Lesa Proverbionan 23:23; Juan 8:32; Juan 17:17. Ki hilu komun ta kore atraves di e versíkulonan akí?

Atraves di siglonan, e gran konflikto tabata un bataya entre bèrdat i eror. Satanas ta un gañadó i tata di mentira (Juan 8:44). Hesus ta e outor di tur bèrdat. El a deklará: “ ‘Ami ta e kaminda, e bèrdat, i e bida’ ” (Juan 14:6, NKJV). E bèrdat, ku ta hasi nos liber for di e engañonan di Satanas, ta ser hañá den e Palabra di Dios. Beibel ta desenmaskará e strategia di Satanas i ta revelá e plannan di Dios. Skritura ta un lampi pa nos pia (Salmo 119:105). E salmista ta deklará: “E entrada di Bo palabranan ta duna lus; e ta duna komprondementu na e esnan simpel” (Salmo 119:130, NKJV). Despues e ta añadí: “Bo palabra den Su totalidat ta bèrdat” (Salmo 119:160).

Lesa 2 Pedro 1:16–21. Ki siguransa e apòstel ta duna nos respekto profesia? Ki ilustrashon e ta uza pa mustra e importansia di Dios su Palabra profétiko?

Nos no a sigui “fábulanan astutamente inventá”. E profesianan di e Palabra di Dios ta iluminá e kaminda nos dilanti. Nan ta yuda nos distinguí bèrdat for di eror. Sin e Beibel, nos lo a keda dependiente di e kaprichonan di opinion humano i ser engañá fásilmemte. “E pueblo di Dios ta ser dirigí na e Skrituranan komo nan salbaguardia kontra e influensia di maestronan falsu i e poder engañoso di spiritunan di skuridat. Satanas ta uza tur medio posibel pa prevení hende di haña un konosementu di Beibel; pasobra su deklarashonnan kla ta revelá su engañonan. . . . E último gran engaño lo habri pronto nos dilanti. Antikristu ta bai ehekutá su obranan maravioso dilanti di nos bista. E falsifikashon lo parse e bèrdat asina djaserka ku lo ta imposibel pa distinguí entre nan eksepto pa medio di e Skrituranan Santu. . . . Niun hende eksepto esnan ku a fortifiká nan mente ku e bèrdatnan di Beibel lo resistí e último gran konflikto. Na kada alma lo bin e prueba di saminashon: Lo mi obedesé Dios mas bien ku hende? E ora desisivo awor ta aserkando. Nos pianan ta plantiá riba e baranka di e palabra inmutabel di Dios? Nos ta prepará pa para firme den defensa di e mandamentunan di Dios i e fe di Hesus?”—Ellen G. White, The Great Controversy, p. 593, 594.

Konsiderá e preguntanan den e sita aki riba. Kiko lo permití nos para den e krísis final? Kiko ta distraé nos for di studia e Palabra di Dios? Kon no lo por ta komprometiendo bèrdat pa plaser personal?

Den e krísis benidero riba adorashon, e pueblo fiel di Dios lo no sede na preshonnan mundano (Rev. 14:12). Nan lo ser seyá dor di Spiritu Santu (Efe. 4:30) i no por ser mové. Den tempunan di antaño, seyonan tabata sertifiká e outentisidat di dokumentonan ofisial. Nan tabata un marka distintivo i individualisá. Ya ku e konflikto final ta sentrá riba adorashon i e outoridat di Dios manera ta revelá den Su lei, nos lo a spera ku e seyo di Dios ta inkorporá den Su lei (kompará Isa. 8:16).

Lesa Eksodo 20:8–11. Kua elementonan di un seyo e mandamentu di Sabat ta kontené?

Aki nos tin tres elemento di un seyo outéntiko:

1. e nòmber na ken e seyo ta pertenesé, “Señor bo Dios;”
2. Su título, Esun ku a “traha”, e Kreador;
3. i Su teritorio, “shelu i tera, laman, i tur loke tin den nan.”

Un seyo ta algu ku den Beibel ta yama un señal (Rom. 4:11). E dos palabranan ta interkambiabel. Komo Dios su señal òf seyo den kurason di e lei di Dios, e Sabat ta den sènter di e konflikto final riba adorashon (Ezek. 20:12,20; Rev. 12:17).

Kompará Revelashon 7:1,2; Revelashon 14:1; Revelashon 13:16,17. Unda e seyo di Dios i e marka di e bestiata ser risibí? Dikon bo ta kere ku tin un diferensia?

