Anhelando pa Dios na Sion

9 di mart

Lesa pa e Estudio di e Siman Akí:

Salmo 84; Rev. 21:3; Salmo 122; Salmo 87; Gal. 3:28,29; Mat. 28:18–20; Salmo 46; Salmo 125.

Versíkulo di Memoria:

“Mi alma ta anhelá, sí, ta antohá pa e pationan di SEÑOR; mi kurason i mi karni ta kanta ku goso na e Dios bibu” (Salmo 84:2, NKJV).

E kantikanan di Sion ta himnonan alegre ku ta oumentá e bunitesa di Sion i e soberania di Señor, kende ta reina for di Su seru santu. E Salmonan akí hopi biaha ta alabá e méritonan di e kas di Señor i ta ekspresá un amor pa e santuario ku nos por haña den otro Salmonan tambe. Hopi di e Salmonan akí tabata komponé pa e yunan di Koré, ku tabatin eksperensia personal di e bendishon di e kas di Señor komo e músikonan di tèmpel (1 Kron. 6:31−38) i wardadónan di e portanan di tèmpel (1 Kron. 9:19).

Kiko ta hasi Sion e fuente di speransa i goso? Sion tabata representá e presensia bibu di Dios meimei di Su pueblo. Manera e pueblo di Israel t e pueblo eligí di Dios (Deut. 7:6), asina Sion ta e seru eligí di Dios (Salmo. 78:68, Salmo 87:2). Dios ta reina for di Sion (Salmo 99:1,2) i a funda Su tèmpel riba Sion tambe (Salmo 87:1). Pues, Sion ta un lugá di bendishon i refugio divino. Hopi biaha ta referí na Sion den paralelo, òf asta interkambiabel ku, Herusalèm i e santuario, e sentro di Dios su obra di salbashon pa e mundu antiguo.

E bendishonnan di Sion ta desbordá te na e finnan di tera pasobra e persona i grasia di Señor ta superá e límitenan di kualke lugá santu. Sion ta e goso di henter tera (Salmo 48:2), afirmando ku henter tera ta pertenesé na Dios.

* Studia e lès di e siman akí pa prepará pa Sabat, 16 di mart.

Lesa Salmo 84:1–4. Dikon e salmista ta anhelá pa biba den e santuario?

E salmista ta “anhelá” i ta “kai flou” pa hasi e santuario su lugá di biba permanente pa asina e por ta serka di Dios pa semper (Salmo 84:1,2). Dios su presensia bibu (Salmo 84:2) ta hasi e santuario un lugá úniko. Den e santuario, adoradónan por “kontemplá e bunitesa di SEÑOR” (Salmo 27:4; lesa tambe Salmo 63:2) i ta “satisfecho ku e bondat di Bo kas” (Salmo 65:4). Den Salmo 84, ta alkansá felisidat sin paralelo den relashon ku Dios, ku ta konsistí di alab’E (Salmo 84:4), haña fortalesa den djE (Salmo 84:5), i konfi’E (Salmo 84:12). E santuario ta e lugá kaminda adorashon i kompañerismo ku otro kreyentenan ta nutri un relashon asina. E presensia bibu di Dios den e santuario ta duna e adoradónan un persepshon di e reino glorioso di Dios i un muestra di bida eterno.

Lesa Salmo 84:5–12. Ken mas e santuario por bendishoná?

Ta deskribí e bendishonnan di Dios komo radiando for di e santuario, otorgá promé na esnan ku ta sirbi den e santuario (Salmo 84:4), despues riba e peregrinonan riba nan kaminda pa e santuario (Salmo 84:5–10), i finalmente alkansando mes leu ku e finnan di tera. E espektativa di topa ku Dios den e santuario ta fortalesé fe di e peregrinonan (Salmo 84:7). Miéntras e forsa di e biahero komun ta debilitá bou di e karga di e biahe agotador, ku e peregrinonan rumbo pa e santuario nan forsa ta oumentá mas serka nan yega na e santuario.

Asta ora kita nan físikamente for di e santuario, e yunan di Dios ta sigui karga un stèmpel di e santuario di Dios dor di biba un bida digno (Salmo 84:11), loke ta karakterisá e hustunan ku ta drenta den e santuario di Señor (Salmo 15:1,2). Ta yama Señor “un solo”, mustrando ku e bendishonnan for di e santuario, meskos ku e rayonan di solo, ta ekstendé te na e finnan di tera (Salmo 84:11). Asina, esnan ku ta permanesé ku Dios pa medio di fe, ta risibí Su grasia, no importá e lugá kaminda nan ta.

Lesa Revelashon 21:3. Ki speransa reflehá den e santuario terenal ta revelá aki na nos? Kon nos ta kuminsá imaginá awor kon e eksperensia akí lo ta?

