E fábula ku morto ta realmente djis entrada na un etapa nobo di bida ta basá riba e konsepto di inmortalidat natural di e alma. E idea pagano akí a infiltrá den iglesia desde prinsipio, miéntras e tabata hala bai for di su fundeshinan bíbliko den un intento pa hasi su fe komprendibel na e mundu romano en general: “E teoria di inmortalidat di e alma tabata un di e doktrinanan falsu ku Roma, derivá di paganismo, a inkorporá den e religion di Kristianismo.”—Ellen G. White, The Great Controversy, p. 549.

“ ‘I no tene miedu di esnan ku ta mata e kurpa ma no por mata e alma. Mas bien tene miedu di Esun ku por destruí tantu alma komo kurpa den fièrnu’ ” (Mat. 10:28, NKJV). Kiko e versíkulo akí so mester bisa nos tokante e supuesto inmortalidat di e alma?

Señor a prohibí Su pueblo di envolvé nan mes den okultismo di kualke tipo. Nan no mester a tolerá entre nan “un medium, òf un spiritista, òf un hende ku ta yama morto” (Deut. 18:11, NKJV). Hendenan asina mester a ser piedrá te ora nan muri (Lev. 20:27). E kastigu parse inkreiblemente kruel, pero e tabata destiná pa protehá Israel for di adorá diosnan falsu.

Bruheria ta demoniako. E ta sedusí hende den adorashon falsu i ta falsifiká un relashon genuino ku Dios, pero nunka e por satisfasé e nesesidatnan di mas profundo di e kurason. Spiritismo ta forma e núkleo di e plan di Satanas pa kue e mundu prezu. Pero Hesus, pa medio di Su grasia i amor, ta libra koutivonan di e kadenanan di maldat ku ta mara nan.

Lesa Eklesiastés 9:5; Job 7:7–9; i Isaias 8:19,20. Kiko e pasashinan di Beibel akí ta siña nos tokante morto i komunikashon ku e mortonan?

E kreensia ku e mortonan ta bai shelu mesora ora nan muri, aunke e no ta bíbliko, tabata eksistí asina tantu tempu, i ta asina firmemente ankrá, ku ta hopi difísil pa hende lag’e lòs. Hende ta usa un par di teksto ku ta saká for di konteksto, pa purba hustifiká e kreensia. Pero e siñansa falsu akí ta laga nan sin protekshon kontra e engañonan ku Satanas por imponé riba nan, spesialmente den e krísis final.

Kiko tabata bo eksperensia ku trata na splika e estado di e mortonan na otro kristiannan? Kiko, si tin algu, bo a haña efektivo?

Lesa Salmo 6:5: Salmo 115:17: 1 Reinan 2:10: 1 Reinan 11:43: 1 Reinan 14:20. Kiko e versíkulonan akí ta siña tokante e estado di e mortonan?

Tèstamènt Bieu no ta siña inmortalidat di e alma. Ni e no ta siña ku, despues di morto, esnan fiel ta subi bai na e gloria di shelu pa eternidat, i ku esnan infiel ta baha bai fièrnu, kaminda nan ta kima pa eternidat. E ta siña ku morto ta un soño. E buki di Reinan ta usa e ekspreshon: “nan a sosegá [drumi] huntu ku nan tatanan” pa deskribí morto di e patriarkanan. E Salmonan ta yam’e e “soño di morto” (Salmo 13:3; kompará Salmo 90:5). Refiriendo na morto, Job ta papia di no spièrta for di soño (Job 14:12). E salmista ta añadí: “Pa loke ta ami, lo mi mira Bo kara den hustisia; lo mi ta satisfecho ora mi spièrta na Bo semehansa” (Salmo 17:15, NKJV).

Ora e ehérsito asirio a ser derotá i destruí, morto di e sòldánan ta ser yamá nan “último soño” (Salmo 76:6, CJB). E idea di e mortonan komo spiritunan sin kurpa ku ta zueif rònt pa komuniká ku e bibunan no ta un konsepto bíbliko ètòl sino puru paganismo.

Un frakaso di komprondé e bèrdat tokante morto ta laga nos habrí pa e engañonan di Satanas. “Hopi lo ser konfrontá pa e spiritunan di demoñonan ku ta personifiká konosínan òf amigunan kerí i ta deklará e erehianan di mas peligroso. E bishitantenan akí lo apelá na nos simpatia di mas tierno i lo obra milagernan pa sostené nan pretenshonnan. Nos mester ta prepará pa resistí nan ku e bèrdat di Beibel ku e mortonan no sa nada i ku esnan ku ta aparesé asina ta e spiritunan di demoñonan.”—Ellen G. White, The Great Controversy, p. 560.

