Lès 9

* 22 - 28 di ougùstùs

Ministerio impulsá pa Amor

Sabat

22 di ougùstùs

Lesa pa e Estudio di e Siman Akí:

2 Kor. 1:3-14; 2 Kor. 2:17; 2 Kor. 4:2; 1 Kor. 16:5-7; 2 Kor. 7:5-13; 2 Kor. 2:5-17.

Versíkulo di Memoria:

"Pasobra for di hopi aflikshon i angustia di kurason mi a skirbi boso, ku hopi lágrima, no pa boso bira tristu, ma pa boso por konosé e amor ku mi tin asina abundantemente pa boso” (2 Korintionan 2:4, NKJV).

No ta semper apòstel Pablo tabatin e asina fásil.

Ademas di prizòn i e situashonnan ku a pone su bida na peliger ku el a enfrentá, el a skirbi tambe: “Di e hudiunan sinku biaha mi a risibí kuarenta sla ménos un. Tres biaha mi a ser batí ku bara; un biaha mi a ser piedrá; tres biaha mi a noufragá; un anochi i un dia mi tabata den profundidat; di biahe hopi bes, den peliger di awanan, den peliger di ladronnan, den peliger di mi mes paisanonan, den peliger di e paganonan, den peliger den stat, den peliger den desierto, den peliger riba laman, den peliger meimei di rumannan falsu; den kansansio i trabou duru, den anochinan sin por drumi hopi bes, den hamber i set, den yunamentu hopi biaha, den friu i sunú, ademas di e otro kosnan, loke ta bini riba mi diariamente: mi preokupashon profundo pa tur e iglesianan" (2 Kor. 11:24-28, NKJV).

Loke nos ta mira den su kartanan na e korintionan ta algun di e “preokupashon profundo” ku e tabatin pa e iglesia akí. Sinembargo, meimei di tur esaki, su amor pa nan nunka a faya, meskos ku e amor di Kristu pa nos nunka ta faya nos. De echo, tabata for di Hesus ku Pablo a siña stima e iglesianan na un manera ku ta reflehá e amor ku Hesus tin pa nos (2 Kor. 5:14; lesa 1 Kor. 11:1).

Djadumingu

23 di ougùstùs

Gradisimentu

Lesa 2 Korintionan 1:3-7. Kua ta e motibu pa Pablo su aktitut di gradisimentu akinan?

E gratitut di Pablo ta enfoká riba e konsuelo ku Dios ta proveé pa esnan ku ta sufriendo. Den e pasashi akí, e verbo pa konsolá (parakaleō) i e sustantivo konsolá (paraklēsis) ta aparesé huntu dies biaha. Esaki ta representá un tersera parti di tur okashon di e palabranan akí den 2 Korintionan (29 biaha). Dios ta ser deskribí komo e “Tata di mizerikòrdia i Dios di tur konsuelo, kende ta konsolá nos den tur nos tribulashon” (2 Kor. 1:3-4, NKJV).

E konsuelo ku un hende ta risibí di Dios no mester ser wardá pa su mes (2 Kor. 1:4,5). Solamente e kurason afligí ku a bira e resipiente di e konsuelo di Dios ta kapas pa impartí konsuelo efektivamente na esnan den aflikshon, tambe.

Pablo por a konsolá otronan pasobra e mes, den su sufrimentunan, a risibí konsuelo for di Dios. "Si nos ta ser afligí, ta pa boso konsuelo i salbashon. ... Of si nos ta ser konsolá, ta pa boso konsuelo i salbashon" (2 Kor. 1:6, NKJV; énfasis suministrá). Esaki ta amor!

Pa kiko Pablo ta ekspresando gratitut den 2 Korintionan 1:8-11?

Pablo ta papia di problema “mas ayá di midí, mas ayá di forsa” ku a pone e i su koleganan di trabou teme ku e fin a yega serka nan (2 Kor. 1:8). Pa un momentu, nan a pensa ku e resurekshon tabata nan úniko speransa. Sinembargo, Dios a libra nan, i e senario a kambia (2 Kor. 1:10). For di e miedu di morto (2 Kor. 1:8), nan ta lanta na un speransa implísito ku Dios lo libra nan un biaha mas (2 Kor. 1:10). E viktorianan di Dios den pasado ta duna nos konfiansa ku E lo hasi meskos den futuro. Dios ta usa aflikshonnan pa siña nos konfia den djE. Difikultatnan por hiba nos na madures spiritual, a lo ménos te na e grado ku nos ta permití nan hala nos mas serka di Dios. E gradisimentu di Pablo tambe ta desplegá e poder di orashon di interseshon i e gratitut ku nos ta eksperensiá pa motibu di e liberashon di Dios (2 Kor. 1:11).