Lesa Salmo 122:1–5. Kua ta e sintimentunan di e adoradónan na nan yegada na Herusalèm? Kiko nan ta spera di haña na Herusalèm?

Salmo 122 ta ekspresá e goso i emoshon di e peregrinonan na nan yegada na Herusalèm. E peregrinashonnan na Herusalèm tabata okashonnan di goso ora e pueblo di Dios tabata uni tres biaha durante aña pa konmemorá e bondat di Dios pa ku nan den pasado i presente (Deut. 16:16). Herusalèm tabata e sentro di bida di e nashon pasobra e tabata kontené “e testimonio di Israel” (Salmo 122:4, NKJV) i e trononan pa huisio (Salmo 122:5). “E Testimonio di Israel” ta referí na e santuario ku nan tabata yama tin biaha “tabernakel di testimonio” (Num. 1:50) i tabata kontené e “arka di Testimonio” (Eks. 25:22). E trononan poné pa huisio ta deskribí e sistema hudisial na Herusalèm (2 Sam. 8:15). Peregrinashon tabata anto e tempu ora hende por a buska i haña hustisia. Fieldat na Dios i atministrá hustisia na hende no mester a separá nunka.

Lesa Salmo 122:6–9. Kua ta e orashon prinsipal di e pueblo di Dios?

Resa pa e pas di Herusalèm ta invoká e bendishonnan di Dios riba e stat i su habitantenan, i e ta uni e adoradónan, poniendo pas plama meimei di nan (Salmo 122:8). Herusalèm por tabata e siudat di pas solamente si pas tabata eksistí entre Dios i Su pueblo, i entre e yunan di Dios mes. Pues, resa pa pas di Herusalèm ta transmití un apelashon na e pueblo di Dios pa biba na pas ku Dios i ku otro. Den e pas di Herusalèm, e pueblo lo prosperá (Salmo 147:12–14).

E salmo ta siña nos ku e orashon pa bienestar di e komunidat di fe mester ta e tema prinsipal di e orashonnan di e yunan di Dios pasobra solamente e pueblo fuerte i uní di Dios por proklamá e bon nobo di pas i salbashon na e mundu (Juan 13:34,35).

Resa pa e pas di Herusalèm ainda ta un privilegio i responsabilidat di e kreyentenan pasobra e ta tene e speransa den e binida di tempu di fin di e reino di pas di Dios bibu, loke lo abarká no solamente e siudat di Herusalèm, sino henter mundu (Isa. 52:7; Isa. 66:12, 13; Revelashon 21–22).

Kua ta maneranan práktiko ku nos por lucha pa harmonia entre nos komo un pueblo awor?

Lesa Salmo 87:1, 2. Kiko ta hasi Sion un lugá asina stimá?

Salmo 87 ta un himno ku ta selebrá Sion komo e siudat spesialmente skohí i stimá di Dios. E fundeshi di e tèmpel di Dios ta riba Seru Sion (Salmo 2:6, Salmo 15:1). Na fin di tempu Sion lo lanta riba tur seru, ku ta nifiká e supremasia soberano di Señor riba henter mundu (Salmo 99:2, Isa. 2:2, Mik. 4:1). Salmo 87 ta referí na Sion komo “serunan” pa resaltá su mahestat (Salmo 133:3). Dios stima e portanan di Sion “mas ku tur e otro lugánan di biba di Jakòb” (Salmo 87:2), ekspresando e superioridat di Sion riba tur otro lugá den Israel ku tabata lugánan di reuní spesial di e pueblo di Dios den pasado, manera Silo i Betèl. Pues, e Salmo ta afirmá ku berdadero adorashon di Dios ta den Su lugá skohí i den Su forma preskribí.

Lesa Salmo 87:3–7. Kua ta e kosnan glorioso ku tin papiá di Sion?

E gloria di Sion ta hala tur e nashonnan na Dios, i asina e fronteranan di e reino di Dios ta ekstendé pa inkluí henter mundu. Nota ku Dios no ta trata e otro nashonnan komo siudadanonan di segundo rango, asta si ta deskribí Sion komo e lugá di nasementu spiritual di tur pueblo ku aseptá Señor komo nan Salbador.

Tabata hasi e registrashon di individuonan di akuerdo ku nan lugá di nasementu (Neh. 7:5, Lukas 2:1–3). Tres biaha e salmo ta deklará ku a nashonnan ta nase na Sion, ku ta nifiká ku Señor ta proveé nan ku un identidat nobo i ta duna nan tur e privilegionan di yunan di Sion nasé legalmente (Salmo 87:4–6).

