Fe Kontra Tur Espektativa

27 di aprel

Lesa pa e Estudio di e Siman Akí:

Salmo 119:162; Juan 16:13–15; 2 Pe. 1:20,21; Efe. 2:8,9; Rom. 3:23,24; Rom. 6:15–18.

Versíkulo di Memoria:

“Bo palabra mi a skonde den mi kurason, pa mi no peka kontra Bo” (Salmo 119:11, NKJV).

E reformadónan protestant tabatin algu ku siglo 21 tabatin mester desesperadamente—un propósito pa nan bida. Den su buki, The Empty Self, Philip Cushman, sikólogo renombrá merikano, ta diskutí hendenan ku ta biba bidanan sin propósito. Nan kreensianan ta superfisial. Poko kos di nifikashon real ta importá nan, i nan no tin nada ku ta bale la pena muri p’e, pues nan tin poko ku ta bale la pena biba p’e.

Pero e hòmbernan, muhénan, i muchanan di e reforma protestant tabata diferente di forma dramátiko. Nan tabatin un propósito permanente ku tabata bale la pena biba p’e. Loke nan tabata kere tabata importá, i nan no tabata dispuesto di komprometé nan integridat. Nan kreensianan fundamental tabata un parti inseparabel di nan. Nenga e kreensianan akí tabata nifiká nenga nan mes identidat. Dilanti di morto mes, nan tabatin un pas interno.

Den e estudio di e siman akí, ku ehèmpelnan di e reforma, nos lo eksplorá kon e siñansanan di Skritura ku ta kambia bida ta proveé e base pa propósito genuino i berdadero nifikashon den bida. Komprendé e bèrdatnan eterno akí lo prepará nos pa e krísis final den e gran konflikto entre bon i malu. E bataya ku e reformadónan a bringa no a kaba ainda, i ta yama nos pa sigui kaminda nan a keda. Nos tambe por deskubrí un Dios grandi sufisiente pa tur bataya ku nos ta enfrentá, un Dios ku ta duna nos bida nifikashon i propósito manera nada mundano hamas por a duna.

* Studia e lès di e siman akí, basá riba The Great Controversy, kapítulo 7-11 pa prepará pa Sabat, 4 di mei.

Lesa Salmo 119:103,104; Salmo 119:147; i Salmo 119:162. Kua tabata e aktitut di David pa ku e Palabra di Dios? Kon esaki a impaktá e reformadónan, i kon e ta influensiá nos bida awe?

Beibel tabata e fundeshi di fe di e reformadónan i e esensia di nan siñansa. Nan a komprendé ku nan tabata tratando ku “e palabra di Dios ku ta biba i ta permanesé pa semper” (1 Pe. 1:23, NKJV). Nan tabata tesorá kada palabra. Segun ku nan tabata lesa su páginanan i kere su promesanan, nan fe tabata fortalesé i nan kurashi renobá. “Asina ta ku tur e promesanan di e Palabra di Dios. Den nan E ta papiando ku nos individualmente, papiando tan direktamente komo si fuera nos por a skucha Su bos. Ta den e promesanan akí Kristu ta komuniká Su grasia i poder na nos. Nan ta blachinan for di e palu ei ku ta ‘pa e kuramentu di e nashonnan.’ Rev. 22:2. Risibí, asimilá, nan mester ta fortalesa di e karakter, e inspirashon i mantenshon di bida. Nada mas por tin poder kurativo asina. Nada mas por duna e kurashi i fe ku ta duna energia vital na henter e ser.”—Ellen G. White, The Ministry of Healing, p. 122.

E Skrituranan ta laga goso bria riba nos fèrdrit, speransa riba nos desánimo, lus riba nos skuridat. Nan ta duna direkshon pa nos konfushon, siguransa den nos konsternashon, fortalesa den nos debilidat, i sabiduria den nos ignoransia. Ora nos meditá riba e Palabra di Dios i pa medio di fe konfia su promesanan, e poder di Dios ku ta duna bida, ta duna henter nos ser poder físikamente, mentalmente, emoshonalmente, i spiritualmente.

E reformadónan a saturá nan mente ku Skritura. Nan a biba pa medio di e Palabra, i hopi di nan a muri pa motibu di e Palabra. Nan no tabata kristiannan kasual, komplasiente, deskuidá ku un bida piadoso superfisial. Nan tabata sa ku sin e poder di e Palabra di Dios, nan lo no a resistí e forsanan di maldat formá kontra nan.

