

E imágen di Señor komo Wardadó i e pueblo di Dios komo e karnénan di Su tereno ku yerba ta destaká Dios su guia i kuido sostenedó di Su pueblo i dependensia di e pueblo riba Dios pa supli tur nan nesesidatnan. E imágen ta transmití e noshon di serkania entre Dios i Su pueblo pasobra wardadónan tabata biba huntu ku nan tou i tabata kuida pa kada karné individualmente. E imágen pastoral ta suprayá tambe e propiedat di Dios di Su tou, garantisá pa dos laso fuerte: kreashon (Salmo 95:6,7; Salmo 100:3) i aliansa (Salmo 28:9, Hebr. 13:20).

E imágen di e Wardadó divino ku ta guia Jozef manera un tou (Salmo 80:1) kisas ta referí na Jakob su bendishon di Jozef, ku ta representá Dios komo e Wardadó di Israel, i asina ta apelá na e gran promesa i bendishon akí (Gén. 49:24). Tabata konsiderá reinan wardadónan di nan pueblo (2 Sam. 5:2). Sinembargo, solamente Dios ta meresé e título akí berdaderamente pasobra mayoria rei no tabata biba na e altura ei. Solamente Hesus a hasi esaki, motibu pa kua ta yam’E e Bon Wardadó.

Lesa Juan 10:11–15. Kiko Hesus ta bisa tokante E mes komo e Bon Wardadó?

Nos ta mira e laso íntimo entre e Wardadó divino i Su tou den e tou su konosementu indiskutibel di e bos di e Wardadó (Juan 10:4,27). Te na e dia di awe, wardadónan di Medio Oriente por dividí nan tou ku a meskla simplemente yamando nan karnénan, ku ta rekonosé i ta sigui e bos di nan wardadó.

Tin biaha, e tou di Dios ta sufri vários aflikshonnan ku e pueblo ta komprendé komo señal di malkontentu i abandono di Dios. Sinembargo, e Bon Wardadó nunka ta bandoná Su karnénan ku a dual sino ta buska pa salba nan. Esaki ta un imágen poderoso di e relashon di Dios ku Su pueblo. E ta dispuesto na muri pa Su karnénan (Juan 10:11,15) i paradóhikamente ta bira un lamchi di sakrifisio na nan fabor (Juan 1:29). Tambe, Hesus a konfirmá ku E lo a yama Su karnénan den otro kuránan i uni nan den un tou (Juan 10:16).

Kua ta maneranan ku bo por probechá, riba nivel diario i práktiko, di loke a primintí nos ora nos tin Hesus komo nos Bon Wardadó?

Lesa Salmo 22 i Salmo 118:22. Kon esnan, ku e Mesias a bin pa salba, a trat’E?

Hopi Salmo ta ekspresá e sintimentunan di agonia di abandono total di e Mesias sufridó (por ehèmpel, Salmo 42, Salmo 88, Salmo 102). Salmo 22 ta un profesia mesiániko direkto pasobra hopi detaye den e Salmo akí no por konektá histórikamente ku David sino ta pas perfektamente ku e sirkunstansianan di e morto di Kristu. Hesus a resa ku e palabranan di Salmo 22:1 riba e krus (Mat. 27:46).

Por midi e tormento di Kristu su separashon for di Su Tata, kousá pa e echo ku Kristu a karga e pikánan di henter mundu, solamente pa medio di e grado di nan serkania, es desir, nan unidat sin igual (Juan 1:1,2; Juan 10:30). Sinembargo, asta e profundidatnan di sufrimentu ineksplikabel no por a kibra e unidat entre e Tata i e Yu. Den Su abandono total Kristu a konfia Su mes inkondishonalmente na e Tata, apesar di e profundidatnan total di desesperashon ku E tabata enfrentá.

“Riba Kristu komo nos sustituto i siguridat e inikidat di nos tur tabata poné. A kont’E komo un transgresor, pa e por a redimí nos for di e kondena di e lei. E kulpa di tur desendiente di Adam tabata primiendo riba Su kurason. E rabia di Dios kontra piká, e teribel manifestashon di Su disgustu pa motibu di inikidat, a yena alma di Su Yu ku konsternashon.”—Ellen G. White, The Desire of Ages, p. 753.

E imágen di animal menasante di toronan fuerte, leonnan gritando, i kachónan ta enfatisá e krueldat i enemistat di e pueblo ku Kristu, kende ta kompará ku un bichi inosente i indefenso, ku a topa den Su último oranan. Ku eksaktitut asombroso, Salmo 22 ta transmití e remarkenan venenoso di e multitut ku tabata burla di Hesus ku Su mes palabranan na e Tata (Salmo 22:1,8; Mat. 27:43) i e sòldánan repartiendo Hesus su pañanan (Salmo 22:18, Mat. 27:35). Poko e pueblo tabata komprendé e momento ei ku e “bichi” ku nan tabata buska pa plèchè lo a bira e “piedra di skina” prinsipal di e Tèmpel i sigurá su fundeshi (Salmo 118:22).

