Lès 3

* 11 - 17 di yüli

Unidat den Kristu

Sabat

11 di yüli

Lesa pa e Estudio di e Siman Akí:

1 Kor. 1:12-17; Rom. 1:29; 1 Kor. 1:10; 1 Kor. 3:1-4; Fil. 2:5-8; 2 Kor. 11:23-28; Kol. 1:24.

Versíkulo di Memoria:

"Mi ta apelá na boso, rumannan, den nòmber di nos Señor Hesu-Kristu, pa boso tur ta di akuerdo, i pa no tin divishon entre boso, ma pa boso ta uní den e mesun mente i e mesun huisio” (1 Korintionan 1:10, ESV).

Esnan ku ta opservá founa sa ku algun kriatura ta biba den trupa, den tou, den grupo, tur di diferente tamaño. For di lobo (naturalmente), te na dòlfein, te na asta vruminga guerero, e kriaturanan akí ta keda huntu. Chimpansé ta spesialmente konosí pa nan lasonan sosial estrecho, tin biaha nan ta eksistí den gruponan di 15 pa 150 chimpansé kompañero. Sinembargo, e relashonnan akí no ta harmonioso semper, i tin biaha e chimpansénan ta bringa entre nan mes.

Hende ta un poko asina tambe; esta, no solamente nan tin tendensia di eksistí den grupo, sino tin biaha nan ta bringa entre nan mes den e gruponan ei. I esei ta un realidat asta den nos iglesianan! Kliknan ta forma, hopi bes rònt di un tipo di lider karismátiko. I, pió ainda, tin biaha un klik no ta bai bon ku otronan.

Bo a yega di mira esei den bo iglesia? Si ta asina, e ora ei bo tin un idea di un problema ku Pablo a enfrentá na Korinto. E siman akí nos lo tira un bista riba 1 Korintionan 1-4, kaminda apòstel Pablo ta trata ku e problema di pleitu den iglesia i kon vense esakinan, esta, pa medio di unidat den Kristu.

Djadumingu

12 di yüli

E Problema di Kliknan den Iglesia

E apelashon di Pablo pa “no tin divishon entre boso, ma pa boso ta uní den e mesun mente i e mesun huisio” (1 Kor. 1:10, ESV) ta dominá e promé kuater kapítulonan di 1 Korintionan. De echo, mayoria erudito ta di akuerdo ku unidat ta e tema ku ta abarká tur kos ku ta mara tur e partinan di e karta huntu.

Lesa 1 Korintionan 1:12-17. Kon e pasashi akí ta yuda nos komprondé kon apsurdo ta pa forma kliknan rònt di lidernan lokal? Kiko ta Pablo su solushon?

Pablo ta usa palabranan fuerte pa ilustrá e falta di unidat entre e miembronan di iglesia na Korinto. E ta usa e términonan griego schisma (“divishon,” 1 Kor. 1:10, NKJV) i eris (“pleitu,” 1 Kor. 1:11, NKJV). E sustantivo schisma (i tambe e verbo schizō, “splet”) ta ser usá otro kaminda den Tèstamènt Nobo pa deskribí diferensianan di opinion ku ta resultá den frakshonnan. Na su turno, e sustantivo eris (“pleitu”) ta aparesé frekuentemente den listanan di bisionan ku no mester ser praktiká dor di kristiannan.

Lesa Romanonan 1:29, Romanonan 13:13, 1 Korintionan 3:3, 2 Korintionan 12:20, i Galationan 5:20. Ki otro pikánan ta menshoná huntu ku eris (“pleitu,” “konflikto”)? Kiko esaki ta bisa nos tokante kon malu e ta?

E desakuerdonan den e iglesia di Korinto a bini na superfisie, asta den forma di demanda kontra otro (1 Kor. 6:1-3). “Mi ta bisa esaki pa brongosá boso,” Pablo a bisa nan (1 Kor. 6:5, NKJV) tokante e demandanan akí entre miembronan di iglesia. De echo, nan no a pone nan diferensianan un banda ni ora nan tabata selebrá e Sena di Señor (1 Kor. 11:17-22).

E problema di falta di unidat entre miembronan di iglesia ta asina spantoso, i Pablo ta asina preokupá pa esaki, ku esaki ta e promé problema ku e ta atendé den e karta akí na e korintionan.

