E Tema Sentral: Amor òf Egoismo?

6 di aprel

Lesa pa e Estudio di e Siman Akí:

Lukas 19:41–44; Mat. 23:37,38; Hebr. 11:35–38; Rev. 2:10; Echonan 2:44–47; Juan 13:35.

Versíkulo di Memoria:

“No tene miedu, pasobra Mi ta ku bo; no desmayá, pasobra Mi ta bo Dios. Lo Mi fortalesébo, sí, lo Mi yudabo, sí, lo Mi sostenébo ku Mi man drechi di hustisia” (Isaias 41:10).

Suponé ku bo ta un wardadó di bestia ku ta kuida bo kabritunan riba e barikanan di Seru di Oleifi ku tin bista riba e stat Herusalèm. Bo ta tende stèmnan. Inmediatamente bo ta rekonosé stèm di Hesus. Bo ta asombrá pa loke E ta bisa. Pa Su disipelnan, tabata difísil pa komprendé. Miéntras e solo ku ta bahando ta bria riba e tèmpel ku kupelnan di oro i ta reflehá den blankura di sneu su murayanan magnífiko di marmer, Hesus ta deklará enfátikamente: “ ‘Di bèrdat Mi ta bisa boso, akinan lo no keda ni un piedra riba otro, ku lo no wòrdu bashá abou’ ” (Mat. 24:2). E disipelnan ta konfundí, i abo tambe. Kiko posiblemente Hesus por tabata ke men ku e palabranan akí? Kon nan ta relashoná ku e fin di mundu ku e disipelnan di Hesus a puntra di dje?

Bo ta skucha ku hopi atenshon miéntras Hesus, di forma magistral, ta meskla eventonan ku lo a hiba na e destrukshon di Herusalèm ku esnan ku ta tuma lugá djis promé ku Su regreso. Den e destrukshon di Herusalèm nos ta deskubrí un presagio di Satanas su strategia, tantu pa gaña komo destruí e pueblo di Dios na e tempu di fin. E instrukshon di Hesus den Mateo 24 klaramente ta deliniá eventonan di último dia den konteksto di e kaida di Herusalèm.

Nos lo studia e strategia dòbel tantu pa gaña komo destruí e pueblo di Dios. Loke e malbado faya di logra a traves di persekushon, e ta spera di alkansá pa medio di kompromiso. Nunka ta tuma Dios pa sorpresa, i asta den e momentonan di mas desafiante E ta preservá Su pueblo.

* Studia e lès di e siman akí, basá riba The Great Controversy, kapítulonan 1–2 pa prepará pa Sabat, 13 di aprel.

Miéntras Hesus tabata sinta riba Seru di Oleifi ku bista riba e stat Herusalèm, Su kurason tabata kibrá. E evangelio di Juan ta bisa: “E tabata den mundu, i e mundu a wòrdu trahá dor di djE, i e mundu no tabata konos'E” (Juan 1:11). Hesus a hasi tur loke E tabata por pa salba Su pueblo for di e próksimo destrukshon di nan stat stimá.

E amor di Hesus pa Su pueblo tabata kore di un kurason di amor infinito. Mas di un biaha E tabata apelá na nan den amor pa repentí i aseptá Su invitashon amabel di mizerikòrdia.

Lesa Lukas 19:41–44; Mateo 23:37, 38; i Juan 5:40. Kiko e versíkulonan akí ta bisa bo tokante e aktitut di Hesus pa ku Su pueblo i nan kontesta riba Su invitashon amoroso di grasia i mizerikòrdia? Ki revelashon di e karakter di Dios bo ta mira?

Ta difísil pa komprendé un evento manera e destrukshon di Herusalèm den lus di e karakter amoroso di Dios. Historia ta revelá ku desenas di míles a muri miéntras e general romano Tito tabata guia su ehérsitonan kontra e stat. Herusalèm tabata destruí. Hòmbernan, muhénan, i muchanan tabata asesiná. Unda Dios tabata ora Su pueblo tabata sufri asina tantu? E kontesta ta kla pero no fásil pa kapta kompletamente. Su kurason tabata kibrá. Su wowonan tabata yená ku lágrima. Pa siglonan El a aserká Su pueblo. Pa medio di nan rebeldia kontra Su bondat amoroso, nan a pèrdè Su protekshon divino. Dios no semper ta intervení pa limitá e resultadonan di e eskohonan di Su pueblo. E ta permití e konsekuensianan natural di rebeldia desaroyá. Dios no a kousa e asesinato di muchanan inosente den e destrukshon di Herusalèm; e morto trágiko di esnan inosente tabata e akto di Satanas, no di Dios.