John Wycliffe su pashon tabata di tradusí e Beibel den e idioma ingles pa asina e persona averahe por a lesa i komprend’e. Pa motibu ku esei tabata ilegal, nan a husg’é pa su fe, a konden’é komo un herétiko, i a sentensi’é na morto. Na su huisio, Wycliffe a hasi un yamamentu ferviente. “Ku ken, boso ta kere, boso ta luchando? Ku un hòmber bieu riba rant di graf? Nò! Ku Bèrdat—Bèrdat ku ta mas fuerte ku boso, i lo vense boso.”—Wylie, buki 2, kapítulo 13, sitá den Ellen G. White, The Great Controversy, p. 90. Wycliffe su último palabranan a kumpli miéntras e lus di e Palabra di Dios a kore ku e skuridat di Edat Media.

Den ki formanan e Skrituranan a konsolá bo den momentonan di prueba?

Lesa 2 Korintionan 4:1–6 i 2 Korintionan 2:14. Kiko e pasashinan akí ta bisa nos tokante e konfiansa ku Pablo tabatin, apesar di e desafionan ku e tabata konfrontá ora e tabata proklamando e bèrdat di e Palabra di Dios?

Apòstel Pablo a enfrentá opstákulonan abrumador den su trabou di plama e evangelio; sinembargo, e tabatin konfiansa ku e Palabra di Dios finalmente lo a triunfá, “pasobra,” manera el a bisa, “nos no por hasi nada kontra e bèrdat, sino solamente pa e bèrdat” (2 Kor. 13:8).

E reformadónan a enfrentá pruebanan similar; pa medio di fe nan a keda fiel na e Palabra di Dios. Un ehèmpel di kurashi apesar di aparente probabilidatnan abrumador ta William Tyndale. E deseo di mas grandi di Tyndale tabata pa duna Inglatera un tradukshon minusioso i legibel di e Beibel. El a determiná pa tradusí e Beibel for di e idiomanan original i koregí algun di e erornan den e tradukshon di Wycliffe 200 aña promé. Finalmente a arestá i husga Tyndale tambe. A konfiská hopi di su tradukshonnan di Beibel, ku a imprimí na Worms, Alemania, i a kima nan públikamente. Su huisio a tuma lugá na Bélgika na A.D. 1536. A konden’é riba akusashon di erehia i sentensiá pa kim’é. Su burdugunan tabata chok’é miéntras nan tabata mar’é na e staka di kandela i despues a kima su kurpa. El a papia su último palabranan ku afan na bos haltu i a reportá nan komo: “Señor, habri wowo di e rei di Inglatera.” Dios a kontestá e orashon di Tyndale milagrosamente.

Denter di kuater aña di su morto, a publiká kuater tradukshon ingles di e Beibel. Na aña 1611 a imprimí e Vershon di Beibel King James, i pa gran parti e tabata basá riba e obra di Tyndale. E 54 eruditonan ku a produsí e obra a saka hopi for di e tradukshon ingles anterior di Tyndale. Un averahe ta sugerí ku e Tèstamènt Bieu di e King James Bible di aña 1611 ta 76 porshento tradukshon di Tyndale, i e Tèstamènt Nobo ta 83 porshento. Na 2011 e Vershon di Beibel King James a selebrá su di 400 aniversario, pasando e echo memorabel di un bion Beibel imprimí. Tradusí den 2.454 idioma, el a impaktá sentenáres di miónes di hende rònt mundu. E sakrifisio di William Tyndale sigur tabata bale la pena.

No importá kon difísil e tabata parse òf kon desafiante e sirkunstansianan tabata, Tyndale i su koleganan ku tabata kere den e Beibel a konfia ku Dios tabata obrando tur kos di akuerdo ku Su boluntat. Tyndale su bida a hasi un diferensia pa eternidat.

Lesa Daniel 12:3 i Revelashon 14:13. Kon e tekstonan akí ta apliká di forma poderoso na e bida di Tyndale? Awor, pensa riba bo mes bida i bo impakto riba otronan. Ki enkurashamentu e tekstonan akí ta duna en konekshon ku e oportunidat ku bo tin pa influensiá otronan pa eternidat?

Lesa Efesionan 2:8, 9; Romanonan 3:23, 24; Romanonan 6:23; i Romanonan 5:8–10. Kiko e versíkulonan akí ta siña nos tokante e plan di salbashon?