Lesa Daniel 12:2; Job 19:25, 26. Ki elementonan tokante e estado di e mortonan e versíkulonan akí ta añadí?

Morto ta un sosiegu den soño te na e resurekshon. No tin spiritunan sin kurpa ku ta zueif rònt pa komuniká ku e bibunan. Aunke e paganonan tabata kere den un mundu di spiritu, e israelitanan a komprondé ku morto ta un soño te na e mainta di resurekshon.

Aunke nos ta yora e mortonan, pensa asin’akí tokante esnan ku muri den Kristu: nan ta sera nan wowonan ora nan muri, i despues, no importá kuantu tempu dura te ora Hesus regresá, e siguiente kos ku nan sa ta e Segundo Binida. E promé pensamentu ku nan lo por tin na e resurekshon lo ta Wow! Hesus realmente a bin bèk pronto tòg!

Lesa Juan 11:11–14; Juan 11:21–25; 2 Timoteo 1:10; 1 Korintionan 15:51–54; 1 Tesalonisensenan 4:15-17. Kon e eskritornan di Tèstamènt Nobo su deskripshonnan di morto ta kompará ku esnan den Tèstamènt Bieu?

Tantu Tèstamènt Bieu komo Tèstamènt Nobo ta uza e simbolismo di morto komo un soño. Por lo ménos sinkuentitres biaha den Beibel, e palabra “soño” ta ser igualá ku morto. E eskritornan di Beibel ta di akuerdo ku no tin niun eksistensia konsiente den un alma inmortal ku ta bandoná e kurpa inmediatamente despues di morto.

Tèstamènt Nobo ta agregá un otro dimenshon, unu ku ya ta insinuá na dje den esun Bieu: e resurekshon glorioso na su regreso di Kristu.

E Evangelionan ta enfatisá ku bida eterno ta den Kristu so. Tur e demoñonan den fièrnu no por hòrta kreyentenan di nan siguransa di bida eterno. Kristu a konkistá morto riba krus. Graf no por tene su víktimanan mas. E resurekshon di Kristu ta e garantia ku tur kreyente, un dia, lo resusitá for di graf na Su regreso.

Wak e palabranan akí di Pablo: “Pasobra si e mortonan no resusitá, e ora ei Kristu no a resusitá. I si Kristu no a resusitá, boso fe ta inútil; ainda boso ta den boso pikánan! E ora ei tambe, esnan ku a drumi den Kristu a peresé” (1 Kor. 15:16–18, NKJV). Kon un hende por duna sentido na e versíkulonan akí si e mortonan, ora nan muri, ya ta den e gloria di shelu? Kiko Pablo ke men ku nan “a peresé” si, de echo, nan ta den shelu kaba?

En kambio, henter Pablo su punto ta ku e resurekshon di Kristu ta e fundeshi di nos resurekshon, i ku sin e resurekshon, “boso fe ta inútil; ainda boso ta den boso pikánan”, i e mortonan ta permanesé den tera, nan a peresé.

E versíkulonan akí ta pas perfektamente ku otro tekstonan di Beibel tokante e speransa ku nos tin den e resurekshon na regreso di Hesus, ora nos lo risibí e “herensia inkoruptibel i sin mancha i ku lo no marchitá, reservá den shelu pa boso” (1 Pe. 1:4, NKJV). Si, sinembargo, e mortonan ta den shelu kaba, dikon Pablo ta papia di un herensia “reservá den shelu” pa nos? Klaramente, kreyentenan di Tèstamènt Nobo tabata wak padilanti ansiosamente na e binida di Kristu i resurekshon di e mortonan, i e speransa akí a inspirá nan na fieldat den e pruebanan di bida.

Dikon e resurekshon ta un speransa asina poderoso pa e fe kristian? Ke tal si nos tabatin e krus ma no e resurekshon? Ki speransa nos lo tabatin? Dikon, anto, e resurekshon ta un parti asina importante di nos fe?

Lesa Mateo 24:5; Mat. 24:11; Mat. 24:24 24; 2 Tesalonisensenan 2:7–9; Revelashon 13:13,14; i Revelashon 16:13,14. Ki tipo di engaño hende lo enfrentá den e último dianan?