Satanas tin delisia den guera, pasobra e ta lanta e pió pashonnan di e kurason humano. A lo largu di siglonan tabata su propósito pa gaña i destruí i despues kulpa Dios di su mal akshonnan.

Lesa Mateo 24:15–20. Ki instrukshon Hesus a duna Su pueblo pa salba nan di e destrukshon benidero di Herusalèm?

Ta bon pa kòrda ku e gran mayoria di kristiannan ku ta biba na Herusalèm na A.D. 70 a bini di un pasado hudiu. Un Dios amoroso tabata deseá di preservá mas tantu di Su pueblo posibel. Ta p’esei El a duna e instrukshon ku, ora e ehérsitonan romano tabata aserká, nan mester a hui for di e stat.

Reflekshoná riba e siguiente deklarashon: nos no ta husga e karakter di Dios pa medio di eventonan ku nos ta mira rònt di nos; mas bien, nos ta filtra tur e eventonan ku nos ta mira a traves di e prisma di Su karakter amoroso manera Beibel ta revelá. Dikon esaki ta un konseho asina bon?

Dios su mizerikòrdia, grasia, providensia, i konosementu previo ta klaramente revelá den e eventonan ku ta hiba na e destrukshon di Herusalèm. Cestius Gallus i e ehérsitonan romano a rondoná e stat. Den un moveshon inesperá, ora nan atake tabata parse inminente, nan a retirá. E ehérsitonan hudiu a persiguí nan i a gana un gran viktoria.

Ku e romanonan huyendo i e hudiunan persiguiendo, e kristiannan na Herusalèm a hui bai Pella na Perea, mas ayá di Riu Hordan. “A duna e señal primintí na e kristiannan ku tabata warda, i awor a ofresé un oportunidat na tur ku tabata ke, pa obedesé e atvertensia di e Salbador. A anulá e eventonan di tal manera ku ni hudiunan ni romanonan lo a stroba e huida di e kristiannan.”—Ellen G. White, The Great Controversy, página 30.

Lesa Salmo 46:1 i Isaias 41:10. Kiko e pasashinan akí ta bisa nos tokante e kuido providensial di Dios?

Dios ta soberano i ta anulá eventonan riba tera pa e kumplimentu final di Su propósitonan divino. Aunke tin biaha Dios ta kambia Su plannan original basá riba nos eskohonan humano, Su plan final pa e planeta akí lo kumpli. Lo tin momentonan ku e pueblo di Dios ta eksperensiá privashon, persekushon, enkarselashon, i morto mes pa e kousa di Kristu. Pero asta den e momentonan di mas desafiante ku e atakenan di mas visioso di Satanas, Dios ta sostené i ta preservá Su iglesia.

Lesa Hebreonan 11:35–38 i Revelashon 2:10. Ki realidat e tekstonan akí ta revelá tokante nos bataya ku e forsanan di maldat? Kon e pasashinan akí ta harmonisá ku e idea di Dios su protekshon den e pregunta anterior? Tin un kontradikshon den e idea di Dios su protekshon i Dios ku ta permití algun hende enfrentá sufrimentu doloroso i asta un morto di mártir pa e kousa di Kristu?

“E esfuersonan di Satanas pa destruí e iglesia di Kristu pa medio di violensia tabata en bano. E gran konflikto den kua e disipelnan di Hesus a entregá nan bida no a stòp ora e kargadónan di estandarte fiel a kai na nan puesto. Pa medio di derota nan a vense. A mata e obreronan di Dios, pero Su obra a sigui firmemente padilanti.”—Ellen G. White, The Great Controversy, p. 41.

Kiko lo mester nifiká pa nos ku e eskritornan di Beibel, ku seguramente tabata konosé doló i sufrimentu, sinembargo por a skibi, bes tras bes, tokante e realidat di e amor di Dios? Kon nos por eksperensiá e mesun amor ei pa nos mes?