Djaluna

13 di yüli

Sentrá riba Hesus

Lesa 1 Korintionan 1:10. Kiko bo ta kere ku Pablo ker a men ku “sea uní den e mesun mente i e mesun huisio” (ESV)?

E formashon di klik a konstituí aki un negashon di un hende su lealtat na Kristu (1 Kor. 1:10). Dios a yama nos "den e komunion di su Yu, Hesu-Kristu nos Señor" (1 Kor. 1:9, NKJV). Nos Señor ta Kristu, i nos mester ta sentrá riba djE. Pues, e kontesta riba e preguntanan retóriko “Kristu ta dividí? Pablo a ser krusifiká pa boso? Òf boso a ser batisá den nòmber di Pablo?" (1 Kor. 1:13, NKJV) ta un "Nò!" rotundo. Kristu no ta dividí. Ta Kristu kende a ser krusifiká pa nos. Nos a ser batisá "den nòmber di e Tata i di e Yu i di e Spiritu Santu" (Mat. 28:19, NASB).

Pablo ta menshoná ku nos ta “e kurpa di Kristu i individualmente miembronan di dje” (1 Kor. 12:27, ESV; énfasis añadí). Miéntras ku e kurpa tin hopi parti, kada un ku su funshon, e ta tòg un kurpa. Pa e kurpa funshoná korektamente, kada parti tin ku hasi su trabou segun su kapasidatnan. E metáfora akí ta indiká ku Pablo ta buskando unidat, no uniformidat. E ta buskando unidat den e diversidat. Mas ku esei, e ta buskando unidat apesar di diversidat.

Sinembargo, tur pensamentu i opinion mester ta sometí na Kristu, nos Señor. E echo ku Kristu ta nos Señor ta un konsepto asina importante pa Pablo ku e ta rekurí na dje repetidamente, den e apertura di 1 Korintionan (1 Kor. 1:2,7,8,9,10). Pues, promé ku Pablo trata e asuntu di klik i lidernan humano, e ta enfatisá ku nos tur tin Hesus komo nos Señor. E iglesia no ta sentrá riba lidernan humano. Kristiannan ta sentrá riba Hesus.

E énfasis riba e Señoria di Hesus den e promé versíkulonan di 1 Korintionan ta yuda nos komprondé kiko Pablo ker a men ku e palabranan: “Sea uní den e mesun mente i e mesun huisio” (1 Kor. 1:10, ESV). E término griego tradusí komo “uní” ta bini di e verbo katartizō, ku ta sugerí ku algu mester ser restourá na su kondishon korekto. Ora ku kliknan ta ser formá rònt di lidernan humano, relashonnan denter di e iglesia mester ser restourá na nan kondishon korekto, i esei por sosodé atraves di unidat den Kristu i morto na e ami ku e ta enserá.

Djamars

14 di yüli

Sabiduria i Madures

En general, kliknan ta resultá di un bista muchu haltu di lidernan humano. Esaki ta masha menasante pa unidat di e iglesia i pa salú spiritual di e miembronan, pasobra un vishon distorshoná di ministerio kristian por hiba un iglesia na duna importansia eksesivo na sierto lidernan, tur a kosto di otronan. E konsekuensia di tal komportashon ta un atmósfera di kompetensia, ku por dividí e iglesia. Mas ku esei, si nos trata lidernan humano komo sentral na nos identidat kristian, nos ta kore riesgo di move Kristu for di e posishon korekto den nos bida.

Lesa 1 Korintionan 3:1-4. Kon Pablo ta deskribí aki e inmadures spiritual di e korintionan?

Pablo ta bisa bon kla ku madures spiritual ta hiba e kreyente na apresiá e sabiduria di Dios (1 Kor. 2:6-7), ku ta ser komuniká na nos pa medio di e Spiritu (1 Kor. 2:13), i ku ta kontrastá ku e sabiduria di e era akí (1 Kor. 2:6), sabiduria humano (1 Kor. 2:13). E sabiduria di Dios ta ser revelá den e Krus di Kristu (1 Kor. 2:1-4). Mas presis ainda, e sabiduria di Dios ta ser revelá den e sufrimentu, morto i resurekshon di Kristu. Pues, promé ku e resumí su apelashon pa unidat (1 Kor. 3:1-17), Pablo ke pa su lektornan rekonosé e nesesidat pa berdadero sabiduria i madures den Kristu.