Diabel lo uza “señalnan i maravianan” i milagernan espektakular pa gaña multitutnan djis promé ku e binida di Hesus. Komentando riba e poder engañoso di spiritunan demoniako, Angel Rodríguez ta hasi e deklarashon signifikativo akí: “Nan forsa di konvikshon no ta ser hañá den e kontenido di nan mensahe sino den e poder di manifestashonnan sobrenatural yamá ‘señalnan’ òf ‘milagernan’. Nan ta ehekutá/hasi (poieō) señalnan, apelando asina na e banda afektivo di sernan humano mas bien ku nan abilidatnan diskresionario i rashonal. E echo ku e señalnan akí ta ser ehekutá dor di demoñonan ta mustra ku e forsa unifikadó di e mensahe di e tres demoñonan [dragon, bestia, i profeta falsu] ta di naturalesa spiritista; Dios no ta nan fuente òf orígen. Segun ku e konflikto kósmiko ta aserká su final, poder demoniako lo drenta e arena di historia humano den un forma sin igual. Spiritismo, ku su fundeshi mes ta e siñansa no bíbliko di inmortalidat di e alma, kasi lo kue mundu prezu.”—“The Closing of the Cosmic Conflict: Role of the Three Angels’ Messages,” manuskrito no publiká, p. 6.

Dikon ta peligroso pa konfia nos emoshonnan? Ki ròlnan nan ta hunga, bon i malu, den nos eksperensia di fe? Kon Satanas lo por desviá nos prosesonan di pensamentu i ta apelá na nos sintimentunan?

“Satanas tin hopi tempu ta preparando pa su último esfuerso pa gaña mundu. . . . Pokopoko el a prepará e kaminda pa su obra maestro di engaño den desaroyo di spiritismo. Ainda e no a alkansá e realisashon total di su plannan; pero e lo ser alkansá den e último sobrá di tempu. . . . Ku eksepshon di esnan ku keda protehá pa e poder di Dios, atraves di fe den Su palabra, henter mundu lo ser lastrá den e filanan di e engaño akí. Rápidamente lo plakia e hendenan hiba na un seguridat fatal, pa spièrta solamente na momento di e dramamentu di e furia di Dios.”—Ellen G. White, The Great Controversy, p. 561, 562.

Nos úniko seguridat ta den Hesus i Su Palabra. No ta difísil pa mira kon miónes, asta biónes di hende, ku no ta komprondé e estado di e mortonan por a keda hibá pa kerensianan falsu ku ta envolví e idea ku e mortonan ta sigui biba despues di morto.

Asta awor, kua ta algun engaño komun ku esnan ku ta komprondé ku e mortonan ta drumi, ta protehá di dje?

Nos speransa di salbashon ta ankrá den Kristu. Su mannan manchá ku sanger ta yama nos pa aseptá e sakrifisio asina gratuitamente proveé na preis infinito. Pronto Kristu lo regresá pa reklamá Esnan di djE. Tito 2:13 ta yama e segundo binida di Kristu: “e speransa bendishoná”. E meta di Satanas ta pa destruí e speransa akí. E lo hasi milagernan, señalnan, i maravianan, kualke kos i tur kos ku por a desviá hende for di bèrdat di Beibel i salbashon den Kristu.

“At’akí e pasenshi di e santunan; at’akí esnan ku ta warda e mandamentunan di Dios i e fe di Hesus” (Rev. 14:12, NKJV). Den e lucha final, Satanas ta bai hasi tur loke e por pa prevení hende di sea warda e “mandamentunan di Dios” òf tin “e fe di Hesus”, òf tur dos. Por lo tantu, e nesesidat pa ta kuidadoso di kualke siñansa ku, asta si e ta kompañá pa señalnan, maravianan, i milagernan, lo a bira nos for di kualke di e dos karakterístikana akí di e remanente.

Lesa Mateo 24:23–27; 2 Korintionan 11:13, 14; i 2 Tesalonisensenan 2:9–12. Kiko e pasashinan akí ta bisa nos tokante e poder engañoso i e manera di obra di Satanas?

