E Guera Tras di Tur Guera

30 di mart

Lesa pa e Estudio di e Siman Akí:

Rev. 12:7–9, Ezek. 28:12–15, Isa. 14:12–14, Gén. 3:15, Juan 17:24–26.

Versíkulo di Memoria:

“I tabatin guera den shelu, Miguel i su angelnan tabata hasi guera kontra e dragon. I e dragon i su angelnan tabata hasi guera, i nan no a prevalesé, i no tabatin lugá mas pa nan den shelu” (Revelashon 12:7,8).

Si Dios ta asina bon, dikon mundu ta asina malu? Kon un Dios di amor por permití asina tantu maldat eksistí? Dikon kosnan malu ta pasa ku bon hende? Den e lès di e siman akí, nos lo eksplorá e konflikto di siglonan largu entre bon i malu. Kuminsando ku e rebelion di Lucifer den shelu, nos lo saminá e orígen di maldat i e pasenshi di Dios den tratamentu ku e problema di piká.

Dios ta un Dios di amor inkreibel. Su naturalesa mes ta amor (1 Juan 4:7,8). Tur Su akshonnan ta amoroso (Jer. 31:3). Nunka por fòrsa, imponé, òf legislá amor. Ellen G. White ta deklar’e bon ora e ta skibi: “Solamente pa medio di amor ta spièrta amor.”— The Desire of Ages, p. 22. Nenga e poder di eskoho ta destruí e abilidat di stima, i destruí e abilidat di stima ta eradiká e posibilidat di ta berdaderamente felis. Dios ta gana nos lealtat pa medio di Su amor. E ta tratando ku e gran konflikto entre bon i malu di tal manera ku piká nunka lo bolbe surgi den universo. E propósito di Dios ta pa demostrá dilanti di henter universo ku semper El a aktua den e mihó interes di Su kriaturanan. Mirando e mundu a traves di e lèns di e amor di Dios, den lus di e gran konflikto entre bon i malu, ta sigurá kada un di nos ku bon lo triunfá riba malu i lo hasi esei pa semper.

* Studia e lès di e siman akí, basá riba The Great Controversy, kapítulonan 29–30 pa prepará pa Sabat, 6 di aprel.

Lesa Revelashon 12:7–9. Kiko e pasashi akí ta revelá tokante e libertat ku ta eksistí den shelu i e orígen di maldat? Ora Lucifer a rebeldiá, den ki forma Dios por a reakshoná?

E versíkulonan akí ta deskribí un konflikto kósmiko entre bon i malu. Satanas i su angelnan a hasi guera kontra Kristu i, finalmente, a tira nan for di shelu. Ta parse ekstremadamente straño ku guera lo a kuminsá den un lugá asina perfekto manera shelu. Dikon esaki a sosodé? Un Dios amoroso a krea un angel demoniako ku a kuminsá e guera akí? Tabatin un karakterístika fatal den e angel akí ku a hib’é na rebeldiá? Beibel ta splika e orígen di maldat di forma kla. E ta hala e kortina un banda den e konflikto akí entre bon i malu.

Kompará Ezekiel 28:12–15 i Isaias 14:12–14. Kiko a pasa den mente di e ser angelikal yamá Lucifer akí, ku a hiba na su rebelion?

Dios no a krea un diabel. El a krea un ser di brio deslumbrante yamá Lucifer. E ser angelikal akí tabata kreá perfekto. Inkluí den su perfekshon tabatin libertat di eskoho, un prinsipio fundamental di e gobièrnu di Dios ku ta funshoná pa amor, no imposishon. Piká a originá ku Lucifer den shelu mes. No tin un splikashon lógiko pa kiko e angel perfekto akí mester a permití orguyo i yalursheit kria rais den su kurason i krese bira rebeldia kontra su Kreador.

Lucifer, un ser kreá, a deseá e adorashon ku tabata pertenesé solamente na e Kreador. El a purba poderá di e trono di Dios ora el a kuestioná e outoridat di Dios. Su rebelion a hiba na guera habrí den shelu.

