Lèsnan di Pasado

2 di mart

Lesa pa e Estudio di e Siman Akí:

Salmo 78; Salmo 105; Gal. 3:29; Salmo 106; Salmo 80; Num. 6:22–27; Salmo 135.

Versíkulo di Memoria:

“Ku nos a tende i tabata sa di djé, i ku nos tatanan a konta nos. Nos lo no tene nan skondí pa nan yunan, ma nos lo konta e generashon benidero di e alabansanan di SEÑOR, di Su forsa i di Su obranan maraviyoso ku El a hasi” (Salmo 78:3,4, NKJV).

Den numeroso Salmo, alabansa ta tuma e forma di konta Señor su aktonan poderoso di salbashon. Hopi biaha ta yama e Salmonan akí “Salmonan di historia di salbashon” òf “Salmonan históriko”. Algun ta apelá na e pueblo di Dios, bisando nan pa siña di nan historia, partikularmente di e erornan di nan i nan antepasadonan. Sierto Salmonan históriko ta kontené un nota di himno predominante ku ta destaká Dios su aktonan maravioso di pasado na fabor di e pueblo di Dios i ku ta fortalesé nan konfiansa den Señor, kende ta kapas i fiel pa libra nan for di nan privashonnan presente.

E apelashon spesial di e Salmonan históriko ta ku nan ta yuda nos mira nos bida komo parti di e historia di e pueblo di Dios i pa reklamá e pasado ei komo di nos mes. Manera a adoptá nos den e famia di e pueblo históriko a traves di Kristu (Rom. 8:15; Rom. 9:24–26; Gal. 4:6,7), e herensia históriko di e pueblo antiguo di Israel ta en realidat e relato di nos asendensia spiritual. P’esei, nos por i mester siña di nan pasado, ku ta di nos tambe.

E meta final ta pa realisá ku kada generashon di e pueblo di Dios ta hunga un parti chikitu pero signifikante den e gran desaroyo históriko di e propósitonan soberano di Dios den e gran konflikto.

* Studia e lès di e siman akí pa prepará pa Sabat, 9 di mart.

Lesa Salmo 78. Kua tres épokanan históriko klave ta destaká den e salmo akí? Kua lèsnan rekurente Asaf ta saka for di kada periodo?

E revishonnan di Israel su pasado ta destaká e fieldat di Dios i e infidelidat di Israel. Nan mester siña generashonnan benidero tambe pa no ripití e erornan di nan antepasadonan sino pa konfia Dios i pa permanesé fiel na Su aliansa. E salmista ta uza historia komo un parábola (Salmo 78:2), loke ta nifiká ku e pueblo mester reflekshoná riba e mensahe di e salmo i buska e nifikashon pa nan mes. Salmo 78:2 ta un deskripshon profétiko di Hesus su método di siña den parábola (Mat. 13:34,35).

E salmo ta reflekshoná tambe riba e tempu di e Eksodo (Salmo 78:9−54), e establesimentu den Kanaan (Salmo 78:55−64), i e tempu di David (Salmo 78:65−72). E ta demostrá e echonan glorioso di Señor i e konsekuensianan di e pueblo su kibramentu di nan aliansa ku Dios. E historia di Israel ta konta hopi forma di e infidelidat di e pueblo na Dios, spesialmente nan idolatria (Salmo 78:58).

E salmista, sinembargo, ta enfatisá e rais di Israel su infidelidat: nan a lubidá loke Dios a hasi pa nan, no a konfia Dios, a pone Dios na prueba (Salmo 78:18, 41,56) i a rebeldiá kontra djE, i a faya di warda Su lei, Su pakto, i Su testimonionan (Salmo 78:10,37,56). Dor di enfatisá e formanan spesífiko akí di infidelidat, e salmista ta impliká ku e rechaso di Israel den historia a resultá for di un piká sentral, es desir, e fayo di e pueblo pa konfia Señor (Salmo 78:7,8).

Lesando e salmo, bo ta keda aplastá ku e pueblo su konstante terkedat i sieguedat spiritual, den kontraste ku e infinito pasenshi i grasia di Señor. Kon kada generashon nobo tabata asina slo pa siña?

Promé ku nos bira krítiko di generashonnan pasá, nos mester konsiderá nos mes. Nos tambe no ta lubidá e maravianan pasá di Dios i neglishá Su rekerimentunan di pakto? E salmo no ta enkurashá hende pa dependé riba nan mes aktonan. En kambio, Salmo 78 ta mustra e banidat di boluntat humano a ménos ku e ta fundá riba konstante konsiensia di Dios su fieldat i un aseptashon di Su grasia. E batayanan sin éksito di e pueblo di Dios (Salmo 78:9,62–64) ta aklará e lès di e salmo ku esfuersonan humano sin fieldat na Dios ta kondená pa terminá den frakaso.