Kristiannan sabí i madurá ta hendenan spiritual, no karnal, no manera mucha chikitu (1 Kor. 3:1). Nan ta kompará kosnan spiritual ku kosnan spiritual, pasobra “e kosnan di Spiritu ... ta ser diserní spiritualmente” (1 Kor. 2:13-14, NKJV). Kristiannan sabí i madurá ta alimentá riba kuminda sólido, no lechi (1 Kor. 3:2; kompará ku Hebr. 5:12). E kreyente "ku ta biba di lechi no ta kalifiká den e palabra di hustisia, ya ku e ta un mucha. Ma kuminda sólido ta pa esnan madurá, pa esnan ku tin nan podernan di disernimentu entrená pa práktika konstante pa distinguí bon for di malu" (Hebr. 5:13-14, ESV). Kristiannan sabí i madurá no ta bisa: “Mi ta di Pablo” òf “Mi ta di Apolos” (1 Kor. 3:4), refiriendo na diferente hende.

Al fin i al kabo, e hendenan akí ta, meskos ku nan, “kompañeronan di trabou di Dios” (1 Kor. 3:9, ESV). Nos, komo iglesia, ta e tereno, edifisio i tèmpel di Dios (1 Kor. 3:9,16,17). Nos tur ta pertenesé na Dios pa medio di Kristu (1 Kor. 3:11).

Djárason

15 di yüli

Servisio di sirbishi manera di Kristu

Lesa 1 Korintionan 4:1-2. Kiko e pasashi akí ta siña tokante e punto di bista korekto ku un hende mester tin tokante lidernan humano?

Den 1 Korintionan 3:1-4, Pablo ta insinuá ku e kliknan ta resultá di un falta di madures spiritual. Sinembargo, promé ku e atendé e tópiko akí, e ta afirmá: “Nos tin e mente di Kristu” (1 Kor. 2:16, NKJV). Probablemente e frase akí ta referí na Kristu su manera di pensa i aktua. Ku otro palabra, e kreyente tin “e mente di Kristu” ora e ta pensa i ta aktua manera Kristu. Sinembargo, pone e mente akí den práktika den tur asuntu di bida no ta asina fásil, no ta bèrdat? Den e mundu grekoromano, tabatin hopi kompetensia entre figuranan polítiko, filósofonan, pensadónan i lidernan religioso. E anhelo pa aprobashon kultural aparentemente a hiba e iglesia di Korinto na sigui normanan sekular. Esaki por ta un peliger pa e iglesia awe tambe.

Lesa Filipensenan 2:5-8. Kon e teksto akí ta yuda nos komprondé e frase “e mente di Kristu” (1 Kor. 2:16)?

Meskos ku na Korinto, divishonnan tabata tumando lugá tambe den e iglesia di Filipos (Fil. 2:1-4), kisas na un menor grado. Filipensenan 2:1-8 ta siña nos ku un servisio manera di Kristu ta rekerí muri na mes i na ambishonnan egoista, i buska, en kambio, pa bendishoná otronan riba nos mes, meskos ku Hesus a hasi.

Un servisio manera di Kristu ta loke Pablo ker a men ku e frase “sirbidónan di Kristu” (1 Kor. 4:1, NKJV). E frase akí por transmití e idea ku nan ta sirbi Kristu komo asistente òf supordinado. Ta evdente ku un punto di bista korekto di lidernan humano ta basá riba Kristu su ehèmpel di liderazgo. E sirbidónan ta ser ilustrá mas aleu komo “mayordomonan” (1 Kor. 4:1-2). Un mayordomo ta un persona ku a ser konfiá ku atministrá e propiedat di un otro hende. I loke sea ku nos tin, tur ta pertenesé na Kristu, di tur manera.

Djaweps

16 di yüli

Un Estilo di Bida Ku Ta Reflehá e Krus

E echo ku nos no mester forma klik, spesialmente rònt di lidernan humano, no ta nifiká ku nos no mester sostené nos lidernan. Nos ta suponé di apresiá i yuda esnan ku ta liderá den trabou di iglesia. Dios ta enkargá hende pa hasi Su ministerio riba tera. Lidernan di iglesia, ku ta desplegá un estilo di bida ku ta reflehá e sumishon representá pa e Krus, ta digno di ser skuchá i siguí.

I esaki ta asina pasobra solamente e Krus tin e poder pa revertí kualke forma manipulativo di kontrol na fabor di sumishon na e Palabra di Dios. Lidernan manera Kristu ta atribuí e éksito di nan ministerio na Dios so. Den Su ministerio terenal, asta Hesus komo hende a asigná gloria na Dios (Juan 17:4).