E seyo di Dios ta ser poné riba frenta. E frenta ta un símbolo di e mente i ta repesentá un desishon konsiente.

E marka di e bestia ta ser risibí sea riba frenta òf den man, indikando ku hende ta konvensí intelektualmente i pa medio di nan mes eskoho ta aseptá e mentiranan di Satanas òf, mas bien, nan ta konformá ku adorashon falsu pa evitá ku ta mata nan.

Diabel ta odia esnan ku ta obediente na Dios. E gran konflikto ta yega na un klímaks ora e dragon (Satanas) hasi guera kontra e remanente kreyente ku “ta warda e mandamentunan di Dios i e fe di Hesus” (Rev. 14:12, NKJV). Nan ta determiná den nan lealtat na Kristu.

Dikon fieldat diario na Señor ta e klave pa ta prepará pa ora e krísis final yega?

Den e último dianan, e gran konflikto lo desplegá su mes, den forma dramátiko, tokante adorashon. Nos ta adorá e Kreador, òf nos ta adorá e bestia i su imágen? No tin kaminda di meimei. E promé angel di Revelashon 14 ta urgi hòmber- i muhénan pa “ ‘ádorá Esun ku a traha shelu i tera, laman i fuentenan di awa’ ” (Rev. 14:7, NKJV). Komo apoyo adishonal di e yamada di shelu, e di tres angel ta revelá e konsekuensianan teribel di adorá e bestia: “e tambe lo bebe di e biña di e furia di Dios, ku ta ser bashá sin meskla den e kopa di Su indignashon” (Rev. 14:10, NKJV). En kambio, ta deskribí esnan ku ta adorá e Kreador komo wardando e mandamentunan di Dios i e fe di Hesus” (Rev. 14:12, NKJV).

Kreashon ta e base di berdadero adorashon (Rev. 4:11). Ya ku Dios “a krea tur kos atraves di Hesu-Kristu” (Efe. 3:9, NKJV), Satanas ta odia e Kreador i a trata, pa medio di podernan terenal, na kambia e Sabat, e konmemorashon di Kreashon (Dan. 7:25). E konflikto benidero riba e lei di Dios ta enfoká riba outoridat. Si Satanas por eradiká adorashon di Sabat, e lo deklará ku su outoridat ta mas grandi ku e outoridat di Dios. Pa logra esaki, Satanas lo purba konvensé òf obligá henter mundu pa aseptá un Sabat falsifiká.

Maske kon difísil por ta aktualmente pa mira esaki sosodé, manera nos a ripará anteriormente, mundu ta kambiando dramátikamente. E krísis di COVID-19 a mustra nos ku, di anochi pa mainta, nos mundu por bira un lugá diferente. Aunke nos no konosé e detayenan ku ta hiba na e marka di e bestia, e no ta teriblemente difísil pa imaginá. Mundu ta masha instabil, i ku e teknologia asombroso eifó awor akí, loke Beibel ta spièrta nos di dje por, en realidat, yega na sosodé mas rápido di loke nos lo por imaginá awor.

Lesa Revelashon 13:13–17. Ki kastigunan spesífiko ta ser imponé riba esnan ku no ta risibí e marka di e bestia?

Esnan ku ta fiel na Kristu, kontrali na sigui e bestia i su imágen, lo enfrentá kastigunan ekonómiko komo tambe menasa di morto. Humanidat ta keda loke e tabata semper: korupto, ku hamber pa poder, i violento. Maske kuantu nos no sa ainda presis kon e eventonan final lo desaroyá, lo no mester ta asina difísil pa imaginá bo persekushon di tempu di fin. Aunke nan ta skirbí den kompletamente un otro konteksto, e palabranan akí den Juan ta bisa tur kos. Papiando tokante Hesus, Juan a skirbi ku E “no tabatin nesesidat pa niun hende testifiká di hende, pasobra E tabata sa kiko tabatin den hende” (Juan 2:25, NKJV).

Pensa riba e korupshon di humanidat i e maldat ku hende ta kapas di hasi. Dikon esaki ta mustra kon fásilmente eventonan final lo por a tuma lugá? Tambe, mas importante ainda, kiko e bèrdat tristu akí lo mester siña nos tokante warda nos mes kurason?

Lesa Joel 2:21–24; Echonan 2:1–4, 41–47. Kua pronóstiko a kumpli den siglo 1? Ki impakto e tabatin?