Ki lèsnan bo a siña, òf mester a siña, di bo erornan di pasado?

Lesa Salmo 105. Kua eventonan históriko i nan lèsnan ta destaká den e salmo akí?

Salmo 105 ta rekordá eventonan klave ku a forma e relashon di pakto entre Señor i Su pueblo Israel. E ta enfoká riba e pakto di Dios ku Abraham pa duna e i su desendientenan e Tera Primintí, i kon e promesa akí, konfirmá na Isaak i Jakòb, a kumpli providensialmente a traves di Hose, Moises, i Aaron, i den tempu di e konkista di Kanaan. E salmo ta duna speransa na e pueblo di Dios den tur generashon, pasobra e obranan maravioso di Dios den pasado ta garantisá e amor inkambiabel di Dios den tur tempu (Salmo 105:1−5,7,8).

Salmo 105 ta parse Salmo 78 (wak e lès di ayera) enfatisando Dios su fieldat na Su pueblo den historia, i e ta hasi esei pa asina glorifiká Dios i pa inspirá fieldat. Sinembargo, diferente for di Salmo 78, Salmo 105 no ta menshoná e erornan pasá di e pueblo. E salmo akí tin un propósito diferente.

En kambio, den Salmo 105, ta bolbe konta historia a traves di bida di e patriarkanan di mas grandi di Israel, mustrando Dios su guia providensial i e pasenshi di e patriarkanan den bista di atversidatnan. Dios a rekompensá e patriarkanan su perseveransia i lealtat na djE rikamente. Asina, Salmo 105 ta invitá hende pa aspirá e fe di e patriarkanan i warda ku konfiansa riba e liberashon di Dios den nan tempu.

Salmo 105 ta poseé un nota di himno (Salmo 105:1–7), mustrando ku pa berdaderamente alabá Dios, e pueblo di Dios mester konosé e echonan di nan historia. Historia ta proveé tantu balidashon pa nos fe komo rasonnan inkontabel pa alabá Dios.

Ta referí na e adoradónan komo simia di Abraham i yunan di Jakòb (Salmo 105:6), konsiderando nan asina komo e kumplimentu di Dios su promesa na Abraham pa hasié un gran nashon (Gén. 15:3−6). E salmista ta suprayá e kontinuidat entre e patriarkanan i e generashonnan posterior di e pueblo di Dios. E salmista ta enfatisá ku “Su huisionan ta den henter mundu” (Salmo. 105:7; énfasis añadí), amonestando asina e adoradónan pa no lubidá ku “nos Dios” ta tambe e Señor soberano di henter mundu i ku Su bondat amoroso ta ekstendé na tur hende (Salmo 96:1, Salmo 97:1). E ta, klaramente, un yamada na fieldat na tur generashon di kreyente.

Kon nos, komo atventistanan di shete dia, mester mira nos mes den e liña di hende akí, for di Abraham en adelante? (Lesa Galationan 3:29). Ki lèsnan nos mester siña for di e historia akí?

Lesa Salmo 106. Kua eventonan históriko i nan lèsnan ta destaká den e salmo akí?

Salmo 106 tambe ta resumí e eventonan prinsipal den historia di Israel, inkluyendo e Eksodo, estadia den desierto, i bida na Kanaan. E ta enfatisá e pikánan horibel di e tatanan ku a kulminá de e generashon ku a ser hibá den eksilio. Pues, kasi siguramente a skirbi e salmo ora e nashon tabata den Babilonia, òf despues ku nan a regresá kas, i e salmista, inspirá pa Spiritu Santu, a bolbe konta e insidentenan históriko akí pa e pueblo di Dios i e lèsnan ku e pueblo mester a siña for di nan.

E salmo akí, tambe manera e otronan, ta mustra na e fieldat di Dios na Su pakto di grasia, pa medio di kua El a salba Su pueblo den pasado (Salmo 106:45). E ta ekspresá speransa ku Dios lo bolbe mustra fabor na Su pueblo repentí i reuní nan for di meimei di e nashonnan (Salmo 106:47). E súplika pa liberashon presente no ta un ilushon, sino un orashon di fe basá riba e siguransa di e liberashonnan pasá di Dios (Salmo 106:1−3) i e karakter infalibel di Dios su fieldat na Su aliansa ku Su pueblo.

E rekuerdo di Israel su frakasonan históriko de Salmo 106 ta un parti integral di e pueblo su konfeshon di nan pikánan i rekonosementu ku nan no ta mihó ku nan antepasadonan. E generashon presente ta atmití ku e ta ainda mas pió ku su antepasadonan pasobra e tabata konosé e konsekuensianan di e inikidatnan di e generashonnan pasá i kon Dios a ehersé Su gran pasenshi i grasia pa salba nan, aunke deliberadamente nan a kana den kamindanan malbado den pasado. Si esaki tabata bèrdat pa nan, pensa riba kuantu mas pa nos, awe, ku tin e revelashon di Dios su karakter i grasia salbador manera ta revelá den Hesus i e krus.