Djaluna

24 di ougùstùs

Simplesa i Sinseridat

Ayera nos a siña ku Pablo su amor pa e korintionan a keda manifestá den e echo ku el a konsolá nan den nan difikultatnan, meskos ku el a risibí konsuelo di Dios den di dje (2 Kor. 1:1-11). Awe nos lo mira ku su amor pa nan a ser desplegá tambe atraves di e integridat ku e i su kompañeronan di trabou a manifestá pa ku e miembronan di iglesia na Korinto.

Lesa 2 Korintionan 1:12-14 den lus di 2 Korintionan 2:17, i 2 Korintionan 4:2. Kon e sinseridat di Pablo ta revelá su amor pa e korintionan?

2 Korintionan 1:12-14 ta introdusí e tésis ku Pablo lo desaroyá den restu di e karta. Su integridat i apostolado a ser kuestioná dor di algun hende na Korinto. Nan a pensa ku Pablo tabatin un karakter basilante i indesiso, loke no tabata pas pa e ministerio apostóliko. Komo kontesta, Paul ta enfatisá ku e i su koleganan a komportá nan mes ku e máksimo integridat pa ku nan.

Dos palabra ta deskribí e kondukta di Pablo i su asosiadonan: simplesa i sinseridat (2 Kor. 1:12). E término “simplesa” ta bini di e palabra griego haplotēs. E ta ser apliká aki pa ekspresá integridat personal den abla òf komportashon; den kòrtiku, e ta revelá e puresa di motibunan (Efe. 6:5, Kol. 3:22). Na su turno, e término “sinseridat” (for di e eilikrineia griego) tambe ta indiká integridat i puresa di motibunan.

E korintionan no mester a duda den e klaridat di e intenshonnan di Pablo. E ta mustra bon kla ku su simplesa i sinseridat tin nan orígen den Dios. E idea akí ta bon kapturá dor di e New English Translation Bible, ku ta menshoná “motibunan puru i sinseridat ku ta bini di Dios” (2 Kor. 1:12, énfasis suministrá). Den e mesun versíkulo, Pablo ta afirmá mas aleu ku e kualidatnan ministerial akí ta ser duná na nos “pa medio di e grasia di Dios.”

Ta parse ku e oponentenan di Pablo a malinterpretá su palabranan, den komunikashonnan skirbí anterior (2 Kor. 1:13,14). Pablo ta garantisá ku su intenshonnan tabata kla i komprendibel. E tabata sigur ku e rektitut di su palabranan, intenshonnan i akshonnan lo a ser hasí kla “den e dia di Señor Hesus” (2 Kor. 1:14, NKJV).

Djamars

25 di ougùstùs

Kambiando Plannan pa Amor

Nos a mira ku algun hende na Korinto a duda Pablo su intenshonnan i amor. Awe, nos lo wak den un motibu partikular: su plannan di biahe ku ta kambia (2 Kor. 1:15-2:4).

Lesa 1 Korintionan 16:5-7. Kiko tabata e plan di biahe original di Pablo?

Pablo tabata na Korinto anteriormente. Di akuerdo ku 1 Korintionan 16:5,6 , el a plania pa pasa dor di Masedonia riba su kaminda bèk pa Korinto i, kisas, keda na Korinto pa wenter. For di Korinto, e lo a bai Judea ku e ofrenda rekohé pa e pobernan na Jerusalèm no solamente na Masedonia sino tambe na Achaia, Galatia i Asia. Sinembargo, el a kambia su plannan pa motibu di un mal informe ku Timoteo a trese for di Korinto (1 Kor. 4:17, 1 Kor. 16:10, 2 Kor. 1:1).

Pablo tabatin intenshon di bai stret for di Efeso pa Korinto i einan atendé e asuntunan reportá dor di Timoteo. E itinerario nobo lo tabata Efeso, Korinto, Masedonia, Korinto, Judea (2 Kor. 1:15,16). El a bai for di Efeso pa Korinto, pero despues el a regresá Efeso. Su plannan a kambia. E no a bai Korinto bèk manera planiá, a lo ménos no mesora, pasobra su último bishita no a bai bon. Asina, el a regresá Efeso i a skirbi nan en kambio. E lo a mas bien manda un karta ku riska empeorá kos ku un otro bishita (2 Kor. 2:1,3).

