Tur na Gloria di Dios

Lesa 1 Korintionan 9:1-6. Kon e pasashi akí ta proveé un ehèmpel práktiko di loke ta nifiká praktiká negashon propio motivá pa amor?

Na promé bista, ta parse ku Pablo su defensa di su apostolado, den 1 Korintionan 9, no tin nada di haber ku e diskushon anterior riba konosementu versus amor. Nos no por lubidá, sinembargo, ku Beibel no a ser skirbí originalmente den kapítulonan. Loke Pablo ta siña den 1 Korintionan 9 no ta deskonektá for di e material anterior. En bèrdat, 1 Korintionan 9 ta ofresé un ehèmpel práktiko di amor apnegá pa Kristu i pa e rumannan. Pa motibu di amor, Pablo ta renunsiá algun derecho.

“Kome i bebe” (1 Kor. 9:4, NKJV). Aki kuminda i bebida ta representá yudansa finansiero en general. Komo apòstel, Pablo tabatin derecho di risibí sosten material di esnan ku e tabata ministrá na dje. Otro lidernan religioso den su tempu tabata hasi nèt esei. Pero e no a hasié; en kambio, el a sostené su mes dor di traha tènt (Echonan 18:3).

“Hiba kuné un esposa kreyente” (1 Kor. 9:5, NKJV). Un apòstel kasá tabata pèrmití pa hasi un biahe mishonero ku su kasá riba gastu di iglesia. Ehèmpelnan di parehanan mishonero ta inkluí Priscilla i Aquila (Rom. 16:3), Andrónicus i Junia (Rom. 16:7). Pero Pablo no tabata kasá (1 Kor. 7:8). E por a kasa i e ora ei benefisiá di e derecho di ta kompañá pa un esposa, ku sosten finansiero pa tur dos.

“Apstené di traha” pa biba (1 Kor. 9:6, NKJV). Pablo i Barnabas tabatin derecho di gana salario pa nan trabou mishonero (1 Kor. 9:4-6). Pablo tabata un trahadó di tènt pa biba (Echonan 18:3), pero nos no sa kiko tabata e okupashon di Barnabas. Nos sa ku e tabata masha generoso (Echonan 4:36-37), i pues, e tabata dispuesto pa sostené su mes.

Den 1 Korintionan 9:7-11, Pablo ta desaroyá e idea di 1 Korintionan 9:6 pa asina mustra ku ta hustu pa e i Barnabas gana nan pan di kada dia for di e iglesia (1 Kor. 9:11,12). Señor Mes a manda, “Esnan ku ta prediká e evangelio mester biba di e evangelio” (1 Kor. 9:14, NKJV; kompará ku 1 Tim. 5:18). Sinembargo, Pablo ta bisa, “Nos no a hasi uso di e derecho akí” (1 Kor. 9:12, ESV). Asina, Pablo ta presentá su mes komo un ehèmpel di negashon propio (1 Kor. 9:1-18) i ta argumentá ku esaki ta benefisiá e predikashon di e evangelio na Korinto (1 Kor. 9:19-23).

Despues di a proveé un ehèmpel di negashon propio for di su propio eksperensia, Pablo ta bira mas partikularmente na e asuntu di idolatria. Den un sentido, 1 Korintionan 10 ta desaroyá e idea di 1 Korintionan 9:27, kaminda Pablo ta komentá ku e ta ehersé disiplina propio pa asina e no bira deskualifiká. E ke pa e korintionan sigui su ehèmpel, pero Hesus ta e modelo pa ekselensia (1 Kor. 11:1).

Lesa 1 Korintionan 10:7-11. Ki pikánan Israel a kometé den desierto, i dikon e privilegionan, otorgá na nan, ta hasi nan pikánan pió ainda?

Den 1 Korintionan 10:1-5, Pablo ta referí na e historia di e pueblo di Dios den desierto. E referensia na e nubia i e laman ta trese e guia, presensia i protekshon di Dios na mente. Na su turno, kuminda i bebida ta para pa e provishon di Dios. Pablo ta referí na e eksperensia di Israel den e nubia i laman komo un boutismo, análogo na boutismo kristian. Asina tambe, dor di referí na kuminda i bebida, Pablo ta aludí na e Sena di Señor.

Ku otro palabra, 1 Korintionan 10 ta siña ku, den un sentido, kristiannan ta bibando e mesun eksperensianan ku Israel a biba. Sinembargo, Pablo ta kòrda e historia di Israel pasobra e no ke pa e historia ei ripití su mes. Apesar di tur e privilegionan ku Israel tabatin, hopi di e pueblo tòg tabata deseá kosnan malu (1 Kor. 10:6), manera idolatria (1 Kor. 10:7) i inmoralidat seksual (1 Kor. 10:8). No ta nada straño, antó, ku “Dios no tabata kontentu ku mayoria di nan” (1 Kor. 10:5, NIV).

Ta fásil pa mustra dede riba Israel antiguo i bisa ku nan a kometé pikánan grandi. Sinembargo, Pablo ta argumentá ku kristiannan ta suseptibel na praktiká pikánan similar apesar di nan privilegio inmenso di konosé e historia di Kristu. Esaki ta kla den e atvertensia: “Laga esun ku ta kere ku e ta pará, tene kuidou pa e no kai” (1 Kor. 10:12, NKJV). E frase “ku ta kere” ta sugerí ku algun hende den iglesia no a realisá ku nan tabata den peliger di kai den e pikánan ei. Nos ta kore e mesun riesgo awe?

“Laga esun ku ta kere ku e ta pará, tene kuidou pa e no kai.” Ken entre nos no a eksperensiá e realidat di e spièrtamentu ei?