E dramamentu di Spiritu Santu na Pentekòster a lansa e iglesia kristian poderosamente. Tres mil hende a kombertí riba un dia. Echonan ta registrá milager tras milager di Dios su grasia transformadó: “Hopi di esnan ku a tende e mensahe a kere; i e kantidat di e hende a bira mas o ménos sinku mil” (Echonan 4:4, NKJV). Solamente 120 kreyente a reuní pa resa, pero orashon a hasi un diferensia dramátiko. Rápidamente e iglesia a añadí míles di kreyente. Asta “un gran kantidat di e saserdotenan tabata obedesidu na e fe” (Echonan 6:7, NKJV). Sí, asta hopi saserdote a bira siguidónan di Hesus.

Ora e disipelnan a ser persiguí ferosmente na Herusalèm, nan “a bai tur kaminda, predikando e palabra” (Echonan 8:4). Iglesianan a ser plantá den henter Hudea, Samaria, i Galilea (lesa Echonan 9:31). Despues di su kombershon, apòstel Pablo a proklamá Kristu den henter e mundu mediteráneo. Na Tesalónika, algun hudiu, ku tabata kontra e evangelio, a hasi e deklarashon remarkabel akí: “ ‘Esunnan akí ku a pone mundu ariba abou a bin aki tambe’ ” (Echonan 17:6, NKJV). Ki un testimonio poderoso di loke e iglesia primitivo por a logra. Atraves di e poder di Spiritu Santu, e disipelnan a alkansá e mundu konosí e tempu ei den un tempu relativamente kòrtiku. Joel su pronóstiko di e áwaseru trempan a kumpli na Pentekòster, ma e áwaseru lat lo kai ku poder mas grandi pa prepará e kosecha final di tera.

Lesa Zakarias 4:6; Zakarias 10:1; Hoseas 6:3; Santiago 5:7, 8. Di akuerdo ku e versíkulonan akí, kon e obra di Dios riba tera lo terminá?

E términonan áwaseru “trempan” i “lat” ta saká for di e siklo di kosecha di Israel. E áwaseru trempan tabata kai den hèrfst di aña pa laga e simia spreit. E áwaseru lat tabata kai den lènte pa hecha e kosecha. . . . Esaki ta deskribí e obra di Spiritu Santu pa proklamashon di e evangelio. “Manera e ‘áwaseru trempan’ a ser duná, den e dramamentu di Spiritu Santu na prinsipio di e evangelio, pa pone e simia presioso brota, asina e ‘áwaseru lat’ lo ser duná na su final pa hechamentu di e kosecha.”—Ellen G. White, The Great Controversy, p. 611, 612.

Lesa Revelashon 18:1–4; Habakuk 2:14; Mateo 24:14. Kon e versíkulonan akí ta bisa ku e obra di Dios riba tera lo terminá?

E angel ku ta anunsiá e kaida di Babilonia tin “gran outoridat”. Meskos ku e angelnan di Revelashon 14, e angel akí ta representá mensaheronan humano. E angel akí ta revelá e gloria di Dios asina plenamente ku e ta iluminá henter tera. E palabra griego pa outoridat òf poder den Tèstamènt Nobo ta exousia. Hopi biaha e ta referí na e triunfo di Kristu riba gobièrnunan i podernan di fièrnu. Hesus ta uza e palabra akí den e evangelio di Mateo den harmonia ku e mishon enkomendá na Su disipelnan. Den Mateo 10:1 Hesus ta duna Su disipelnan outoridat riba e gobièrnunan i podernan di fièrnu. E ta manda nan bai ku poder divino pa ta viktorioso den e bataya entre bon i malu. Den Mateo 28, E ta bolbe manda nan bai ku “ ‘tur outoridat . . . den shelu i riba tera’ ” pa “ ‘bai, antó, i hasi tur nashon disipel’ ” (Mat. 28:18,19, NKJV).

Yená ku poder di Spiritu Santu, avansando ku outoridat di e Kristu bibu ku, den Su bida i morto a triunfá riba e gobièrnunan i podernan di fièrnu, e iglesia di Tèstamènt Nobo a iluminá tera ku e gloria di Dios. Den un par di aña, e disipelnan a proklamá e evangelio na e mundu konosí e tempu ei (Kol. 1:23).