Salmo 87 ta mustra salbashon di tantu e hudiunan komo e paganonan, i e echo ku nan ta uní den un iglesia pa medio di e ministerio di redenshon di Kristu (Rom. 3:22; Rom. 10:12; Gal. 3:28, 29; Kol. 3:11). E salmo su deskripshon di e prosperidat di Sion ta kòrda nos riba Daniel su vishon di e reino di Dios ku ta bira un seru enorme ku ta yena henter tera (Dan. 2:34,35,44,45) i di e parábola di Hesus tokante e reino di Dios ku ta krese bira un palu enorme ku ta hospedá e paranan di laira (Mat. 13:32).

Kon Sion su disponibilidat pa adoptá tur hende ta haña su kumplimentu den e Gran Komishon di e iglesia pa prediká e evangelio na tur nashon (Mat. 28:18–20)? Kon e idea akí ta pas ku nos yamada pa prediká e mensahe di e tres angelnan?

Lesa Salmo 46:1–7. Kon ta deskribí mundu di forma poétiko akinan?

E salmo ta duna un deskripshon bibu di e mundu den konmoshon, i ta deskribié ku e imágennan di desasternan natural di intensidat sin igual (Salmo 46:2,3). E imágen di awanan turbulento ta deskribí e nashonnan rebelde i vários problema ku e malbadonan ta kousa den mundu (Salmo 93:3,4; Salmo 124:2–5). Di mes manera, den Salmo 46 e imágen di kalamidatnan natural ta deskribí e mundu kontrolá pa nashonnan den bataya (Salmo 46:6).

E ta klaramente un mundu sin konosementu di Dios pasobra Dios ta meimei di Su pueblo, i kaminda Dios ta biba, pas ta abundá (Salmo 46:4,5). Sinembargo, aunke mundu ta rechas’E, Dios no ta bandoná e mundu. Dios ta presente den mundu siendo meimei di Su pueblo. Den otro palabra, no importá kon malu kosnan ta parse, Dios su presensia ta aki, den mundu, i nos por saka speransa i ánimo personal for di konosé e bèrdat fundamental akí.

Señor, kende ta e refugio perfekto, ta e Fuente di pas i seguridat duradero di Sion. E palabra ku ta resaltá e seguridat di Sion ta “maske” den Salmo 46:3. Maske mundu ta den konmoshon, e pueblo di Dios ta seif. Esaki ta mustra ku pas no ta resultado di ousensia total di pruebanan sino e regalo di Dios na Su yunan ku ta konfia. Konfiansa sin reserva den Dios por hasi ku e yu di Dios tin pas i seguridat meimei di e tormenta (Mat. 8:23–27). E pregunta ku ta surgi ta: Dios lo laga e mundu ku su eskohonan i akshonnan destruktivo pa semper?

Lesa Salmo 46:6–11. Kiko ta e reakshon di Dios riba violensia i destrukshon den mundu?

Dios ta reakshoná ku asina un forsa di malkontentu ku Su palabra, ku a krea tera, awor ta pone tera dirti (Salmo 46:6). Sinembargo, e dirtimentu no ta terminá den destrukshon sino renobashon. Nota ku Dios ta ekstendé Su pas for di Sion te na e finnan di tera. Dios lo hasi gueranan stòp i paga e hèrmèntnan di destrukshon ku e nashonnan malbado a uza pa trese opreshon den mundu (Salmo 46:9). Esaki ta e gran speransa ku kristiannan tin, ku lo tuma lugá na e segundo binida di Hesus.

Kon nos ta siña tin pas i konfia Dios meimei di un mundu ku, en realidat, tin asina tantu konmoshon?

Lesa Salmo 125:1, 2. Kon ta deskribí esnan ku ta konfia Dios akinan?

Ta kompará esnan ku ta konfia den Señor ku Seru Sion, e símbolo di firmesa i fortalesa. E bista magnífiko di e serunan, ku ta rondoná e stat di Herusalèm, a inspirá e salmista pa rekonosé e siguransa di protekshon divino (Salmo 5:12, Salmo 32:7,10). Diferente for di e serunan goberná pa e malbado, ku ta ser tirá den laman (Salmo 46:2), e durabilidat impreshonante di e seru riba kua a konstruí Herusalèm ta inspirá konfiansa profundo. E konfiansa den e protekshon di Dios ta bira ainda mas oudas den lus di e realidat doloroso den kua maldat ta parse di prevalesé asina tantu biaha. Sinembargo, asta meimei di e maldat ei, e pueblo di Dios por tin speransa.

Lesa Salmo 125:3–5. Kon ta tenta esnan hustu? Kua ta e lès pa nos?