Sinembargo, e Mesias rechasá a bira e Fuente di salbashon pa e pueblo di Dios despues di Su resurekshon for di morto (Mat. 21:42, Echonan 4:10–12). Kristu a sufri rechaso di humanidat, pero Dios a glorifiká Su Yu dor di hasiE e “piedra di skina prinsipal” bibu di e Tèmpel spiritual di Dios (Efe. 2:20−22, 1 Pe. 2:4−8). Pa esnan ku rechasá e Piedra akí, es desir, Dios su medio di salbashon, e lo bira e agente di huisio (Isa. 8:14, Mat. 21:44).

Hesus riba e krus a paga den Su mes e kastigu pa tur piká ku bo a yega di kometé. Kon e echo ku El a sufri na bo fabor mester impaktá e manera kon bo ta biba awor, es desir, dikon bo mester haña piká asina repugnante?

Lesa Salmo 89:27–32, 38–46 i Salmo 132:10–12. Di kiko e aliansa davídiko ta trata? Kiko a parse di pon’é na peliger?

E aliansa davídiko ta kontené e promesa di Dios di sosten eterno di e liña di David i prosperidat di e pueblo di Dios (1 Sam. 7:5–16; Salmo 89:1–4, 19–37; Salmo 132:12–18). E permanensia di e aliansa tabata establesé riba Dios su huramentu solèm i e rei su fieldat na Dios. Sinembargo, asta e reinan dediká, manera Rei David, no semper tabata fiel na Señor. Salmo 89 ta lamentá riba e realidat duru ku parse ta indiká ku e promesanan glorioso di e aliansa davídiko a pèrdè. Dios a bandoná Israel desesperadamente? E kontesta, naturalmente, ta nò!

E rabia di Dios ta, sí, un ekspreshon di huisio divino (Salmo 38:1, Salmo 74:1). Sinembargo, e no ta dura pa semper pasobra e amor eterno di Dios ta pordoná e pikánan di hende ora hende repentí. Sinembargo, miéntras e ta dura, Dios su malkontentu ku Su pueblo erante ta serio. E hendenan ta sinti e konsekuensianan amargo di nan desobedensia i ta realisá e gravedat di nan pikánan (Salmo 89:38–46). Tòg nan ta puntra: “Kuantu tempu mas?” apelando na e karakter pasahero di e rabia di Dios (Salmo 89:46). Speransa renobá ta brota di seguridat nobo den Dios su fieldat pa “kòrda” Su grasia (Salmo 89:47,50).

Den poko palabra, aunke e komponente humano di e aliansa a faya, e pueblo por a sosegá den e promesa di Dios su propósitonan inkambiabel a traves di e Mesias, kende ta enkarná tur hustisia i salbashon di Israel i di henter mundu. Es desir, al final, Dios lo prevalesé, i Su reino eterno lo ta establesé pa semper—pero solamente pa motibu di Hesus, i no pa motibu di e pueblo di Dios.

Hesu-Kristu ta Yu di David i e Mesias (Mat. 1:1, Hebr. 1:8). Ta yam’E “e primogénito di henter kreashon” (Kol. 1:15), refiriendo na Salmo 89:27, ku ta yama David, ku tabata e tipo di Kristu, Dios su primogénito. “Lo Mi hasié mi primogénito, esun mas haltu di reinan di tera”.

Klaramente e título “primogénito” no ta ekspresá e status biológiko di David, pasobra David tabata e di ocho yu di su mayornan (1 Sam. 16:10, 11). Ta mesun kos ku Hesus. E título akí ta nifiká Su honor i outoridat spesial (Kol. 1:16,20−22). Dios a hasi Hesus e Rei supremo riba henter mundu ora El a lanta Hesus for di morto (Echonan 2:30,31).

Lesa Kolosensenan 1:16, 20–22. Kiko e versíkulonan akí ta siña nos tokante ken Hesus tabata i loke El a hasi pa nos? Kua promesa bo por saka for di esaki pa bo mes?

Lesa Salmo 2; Salmo 110:1–3; Salmo 89:4, 13–17; i Salmo 110:1, 2, 5, 6. Kiko e tekstonan akí ta siña nos tokante Kristu komo Rei?