Lesa 1 Korintionan 10:5-22. Dikon nos mester hui for di idolatria?

Den 1 Korintionan 10:14-22, Pablo ta reanudá e asuntu di kuminda ofresé na ídolonan. Ofresé kuminda na ídolonan por ta straño den hopi kultura awe, pero e tabata komun den tempu bíbliko. Ora animalnan tabata ser sakrifiká na e diosnan den e tèmpelnan pagano, parti di e animal tabata ser duná na e saserdotenan ofisiante, ku tabata bende e karni. Algun di e karni akí tabata haña su kaminda den e merkadonan públiko. Komo ku e karni akí no a ser wardá separá for di otro karni ku tambe tabata ser ofresé na benta den merkado, un kristian lo por a kumpra karni ku a ser ofresé na ídolonan sin sa. E konseho di e apòstel ta ku karni asina por ser kumprá libremente dor di kristiannan.

No opstante, miéntras ku karni ku anteriormente a ser sakrifiká den un tèmpel por a ser komé dor di kristiannan na kas (1 Kor. 8:1-13), e práktika di bai den tèmpelnan pagano i partisipá den nan fiestanan tabata klaramente prohibí pa kristiannan. E kriterio ta kla: Kristiannan ta pèrmití pa kome e karni ei na kas pasobra e ídolonan no ta nada (1 Kor. 8:4); sinembargo, kristiannan no mester partisipá den seremonianan pagano pasobra esaki ta korespondé ku adorá demoñonan (1 Kor. 10:20-21). Tuma parti den ritualnan pagano ta igualá tin komunion ku demoñonan (1 Kor. 10:20), meskos ku tuma parti na e Sena di Señor ta igualá tin komunion ku Kristu (1 Kor. 10:16).

Pues, Pablo ta bisa: “Boso no por bebe e kopa di Señor i for di e kopa di demoñonan; boso no por partisipá na e mesa di Señor i na e mesa di demoñonan” (1 Kor. 10:21, NKJV). Manera Hesus a bisa: “Ningun hende por sirbi dos shon” (Mat. 6:24, NKJV).

Pablo ta siña ku Dios ta rekerí lealtat di henter kurason. E ta impliká ku idolatria ta provoká “Señor na yalursheit” (1 Kor. 10:22, NKJV). Pa esei no sosodé, Pablo, den 1 Korintionan 8:4-6, ta proveé un regla infalibel kontra idolatria, dor di aludí na Deuteronomio 6:4,5, “Tende, O Israel: SEÑOR nos Dios, SEÑOR ta ún! Lo bo stima SEÑOR bo Dios ku henter bo kurason, ku henter bo alma i ku tur bo forsa" (NKJV; énfasis añadí). Na e idea akí di stima Dios riba tur kos den Deuteronomio 6:5, Hesus a agregá: "Lo bo stima bo próhimo manera bo mes" (Marko 12:31, NKJV; lesa tambe 19:18).

Den 1 Korintionan 8:1-3, Pablo ta argumentá ku amor pa Dios ta tene un hende seif for di idolatria. E argumento akí ta ser reanudá i desaroyá mas aleu den 1 Korintionan 10:23-11:1. Den 1 Korintionan 8:3, e ta papia tokante nos amor pa Dios. E ta bisa: “No laga niun hende buska su mes bienestar, ma kada un e bienestar di e otro” (1 Kor. 10:24, NKJV). Esaki ta amor pa otronan.

Lesa Marko 10:17-22 i Marko 12:28-31. Kiko e dos pasashinan akí tin en komun, i kon nan ta apliká na e situashon den 1 Korintionan 10?

Pablo ta hasiendo den 1 Korintionan 10 presisamente loke Hesus a hasi den Marko 12:28-31; esta, e ta mara huntu e dos gran mandamentunan di lei: amor pa Dios riba tur kos, i amor pa otronan. Den e storia di e hóben riku (Marko 10:17-22), Hesus ta uni e dos tiponan di amor akí, i ta hasi esaki dor di referí respektivamente na Deuteronomio 6:4 (lesa Marko 10:18) i e di dos tabla di e Dekálogo (lesa Marko 10:19). E problema di e hóben riku ei ta ku e tabata stima su poseshonnan mas ku e tabata stima Dios i su próhimo (Marko 10:22). E tabata balorá su tesoro riba tera riba e tesoronan den shelu. E tabata balorá su plaka riba e pobernan (Marko 10:21). E tabata un idólatra.

Siguiendo e siñansanan di Hesus, Pablo ta insinuá ku e prinsipio di stima Dios riba tur kos i e próhimo manera bo mes mester ser apliká na e situashonnan hipotétiko ku e ta menshoná den 1 Korintionan 10:27-28. Esaki ta nifiká ku asta kosnan legal kisas no ta útil òf edifikante, ya ku nan por ta ofensivo pa konsenshi di un otro hende (1 Kor. 10:23). E prinsipio akí ta ser sintetisá magistralmente den e palabranan “Hasi tur kos na gloria di Dios” (1 Kor. 10:31, NKJV). Dor di bisa ku tur kos mester ser hasí na gloria di Dios, Pablo ta indiká ku idolatria por manifestá su mes den e formanan di mas variá, pasobra kualke kos ku ta usurpá e gloria ku ta pertenesé na Dios so, ta un forma di idolatria (Isa. 42:8).

E palabranan di Pablo den 1 Korintionan 10:31-11:1 ta sirbi komo konklushon pa kapítulonan 8-10. E ta hasi kla ku e no a buska su mes bentaha, “sino esun di hopi hende, pa nan por ser salbá” (1 Kor. 10:33, ESV). Ta asina el a imitá Kristu (1 Kor. 11:1).