E éksito di e malbado por deskurashá e yunan di Dios i, kisas, tenta nan pa sigui nan kamindanan (Salmo 73:2–13, Salmo 94:3). E máksimo stabilidat di Seru Sion no por sigurá esnan ku bai for di Señor. Ainda ta duna e pueblo libertat pa “saka nan man pa hasi maldat” (Salmo 125:3) i “sigui nan kamindanan trosí” (Salmo125:5). Señor ta hustu i lo husga e individuonan ku permanesé den rebelion huntu ku otro pekadornan ku no repentí.

Ata e yamada aki pa e pueblo di Dios ku ta keda inmovibel den fe i konfiansa den Señor, meskos ku Seru Sion ta nan refugio inmovibel. Es desir, asta ora nos no ta komprendé kosnan, ainda nos por konfia den e bondat di Dios.

“E entrada di piká den mundu, e enkarnashon di Kristu, regenerashon, e resurekshon, i hopi otro temanan presentá den Beibel, ta misterionan demasiado profundo pa e mente humano splika, òf asta komprendé kompletamente. Pero nos no tin motibu pa duda den e palabra di Dios pasobra nos no por komprendé e misterionan di Su providensia. . . . Tur kaminda tin maravianan mas ayá di nos konosementu. Nos mester ta sorprendé anto di haña ku den e mundu spiritual tambe tin misterionan ku nos no por komprendé? E difikultat ta sinta únikamente den e debilidat i rigides di e mente humano. Dios a duna nos den e Skrituranan sufisiente evidensia di nan karakter divino, i nos no mester duda den Su palabra pasobra nos no por komprendé tur e misterionan di Su providensia.”—Ellen G. White, Steps to Christ, p. 106, 107.

Kontemplá e mensahe di Isaias 40 i Isaias 51:1–16.

E kantikanan di Sion ta hasi un kompromiso apsoluto pa keda tene kuenta ku Sion i e speransa bibu den e reinado soberano di Dios ku e ta representá. Miéntras ta eksperensiá hopi bendishon di e santuario di Dios den e bida akí, e speransa den e plenitut di bida i goso den Sion ainda ta den futuro. Hopi di e yunan di Dios ta anhelá pa e Sion selestial ku lágrimanan (Salmo 137:1). Pa pensa riba Sion no ta impliká solamente un pensamentu di de bes en kuando, sino un atenshon deliberá i desishon pa biba di akuerdo ku e rekuerdo bibu ei (Eks. 13:3, Eks. 20:8).

Por lo tantu, kanta e kantikanan di Sion ta hiba un resolushon pashoná pa tene e speransa den e restourashon di Dios su reino riba e tera nobo bibu (Rev. 21:1–5). “Aya, mentenan inmortal lo kontemplá, ku un delisia ku nunka ta faya, e maravianan di poder kreativo, e misterionan di amor redentor. No tin un enemigu kruel i engañoso ku ta tenta pa lubidá riba Dios. Kada fakultat lo desaroyá, kada kapasidat oumentá. E atkisishon di konosementu lo no kansa e mente òf agotá e energianan. Aya por realisá e empresanan di mas grandi, alkansá e aspirashonnan di mas haltu, realisá e ambishonnan di mas haltu; i ainda lo surgi halturanan nobo pa superá, maravianan nobo pa aspirá, bèrdatnan nobo pa komprendé, ophetonan fresku pa invoká e podernan di mente i alma i kurpa.”—Ellen G. White, The Great Controversy, p. 677.

Un kompromiso pa no lubidá Sion ta un promesa implísito di e peregrinonan di Señor, ku nunka nan lo aseptá e mundu akí komo nan patria sino spera e shelunan nobo i e tera nobo.

Pues, kreyentenan di tur generashon ku ta anhelá di biba den e Herusalèm Nobo por kanta e Salmonan di Sion (Rev. 3:12). E kantikanan di Sion ta enkurashá nos pa antisipá e mundu futuro ku speransa, pero tambe nan ta obligá nos pa ta agentenan di e grasia di Dios den e mundu presente akí.

Preguntanan pa Diskushon:

Kon nos ta tuma e prinsipionan spiritual i teológiko ku tabata sentrá riba e pueblo di Dios na Sion, un lugá literal na Herusalèm, i apliká nan na e iglesia i su mishon na e mundu?

Kon kreyentenan por permanesé den e santuario di Dios awe? (Juan 1:14–18, Hebr. 12:22–24).

Kon Sion lo bira e stat di tur nashon manera ta imaginá den Salmo 87? (Rom. 5:10, Efe. 2:11–16, Kol. 1:19–23).

Kon bo ta kontestá e persona ku ta mustra na e realidat di e malbado ku ta prosperá den e mundu akí miéntras e “bon” hende ta sufri? Kiko bo ta bisa? Dikon ta importante pa rekonosé ku nos no tin kontestanan kompletu pa tur kos akinan awor?