Motivá pa Speransa

11 di mei

Lesa pa e Estudio di e Siman Akí:

1 Tes. 4:13–18; Mat. 24:27,30,31; 2 Pe. 1:19–21; Dan. 8:14; Dan. 9:20–27; Esdras 7:7–13.

Versíkulo di Memoria:

“I hende lo bisa riba e dia ei: ‘Mira, esaki ta nos Dios, nos a spera riba Dje, i E lo salba nos. Esaki ta SEÑOR, nos a spera riba Dje; nos lo ta kontentu i regosihá den Su salbashon’ ” (Isaias 25:9, NKJV).

E segundo binida di Hesus ta un di e temanan sentral di Skritura. E ta un hilu di oro ku ta kore atraves di e páginanan sagrado di e Beibel. Un erudito a kalkulá ku tin 1.854 referensia na e segundo binida di Kristu den Tèstamènt Bieu. Den e 260 kapítulonan di Tèstamènt Nobo tin mas ku 300 referensia na e regreso di Kristu. Un den kada 25 versíkulo ta menshon’e. Bintitres di e 27 bukinan di Tèstamènt Nobo ta referí na e gran evento akí.

Despues ku e Reforma na Oropa a pega i divishonnan i lucha a strob’e, protestantismo a kue rais den e Mundu Nobo, inkluyendo Estádos Unídos, kaminda hopi a trata na rekohé e mantel di bèrdat, inkluyendo e bèrdat tokante e Segundo Binida.

Entre nan tabatin un kampesino baptista yamá William Miller. For di su estudio di e Beibel, el a kere ku Hesus tabata biniendo pronto, asta durante su bida, i despues a kuminsá prediká e mensahe ei. Miller a kuminsá un movementu ku, aunke el a enfrentá un gran desapunto, a habri pa hopi hende bèrdatnan di Beibel ku ta keda relevante te dia di awe.

Den e lès di e siman akí nos lo investigá dikon e segundo binida di Kristu a yena kurason di kreyentenan ku goso atraves di siglonan i kon nos por ta prepará pa e gran evento ei.

* Studia e lès di e siman akí, basá riba The Great Controversy kapítulo 18–21, pa prepará pa Sabat, 18 di mei.

E reformadónan protestant i e peregrinonan ku a bandoná Hulanda pa bai e Mundu Nobo tabata anhelá pa e binida di Hesus. Pa nan e segundo binida di Kristu tabata un evento gososo ku nan tabata antisipá ansiosamente. John Wycliffe tabata wak padilanti na e binida di Kristu komo e speransa di e iglesia. Calvin a papia pa tur e reformadónan ora el a papia di e glorioso regreso di Kristu komo “mas prometedor di tur evento”. Pa hòmber- i muhénan fiel di Dios, e segundo binida di Kristu tabata algu di brasa, no algu di teme.

Lesa Juan 14:1–3, 1 Tesalonisensenan 4:13–18, i Tito 2:11–14. Dikon e pasashinan di Beibel akí a duna kristiannan asina tantu speransa a lo largu di siglonan?

Ta fásil pa komprendé dikon un kreensia den e segundo binida di Kristu a trese asina tantu speransa i goso pa kristiannan ku ta kere den Beibel. E ta mustra padilanti na e fin di malesa, sufrimentu, i morto. E ta marka e komienso di fin di pobresa, inhustisia, i opreshon. E ta antisipá e fin di lucha, konflikto, i guera. E ta pronostiká un mundu futuro di pas, felisidat, i kompañerismo duradero huntu ku Kristu i e redimínan di tur siglo pa semper.

“Den tur siglo e binida di Señor tabata e speransa di Su berdadero siguidónan. E promesa di despedida di e Salbador riba Seru di Oleifi, ku E lo a bin atrobe, a iluminá e futuro pa Su disipelnan, yenando nan kurason ku goso i speransa ku tristesa no por a paga ni pruebanan suavisá. Meimei di sufrimentu i persekushon, e ‘aparishon di e gran Dios i nos Salbador Hesu-Kristu’ tabata e ‘speransa bendishoná’. Ora e kristiannan di Tesalonika tabata yená ku tristesa miéntras nan tabata dera nan sernan kerí, ku a spera di biba pa testiguá e binida di Señor, Pablo, nan maestro, tabata mustra nan na e resurekshon, ku ta tuma lugá na binida di e Salbador. E ora ei e mortonan den Kristu lo mester a resusitá, i huntu ku e bibunan ser tumá pa topa Señor den laira. ‘I asina,’ el a bisa, ‘nos lo ta semper ku Señor. P’esei, konsolá otro ku e palabranan akí.’ 1 Tesalonisensenan 4:16–18.”—Ellen G. White, The Great Controversy, p. 302.