Na e tempu di fin, Spiritu Santu lo ser bashá ku poder sin presedente, i e evangelio lo ser plamá rápidamente te na e finnan di tera. Míles di hende lo ser kombertí riba un dia, i e grasia i bèrdat di Dios lo impaktá henter e planeta. Di e manera akí, e mundu lo ser spièrtá i e evangelio, i e speransa ku e ta ofresé, lo ser plamá rònt mundu.

“E gran obra di e evangelio no ta bai sera ku ménos manifestashon di e poder di Dios ku a marka su apertura. E profesianan ku a kumpli den tempu di e dramamentu di e áwaseru trempan, na prinsipio di e evangelio, mester bolbe kumpli den tempu di e áwaseru lat, na su final. . . .

“Sirbidónan di Dios, ku nan kara iluminá i briando ku konsagrashon santu, lo pura di lugá pa lugá pa proklamá e mensahe di shelu. Pa medio di míles di bosnan, riba henter tera, e spièrtamentu lo ser duná. Milagernan lo ser realisá, esnan malu lo ser kurá, i señalnan i maravianan lo sigui e kreyentenan.”—Ellen G. White, The Great Controversy, p. 611, 612.

Kiko ta tarda e dramamentu poderoso di Spiritu Santu, e áwaseru lat, i e gritu duru? Maske kon chikitu nos ròl komo individuonan lo por ta, ki ròl nos por desempeñá pa ta habrí i reseptivo pa e dramamentu di Spiritu Santu?

Ya den 1851, pioneronan atventista a identifiká e di dos bestia di Revelashon 13:11–17 ku Estádos Unídos di Amérika. Pero mester tabata difísil e tempu ei pa mira kon Estádos Unídos por a pone henter mundu adorá e promé bestia (Rev. 13:12). Asta den dékada di 1880 henter e marina di Estádos Unídos tabata konsistí di solamente 48 barku bieu.

Pero for di fin di e Guera Friu, niun poder ta igualá Estádos Unídos militarmente. I aunke merikanonan a disfrutá di libertatnan maravioso, segun ku tempu ta bira mas difísil, no ta difísil pa mira e libertatnan ei keda trapá, òf asta kompletamente miná. Hopi hende ta kere ku asta aktualmente nos ta mirando esaki ta sosodé.

“Tur esnan ku nenga kumplimentu [di warda e sabat falsu] lo ser kastigá ku sanshonnan sivil, i finalmente lo ser deklará ku nan ta meresé morto. Na otro banda, e lei di Dios ku ta ordená e dia di sosiegu di e Kreador ta demandá obediensia i ta menasá rabia kontra tur ku violá su preseptonan.”—Ellen G. White, The Great Controversy, p. 604.

“Segun ku e tormenta ta aserká, un gran kantidat di hende ku a profesá fe den e mensahe di e di tres angel, ma no a keda santifiká atraves di obediensia na e bèrdat, ta bandoná nan posishon i ta uni na e filanan di e oposishon. Dor di uni ku e mundu i partisipá di su spiritu, nan a yega na mira asuntunan den kasi e mesun lus; i ora e prueba yega, nan ta prepará pa skohe e banda fásil i popular. Hòmbernan di talento i trato agradabel, ku un tempu tabata gosa den e bèrdat, ta uza nan podernan pa gaña i desviá almanan. Nan ta bira e enemigunan di mas amargo di nan anterior rumannan. Ora wardadónan di Sabat ser hibá dilanti di e tribunalnan pa kontestá pa nan fe, e apóstatanan akí ta e agentenan di mas efisiente di Satanas pa kalumniá i akusá nan, i pa medio di informenan falsu i insinuashonnan instigá e gobernantenan kontra nan.”—Ellen G. White, The Great Controversy, p. 608.

Preguntanan pa Diskushon:

Dikon un komprondementu di eventonan di último dia ta asina importante den e krísis benidero? Kon e Skrituranan ta un salbaguardia kontra engaño?

Sosiedatnan demokrátiko rònt mundu tabata baluartenan di libertat religioso durante siglonan. Kon esei lo por a kambia mas bien rápidamente?

Wak e sita di Ellen G. White aki riba. Ki eskohonna bo ta hasiendo awendia ku por a resultá ku mañan bo ta huntu ku esnan ku ta profesá di ta atventista?

Kon e mensahe di e di dos angel ta kambia bou di e gritu duru, i ki preparashon personal nos por hasi pa risibí e áwaseru lat pa terminá e obra di Dios riba tera?