E bon notisia di Salmo 106 ta ku e amor firme di Dios ta prevalesé semper riba e pikánan di hende (Salmo 106:8−10,30,43−46). E ròl klave di Moises i Pinhas den desviá e rabia di Dios ta mustra na e nifikashon di Kristu su interseshon na fabor di kreyentenan. Solamente eksperensia personal di e grasia di Dios por transformá un storia di pasado den nos storia.

Salmo 106:13 ta bisa: “Masha lihé nan a lubidá Su obranan; nan no a spera riba Su konseho”. Dikon ta asina fásil pa nos hasi esei den nos mes bida, tambe?

Lesa Salmo 80. Kon ta deskribí e pueblo di Dios den e salmo akí, i ki gran speransa nan ta supliká p’e?

Ta deskribí Israel komo un kunuku di wendrùif ku Dios a ranka for di Egipto, e tera di opreshon, i a transportá hiba na e Tera Primintí di abundansia. E imágen di un mata di wendrùif ta transmití Dios su eskoho di Israel i Su kuido providensial (lesa tambe Gén. 49:11,12,22; Deut. 7:7−11).

Sinembargo, den Salmo 80, e kunuku di wendrùif ta bou di Su furia (Salmo 80:12). E profetanan ta anunsiá e destrukshon di e kunuku di wendrùif komo señal di e huisio di Dios pasobra e mata a bira malu (Isa. 5:1−7, Jer. 2:21).

Sinembargo, Salmo 80 no ta reflekshoná riba e rasonnan pa huisio divino. Mirando e profundidat di e grasia di Dios, e salmista ta babuká ku Dios por retené Su presensia for di Su pueblo pa un tempu asina largu. E tenshon entre e furia di Dios i huisio, na un banda, i Dios su grasia i pordon, na e otro, ta pone e salmista teme ku e furia divino por prevalesé i konsumí e pueblo kompletamente (Salmo 80:16).

Lesa Numbernan 6:22–27. Kon Salmo 80 ta usa e bendishon akí?

E refran di e salmo ta resumí e promesa di Aaron di e bendishon perpetuo di Dios di Su pueblo (Num. 6:22−27) i ta destaká e speransa ku e grasia di Dios lo triunfá riba e kousanan di e mizeria di e pueblo: “Restorá nos, O Dios, i hasi Bo kara resplandesé, i nos lo ta salbá” (Salmo 80:3; lesa tambe Salmo 80:7,19).

E palabra hebreo pa “restorá” akinan ta bini di un palabra komun ku ta nifiká “bolbe”, i ta uz’é bes tras bes den Beibel ku Dios yamando Su pueblo, ku a dual bai, pa bolbe serka djE. E ta konektá djaserka na e idea di repentimentu, di bira bai for di piká i bèk serka Dios. “Lo Mi duna nan un kurason pa konoséMi, pasobra Ami ta SEÑOR; i nan lo ta Mi pueblo, i Ami lo ta nan Dios, pasobra nan lo bolbe serka Mi ku henter nan kurason” (Jer. 24:7).

Kon bo a eksperensiá pa bo mes arepentimentu komo un regreso na Dios?

Lesa Salmo 135. Kua eventonan históriko ta destaká den e salmo? Ki lèsnan e salmista ta saka for di nan?

Salmo 135 ta yama e pueblo di Dios pa alabá Señor pa Su bondat i fieldat demostrá den Kreashon (Salmo 135:6,7) i den e historia di salbashon di Israel den tempu di e Eksodo (Salmo 135:8,9) i den konkistamentu di e Tera Primintí (Salmo 135:10–12).

Señor a demostrá Su grasia skohiendo e pueblo di Israel komo Su tesoro spesial (Salmo 135:4). “Tesoro spesial” ta transmití e relashon distintivo di pakto entre Señor i Su pueblo (Deut. 7:6–11; 1 Pe. 2:9,10). E skohementu di Israel tabata basá riba e boluntat soberano di Señor, i pues, Israel no tin motibu pa sinti su mes superior na otro pueblonan. Salmo 135:6,7 ta demostrá ku e propósitonan soberano di Señor pa mundu no a kuminsá ku Israel, sino ku Kreashon. P’esei, Israel mester kumpli humildemente ku su ròl asigná den e propósitonan di salbashon di Dios pa henter mundu.