Aunke Dios a soportá Lucifer hopi, E no por a permitié daña shelu ku su rebeldia. “E konsilionan selestial a supliká Lucifer. E Yu di Dios a presentá su dilanti e grandesa, e bondat, i e hustisia di e Kreador, i e naturalesa sagrado i inkambiabel di Su lei. Dios Mes a establesé e órden di shelu; i apartando di dje, Lucifer lo a deshonrá su Hasidó, i trese ruina riba su mes. Pero e spièrtamentu, duná den amor i mizerikòrdia infinito, solamente a lanta un spiritu di resistensia.”—Ellen G. White, The Great Controversy, p. 494, 495.

Ki lèsnan bo por saka tokante e karakter di Dios den Su trato ku maldat?

No tin un splikashon lógiko pa dikon Lucifer, e angel perfekto akí, mester a permití orguyo i yalursheit kria rais den su kurason i krese bira rebeldia kontra su Kreador. E orguyo di Satanas a hecha bira rebeldia habrí. El a akusá Dios di ta inhustu i deshonesto. El a infektá e angelnan ku su dudanan i akusashonnan.

Lesa Revelashon 12:4. Kiko e pasashi akí ta revelá tokante e abilidat di Satanas di gaña? Kuantu di e angelnan a kai pa su mentiranan tokante Dios?

Ora guera a kuminsá den shelu, e angelnan mester a disidí, nan lo a sigui Hesus òf Lucifer? Kua tabata e naturalesa di e guera akí den shelu? E tabata un guera físiko, òf un guera di ideanan, òf tur dos? Nos no sa e detayenan, pero e konflikto tabata sufisiente físiko ku a “tirá” Satanas i su angelnan “pafó”, i “no tabatin lugá mas pa nan den shelu” (Rev. 12:8,9). E guera akí opviamente ta inkluí algun tipo di elemento físiko.

Un kos ta sigur tokante e guera den shelu. Tur angel mester a disidí pa òf kontra Kristu. Ken nan lo a sigui? Na ken su bos nan lo a skucha? E angelnan leal a skohe pa ta obediente na e mandatonan amoroso di Kristu, miéntras un terser parti di e angelnan a skucha e bos di Lucifer, a desobedesé Dios, i a pèrdè shelu. Nos tambe, den e tempu krítiko akí di historia di tera, ta yamá pa disidí pa òf kontra Kristu. Nos tambe mester deklará na ken su banda nos ta, esun di Kristu òf esun di Satanas.

Lesa Génesis 2:15–17, Eksodo 32:26, Hosue 24:15, 1 Reinan 18:20, 21, i Revelashon 22:17. Kua prinsipio fundamental den e gran konflikto e versíkulonan akí ta siña nos?

Ora Dios a krea humanidat, El a ankra profundo den nos seleber e abilidat di pensa, rasoná, i skohe. E esensia di nos humanidat ta nos abilidat di hasi eskohonan moral. Nos no ta simpel robòtnan. Nos ta kreá den imágen di Dios, distinto for di e kreashon animal, den nos abilidat di hasi eskohonan moral i biba pa medio di prinsipionan spiritual eterno. For di tempu di e rebelion di Lucifer den shelu, Dios a yama Su pueblo pa respondé riba Su amor i ta obediente na Su mandatonan dor di skohe pa sirbiE.

Ki lèsnan nos por siña for di e bataya den shelu ku ta relatá na nos bataya personal ku maldat? Si Satanas tabata kapas pa gaña e sernan selestial hustu i santu akí, kiko esaki ta bisa tokante su intentonan malbado pa gaña nos?

Adam i Eva a peka, i Dios a bisa nan ku nan mester bandoná nan hogar den hòfi. For di awor en adelante, trabou duru i sufrimentu lo ta nan destino. Nan lo tin ku sufri i finalmente muri sin niun speransa? Morto ta final di tur kos?

