Lès 5

* 25 di aprel - 1 di mei

Kon Studia Beibel

Sabat

25 di aprel

Lesa pa e Estudio di e Siman Akí:

Juan 15:1-8; Marko 1:35; 1 Kron. 16:11; Salmo 119:105; Isa. 50:4; Isaias 55:1-13.

Versíkulo di Memoria:

“Asina Mi palabra lo ta ku ta sali for di Mi boka; e lo no bolbe bèk serka Mi bashí, ma e lo kumpli ku loke Mi ke, i e lo prosperá den e kos pa kua Mi a mand’é” (Isaias 55:11, NKJV).

Pensa bèk riba tempu ku bo a risibí bo promé Beibel. Kisas bo tabata mucha, i un pariente kristian a dunabo. Of kisas bo a kumpr’é bo mes komo adulto. Maske kon largu bo tin bo Beibel (kisas bo tin mas ku un ehemplar), konsiderá e balor ku bo ta pone riba e Buki akí. E ta un di bo poseshonnan di mas presioso i tesorá, òf bo ta tuma komo normal ku bo tin e Palabra bibu di Dios na bo alkanse? Bo ta lucha pa ta konsistente den les’é? Bo a yega di puntra bo mes: Unda mi ta kuminsá? Kon mi por lesa e Buki akí pa krese i yega mas serka di Dios?

Martin Luther a bisa: “Pa un kantidat di aña awor mi a lesa Beibel dos biaha pa aña. Si Beibel lo tabata un palu grandi i poderoso i tur su palabranan tabata ramanan chikitu, lo mi a bati riba tur e ramanan, ansioso pa sa kiko tabatin einan i kiko e tabatin pa ofresé.”

Sea bo ta eksperensiá un tempu di estudio di Beibel diario próspero, òf sea bo Beibel ta sinta mayoria biaha será riba un rèki di buki, realidat ta ku nos tur por desaroyá tempunan di estudio di Beibel mas fuerte ku Dios. E siman akí nos lo eksplorá algun manera práktiko pa studia e Palabra di Dios mihó.

Djadumingu

26 di aprel

Tempu

Bo a yega di pone bo wèker un tiki mas trempan ku normal pa bo por lanta i lesa bo Beibel? Bo a yega di lucha pa baha for di kama i despues wak e oloshi i pensa, mi tin diessinku minüt promé ku mi mester kuminsá e dia. Mihó mi hasi lihé! Bo a yega di tin e kustumber di hasi djis un orashon kòrtiku òf pasa dor di un kapítulo, solamente pa haña bo konsenshi trankilisá pero bo kurason insatisfecho ku e resultado promé ku bo a kore drenta dia? “Tin masha poko benefisio derivá for di un lesamentu lihé di e Skrituranan. Un hende por lesa henter Beibel kompletamente i tòg no logra mira su bunitesa òf komprondé su nifikashon profundo i skondí.”—Ellen G. White, Steps to Christ, p. 90.

Miéntras ku enbèrdat tin bendishonnan ku ta bini di lesa Beibel, meskos ku bebe for di un kranchi di paga kandela (hopi i lihé), ta posibel pa lesa Beibel di dilanti te patras lihé i tòg pèrdè asina tantu. Dios a duna nos Su Palabra inspirá i presioso pa asina nos por yega na konosé mas tokante djE (i, den e proseso, mas tokante nos mes tambe). Ora nos tuma tempu pa mira e karakter indeskriptibel i bunita di Dios i e maneranan ku El a interaktuá ku humanidat atraves di historia, nos por solamente stim’E mas. E registro di Su interakshonnan ta einan den nos mannan, pero nos mester haña tempu, i tuma tempu, pa konosé Dios atraves di lesamentu di Su Palabra (Echonan 17:11). Konsiderá e siguiente sugerensianan:

Pidi Dios pone un deseo den bo kurason p’E. Reklamá e promesanan den Jeremias 29:13 i Salmo 37:4. Invit’E pa lantabo mas trempan ku normal òf pa hasi algun tempu liber den bo dia pa hasi esei.

Someté bo tempu na Dios. Sí, bo ta okupá, i tin asina tantu kos urgente pa hasi. Pero tempu ku Dios ta invaluabel. Bai na un lugá trankil bo so i lesa Salmo 46:10. Lesa e palabranan òf kanta na Dios e himno “Mi ke sumití na Kristu.” Pensa riba e áreanan di bo bida ku kisas no ta sumití i ofresé nan na Dios.

