E buki di Josué ta marka e transishon for di e liderazgo di Moises na esun di Josué. E ta kuminsá ku e storia di Israel drentando e Tera Primintí i ta kaba ku nan establesé den e tera ei.
Joshua, enbèrdat, tabatin un akto difísil pa sigui. Esei ta, pa sigui kaminda Moises (Moises!) a stòp. Pero e desafio ei tabata solamente e komienso. Josué mester a hasi loke Moises nunka a hasi: hiba e nashon, despues di 40 aña den desierto, atraves di Jordan i drenta Canaan, di akuerdo ku e promesa ku Dios a hasi na e tatanan añanan promé.
“Moises Mi sirbidó ta morto. Awor p’esei, lanta, krusa e Jordan akí, abo i henter e pueblo akí, pa e tera ku Mi ta duna nan, e yunan di Israel” (Jos. 1:2, NKJV).
E yabi na henter e storia ta ser hañá aki, den e palabranan di Señor na Josué: nan ta bai drenta “e tera ku Ami [YHWH] ta duna nan.”
Sí, Josué no ta bai hasié su so, sino solamente pa medio di e poder i guia di Señor, kende lo a trese e pueblo den e tera un generashon promé, si nan lo a obedesé nan parti di e pakto. Desafortunadamente, nan no a hasié, i pues, nan a sufri e konsekuensianan di nan akshonnan.
Echo ta, durante e 40 añanan anterior, Israel a enfrentá e banda negativo di e pakto. Pa motibu di nan rebelion kontra Dios, henter e generashon adulto, ku a eksperensiá e milagernan i maravianan di Eksodo, ku eksepshon di Caleb i Josué, a peresé den desierto. Kuater di e sinku bukinan di Moises ta trata ku loke a pasa ku nan ora nan tabata dual den desierto tur e tempu ei. Awor, bou di liderazgo di Josué, e di dos generashon tabata kla pa afrontá e desafionan di poseé e tera.
“E ora ei Moises a yama Josué i a bis’é den bista di henter Israel: ‘Sea fuerte i di bon kurashi, pasobra abo mester bai ku e pueblo akí na e tera ku SEÑOR a hura na nan tatanan di duna nan, i bo mester laga nan heredá esaki. I SEÑOR, E ta Esun ku ta bai bo dilanti. E lo ta ku bo, E lo no lagabo ni bandonábo; no tene miedu ni desmayá” (Deut. 31:7-8, NKJV).
E promesanan di Dios, duná na e patriarkanan i na Moises, ta serka di ser kumplí. Tin un aire di ekspektativa i eksitashon, un komienso nobo pa e hendenan, pa hopi tempu sin kas i ekspropiá. Dios tabata fiel den libra nan for di sklabitut, i siguramente E por ser konfiá pa kumpli ku Su promesanan tokante e tera.
“E propósito prinsipal di e buki di Josué ta pa deskribí e entrada di Israel den e tera di promesa, e konkista di e tera, i su divishon entre e tribunan. E propósito akí ta suprayá e mensahe di e buki, esta, e fieldat di Dios den kumpli ku e promesa di tera hasí na Abraham. E buki ta enfatisá e fieldat di Dios na Su promesanan di e pakto (Josué 21:43-45).”—Andrews Bible Commentary (Andrews University Press, 2020), p. 365.
Nos lo deskubrí huntu ku, aunke e buki di Josué a ser skirbí mas ku tres milenio pasá, e mundu den kua nos ta biba awe no ta asina diferente for di esun di Josué den su desafionan spiritual. Kisas nos lo por ta enfrentá retonan di un naturalesa diferente, pero no opstante tin retonan, spesialmente esnan spiritual, ku ta menasá nos seguridat, nos fe, i e kumplimentu di e mishon ku Dios a konfia na Su pueblo. E ehèmpel di Josué sigur lo inspirá nos pa reklamá e promesanan di Dios tokante nos tempu i pa logra pa medio di Su poder, manera el a hasi.