Tabata na e punto akí ku Dios a duna nan e promesa registrá den Génesis 3:15: Mirando direktamente na Satanas, e kolebra, El a bisa: “i lo Mi pone enemistat entre abo i e muhé, i entre bo simia i su simia; e lo heridá bo kabes, i abo lo heridá Su hilchi di pia”. Kisas nan no a komprendé kompletamente na e momento ei eksaktamente loke esaki tabata nifiká, pero nan tabata sa ku nan por a spera atrobe. Den algun manera, a traves di e “Simia di e muhé,” nan redenshon lo a bini.

E “Simia di e muhé,” naturalmente, ta Hesu-Kristu (Gal. 3:16). Riba e krus, Satanas a heridá Su hilchi di pia. Pero e viktoria di Hesus ta nos garantia ku un dia kabes di e kolebra lo keda machiká, i e porta di sufrimentu i morto ku Adam i Eva a habri lo sera un dia.

Lesa Hebreonan 2:9, Galationan 3:13, i 2 Korintionan 5:21. Kiko e versíkulonan akí ta bisa nos tokante e inmensidat di e sakrifisio di Kristu riba e krus?

Bo a yega di puntra bo mes si Dios realmente stima bo? Wak e krus; wak e korona di sumpiña, wak e klabunan den Su mannan i pianan. Ku kada drùp di sanger ku Hesus a drama riba Kalvario, Dios ta bisando: Mi stima bo. Mi no ke ta den shelu sin bo. Sí, bo a peka; bo a bende bo mes den man di e enemigu; sí, den i di bo mes bo ta indigno di bida eterno. Pero mi a paga e reskate pa haña bo bèk. Nunka mas bo tin ku puntra bo mes si bo ta stimá ora bo wak e krus.

Beibel ta papia di un Hesus ku a bin na e mundu akí, a eksperensiá doló di kurason, desapunto, i doló en komun ku henter humanidat. E ta revelá un Kristu ku a enfrentá e mesun tentashonnan ku nos ta enfrentá, un Kristu ku a triunfá riba e prinsipadonan i podernan di fièrnu, tantu den Su bida komo a traves di Su morto riba e krus, tur pa kada un di nos personalmente.

Pens’e: Hesus, Esun ku a krea e kòsmòs (lesa Juan 1:3), a baha for di shelu i no solamente a bini den e mundu kaí akí sino a sufri den dje den formanan ku niun di nos hamas lo sufri (lesa Isa. 53:1–5). I El a hasié pasobra E tabata stima nos, kada un di nos. Ki un rason poderoso pa speransa!

Kon Kristu a kontestá e akusashonnan di Satanas riba e krus? Den lus di e gran konflikto entre bon i malu, kiko Su morto a logra?

Loke Hesus a hasi pa nos riba e krus ta kapasit’E tambe pa intersedé pa nos den shelu. Nos Señor resusitá ta nos gran Sumo Saserdote, ku ta proveé tur kos ku nos tin mester pa ta salbá i pa biba den e reino di Dios pa semper.

Lesa Hebreonan 4:15,16 i Hebreonan 7:25. Kon e versíkulonan akí ta duna nos siguransa den un mundu di tentashon, sufrimentu, malesa, i morto?

E teksto ta bisa ku El “a wòrdu tentá den tur kos meskos ku nos, ma tòg sin piká” (Hebr. 4:15). I e ta añadí: “Pesei, laga nos aserká e trono di grasia ku konfiansa, pa nos risibí mizerikòrdia i haña grasia pa yuda den tempu di nesesidat” (Hebr. 4:16).

Pa pon’e di forma mashá simpel, Hesus ta presentá nos dilanti di e universo komo bistí ku Su hustisia, salbá pa medio di Su morto, i redimí a traves di Su sanger. Tur loke nos mester tabata, E tabata. Den Kristu no tin kondena pa e pikánan di nos pasado. Den Kristu nos kulpa a bai, i a traves di Su interseshon poderoso, e gara di piká riba nos bida a kibra. E kadenanan ku ta mara nos a lòs, i nos ta liber.

Lesa Juan 17:24–26. Kua ta e anhelo di mas profundo di Kristu den e gran konflikto entre bon i malu?