Pasa tempu ku Dios asta ora kisas bo no tin gana. Meskos ku ta tuma un eskoho konsiente i un plan di akshon pa ta salú (hasi ehersisio, kome bon), ta tuma un eskoho konsiente di tin un relashon estrecho ku Dios. Kòrda ku kustumbernan nobo por tuma por lo ménos 21 dia pa forma, i nunka nos por logra sin yudansa di Spiritu Santu.

Lesa Juan 15:1-8 atrobe. Kiko Hesus ta bisando nos tokante permanesé den djE, i dikon esaki ta asina krusial pa nos fe?

Djaluna

27 di aprel

Un Lugá

Hesus ta nos ehèmpel perfekto den tur kos, i ora ta trata di deboshonnan personal, e no ta diferente. Kiko Marko 1:35 ta bisa nos tokante Hesus su tempu ku Dios?

Aunke esaki ta djis ún versíkulo, nos por siña asina tantu aki for di e ehèmpel di Hesus. Hopi promé ku solo a sali, E tabata apartá Su mes i bai na un lugá solitario di trankilidat pa E por ta ku Su Tata. Bo por imaginá e esena: Hesus, sintá kantu di Laman di Galilea òf na subida di un seru, hasiendo orashon i komuniká ku Su Tata promé ku e mundu rònt di djE a spièrta? Aunke e versíkulo akí ta deskribí Hesus su kompromiso ku orashon, nos ta mira klaramente ku e tabata un prioridat p’E. Sin duda e tempu akí tabata loke a dun’E forsa pa enfrentá tur loke El a soportá. Si Hesus tabatin mester di esaki pa kuminsá tur dia, kuantu mas nos tin mester?

Dios ta bisa nos: “Buska Mi kara,” i E ta spera ku nos kontesta lo ta “Bo kara, SEÑOR, lo mi buska” (Salmo 27:8, NKJV).

Kiko 1 Krónikanan 16:11 ta bisa tokante kon nos mester buska Su kara?

Bo tin un lugá ku bo por bai tur mainta pa ta ku Dios? Kisas bo por haña un stul banda di un bentana, un lugá ketu pafó, òf asta e mesa di kushina, kaminda bo por bini tur dia pa sinta na pia di Hesus pa siña for di e Palabra di Dios. Sinta na pia di Hesus ta e mihó lugá pa ta (Lukas 10:39-42). Dor di forma un kustumber diario di bai un sierto lugá pa pasa tempu ku Dios, lo ta mas probabel ku bo ta bolbe einan tur dia. No deskurashá ora bo pèrdè un dia aki òf aya, pasobra emergensianan ta surgi, i lo bo no por pasa tempu ku Dios. Pero purba di no laga muchu tempu pasa sin pasa tempu ku Dios. Kòrda ku tin un relashon duradero ku Dios ta un desishon diario, unu ku bo por kuminsá di nobo, awe, si bo skohe pa hasié.

Djamars

28 di aprel

Estudio di Beibel Profundo

Asta si bo no mester ta un erudito pa studia Beibel, kon bo por studia Beibel profundamente?

Hasi orashon: Ta imposibel pa eksagerá e importansia di orashon komo "sosten pa buki" pa (i "markadó" durante) bo tempu di estudio di Beibel. Ellen G. White ta bisa nos ku ora nos ta lesa Beibel, nos no ta nos so. Dor di invitá Spiritu Santu pa ta nos guia, nos ta rechasá tur otro distraishon, i e enemigu ta hui. “Nunka mester studia Beibel sin orashon. Spiritu Santu so por pone nos sinti e importansia di e kosnan ei ku ta fásil pa komprondé, òf impedí nos di bringa ku bèrdatnan ku ta difísil pa komprondé.”—The Great Controversy, p. 599, 600.

Lesa i Skirbi: Por bisa ku un diferensia prinsipal entre djis lesa Beibel, i studi’é, ta impliká ún akto klave: skirbimentu. Skirbimentu ta yuda nos frena nos pensamentunan, reflekshoná riba e Palabra di Dios, i pasa dor di dje na un ritmo kaminda opservashon, interpretashon, aplikashon i kompromiso por tuma lugá. Tambe e ta yuda nos ideanan inisial plamá organisá nan mes; for di nos kabes, te na nos pèn, i despues te den nos kurason pa e dia. Tambe ta mas probabel ku nos ta kòrda algu ku nos a skirbi (Salmo 119:15-16). Si bo no por skirbi, purba lesa Beibel na bos haltu (òf skuch’é), siguí pa bo pensamentunan komo un orashon na Dios.