Dios a proveé salbashon komo un regalo. Su Spiritu Santu ta guia nos pa aseptá pa medio di fe loke Kristu a proveé asina gratuitamente a traves di Su morto riba e krus di Kalvario. Hesus, e Yu divino di Dios, a ofresé Su bida perfekto pa ekspiá pa nos pikánan.

Hustisia divino ta demandá perfekto obediensia. Kristu su bida perfekto ta para na lugá di nos bida imperfekto. E lei divino ku nos a kibra ta kondená nos na morto eterno. Beibel ta kla. A traves di nos eskohonan pekaminoso nos a “kai chikí” di e ideal di Dios pa nos bida. Nos a peka. Lagá pa nos kuenta nos no por kumpli ku e demandanan hustu i rekto di un Dios santu. Komo resultado, nos meresé morto eterno. Pero tin bon notisia. Apòstel Pablo ta sigurá nos: “Pasobra e pago di piká ta morto, ma e don di grasia di Dios ta bida etèrno den Kristo Hesus, nos Señor” (Rom. 6:23, NKJV). E ta un regalo, inmeresí; si tabata pa medio di obranan, nos lo a gan’e, i si tin kualke un bèrdat ku ta bria for di e evangelio, ta ku nos no por gana salbashon.

Martin Luther i e reformadónan protestant a deskubrí Kristu i Kristu so komo nan fuente di salbashon. Tabata e ora ei ku Luther a kuminsá prediká e mensahe di e grasia salbador di Kristu. Multitutnan a akudí na masa pa tende su mensahenan sinsero i transformadó. Su palabranan tabata manera un boka di awa friu den e desierto seku di nan bida. E hendenan tabata kadená pa e tradishonnan di e iglesia medieval i mantené den koutiverio ku ritualnan di siglonan bieu ku no tabata proveé bida spiritual. E mensahenan bíbliko di Luther a toka kurasonnan, i bidanan a kambia.

Miéntras Luther tabata lesa Tèstamènt Nobo, e tabata abrumá ku e bondat di Dios. E tabata asombrá pa Dios su deseo pa salba henter humanidat. E bista popular siñá pa lidernan di iglesia na e momento ei tabata salbashon komo parsialmente un obra humano i parsialmente obra di Dios. Luther a deskubrí ku e morto di Kristu riba krus tabata sufisiente pa henter humanidat.

“A trata Kristu manera nos meresé, pa por a trata nos manera E meresé. A konden’E pa nos pikánan, den kua E no tabatin parti, pa Su hustisia por a hustifiká nos, den kua nos no tabatin parti. El a sufri e morto ku tabata di nos, pa nos por a risibí e bida ku tabata di djE.”—Ellen G. White, The Desire of Ages, p. 25.

Ki un resúmen poderoso i maraviosamente skirbí di e evangelio, pa nos por tabata hustifiká pa medio di un hustisia “den kua nos no tabatin parti.” Ki un promesa!

Si salbashon ta obra di Dios den Kristu, ki ròl nos bon obranan ta hunga den bida kristian? Kon nos por afirmá e importansia di bon obranan den nos eksperensia pero sin hasi nan e fundeshi di nos speransa?

Lesa Romanonan 3:27–31; Romanonan 6:15–18; i Romanonan 8:1, 2. Kiko e versíkulonan akí ta siña nos tokante salbashon a traves di e hustisia di Kristu so?

Un bientu nobo tabata suplando a lo largu di e iglesia kristian den e dianan di Luther. Sentenáres di míles di hende tabata siña di apartá nan mirada for di nan mes pekaminoso i wak Hesus en kambio. Sin duda e hendenan akí, mirando nan mes i kon nan mes tabata, tabata mira solamente kosnan ku ta deskurashá nan. Kua kreyente awendia no tin e mesun eksperensia? Ta p’esei nos mester wak, en kambio, na Hesus.

E grasia di Dios ta kambia nos. Un dia John Wesley a asistí na un reunion di Moravia na London. Wesley a keda asombrá ora el a tende nan lesa e introdukshon di Luther na Romanonan. Pa promé biaha den su bida el a kuminsá komprendé e evangelio. Algu a move denter di dje, i el a sinti su mes di forma straño halá na Kristu ku a duna Su bida p’e. El a sklama: “Mi a sinti ku mi a konfia den Kristu, Kristu so pa salbashon: i mi a haña un siguransa ku El a kita mi pikánan, asta di mi, i a salba mi for di e lei di piká i morto.”—John Whitehead, The Life of the Rev. John Wesley, M.A. (London: Stephen Couchman, 1793), p. 331.