E deskripshon di Dios komo Tata di e Mesias ta mustra na e koronashon di e rei ora a adoptá e rei den e aliansa di Dios (Salmo 2:7, Salmo 89:26–28). Salmo 2:7 ta premirá Kristu su resurekshon i eksaltashon komo e ourora di e aliansa eterno nobo i e saserdosio real di Kristu (Echonan 13:33–39, Hebr. 1:5, Hebr. 5:5). E Mesias ta sinta na man drechi di Dios komo un hende ku tin honor i outoridat sin presedente (Salmo 110:1; Echonan 7:55,56). “Ademas, e interakshon entre Señor i e (Mesias) ‘ungí’ asta ta sugirí un intenshon pa identifiká e Mesias davídiko ku Señor Mes. . . . Si esun ku ta sinta na man drechi ta Señor, e ora ei, Señor ta e Mesias, ya ku ta mira e último tambe na man drechi [lesa Salmo 110:1,5.]”—Jacques Doukhan, On the Way to Emmaus (Clarksville, MD: Lederer Books, 2012), p. 26, 27.

Na final, Kristu lo tin viktoria apsoluto riba Su enemigunan. Pa hasi e enemigunan un “banki pa pia” ta un imágen ku ta reflehá e kustumber di e reinan antiguo di Serkano Oriente pa pone nan pianan riba garganta di nan enemigunan derotá pa demostrá dominio total riba nan. Sinembargo, Kristu su bara akinan no ta un hèrmènt di teror (Salmo 2:9, Salmo 110:2).

E Lidernan di tribu tabata tene e bara (“baston”) originalmente komo símbolo di e tribu (Num. 17:2−10). E bara di Kristu ta bini di Sion pasobra E ta representá e pueblo di Sion. Su bara ta un símbolo di huisio divino, ku ta kaba ku e gobièrnu di maldat i ta deskribí e reinado sin igual di Kristu (Rev. 2:27, Rev. 12:5). Asta e reinan malbado ta haña un chèns pa arepentí i someté na e Mesias (Salmo 2:10–12).

Un deskripshon gráfiko di e viktoria final di Kristu ta ser hañá den e esena pre-atvènt den Daniel 7, ku ta mustra ku, despues ku duna huisio “ ‘na fabor di e santunan di e Haltísimo’ ” (Dan. 7:22), ta establesé Su reino, i “ ‘Su reino lo ta un reino eterno’ ” (Dan. 7:27). Pa motibu di e krus, e promesa di e reino ta sigurá.

Un bendishon ta primintí na tur ku konfia den e Rei, i e pueblo ta regosihá den e reinado soberano i hustu di e Mesias (Salmo 2:12, Salmo 89:15–17).

Ki bunita ta pa sa ku, sí, al final, e bon lo triunfá riba e malu, lo hasi hustisia, i doló i sufrimentu lo ta vensí pa semper. Kon e bèrdat akí mester duna nos konsuelo awor ora, for di perspektiva humano, parse ku maldat ta prosperá?

Lesa Salmo 110:4–7. Kon e saserdosio di Kristu ta úniko, i ki gran speransa nos por haña den e saserdosio selestial di Kristu?

Dios ta duna e Mesias un monarkia eterno (Salmo 110:1–3) i un saserdosio di rango superior, e órden di Melkisedèk (Salmo 110:4–7). Señor ta seya Su palabra ku un promesa solèm (Hebr. 6:18). Dios su huramentu pa no repentí di duna nos un Saserdote perfekto ta un señal di Su grasia. E pikánan i rebelion habrí di hende ta provoká Dios konstantemente pa bandoná Su pueblo, pero Dios su huramentu ta inkambiabel i ta garantisá e grasia di Dios pa revoká Su huisio riba e pueblo arepentí (Eks. 32:14, Salmo 106:45).

E huramentu divino ta introdusí un elemento nobo na e pakto davídiko, deklarando ku e Mesias Rei ta tambe un Saserdote (Salmo 110:4). E reinan di Israel nunka por a funshoná komo saserdotenan levítiko (Num. 8:19, 2 Kron. 26:16−21). Ora Skritura ta menshoná reinan of hendenan ku ta ofresé sakrifisionan, e ta impliká ku nan ta trese sakrifisionan pa e saserdotenan, ku finalmente ta ofresé nan. Salmo 110 ta pone e Mesias Rei apart for di otro reinan i saserdotenan di Israel. E saserdosio eterno di Kristu ta derivá for di Melkisedèk, ku tabata tantu rei di Salem (Herusalèm) komo saserdote di “e Dios Haltísimo” (Gén. 14:18−20). Nunka Tèstamènt Bieu ta papia di Rei David òf kualke otro rei israelita di ta poseé e saserdosio den e órden di Melkisedèk, eksepto pa Salmo 110. Klaramente, e Salmo ta papia tokante un rei-saserdote distintivo den historia di Israel.