Dikon e Segundo Binida ta asina importante pa nos fe? Spesialmente pasobra nos sa ku e mortonan ta drumi (wak lès 10), dikon e siñansa akí ta haña tantu importansia? Sin dje, dikon nos lo tabata, manera Pablo a bisa, den un situashon apsolutamente sin speransa (lesa 1 Kor. 15:15–18)?

Aunke e reformadónan protestant tabata kere den e regreso literal, visibel, oudibel, i glorioso di Kristu, gradualmente e komprendementu di e bèrdat bíbliko akí a kambia. Predikadónan popular di siglo 19 tabata siña ku Kristu lo a bini pa establesé Su reino riba tera i marka komienso di 1.000 aña di pas. Esaki a hiba na letargo spiritual i un kompromiso apátiko na balornan spiritual.

Di forma similar, e disipelnan di Kristu a mal komprendé e naturalesa di e Mesias su binida. Nan a pensa ku E lo a bini komo un general konkistadó ku lo a kibra e yugo di sklabitut romano, no Unu ku lo a libra nan for di e kondena i kadenanan di piká. Asina, nan no a komprendé e forma di Su binida.

Lesa Echonan 1:9–11; Revelashon 1:7; i Mateo 24:27,30,31. Kiko e versíkulonan akí ta siña nos tokante e forma di regreso di nos Señor?

Ora Kristu a bini e promé biaha komo un beibi den e stal di Bètlehèm, mashá poko hende a diserní Su binida. Pero ora E bini e di dos biaha, “tur wowo” lo mir’E bini. Tur orea lo tende e zonidu di trompèt di Su regreso. Tur ser humano riba tera lo kontemplá Su gloria. Nos no mester keda engañá. E Skrituranan a hasi e eventonan rònt di Su regreso abundantemente kla.

“Un di e bèrdatnan di mas solèm i sinembargo mas glorioso revelá den Beibel ta esun di e segundo binida di Kristu pa kompletá e gran obra di redenshon. Na e pueblo peregrino di Dios, lagá asina tantu tempu pa biba den ‘e region i sombra di morto’, ta ser duná un speransa ku ta inspirá goso den e promesa di Su aparishon, kende ta ‘e resurekshon i bida’, pa ‘trese esnan desterá di djE bèk kas’. E doktrina di e segundo binida ta e nota klave mes di e Sagrado Skrituranan. For di e dia ku e promé pareha a apartá nan pasonan tristu for di Eden, e yunan di fe tabata spera e binida di Esun Primintí pa kibra e poder di e destruktor i trese nan atrobe na e Paraiso pèrdí.”—Ellen G. White, The Great Controversy, p. 299.

Un di e promé lidernan atventista, Luther Warren, tabatin kustumber di bisa hóbennan: “E úniko manera pa ta prepará pa e binida di Kristu ta pa ta prepará i keda prepará.” E mensahe di e pronto regreso di Kristu ta un apelashon urgente na kada un di nos pa saminá nos kurason i evaluá nos bida spiritual. E ta un yamada pa biba piadosamente. No por tin neutralidat den e lus resplandesiente di e gloria di Kristu su regreso.

Lesa 1 Tesalonisensenan 5:2–5 i Hebreonan 9:28. Ki enkurashamentu e versíkulonan akí ta duna nos tokante e forma di Kristu su binida?

Meskos ku Dios a uza e reformadónan protestant pa redeskubrí e bèrdat tokante hustifikashon pa fe den Kristu so, El a uza William Miller pa redeskubrí e bèrdat tokante e forma di Kristu su segundo binida. Segun ku Miller tabata studia Skritura, el a deskubrí un Kristu ku tabata stim’é mas ku posiblemente e por a imaginá. Ku su Beibel, un pèn, i un buki di anotashon, el a kuminsá lesa kuminsando na Génesis i no a lesa mas rápido ku e por a komprendé e pasashi konserní. Komparando Skritura ku Skritura, el a permití Beibel splika su mes.

Lesa Isaias 28:9,10; Proverbionan 8:8,9; Juan 16:13; i 2 Pedro 1:19-21. Kua prinsipionan di interpretashon di Beibel bo ta deskubrí den e pasashinan akí?

Segun ku William Miller tabata kompará skritura ku skritura, e misterionan di e Beibel tabata habri p’é. E tabata buska manera un hende ku ta buska un tesoro skondí i a keda rikamente rekompensá. Spiritu Santu a habri e Palabra di Dios pa su komprendementu. El a aserká profesia ku e mesun diligensia den estudio di Beibel ku e otro pasashinan ku e tabata studiando.