E iglesia kristian primitivo a krese no solamente pasobra su miembronan tabata prediká e evangelio, sino pasobra nan tabata biba e evangelio. Kreyentenan tabata forma ehèmpel di e ministerio di Kristu ku “tabata pasa den henter Galilea, i tabata siña den nan snoanan, i proklamá e evangelio di reino i kura tur sorto di enfermedat i tur sorto di malesa den e pueblo” (Mat. 4:23). Hesus tabata preokupá, preokupá profundamente, pa hende, i esei e iglesia di Tèstamènt Nobo a hasi. Tabata e amor apnegá i kompromiso akí pa supli nesesidatnan humano, kombiná ku kompartí e bon notisia di e evangelio den poder di Spiritu Santu, ku a hasi asina un impakto riba e mundu den e promé siglonan di e iglesia kristian.

Lesa Echonan 2:44–47, Echonan 3:6–9, i Echonan 6:1–7. Aunke sirkunstansianan ta varia, kua prinsipionan nos por siña for di e pasashinan akí tokante kristianismo outéntiko?

E kreyentenan akí di Tèstamènt Nobo a sigui e modelo di Kristu, kende manera Pedro a ekspresá “Dios a ungiE ku Spiritu Santu i ku poder, i kon El a bai rònt, hasiendo bon i kurando tur ku tabata bou di poder di diabel; pasobra Dios tabata kunE’ ” (Echonan 10:38). E iglesia di Kristu tabata Su kurpa riba tera, i e, tambe, den e promé siglonan akí tabata ekspresá e amor sakrifisial di Kristu i Su preokupashon pa humanidat heridá i kibrá. E kreyentenan akí tabata ehèmpelnan bibu di e kompashon di Kristu.

Den e gran konflikto ku ta ras den universo, diabel ke desfigurá e imágen di Dios den humanidat. E propósito di e evangelio ta pa restourá e imágen di Dios den humanidat. E restourashon akí ta inkluí sanashon físiko, mental, emoshonal, i spiritual.

Den Juan 10:10 Hesus ta revelá Su plan pa kada un di nos: “E ladron ta bin solamente pa hòrta, pa mata i pa destruí; Ami a bin pa nan tin bida i pa nan tin é na abundansia”. E ta anhelá pa nos ta físikamente saludabel, mentalmente alerta, emoshonalmente stabil, i spiritualmente kompleto.

Esaki ta spesialmente bèrdat den lus di Su regreso primintí. E mundu akí ta enfrentando un krísis enorme. Hesus su mes pronóstikonan den Mateo 24 i Lukas 21 ta pronostiká kondishonnan katastrófiko riba tera promé ku Su regreso. Ora Kristu toka nos ku Su grasia kurativo, nos ta anhelá di toka otronan ku e toke di Kristu pa asina nan por bira kompleto. Hesus ta manda nos bai den un mundu kibrá komo embahadornan di Kristu pa toka otronan ku Su amor. Kristianismo di Tèstamènt Nobo tabata karakterisá pa e amor di e kristiannan un pa otro den nan komunidatnan.

Diskutí: Ki ròl e iglesia tin den koperá ku Kristu, probando ku e akusashonnan di Satanas ta robes?

Lesa Juan 13:35 i 1 Juan 4:21. Kiko e pasashinan akí ta revelá den lus di e desafio di Satanas kontra e gobièrnu di Dios den e gran konflikto? Kiko nan ta bisa nos tokante e esensia di kristianismo genuino?

Amor tabata e norma di komunidatnan kristian den e promé par di siglonan. Tertullian a afirmá: “Ta prinsipalmente e aktonan di amor asina noble ta hiba hopi hende na pone un marka riba nos. Wak, nan ta bisa, kon nan ta stima otro”. (Wak Terullian su Apology 39 manera tradusí pa riba S.Thelwall Apology 39)

Un di e revelashonnan di mas grandi di e amor di Dios tabata demostrá ora dos pandemia devastador a asotá e promé siglonan na A.D. 160 i A.D. 265. Kristiannan a sali padilanti i a ministrá na esnan malu i ku ta muriendo. E plaganan akí a mata desénas di míles i a laga pueblonan i statnan kompleto kasi sin habitante. E ministerio apnegá, sakrifisial, di kuido, i amoroso di kristiannan a hasi un impakto enorme riba e poblashon. Despues di tempu, míles, i asta sentenáres di míles, i despues miónes den e imperio romano a bira kreyentenan den Hesus durante e dos epidemianan akí. Amor, preokupashon saliente, i kuido desinteresá organisá di esnan malu i muriendo a krea un atmirashon pa e kreyentenan akí i e Kristu ku nan tabata representá.