Lesa 1 Pedro 2:2, 2 Pedro 3:18, Kolosensenan 1:10, i Efesionan 4:18–24. Kua bèrdatnan vital e pasashinan akí ta revelá tokante bida kristian?

E reformadónan tabata studia e Palabra sistemátikamente pa deskubrí mas bèrdat. No satisfecho ku e status quo, ni ku eksperensia religioso rígido ku tiki òf sin kresementu, nan tabata deseá konstantemente pa konosé Kristu mihó. Hopi kristian ku tabata kere den Beibel den Edat Media a paga un preis ekstremadamente haltu pa nan kompromiso. A torturá, enkarselá, eksiliá, i ehekutá nan. A konfiská nan propiedatnan, kima nan kasnan, destruí nan teranan, i persiguí nan famianan. Ora a saka nan for di nan kasnan, nan tabata buska un stat “di kual Dios ta e arkitekto i konstruktor” (Hebr. 11:10). Ora tabata torturá nan, nan tabata bendishoná nan tormentadónan, i ora nan tabata dekaí den piskalatnan skur i húmedo, nan tabata reklamá e promesanan di Dios di un mañan mas briante. Aunke nan kurpanan tabata enkarselá, nan tabata liber—liber den Kristu, liber den e bèrdatnan di Su Palabra, liber den e speransa di Su pronto regreso.

Ora bo wak bo mes, ki speransa di salbashon bo tin?

“E sirbidónan fiel di Dios no tabata traha duru nan so. Miéntras prinsipadonan i podernan i spiritunan malbado den lugánan haltu tabata konspirá kontra nan, Señor no a bandoná Su pueblo. Si lo por a habrí nan bista, nan lo a mira un evidensia asina kla di e presensia i ayudo divino manera a konsedé un profeta di antigwedat. Ora e sirbidó di Eliseo a mustra su shon e ehérsito hostil ku tabata rondoná nan i kòrta tur oportunidat pa skapa, e profeta a resa: ‘O SEÑOR, mi ta pidiBo, habri su wowo pa e mira.’ 2 Reinan 6:17. I, ata, e serunan tabata yená ku garoshinan i kabainan di kandela, e ehérsito di shelu stashoná pa protegé e hòmber di Dios. Asina angelnan tabata warda e obreronan den e kousa di Reforma.”—Ellen G. White, The Great Controversy, p. 208.

“Ora enemigunan poderoso tabata uni pa tumba e fe reformá, i míles di spada tabata parse na punto di keda saká for di baliña kontra dje, Luther a skibi: ‘Satanas ta lansando su furia; pontífisenan impio ta konspirando; i ta menasá nos ku guera. Insitá e pueblo pa lucha balentemente dilanti di e trono di Señor, pa medio di fe i orashon, pa asina nos enemigunan, vensí pa e Spiritu di Dios, por keda limitá na pas. Nos nesesidat prinsipal, nos trabou prinsipal, ta orashon; laga e hendenan sa ku awor nan ta eksponé na e fila di spada i na e rabia di Satanas, i laga nan resa.’ ”—D'Aubigné, buki 10, kapítulo 14, sitá den Ellen G. White, The Great Controversy, p. 209.

Hustifikashon pa fe, e gran bèrdat ku Luther a deskubrí di nobo, ta e fundeshi di e evangelio, e bèrdat riba kua nos speransa di salbashon ta deskansá. Su himno: “Un Fòrti Fuerte,” ta artikulá e evangelio poderosamente: “Si nos konfia den nos mes, Nos lucha lo ta robes, Nos tin pará na nos lado E hòmber ku ta digno. Ta ken esei por ta? Kristu Hesus, E ta Señor di e Sabat, Su nòmber t’eksalsá, E mester ta Vensedor.”— Seventh-day Adventist Hymnal (Hagerstown, MD: Review and Herald Publishing Association, 1985), No. 506.

Preguntanan pa Diskushon:

Kon nos por splika e balansa entre grasia i lei, entre fe i bon obranan?

Dikon bo ta kere ku ta asina fásil pa laga nos mente slep drenta den legalismo? Kon lo bo a definí legalismo? Dikon e ta asina perhudisial pa nos fe kristian?

Tin peliger si no komprendé e konsepto di “salbashon pa grasia” korektamente? Na unda e mal komprendementu ei lo por hiba?

Kiko algun hende ke men ora nan uza e término “grasia barata”? Grasia algun biaha ta barata?