Lesa Daniel 1:17; Daniel 2:45; 1 Pedro 1:10,11; i Revelashon 1:1–3. Kiko e pasashinan akí ta siña nos tokante komprendé e profesianan di Beibel?

E símbolonan den e bukinan profétiko no ta di lòk den misterio. Un Dios amoroso a duna nos Su Palabra profétiko pa prepará nos pa e eventonan klimátiko ku pronto lo desplegá den e mundu akí. William Miller a komprendé klaramente ku profesia tabata su mes mihó intérprete. Beibel mes ta splika e símbolonan di profesia. Bestianan ta representá reinan òf reinonan (Dan. 7:17,23). Bientu ta representá destrukshon (Jer. 49:36). Awa ta representá pueblonan òf nashonnan (Rev. 17:15). Un muhé ta representá iglesia (Jer. 6:2, Efe. 5:22–32). E profesianan di tempu di Daniel i Revelashon ta duná tambe den lenguahe simbóliko, ku un dia profétiko representando un aña literal (Num. 14:34, Ezek. 4:6). Segun ku William Miller tabata apliká e prinsipionan akí di interpretashon bíbliko, e tabata sorprendí pa loke el a deskubrí tokante loke el a kere di ta e tempu di e regreso di Kristu.

Dikon un komprendementu korekto di simbolismo profétiko ta asina importante pa nos fe?

William Miller a opservá ku eventonan pronostiká pa e profetanan a kumpli eksaktamente: e 400 añanan di peregrinashon di e desendientenan di Abraham, e 40 añanan di Israel su dualmente den desierto, e 70 aña di koutiverio di Israel, i e 70 añanan di Daniel asigná na Israel (Gen. 15:13, Num. 14:34, Jer. 25:11, i Dan. 9:24).

Lesa Marko 1:15, Galationan 4:4, i Romanonan 5:6. Kiko e versíkulonan akí ta bisa nos tokante Dios su skema di tempu pa e Promé Binida?

Segun ku Miller tabata studia e profesianan, komparando Skritura ku Skritura, el a konkluí ku si Dios tabatin un skema di tempu divino a lo largu di Beibel, Dios mester tin un skema di tempu divino ora ta trata di e segundo binida di nos Señor.

Lesa Daniel 8:14. Kua evento tabata bai tuma lugá na final di e 2.300 dianan?

William Miller a aseptá e punto di bista popular ku e “purifikashon di e santuario” tabata e purifikashon di tera pa medio di kandela. Diligentemente el a studia e Skrituranan pa komprendé un evento di importansia asina estupendo. El a deskubrí e konekshon entre Daniel 8 i Daniel 9. Den Daniel 8 a instruí e angel pa “hasi e hòmber akí komprendé e vishon” (Dan. 8:16). Yegando final di e kapítulo, e úniko porshon di henter e vishon di Daniel 8 ku a keda sin splikashon (lesa Dan. 8:27) tabata e parti tokante e 2.300 dianan. Despues e angel a bai bèk serka Daniel i a deklará: “ ‘awor mi a bin pa dunabo abilidat pa kompromdé’ ” (Dan. 9:22, NKJV; lesa tambe Dan. 9:23,25–27). Esaki tabata pa yud’é komprendé tokante e 2.300 dianan.

Nos sa esaki pasobra, despues di a pidi Daniel pa “ ‘konsiderá e asuntu i komprendé e vishon’ ” (Dan. 9:23, NKJV), e promé palabranan di e angel tabata: “ ‘Setenta siman a wòrdu determiná pa bo pueblo i bo stat santu’ ” (Dan. 9:24, NKJV). E palabra tradusí “determiná” literalmente ta nifiká “kòrta afó”. Setenta siman, 490 aña, mester ser kòrta afó. Pero di kiko? E vishon di e 2.300 dianan, opviamente, e úniko parti di Daniel 8 ku Daniel no a komprendé, i ku e angel a bin splika awor.

I ya ku e punto di salida di e 70 simannan tabata “ ‘for di ora ku e òrdu a sali pa restorá i konstruí Herusalèm’ ” (Dan. 9:25, NKJV), Miller tabata sa ku si e tabatin e fecha ei, e por a sa e komienso di e 70 simannan i e profesia di 2.300 dia.

Lesa Esdras 7:7–13. Ki ora a emití e dekreto pa permití e koutivonan di Israel na Persia bai liber pa rekonstruí nan tèmpel?