Rodney Stark su The Rise of Christianity ta un narativo históriko moderno ku ta deskribí e eventonan históriko akí den un lus nobo i mehorá. Den dje e ta deskribí kon durante e di dos epidemia (A.D. 260) henter e komunidat kristian, ku ainda tabata hudiu-kristian pisá, a bira un ehérsito virtual di enfermeronan, ku tabata proveé e nesesidatnan básiko pa e komunidat, ku tabata sufri, sobrebibí. “Na e punto kulminante di e di dos epidemia, rònt di A.D. 260, den un karta di Pasku di Resurekshon, Dionisio a skibi un tributo ekstenso na e esfuersonan heroiko di enfermeria di e kristiannan lokal, di ken hopi a pèrdè nan bida miéntras nan tabata kuidando otronan.

“Mayoria di nos rumannan kristian a mustra amor i lealtat ilimitá, i nunka a spar nan mes i tabata pensa solamente riba otro. Sin preokupashon di peliger, nan a tuma enkargo di esnan malu, atendiendo tur nan nesesidatnan i ministrando na nan den Kristu, i huntu ku nan a bandoná e bida akí di forma sereno i felis; pasobra otronan a infektá nan ku e malesa, i nan a trese riba nan mes e enfermedat di nan próhimo i yen di goso a aseptá nan dolónan.”—Rodney Stark, The Rise of Christianity (Princeton, New Jersey: Princeton University Press, 1996), p. 82.

Kua ta e mensahe opvio pa nos aki? Kon nos ta siña muri na e ami pa asina nos tambe por manifestá e mesun spiritu apnegá? No ta fásil, bèrdat?

“E esfuersonan di Satanas pa destruí e iglesia di Kristu, pa medio di violensia, tabata en bano. E gran konflikto, den kua e disipelnan di Hesus a duna nan bida, no a stòp ora e kargadónan di bandera fiel a kai na nan puesto. Pa medio di derota nan a vense. A mata e obreronan di Dios, pero Su obra a sigui padilanti firmemente. E evangelio a sigui plama i e kantidat di su partidarionan a oumentá. El a penetrá den regionnan ku tabata inaksesibel asta pa e águilanan di Roma. Un kristian a bisa, protestando ku e gobernantenan pagano ku tabata persistí riba e persekushon: Boso por ‘mata nos, torturá nos, kondená nos. . . . Boso inhustisia ta e prueba ku nos ta inosente. . . . Boso krueldat tampoko ta. . . probechá boso.’ E tabata djis un invitashon mas fuerte pa trese otronan na nan konvikshon: ‘Mas tantu boso kòrta nos, mas nos ta krese den kantidat; e sanger di kristiannan ta simia.’—Tertullian, Apology, paragraf 50.”—Ellen G. White, The Great Controversy, p. 41, 42.

“E providensia misterioso ku ta permití esnan hustu sufri persekushon na man di e malbadonan tabata un kousa di gran konfushon pa hopi ku ta suak den fe. Algun ta asta kla pa tira nan konfiansa den Dios afó pasobra E ta permití e hende di mas baho prosperá, miéntras nan poder kruel ta aflihí i tormentá esnan mihó i mas puru. Kon, hende ta puntra, Un ku ta hustu i miserikòrdioso, i ku ta tambe infinito den poder, por tolerá tal inhustisia i opreshon? Esaki ta un asuntu ku kua nos no tin nada di aber. Dios a duna nos sufisiente evidensia di Su amor, i nos no tin ku duda di Su bondat pasobra nos no por komprendé e funshonamentu di Su providensia.”—Ellen G. White, The Great Controversy, p. 47.

Preguntanan pa Diskushon:

Ki balor persekushon tin? Dikon bo ta kere ku Dios ta permití Su pueblo sufri tin biaha?

Si un amigu a hasi bo e pregunta akí, kon lo bo a respondé: “Unda Dios ta den mi sufrimentu? Si E stima mi, dikon mi ta pasando a traves di un momento difísil asina?”

Kon bo iglesia lokal por bira un komunidat ku ta kuida pa impaktá mundu? Diskutí maneranan práktiko pa apliká e estudio di e siman akí.