E intenshonnan di Pablo riba e último bishita a ser mal interpretá. Algun hende na Korinto a bisa ku e no tabata konfiabel i ku e no tabata stima nan sufisiente (2 Kor. 1:17). Den su reakshon riba e akusashonnan, el a move e bista di e korintionan pa e evangelio di Kristu. E tabata fiel na su intenshonnan pa bishitá e korintionan na e mihó oportunidat, meskos ku Dios tabata fiel den kumpli ku Su promesanan na nan atraves di Kristu (2 Kor. 1:18-22).

"Pasobra tur e promesanan di Dios den djE ta Sí, i den djE Amèn, pa e gloria di Dios atraves di nos" (2 Kor. 1:20, NKJV).

Pues, su kontesta no tabata un meskla konfuso di “sí” òf “nò” dependiente di e sirkunstansianan, manera nan a bisa, sino tabata “semper sí,” meskos ku e obra di Dios den Kristu ta “semper Sí” (2 Kor. 1:19, ESV).

P’esei, e motibu ku Pablo a skirbi un karta na e korintionan en bes di bishitá nan tabata su amor sinsero pa nan, no lo kontrario (2 Kor. 2:4). Un otro bishita nèt despues di e bishita doloroso lo a trese mas doló pa nan, no e goso ku e tabatin intenshon di kousa ku su presensia (2 Kor. 1:24, 2 Kor. 2:3). Kon fásil su bon intenshonnan a ser mal interpretá.

Djárason

26 di ougùstùs

Pordon i Reafirmashon di Amor

Mas bien ku bishitá e korintionan un di dos biaha, Pablo, despues di a regresá na Efeso, a manda loke a bira konosí komo “e karta severo” (lesa 2 Kor. 2:3,4; 2 Kor. 7:8,12).

Lesa 2 Korintionan 7:5-13. Kiko tabata e resultado di loke el a skirbi nan, i kiko tabata Pablo su reakshon pa motibu di e resultado ei?

Pablo i Tito a topa despues na Masedonia, kaminda Pablo a tende for di Tito e ekselente notisia ku su palabranan fuerte a kousa resultadonan positivo, loke a trese hopi goso den kurason di e apòstel. Si anteriormente, algun hende na korinto a posishoná nan mes kontra Pablo, awor e iglesia a bai na su banda. Kon importante ta pa sostené nos lidernan. Komo miembronan di iglesia nos por hasi nan trabou muchu mas fásil ku e ta.

Lesa 2 Korintionan 2:5-11. Kiko ta e idea sentral akinan?

E pasashi akí tin di haber ku un kaso di disiplina di iglesia. Eruditonan ta debatí si e ofensor akí ta e hòmber insestuoso di 1 Korintionan 5:1-5 òf un otro hende, un persona ku a influensiá otronan den iglesia den nan akusashon ku Pablo tabata inkonsistente i inkonsiderá ku nan den su desishonnan di biahe. E konteksto ta parse di ta faboresé e di dos opshon. En todo kaso, e siñansa mas importante di e pasashi ta tokante kon e iglesia mester trata ku un persona den piká.

E pasashi akí ta siña ku e propósito di disiplina di iglesia ta restourashon pa medio di pordon i atraves di reafirmashon di amor pa e pekador (2 Kor. 2:6-8,10). E pasashi ta insinuá tambe ku disiplina di iglesia por ta doloroso, ma e ta nesesario. Es desir, maske kon bon intenshoná nan por ta, i ta deseá di ta orientá na “grasia”, algun iglesia lo no por konfrontá òf dil ku piká flagrante òf asta públiko. Di otro banda, otronan por ta masha rígido, sin ta pordoná, i brutu. Piká mester ser atendé kuné, ma den amor. Pues, Pablo por a eksortá e iglesia pa reafirmá su amor pa e ofensor (2 Kor. 2:8) pasobra e mes tabata stima e iglesia (2 Kor. 2:4)!

Djaweps

27 di ougùstùs

Triunfo den Kristu

Lesa 2 Korintionan 2:12-13. Unda Pablo a bai despues di a skirbi “e karta severo” na nan? Kiko el a hasi einan?

Pablo su kurason tabata intrankil miéntras e tabata warda riba Tito (2 Kor. 7:5,6). Apesar di e intrankilidat ei, e no por a stòp di papia tokante Hesus (2 Kor. 2:12). E tabata stima Hesus asina tantu. Na e momento ei, ainda e no tabata sa e resultadonan di su karta. E tabata ansioso pa mira Tito i tende tokante e reakshon di e korintionan.