“Ora e gran sakrifisio a tuma lugá, Kristu a subi na shelu, i a rechasá e adorashon di angelnan te ora El a presentá e petishon: ‘Mi ta deseá ku nan tambe, kendenan Bo a dunaMi, por ta serka Mi, kaminda Mi ta.’ Juan 17:24. E ora ei, ku amor i poder inekspresabel a bin e kontesta for di trono di e Tata: ‘I laga tur e angelnan di Dios ador'E. Hebreonan 1:6. Ni un mancha tabata deskansá riba Hesus. Su humiashon a terminá, Su sakrifisio kompletá, a dun’E un nòmber ku ta riba tur nòmber.”—Ellen G. White, The Great Controversy, p. 501, 502. Hesus ke mas ku kualke otro kos pa nos ta huntu kunE den shelu. E deseo di Su kurason, e rason pa Su morto i interseshon, ta pa salba nos. Bo tin un nesesidat spesial den bo bida? Bisa Hesus. Kaminda tin fèdrit, E ta trese konsuelo. Kaminda tin miedu, E ta trese pas. Kaminda tin kulpa, E ta trese pordon. Kaminda tin debilidat, E ta trese fortalesa.

Dikon bo ta kere ku Kristu a sakrifiká Su mes pa nos? Kiko ta hasi nos asina balioso p’E?

“Den e deportashon di Satanas for di shelu, Dios a deklará Su hustisia i a mantené e honor di Su trono. Pero ora hende a peka ora el a sede na e engañonan di e spiritu apóstata, Dios a duna un evidensia di Su amor ora El a sede Su úniko Yu pa muri pa e rasa kaí. Den e ekspiashon e karakter di Dios ta revelá. E argumento poderoso di e krus ta demostrá na henter universo ku e kurso di piká ku Lucifer a skohe, di ningun manera tabata pa kuenta di e gobièrnu di Dios.”—Ellen G. White, The Great Controversy, p. 500, 501.

“E krus di Kalvario, miéntras e ta deklará e lei inmutabel, ta proklamá na e universo ku e pago di piká ta morto. Den e último gritu di e Salbador, ‘Ta kumplí,’ e klòk di morto di Satanas a bati. E gran konflikto ku tabata asina tantu tempu den progreso a keda disidí e ora ei, i e eradikashon final di maldat tabata sigurá. E Yu di Dios a pasa a traves di e portanan di e graf, pa ‘pa medio di morto E por a destruí esun ku tabatin poder riba morto, esta, diabel.’ Hebreonan 2:14.”—Ellen G. White, The Great Controversy, p. 503.

Preguntanan pa Diskushon:

Si Dios tabata sa ku Lucifer tabata bai rebeldiá, dikon El a dun’é poder di eskoho na promé lugá? Of ora Lucifer a rebeldiá, dikon Dios no a djis destruyé inmediatamente? Ki tipo di kreashon e universo ku no a kai lo por tabatin si Dios a eliminá Lucifer inmediatamente? Dikon e konsepto di e interes di e universo den e plan di salbashon (1 Pe. 1:12, Rev. 5:13, Rev. 16:7) ta asina importante pa komprendé e gran konflikto?

Riba kua rason òf rasonnan bo por pensa pa e morto di Kristu riba krus? Tabata solamente pa revelá e karakter di Dios? Tabata pa paga e preis di reskate pa piká? Si ta asina, na ken a paga e reskate? Kompartí bo pensamentunan i duna rasonnan bíbliko pa nan.

Ora nos uza e término “e gran konflikto”, kiko nos ke men? Diskutí e vários aspektonan di e gran konflikto i kon e lès di e siman akí ta apliká na bo mes bida.

Kua tekstonan di Beibel ta papia tokante e realidat di e gran konflikto? (Lesa, por ehèmpel, Job 1, 2; Efe. 6:12.)

Kon e komprendementu atventista di shete dia ta úniko entre otro denominashonnan kristian? Kiko tin den e tema di gran konflikto akí ku ta separá atventistanan?