Kompartí: Konta un hende loke bo a siña. Esaki lo konsolid’é den bo mente i enkurashá un otro hende.

Selektá un buki kòrtiku di Beibel pa kuminsá kuné (manera Jonas, Marko, Filipensenan òf 1 Juan), i pokopoko traha bo kaminda dor di dje. At’akí un aserkamentu simpel ku bo por apliká na un versíkulo (e método versíkulo pa versíkulo), un pasashi, òf henter un kapítulo:

Hasi orashon pa Spiritu Santu guia bo mente i suavisá bo kurason segun ku bo ta lesa.
Skohe un versíkulo òf pasashi di Beibel.
Skirbi e pasashi, òf porshonnan di e pasashi ku ta destaká, den un diario, segun ku bo ta lesa.
Lesa e pasashi atrobe, ku orashon, i suprayá e ideanan klave.
Skirbi loke e ideanan suprayá ta bisabo.
Hasi orashon pa e ideanan akí i kon nan ta impaktá bo relashon ku Dios.
Konsiderá ku ken lo bo por kompartí esaki awe.

“Ki ora ku e pueblo di Dios ta kresiendo den grasia, nan lo ta hañando konstantemente un komprondementu mas kla di Su palabra. Nan lo diserní lus i bunitesa nobo den su bèrdatnan sagrado. Esaki tabata bèrdat den e historia di iglesia den tur époka, i asina e lo sigui te na final.”—Ellen G. White, Counsels to Writers and Editors, p 38, 39.

Djárason

29 di aprel

Un Dòbel Bendishon

Tin hopi manera ku nos por studia nos Beibel, manera e método di versíkulo pa versíkulo (menshoná anteriormente), un estudio di kapítulo, un estudio di tema, un estudio di palabra òf un estudio di buki. Nos por studia ku un konkordansia i dikshonario di Beibel, i nos por lesa Beibel huntu ku e seri di Conflicto de los Siglos pa informashon adishonal. Nos por bai kana pafó den naturalesa i skucha Beibel ser lesá pa nos, òf topa ku un amigu òf grupo chikitu pa studia huntu.

Di mes manera ku nos ta mantené nos amistatnan bibu ku variedat i aventuranan nobo, nos mester mantené nos sita diario ku Dios fresku i vibrante dor di usa diferente método segun ku nos ta studia nos Beibel. Semper tin mas pa siña!

Algu ku lo yuda mantené bo tempu di estudio di Beibel vibrante ta di kompartí ku otronan loke bo a deskubrí. Ora nos splika loke nos a siña, e proseso di resumí i sintetisá ta konsolidá nos pensamentunan. Esaki ta yuda nos retené konosementu. E dòbel bendishon ta ku ora nos kompartí i diskutí ku otronan, e kòmbersashon spiritual hopi bes lo desafiá i fortalesé boso tur dos. Hopi bes ta ora nos kompartí òf siña otronan, e siñamentu mas profundo ta tuma lugá den nos mes mente.

Tambe lo bo bin mira ku loke bo ta studia kada dia no ta solamente e mensahe di Dios pa bo sino un mensahe pa otronan.

Lesa Isaías 50:4. Kiko e versíkulo akí ta bisa nos tokante tin un relashon ku Dios i kon e por impaktá nos relashon ku otronan?

Nos tempu di estudio di Beibel personal no solamente ta fortalesé nos, sino ta kapasitá nos pa animá otronan ku nos por topa e dia ei. E por bira un dòbel bendishon.

Nos bida spiritual ta un maratòn. Pidi Señor pa mantenébo koriendo bo kareda ku konstansia, manteniendo bo bista riba e meta (Fil. 3:14). No sintibo deskurashá si bo tabata un poko floho pa un tempu, pero hasi kualke kambio nesesario den bo bida pa mantené bo relashon, i spesífikamente bo tempu di estudio di Beibel i orashon, vibrante. Pasobra di bèrdat, esaki ta bida eterno, ku nos por konosé Dios awe (Juan 17:3). Nos kompromiso diario pa keda den djE i den Su Palabra ta kambia bida.

Djaweps

30 di aprel

Ki dushi ta!

Pensa riba bo postre faborito. E ta bon pa bo salú? Kisas bo ta usa stropi di abea komo edulkorante, òf bo por asta usa miel di Manuka pa su supuesto benefisionan medisinal. Si bo a yega di purba panal di miel, lo bo sa kon dushi e tekstura suave ta ora e dirti riba bo lenga.