Den e último momentonan di tempu, Satanas lo dekretá su último engaño: “Bistanan spantoso di karakter sobrenatural lo ser revelá pronto den e shelunan, komo señal di e poder di demoñonan ku ta obra milager. E spiritunan di demoñonan lo bai serka e reinan di tera i serka henter mundu, pa mara nan den engaño, i insitá nan pa uni ku Satanas den su último lucha kontra e gobièrnu di shelu. Atraves di agensianan akí, gobernantenan i súpditonan lo ser engañá di mes manera. Personanan lo lanta, pretendiendo di ta Kristu Mes, i reklamando e título i adorashon ku ta pertenesé na e Redentor di mundu. Nan lo hasi milagernan di kurashon maravioso i lo profesá di tin revelashonnan for di shelu ku ta kontradesí e testimonio di e Skrituranan.

“Komo e akto kulminante den e gran drama di engaño, Satanas mes lo personifiká Kristu. Pa hopi tempu e iglesia a wak e atvènt di e Salbador komo e kulminashon di su speransanan. Awor e gran gañadó lo laga parse ku Kristu a bini. Den diferente parti di tera, Satanas lo manifestá su mes meimei di hende komo un ser mahestuoso di brio lombrante, paresido na e deskripshon di e Yu di Dios duná pa Juan den Revelashon. Revelashon 1:13–15.”—Ellen G. White, The Great Controversy, p. 624 (énfasis añadí).

Dikon komprondé e bèrdat tokante kon Kristu ta regresá, komo tambe estado di e mortonan, ta asina importante pa asina nos no ser engañá?

Un buki resien di Lee Strobel, The Case for Heaven, ta basá riba e idea ku e mortonan, ora nan muri, ta keda bibu den un tipo di eksistensia konsiente, kaminda “eksperensianan serka di morto” (NDE) ta ser uzá komo parti di e “prueba”. Un ehèmpel: “Un otro mucha muhé, ku tabatin un NDE durante operashon di kurason, a bisa ku el a topa su ruman hòmber den e bida despues di morto, loke a sorprend’é pasobra e no tabatin un ruman hòmber. Ora el a rekuperá despues i a konta su tata, esaki a revelá na dje pa promé biaha ku, en realidat, e tabatin un ruman hòmber sí, pero esaki a muri promé ku el a nase.”—Lee Strobel, The Case for Heaven (Grand Rapids, MI: Zondervan Books, 2021), p. 69. Strobel ta lucha, sinembargo, pa harmonisá e idea di un bida infinito inmediato ku e siñansa bíbliko kla ku solamente ora Kristu regresá kristiannan ta risibí nan rekompensa final.

Nos a ser spièrtá: “Hopi hende lo ser konfrontá pa e spiritunan di demoñonan ku ta personifiká konosínan òf amigunan simá i ta deklará e erehianan di mas peligroso. E bishitantenan akí lo apelá na nos simpatia di mas tierno i lo obra milagernan pa sostené nan pretenshonnan. Nos mester ta prepará pa resistí nan ku e bèrdat di Beibel ku e mortonan no sa nada i ku esnan ku ta aparesé asina, ta spiritunan di demoñonan.

“Djis nos dilanti tin ‘e ora di tentashon, ku lo bin riba henter mundu, pa purba esnan ku ta biba riba tera.’ Revelashon 3:10, NKJV. Tur esnan ku nan fe no ta firmemente establesé riba e palabra di Dios lo ser engañá i vensé. Satanas ‘ta obra ku tur engaño di inhustisia’ pa haña kontrol riba e yunan di hende, i su engañonan lo oumentá kontinuamente. Pero e por logra su ophetivo solamente ora hende sede boluntariamente na su tentashonnan. Esnan ku ta buskando sinseramente un konosementu di e bèrdat i ta luchando pa purifiká nan alma atraves di obediensia, hasiendo asina loke nan por pa prepará pa e konflikto, lo haña, den e Dios di bèrdat, un defensa sigur. ‘Pa motibu ku bo a warda e palabra di Mi pasenshi, Ami tambe lo warda bo’ (v. 10, KJV)), ta promesa di e Salbador. E lo a preferá manda tur angel for di shelu pa protehá Su pueblo ku laga un alma ku ta konfia den djE ser vensé pa Satanas.”—Ellen G. White, The Great Controversy, p. 560.

Preguntanan pa Diskushon:

Ki influensianan spiritista sutil Satanas lo por ta uzando pa influensiá e mente? Ki ròl medionan di komunikashon di masa ta hunga?

Kon lo bo a kompartí bo fe ku un amigu ku a kaba di pèrdè un ser kerí i tabata kere ku e persona akí tabata den shelu? Kiko ta apropiá pa bisa, i kiko no ta apropiá?