E kontamentu di e gran obranan di Dios na fabor di Su pueblo (Salmo 135:8–13) ta kulminá den e promesa ku Dios lo “huzga” Su pueblo i tin kompashon ku nan (Salmo 135:14). E huisio akinan ta Dios su hustifikashon di esnan oprimí i esnan den nesesidat (Salmo 9:4, Salmo 7:8, Salmo 54:1, Dan. 7:22). E promesa ta ku Señor lo sostené e kousa di Su pueblo i defendé nan (Deut. 32:36). Asina, Salmo 135 ke inspirá e pueblo di Dios pa konfia den Señor i pa keda fiel na nan pakto kunE.

E fieldat di Señor na Su pueblo ta hiba e salmista na afirmá e insignifikansia di ídolonan i na e soberania úniko di Señor den mundu (Salmo 135:15−18). Konfiansa den ídolonan ta hasi nan adoradónan mes sin speransa i impotente ku nan ídolonan ta (Salmo 135:18). E salmo ta demostrá ku mester alabá Dios tantu komo Kreador komo Salbador di Su pueblo. Esaki ta transmití maraviosamente den e dos vershonnan komplementario di e di kuater mandamentu di e Dekálogo (Eks. 20:8−11, Deut. 5:12−15). Pa motibu ku e poder di Dios den kreashon i historia ta inkomparabel den mundu, e pueblo di Dios semper mester dependé riba djE i adorá E so. Komo nos Kreador i nos Redentor, mester adorá E so, i adorashon di kualke otro kos, òf kualke otro hende, ta idolatria.

Kon nos por sigurá ku nos no tin ídolonan den nos mes bida? Dikon idolatria kisas por ta mas fásil pa hasi ku nos ta realisá?

Lesa Echonan 7 i Hebreonan 11. Kiko Tèstamènt Nobo ta bisa ta e meta final di Dios su direkshon soberano di Su pueblo den historia?

E Salmonan históriko ta un testimonio poderoso na e fieldat di Dios na Su pueblo. Kada evento den historia di e pueblo di Dios tabata un paso providensial ku ta hiba na e kumplimentu final di e promesa divino di e Salbador di mundu den persona di Hesus di Názarèt. Asta e pruebanan, ku hopi biaha tabata laga e pueblo di Dios babuká i pone nan pensa ku Dios a bandoná nan, tabata bou di e kontrol soberano di Dios i parti di Su providensia pasobra Dios ta e Señor supremo di historia. E salmista ábilmente ta presentá e bèrdat ku asta e infidelidat di e pueblo no por prevení Dios di mantené fe den Su pueblo i kumpli ku Su promesanan. Sinembargo, e individuonan i gruponan ku no a repentí a keda ekskluí di e bendishonnan di pakto, i nan final notorio ta sirbi komo un spièrtamentu duradero di kon bida sin òf opuesto na Dios ta destruí hende.

E Salmonan ta enkurashá e yunan di Dios den tur tempu pa spera riba Señor i permanesé fiel na djE. “Nos no tin nada di teme pa futuro, eksepto si nos lubidá e manera ku Señor a guia nos, i Su siñansa den nos historia di pasado.”—Ellen G. White, Life Sketches of Ellen G. White, p. 196.

Pa e pueblo di Dios sigui padilanti sin temor, nan mester konosé e echonan di nan historia. Ellen G. White ta konsehá kreyentenan pa lesa Salmo 105 i 106 “por lo ménos un biaha tur siman.”— Testimonies to Ministers and Gospel Workers, p. 98.

E historia di e pueblo di Dios ta demostrá ku niun promesa ku Dios a hasi den Su Palabra lo keda sin kumpli. Esaki ta inkluí tantu promesanan divino di kuido individual presente komo futuro promesanan di e segundo binida di Kristu, ku lo establesé e reino di hustisia i pas di Dios riba e tera nobo.

Preguntanan pa Diskushon:

Kua ta e bendishonnan di kòrda Dios su direkshon fiel di Su pueblo den historia? Kua ta e konsekuensianan di lubidá òf ignorá e lèsnan di pasado? Kon nos por apliká e mesun prinsipio ei na nos, komo un iglesia yamá pa hasi e mesun kos ku Israel antiguo tabata yamá pa hasi?

Kon e Salmonan ta enkurashá nos pa rekonosé e kuido providensial di Dios den nos bida i pa ehersé pasenshi i konfiansa den e kamindanan soberano di Dios, asta ora no ta fásil pa komprendé dikon kosnan ta sosodiendo manera nan ta sosodé?

Kon nos por hasi e estudio di e historia di Dios su pueblo mas prominente den nos servisionan di adorashon personal i kolektivo? Kon nos por ta mas intenshonal ora nos ta konta nos yunan tokante e historia mas resien di e pueblo di Dios?