Artaxerxes, rei di Persia, a emití e dekreto na 457 B.C. E dekreto akí tabata e último di tres dekreto pa permití e hudiunan regresá pa rekonstruí Herusalèm i restorá servisionan di adorashon den tèmpel. E di tres dekreto akí tabata esun di mas kompletu i ta marka e komienso di e profesio di 2.300 dia/aña.

Lesa Daniel 9:25,26. Ki ora henter e periodo profétiko akí lo a kuminsá? Ki eventonan importante e versíkulonan akí ta pronostiká?

Den e profesia remarkabel akí, Daniel a pronostiká ku for di “ora ku e òrdu a sali pa restorá i konstruí Herusalèm” te na e Mesias lo tabata 69 siman profétiko, òf 483 dia profétiko, òf aña literal. Ya ku e dekreto a sali den hèrfst di 457 B.C., 483 aña ta kubri te na hèrfst di A.D. 27. E palabra “Mesias” ta nifiká “Esun Ungí”. Den hèrfst di A.D. 27 Kristu a ser batisá i a risibí unsion di e Spiritu (Echonan 10:38). Despues di Su boutismo, Hesus a bai Galilea, "predikando e evangelio di e reino Dios, i bisando: ‘E tempu ta kumplí’ ” (Marko 1:14,15, NKJV).

Den lènte di A.D. 31, meimei di e último siman profétiko akí, tres aña i mei despues di Su boutismo, nan a krusifiká Hesus. E sistema di ofrenda ku tabata mustra padilanti na e Lamchi di Dios a terminá ku e sakrifisio di Kristu riba Kalvario. Tipo a topa antitipo, i finalmente tur e sakrifisionan i ofrendanan di e sistema seremonial a stòp.

Lesa Daniel 9:27. Kon e profesia di setenta siman lo a kaba?

E setenta simannan, òf 490 aña, spesialmente asigná na e hudiunan, a terminá na A.D. 34 ora e Sanhedrin a rechasá e mensahe di e evangelio (Echonan 6:8–7:60).

Kitando 490 aña for di e profesia di 2.300 aña ta resta 1.810 aña pa kompletá e profesia. Esaki ta hiba nos na A.D. 1844. William Miller i e promé atventistanan tabata kere ku e santuario den Daniel 8:14 tabata tera, i nan a asumí ku Kristu lo a bini pa purifiká tera pa medio di kandela na 1844. (Wak e diagrama riba djabièrnè.)

Wak e siguiente diagrama pa e profesianan di e 70 simannan i e 2.300 dianan. E profesianan ta kuminsá na 457 B.C. i ta pronostiká e eventonan rònt di “Mesias e Prens”, riba ken e profesia di 70 siman ta basá. Ku e fundeshi sólido ei, e profesia di 2.300 dia ta terminá den aña 1844.

“Meskos ku e promé disipelnan, William Miller i su sosionan mes no a komprendé e importansia kompletamente di e mensahe ku nan tabata hiba. Erornan ku a establesé durante hopi tempu den e iglesia a impedí nan di yega na un interpretashon korekto di un punto importante den e profesia. P’esei, aunke nan tabata proklamá e mensahe ku Dios a konfia na nan pa duna mundu, tòg, debí na un mal komprendementu di su nifikashon, nan a sufri desapunto.”—Ellen G. White, The Great Controversy, p. 351, 352.

“Sinembargo, Dios a kumpli ku Su mes propósito benefisioso, permitiendo pa duna e spièrtamentu di e huisio eksaktamente manera e tabata. E gran dia tabata serka, i den Su providensia El a hiba e hendenan na e prueba di un tempu definí, pa asina revelá na nan loke tabata den nan kurason. E mensahe tabata diseñá pa prueba i purifikashon di e iglesia. Mester a hiba nan na mira si nan afekto tabata establesé riba e mundu akí òf riba Kristu i shelu. Nan tabata profesá di ta stima e Salbador; awor nan mester a proba nan amor. Nan tabata kla pa renunsiá nan speransanan i ambishonnan mundano i, ku goso, duna bonbiní na e binida di nan Señor? E mensahe tabata diseñá pa kapasitá nan pa diserní nan berdadero estado spiritual; a mand’e den mizerikòrdia pa spièrta nan pa buska Señor ku repentimentu i humiliashon.”—Ellen G. White, The Great Controversy, p. 353.

Preguntanan pa Diskushon:

Ki lèsnan nos por siña for di e eksperensia di William Miller? Tin biaha Dios ta anulá nos komprendementu robes?

Dikon un komprendementu di Daniel 9:24–27 ta asina signifikante ora ta establesé e integridat di Beibel i e divinidat di Kristu?

Ki ròl komprendé profesia ta hunga den e plan di salbashon? Dikon profesia ta asina signifikante den e plan di Dios?