Segun Pablo, ministerio kristian fiel mester ta basá riba loke nos por yama un teologia di e Krus. E Krus ta Dios Su revelashon di Su sabiduria i poder pa salba. Na mes momentu, e ta desplegá tambe sabiduria humano komo bobedat. Den 1 Korintionan 4:1-13, Pablo ta hasi kla kon un teologia di e Krus asina ta. Di promé, e ta indiká ku ta Dios ta esun ku ta pone e norma pa liderazgo kristian (1 Kor. 4:1-5). Di dos, e ta mustra riba e echo ku sufrimentu ta e marka di ministerio kristian berdadero (1 Kor. 4:9, 11-13). E di dos punto akí meresé di ser desaroyá mas aleu.

Lesa 2 Korintionan 11:23-28 i Kolosensenan 1:24. Kiko esaki ta siña nos tokante kiko ta nifiká sufri pa motibu di Kristu?

Lidernan kristian ta sigui e stapnan di Hesus dor di ta dispuesto pa sufri pa nan rumannan, i asta si mester, muri pa motibu di nan ministerio. Pablo ta referí na su mes i Apolos komo “hòmbernan kondená na morto” (1 Kor. 4:9, NKJV). Nan ta ser deskribí komo enfrentando un falta di kuminda i awa, i tambe siendo “mal bisti, i batí, i sin kas” (1 Kor. 4:11, NKJV). Ademas, tambe nan a ser insultá, persiguí, difamá, i “trahá manera ko’i sushi di mundu, e sushedat di tur kos te ku awor” (1 Kor. 4:12-13, NKJV). Ademas, dor di referí irónikamente na e korintionan komo riku, reinan, sabí i distinguí (1 Kor. 4:8,10), Pablo ta demostrá ku orguyo no mester tin lugá den liderazgo kristian berdadero, pasobra e ta e rais di divishon den iglesia (1 Kor. 4:6).

Djabièrnè

17 di yüli

Pa mas Estudio

Lesa Ellen G. White, "The Training of the Twelve," p. 17-24, den The Acts of the Apostles.

“Dios ta hibando un pueblo pa para den unidat perfekto riba e plataforma di bèrdat eterno. Kristu a entregá Su mes na mundu pa E por a ‘purifiká pa Su mes un pueblo pekuliar, zeloso di bon obranan.’ E proseso di refinamentu akí ta destiná pa purifiká e iglesia di tur inhustisia i e spiritu di diskòrdia i pleitu, pa nan por edifiká en bes di basha abou, i konsentrá nan energianan riba e gran obra ku tin nan dilanti. Dios ke pa tur Su yunan yega na unidat di fe. E orashon di Kristu djis promé ku Su krusifikashon tabata pa Su disipelnan por ta ún, meskos ku E tabata ún ku e Tata, pa mundu por kere ku e Tata a mand’E. E orashon mas konmovedor i maravioso akí ta ekstendé atraves di siglonan, asta te na nos dia; pasobra Su palabranan tabata: ‘Mi no ta resa pa esakinan so, sino tambe pa esnan ku lo kere den Mi pa medio di nan palabra.’ “--Ellen G. White, Testimonies for the Church, tomo 4, p. 17.

Preguntanan pa Diskushon:

Yegando final di Su ministerio terenal, Hesus a hasi orashon pa unidat, “pa nan tur por ta un … pa asina mundu por sa ku Abo a mandaMi” (Juan 17:21-23, NASB). Dikon unidat den Kristu ta un argumento poderoso pa e bèrdat ku Dios a manda Su Yu pa salba mundu? Konektá ku esaki, dikon falta di unidat ta un opstákulo pa e mishon di iglesia?

Lesa 1 Korintionan 4:9-13 i paga bon atenshon na kon e apòstelnan ta ser deskribí den e pasashi akí. Kon e representashon akí di e apòstelnan ta kontrastá ku e karakterístikanan di liderazgo balorá den nos mundu? Kiko e pasashi akí ta siña nos tokante kon diferente e normanan di Dios i e normanan di e mundu akí por ta?

Den 1 Korintionan 4:16, Pablo ta urgi e korintionan pa imit’é. Lo bo ta dispuesto pa imitá lidernan humano? Kon imitá un lider lo por diferensiá for di eksaltá e lider ei indebidamente, i asta peligrosamente?