E trabou di Pablo na Troas tabata eksitoso, pero "e no por a keda einan largu. 'E kuido di tur e iglesianan,' i partikularmente di e iglesia na Korinto, tabata sosegá pisá riba su kurason. El a spera di topa Tito na Troas i di tende for di dje kon e palabranan di konseho i reprendementu, mandá na e rumannan korintio, a ser risibí, pero el a keda desepshoná. ‘Mi no tabatin sosiegu den mi spiritu,’ el a skirbi tokante e eksperensia akí, ‘pasobra mi no a haña Tito mi ruman.’ P’esei el a bandoná Troas i a krusa bai Masedonia, kaminda, na Filipos el a topa ku Timoteo."--Ellen G. White, The Acts of the Apostles, p. 323.

Lesa 2 Korintionan 2:14-17. Kiko tabata e reakshon di Pablo ora el a topa Tito na Masedonia i a tende tokante e reakshon positivo di e korintionan?

Den un ráfaga di goso, Pablo ta afirmá ku Dios “semper ta hiba nos den triunfo den Kristu” (2 Kor. 2:14, NKJV). Ki un deklarashon maravioso! Un kurason yená ku e presensia di Kristu ta plama “e fragansia di Su konosementu na tur kaminda” (2 Kor. 2:14, NKJV).

Pablo ta regosihá den Kristu pasobra e karta doloroso a duna e fruta ku e tabatin intenshon di kosechá (2 Kor. 7:5-9). Esaki ta un gran viktoria. Miéntrastantu, den 2 Korintionan 2:17, Pablo ta reafirmá su sinseridat komo apòstel di Kristu (2 Kor. 2:17, 2 Kor. 1:12). Di akuerdo ku e pasashi akí, loke ta distinguí un sirbidó fiel di Kristu for di un minister falsu ta ku miéntras ku e último ta bende e evangelio pa interes propio, e promé ta prediká e Palabra di Dios den amor di henter kurason pa Kristu.

Djabièrnè

28 di ougùstùs

Pa mas Estudio

Lesa Ellen G. White, "The Message Heeded," p. 323-334, den The Acts of the Apostles.

“Esnan ku a karga e tristesanan di mas grandi ta frekuentemente esnan ku ta karga e konsuelo di mas grandi pa otronan, tresiendo Solo unda ku nan bai. Esnan asina a ser purifiká i suavisá pa nan aflikshonnan; nan no a pèrdè konfiansa den Dios ora problema a ataká nan, ma a pega mas serka di Su amor protektor. E tipo di personanan ei ta prueba bibu di e tierno kuido di Dios.” G. White, God's Amazing Grace, p. 122.

“Un bida kristian konsagrá semper ta tira lus i konsuelo i pas. E ta ser karakterisá pa puresa, takto, simplesa i utilidat. E ta ser kontrolá pa e amor no egoista ei ku ta santifiká e influensia. E ta yen di Kristu, i ta laga un rastro di lus na unda ku su poseedor por bai.”—God’s Amazing Grace, p. 122.

"Apòstel Pablo a haña ta nesesario pa reprendé kos robes den iglesia, pero e no a pèrdè su dominio propio ora el a reprendé eror. E ta splika ansiosamente e motibu di su akshon. Kon kuidadosamente el a traha pa asina laga e impreshon ku e tabata un Amigu di esnan ku ta kometé eror! El a laga nan komprondé ku ta kost’é doló pa duna nan doló. El a laga e impreshon riba nan mente ku su interes tabata identifiká ku esun di nan."--Ellen G. White Comments, den The SDA Bible Commentary, tomo 6, p. 1094.

Preguntanan pa Diskushon:

Den 2 Korintionan 2:1-14, Pablo ta afirmá su integridat den ministerio. Dikon e kualidat ministerial akí ta asina krusial?

Kiko e echo ku Pablo a kambia su plan di biahe ta bisa nos tokante e nesesidat di fleksibilidat den ministerio kristian? Dikon ta importante pa ta habrí pa kambio ora ta nesesario?

Pablo a konfrontá angustia i ansiedat den su ministerio. Esaki ta mustra klaramente ku lidernan di iglesia ta sernan humano ku ta mes eksponé na angustia ku kualke otro hende. Kiko miembronan di iglesia por hasi pa fasilitá nan trabou?

Pablo ta referí na su intrankilidat (2 Kor. 2:13) nèt promé ku e menshoná su triunfo den Kristu (2 Kor. 2:14). Kon e por a papia tokante su debilidat i forsa na mes momento? Kon nos por?