Lesa Hebreonan 7:20–28. Kua ta algun di e implikashonnan di e saserdosio superior di Kristu?

Siendo tantu Rei divino komo Saserdote eterno, Kristu tin superioridat sin presedente riba saserdotenan i reinan humano; pues, nos por tin speransa. Kristu ta sostené un pakto superior ku ta basá riba e huramentu di Dios, no promesanan humano. E ta sirbi den e santuario selestial. Piká òf morto no ta afektá Su saserdosio, manera esun di saserdotenan humano, i pues, E por intersedé pa i salba Su pueblo pa semper. E obra di rekonsiliashon di Kristu komo e Saserdote perfekto i miserikòrdioso ta duna Su pueblo un siguransa duradero di keda den e presensia mes di Dios (Hebr. 6:19,20). E saserdosio real di Kristu lo abolí e gobièrnu di maldat, no solamente den kurason di hende sino tambe riba mundu. E lo kumpli ku e promesa di Salmo 2 ku tur nashon i gobernante lo ta suheto na e huisio real di Kristu Hesus (Salmo 2:6–9; Salmo 110:1,2,5,6). E saserdosio real maravioso di Hesus ta hasi un apelashon apsoluto riba nos obediensia i konfiansa.

Lesa Ellen G. White, “God With Us,” p. 19–26, den The Desire of Ages.

Siendo tantu orashonnan di Kristu komo orashonnan tokante Kristu, e Salmonan ta proveé un revelashon úniko di e persona di Kristu i Su ministerio di redenshon komo Esun ku ta “Dios ku nos” (Mat. 1:23). Hesus ta “Dios ku nos” den e orashonnan di bataya di abandono i sufrimentu. E ta “Dios ku nos” den e gritunan pa hustisia i liberashon. Hesus ta “Dios ku nos” dor di no bandoná nos den nos perdishon i desesperashon sino mustra nos e kaminda di fe viktorioso. El a bira pa nos e Saserdote i Rei eterno pa salba nos di e destino eterno di piká. Den Kristu, e Rei davídiko perfekto, tur Dios su promesanan solèm di salbashon ta haña nan kumplimentu (2 Kor. 1:20).

Di forma kla Ellen G. White ta deskribí e unidat di Kristu ku humanidat: “Pa medio di Su humanidat, Kristu a toka humanidat; pa medio di Su divinidat, E ta tene na e trono di Dios. Komo e Yu di hende, El a duna nos un ehèmpel di obediensia; komo e Yu di Dios, E ta duna nos poder pa obedesé. Tabata Kristu ku a papia ku Moises for di e mata riba Seru Horeb bisando: ‘AMI TA ESUN KU MI TA; i El a bisa: Asina bo mester bisa e yunan di Israel: AMI TA a mandami serka boso.’ Eks. 3:14. Esaki tabata e promesa di e liberashon di Israel. Pues ora El a bini ‘den semehansa di hende’, El a deklará Su mes e AMI TA. E Yu di Bètlehèm, e Salbador mansu i humilde, ta Dios ‘manifestá den karni’ 1 Tim. 3:16. I na nos E ta bisa: ‘AMI TA e Bon Wardadó’. ‘AMI TA e Pan bibu’. ‘AMI TA e Kaminda, e Bèrdat, i e Bida’. ‘Tur poder a ser duná na Mi den shelu i riba tera’. Juan 10:11; 6:51; 14:6; Mat. 28:18. AMI TA e siguransa di tur promesa. AMI TA; no tene miedu.”— The Desire of Ages, p 24, 25.

Preguntanan pa Diskushon:

Kon Dios a demostrá Su fieldat inkebrantabel na Su aliansa apesar di e infidelidat di e pueblo? Ki siguransa esei ta trese pa e yunan di Dios ku ta luchando awe?

Kon e saserdosio úniko i superior di Kristu di akuerdo ku e órden di Melkisedèk ta fortalesé e sertesa di salbashon di e pueblo di Dios?

E Evangelionan ta mustra ku hopi promesa mesiániko den e Salmonan a kumpli den Hesu-Kristu. Kon esaki ta demostrá e verasidat di e Palabra di Dios? Dikon nos mester resistí kualke i tur sintimentu ku tin tendensia di debilitá nos konfiansa den e Palabra di Dios?

Ki gran konsolashon nos por haña for di e palabranan di Kristu: “ ‘Tur outoridat a wòrdu duná na Mi den shelu i riba tera’ ” (Mat. 28:18) ? Kon nos ta apliká e promesa akí na nos propio eksperensia?