Den Salmo 119:103-104, e salmista ta deskribí Beibel komo un panal di miel, un metáfora pa delisia: “Ki dushi ta Bo palabranan pa mi smak, mas dushi ku stropi di abea pa mi boka! Atraves di Bo preseptonan mi ta haña komprondementu” (NKJV).

Kiko ta nifiká ku “atraves di bo preseptonan mi ta haña komprondementu”? (Salmo 119:104). Dikon e idea akí ta importante pa kapta loke estudio di Beibel ta hasi pa nos?

Sí, e palabranan di Dios enbèrdat ta dushi pa nos alma i diferente for di kualke otro kos ku mundu ta ofresé nos. Diferente for di hopi postre, e dulsura di e Palabra di Dios ta sanashon pa nos alma i transformashon pa nos karakter. Si bo tabata leu for di Dios, bo por kai riba bo rudia, habri Su Palabra, i bebe for di e awa bibu, ku ta e úniko ku lo satisfasé.

Den Isaias 55:1-13, e profeta ta amplia riba e mensahe menshoná aki riba. Dediká un ratu na lesa e kapítulo akí awor, i despues kontestá e preguntanan akí:

Kiko Señor ta duna na esnan ku bini serka djE, pa “kome” for di Su Palabra?
Kiko ta Su invitashon na bo aki?
Kiko ta Su desafio?
Kiko ta Su promesa?

Dios su Palabra bibu i poderoso ta kòrta direktamente na nos kurason, mente i alma segun ku e ta desafiá nos pa krese den Kristu. Pero e por hasi esaki pa nos solamente te na e grado ku nos ta tuma e tempu i esfuerso (i sí, e ta tuma esfuerso) pa profundisá den e Palabra ku un aktitut di sumishon i humildat i un boluntat pa sigui loke e ta siña.

Djabièrnè

1 di mei

Pa mas Estudio

E propósito di estudio di Beibel ta pa konosé Dios i pa krese den bo relashon kunE, pasobra esaki ta loke bida eterno ta: pa ta pa semper ku e Dios ku nos ta stima (Juan 5:39, Juan 17:3).

Parti di kualke relashon ta kompromiso mutuo. Nos ta lesa den Revelashon 3:20 ku Hesus ta buska pa E tin esaki ku nos, sinembargo, nos mester realisá ku, komo sernan kreá, semper nos por siña mas tokante nos Kreador. Meskos ku un minero ku ta koba pa haña piedranan presioso, nos mester ta skrudiñando konstantemente den Beibel. Semper tin mas pa saka, sin importá kuantu biaha nos a lesa sierto storianan òf pasashinan di Beibel. “Loke sea e avanse intelektual di hende por ta, no lag’é pensa ni un momentu ku no tin nesesidat di un skrudiñamentu profundo i kontinuo di e Skritura pa lus mas grandi. Komo un pueblo, nos ta ser yamá individualmente pa ta studiantenan di profesia.”—Ellen G. White, Counsels to Writers and Editors, p. 41.

Tampoko nos mester purba pone Beibel pas den nos propio opinionnan òf pensamentunan humano. “Kon nos lo skrudiñá e Skrituranan? Nos tin ku klaba nos stakanan di doktrina un tras di otro, i despues purba pone henter Skritura ahustá na nos opinionnan establesí? Of nos mester hiba nos ideanan i puntonan di bista na e Skrituranan, i midi nos teorianan na tur banda pa medio di e Skrituranan di bèrdat? Hopi hende ku ta lesa i asta siña Beibel, no ta komprondé e bèrdat presioso ku nan ta siñando òf studiando … Hopi ta duna e palabranan di Skritura un nifikashon ku ta pas ku nan propio opinionnan.”—Ellen G. White, Counsels to Writers and Editors, p. 36.

Preguntanan pa Diskushon:

Ku ki aktitut bo ta bin na Beibel normalmente? Tin algu ku mester kambia? Dikon un aktitut di humildat i sumishon na e Palabra ta asina krusial?

Tin algun opinion establesé ku lo bo por pone un banda pa pèrmití Skritura papia pa su mes? Si ta asina, kon bo por kuminsá hasi orashon tokante nan awor akí?

Kon originalidat lo por bira un piedra di trompeká den e relashon eksterno di un persona ku Dios? Es desir, kon e deseo pa haña algu nobo i inovativo lo por hiba un hende riba un kaminda robes, spesialmente si nan ta hasié pa propósitonan egoista?